Chapter 12

dhṛtarāṣṭra uvāca |
yathā saṃśaptakaiḥ sārdhamarjunasyābhavadraṇaḥ |
anyeṣāṃ ca madīyānāṃ pāṇḍavaistadbravīhi me || 1 ||
[Analyze grammar]

saṃjaya uvāca |
śṛṇu rājanyathāvṛttaṃ saṃgrāmaṃ bruvato mama |
vīrāṇāṃ śatrubhiḥ sārdhaṃ dehapāpmapraṇāśanam || 2 ||
[Analyze grammar]

pārthaḥ saṃśaptakagaṇaṃ praviśyārṇavasaṃnibham |
vyakṣobhayadamitraghno mahāvāta ivārṇavam || 3 ||
[Analyze grammar]

śirāṃsyunmathya vīrāṇāṃ śitairbhallairdhanaṃjayaḥ |
pūrṇacandrābhavaktrāṇi svakṣibhrūdaśanāni ca |
saṃtastāra kṣitiṃ kṣipraṃ vinālairnalinairiva || 4 ||
[Analyze grammar]

suvṛttānāyatānpuṣṭāṃścandanāgurubhūṣitān |
sāyudhānsatanutrāṇānpañcāsyoragasaṃnibhān |
bāhūnkṣurairamitrāṇāṃ vicakartārjuno raṇe || 5 ||
[Analyze grammar]

dhuryāndhuryatarānsūtāndhvajāṃścāpāni sāyakān |
pāṇīnaratnīnasakṛdbhallaiściccheda pāṇḍavaḥ || 6 ||
[Analyze grammar]

dvipānhayānrathāṃścaiva sārohānarjuno raṇe |
śarairanekasāhasrai rājanninye yamakṣayam || 7 ||
[Analyze grammar]

taṃ pravīraṃ pratīyātā nardamānā ivarṣabhāḥ |
vāśitārthamabhikruddhā huṃkṛtvā cābhidudruvuḥ |
nighnantamabhijaghnuste śaraiḥ śṛṅgairivarṣabhāḥ || 8 ||
[Analyze grammar]

tasya teṣāṃ ca tadyuddhamabhavallomaharṣaṇam |
trailokyavijaye yādṛgdaityānāṃ saha vajriṇā || 9 ||
[Analyze grammar]

astrairastrāṇi saṃvārya dviṣatāṃ sarvato'rjunaḥ |
iṣubhirbahubhistūrṇaṃ viddhvā prāṇānrarāsa saḥ || 10 ||
[Analyze grammar]

chinnatriveṇucakrākṣānhatayodhāśvasārathīn |
vidhvastāyudhatūṇīrānsamunmathitaketanān || 11 ||
[Analyze grammar]

saṃchinnayoktraraśmīkānvitriveṇūnvikūbarān |
vidhvastabandhurayugānviśastāyudhamaṇḍalān |
rathānviśakalīkurvanmahābhrāṇīva mārutaḥ || 12 ||
[Analyze grammar]

vismāpayanprekṣaṇīyaṃ dviṣātāṃ bhayavardhanam |
mahārathasahasrasya samaṃ karmārjuno'karot || 13 ||
[Analyze grammar]

siddhadevarṣisaṃghāśca cāraṇāścaiva tuṣṭuvuḥ |
devadundubhayo neduḥ puṣpavarṣāṇi cāpatan |
keśavārjunayormūrdhni prāha vākcāśarīriṇī || 14 ||
[Analyze grammar]

candrārkānilavahnīnāṃ kāntidīptibaladyutīḥ |
yau sadā bibhraturvīrau tāvimau keśavārjunau || 15 ||
[Analyze grammar]

brahmeśānāvivājayyau vīrāvekarathe sthitau |
sarvabhūtavarau vīrau naranārāyaṇāvubhau || 16 ||
[Analyze grammar]

ityetanmahadāścaryaṃ dṛṣṭvā śrutvā ca bhārata |
aśvatthāmā susaṃyattaḥ kṛṣṇāvabhyadravadraṇe || 17 ||
[Analyze grammar]

atha pāṇḍavamasyantaṃ yamakālāntakāñśarān |
seṣuṇā pāṇināhūya hasandrauṇirathābravīt || 18 ||
[Analyze grammar]

yadi māṃ manyase vīra prāptamarhamivātithim |
tataḥ sarvātmanādya tvaṃ yuddhātithyaṃ prayaccha me || 19 ||
[Analyze grammar]

evamācāryaputreṇa samāhūto yuyutsayā |
bahu mene'rjuno''tmānamidaṃ cāha janārdanam || 20 ||
[Analyze grammar]

saṃśaptakāśca me vadhyā drauṇirāhvayate ca mām |
yadatrānantaraṃ prāptaṃ praśādhi tvaṃ mahābhuja || 21 ||
[Analyze grammar]

evamukto'vahatpārthaṃ kṛṣṇo droṇātmajāntikam |
jaitreṇa vidhināhūtaṃ vāyurindramivādhvare || 22 ||
[Analyze grammar]

tamāmantryaikamanasā keśavo drauṇimabravīt |
aśvatthāmansthiro bhūtvā praharāśu sahasva ca || 23 ||
[Analyze grammar]

nirveṣṭuṃ bhartṛpiṇḍaṃ hi kālo'yamupajīvinām |
sūkṣmo vivādo viprāṇāṃ sthūlau kṣātrau jayājayau || 24 ||
[Analyze grammar]

yāṃ na saṃkṣamase mohāddivyāṃ pārthasya satkriyām |
tāmāptumicchanyudhyasva sthiro bhūtvādya pāṇḍavam || 25 ||
[Analyze grammar]

ityukto vāsudevena tathetyuktvā dvijottamaḥ |
vivyādha keśavaṃ ṣaṣṭyā nārācairarjunaṃ tribhiḥ || 26 ||
[Analyze grammar]

tasyārjunaḥ susaṃkruddhastribhirbhallaiḥ śarāsanam |
cicchedāthānyadādatta drauṇirghorataraṃ dhanuḥ || 27 ||
[Analyze grammar]

sajyaṃ kṛtvā nimeṣāttadvivyādhārjunakeśavau |
tribhiḥ śarairvāsudevaṃ sahasreṇa ca pāṇḍavam || 28 ||
[Analyze grammar]

tataḥ śarasahasrāṇi prayutānyarbudāni ca |
sasṛje drauṇirāyastaḥ saṃstabhya ca raṇe'rjunam || 29 ||
[Analyze grammar]

iṣudherdhanuṣo jyāyā aṅgulībhyaśca māriṣa |
bāhvoḥ karābhyāmuraso vadanaghrāṇanetrataḥ || 30 ||
[Analyze grammar]

karṇābhyāṃ śiraso'ṅgebhyo lomavartmabhya eva ca |
rathadhvajebhyaśca śarā niṣpeturbrahmavādinaḥ || 31 ||
[Analyze grammar]

śarajālena mahatā viddhvā keśavapāṇḍavau |
nanāda mudito drauṇirmahāmeghaughanisvanaḥ || 32 ||
[Analyze grammar]

tasya nānadataḥ śrutvā pāṇḍavo'cyutamabravīt |
paśya mādhava daurātmyaṃ droṇaputrasya māṃ prati || 33 ||
[Analyze grammar]

vadhaprāptau manyate nau praveśya śaraveśmani |
eṣo'sya hanmi saṃkalpaṃ śikṣayā ca balena ca || 34 ||
[Analyze grammar]

aśvatthāmnaḥ śarānastāṃśchittvaikaikaṃ tridhā tridhā |
vyadhamadbharataśreṣṭho nīhāramiva mārutaḥ || 35 ||
[Analyze grammar]

tataḥ saṃśaptakānbhūyaḥ sāśvasūtarathadvipān |
dhvajapattigaṇānugrairbāṇairvivyādha pāṇḍavaḥ || 36 ||
[Analyze grammar]

ye ye dadṛśire tatra yadyadrūpaṃ yathā yathā |
te te tattaccharairvyāptaṃ menire''tmānameva ca || 37 ||
[Analyze grammar]

te gāṇḍīvapraṇuditā nānārūpāḥ patatriṇaḥ |
krośe sāgre sthitānghnanti dvipāṃśca puruṣānraṇe || 38 ||
[Analyze grammar]

bhallaiśchinnāḥ karāḥ petuḥ kariṇāṃ madakarṣiṇām |
chinnā yathā paraśubhiḥ pravṛddhāḥ śaradi drumāḥ || 39 ||
[Analyze grammar]

paścāttu śailavatpetuste gajāḥ saha sādibhiḥ |
vajrivajrapramathitā yathaivādricayāstathā || 40 ||
[Analyze grammar]

gandharvanagarākārānvidhivatkalpitānrathān |
vinītajavanānyuktānāsthitānyuddhadurmadān || 41 ||
[Analyze grammar]

śarairviśakalīkurvannamitrānabhyavīvṛṣat |
alaṃkṛtānaśvasādīnpattīṃścāhandhanaṃjayaḥ || 42 ||
[Analyze grammar]

dhanaṃjayayugāntārkaḥ saṃśaptakamahārṇavam |
vyaśoṣayata duḥśoṣaṃ tīvraiḥ śaragabhastibhiḥ || 43 ||
[Analyze grammar]

punardrauṇimahāśailaṃ nārācaiḥ sūryasaṃnibhaiḥ |
nirbibheda mahāvegaistvaranvajrīva parvatam || 44 ||
[Analyze grammar]

tamācāryasutaḥ kruddhaḥ sāśvayantāramāśugaiḥ |
yuyutsurnāśakadyoddhuṃ pārthastānantarācchinat || 45 ||
[Analyze grammar]

tataḥ paramasaṃkruddhaḥ kāṇḍakośānavāsṛjat |
aśvatthāmābhirūpāya gṛhānatithaye yathā || 46 ||
[Analyze grammar]

atha saṃśaptakāṃstyaktvā pāṇḍavo drauṇimabhyayāt |
apāṅkteyamiva tyaktvā dātā pāṅkteyamarthinam || 47 ||
[Analyze grammar]

tataḥ samabhavadyuddhaṃ śukrāṅgirasavarcasoḥ |
nakṣatramabhito vyomni śukrāṅgirasayoriva || 48 ||
[Analyze grammar]

saṃtāpayantāvanyonyaṃ dīptaiḥ śaragabhastibhiḥ |
lokatrāsakarāvāstāṃ vimārgasthau grahāviva || 49 ||
[Analyze grammar]

tato'vidhyadbhruvormadhye nārācenārjuno bhṛśam |
sa tena vibabhau drauṇirūrdhvaraśmiryathā raviḥ || 50 ||
[Analyze grammar]

atha kṛṣṇau śaraśatairaśvatthāmnārditau bhṛśam |
saraśmijālanikarau yugāntārkāvivāsatuḥ || 51 ||
[Analyze grammar]

tato'rjunaḥ sarvatodhāramastramavāsṛjadvāsudevābhiguptaḥ |
drauṇāyaniṃ cābhyahanatpṛṣatkairvajrāgnivaivasvatadaṇḍakalpaiḥ || 52 ||
[Analyze grammar]

sa keśavaṃ cārjunaṃ cātitejā vivyādha marmasvatiraudrakarmā |
bāṇaiḥ sumuktairatitīvravegairyairāhato mṛtyurapi vyatheta || 53 ||
[Analyze grammar]

drauṇeriṣūnarjunaḥ saṃnivārya vyāyacchatastaddviguṇaiḥ supuṅkhaiḥ |
taṃ sāśvasūtadhvajamekavīramāvṛtya saṃśaptakasainyamārchat || 54 ||
[Analyze grammar]

dhanūṃṣi bāṇāniṣudhīrdhanurjyāḥ pāṇīnbhujānpāṇigataṃ ca śastram |
chatrāṇi ketūṃsturagānathaiṣāṃ vastrāṇi mālyānyatha bhūṣaṇāni || 55 ||
[Analyze grammar]

carmāṇi varmāṇi manorathāṃśca priyāṇi sarvāṇi śirāṃsi caiva |
ciccheda pārtho dviṣatāṃ pramuktairbāṇaiḥ sthitānāmaparāṅmukhānām || 56 ||
[Analyze grammar]

sukalpitāḥ syandanavājināgāḥ samāsthitāḥ kṛtayatnairnṛvīraiḥ |
pārtheritairbāṇagaṇairnirastāstaireva sārdhaṃ nṛvarairnipetuḥ || 57 ||
[Analyze grammar]

padmārkapūrṇendusamānanāni kirīṭamālāmukuṭotkaṭāni |
bhallārdhacandrakṣurahiṃsitāni prapetururvyāṃ nṛśirāṃsyajasram || 58 ||
[Analyze grammar]

atha dvipairdevapatidvipābhairdevāridarpolbaṇamanyudarpaiḥ |
kaliṅgavaṅgāṅganiṣādavīrā jighāṃsavaḥ pāṇḍavamabhyadhāvan || 59 ||
[Analyze grammar]

teṣāṃ dvipānāṃ vicakarta pārtho varmāṇi marmāṇi karānniyantṝn |
dhvajāḥ patākāśca tataḥ prapeturvajrāhatānīva gireḥ śirāṃsi || 60 ||
[Analyze grammar]

teṣu prarugṇeṣu gurostanūjaṃ bāṇaiḥ kirīṭī navasūryavarṇaiḥ |
pracchādayāmāsa mahābhrajālairvāyuḥ samudyuktamivāṃśumantam || 61 ||
[Analyze grammar]

tato'rjuneṣūniṣubhirnirasya drauṇiḥ śarairarjunavāsudevau |
pracchādayitva divi candrasūryau nanāda so'mbhoda ivātapānte || 62 ||
[Analyze grammar]

tamarjunastāṃśca punastvadīyānabhyarditastairavikṛttaśastraiḥ |
bāṇāndhakāraṃ sahasaiva kṛtvā vivyādha sarvāniṣubhiḥ supuṅkhaiḥ || 63 ||
[Analyze grammar]

nāpyādadatsaṃdadhannaiva muñcanbāṇānraṇe'dṛśyata savyasācī |
hatāṃśca nāgāṃsturagānpadātīnsaṃsyūtadehāndadṛśū rathāṃśca || 64 ||
[Analyze grammar]

saṃdhāya nārācavarāndaśāśu drauṇistvarannekamivotsasarja |
teṣāṃ ca pañcārjunamabhyavidhyanpañcācyutaṃ nirbibhiduḥ sumuktāḥ || 65 ||
[Analyze grammar]

tairāhatau sarvamanuṣyamukhyāvasṛkkṣarantau dhanadendrakalpau |
samāptavidyena yathābhibhūtau hatau svidetau kimu menire'nye || 66 ||
[Analyze grammar]

athārjunaṃ prāha daśārhanāthaḥ pramādyase kiṃ jahi yodhametam |
kuryāddhi doṣaṃ samupekṣito'sau kaṣṭo bhavedvyādhirivākriyāvān || 67 ||
[Analyze grammar]

tatheti coktvācyutamapramādī drauṇiṃ prayatnādiṣubhistatakṣa |
chittvāśvaraśmīṃsturagānavidhyatte taṃ raṇādūhuratīva dūram || 68 ||
[Analyze grammar]

āvṛtya neyeṣa punastu yuddhaṃ pārthena sārdhaṃ matimānvimṛśya |
jānañjayaṃ niyataṃ vṛṣṇivīre dhanaṃjaye cāṅgirasāṃ variṣṭhaḥ || 69 ||
[Analyze grammar]

pratīpakāye tu raṇādaśvatthāmni hṛte hayaiḥ |
mantrauṣadhikriyādānairvyādhau dehādivāhṛte || 70 ||
[Analyze grammar]

saṃśaptakānabhimukhau prayātau keśavārjunau |
vātoddhūtapatākena syandanenaughanādinā || 71 ||
[Analyze grammar]