Chapter 226

śrīpuruṣottama uvāca |
śṛṇu nārāyaṇīśri tvam ājīvanīnadītaṭe |
saurāṣṭre tvabhavadvaidyo nāmnā gadārdaneśvaraḥ || 1 ||
[Analyze grammar]

jīradurgakṛtāvāsaścauṣadhitattvamarmavit |
vipraḥ kuṭumbasahito jīradurge nijāpaṇam || 2 ||
[Analyze grammar]

kṛtvā karoti rugṇānāṃ cikitsāṃ cauṣadhaṃ tataḥ |
nāmā'bhavaddhi vikhyātaṃ roganāśakalāvidaḥ || 3 ||
[Analyze grammar]

parito grāmavargeṣu deśalokeṣu cāpyati |
prajājanāḥ samāyānti tadgṛhaṃ roganuttaye || 4 ||
[Analyze grammar]

so'pi nārāyaṇaṃ kṛṣṇaṃ smṛtvā dadāti cauṣadham |
suphalaṃ tadbhavatyeva guṇakṛdrogahārakam || 5 ||
[Analyze grammar]

yajñabhasmānvitaṃ devaprasādaśarkarānvitam |
tulasīpatracūrṇāḍhyaṃ kāṣṭhauṣadhaṃ ca dhātujam || 6 ||
[Analyze grammar]

bhasmādi ca rasān vahnipakvān śarannivartakān |
kaphanāśakarān jīrṇajvaraghnānāsavāṃstathā || 7 ||
[Analyze grammar]

virecakān gūṭikāṃśca pācakān vāyunāśakān |
śaktidān dhātupuṣṭikṛdvṛkṣabījāni yāni ca || 8 ||
[Analyze grammar]

jantujān cūrṇitān rogaharāṃstuṣāṃśca mūlajān |
patrajān puṣpajāṃścāpi tvacāṃ cūrṇāni yānyapi || 9 ||
[Analyze grammar]

dadāti rogiṇe rogānnāśayatyeva sarvathā |
viṣaṃ harati śīghraṃ ca sarpādīnāṃ rasodbhavam || 10 ||
[Analyze grammar]

evaṃvidhasya vaidyasya śālāyāṃ mānavā daśa |
kurvanti peṣaṇaṃ cāpi mardanaṃ pācanaṃ tathā || 11 ||
[Analyze grammar]

sāraniḥsāraṇaṃ cūrṇanaṃ ca prajvālanaṃ sadā |
auṣadhāni yathāyogyaṃ sampādayanti yatnataḥ || 12 ||
[Analyze grammar]

varṣāraṃbhe svayaṃ gadārdanaḥ kṣetre nadītaṭe |
yāti kācādipātrāṇi nītvā jantumaye sthale || 13 ||
[Analyze grammar]

sarīsṛpāṃstāmrakaṇaśendragopān pipīlakān |
raktapuṣṭikarān jantūn dhṛtvā dadhāti pātrake || 14 ||
[Analyze grammar]

sahasraśaḥ prāṇaraudhairvyasavaste bhavanti hi |
uttejakāni tailāni kartuṃ gartādigodhikāḥ || 15 ||
[Analyze grammar]

dhṛtvā kāce tu nikṣipya vyasūn karoti vaidyarāṭ |
nirdayo nijalābhārthaṃ paraprāṇavighātakaḥ || 16 ||
[Analyze grammar]

vipro'pi rākṣasadharmā hiṃsāmārgaparo'bhavat |
nāṇakāṇāṃ pralobhena tṛṣṇayā hiṃsako'bhavat || 17 ||
[Analyze grammar]

evaṃ gadārdanaḥ kāle kāle jantuvināśakaḥ |
auṣadhārthaṃ koṭijantunāśakṛddhiṃsako'bhavat || 18 ||
[Analyze grammar]

jantavo'pi mūrchitā arditāḥ śapanti taṃ dvijam |
naḥ prāṇaghnasya te prāṇān hariṣyantyapi jantavaḥ || 19 ||
[Analyze grammar]

caturaśītilakṣāsu yoniṣveva muhurmuhuḥ |
asmadvadduḥkhamāsādya mṛtyuṃ yāhi punaḥ punaḥ || 20 ||
[Analyze grammar]

śaptaścaivaṃ bahuśāpaistīvravegaiḥ sa vaidyakaḥ |
karmavipākakālena jvarāviṣṭo'bhavacchanaiḥ || 21 ||
[Analyze grammar]

jvaranāśāya sahasā'yujat sa gūṭikādikam |
jvaraḥ śāntiṃ na cāyāti pratyuta saṃpravardhate || 22 ||
[Analyze grammar]

prārabdhāgatavighnaṃ hi koṭyupāyairna naśyati |
śāpāgataṃ mahāduḥkhaṃ tvanyopāyairna līyate || 23 ||
[Analyze grammar]

vaidyasya yamarājasya devasya ca vṛṣasya ca |
īśvarasya samarthasya mānavasya tu kā kathā || 24 ||
[Analyze grammar]

līyate śāpadasyaiva prasādena na cānyathā |
atra te jantavo naṣṭāḥ prasādaḥ kuta ālabhet || 25 ||
[Analyze grammar]

jīrṇajvaro hi vaidyasya balavattvamupāgamat |
nityaṃ gadārdanaraktaṃ śoṣayatyeva bhūtavat || 26 ||
[Analyze grammar]

athā'yaṃ tannirāsārthaṃ kvāthān pibati nityaśaḥ |
aprārabdhahatāḥ kvāthā viparītā bhavanti yat || 27 ||
[Analyze grammar]

raktanāśakarāścāpyuṣṇatāvivardhakāstathā |
nāḍīṣu māṃsapiṇḍeṣu sūkṣmachidrakarā api || 28 ||
[Analyze grammar]

vyavartanta samastāste kvāthāḥ kṣatakarāstataḥ |
mūtre male ṣṭhīvane'sya raktabhāgaḥ sravatyapi || 29 ||
[Analyze grammar]

nirvṛttātyupacāro'pi vaidyo rugṇataro'bhavat |
na buddhirna balaṃ dravyaṃ nopacārā vibhāgyake || 30 ||
[Analyze grammar]

mahāpāpe prabhavanti yojitāḥ kuśalairapi |
lakṣmi prasiddhavaidyasya kṛtaśramasya śāntaye || 31 ||
[Analyze grammar]

anye vaidyāścāyayuśca cikitsārthaṃ vidūrataḥ |
kṛtvā mūlacikitsāṃ te prayojayanti cauṣadham || 32 ||
[Analyze grammar]

tathāpyaghahatasyā'sya leśalābho na dṛśyate |
āśāhatāśca te bhūtvā prayānti nijamandiram || 33 ||
[Analyze grammar]

raktasrāvā hi vaidyasya na śāntiṃ pragatāḥ khalu |
tatrauṣadhaiḥ kṛtairlakṣmi pratyutādhikatāṃ gatāḥ || 34 ||
[Analyze grammar]

varṣaṃ tvevaṃ gataṃ tasya yāmyasadṛśaduḥkhinaḥ |
tato mātrā tu bhasmotthā bhakṣitā bhiṣajā svayam || 35 ||
[Analyze grammar]

sā'pi vikṛtimāsādya visphoṭān parito vyadhāt |
pācapūrṇaṃ ca durgandhaṃ sphuṭitaṃ varṣma cā'bhitaḥ || 36 ||
[Analyze grammar]

pācasrāvi kleditaṃ ca nārakaṃ kuṇḍavaddhyabhūt |
na pārśve ke'pi gacchanti vaidyo roditi śūlitaḥ || 37 ||
[Analyze grammar]

utpannakīṭajantukṛddaṃśairardita ityadhī |
ākrūśyatyatiduḥkhena jantukhāditamāṃsakaḥ || 38 ||
[Analyze grammar]

etādṛśamahāduḥkhaṃ prāptavān vaidyarāṭ rame |
duḥkhī māṃ bhajate nityaṃ duḥkhanāśāya kevalam || 39 ||
[Analyze grammar]

śāpaduḥkhavināśe'haṃ samartho na bhavāmi vai |
śāpadasya hṛdaye'haṃ sthitastadā samarditaḥ || 40 ||
[Analyze grammar]

śāpadastvahamevā'smi kathaṃ cā'śāpakṛt punaḥ |
vinā taṃ śāpadaṃ jantuṃ prabhavāmi nivṛttaye || 41 ||
[Analyze grammar]

evaṃ vidhasya vaidyasya bhajamānasya māmapi |
duḥkhaṃ nivartate naiva maraṇaṃ nāpi jāyate || 482 ||
[Analyze grammar]

bhojanaṃ prāṇadhāraṃ cā''datte'sya jāṭharo laghu |
tena prāṇā na prayānti śāpabhogaprabandhinaḥ || 43 ||
[Analyze grammar]

bahudānāni puṇyāni kṛtavān vaidyarāḍapi |
prāṇāḥ sthānaṃ na muñcanti yāmyapurīsamaprabhāḥ || 44 ||
[Analyze grammar]

oṣadhānāṃ prayogaiśca manāk svāsthyaṃ pradṛśyate |
māsaṃ svāsthyaṃ dṛśyate ca māṃsamajjā vivardhate || 45 ||
[Analyze grammar]

punaśca jantavastatra jāyante ca sahasraśaḥ |
kīṭā daśanti bahudhā yāmyakuṇḍo yathā tviha || 46 ||
[Analyze grammar]

evaṃ muhuḥ śāpavaśādasya vaidyasya vartate |
daśavarṣāṇi caivaṃ vai vyatītānyasya rogiṇaḥ || 47 ||
[Analyze grammar]

yāvanto jantavastena māritāstāvadeva tat |
duḥkhaṃ sākṣādatra jātaṃ yāmyaṃ tathāpi śiṣyate || 48 ||
[Analyze grammar]

madhye lakṣmi tathā tasya putrāḥ ṣaṭ pāpisaṃgataḥ |
atiriktātisāraiśca śanaiḥ kramānmṛtiṃ yayuḥ || 49 ||
[Analyze grammar]

vidhvastā vidhavā jātāḥ ṣaḍevā'patyavarjitāḥ |
gadārdanasya putryaśca sapta tāḥ saṃgadoṣataḥ || 50 ||
[Analyze grammar]

sarvā api tu vidhavā jātāḥ pitṛprapāpataḥ |
āsanācchayanādvāsād bhojanāt sahakarmaṇaḥ || 51 ||
[Analyze grammar]

utpādād dāyabhāgācca pāpaṃ saṃkramate jane |
jantūnāṃ māraṇe teṣāṃ kuṭumbināṃ yathā bhayam || 52 ||
[Analyze grammar]

duḥkhaṃ cā'bhūttathā śāpādasya kuṭumbināṃ tathā |
sarvamatraiva sañjātaṃ duḥkhaṃ tīvrapraveginaḥ || 53 ||
[Analyze grammar]

evaṃ nirvaṃśatāṃ prāptā patnī tvekā'vaśiṣyate |
sāpi cintāparā bhrātṝn nijānāhūya sarvathā || 54 ||
[Analyze grammar]

dravyaṃ sarvaṃ dadau tebhyo gṛhaṃ śūnyamivā'bhavat |
patnī bhrātara evāpi dravyapāśena pāśitāḥ || 55 ||
[Analyze grammar]

rugṇāḥ sarve'bhavaṃstūrṇaṃ mṛtāste dravyabhoginaḥ |
nirvaṃśāste'pi jātā vai pāpadravyaprasaṃgataḥ || 56 ||
[Analyze grammar]

vaidyasyā'nnaṃ na bhoktavyaṃ prāyaścittī yato bhavet |
lakṣmi śataghno vaidyo vai tadannaṃ pāpadaṃ matam || 57 ||
[Analyze grammar]

paśya vaidyā nirdayā vai yamadūtasamāḥ sadā |
chedane ghātane mṛtyudāne śavādisevane || 58 ||
[Analyze grammar]

nagnaśavā'bhyasane ca nagnaśavāvalokane |
nagnadurgandhakīṭāḍhyaśavānāṃ nityadarśane || 59 ||
[Analyze grammar]

rogasaṃskārakaraṇe pācakledādiśīlane |
yamadūtasamā vaidyā aśuddhāḥ prāṇapāragāḥ || 60 ||
[Analyze grammar]

anubhūtiṃ vinā ye te pāpinaḥ prāṇahārakāḥ |
teṣāmannaṃ na bhoktavyaṃ vinaṣṭikṛt tadannakam || 61 ||
[Analyze grammar]

nahi sarve tviha loke dhanvantarisamāḥ khalu |
tattvajñā yadi puṇyāḥ syurahiṃsakāstu pāvanāḥ || 62 ||
[Analyze grammar]

aśvinīputrasadṛśāḥ pūjyāste tu matāḥ sadā |
lokakalyāṇakartāro hiṃsāmārgavivarjitāḥ || 63 ||
[Analyze grammar]

yathāpekṣauṣadhānāṃ tu prayogiṇaḥ subhaktayaḥ |
jantuhiṃsāvihīnāśca kāṣṭhadhātvādiyoginaḥ || 64 ||
[Analyze grammar]

durlabhāste devavaidyāsteṣāṃ pūjā tu puṇyadā |
atha lakṣmi gate kāle patnī gadārdanasya sā || 65 ||
[Analyze grammar]

kṣayarogeṇa vai vyāptā'bhavannāmnā mukundinī |
vaiṣṇavī patibhaktā ca śraddhābhāvaguṇānvitā || 66 ||
[Analyze grammar]

sā tvābālyāddharerbhaktā'bhavat snātrī prapūjikā |
bhaktimatī dharmavatī pātivratyaparāyaṇā || 67 ||
[Analyze grammar]

vratadānatapaḥkartrī nityaṃ sādhuprasevikā |
kṛṣṇakathāyā raktā ca śaucasantoṣaśobhanā || 68 ||
[Analyze grammar]

tanvā manasā vāṇyā ca karmabhiḥ sādhusevikā |
kṛṣṇasevāparā nityaṃ navadhābhaktisaṃyutā || 69 ||
[Analyze grammar]

hāranaivedyadhūpādividhātrī viṣṇupūjikā |
ātmanivedinī mahābhāgavatī haripriyā || 70 ||
[Analyze grammar]

śīlasatyaparā sādhvīdharmayuktā''tmanaiṣṭhikī |
divyā divyaguṇopetā bhagavannaiṣṭhikī sadā || 71 ||
[Analyze grammar]

dhyānaparā ca sarvasvārpaṇaparā harau mayi |
lakṣmi tvetādṛśī bhaktā kintu saṃgāt suduḥkhitā || 72 ||
[Analyze grammar]

patyurardhaṃ samastaṃ vai bhujyate nijayoṣitā |
saivaṃ duḥkhaparā rugṇā vartate bhajate tu mām || 73 ||
[Analyze grammar]

tasyā varṣe gate kṣīṇāyāstu patirmṛto'bhavat |
parādhīnā ca vidhavā ruroda kurarīva sā || 74 ||
[Analyze grammar]

patyurasadgatiṃ vīkṣya smṛtvā putrīsutādikān |
mṛtān bhrātṝṃśca vai smṛtvā svasyā asadgatiṃ tathā || 75 ||
[Analyze grammar]

cukrośā''krandanairdhairyavarjitā kṣayarogiṇī |
śrutvā cākrośanaṃ devāḥ kṣaṇaṃ stabdhāstadā'bhavan || 76 ||
[Analyze grammar]

ṛtavaścāpi tattvāni kṣaṇaṃ jaḍāni cā'bhavan |
athā'haṃ sahasā lakṣmi cāntarātmā nijānumaḥ || 77 ||
[Analyze grammar]

mukundinyā hṛdayastho vatsalo duḥkhito'bhavam |
dhairyaṃ dadau cāntarātmā sadvicāreṇa cāpyaham || 78 ||
[Analyze grammar]

sāpi vijñānamāsādya dhairyamālambya māṃ harim |
asmarad bahudhā lakṣmi nātha nātha kṛpāṃ kuru || 79 ||
[Analyze grammar]

bhaktāyā cāpi duḥkhāyāṃ vidhavāyāṃ kṛpāṃ kuru |
sarvasvanāśayuktāyāṃ śeṣāyāṃ vatsalo bhava || 80 ||
[Analyze grammar]

duḥkhānāṃ nāsti me sīmā samuddhara bhavārṇavāt |
prathamaṃ māṃ mārayitvā tataḥ patiṃ pramāraya || 81 ||
[Analyze grammar]

sadhavāyā gatirme syād vidhavāyā gatirnahi |
eṣā'haṃ vahnimutpādya sajīvā prajvalāmi vai || 82 ||
[Analyze grammar]

satītvaṃ sarvathā yogyaṃ vidhavātvaṃ bhayāvaham |
kṛpā te'sti samāyāhi jīvayainaṃ nirogiṇam || 83 ||
[Analyze grammar]

naivaṃ cenmaraṇaṃ dehi yugapattūbhayorapi |
ityuktyā sā mama bhaktā kṣaṇaṃ dadhyau tu māṃ hṛdi || 84 ||
[Analyze grammar]

tāvanmayā pārṣadā me preṣitāstatpatiṃ prati |
yāmyadūtairnīyamānaṃ duḥkhinaṃ śaraṇaiṣiṇam || 85 ||
[Analyze grammar]

pārṣadairme drutaṃ gatvā viyojito yamārthibhiḥ |
gṛhītaścānīta eva dehaṃ praveśitaḥ punaḥ || 86 ||
[Analyze grammar]

utthitaḥ sahasā deho'kasmād bandhanabandhitaḥ |
śavārthino'bhavan stabdhā mahāścaryasamanvitāḥ || 87 ||
[Analyze grammar]

kecijjagaduḥ pāpānāmapūrṇaṃ pāpabhoganam |
punaḥ pāpaprabhogāyā''gato yāmyairna rakṣitaḥ || 88 ||
[Analyze grammar]

apare tu tadā prāhuḥ satyāḥ patnyāstu bhaktitaḥ |
utthitaścātibhaktyā vai nīrogo'yaṃ bhaviṣyati || 89 ||
[Analyze grammar]

anye prāhurvāsaniko vartate'yaṃ hi pāpavān |
na yāti paralokaṃ svāṃ patnīṃ vihāya caikalaḥ || 90 ||
[Analyze grammar]

itare tu tadā prāhuḥ karmarekhā hi durgamā |
ityevaṃ te viremuśca nirbandhanaṃ vyadhuśca tam || 91 ||
[Analyze grammar]

atha lakṣmi tadā cā'haṃ patnyā bhakteḥ pratāpataḥ |
puro divyamabhavaṃśca mūrtimān pārṣadaiḥ saha || 92 ||
[Analyze grammar]

caturbhujo divyadehaḥ kṛṣṇanārāyaṇaḥ prabhuḥ |
avadaṃ ca mukundinyai varaṃ vṛṇu madagrataḥ || 93 ||
[Analyze grammar]

sā'pi cotthāya sahasā patitā pādayormama |
gadārdano'pi māṃ vīkṣya nīroga iva nidritaḥ || 94 ||
[Analyze grammar]

utthāya nyapatacchīghraṃ pādayormama bhūtale |
varadānāya ca mayā niyuktāvūcatuśca tau || 95 ||
[Analyze grammar]

mokṣaṃ dehi kṛpāsindho parameśa ramāpate |
sarvaṃ kālena nītaṃ nau hyāvāṃ nirvāsanau kṛtau || 16 ||
[Analyze grammar]

vaidyavaidyo mahākālastadvaidyaḥ parameśvaraḥ |
yāmyahūtau drāvitau tvatpārṣadairiha sarvathā || 97 ||
[Analyze grammar]

mokṣaṃ dehi yatheṣṭaṃ vā niyojaya pareśvara |
evaṃ prārthayamānābhyāṃ tathetyuktvā vimānake || 98 ||
[Analyze grammar]

adhyāropya divaṃ śreṣṭhaṃ preṣayāmāsa pārṣadaiḥ |
satībhaktipratāpena satī mukundinī tadā || 99 ||
[Analyze grammar]

divaṃ tyaktvā satīlokaṃ patyā saha yayau drutam |
pārṣadā me tu tāṃ svāmisahitāṃ vai mukundinīm || 100 ||
[Analyze grammar]

avasthāpya satīlokaṃ prayayurmama dhāma ha |
evaṃ kālāntare prāpte tau yāsyataḥ paraṃ padam || 101 ||
[Analyze grammar]

lakṣmi bhaktāpratāpena vaidyo yāmyaṃ vihāya ca |
satīlokaṃ yayau yasya pāpapuñjo'bhavanmahān || 102 ||
[Analyze grammar]

tathāpi strīpratāpena kṛpayā me layaṃ gataḥ |
ardhāṃganākṛtaṃ puṇyamardhaṃ tu labhate patiḥ || 103 ||
[Analyze grammar]

vratadānādikaṃ bhaktiḥ sarvamardhaṃ prapadyate |
evaṃ sambandhinaḥ putrāḥ striyo mitrāṇi cāpare || 104 ||
[Analyze grammar]

kurvanti pretanāmnā'pi puṇyaṃ prete prapadyate |
tasmācchrāddhaṃ makhaṃ dānaṃ kurvanti pṛṣṭhato janāḥ || 105 ||
[Analyze grammar]

bhaktitulyaṃ mokṣadaṃ vai sādhanaṃ netarad rame |
paṭhanācchravaṇādasya bhuktirmuktiśca vai bhaveta || 106 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne gadārdaneśvaranāmakavaidyasya pāpairduḥkhāni tatpatnyā mukundinyā bhaktyā ca mokṣaṇamityādinirūpaṇanāmā ṣaḍviṃśatyadhikadviśatatamo'dhyāyaḥ || 226 ||
[Analyze grammar]