Chapter 215

puruṣottama uvāca |
śṛṇu nārāyaṇīśri tvaṃ śilāhārakathāṃ tathā |
nāmnā dāmaśilādau vai purā sudāmapattane || 1 ||
[Analyze grammar]

nyavasat sakuṭumbo'yaṃ khanyaśmavikrayodyamaḥ |
śataśo vai janā bhṛtyā yatrodyamaṃ prakurvate || 2 ||
[Analyze grammar]

śilāstu mahatīrdīrghā niṣkāsayanti bhūstarāt |
preṣayanti videśeṣu devarājālayārthikāḥ || 3 ||
[Analyze grammar]

śikharāṇi vicitrāṇi prāsādā bhinnajātayaḥ |
śvetaśilāmayā divyāḥ śilpakalādiśobhitāḥ || 4 ||
[Analyze grammar]

jāyante śilpivaryāṇāṃ kalābhistacchilākṛtāḥ |
pāṣāṇānāṃ hi khananaṃ divā tu khanibhūstare || 5 ||
[Analyze grammar]

satataṃ tadabhijñaistu kriyate dāmanoditaiḥ |
draṣṭā dāmaśilādo vai pramātā mūlyakṛttathā || 6 ||
[Analyze grammar]

nirīkṣaṇaṃ yathākālaṃ kurute khanibhūstare |
karmacārā yatante ca niṣkāsane'dhirohaṇe || 7 ||
[Analyze grammar]

śakṭyā gantrikāyāṃ ca bahusādhanasampadaḥ |
tatra dāmaśilādo vai krayārthaṃ cā''gatārthine || 8 ||
[Analyze grammar]

śilā dadāti mūlyena dāmnā yathocitāḥ śubhāḥ |
mūrtiyogyā bahumūlyāḥ saudhayogyāstathāvidhāḥ || 9 ||
[Analyze grammar]

gṛhayogyā bhittiyogyāḥ starayogyāstathā'parāḥ |
vibhinnamūlyabhāvaiśca dadāti tāstadarthine || 10 ||
[Analyze grammar]

bhṛtyā dāmaśilādasya gantryāmārohayanti tāḥ |
vṛṣabhairuṣṭrakairhastivaryaiśca geṇḍakaistathā || 11 ||
[Analyze grammar]

mahiṣairyantravayaiścā''karṣayanti sugantrikāḥ |
sarvatra rakṣaṇaṃ nārāyaṇo hi bhagavān svayam || 11 ||
[Analyze grammar]

karotyārohaṇe cāvarohaṇe ca prasāraṇe |
utthāpane'pasaraṇe vivartane vidāraṇe || 13 ||
[Analyze grammar]

śatabhārāstatra kācit kācittato'dhigurviṇī |
tadardhāśca tadardhāśca khanyante nityameva tāḥ || 14 ||
[Analyze grammar]

kvacicchilātibhāreṇa śakaṭī bhaṃgameti hi |
śilātale hi śakaṭī cūrṇitā kaccarāyate || 15 ||
[Analyze grammar]

akasmādāpadādyāsu rakṣatyeva prabhurhariḥ |
vicāryetthaṃ karmacārān dāmaśilāda uttamam || 16 ||
[Analyze grammar]

hare nārāyaṇa svāmin vallabha śrīpate hare |
ityevaṃ bhajanaṃ saṃkīrtanaṃ ca raṭanaṃ hareḥ || 17 ||
[Analyze grammar]

upādideśa satataṃ rakṣaṇaṃ yena mokṣaṇam |
svayaṃ karoti bhajanaṃ bhṛtyān prakārayatyapi || 18 ||
[Analyze grammar]

śilāsu kṛṣṇanāmāni guṇavanti nyayojayat |
kṛṣṇaśilā rāmaśilā nārāyaṇaśilā tathā || 19 ||
[Analyze grammar]

lakṣmīśilā ramopalā rādhopalā haropalā |
devopalā mandirā'śmā mūrtyupalā satīśilā || 20 ||
[Analyze grammar]

viṣṇuśilā brahmaśilā parameśaśileti ca |
devīśilā sūryaśilā tīrthaśilā gurūpalā || 21 ||
[Analyze grammar]

mokṣaśilā cātmaśilā muktiśileti vai tathā |
avatāraśilā tadvad golokaprastarastathā || 22 ||
[Analyze grammar]

vaikuṇṭhaśilā cakrāśmā śālagrāmaśilā tathā |
bhagavatprastaraścāpi janārdanaśileti ca || 23 ||
[Analyze grammar]

yogaśilā jñānaśilā dhyānaśileti nāmabhiḥ |
śilāvargāḥ kṛtāstena nārāyaṇaprasattaye || 24 ||
[Analyze grammar]

nārāyaṇaṃ raṭiṣyāmi śilāyogena mānavāḥ |
śubhanāma grahīṣyanti pāpanāśakamuttamam || 25 ||
[Analyze grammar]

ityabhipretya nāmāni hareḥ suyojitāni vai |
tena dāmaśilādena śilāsu mokṣadāni hi || 26 ||
[Analyze grammar]

mānavā api gṛhṇanti śilāvyājena śārṅgiṇaḥ |
nāmāni bhṛtyavargāśca śreṣṭhinaḥ pāvanāni vai || 27 ||
[Analyze grammar]

evaṃ bhaktena sadbhaktiḥ kāritā kīrtanātmikā |
pāvitāśca narā nāryaḥ prākṛtā api nāmabhiḥ || 28 ||
[Analyze grammar]

puṇyaṃ mahattamaṃ tasya jātaṃ prasannatātmakam |
mamā'nugraharūpaṃ vai vardhate'pi nirantaram || 29 ||
[Analyze grammar]

bhaktabhaktiṃ samākarṇya tadgṛhaṃ mānavā rame |
santo bhaktāḥ samāyānti dhārmikā yātribhikṣukāḥ || 30 ||
[Analyze grammar]

militvā te prakurvanti bhajanaṃ mama kīrtanam |
śilājanyāṃ mama mūrtiṃ sampratiṣṭhāpya vai gṛhe || 31 ||
[Analyze grammar]

pūjayanti sadā bhāvairmahotsavaiḥ suvastubhiḥ |
gāyanaṃ nartanaṃ gītiṃ kurvanti rāsamagrataḥ || 32 ||
[Analyze grammar]

dhūpadīpādikaṃ cāpi naivedyaṃ ca jalaṃ ca me |
samarpya matprasādaṃ te gṛhṇanti ca viyanti ca || 33 ||
[Analyze grammar]

evaṃ satsaṃgasaṃgho vai dāmaśilādamandire |
puṣṭiṃ prāptastadā lakṣmi prasanno'haṃ viśeṣataḥ || 34 ||
[Analyze grammar]

abhavaṃ ca pratimāyāṃ vartamāno nirantaram |
kṛtāṃ sevāṃ ca gṛhṇāmi rakṣāṃ karomi sarvathā || 35 ||
[Analyze grammar]

athaikadā gṛhe bhaktaścāsīd bhṛtyāstu vai khanau |
krośadūre'bhavan sarve śilāniṣkāsane ratāḥ || 36 ||
[Analyze grammar]

dīrghā mahopalā taiśca niṣkāsitā bahiḥ kṛtā |
āropitā śakaṭyāṃ ca bhagnā sā śakaṭī drutam || 37 ||
[Analyze grammar]

śakaṭīpārśvagā bhṛtyāḥ karmacārāstu ye'bhavan |
teṣu dvitrāḥ śakaṭyāṃ vai kaccaritāḥ śilātale || 38 ||
[Analyze grammar]

hāhā śokastadā tatra vyajāyata janeṣu vai |
jalaṃ kaccaritāḥ pātuṃ prārthayāmāsureva te || 39 ||
[Analyze grammar]

dadurvāri tato mūrchāṃ prāpuste maraṇonmukhāḥ |
athā'nye sasmarurnārāyaṇaṃ māṃ rakṣakaṃ prabhum || 40 ||
[Analyze grammar]

prayatna sahasā cakrarbhārākrāntāvanāya te |
śakaṭīṃ ca śilāṃ cāpyuttolya sambhūya mānavaiḥ || 41 ||
[Analyze grammar]

niṣkāsitāḥ kaccaritā dvitrāste karmacāriṇaḥ |
abhānā gatabhānāste mṛtyūnmukhāḥ suduḥkhitāḥ || 42 ||
[Analyze grammar]

vartante tāvadevā'pi karmacārairniveditaḥ |
bhakto dāmaśilādo vai gṛhe gatvā tu satvaram || 3 ||
[Analyze grammar]

āyayau sa khaniṃ yāvat smṛtvā nārāyaṇaṃ hi mām |
tāvadahaṃ sādhuveṣo'ṭavītaścāyayau khanim || 44 ||
[Analyze grammar]

bhojanārthaṃ bhikṣukaḥ san jalārthaṃ bhikṣayan jalam |
vilokya tān kaccaritānāścaryaparamo'bhavam || 45 ||
[Analyze grammar]

stabdho'bhavaṃ kṣaṇaṃ te tu prārthayāmāsuracyutam |
hare kṛṣṇa dīnabandho samujjīvaya dīnanṝn || 46 ||
[Analyze grammar]

manuṣyahatyā bhaktasya yathā na syāt prarakṣaya |
raṃkarakṣāvidhātā tvaṃ bhaktecchāpūrako bhavān || 47 ||
[Analyze grammar]

sarvaduḥkhaprahātā tvaṃ prarakṣaya nijāñjanān |
nā'trauṣadhaṃ bhavecchaktamasthikaccaracūrṇite || 48 ||
[Analyze grammar]

dehe raktātirikte'tra vinā tvāṃ jīvanaṃ nahi |
camatkāraṃ vinā siddhiṃ vinā naiṣāṃ hi jīvanam || 49 ||
[Analyze grammar]

mṛtaprāyā mṛgāśceme nānyastvāṃ yoginaṃ vinā |
navīkartuṃ samīkartuṃ sandhiṃ kartuṃ kṣamo'paraḥ || 50 ||
[Analyze grammar]

ityevaṃ vadamānānāṃ śṛṇvan sādhurjalaṃ kare |
samādāya dadau tebhyo mukhe tvācamanīyakam || 51 ||
[Analyze grammar]

rakṣāṃ nidhāya kukṣisthaṃ bhasma dhṛtvā karadvaye |
mardayāmāsa bhagnānāṃ deheṣvabhita ādarāt || 52 ||
[Analyze grammar]

tāvatte svasthatāṃ prāptāḥ sandhitā nīrujīkṛtāḥ |
raktapūrṇā abhavaṃśca yathāpūrvaṃ tathaiva te || 53 ||
[Analyze grammar]

utthitāḥ svapnato yadvat praṇemuḥ sādhuyoginam |
jīvanaṃ prāpya viśrāntiṃ lebhuḥ kṣaṇaṃ sataḥ puraḥ || 54 ||
[Analyze grammar]

sādhurbhikṣāṃ jagṛhe ca jalānnaṃ bubhuje tataḥ |
te'pi sarve prasādaṃ ca samyag bubhujire mama || 55 ||
[Analyze grammar]

atha śāntyā niṣeduste sevamānāḥ padāmbuje |
papracchurmāṃ pāpanāśakaraṃ sādhanamuttamam || 56 ||
[Analyze grammar]

nārāyaṇasya vijñānaṃ mūrtirūpaṃ tathottamam |
ahaṃ vai kathayāmāsa sarvaṃ tebhyo yathātatham || 57 ||
[Analyze grammar]

satāṃ sevā harerbhaktistīrthānāṃ sevanaṃ tathā |
pāpanāśakarāṇyeva bhavanti bhagavatkṛpā || 58 ||
[Analyze grammar]

satāṃ samāgamenaiva vijñānaṃ śrīharerbhavet |
sacchāstrāṇāṃ śīlanena kathāyāḥ śravaṇena ca || 59 ||
[Analyze grammar]

pūrvasaṃskārabalato vijñānaṃ jāyate hareḥ |
yogābhyāsena sahasā kalmaṣāṇāṃ vināśane || 60 ||
[Analyze grammar]

yogigatyā brahmagatyā kṛṣṇamūrtiḥ prakāśate |
piṇḍe'sti ghaṭanā ramyā yādṛśī tādṛśī punaḥ || 61 ||
[Analyze grammar]

vairāje vartate cāpi sūkṣmā sthūletyabhedataḥ |
dehe tu mānave nāḍyo brahmāṇḍe nadikāstu tāḥ || 62 ||
[Analyze grammar]

dehe tu kukṣayaḥ santi brahmāṇḍe cā'bdhayastu te |
pādamūlaṃ tu pātālaṃ mūrdhā satyaṃ kaṭirhi bhūḥ || 63 ||
[Analyze grammar]

dehasthendriyanāḍīnāṃ vairājendriyanāḍikāḥ |
kāraṇāni tataścaikyabhāvā bhavanti tā imāḥ || 64 ||
[Analyze grammar]

yogābhyāsaratā jihvāprāntaṃ yānti samādhinā |
tadā vairājajihvāyā antaṃ paśyanti yoginaḥ || 65 ||
[Analyze grammar]

evaṃ sarvendriyāṇāṃ tu prāntaṃ yānti samādhinā |
tadā vairājendriyāṇāmantaṃ paśyanti yoginaḥ || 66 ||
[Analyze grammar]

suṣumṇā vartate madhye dehe'tra nābhimūrdhvagā |
vāme ceḍā piṃgalā tu dakṣe sthitā sadā'sti vai || 67 ||
[Analyze grammar]

suṣumṇāntaṃ tu mūrdhānaṃ gatvā vairājamīkṣate |
sā tu dīrghā brahmarandhrād vairājaṃ yogamṛcchati || 68 ||
[Analyze grammar]

tejaḥkiraṇarūpā vai vairājātpuruṣāvadhim |
mahāpuruṣarandhrāt sā tejaḥkiraṇasaṃjñitā || 69 ||
[Analyze grammar]

akṣareṇa ca tādātmyaṃ gatā tato harau hi sā |
pramātādātmyamāpannā vidyate kiraṇātmikā |
ataḥ suṣumṇāmārgeṇa yogī yāti paraṃ padam || 70 ||
[Analyze grammar]

hareḥ kiraṇaṃ niryan syāt sarvāvatāramantagam |
īśvareṣu ca jīveṣu vartate vyāpakaṃ hi tat |
tadbrahma tacca vijñānaṃ sattvaṃ prakāśa eva tat || 71 ||
[Analyze grammar]

tasya bhāsā sarvamidaṃ vibhāti jñānadīptimat |
snehātiśayataścaivaṃvidaḥ prabhā vivardhate || 72 ||
[Analyze grammar]

jāgrati vā svāpake vā suṣuptau vā yadā yadā |
harau syāllīnatā yasya snehena tatra taṃ vrajet || 73 ||
[Analyze grammar]

saṃkalpena hareścāpi śaktyā cāpi harestathā |
jñānaśaktyā kriyāśaktyā cecchāśaktyā harestathā || 74 ||
[Analyze grammar]

jīveśāḥ sampravartante jānantaḥ kriyayā'nvitāḥ |
karmavaśā sarvajīvāḥ svatantrā nahi santi vai || 75 ||
[Analyze grammar]

harerjñānakriyecchābhiḥ kriyecchājñāninaḥ khalu |
phalapradātā bhagavān karmaṇāmasti sarvathā || 76 ||
[Analyze grammar]

harestāḥ śaktayo nṝṇāṃ svasvakarmānusārataḥ |
jñānādīn prerayantyeva tena sṛṣṭiḥ pravartate || 77 ||
[Analyze grammar]

sṛṣṭerjīvā harau dhyānābhyāsād divyā bhavanti vai |
divyadṛṣṭaya evāpi tadā brahmasudarśanam || 78 ||
[Analyze grammar]

māyāguṇādiśūnyaṃ tannirguṇaṃ brahma taijasam |
nijairdivyaguṇairyuktaṃ saguṇaṃ brahma śāśvatam || 79 ||
[Analyze grammar]

pareśaṃ paramātmānaṃ parabrahma sanātanam |
prāpnuvanti mahātmānaḥ satāṃ satsaṃgasatphalāḥ || 80 ||
[Analyze grammar]

narākāraṃ divyamūrtiṃ śrīpatiṃ taṃ satāṃ patim |
divyamūrtiṃ parātmānaṃ yānti tadyoginastvime || 81 ||
[Analyze grammar]

divyatāṃ yānti bahavastatsamā brahmarūpiṇaḥ |
yathā brahmapriyā divyā yathā muktā hyasaṃkhyakāḥ || 82 ||
[Analyze grammar]

yathā lakṣmīryathā rādhā yathā satī sarasvatī |
tathā divyā bhavantyeva narā nāryaḥ parātmagāḥ || 83 ||
[Analyze grammar]

tasmānnārāyaṇaḥ kṛṣṇo bhajanīyo hi rakṣakaḥ |
mokṣadaḥ svargadaścāpi suṣumṇāmārgalabdhimān || 84 ||
[Analyze grammar]

khanau nārāyaṇo nityaṃ smaraṇīyo janārdanaḥ |
satāṃ mūrtau hariścāste sevanīyaḥ satāṃ gatiḥ || 85 ||
[Analyze grammar]

ityuktvā nirbhayān kṛtvā dadau mantraṃ tadā tvaham |
oṃ namaḥ śrīkṛṣṇanārāyaṇāya svāmine svāhā || 86 ||
[Analyze grammar]

atha te māṃ guruṃ matvā lakṣmi nijālayaṃ prati |
ninyuḥ sādhusvarūpaṃ māṃ camatkārijanaṃ gurum || 87 ||
[Analyze grammar]

bhojayāmāsuratyarthaṃ pāyayāmāsuriṣṭakam |
pāyasaṃ śarkarāyuktaṃ sevayāmāsurādarāt || 88 ||
[Analyze grammar]

pūjayāmāsurevā'pi kṣamāṃ yayācire tataḥ |
pādāmṛtajalaṃ me te papurmayā'pi vai tadā || 89 ||
[Analyze grammar]

āśīrvādairyojitāśca kṛpayā bhaktigocarāḥ |
bhuktirmuktirbhavatāṃ vai yatheṣṭā jāyatāṃ sadā || 90 ||
[Analyze grammar]

athā'hamabhavaṃ lakṣmi jigamiṣustadā tu te |
kṛṣṇapratyakṣalābhārthaṃ kṛṣṇadarśanalālasaḥ || 91 ||
[Analyze grammar]

yayācire mayā tathā'stviti tatra niyojitāḥ |
apaśyan māṃ śaṃkhacakragadābjadhāriṇaṃ harim || 92 ||
[Analyze grammar]

āścaryaṃ paramaṃ prāptāḥ pratyakṣayogino yathā |
divyā divyasvarūpāste vyajāyanta tadā drutam || 93 ||
[Analyze grammar]

nanṛtuśca jaguścāpi mumuduścātiharṣulāḥ |
pupūjurmāṃ parabrahma rakṣakaṃ prāṇarakṣakam || 94 ||
[Analyze grammar]

athā'haṃ tatra mūrtau me tiro'bhavaṃ hi paśyatām |
teṣāṃ tadā samārabhya te'pi mūrtiniṣeviṇaḥ || 95 ||
[Analyze grammar]

sarvathā''tmanivedāścā'bhavan bhaktāḥ sahasraśaḥ |
atha kāle samāyāte bhaktaṃ dāmaśilādakam || 96 ||
[Analyze grammar]

tasya bhṛtyān bahūn bhaktān tathā patnīṃ kalābhidhām |
vimānenā'nayaṃ dhāmā'kṣaraṃ me śāśvataṃ param || 97 ||
[Analyze grammar]

evaṃ lakṣmi mayā rakṣā kṛtā bhaktiśca kāritā |
jñānaṃ dattaṃ ca sāmarthyaṃ muktiścāpi kṛtā śubhā || 98 ||
[Analyze grammar]

evaṃ madīyabhaktānāṃ prānte mokṣaṃ karomyaham |
dadāmi divyatāṃ cāpi bhaktyā sādhyo yato'smyaham || 99 ||
[Analyze grammar]

paṭhanācchravaṇādasya smaraṇāt stavanādapi |
bhuktirmuktirbhavatyeva tatheṣṭā śubhadā gatiḥ |
vallabhaḥ śrīguruḥ svāmī prabhuḥ sarvagatistvaham || 100 ||
[Analyze grammar]

itiśrīlakṣmīnārāyaṇīyasaṃhitāyāṃ tṛtīye dvāparasantāne śilāhārasya dāmaśilādanāmakabhaktasya bhṛtyānāṃ rakṣaṇaṃ dāmaśilādādeścānte mokṣaṇaṃ ca bhagavatā kṛtamityādinirūpaṇanāmā pañcadaśādhika |
dviśatatamo'dhyāyaḥ || 215 ||
[Analyze grammar]