Chapter 227

śrīpuruṣottama uvāca |
śṛṇu nārāyaṇīśri tvaṃ kathāṃ bhaktasya śobhanām |
kīśanakulapālasya nāmnā deśyāvanasya vai || 1 ||
[Analyze grammar]

deśyāvano'bhavad yogī candrāvanasya cātmajaḥ |
gomaṇḍalyāścāpagāyāstaṭe gauvādikheṭagaḥ || 2 ||
[Analyze grammar]

pitrā putraḥ śikṣito vai kīśanakulapālane |
kīśayornartane cāpi nakulayostu yodhane || 3 ||
[Analyze grammar]

vānaro bhavati rājā vānaro ghargharīyutā |
śāṭīdharā ca lajjāyāṃ vartate kīśasannidhau || 4 ||
[Analyze grammar]

rājñīva vartate cāpi nṛtyasyeva praśikṣitā |
nṛtyakṣatau vānarastāṃ tāḍayatyeva roṣataḥ || 5 ||
[Analyze grammar]

bānaro'pi tataḥ khātavaṃśayormadhyarajjugaḥ |
naṭavat saṃprayātyeva sthālyā chatradharo naṭaḥ || 6 ||
[Analyze grammar]

vānarī ḍamarūvādyaṃ vādayatyeva raṃgagā |
janān pradarśayatyeṣā yaṣṭyā hastena vānaram || 7 ||
[Analyze grammar]

janā dṛṣṭvā magnacittā arpayanti dhanā'nnakam |
athā'pi vānaraścā'dho'vatīrya śakaṭīṃ navām || 8 ||
[Analyze grammar]

āyuktvā tu śṛgālau dvau tatrā''ropya tu vānarīm |
svayaṃbhūtvā sūtakarmā cālayatyeva rājavat || 9 ||
[Analyze grammar]

nakulau vānarīpārśve pārṣadāviva tiṣṭhataḥ |
cāmare śobhite dhṛtvā vīkṣante kautukaṃ janāḥ || 10 ||
[Analyze grammar]

śṛgālau vahamānau tau kīśo yaṣṭyā pratāḍanam |
yāvat karoti jambukau kruddhau pratimukhau dhuri || 11 ||
[Analyze grammar]

bhūtvā nirgatya dhurataścotplutyā''kruśya roṣataḥ |
vānareṇa samaṃ samyag yudhyataḥ saṃprapaśyatām || 12 ||
[Analyze grammar]

janānāṃ tatra kīśena yuddhyatyekastu jambukaḥ |
dvitīyo vānarīkarṇe dhṛtvā nītvā'tigo'bhavat || 13 ||
[Analyze grammar]

deśyāvanastadā tyaktvā raṃgaṃ dudrāva vānarīm |
ānetuṃ ca śṛgālāṃ tu tāvat kīśo'pi dhāvati || 14 ||
[Analyze grammar]

ānetuṃ vānarīṃ tāvajjambuko'pyanudhāvati |
nakulī pṛṣṭhatastatra vaṃśayoradhirohataḥ || 15 ||
[Analyze grammar]

prapaśyato hi vānaryā haraṇaṃ kroṣṭṛṇā kṛtam |
yuddhaṃ tatra punastāvad deśyāvanakṛtāvanam || 16 ||
[Analyze grammar]

punā raṃgānayanaṃ ca śṛgālasya kṣamārthanam |
bhikṣāṃ janebhyaḥ purikānāstī tatstrī prayācate || 17 ||
[Analyze grammar]

evaṃ deśyāvano nityaṃ nagare kharvaṭe pure |
gatvā gatvā hāsyanāṭyaṃ kārayatyeva pāśavam || 18 ||
[Analyze grammar]

tadutpannā'nnavastrādyairdhanaiḥ piṣṭādibhiḥ sadā |
nirvahatyeva satataṃ patnyā sākaṃ pratiṣṭhati || 19 ||
[Analyze grammar]

paśūnāṃ poṣaṇaṃ cāpi karoti dayayā yutaḥ |
naisargiko bhaktadharmā deśyāvanaḥ prage'nvaham || 20 ||
[Analyze grammar]

snāti kṛṣṇaṃ citrachaviṃ namati ca prapaśyati |
jalaṃ phalaṃ ca dharati bhojanaṃ purikākṛtam || 21 ||
[Analyze grammar]

nivedya viṣṇave datvā paśubhyo nijayoṣite |
tato bhuṃkte nānyathaiva nārāyaṇaṃ tu māṃ smaran || 22 ||
[Analyze grammar]

lakṣmi sarvatra bhaktā me saṃskṛtāścāpyasaṃskṛtāḥ |
ye'pi ke'pi bhajante māṃ yathā tathāpi ceśvaram || 23 ||
[Analyze grammar]

teṣāṃ manaḥprapūrtyarthaṃ prayate bhaktikarśitaḥ |
purikā'pi tu śūdrāṇī snātvā māṃ sevate'nvaham || 24 ||
[Analyze grammar]

śakaṭyāṃ mama mūrtiṃ ca rakṣatyeva chaviṃ śubhām |
nānyadharmaṃ prajānāti jānāti śaraṇāgatim || 25 ||
[Analyze grammar]

chavistho bhagavān kṛṣṇa uddhāraṃ naḥ kariṣyati |
tadarpaṇaṃ vinā naiva bhoktavyaṃ jalamityapi || 26 ||
[Analyze grammar]

harerbhaktiṃ vinā vandhyo netavyo divaso na vai |
antarātmā hariścāste kīśe nakule kroṣṭari || 27 ||
[Analyze grammar]

nāryā nare ca sarvatra vṛkṣe jaḍe ca cetane |
evaṃ tau budhyato lakṣmi kīśanakulapālakau || 28 ||
[Analyze grammar]

atastau pāvanau snigdhau bhaktau me mama sammatau |
dine khelaṃ viracayyotpādyopārjanabhojane || 29 ||
[Analyze grammar]

yathālabdhe susantuṣṭau rātrau kurutaḥ kīrtanam |
ḍamarūvādyasahitaṃ kṛṣṇa rāma ramāpate || 30 ||
[Analyze grammar]

evaṃ nityaṃ hi kuruto bhajanaṃ vai niśāmukhe |
pūrṇimāyāṃ tu miṣṭānnaṃ nivedayato matpuraḥ || 31 ||
[Analyze grammar]

paśubhyaḥ sampradāyaiva tatastau matprasādajam |
bhuñjāte pratimāsaṃ tau vrataṃ tvetannirantaram || 35 ||
[Analyze grammar]

tulasīmiśritaṃ vāri pibatastau sadā rame |
nahi bhaktau kāraṇaṃ vai vanaṃ sthalaṃ gṛhaṃ dhanam || 33 ||
[Analyze grammar]

snehastu kāraṇaṃ tatra hṛdayaṃ bhaktikāraṇam |
śraddhā ca kāraṇaṃ tatra puṇyaṃ ca kāraṇaṃ mahat || 34 ||
[Analyze grammar]

evaṃ gomaṇḍalītīre vasatoścobhayorapi |
ekadā sādhusaṃgho vai yātrārthī pārśvato'gamat || 35 ||
[Analyze grammar]

tāvubhau sahasā gatvā nematuḥ sādhupādayoḥ |
viśrāntyarthaṃ ghaṭikāṃ cārthayāmāsaturīśvarān || 36 ||
[Analyze grammar]

sādhavo'pi nadītīraṃ vṛkṣachāyāṃ vilokya tu |
kṣaṇaṃ viśrāntimāpuste papurjalaṃ tu śītalam || 37 ||
[Analyze grammar]

pūrṇimā''sīd bhāgyayogānmiṣṭamāsīt kṛtaṃ tadā |
saṃyāvaṃ śrīharaye vai niveditaṃ samastakam || 38 ||
[Analyze grammar]

sādhubhyo dadaturbhaktyā bhuktavantaśca sādhavaḥ |
mama smṛtiyutā lakṣmi saṃyāvo vṛddhimāptavān || 39 ||
[Analyze grammar]

mayā'ntaryāmiṇā jñātvā saṃyāvo vardhito hyati |
viṃśatiḥ sādhavaḥ sarve tṛptāstāvān sa cā'bhavat || 40 ||
[Analyze grammar]

saṃyāvaḥ pūrvamāno vai nyūnatāṃ nā'vrajanmanāk |
sādhavo'pi vividurvai bhakteḥ pratāpameva tam || 41 ||
[Analyze grammar]

tanmadhye maṇḍalīśo yaḥ sādhurnāmnā sudhā'maraḥ |
upādideśa vākyāni matvā bhaktaṃ tu pātrakam || 42 ||
[Analyze grammar]

śṛṇu bhakta sadā sevyo hariśca tasya sādhavaḥ |
nārāyaṇaḥ satsu cāste kāmasaṃkalpapūrakaḥ || 43 ||
[Analyze grammar]

na jātirna dhanaṃ rājyaṃ kṛṣṇaprasādasādhanam |
snehabhaktiḥ sādhusevā kṛṣṇaprasādasādhanam || 44 ||
[Analyze grammar]

sādhavo bhagavanniṣṭhā tathā śrībhagavān svayam |
kṣetraṃ vai naimiṣāraṇyaṃ kuṇṭhitaṃ yatra mānasam || 45 ||
[Analyze grammar]

indriyāṇi kuṇṭhitāni nivṛttāni sthirāṇi ca |
viṣayebhyaḥ parāvṛtya jāyante śāntidāni ca || 46 ||
[Analyze grammar]

tatra kṣetre sāghurūpe tathā nārāyaṇātmake |
satsaṃgasalile snātvā puṇyayajñān samācaret || 47 ||
[Analyze grammar]

āśu siddhirbhavettatra mokṣadharmasya cottamām |
dhyānaṃ siddhistathā śīghraṃ mumukṣūṇāṃ prajāyate || 48 ||
[Analyze grammar]

vānarā indriyāṇyeva tvahaṃmanasī jambukau |
pūrvakarmāṇi nakulāstān vaśān sannayet sadā || 49 ||
[Analyze grammar]

dharme jñāne ca vairāgye bhaktau sādhuprasevane |
harermūrtau ca tiṣṭheyustathā vaśān vidhāpayet || 50 ||
[Analyze grammar]

parotkarṣā'sahiṣṇvākhyāmirṣyāṃ tyajet sadā sudhīḥ |
mānaṃ tyājyaṃ prayatnena sudhiyā sarvarodhakam || 51 ||
[Analyze grammar]

sattvena bhāvyaṃ satataṃ dharme ruciryato bhavet |
sattvaṃ proktaṃ kṛtayugaṃ yatra dhyānaṃ bhaveddhareḥ || 52 ||
[Analyze grammar]

rajovegān rodhayedvai kāmyakarmapraperakān |
rajastretāyugo bodhyaḥ sevā kāryā'tra daihikī || 53 ||
[Analyze grammar]

rajastamobhyāṃ yuktātmā dvāparātmā prakathyate |
tatra lojā'rjanatṛṣṇā tyajet sevāṃ careddhareḥ || 54 ||
[Analyze grammar]

tamomayaḥ kalirbodhyo yatra māyā'nṛtādikam |
tatra samāgamaḥ kāryaḥ satāṃ ca bhajanaṃ muhuḥ || 55 ||
[Analyze grammar]

uccaiḥ saṃkīrtanaṃ viṣṇoḥ kalervego nivartate |
pūrvakarmānusāreṇa pravartante yugā hṛdi || 56 ||
[Analyze grammar]

ato dhyānaṃ cātmaniṣṭhā māhātmyabuddhiruttamā |
sādhanīyā viśeṣeṇa yugadharmādirodhinī || 57 ||
[Analyze grammar]

śrīkṛṣṇaṃ bhajato bhītirnāstyeva kālakarmajā |
kṛtārtho'smīti matvaiva seveta sādhusattamān || 58 ||
[Analyze grammar]

bhaktiṃ kuryānnavadhā'pi sarvasvārpaṇabhāvanām |
kṛṣṇasādhvāśrayeṇaiva kalirnaśyati vai hṛdaḥ || 59 ||
[Analyze grammar]

yatra kṛṣṇanivāso'sti tatra kalirna vidyate |
yatra santaḥ sthitāḥ santi tatra māyā na vidyate || 60 ||
[Analyze grammar]

mahābhāgavato dharmo mahāvaiṣṇavatātmakḥ |
sarvanivedanātmā sa pālanīyaḥ sadā śubhaḥ || 61 ||
[Analyze grammar]

cauryaṃ piśunatā dambhaḥ kartavyā naiva sarvathā |
satāṃ samāgamaḥ kāryo viśvāso'pi sadā satām || 62 ||
[Analyze grammar]

maryādā ca satāṃ pālyā yathā kṛṣṇasya sā tathā |
sevā satāṃ sadā kāryā yathā kṛṣṇasya sā tathā || 63 ||
[Analyze grammar]

yeṣu hiṃsā madaścauryamanṛtaṃ kapaṭaṃ tathā |
nāstikatvaṃ ca māyā ca te na viśvāsabhūmayaḥ || 64 ||
[Analyze grammar]

te tu ruciṃ na kurvanti satsaṃge satsu vā harau |
druhyantyeva te satataṃ kalipriyāstu pāpinaḥ || 65 ||
[Analyze grammar]

ato mumukṣuṇā sevyāḥ santo naiva tu nāstikāḥ |
satāṃ yogena sarveśa bhajitvā muktimarjayet || 66 ||
[Analyze grammar]

satsaṃge śraddhayā'nanyabhāvena bhajate tu yaḥ |
dehānte sa vrajatyeva dhāmākṣaraṃ hareḥ param || 67 ||
[Analyze grammar]

golokaṃ vāpi vaikuṇṭhaṃ vrajennārāyaṇāśramam |
śvetadvīpaṃ vrajedvāpi śrīpuraṃ cā'mṛtaṃ vrajet || 68 ||
[Analyze grammar]

divyadṛṣṭimatāṃ tāni cāntike santi sarvathā |
bāhyadṛṣṭimatāṃ tāni dhāmāni santi dūrataḥ || 69 ||
[Analyze grammar]

dehe jīvo yathā tatra jīve śrīpuruṣottamaḥ |
vartate tanmayīdṛṣṭyā paśyeddhāmāni cāntike || 70 ||
[Analyze grammar]

yatra kṛṣṇo'sti hṛdaye bahirvā tatra santi vai |
sarvadhāmāni kṛṣṇasyaiśvaryāṇi nikhilānyapi || 71 ||
[Analyze grammar]

evaṃvijñāstu ye bhaktāste śrīkṛṣṇasamā matāḥ |
teṣāṃ darśanajaṃ puṇyaṃ kṛṣṇadarśanasadṛśam || 72 ||
[Analyze grammar]

anyaiḥ sarvairīdṛśānāṃ samāgamena mokṣaṇam |
prāpyate durlabhaṃ yadvai sulabhaṃ satprasādataḥ || 73 ||
[Analyze grammar]

satsu snehena santaḥ svāśritān nayanti cā'kṣaram |
vāsanāḥ kṣapayitvaiva nayanti paramaṃ padam || 74 ||
[Analyze grammar]

strīvargaṃ naravargaṃ vā sakāmaṃ vāpi dehinam |
santo viśodhya divyaṃ taṃ kṛtvā nayanti cā'kṣaram || 75 ||
[Analyze grammar]

śṛṇu deśyāvana tvaṃ vai smara nāṭye prabhuṃ harim |
vaṃśarajjvā dhāma divyamakṣaraṃ smara sarvathā || 76 ||
[Analyze grammar]

rajjusthe vānare viṣṇuṃ smara chatre tu chatrakam |
vaṃśe pūrve tu golokaṃ dvitīye tu vikuṇṭhakam || 77 ||
[Analyze grammar]

smara divyaṃ rathaṃ taṃ tu yatra sā vānarī sthitā |
brahmarathaṃ smara tatra māyāṃ viṣṇostu vānarīm || 78 ||
[Analyze grammar]

kroṣṭāraṃ cāpyahaṃkāraṃ dvitīyaṃ mānasaṃ smara |
tābhyāṃ sā sajjate māyā tāṃ samarpaya viṣṇave || 79 ||
[Analyze grammar]

nakulaṃ tu guruṃ sarvadraṣṭāraṃ smara tatra hi |
rajjvakṣarasthito divyo gurustvāṃ tārayiṣyati || 80 ||
[Analyze grammar]

ḍamarūtthaṃ mahānādam oṃnārāyaṇamādhavam |
vidhehi satataṃ sarvajīvānāṃ śravaṇāya vai || 81 ||
[Analyze grammar]

paśya sevātmikāṃ bhaktiṃ raṃgarakṣākarīṃ naṭīm |
paśya bhikṣāṃ mokṣayātrāṃ nityadravyamayīṃ tathā || 82 ||
[Analyze grammar]

bhikṣāpradān śaraṇe vai samāyātān śarīriṇaḥ |
paśya sādhoḥ saṃgamena pāvanān dattacittakān || 83 ||
[Analyze grammar]

sādhuṃ sudhāmaraṃ māṃ tvaṃ paśyā'ntaryāmiṇaṃ harim |
jñānadaṃ mokṣadaṃ kṛṣṇanārāyaṇaṃ hitārthinam || 84 ||
[Analyze grammar]

deśyāvanaṃ nijātmānaṃ paśya kīśādipālakam |
svāminaṃ ca niyantāraṃ raṃgakhelavidhāyinam || 85 ||
[Analyze grammar]

raṃgabhūmiṃ paśya jātiṃ dehaṃ gehaṃ samastakam |
khelāntaṃ paśya maraṇaṃ visarjanaṃ tu karmaṇām || 86 ||
[Analyze grammar]

darśakānāṃ manorañjanaṃ tu paśya śamādikam |
evaṃ kṛtvā tava tṛptiṃ jātāṃ paśya tu śāśvatīm || 87 ||
[Analyze grammar]

ityevaṃ nityamīkṣaṃstvaṃ paraṃ padaṃ prayāsyasi |
hṛdaye brāhmīmupaniṣadaṃ prāpya bhayaṃ nahi || 88 ||
[Analyze grammar]

yāvadvai vāsanā cā'sti tāvat khelaḥ pravartate |
upaniṣannivāsena khelaḥ khelo bhavet sadā || 89 ||
[Analyze grammar]

parā śāntiḥ pravarteta deśyāvana tathā''cara |
oṃ namaḥ śrīkṛṣṇanārāyaṇāya svāmine svāhā || 90 ||
[Analyze grammar]

hare kṛṣṇa bālakṛṣṇa śrīpate puruṣottama |
bhaja nityaṃ parameśaṃ tvevaṃ samāhito bhava || 91 ||
[Analyze grammar]

ityuktvā kamale sādhuḥ samaṇḍalaḥ supūjitaḥ |
prasannamānaso bhūtvā datvā''śīrvacanaṃ yayau || 92 ||
[Analyze grammar]

athā'yaṃ deśyavacano vilokya pātrake dhṛtam |
prasādātmakasaṃyāvaṃ sampūrṇaṃ tu yathātatham || 93 ||
[Analyze grammar]

camatkāraṃ mahāścaryaṃ mene kṛpāṃ harerapi |
kuṭumbayug bubhuje'pi prasādaṃ tāvadeva saḥ || 94 ||
[Analyze grammar]

divyadṛṣṭirabhavadvai kuṭumbasahitaḥ khalu |
agre pārśve pṛṣṭhataśca haristasyā'bhito'bhavat || 95 ||
[Analyze grammar]

yatra paśyati tatraiva viśvātmānaṃ prapaśyati |
ūrdhve'dho bhūtale pātre vastre rathe ca vānare || 96 ||
[Analyze grammar]

jambuke nakule naṭyāṃ parātmānaṃ prapaśyati |
divyabhāvo'bhavadbhaktaḥ kalpitaṃ labhate kare || 97 ||
[Analyze grammar]

nārāyaṇasya me mūrtiḥ sarvato gocarā'bhavat |
kṛpā sā me guroḥ sādhoścāpi lakṣmi śubhā hi sā || 98 ||
[Analyze grammar]

yayā sarvamasya jātaṃ brahmadarśanamuttamam |
atha vāksiddhamājñāya janāścāyānti saṃghaśaḥ || 99 ||
[Analyze grammar]

kṛtvā tu darśanaṃ tasya bhavanti pāvanā api |
mantraṃ gṛhṇanti me tasmād bhaktād viyanti vai tataḥ || 100 ||
[Analyze grammar]

kṛtakṛtyāḥ prajāyante mahābhāgavatekṣaṇāt |
atha kāle samāyāte tvāvirbhūto'bhavaṃ puraḥ || 101 ||
[Analyze grammar]

vimānena sahitaśca pārṣadaiśca samanvitaḥ |
tvayā sākaṃ tathā lakṣmi divyadehānakārayam || 102 ||
[Analyze grammar]

kīśanakulakroṣṭṝṃśca kīśapaṃ kīśapāṃ tathā |
vimāne tāṃścādhirohayitvā'nayaṃ mamā'kṣaram || 103 ||
[Analyze grammar]

evaṃ lakṣmi dadau muktiṃ muktamaṇḍalamadhyagām |
mama prasādabhoktṛbhyaḥ sarvebhyo bhaktiyogataḥ || 104 ||
[Analyze grammar]

paṭhanācchravaṇādasya mananādvartanāttathā |
bhuktiṃ muktiṃ labheccāpi divyaṃ svargaṃ ca śāśvatam || 105 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne deśyāvanasya kīśapālasya sudhā'marasādhoḥ prasaṃgena mokṣaṇamityādinirūpaṇanāmā saptaviṃśatyadhikadviśatatamo'dhyāyaḥ || 227 ||
[Analyze grammar]