Chapter 14

saṃjaya uvāca |
duryodhano mahārāja dhṛṣṭadyumnaśca pārṣataḥ |
cakratuḥ sumahadyuddhaṃ śaraśaktisamākulam || 1 ||
[Analyze grammar]

tayorāsanmahārāja śaradhārāḥ sahasraśaḥ |
ambudānāṃ yathā kāle jaladhārāḥ samantataḥ || 2 ||
[Analyze grammar]

rājā tu pārṣataṃ viddhvā śaraiḥ pañcabhirāyasaiḥ |
droṇahantāramugreṣuḥ punarvivyādha saptabhiḥ || 3 ||
[Analyze grammar]

dhṛṣṭadyumnastu samare balavāndṛḍhavikramaḥ |
saptatyā viśikhānāṃ vai duryodhanamapīḍayat || 4 ||
[Analyze grammar]

pīḍitaṃ prekṣya rājānaṃ sodaryā bharatarṣabha |
mahatyā senayā sārdhaṃ parivavruḥ sma pārṣatam || 5 ||
[Analyze grammar]

sa taiḥ parivṛtaḥ śūraiḥ sarvato'tirathairbhṛśam |
vyacaratsamare rājandarśayanhastalāghavam || 6 ||
[Analyze grammar]

śikhaṇḍī kṛtavarmāṇaṃ gautamaṃ ca mahāratham |
prabhadrakaiḥ samāyukto yodhayāmāsa dhanvinau || 7 ||
[Analyze grammar]

tatrāpi sumahadyuddhaṃ ghorarūpaṃ viśāṃ pate |
prāṇānsaṃtyajatāṃ yuddhe prāṇadyūtābhidevane || 8 ||
[Analyze grammar]

śalyastu śaravarṣāṇi vimuñcansarvatodiśam |
pāṇḍavānpīḍayāmāsa sasātyakivṛkodarān || 9 ||
[Analyze grammar]

tathobhau ca yamau yuddhe yamatulyaparākramau |
yodhayāmāsa rājendra vīryeṇa ca balena ca || 10 ||
[Analyze grammar]

śalyasāyakanunnānāṃ pāṇḍavānāṃ mahāmṛdhe |
trātāraṃ nādhyagacchanta kecittatra mahārathāḥ || 11 ||
[Analyze grammar]

tatastu nakulaḥ śūro dharmarāje prapīḍite |
abhidudrāva vegena mātulaṃ mādrinandanaḥ || 12 ||
[Analyze grammar]

saṃchādya samare śalyaṃ nakulaḥ paravīrahā |
vivyādha cainaṃ daśabhiḥ smayamānaḥ stanāntare || 13 ||
[Analyze grammar]

sarvapāraśavairbāṇaiḥ karmāraparimārjitaiḥ |
svarṇapuṅkhaiḥ śilādhautairdhanuryantrapracoditaiḥ || 14 ||
[Analyze grammar]

śalyastu pīḍitastena svasrīyeṇa mahātmanā |
nakulaṃ pīḍayāmāsa patribhirnataparvabhiḥ || 15 ||
[Analyze grammar]

tato yudhiṣṭhiro rājā bhīmaseno'tha sātyakiḥ |
sahadevaśca mādreyo madrarājamupādravan || 16 ||
[Analyze grammar]

tānāpatata evāśu pūrayānānrathasvanaiḥ |
diśaśca pradiśaścaiva kampayānāṃśca medinīm |
pratijagrāha samare senāpatiramitrajit || 17 ||
[Analyze grammar]

yudhiṣṭhiraṃ tribhirviddhvā bhīmasenaṃ ca saptabhiḥ |
sātyakiṃ ca śatenājau sahadevaṃ tribhiḥ śaraiḥ || 18 ||
[Analyze grammar]

tatastu saśaraṃ cāpaṃ nakulasya mahātmanaḥ |
madreśvaraḥ kṣurapreṇa tadā ciccheda māriṣa |
tadaśīryata vicchinnaṃ dhanuḥ śalyasya sāyakaiḥ || 19 ||
[Analyze grammar]

athānyaddhanurādāya mādrīputro mahārathaḥ |
madrarājarathaṃ tūrṇaṃ pūrayāmāsa patribhiḥ || 20 ||
[Analyze grammar]

yudhiṣṭhirastu madreśaṃ sahadevaśca māriṣa |
daśabhirdaśabhirbāṇairurasyenamavidhyatām || 21 ||
[Analyze grammar]

bhīmasenastataḥ ṣaṣṭyā sātyakirnavabhiḥ śaraiḥ |
madrarājamabhidrutya jaghnatuḥ kaṅkapatribhiḥ || 22 ||
[Analyze grammar]

madrarājastataḥ kruddhaḥ sātyakiṃ navabhiḥ śaraiḥ |
vivyādha bhūyaḥ saptatyā śarāṇāṃ nataparvaṇām || 23 ||
[Analyze grammar]

athāsya saśaraṃ cāpaṃ muṣṭau ciccheda māriṣa |
hayāṃśca caturaḥ saṃkhye preṣayāmāsa mṛtyave || 24 ||
[Analyze grammar]

virathaṃ sātyakiṃ kṛtvā madrarājo mahābalaḥ |
viśikhānāṃ śatenainamājaghāna samantataḥ || 25 ||
[Analyze grammar]

mādrīputrau tu saṃrabdhau bhīmasenaṃ ca pāṇḍavam |
yudhiṣṭhiraṃ ca kauravya vivyādha daśabhiḥ śaraiḥ || 26 ||
[Analyze grammar]

tatrādbhutamapaśyāma madrarājasya pauruṣam |
yadenaṃ sahitāḥ pārthā nābhyavartanta saṃyuge || 27 ||
[Analyze grammar]

athānyaṃ rathamāsthāya sātyakiḥ satyavikramaḥ |
pīḍitānpāṇḍavāndṛṣṭvā madrarājavaśaṃ gatān |
abhidudrāva vegena madrāṇāmadhipaṃ balī || 28 ||
[Analyze grammar]

āpatantaṃ rathaṃ tasya śalyaḥ samitiśobhanaḥ |
pratyudyayau rathenaiva matto mattamiva dvipam || 29 ||
[Analyze grammar]

sa saṃnipātastumulo babhūvādbhutadarśanaḥ |
sātyakeścaiva śūrasya madrāṇāmadhipasya ca |
yādṛśo vai purā vṛttaḥ śambarāmararājayoḥ || 30 ||
[Analyze grammar]

sātyakiḥ prekṣya samare madrarājaṃ vyavasthitam |
vivyādha daśabhirbāṇaistiṣṭha tiṣṭheti cābravīt || 31 ||
[Analyze grammar]

madrarājastu subhṛśaṃ viddhastena mahātmanā |
sātyakiṃ prativivyādha citrapuṅkhaiḥ śitaiḥ śaraiḥ || 32 ||
[Analyze grammar]

tataḥ pārthā maheṣvāsāḥ sātvatābhisṛtaṃ nṛpam |
abhyadravanrathaistūrṇaṃ mātulaṃ vadhakāmyayā || 33 ||
[Analyze grammar]

tata āsītparāmardastumulaḥ śoṇitodakaḥ |
śūrāṇāṃ yudhyamānānāṃ siṃhānāmiva nardatām || 34 ||
[Analyze grammar]

teṣāmāsīnmahārāja vyatikṣepaḥ parasparam |
siṃhānāmāmiṣepsūnāṃ kūjatāmiva saṃyuge || 35 ||
[Analyze grammar]

teṣāṃ bāṇasahasraughairākīrṇā vasudhābhavat |
antarikṣaṃ ca sahasā bāṇabhūtamabhūttadā || 36 ||
[Analyze grammar]

śarāndhakāraṃ bahudhā kṛtaṃ tatra samantataḥ |
abhracchāyeva saṃjajñe śarairmuktairmahātmabhiḥ || 37 ||
[Analyze grammar]

tatra rājañśarairmuktairnirmuktairiva pannagaiḥ |
svarṇapuṅkhaiḥ prakāśadbhirvyarocanta diśastathā || 38 ||
[Analyze grammar]

tatrādbhutaṃ paraṃ cakre śalyaḥ śatrunibarhaṇaḥ |
yadekaḥ samare śūro yodhayāmāsa vai bahūn || 39 ||
[Analyze grammar]

madrarājabhujotsṛṣṭaiḥ kaṅkabarhiṇavājitaiḥ |
saṃpatadbhiḥ śarairghorairavākīryata medinī || 40 ||
[Analyze grammar]

tatra śalyarathaṃ rājanvicarantaṃ mahāhave |
apaśyāma yathā pūrvaṃ śakrasyāsurasaṃkṣaye || 41 ||
[Analyze grammar]