Chapter 216

śrīpuruṣottama uvāca |
śṛṇu nārāyaṇīśri tvaṃ śilpakalāvidaḥ kathām |
nāmnā sañjayadevasya mama bhaktasya śobhanām || 1 ||
[Analyze grammar]

kutarkapuravāso'bhūd bhakto nārāyaṇe mayi |
kuṭumbasahito nityaṃ bhajate māṃ śriyaḥ patim || 2 ||
[Analyze grammar]

bahudhā śilpinaṃ vetti kāṣṭhapāṣāṇadhātujam |
vṛkṣavallīstabakādi devarṣimānavādi ca || 3 ||
[Analyze grammar]

paśupakṣisarpakīṭādi ca tattvādikaṃ tathā |
sarvavidhaṃ kalayā sa vijānāti yathāyatham || 4 ||
[Analyze grammar]

sarvavidhe śilpane sañjayadevo hariṃ tu mām |
likhatyevā'ntare sūkṣmaṃ sūkṣmamūrtisvarūpiṇam || 5 ||
[Analyze grammar]

yathā'nye naiva jānīyustathā vai nāntarīyakam |
śilpe cāntaraśilpaṃ ca tadantare tu māṃ śubham || 6 ||
[Analyze grammar]

vidadhāti smaran māṃ sa sabījaṃ śilpinaṃ yataḥ |
divyaṃ bhavati śrīkṛṣṇā'rpitaṃ kṛṣṇasuyogavat || 7 ||
[Analyze grammar]

evaṃ kṛṣṇārpaṇaṃ bhaktaḥ karoti manmayaṃ sadā |
sarvaṃ madātmakaṃ śilpaṃ saphalodyamaśobhitam || 8 ||
[Analyze grammar]

bhakto nijāntare bhaktiṃ manute tatkalātmikām |
yatra nārāyaṇaścā'haṃ nirmītaḥ saṃbhavāmi ha || 9 ||
[Analyze grammar]

śilpakalāsu sarvāsu māṃ ca nārāyaṇaṃ harim |
caṣṭe dhyāyati kurute namati pūjayatyapi || 10 ||
[Analyze grammar]

prātarnityaṃ samutthāya dhyātvā'rhaṇaṃ karoti me |
mūrteḥ pañcāmṛtasnānaṃ tīrthasnānaṃ tathā'rghyakam || 11 ||
[Analyze grammar]

bhūṣāśṛṃgārā'mbarāṇi samarpayanti me sadā |
dhūpaṃ dīpaṃ ca naivedyaṃ tāmbūlakaṃ jalaṃ tathā || 12 ||
[Analyze grammar]

sugandhitailasāraṃ ca mahārhāsanamañcakam |
samarpayati natvā me kṛtvā ca daṇḍavat stavam || 13 ||
[Analyze grammar]

nityamarthayati śreyaścaihikaṃ pāralaukikam |
satāṃ samāgamaṃ kṛṣṇasevāṃ śrīkṛṣṇakīrtanam || 14 ||
[Analyze grammar]

karoti sañjayo nityaṃ keśavatyā svayoṣitā |
putreṇa suradevena sākaṃ gṛhe niśāmukhe || 15 ||
[Analyze grammar]

nṛtyaṃ ca gāyanaṃ kṛṣṇacamatkārakathāśravam |
karoti śubhanaivedyaṃ prasādasya pradānakam || 16 ||
[Analyze grammar]

bhuktvā prāsādikaṃ paścādudyoge vartate sadā |
evaṃ sañjayadevo me bhaktiniṣṭho hi vartate || 17 ||
[Analyze grammar]

tasyā''jñāyāṃ śilpino'nye vartante karmacāriṇaḥ |
te'pi sañjayayogena bhajante parameśvaram || 18 ||
[Analyze grammar]

athaikadā nṛpo nāmnā khaḍgavarmā vihārarāṭ |
svasya nūtanasaudhasya nirmityai taṃ samāhvayat || 19 ||
[Analyze grammar]

sāptabhaumasya kakṣāsu koṇe koṇe sthale sthale |
yāvatprasiddhajātīnāṃ puttalīsthāpanāya tu || 20 ||
[Analyze grammar]

ājñāṃ cakāra nṛpatirdhanavyaye'pyudāratām |
pradarśayan dadānaśca toṣayan karmaśilpinaḥ || 21 ||
[Analyze grammar]

bhakto'yaṃ nṛpaterājñāṃ svīcakārātimodavān |
śubhekṣaṇekṣitiṃ yogyavidhinā saṃprapūjya saḥ || 22 ||
[Analyze grammar]

khanitvā maṃgalaṃ tatra nṛpahastena saṃvyadhāt |
prāsādaḥ saptabhaumo vai sampannaścendrasaudhavat || 23 ||
[Analyze grammar]

sthale sthale puttalāni prātiṣṭhipanmahāntyapi |
ramyāṇi ca vicitrāṇi saumyamanoharāṇi ca || 24 ||
[Analyze grammar]

nārāyaṇasya kṛṣṇasya rādhāyāśca śriyāstathā |
sarasvatyāśca lakṣmyāśca māṇikyā brahmayoṣitām || 25 ||
[Analyze grammar]

śrīhareravatārāṇāmīśvarāṇāṃ śubhānyapi |
īśvarīṇāṃ pratimāśca maharṣisurayoginām || 26 ||
[Analyze grammar]

devīnāṃ devatānāṃ ca mānavānāṃ ca pakṣiṇām |
paśūnāṃ vanyajātīnāṃ grāmīṇānāṃ ca dehinām || 27 ||
[Analyze grammar]

pāvanānāṃ maṃgalānāṃ khyātānāṃ pratimāstathā |
udbhijjānāṃ suramyāṇāṃ dṛśyāni saritāṃ tathā || 28 ||
[Analyze grammar]

parvatānāṃ grahāṇāṃ ca vidyutāṃ vyomacāriṇām |
meghānāṃ ca samudrāṇāṃ dṛśyānyapi vyadarśayat || 29 ||
[Analyze grammar]

evaṃvidhaṃ mahāsaudhaṃ racayitvā sthale sthale |
sūkṣmaṃ nārāyaṇaṃ māṃ sa samasthāpayadacyutam || 30 ||
[Analyze grammar]

prasannamānaso bhakto vāstuṃ tasya nyavedayata |
rājā viprān samāhūya vāstupūjāmakārayat || 31 ||
[Analyze grammar]

havanāni bhojanāni pūjanāni hyakārayat |
dānāni dakṣiṇāḥ pāritoṣikāṇi dadau nṛpaḥ || 32 ||
[Analyze grammar]

śilpine svarṇaśṛṃgārairalaṃkṛtaṃ gajaṃ dadau |
grāmāṇāṃ pañcakaṃ cāpi dāsān dāsīstathā dadau || 33 ||
[Analyze grammar]

śilpibhyaśca yathāyogyadhanādīni nṛpo dadau |
athā'laṅkṛtahastīndraṃ samāruhya gṛhaṃ nijam || 34 ||
[Analyze grammar]

yāvat sañjayadevastu prayāti tāvadeva tu |
mārge gajaḥ pramatto'timadāviṣṭo'bhavad drutam || 35 ||
[Analyze grammar]

apradhṛṣyaścātibalo vicittonmattasañcaraḥ |
aśāsanīyo'pyabhavanmahāvibhrama udvrataḥ || 36 ||
[Analyze grammar]

hastipakā'niyamyaścā'gamyo bhītikarastathā |
mahābṛṃhaṇakartā ca mahāvegadravānvitaḥ || 37 ||
[Analyze grammar]

dhāvamāno'niyamito dudrāvotpathasañcaraḥ |
mānavā dudruvurbhītāḥ prāṇarakṣārthameva ha || 38 ||
[Analyze grammar]

na ke'pi tatra tiṣṭhanti yatra yāti hi vāraṇaḥ |
ambālikā sakūthā ca vivṛtā patitā kṣitau || 39 ||
[Analyze grammar]

patitaḥ sañjayaścāpi hastipakaḥ papāta ca |
gajaḥ sañjayadevaṃ me bhaktaṃ nigṛhya śuṇḍayā || 40 ||
[Analyze grammar]

dūre cikṣepa sahasā bhaktaḥ papāta khātake |
khātamadhye hyaniḥsāre pātapīḍātimūrchitaḥ || 41 ||
[Analyze grammar]

sasmāra māṃ hariṃ tatra hṛdaye bhaktarakṣakam |
gajo dūraṃ gato yāvattataḥ khātaṃ tu mānavāḥ || 42 ||
[Analyze grammar]

āyayustasya vīkṣārthaṃ rakṣārthaṃ parito janāḥ |
tatpūrvaṃ tu tadā lakṣmi bhaktapārśvaṃ gato'bhavam || 43 ||
[Analyze grammar]

hastābhyāṃ saṃspṛśaṃstaṃ ca mūrchāṃ pīḍāmanāśayam |
darśanaṃ me dadau tasmai kṛṣṇanārāyaṇātmakam || 44 ||
[Analyze grammar]

haste dhṛtvā bahistaṃ cā'niṣkāsayaṃ tu gartataḥ |
svastho bhakto virogaśca bādhāpīḍāvivarjitaḥ || 45 ||
[Analyze grammar]

bhajanyāṃ ca rahan māṃ ca mohamāno hi mānavān |
jagāda bhagavānatrā''gato me rakṣaṇāya vai || 46 ||
[Analyze grammar]

tatkārābhyāṃ nīrujo'haṃ vipīḍo'tra bhavāmi ha |
evaṃ nārāyaṇaṃ sarve bhajantāṃ parameśvaram || 47 ||
[Analyze grammar]

ityuktvā'darśayat sarvānaṅgulyā māṃ puraḥsthitam |
viprarūpadharaṃ kṛṣṇaṃ tejovyāptasuvigraham || 48 ||
[Analyze grammar]

praṇemuste hariṃ māṃ ca divya mānavavigraham |
kalyāṇaṃ prārthayāñcakruścopādideśa cāpyaham || 49 ||
[Analyze grammar]

kalyāṇaṃ jāyate kṛṣṇabhaktyā satāṃ prasevayā |
sarvamityarthakartavyaṃ śrīkṛṣṇaprītihetukam || 50 ||
[Analyze grammar]

satāṃ prasannatā labhyā guṇā labhyāḥ satāṃ tathā |
devādhikāḥ sadā santo mānyā mumukṣubhiḥ śubhāḥ || 51 ||
[Analyze grammar]

viṣṇuvaccā'rcanīyāste sevanīyāśca viṣṇuvat |
satāmājñā pālanīyā vacodhāryaṃ ca mānase || 52 ||
[Analyze grammar]

vartitavyaṃ ca niśchadma satāmagre tu dāsavat |
kṛṣṇatulyān sato dṛṣṭvā namanīyaṃ tadagrataḥ || 53 ||
[Analyze grammar]

mantavyaṃ hṛdaye naije santaḥ śrīkṛṣṇamūrtayaḥ |
mahāntaste samarthāśca divyāḥ sarvātmanā śubhāḥ || 54 ||
[Analyze grammar]

pāvanāḥ śrīkṛṣṇarūpā vikriyāvarjitāḥ parāḥ |
māyāpāragatāḥ santi māyāyāmahamasmi ca || 55 ||
[Analyze grammar]

mama māyāvilopo vai satsevayā bhaviṣyati |
pāmarasya mama sarvāṇyaghānyeṣyanti saṃkṣayam || 56 ||
[Analyze grammar]

evaṃ satāṃ guṇagrāhī guṇasindhurbhavediha |
ye tu loke duṣṭajanā nindanti sādhuyoginaḥ || 57 ||
[Analyze grammar]

kathayanti mitho nindāṃ satāṃ cāguṇavarṇanām |
yatheme sādhavaḥ santi vivekavarjitāḥ khalu || 58 ||
[Analyze grammar]

loke sthātuṃ na jānanti bhoktuṃ pātuṃ ca bhāṣitum |
paridhātuṃ ca vasanaṃ dātuṃ jānanti naiva ca || 59 ||
[Analyze grammar]

kartuṃ cābhyāgatasya svāgataṃ vidanti naiva ca |
mahattvaṃ khyāpayituṃ svaṃ yatante copadeśadāḥ || 60 ||
[Analyze grammar]

kāmo lobho ratiḥ krodho vidyante'sya yathā mama |
nā'yaṃ sādhurmṛṣā sādhurevaṃ gṛhṇanti dūṣaṇam || 61 ||
[Analyze grammar]

etādṛśāścarmanetrā nirayālayabhoginaḥ |
duḥkhino'tra prajāyante mṛtvā yāmyādhikāriṇaḥ || 62 ||
[Analyze grammar]

kadāpi te na jāyante guṇino mokṣasanmukhāḥ |
āsurāste tu vijñeyāḥ satāṃ drohakarāstviha || 63 ||
[Analyze grammar]

yūyaṃ śilpakalājñā vai sañjayo'yaṃ viśeṣataḥ |
yāvatkalāsu mūrtiṃ me dhārayatyeva sarvathā || 64 ||
[Analyze grammar]

tatra sarvatra bhaktirme bhavatyasya ca vastayā |
tādṛśībhaktiyogena viprarūpī janārdanaḥ || 65 ||
[Analyze grammar]

samāyāto'smi rakṣākṛt prasannaḥ sevayā mama |
sataḥ saṃsevya ca hariṃ yāntu mokṣaṃ paraṃ padam || 66 ||
[Analyze grammar]

kṛṣṇārcā kṛṣṇavat pūjyā mānyā sevyā ca kṛṣṇavat |
santastathaiva sampūjyāḥ mānyāḥ sevyāśca kṛṣṇavat || 67 ||
[Analyze grammar]

kṛṣṇo mahāntaḥ santaśca sarvaiśvaryādisaṃbhṛtāḥ |
sarvarakṣākarāḥ santi sarvagāḥ śaktiśālinaḥ || 68 ||
[Analyze grammar]

parakāyaṃ praviśanti rakṣantyāpadvipattitaḥ |
kṛṣṇo mūrtiṃ samāviśya vartate rakṣaṇāya vai || 69 ||
[Analyze grammar]

mūrtau nijecchayā sākṣāt praviśyaiva virājate |
sākṣānme tu yathā tadvanmaryādā sarvathā sadā || 70 ||
[Analyze grammar]

mūrteragre satāmagre pālanīyā hi gauravāt |
satāṃ hṛdaye sākṣādvai svayamāviśya sarvathā || 71 ||
[Analyze grammar]

varte'haṃ vai tato nityaṃ sevanīyā hi sādhavaḥ |
maryādā pālanīyā vai satāṃ mūrteśca me samām || 72 ||
[Analyze grammar]

ye tu matvā hi pāṣāṇaṃ mūrtiṃ satastu mānavān |
prākṛtān sādhupuruṣān matvā nindanti nāstikāḥ || 73 ||
[Analyze grammar]

mama vacāṃsi sādhūnāṃ vacāṃsi mokṣadānyapi |
mānayanti mṛṣā nirarthakāni te tu māyikā || 74 ||
[Analyze grammar]

nindakāḥ pāpino yāsyantyeva duḥkhaṃ tu nārakam |
teṣāṃ cātmaparātmādivijñānaṃ naiva jāyate || 75 ||
[Analyze grammar]

kṛṣṇasya niścayo naiva jāyate mūrtigasya me |
kalyāṇaṃ tādṛśānāṃ vai naiva bhavati naiva hi || 76 ||
[Analyze grammar]

daurmatyaṃ khalu teṣāṃ tu mūrtāveveti naiva ca |
kintu satsu tathā tadvat sveṣṭadeveṣu tādṛśam || 77 ||
[Analyze grammar]

anīśatvādināstikyaṃ jāyate bahupāpinām |
īśvarānavatārāṃśca manvate naiva sarvathā || 78 ||
[Analyze grammar]

golokaṃ cāpi vaikuṇṭhaṃ śrīpuraṃ cākṣaraṃ padam |
brahmapadaṃ ca vibhavān manvate naiva te khalāḥ || 79 ||
[Analyze grammar]

khalānāṃ samprasaṃgena jāyate khalatā tathā |
pūrvapāpādiyogena jāyate khalatā hyapi || 80 ||
[Analyze grammar]

nāstikānāṃ vacobhiśca kathābhiḥ saṃgatastathā |
kāmakrodhābhimānādyairdoṣaiśca khalatā bhavet || 81 ||
[Analyze grammar]

khalasya hṛdaye bhāvo na tiṣṭhate satāṃ hareḥ |
tasmāt kharāditulyasya khalasya saṃgamaḥ kvacit || 82 ||
[Analyze grammar]

vartavyo naiva loke'tra mumukṣubhistu mānavaiḥ |
śrotavyā sukathā divyā divyabodhapradā hareḥ || 83 ||
[Analyze grammar]

satāṃ kathā divyalīlā śrotavyā sevakaiḥ sadā |
kartavyaḥ saṃgamaścāpi satāṃ nārāyaṇasya ca || 84 ||
[Analyze grammar]

divyatā ca satāṃ bodhyā bodhyā mūtau sthitirmama |
vijñeyaṃ mama māhātmyaṃ satāṃ bodhyaṃ ca mādṛśam || 85 ||
[Analyze grammar]

evaṃvidhasya bhaktasya rakṣāṃ karomi sarvathā |
yathā rakṣā kṛtā garte sañjayasya mayā tviha || 8 ||
[Analyze grammar]

mūrtau sthitvā parāṃ rakṣāṃ kariṣye māṃ bhajantviti |
sarvajīveṣu kṛṣṇo'haṃ nivasāmītyahiṃsayā || 87 ||
[Analyze grammar]

sarvathā vartitavyaṃ me bhaktairdayāparairiha |
adroho balavān dharmaḥ prīṇanaṃ dharma uttamaḥ || 88 ||
[Analyze grammar]

sarvasvārpaṇabhāvaiśca prīṇayenna tu hiṃsayet |
kāyena vācā manasā kriyayā sevayā'pi ca || 89 ||
[Analyze grammar]

prīṇayenmāṃ sataścāpi svargaṃ mokṣaṃ labhettataḥ |
krodhā'haṃkāramānādyā doṣā varjyā hi hiṃsakāḥ || 90 ||
[Analyze grammar]

śāntatayā sadā stheyaṃ bhajanīyo janārdanaḥ |
bhajanīyāḥ sādhavaśca bhagavatpādasadrasāḥ || 91 ||
[Analyze grammar]

ityuktvā mama bhaktebhyo datvā mantraṃ madāśrayam |
oṃ namaḥ śrīkṛṣṇanārāyaṇāya svāmine svāhā || 92 ||
[Analyze grammar]

bhaktakṛtāṃ prapūjāṃ saṅgṛhya tiro'bhavaṃ drutam |
gajastu rājapuruṣairdhṛtaścātiprayatnakaiḥ || 93 ||
[Analyze grammar]

śamitaścopacāraiśca sañjayāya tato daduḥ |
atha smṛddhaṃ mama bhaktaṃ pūrṇāyuṣye'hamacyutaḥ || 94 ||
[Analyze grammar]

lakṣmi mokṣapradānārthaṃ pratyakṣastadgṛhe'gamam |
hastiyāne tu bhaktaṃ taṃ samādāya tathā'parān || 95 ||
[Analyze grammar]

pradarśya divyatāṃ me cā'nayaṃ pattīyutaṃ drutam |
dhāmā'kṣaraṃ paraṃ divyaṃ tathā'parān suśilpinaḥ || 96 ||
[Analyze grammar]

aprāpayaṃ paraṃ dhāma narānnārīśca bhāvukīḥ |
evaṃ rakṣā mayā lakṣmi kṛtā garte ca hastitaḥ || 97 ||
[Analyze grammar]

mama mūrtiṃ śilpavidaḥ kurvanti pūjayanti mām |
divyabhāvāstu te bhaktyā yānti me paramaṃ padam || 98 ||
[Analyze grammar]

yādṛśīṣu tādṛśīṣu śālagrāma śilāsvaham |
satsu satīṣu sādhvīṣu yogiṣvapi vasāmyaham || 99 ||
[Analyze grammar]

sarvatrā'vasthitaścā'smi pratiṣṭhāpitamūrtiṣu |
viśeṣataḥ sthitaścā'smi bhaktamānasapūrakaḥ || 100 ||
[Analyze grammar]

yatra mama nivāso'sti kāṣṭhe kuḍye śilātale |
sarvaṃ divyaṃ bhavatyeva divyasya me prasaṃgataḥ || 101 ||
[Analyze grammar]

māyā divyā mama yogānnārī naro drumādayaḥ |
mama yogena divyāste jāyante mokṣadāḥ sadā || 102 ||
[Analyze grammar]

doṣā guṇāḥ prajāyante jaḍāni cetanāni vai |
mama yogena divyāni jāyante yāni kānyapi || 103 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne śilpakarasya sañjayadevasya bhaktyā bhagavatā gajato rakṣaṇaṃ kṛtaṃ mokṣaṇaṃ cetyādinirūpaṇanāmā |
ṣoḍaśādhikadviśatatamo'dhyāyaḥ || 216 ||
[Analyze grammar]