Chapter 214

śrīpuruṣottama uvāca |
śṛṇu nārāyaṇīśri tvaṃ rathakārasya śobhanam |
vṛttāntaṃ mama bhaktyāḍhyaṃ sutāragrāmavāsinaḥ || 1 ||
[Analyze grammar]

raṅgamayīsarittīre rathakāro'tipāvanaḥ |
sutārapuryāmabhavanmama bhaktaḥ kuṭumbavān || 2 ||
[Analyze grammar]

kāṣṭhayānāni sarvāṇi gantrīśca śakaṭāni ca |
anaścakrāṇi sarvāṇi kāṣṭhāsanāni maṃcakān || 3 ||
[Analyze grammar]

bṛsīḥ khadvāśca paryaṃkān kapaṭān prakaroti saḥ |
kāṣṭhapātrāṇi ramyāṇi kāṣṭhaputtalaputtalīḥ || 4 ||
[Analyze grammar]

kāruvaryaḥ karotyeva naukā gajāśvagovṛṣān |
vividhānyupakaraṇānyapi svakalayā tathā || 5 ||
[Analyze grammar]

karoti peṭikāścāpi peṭakān sucatuṣkikāḥ |
tatra sarvatra kāryeṣu harernāma likhatyapi || 6 ||
[Analyze grammar]

svanāma haridāseti likhitvā ca tataḥ param |
hariśceti hi sarveṣu vastuṣvayaṃ likhatyapi || 7 ||
[Analyze grammar]

gṛhe ca kāṣṭhaśālāyāṃ lilekha śrīhare prabho |
gṛhajālāntare kāṣṭhapratimāṃ paramātmanaḥ || 8 ||
[Analyze grammar]

anādiśrīkṛṣṇanārāyaṇasyā'sthāpayaddhi saḥ |
prātaḥ samūjayatyenāṃ pratimāṃ mama śobhanām || 9 ||
[Analyze grammar]

śriyā sākaṃ puṣpapatracandanā'kṣatakuṃkumaiḥ |
bhūṣāvastradravadhūpadīpanaivedyavāribhiḥ || 10 ||
[Analyze grammar]

evaṃ sampūjya nityaṃ vai prasādaṃ grasate tataḥ |
anyebhyaḥ sampradāyā'pi tataḥ kārye pravartate || 11 ||
[Analyze grammar]

udyame smarati māṃ lakṣmīnārāyaṇaṃ prabhum |
harikṛṣṇaṃ bālakṛṣṇaṃ haridāsaḥ subhaktarāṭ || 12 ||
[Analyze grammar]

athaikadā vicāro'syā'bhavad devādigocaraḥ |
anyodyogaṃ vihāyaiva pratimodyogamāvahe || 13 ||
[Analyze grammar]

yāsāṃ nirmāṇakārye vai dhyānaṃ devātmakaṃ bhavet |
smaraṇaṃ cāpi devānāṃ rūparaṅgādikarmasu || 14 ||
[Analyze grammar]

satataṃ syāt kīrtanaṃ cārpaṇaṃ mūrtimayaṃ bhavet |
evaṃ vicārya ca haridāso haryarthamutsukaḥ || 15 ||
[Analyze grammar]

harimūrtimayodyogaṃ samārabhata bhāvataḥ |
puruṣottamamūrtiṃ sa vyaracayat suśobhanām || 16 ||
[Analyze grammar]

anādiśrīkṛṣṇanārāyaṇamūrtiṃ samāṇikīm |
rādhākṛṣṇayugalaṃ ca lakṣmīnārāyaṇobhayam || 17 ||
[Analyze grammar]

vāsudevaṃ śriyā sākaṃ viṣṇuṃ ca kamalāyutam |
naraṃ nārāyaṇaṃ cāpi śeṣaśāyinarāyaṇam || 18 ||
[Analyze grammar]

śrīpatiṃ śrīgaruḍasthaṃ gajasthaṃ māṇikīsthitam |
vimānasthaṃ rathasthaṃ cā'racayad divyaśobhanam || 19 ||
[Analyze grammar]

duḥkhahāśrīsahitaṃ ca gobhiśca sahitaṃ prabhum |
matsyaṃ kūrmaṃ ca vārāhaṃ kapilaṃ ca hariṃ tathā || 20 ||
[Analyze grammar]

vāsudevaṃ rājarājaṃ pṛthuṃ dattaṃ nṛsiṃhakam |
haṃsamṛṣabhaṃ paraśudharaṃ yajñaṃ ca vāmanam || 21 ||
[Analyze grammar]

rāmaṃ kumāraṃ vyāsaṃ ca hayagrīvaṃ ca nāradam |
bālakṛṣṇaṃ ca buddhaṃ ca kalkiṃ nārāyaṇīpatim || 2 ||
[Analyze grammar]

haraṃ satīṃ ca brahmāṇaṃ sāvitrīṃ ca sarasvatīm |
prajñāṃ pārāvatīṃ durgāṃ gaṃgāṃ ca kālikāṃ tathā || 23 ||
[Analyze grammar]

sūryaṃ vahniṃ candramasaṃ gaṇeśaṃ kālabhairavam |
nandaṃ sunandaṃ liṅgaṃ cā'racayat pratimāḥ śubhāḥ || 24 ||
[Analyze grammar]

kāṣṭhānāṃ savanānāṃ vai sasarjānāṃ sāgaśākhinām |
vaṭānāṃ śiṃśapānāṃ ca karoti pratimāḥ śubhāḥ || 25 ||
[Analyze grammar]

svalpā madhyāścottamāśca vividhāḥ sa karoti vai |
raṃgaśṛṃgārayuktāśca saṃskṛtāścihnitatvacaḥ || 26 ||
[Analyze grammar]

bhajan raṭan hariṃ nāma nirmāti pratimāḥ sadā |
yāsāṃ rūpāṇi hṛdaye bhāsante na tadā tu saḥ || 27 ||
[Analyze grammar]

raho niṣadya māṃ smṛtvā rūpaṃ dhārayate mama |
hṛdaye sve caikatāno manmūrtau sa prajāyate || 28 ||
[Analyze grammar]

samastendriyavṛttīnāṃ layo bhavati vai mayi |
yathā tathā sa yatate yogivad dhyāyati sthiraḥ || 29 ||
[Analyze grammar]

dinārdhaṃ vā dinaṃ yāti samādhāviva tasya vai |
tathāpi premamagno'sau na niryāti samādhitaḥ || 30 ||
[Analyze grammar]

mūrtiścintāmaṇikalpā vartate mādhavasya yat |
tasyāḥ sakāśāt saṃkalpāḥ pūrṇā bhavanti dhāritāḥ || 31 ||
[Analyze grammar]

itiniścayayuktasya haridāsasya sarvathā |
yāvannodeti rūpaṃ vai kartavyapratimātmakam || 32 ||
[Analyze grammar]

tāvat samādhau manmūrtau sthirastiṣṭhati tanmayaḥ |
icchan draṣṭuṃ nūtnarūpaṃ racanārhaṃ suśobhanam || 33 ||
[Analyze grammar]

atha me kṛpayā mūrteḥ rūpaṃ yadā'bhijāyate |
kartavyapratimārūpaṃ dṛṣṭvā dhṛtvā punaḥ punaḥ || 34 ||
[Analyze grammar]

abhyasya ca tato bhakto bahiryāti na cānyathā |
yādṛg dṛṣṭaṃ svarūpaṃ vai sādhyamūrtestathāvidham || 35 ||
[Analyze grammar]

kāṣṭhācchilpakalābhiśca niṣkāsayati śobhanam |
saumyaṃ suhāsyavadanaṃ sarvayogyasuśastrakam || 36 ||
[Analyze grammar]

yogyaśṛṃgārabhūṣāḍhyaṃ tathotkaroti kāṣṭhajam |
dāravaṃ sundaraṃ rūpaṃ yādṛśaṃ hṛdi vīkṣitam || 37 ||
[Analyze grammar]

tādṛśaṃ saṃvidhāyaiva vikrīṇāti suraṃgitam |
evaṃ samastadevānāṃ hanumadyatiyoginām || 38 ||
[Analyze grammar]

sādhvīnāṃ devatānāṃ ca kṛtvā karoti vikrayam |
dhyāyati devatāḥ sarvā viśeṣatastu vallabham || 39 ||
[Analyze grammar]

lakṣmīṃ nārāyaṇaṃ śrīśaṃ dhyāyati puruṣottamam |
tato'haṃ matpratimātastadiṣṭaṃ pūrayāmyapi || 40 ||
[Analyze grammar]

khyātistasyā'bhavalloke haridāso harestanuḥ |
rājānaścāpi tasmādvai kārayantīṣṭadevatāḥ || 41 ||
[Analyze grammar]

haridāso'pi kṛtvaiva dadātyeva śubhottamāḥ |
haridāsena niyamaḥ kṛto nārāyaṇaṃ vinā || 42 ||
[Analyze grammar]

nārāyaṇāṃśaṃ ca vinā mānavī pratimā mayā |
na vai kāryā kvacid bhaktivirodhinī tu māyikī || 43 ||
[Analyze grammar]

nimnacintanadā naiva kāryā mānuṣaputtalī |
abhaktānāṃ naiva kāryā tathā mānuṣaputtalī || 44 ||
[Analyze grammar]

bhaktānāṃ tu śubhā kāryā tadiṣṭadevatāyutā |
evamātmaniveditvaṃ rarakṣa nityadā hi saḥ || 45 ||
[Analyze grammar]

prasanno'haṃ tato lakṣmi parīkṣārthamupāyayau |
cakravatīśvaro bhūtvā tīrthavyājena mārgagaḥ || 46 ||
[Analyze grammar]

hastyaśvarathavān pāresahasrasainikānvitaḥ |
rājñīdāsīdāsavargasahasraparisevitaḥ || 47 ||
[Analyze grammar]

ratnahīrakahārādyairbhūṣitaśchatraśobhitaḥ |
mahāśvetagajapṛṣṭhe svarṇāmbālikayā'nvite || 48 ||
[Analyze grammar]

niṣaṇṇaścāmarairyu'kto jayaśabdābhipūjitaḥ |
astraśastradharaiścāpi bhaṭaiḥ samparivāritaḥ || 49 ||
[Analyze grammar]

gurvamātyapradhānādyairvanditaḥ sevitastathā |
lakṣmi tvaṃ ca mama patnī sāmrājñī śobhanottamā || 50 ||
[Analyze grammar]

sahasraśobhanādāsīyuvatīgaṇamaṇḍitā |
mayā preritabhṛtyābhirakṣitā bhṛtyapūjitā || 51 ||
[Analyze grammar]

mahāsauvarṇaratnāḍhyanarayānasthitā tathā |
upāyayitha sākaṃ vai mayā pūrvaprapreṣitā || 52 ||
[Analyze grammar]

evaṃvidho'haṃ samrāṭ vai raṅgamayīnadītaṭe |
tīrthayātrāmiṣeṇā'gre vṛkṣaṣaṇḍe viniryayau || 53 ||
[Analyze grammar]

tīrthataṭaṃ mahāśālagrāmatīrthā'bhidhaṃ varam |
samāśritya sthiratārthamavātaraṃ gajānmama || 54 ||
[Analyze grammar]

sasainyo'haṃ nyavasaṃśca snānapūjādimānasaḥ |
athā''yayuḥ sutārākhyanagarasthāḥ prajājanāḥ || 55 ||
[Analyze grammar]

guravaścāpi viprāśca bhikṣukāḥ sakutūhalāḥ |
lipsayā dakṣiṇādeśca vikṣaṇecchānvitā api || 56 ||
[Analyze grammar]

āyayau nagaraṃ sarve draṣṭuṃ rājānamityapi |
tathāpi bhaktarājo'sau nā''yāti māyikaṃ vidan || 57 ||
[Analyze grammar]

athā'haṃ tīrthavidhinā kṛtvā tīrthaṃ tataḥ param |
datvā dānānyanekāni śuśrāva pratimāḥ śubhāḥ || 58 ||
[Analyze grammar]

dadarśa pratimāścāpi tīrthataṭe sthirīkṛtāḥ |
papraccha mānavāṃstatrāgatān śilpivaraṃ prati || 59 ||
[Analyze grammar]

te prāhuratra nagare vartate śilpirāṇnanu |
ākārito mayā dūtairharidāso'pi nāyayau || 60 ||
[Analyze grammar]

vinā bhāgavataṃ santaṃ vinā nārāyaṇaṃ harim |
vinā bhaktaṃ hareranyasyā'ntikaṃ naimi so'vadat || 61 ||
[Analyze grammar]

tato'hamuktavānnāma madīyaṃ kṛṣṇadāsavat |
śrīkṛṣṇadāsavaryā'haṃ kṛṣṇabhakto bhavāmi ha || 62 ||
[Analyze grammar]

āyāhi śilpivarya tvaṃ pratimārthaṃ madicchayā |
dūtairgatvā tathaivoktaḥ so'pi śrutvā hyupāyayau || 63 ||
[Analyze grammar]

puṣpahārān gṛhītvaiva nyadhārayannṛporasi |
rājānaṃ kṛṣṇabhaktaṃ vai jñātvā neme'tibhāvataḥ || 64 ||
[Analyze grammar]

rājā'pi tasya sammānaṃ pracakāra suvijñavat |
śilpī lakṣmi mayā rājñā pṛṣṭo mūrtividhāpane || 65 ||
[Analyze grammar]

krīṇanārthaṃ ca mūrtīnāṃ mūlye'pi pṛṣṭa eva saḥ |
so'pi kṛṣṇasya mūrtiṃ vai dadau me rādhayā yutām || 66 ||
[Analyze grammar]

sahasrarūpyamudrābhistathā lakṣmīṃ narāyaṇam |
labdhvā'haṃ mudrikā datvā svarṇaśataṃ tathottaram || 67 ||
[Analyze grammar]

pāritoṣikamevāpi datvā'kathayaṃ matkṛte |
mamaikāṃ mama rājñyāśca mūrtimekāṃ vidhāpaya || 68 ||
[Analyze grammar]

dāsye yatheṣṭaṃ kanakaṃ ratnāni hīrakāṃstathā |
sa prāha rājan bhakto'smi nārāyaṇaparāyaṇaḥ || 69 ||
[Analyze grammar]

nārāyaṇavibhūtīnāṃ nārāyaṇasya vai tathā |
devānāṃ devatānāṃ ca karomi pratimāḥ sadā || 70 ||
[Analyze grammar]

mānavīṃ na karomyeva māyikīṃ na karomi ca |
yasyāḥ saṃklṛptane vṛttirnārāyaṇaṃ na cintayet || 71 ||
[Analyze grammar]

māyāṃ ca māyikīṃ cāpi puttalīṃ na smare kvacit |
tava rājanmahiṣyāśca puttalyāḥ karaṇe tu me || 72 ||
[Analyze grammar]

smaraṇaṃ mānavaṃ syādvai bhaktau kṣatirbhavenmama |
tato'haṃ na kariṣye vai puttalīṃ te kṣamasva mām || 73 ||
[Analyze grammar]

yadyapi tvaṃ prabhakto'si tathāpi rājaso'si vai |
rājño ceyaṃ mahāmāyā mohinī vartate tava || 74 ||
[Analyze grammar]

tatsmṛtiṃ na kariṣye'haṃ vinā lakṣmīṃ narāyaṇam |
yadi lakṣmyā samaṃ rājñī tvaṃ sākaṃ mādhavena tu || 75 ||
[Analyze grammar]

bhaktāvivobhau tiṣṭhantau sevāyāṃ staśca rocate |
te yadi tarhi kurve'haṃ mūrtiṃ śrīpatinā saha || 76 ||
[Analyze grammar]

kevalāṃ naiva kurve'haṃ necchāmi pāritoṣikam |
namaste ca kṣamasvā'pi rājā mānyaḥ prajājanaiḥ || 77 ||
[Analyze grammar]

ityuktvā bhaktarāṭ lakṣmi haridāso gṛhaṃ yayau |
rājā'haṃ mama bhaktaṃ samparīkṣyaivaṃ tu pṛṣṭhagaḥ || 78 ||
[Analyze grammar]

padbhyāṃ tasya gṛhaṃ prāpto lokāścāścaryamāpnuvan |
dadau sa bhaktarāṇmahyaṃ kāṣṭhāsanaṃ vivekataḥ || 79 ||
[Analyze grammar]

annaṃ jalaṃ śrīharaye'rpitaṃ dadāvadarśayat |
pratimā me samastāśca dhyānārthaṃ sa upāviśat || 80 ||
[Analyze grammar]

avigaṇayya me bhītiṃ dhairyaṃ dhṛtvā hareḥ śubham |
samādhau hṛdaye magnastadā'haṃ hṛdaye'bhavam || 81 ||
[Analyze grammar]

rājarūpastathā lakṣmī rājñīrūpā yathāyatham |
lakṣmīṃ nārāyaṇaṃ māṃ ca jñātvā śīghraṃ samutthitaḥ || 82 ||
[Analyze grammar]

svāgataṃ daṇḍavaccāpi cakre pradakṣiṇaṃ tu mām |
kīrtanaṃ sahasā cakre nanarta modavihvalaḥ || 83 ||
[Analyze grammar]

athā'nye tu janāstatra darśakā ye'bhavaṃstadā |
sarve dṛṣṭvā mahāścaryaṃ śrutvā bhaktoditaṃ tathā || 84 ||
[Analyze grammar]

nārāyaṇo hi samrāṇme bhūtvā gṛhamupāgataḥ |
lakṣmīrbhūtvā mahārājñī cāyayau bhāgyavānaham || 85 ||
[Analyze grammar]

aho bhāgyamaho bhāgyaṃ sutāragrāmavāsinām |
aho bhāgyaṃ mama patnyāḥ śrīmānavyāḥ śubhottamam || 86 ||
[Analyze grammar]

kuṭumbasya ca me bhāgyaṃ bhṛtyānāṃ bhṛtyayoṣitām |
bhāgyaṃ śreṣṭhatamaṃ tvadya yadgṛhe vallabhohariḥ || 87 ||
[Analyze grammar]

yadgṛhe śrīḥ samāyātā rājñīrūpā hareḥ priyā |
śrīmānavyāḥ śreyase ca haridāsasya muktaye || 88 ||
[Analyze grammar]

aho pratimānirmātuḥ phalaṃ sākṣāddharirgṛhe |
ātmaniveditālābhaścāho sākṣātprabhurgṛhe || 89 ||
[Analyze grammar]

kalā me sukalā jātā jīvanaṃ me sujīvanam |
prāptaḥ sākṣānmayā kṛṣṇanārāyaṇaḥ śriyā yutaḥ || 90 ||
[Analyze grammar]

śrutvaivaṃ janatāścāpi pupūjuḥ śrīpatiṃ nṛpam |
daṇḍavat tāḥ pracakruśca bhaktaḥ papāta pādayoḥ || 91 ||
[Analyze grammar]

tāvallakṣmi mayā naijaṃ rūpaṃ caturbhujaṃ param |
prakāśitaṃ tvayā lakṣmyā sākaṃ divyamanoharam || 92 ||
[Analyze grammar]

nadītaṭe tu yat sainyaṃ sarvaṃ tatra kṣaṇāntare |
tattirobhāvitaṃ tatra mahāścaryaṃ tato'bhavat || 93 ||
[Analyze grammar]

gṛhe'haṃ bhagavān sākṣād datvā me darśanaṃ tataḥ |
labdhvā pūjāṃ varadānaṃ mokṣārthaṃ sampradāya ca || 94 ||
[Analyze grammar]

prasannatāṃ samarpyaiva tatastūrṇaṃ tvayā saha |
kṣaṇaṃ sthitvā jagādā'haṃ bhaktāya cātmavedine || 95 ||
[Analyze grammar]

yo māmevaṃ hi bhajate tatkṛte sarvathā tvaham |
kalpalatāsamaścā'smi pūrayāmi manorathān || 96 ||
[Analyze grammar]

śilpino ye mama mūrtiṃ mama dhyānaparāyaṇāḥ |
lobhasvārthavihīnāśca kariṣyanti śubhāśayāḥ || 97 ||
[Analyze grammar]

teṣāṃ mokṣaṃ kariṣyāmi yathā te bhaktarāḍiha |
ityuktvā svasvarūpaṃ ca kṛṣṇe lakṣmyāṃ gṛhāntare || 98 ||
[Analyze grammar]

pūjanārthaṃ sthāpite ca sthāpitāyāṃ tirobhavam |
atha bhakto'pi nityaṃ māṃ dhyāyati smarate tathā || 99 ||
[Analyze grammar]

kāle prāpte vimānena tadgṛhaṃ samupasthitaḥ |
śrīmānavīṃ striyaṃ tasya haridāsaṃ ca taṃ tathā || 100 ||
[Analyze grammar]

ārohayitvā divyau tau kṛtvā'nayaṃ mamā'kṣaram |
anyān kālena tadvaccā'nayaṃ dhāmā'kṣaraṃ mama || 101 ||
[Analyze grammar]

evaṃ lakṣmi mayā bhakto rathakāro hi tāritāḥ |
paṭhanācchravaṇādasya bhuktirmuktirbhaved dhruvā || 102 ||
[Analyze grammar]

itiśrīlakṣmīnārāyaṇīyasaṃhitāyāṃ tṛtīye dvāparasantāne haridāsākhyasya rathakārasya bhaktyā sakuṭumbasya bhagavatā mokṣaḥ kṛta ityādinirūpaṇanāmā caturdaśādhikadviśatatamo'dhyāyaḥ || 214 ||
[Analyze grammar]