Chapter 12

saṃjaya uvāca |
pīḍite dharmarāje tu madrarājena māriṣa |
sātyakirbhīmasenaśca mādrīputrau ca pāṇḍavau |
parivārya rathaiḥ śalyaṃ pīḍayāmāsurāhave || 1 ||
[Analyze grammar]

tamekaṃ bahubhirdṛṣṭvā pīḍyamānaṃ mahārathaiḥ |
sādhuvādo mahāñjajñe siddhāścāsanpraharṣitāḥ |
āścaryamityabhāṣanta munayaścāpi saṃgatāḥ || 2 ||
[Analyze grammar]

bhīmaseno raṇe śalyaṃ śalyabhūtaṃ parākrame |
ekena viddhvā bāṇena punarvivyādha saptabhiḥ || 3 ||
[Analyze grammar]

sātyakiśca śatenainaṃ dharmaputraparīpsayā |
madreśvaramavākīrya siṃhanādamathānadat || 4 ||
[Analyze grammar]

nakulaḥ pañcabhiścainaṃ sahadevaśca saptabhiḥ |
viddhvā taṃ tu tatastūrṇaṃ punarvivyādha saptabhiḥ || 5 ||
[Analyze grammar]

sa tu śūro raṇe yattaḥ pīḍitastairmahārathaiḥ |
vikṛṣya kārmukaṃ ghoraṃ vegaghnaṃ bhārasādhanam || 6 ||
[Analyze grammar]

sātyakiṃ pañcaviṃśatyā śalyo vivyādha māriṣa |
bhīmasenaṃ trisaptatyā nakulaṃ saptabhistathā || 7 ||
[Analyze grammar]

tataḥ saviśikhaṃ cāpaṃ sahadevasya dhanvinaḥ |
chittvā bhallena samare vivyādhainaṃ trisaptabhiḥ || 8 ||
[Analyze grammar]

sahadevastu samare mātulaṃ bhūrivarcasam |
sajyamanyaddhanuḥ kṛtvā pañcabhiḥ samatāḍayat |
śarairāśīviṣākārairjvalajjvalanasaṃnibhaiḥ || 9 ||
[Analyze grammar]

sārathiṃ cāsya samare śareṇānataparvaṇā |
vivyādha bhṛśasaṃkruddhastaṃ ca bhūyastribhiḥ śaraiḥ || 10 ||
[Analyze grammar]

bhīmasenastrisaptatyā sātyakirnavabhiḥ śaraiḥ |
dharmarājastathā ṣaṣṭyā gātre śalyaṃ samarpayat || 11 ||
[Analyze grammar]

tataḥ śalyo mahārāja nirviddhastairmahārathaiḥ |
susrāva rudhiraṃ gātrairgairikaṃ parvato yathā || 12 ||
[Analyze grammar]

tāṃśca sarvānmaheṣvāsānpañcabhiḥ pañcabhiḥ śaraiḥ |
vivyādha tarasā rājaṃstadadbhutamivābhavat || 13 ||
[Analyze grammar]

tato'pareṇa bhallena dharmaputrasya māriṣa |
dhanuściccheda samare sajyaṃ sa sumahārathaḥ || 14 ||
[Analyze grammar]

athānyaddhanurādāya dharmaputro mahārathaḥ |
sāśvasūtadhvajarathaṃ śalyaṃ prācchādayaccharaiḥ || 15 ||
[Analyze grammar]

sa cchādyamānaḥ samare dharmaputrasya sāyakaiḥ |
yudhiṣṭhiramathāvidhyaddaśabhirniśitaiḥ śaraiḥ || 16 ||
[Analyze grammar]

sātyakistu tataḥ kruddho dharmaputre śarārdite |
madrāṇāmadhipaṃ śūraṃ śaraughaiḥ samavārayat || 17 ||
[Analyze grammar]

sa sātyakeḥ praciccheda kṣurapreṇa mahaddhanuḥ |
bhīmasenamukhāṃstāṃśca tribhistribhiratāḍayat || 18 ||
[Analyze grammar]

tasya kruddho mahārāja sātyakiḥ satyavikramaḥ |
tomaraṃ preṣayāmāsa svarṇadaṇḍaṃ mahādhanam || 19 ||
[Analyze grammar]

bhīmaseno'tha nārācaṃ jvalantamiva pannagam |
nakulaḥ samare śaktiṃ sahadevo gadāṃ śubhām |
dharmarājaḥ śataghnīṃ tu jighāṃsuḥ śalyamāhave || 20 ||
[Analyze grammar]

tānāpatata evāśu pañcānāṃ vai bhujacyutān |
sātyakiprahitaṃ śalyo bhallaiściccheda tomaram || 21 ||
[Analyze grammar]

bhīmena prahitaṃ cāpi śaraṃ kanakabhūṣaṇam |
dvidhā ciccheda samare kṛtahastaḥ pratāpavān || 22 ||
[Analyze grammar]

nakulapreṣitāṃ śaktiṃ hemadaṇḍāṃ bhayāvahām |
gadāṃ ca sahadevena śaraughaiḥ samavārayat || 23 ||
[Analyze grammar]

śarābhyāṃ ca śataghnīṃ tāṃ rājñaściccheda bhārata |
paśyatāṃ pāṇḍuputrāṇāṃ siṃhanādaṃ nanāda ca |
nāmṛṣyattaṃ tu śaineyaḥ śatrorvijayamāhave || 24 ||
[Analyze grammar]

athānyaddhanurādāya sātyakiḥ krodhamūrchitaḥ |
dvābhyāṃ madreśvaraṃ viddhvā sārathiṃ ca tribhiḥ śaraiḥ || 25 ||
[Analyze grammar]

tataḥ śalyo mahārāja sarvāṃstāndaśabhiḥ śaraiḥ |
vivyādha subhṛśaṃ kruddhastottrairiva mahādvipān || 26 ||
[Analyze grammar]

te vāryamāṇāḥ samare madrarājñā mahārathāḥ |
na śekuḥ pramukhe sthātuṃ tasya śatruniṣūdanāḥ || 27 ||
[Analyze grammar]

tato duryodhano rājā dṛṣṭvā śalyasya vikramam |
nihatānpāṇḍavānmene pāñcālānatha sṛñjayān || 28 ||
[Analyze grammar]

tato rājanmahābāhurbhīmasenaḥ pratāpavān |
saṃtyajya manasā prāṇānmadrādhipamayodhayat || 29 ||
[Analyze grammar]

nakulaḥ sahadevaśca sātyakiśca mahārathaḥ |
parivārya tadā śalyaṃ samantādvyakirañśaraiḥ || 30 ||
[Analyze grammar]

sa caturbhirmaheṣvāsaiḥ pāṇḍavānāṃ mahārathaiḥ |
vṛtastānyodhayāmāsa madrarājaḥ pratāpavān || 31 ||
[Analyze grammar]

tasya dharmasuto rājankṣurapreṇa mahāhave |
cakrarakṣaṃ jaghānāśu madrarājasya pārthiva || 32 ||
[Analyze grammar]

tasmiṃstu nihate śūre cakrarakṣe mahārathe |
madrarājo'tibalavānsainikānāstṛṇoccharaiḥ || 33 ||
[Analyze grammar]

samācchannāṃstatastāṃstu rājanvīkṣya sa sainikān |
cintayāmāsa samare dharmarājo yudhiṣṭhiraḥ || 34 ||
[Analyze grammar]

kathaṃ nu na bhavetsatyaṃ tanmādhavavaco mahat |
na hi kruddho raṇe rājā kṣapayeta balaṃ mama || 35 ||
[Analyze grammar]

tataḥ sarathanāgāśvāḥ pāṇḍavāḥ pāṇḍupūrvaja |
madreśvaraṃ samāseduḥ pīḍayantaḥ samantataḥ || 36 ||
[Analyze grammar]

nānāśastraughabahulāṃ śastravṛṣṭiṃ samutthitām |
vyadhamatsamare rājanmahābhrāṇīva mārutaḥ || 37 ||
[Analyze grammar]

tataḥ kanakapuṅkhāṃ tāṃ śalyakṣiptāṃ viyadgatām |
śaravṛṣṭimapaśyāma śalabhānāmivātatim || 38 ||
[Analyze grammar]

te śarā madrarājena preṣitā raṇamūrdhani |
saṃpatantaḥ sma dṛśyante śalabhānāṃ vrajā iva || 39 ||
[Analyze grammar]

madrarājadhanurmuktaiḥ śaraiḥ kanakabhūṣaṇaiḥ |
nirantaramivākāśaṃ saṃbabhūva janādhipa || 40 ||
[Analyze grammar]

na pāṇḍavānāṃ nāsmākaṃ tatra kaścidvyadṛśyata |
bāṇāndhakāre mahati kṛte tatra mahābhaye || 41 ||
[Analyze grammar]

madrarājena balinā lāghavāccharavṛṣṭibhiḥ |
loḍyamānaṃ tathā dṛṣṭvā pāṇḍavānāṃ balārṇavam |
vismayaṃ paramaṃ jagmurdevagandharvadānavāḥ || 42 ||
[Analyze grammar]

sa tu tānsarvato yattāñśaraiḥ saṃpīḍya māriṣa |
dharmarājamavacchādya siṃhavadvyanadanmuhuḥ || 43 ||
[Analyze grammar]

te channāḥ samare tena pāṇḍavānāṃ mahārathāḥ |
na śekustaṃ tadā yuddhe pratyudyātuṃ mahāratham || 44 ||
[Analyze grammar]

dharmarājapurogāstu bhīmasenamukhā rathāḥ |
na jahuḥ samare śūraṃ śalyamāhavaśobhinam || 45 ||
[Analyze grammar]