Chapter 11

saṃjaya uvāca |
bhīmasenaṃ tato drauṇī rājanvivyādha patriṇā |
tvarayā parayā yukto darśayannastralāghavam || 1 ||
[Analyze grammar]

athainaṃ punarājaghne navatyā niśitaiḥ śaraiḥ |
sarvamarmāṇi saṃprekṣya marmajño laghuhastavat || 2 ||
[Analyze grammar]

bhīmasenaḥ samākīrṇo drauṇinā niśitaiḥ śaraiḥ |
rarāja samare rājanraśmivāniva bhāskaraḥ || 3 ||
[Analyze grammar]

tataḥ śarasahasreṇa suprayuktena pāṇḍavaḥ |
droṇaputramavacchādya siṃhanādamamuñcata || 4 ||
[Analyze grammar]

śaraiḥ śarāṃstato drauṇiḥ saṃvārya yudhi pāṇḍavam |
lalāṭe'bhyahanadrājannārācena smayanniva || 5 ||
[Analyze grammar]

lalāṭasthaṃ tato bāṇaṃ dhārayāmāsa pāṇḍavaḥ |
yathā śṛṅgaṃ vane dṛptaḥ khaḍgo dhārayate nṛpa || 6 ||
[Analyze grammar]

tato drauṇiṃ raṇe bhīmo yatamānaṃ parākramī |
tribhirvivyādha nārācairlalāṭe vismayanniva || 7 ||
[Analyze grammar]

lalāṭasthaistato bāṇairbrāhmaṇaḥ sa vyarocata |
prāvṛṣīva yathā siktastriśṛṅgaḥ parvatottamaḥ || 8 ||
[Analyze grammar]

tataḥ śaraśatairdrauṇimardayāmāsa pāṇḍavaḥ |
na cainaṃ kampayāmāsa mātariśveva parvatam || 9 ||
[Analyze grammar]

tathaiva pāṇḍavaṃ yuddhe drauṇiḥ śaraśataiḥ śitaiḥ |
nākampayata saṃhṛṣṭo vāryogha iva parvatam || 10 ||
[Analyze grammar]

tāvanyonyaṃ śarairghoraiśchādayānau mahārathau |
rathacaryāgatau śūrau śuśubhāte raṇotkaṭau || 11 ||
[Analyze grammar]

ādityāviva saṃdīptau lokakṣayakarāvubhau |
svaraśmibhirivānyonyaṃ tāpayantau śarottamaiḥ || 12 ||
[Analyze grammar]

kṛtapratikṛte yatnaṃ kurvāṇau ca mahāraṇe |
kṛtapratikṛte yatnaṃ cakrāte tāvabhītavat || 13 ||
[Analyze grammar]

vyāghrāviva ca saṃgrāme ceratustau mahārathau |
śaradaṃṣṭrau durādharṣau cāpavyāttau bhayānakau || 14 ||
[Analyze grammar]

abhūtāṃ tāvadṛśyau ca śarajālaiḥ samantataḥ |
meghajālairiva cchannau gagane candrabhāskarau || 15 ||
[Analyze grammar]

prakāśau ca muhūrtena tatraivāstāmariṃdamau |
vimuktau meghajālena śaśisūryau yathā divi || 16 ||
[Analyze grammar]

apasavyaṃ tataścakre drauṇistatra vṛkodaram |
kirañśaraśatairugrairdhārābhiriva parvatam || 17 ||
[Analyze grammar]

na tu tanmamṛṣe bhīmaḥ śatrorvijayalakṣaṇam |
praticakre ca taṃ rājanpāṇḍavo'pyapasavyataḥ || 18 ||
[Analyze grammar]

maṇḍalānāṃ vibhāgeṣu gatapratyāgateṣu ca |
babhūva tumulaṃ yuddhaṃ tayostatra mahāmṛdhe || 19 ||
[Analyze grammar]

caritvā vividhānmārgānmaṇḍalaṃ sthānameva ca |
śaraiḥ pūrṇāyatotsṛṣṭairanyonyamabhijaghnatuḥ || 20 ||
[Analyze grammar]

anyonyasya vadhe yatnaṃ cakratustau mahārathau |
īṣaturvirathaṃ caiva kartumanyonyamāhave || 21 ||
[Analyze grammar]

tato drauṇirmahāstrāṇi prāduścakre mahārathaḥ |
tānyastraireva samare pratijaghne'sya pāṇḍavaḥ || 22 ||
[Analyze grammar]

tato ghoraṃ mahārāja astrayuddhamavartata |
grahayuddhaṃ yathā ghoraṃ prajāsaṃharaṇe abhūt || 23 ||
[Analyze grammar]

te bāṇāḥ samasajjanta kṣiptāstābhyāṃ tu bhārata |
dyotayanto diśaḥ sarvāstacca sainyaṃ samantataḥ || 24 ||
[Analyze grammar]

bāṇasaṃghāvṛtaṃ ghoramākāśaṃ samapadyata |
uklāpātakṛtaṃ yadvatprajānāṃ saṃkṣaye nṛpa || 25 ||
[Analyze grammar]

bāṇābhighātātsaṃjajñe tatra bhārata pāvakaḥ |
savisphuliṅgo dīptārciḥ so'dahadvāhinīdvayam || 26 ||
[Analyze grammar]

tatra siddhā mahārāja saṃpatanto'bruvanvacaḥ |
ati yuddhāni sarvāṇi yuddhametattato'dhikam || 27 ||
[Analyze grammar]

sarvayuddhāni caitasya kalāṃ nārhanti ṣoḍaśīm |
naitādṛśaṃ punaryuddhaṃ na bhūtaṃ na bhaviṣyati || 28 ||
[Analyze grammar]

aho jñānena saṃyuktāvubhau cograparākramau |
aho bhīme balaṃ bhīmametayośca kṛtāstratā || 29 ||
[Analyze grammar]

aho vīryasya sāratvamaho sauṣṭhavametayoḥ |
sthitāvetau hi samare kālāntakayamopamau || 30 ||
[Analyze grammar]

rudrau dvāviva saṃbhūtau yathā dvāviva bhāskarau |
yamau vā puruṣavyāghrau ghorarūpāvimau raṇe || 31 ||
[Analyze grammar]

śrūyante sma tadā vācaḥ siddhānāṃ vai muhurmuhuḥ |
siṃhanādaśca saṃjajñe sametānāṃ divaukasām |
adbhutaṃ cāpyacintyaṃ ca dṛṣṭvā karma tayormṛdhe || 32 ||
[Analyze grammar]

tau śūrau samare rājanparasparakṛtāgasau |
parasparamudaikṣetāṃ krodhādudvṛtya cakṣuṣī || 33 ||
[Analyze grammar]

krodharaktekṣaṇau tau tu krodhātprasphuritādharau |
krodhātsaṃdaṣṭadaśanau saṃdaṣṭadaśanacchadau || 34 ||
[Analyze grammar]

anyonyaṃ chādayantau sma śaravṛṣṭyā mahārathau |
śarāmbudhārau samare śastravidyutprakāśinau || 35 ||
[Analyze grammar]

tāvanyonyaṃ dhvajau viddhvā sārathī ca mahārathau |
anyonyasya hayānviddhvā bibhidāte parasparam || 36 ||
[Analyze grammar]

tataḥ kruddhau mahārāja bāṇau gṛhya mahāhave |
ubhau cikṣipatustūrṇamanyonyasya vadhaiṣiṇau || 37 ||
[Analyze grammar]

tau sāyakau mahārāja dyotamānau camūmukhe |
ājaghnāte samāsādya vajravegau durāsadau || 38 ||
[Analyze grammar]

tau parasparavegācca śarābhyāṃ ca bhṛśāhatau |
nipetaturmahāvīrau svarathopasthayostadā || 39 ||
[Analyze grammar]

tatastu sārathirjñātvā droṇaputramacetanam |
apovāha raṇādrājansarvakṣatrasya paśyataḥ || 40 ||
[Analyze grammar]

tathaiva pāṇḍavaṃ rājanvihvalantaṃ muhurmuhuḥ |
apovāha rathenājau sārathiḥ śatrutāpanam || 41 ||
[Analyze grammar]