Chapter 1

vaiśaṃpāyana uvāca |
tato droṇe hate rājanduryodhanamukhā nṛpāḥ |
bhṛśamudvignamanaso droṇaputramupāgaman || 1 ||
[Analyze grammar]

te droṇamupaśocantaḥ kaśmalābhihataujasaḥ |
paryupāsanta śokārtāstataḥ śāradvatīsutam || 2 ||
[Analyze grammar]

muhūrtaṃ te samāśvāsya hetubhiḥ śāstrasaṃmitaiḥ |
rātryāgame mahīpālāḥ svāni veśmāni bhejire || 3 ||
[Analyze grammar]

viśeṣataḥ sūtaputro rājā caiva suyodhanaḥ |
duḥśāsano'tha śakunirna nidrāmupalebhire || 4 ||
[Analyze grammar]

te veśmasvapi kauravya pṛthvīśā nāpnuvansukham |
cintayantaḥ kṣayaṃ tīvraṃ nidrāṃ naivopalebhire || 5 ||
[Analyze grammar]

sahitāste niśāyāṃ tu duryodhananiveśane |
atipracaṇḍādvidveṣātpāṇḍavānāṃ mahātmanām || 6 ||
[Analyze grammar]

yattaddyūtaparikliṣṭāṃ kṛṣṇāmāninyire sabhām |
tatsmaranto'nvatapyanta bhṛśamudvignacetasaḥ || 7 ||
[Analyze grammar]

cintayantaśca pārthānāṃ tānkleśāndyūtakāritān |
kṛcchreṇa kṣaṇadāṃ rājanninyurabdaśatopamām || 8 ||
[Analyze grammar]

tataḥ prabhāte vimale sthitā diṣṭasya śāsane |
cakrurāvaśyakaṃ sarve vidhidṛṣṭena karmaṇā || 9 ||
[Analyze grammar]

te kṛtvāvaśyakāryāṇi samāśvasya ca bhārata |
yogamājñāpayāmāsuryuddhāya ca viniryayuḥ || 10 ||
[Analyze grammar]

karṇaṃ senāpatiṃ kṛtvā kṛtakautukamaṅgalāḥ |
vācayitvā dvijaśreṣṭhāndadhipātraghṛtākṣataiḥ || 11 ||
[Analyze grammar]

niṣkairgobhirhiraṇyena vāsobhiśca mahādhanaiḥ |
vardhyamānā jayāśīrbhiḥ sūtamāgadhabandibhiḥ || 12 ||
[Analyze grammar]

tathaiva pāṇḍavā rājankṛtasarvāhṇikakriyāḥ |
śibirānniryayū rājanyuddhāya kṛtaniścayāḥ || 13 ||
[Analyze grammar]

tataḥ pravavṛte yuddhaṃ tumulaṃ romaharṣaṇam |
kurūṇāṃ pāṇḍavānāṃ ca parasparavadhaiṣiṇām || 14 ||
[Analyze grammar]

tayordve divase yuddhaṃ kurupāṇḍavasenayoḥ |
karṇe senāpatau rājannabhūdadbhutadarśanam || 15 ||
[Analyze grammar]

tataḥ śatrukṣayaṃ kṛtvā sumahāntaṃ raṇe vṛṣaḥ |
paśyatāṃ dhārtarāṣṭrāṇāṃ phalgunena nipātitaḥ || 16 ||
[Analyze grammar]

tatastatsaṃjayaḥ sarvaṃ gatvā nāgāhvayaṃ puram |
ācakhyau dhṛtarāṣṭrāya yadvṛttaṃ kurujāṅgale || 17 ||
[Analyze grammar]

janamejaya uvāca |
āpageyaṃ hataṃ śrutvā droṇaṃ ca samare paraiḥ |
yo jagāma parāmārtiṃ vṛddho rājāmbikāsutaḥ || 18 ||
[Analyze grammar]

sa śrutvā nihataṃ karṇaṃ duryodhanahitaiṣiṇam |
kathaṃ dvijavara prāṇānadhārayata duḥkhitaḥ || 19 ||
[Analyze grammar]

yasmiñjayāśāṃ putrāṇāmamanyata sa pārthivaḥ |
tasminhate sa kauravyaḥ kathaṃ prāṇānadhārayat || 20 ||
[Analyze grammar]

durmaraṃ bata manye'haṃ nṛṇāṃ kṛcchre'pi vartatām |
yatra karṇaṃ hataṃ śrutvā nātyajajjīvitaṃ nṛpaḥ || 21 ||
[Analyze grammar]

tathā śāṃtanavaṃ vṛddhaṃ brahmanbāhlikameva ca |
droṇaṃ ca somadattaṃ ca bhūriśravasameva ca || 22 ||
[Analyze grammar]

tathaiva cānyānsuhṛdaḥ putrapautrāṃśca pātitān |
śrutvā yannājahātprāṇāṃstanmanye duṣkaraṃ dvija || 23 ||
[Analyze grammar]

etanme sarvamācakṣva vistareṇa tapodhana |
na hi tṛpyāmi pūrveṣāṃ śṛṇvānaścaritaṃ mahat || 24 ||
[Analyze grammar]

vaiśaṃpāyana uvāca |
hate karṇe mahārāja niśi gāvalgaṇistadā |
dīno yayau nāgapuramaśvairvātasamairjave || 25 ||
[Analyze grammar]

sa hāstinapuraṃ gatvā bhṛśamudvignamānasaḥ |
jagāma dhṛtarāṣṭrasya kṣayaṃ prakṣīṇabāndhavam || 26 ||
[Analyze grammar]

sa samudvīkṣya rājānaṃ kaśmalābhihataujasam |
vavande prāñjalirbhūtvā mūrdhnā pādau nṛpasya ha || 27 ||
[Analyze grammar]

saṃpūjya ca yathānyāyaṃ dhṛtarāṣṭraṃ mahīpatim |
hā kaṣṭamiti coktvā sa tato vacanamādade || 28 ||
[Analyze grammar]

saṃjayo'haṃ kṣitipate kaccidāste sukhaṃ bhavān |
svadoṣeṇāpadaṃ prāpya kaccinnādya vimuhyasi || 29 ||
[Analyze grammar]

hitānyuktāni viduradroṇagāṅgeyakeśavaiḥ |
agṛhītānyanusmṛtya kaccinna kuruṣe vyathām || 30 ||
[Analyze grammar]

rāmanāradakaṇvaiśca hitamuktaṃ sabhātale |
nagṛhītamanusmṛtya kaccinna kuruṣe vyathām || 31 ||
[Analyze grammar]

suhṛdastvaddhite yuktānbhīṣmadroṇamukhānparaiḥ |
nihatānyudhi saṃsmṛtya kaccinna kuruṣe vyathām || 32 ||
[Analyze grammar]

tamevaṃvādinaṃ rājā sūtaputraṃ kṛtāñjalim |
sudīrghamabhiniḥśvasya duḥkhārta idamabravīt || 33 ||
[Analyze grammar]

gāṅgeye nihate śūre divyāstravati saṃjaya |
droṇe ca parameṣvāse bhṛśaṃ me vyathitaṃ manaḥ || 34 ||
[Analyze grammar]

yo rathānāṃ sahasrāṇi daṃśitānāṃ daśaiva hi |
ahanyahani tejasvī nijaghne vasusaṃbhavaḥ || 35 ||
[Analyze grammar]

sa hato yajñasenasya putreṇeha śikhaṇḍinā |
pāṇḍaveyābhiguptena bhṛśaṃ me vyathitaṃ manaḥ || 36 ||
[Analyze grammar]

bhārgavaḥ pradadau yasmai paramāstraṃ mahātmane |
sākṣādrāmeṇa yo bālye dhanurveda upākṛtaḥ || 37 ||
[Analyze grammar]

yasya prasādātkaunteyā rājaputrā mahābalāḥ |
mahārathatvaṃ saṃprāptāstathānye vasudhādhipāḥ || 38 ||
[Analyze grammar]

taṃ droṇaṃ nihataṃ śrutvā dhṛṣṭadyumnena saṃyuge |
satyasaṃdhaṃ maheṣvāsaṃ bhṛśaṃ me vyathitaṃ manaḥ || 39 ||
[Analyze grammar]

trailokye yasya śāstreṣu na pumānvidyate samaḥ |
taṃ droṇaṃ nihataṃ śrutvā kimakurvata māmakāḥ || 40 ||
[Analyze grammar]

saṃśaptakānāṃ ca bale pāṇḍavena mahātmanā |
dhanaṃjayena vikramya gamite yamasādanam || 41 ||
[Analyze grammar]

nārāyaṇāstre nihate droṇaputrasya dhīmataḥ |
hataśeṣeṣvanīkeṣu kimakurvata māmakāḥ || 42 ||
[Analyze grammar]

vipradrutānahaṃ manye nimagnaḥ śokasāgare |
plavamānānhate droṇe sannanaukānivārṇave || 43 ||
[Analyze grammar]

duryodhanasya karṇasya bhojasya kṛtavarmaṇaḥ |
madrarājasya śalyasya drauṇeścaiva kṛpasya ca || 44 ||
[Analyze grammar]

matputraśeṣasya tathā tathānyeṣāṃ ca saṃjaya |
viprakīrṇeṣvanīkeṣu mukhavarṇo'bhavatkatham || 45 ||
[Analyze grammar]

etatsarvaṃ yathā vṛttaṃ tattvaṃ gāvalgaṇe raṇe |
ācakṣva pāṇḍaveyānāṃ māmakānāṃ ca sarvaśaḥ || 46 ||
[Analyze grammar]

saṃjaya uvāca |
pāṇḍaveyairhi yadvṛttaṃ kauraveyeṣu māriṣa |
tacchrutvā mā vyathāṃ kārṣīrdiṣṭe na vyathate manaḥ || 47 ||
[Analyze grammar]

yasmādabhāvī bhāvī vā bhavedartho naraṃ prati |
aprāptau tasya vā prāptau na kaścidvyathate budhaḥ || 48 ||
[Analyze grammar]

dhṛtarāṣṭra uvāca |
na vyathā śṛṇvataḥ kācidvidyate mama saṃjaya |
diṣṭametatpurā manye kathayasva yathecchakam || 49 ||
[Analyze grammar]