Chapter 207

puruṣottama uvāca |
śṛṇu nārāyaṇīśri tvaṃ kṣetrapasya kathāṃ śubhām |
nāmnā nāñjakadevasya mama bhaktasya tāraṇīm || 1 ||
[Analyze grammar]

nāñjabhakto'bhavacchūraḥ sīmakṣetraprarakṣakaḥ |
kuṃkume laumaśe kṣetre śastrāstravinmahābalaḥ || 2 ||
[Analyze grammar]

sīmni vasati nityaṃ sa nagare yāti cotsave |
sasyarakṣākaro nāñjo vāṭikānāṃ ca rakṣakaḥ || 3 ||
[Analyze grammar]

khalasthā'nnakaṇagañjarakṣakaśca sa eva saḥ |
rātrindivaṃ bhramatyeṣo rakṣārthaṃ paritaḥ kṣitau || 4 ||
[Analyze grammar]

caurāpahārakebhyaśca rakṣāṃ karoti sarvathā |
karṣukāṇāṃ ca dhanināṃ nāgarikādisampadām || 5 ||
[Analyze grammar]

patrakāṇḍādikānāṃ ca sañcayānāṃ tu sīmasu |
nityaṃ māṃ bhajate nāmnā śrīkṛṣṇaśrīnarāyaṇa || 6 ||
[Analyze grammar]

mālāmāvartayatyeva mārgeṣu sīmabhūmiṣu |
nāñjasya nāma saṃśrutvā caurā nāyānti tāṃ diśam || 7 ||
[Analyze grammar]

bhakto bhaktau nipūṇo'ti dharme'pi pūjane'pi me |
bhajane kīrtane dhyāne yatnavān vartate sadā || 8 ||
[Analyze grammar]

sādhūnāṃ rakṣaṇe śūro gavāṃ ca dīnayoṣitām |
sādhvīnāṃ ca satīnāṃ ca vṛddhānāṃ rakṣaṇe tathā || 9 ||
[Analyze grammar]

devānāṃ daivavṛkṣāṇāṃ devabhuvāṃ ca rakṣaṇe |
śraddhāvān sevakaścā'yaṃ nirmāno dāsavat sadā || 10 ||
[Analyze grammar]

evaṃvidho'yaṃ bhakto me lakṣmi prātaḥ sadā mama |
pūjanaṃ saṃvidhāyaiva vīkṣārthaṃ cā'ṭavīṃ prati || 11 ||
[Analyze grammar]

sarvadikṣu prayātyeva duṣṭānāṃ śāsanāya vai |
ekadā pūrvadigbhāge prātaḥ krośadvayaṃ yayau || 12 ||
[Analyze grammar]

dūre'marāpurato vai mṛdaṃgapurasannidhau |
tatra śatruṃjayādeśālluṇṭakāḥ samupāyayuḥ || 13 ||
[Analyze grammar]

bahavo'śvasamārohāḥ saśastrā annahāriṇaḥ |
karṣukāṇāṃ khalabhūmerapahartuṃ khaleṣu te || 14 ||
[Analyze grammar]

viviśurvāṭikābhāge karṣukāstu bhayaṃ gatāḥ |
rakṣakaṃ naiva cāsādya hyākruśya kaṇasañcayān || 15 ||
[Analyze grammar]

vihāya prayayurdūraṃ tatra nāñjaḥ samāyayau |
kathaṃ vimanaso yūyaṃ nāñjaḥ papraccha karṣukān || 16 ||
[Analyze grammar]

karṣukā jagadustaṃ ca luṇṭakā annahārakāḥ |
prasahya khalabhūmeśca harantyannāni no'dhunā || 17 ||
[Analyze grammar]

rakṣāṃ kuru balaṃ te celluṇṭakebhyaḥ prarakṣaka |
śrutvā tūrṇaṃ harikṛṣṇaṃ smṛtvā māṃ puruṣottamam || 18 ||
[Analyze grammar]

aśvavāraḥ svayaṃ śīghraṃ dudrāva tatsthalīṃ prati |
yatra te luṇṭakāścā'nnasañcayān vai haranti ha || 19 ||
[Analyze grammar]

aśveṣūṣṭreṣu cānnāni nikṣipya te vahanti vai |
tān dṛṣṭvā śūrabhāṣābhirgarjanāṃ nāñjako vyadhāt || 20 ||
[Analyze grammar]

luṇṭakā balino yūyaṃ mātṛjāḥ pitṛjāḥ ṛtāḥ |
māṃ vijitya tato yāntu jitānnānānyathā tviti || 21 ||
[Analyze grammar]

śrutvā balodbhavaṃ śabdaṃ sanmukhā yuddhavedinaḥ |
abhavan śastrayuktāste nāñjasya vijayāya vai || 22 ||
[Analyze grammar]

śastrāṇāṃ sahasā kṣepaḥ sānnidhye samajāyata |
prāvartata tadā yuddhaṃ bāṇaiḥ śastraiśca tomaraiḥ || 23 ||
[Analyze grammar]

eko nāñjastu viṃśatyā saha yuddhyati madhyagaḥ |
śastrakṣato'pi bahudhā māṃ smaran bahu yuddhyati || 24 ||
[Analyze grammar]

nāñjasya bhallakairviddhā daśa vakṣassu vai mṛtāḥ |
caurāstato hi caurāṇāṃ khaṅgāghātairmuhurmuhuḥ || 286 ||
[Analyze grammar]

nāñjo nipatito bhūmau mūrchāyāṃ māṃ smaran muhuḥ |
tadā'haṃ tatsthale śūraḥ khaḍgadhraḥ pārśvato drutam || 26 ||
[Analyze grammar]

āvirāsaṃ mahādeho vajrāṃgo yuddhakovidaḥ |
khaḍgaśastān śeṣacaurān bibhedā'tyavicārayan || 27 ||
[Analyze grammar]

sarve mṛtiṃ gatāścaurā viṃśatistatra vai drutam |
ekaviṃśastvekacauro rāmarāmetisaṃvadan || 28 ||
[Analyze grammar]

mṛtyave saṃyayau mūrchāmāptaḥ śīghraṃ visaṃjñakaḥ |
tato'haṃ dayayā spṛṣṭvā rāmanāmaparāyaṇam || 29 ||
[Analyze grammar]

ujjīvayan prabhaktaṃ taṃ nīrujaṃ samakārayam |
utthitaḥ sa tato bhakto nāmnā mahāmayābhidhaḥ || 30 ||
[Analyze grammar]

prārthayanmāṃ tu nāñjasyojjīvanārthaṃ dayāvaśaḥ |
tato nāñjaṃ karābhyāṃ saṃspṛśannahaṃ muhurmuhuḥ || 31 ||
[Analyze grammar]

mūrchāṃ tasya vyapanīyautthāpayaṃ taṃ sukhānvitam |
anādiśrīkṛṣṇanārāyaṇaṃ dṛṣṭvā ca tau tadā || 32 ||
[Analyze grammar]

tuṣṭuvatuḥ sārdabhāvau mṛtānāṃ prāṇalabdhaye |
aho nārāyaṇastvaṃ vai rāmo rākṣasamokṣakṛt || 33 ||
[Analyze grammar]

aho nṛsiṃho bhagavān bhavān daityavināśakṛt |
aho kṛṣṇa hare rāma tvaṃ gajoddhārakārakaḥ || 34 ||
[Analyze grammar]

tvamevā''suranāśārthaṃ vartase bhaktavatsalaḥ |
pāpināṃ pāpanāśaśca jāyate tava darśanāt || 35 ||
[Analyze grammar]

sparśanāt smaraṇāccāpi pāpino'tra taranti hi |
viśvaṃbharo bhavānāste poṣako rakṣako'pi ca || 36 ||
[Analyze grammar]

hantā saṃkarṣaṇo rudraḥ kālo bhavān prakāśate |
rakṣa rakṣa kṛpāsindho mṛtānujjīvayā'tra vai || 37 ||
[Analyze grammar]

caurayogena bhakto'pi saṃgāccauraḥ prajāyate |
bhakto mahāmayaścāhaṃ cauryakārye'bhisaṃhataḥ || 38 ||
[Analyze grammar]

tathāpi rāmanāmnā tvaṃ bhaktaṃ rakṣitavāniha |
nāñjaṃ rakṣitavānatra rakṣā tadyogato mama || 39 ||
[Analyze grammar]

jātā'tra bhagavan kṛṣṇa bhaktecchāsaṃprapūraka |
bhaktayogaṃ gatāśceme rakṣaṇīyā dayālunā || 40 ||
[Analyze grammar]

mṛtāścejjīvitāḥ syuste bhajiṣyanti narāyaṇam |
athavā te rucisteṣāṃ mokṣaṇe cettathā kuru || 41 ||
[Analyze grammar]

ityukto'haṃ tadā lakṣmi mṛtānāṃ mokṣahetave |
svargavāsaṃ prathamaṃ vai kṛpayā samakalpayam || 42 ||
[Analyze grammar]

pāpānyeṣāṃ bhaktayogānmadyogādavināśayam |
yāmyaduḥkhāni sarvāṇi tacchirobhyo vyanāśayam || 43 ||
[Analyze grammar]

smṛtvā devavimānaṃ ca kṛtvā tān devavigrahān |
apreṣayaṃ divaṃ tūrṇaṃ viṃśatiṃ samare mṛtān || 44 ||
[Analyze grammar]

mahāmayaṃ tathā nāñjaṃ bhaktaṃ kareṇa vai muhuḥ |
sparśaṃ kṛtvā ca nīrujaṃ yathāpūrvamakārayam || 45 ||
[Analyze grammar]

puṣṭau vigataduḥkhau tau bodhitau ca mayā tadā |
anityo'yaṃ hi saṃsāro deho'nityo gṛhādayaḥ || 46 ||
[Analyze grammar]

anityāḥ sarvamāyotthāḥ padārthāḥ kṣayagocarāḥ |
tathāpyajñā janā nītiṃ vihāyotpathagāminaḥ || 47 ||
[Analyze grammar]

hiṃsāyāṃ sampravartante'pahāre nāśane muhuḥ |
satāṃ yogaṃ na kurvanti bhajante na pareśvaram || 48 ||
[Analyze grammar]

śāstrakathāṃ na śṛṇvanti pāpaṃ kurvantyasaṃśayāḥ |
tena yāmyamahāduḥkhānyanubhavanti daṇḍitāḥ || 49 ||
[Analyze grammar]

paśūnāṃ pakṣiṇāṃ janmānyapi gṛhṇanti pāpinaḥ |
duḥkhottaraṃ ca duḥkhaṃ samprāpnuvanti vidharmiṇaḥ || 50 ||
[Analyze grammar]

parānnaharaṇe janma mūṣakāṇāṃ prajāyate |
ghṛtadugdhādiharaṇe mārjārajanmavān bhavet || 51 ||
[Analyze grammar]

śākamūlādiharaṇe māyūraṃ janma cāpyate |
vastropakaraṇā''cchede māhiṣaṃ janma jāyate || 52 ||
[Analyze grammar]

phalapatrādiharaṇe vānaratvaṃ prajāyate |
svarṇaratnādiharaṇe bhallukatvaṃ prajāyate || 53 ||
[Analyze grammar]

jalapānādiharaṇe pretatā nirjale vane |
dārāputryādiharaṇe ṣaṇḍhatvaṃ gaṇikājanuḥ || 54 ||
[Analyze grammar]

vādyavāditraharaṇe bhāṇḍatvaṃ naṭatā tathā |
viśvāsaghātakānāṃ tu vṛkatā kṛkalāsatā || 55 ||
[Analyze grammar]

apahārakṛtāṃ cā'śvajanma vāhanajīvinām |
ṛṇināṃ tu vṛṣabhatvaṃ nindakānāṃ tu mūkatā || 56 ||
[Analyze grammar]

ṣaṇḍhokṣatvaṃ kāmināṃ ca kāminī tu piśācinī |
pratārako bhikṣukaśca bhaved dāridryaduḥkhavān || 57 ||
[Analyze grammar]

devānnadhanabhoktā ca bhavecchvā kāka unduruḥ |
kulahantā nakulaḥ syānnārīhantā tu rākṣasaḥ || 58 ||
[Analyze grammar]

dharmahantā bhāgyahīno vārāho jāyate vane |
bhaktihantā nārakī syānnirvaṃśo yamadūtakaḥ || 59 ||
[Analyze grammar]

madyapo mūtrakīṭaḥ syād vṛściko viṣabhakṣakaḥ |
kruddhaḥ sarpo bhaveccāpi nīlamarkaṭikastathā || 60 ||
[Analyze grammar]

ityevaṃ karmajanmāni jñātvā tāni vivarjayet |
śubhaṃ kuryānmānavena dehena nā'śubhaṃ kvacit || 61 ||
[Analyze grammar]

śubhaṃ dharmaṃ śubhaṃ jñānaṃ śubhaṃ vairāgyamityapi |
śubhāṃ bhaktiṃ prakuryācca mokṣadaṃ satsamāgamam || 62 ||
[Analyze grammar]

nirdaṃbhaṃ satparicaryāṃ kuryāddhareḥ satāṃ sadā |
kṛṣṇamandiravāṭyādi kārayellepamārjane || 63 ||
[Analyze grammar]

pādasaṃvāhanaṃ dehamardanaṃ ca satāṃ kriyāt |
naivedyaṃ bhojanaṃ vāripānaṃ dadyāttu śārṅgiṇe || 64 ||
[Analyze grammar]

sadyo dadyād yatheṣṭaṃ ca seveta gurumaṇḍalam |
kathāṃ ca śṛṇuyānnityaṃ nāmakīrtanamācaret || 65 ||
[Analyze grammar]

ātmaniṣṭhayā varteta brahmarūpeṇa cātmanā |
jānīyānmāṃ hariṃ divyaṃ sarvadoṣavivarjitam || 66 ||
[Analyze grammar]

vārtāṃ madīyāṃ kuryācca snehaṃ kuryāt sadā mayi |
māyāmāyikakāryeṣu rāgahīnastathā bhavet || 67 ||
[Analyze grammar]

sādhusevāṃ ca satsaṃgaṃ prakurvīta sadā śubham |
viṣayeṣu prakuryāccā'ruciṃ cāntermatirbhavet || 68 ||
[Analyze grammar]

anādiśrīkṛṣṇanārāyaṇe matiṃ dṛḍhāṃ kriyāt |
anyatra mānasaṃ naiva dhārayettu kadācana || 69 ||
[Analyze grammar]

premṇaiva kārayet kuryāt sevāṃ me'laṃkṛtiṃ tathā |
mama mūrtiṃ dhārayecca mānuṣīṃ devatāṃ ca vā || 70 ||
[Analyze grammar]

mama bhakteṣu vai prītiṃ kuryānnānyatra kutracit |
strīputrādau bandhanaṃ tu snehaṃ sadā vivarjayet || 71 ||
[Analyze grammar]

kṛṣṇasambandhinīṣveva kriyāsu vyāpṛto bhavet |
kṛṣṇasambandhaśūnyābhyo nivarteta samāhitaḥ || 72 ||
[Analyze grammar]

nityaṃ pūjā mama kuryāt prārthayecca nijaṃ hitam |
nārāyaṇa hare kṛṣṇa viṣṇo svāmin pareśvara || 73 ||
[Analyze grammar]

adharmamārgagāllokāt pāhi māṃ nāstikāttathā |
samāgamaṃ te bhaktānāṃ dehi nityaṃ śubhaṃ kuru || 74 ||
[Analyze grammar]

asatāṃ saṃgamo mā syāttathā rakṣāṃ sadā kuru |
caurāṇāṃ pāpināṃ saṃgaṃ nindakānāṃ na me'rpaya || 75 ||
[Analyze grammar]

madyamāṃsāśanānāṃ ca saṃgaṃ vyavāyināṃ na me |
mūrtikhaṇḍanakartṝṇāmupāsanāvināśinām || 76 ||
[Analyze grammar]

saṃgaṃ me mā'rpaya kṛṣṇa śaraṇāgatavatsala |
bhaktiṃ vinā dinaṃ vandhyaṃ mā me yātu tathā kuru || 77 ||
[Analyze grammar]

manovṛttiḥ sadā kṛṣṇe tiṣṭhettathāvidhāpaya |
sāṃsārikeṣu cittaṃ me virāgaṃ syāttathā kuru || 78 ||
[Analyze grammar]

satāṃ samāgamaṃ kṛṣṇa tava mūrteḥ samāgamam |
ciraṃ ca darśanaṃ te ca dehi hṛdvāsamācara || 79 ||
[Analyze grammar]

bahirvā cāntare vā te darśanaṃ divyameva tat |
sarvadā syāttathā kṛṣṇā'ntardṛṣṭi dehi me śubhām || 80 ||
[Analyze grammar]

ante dhāmā'kṣaraṃ dehi tava mūrtyā virājitam |
arthayāmi tathā kṛṣṇa muktiṃ te sevanātmikām || 81 ||
[Analyze grammar]

ityevamarthayennityaṃ bhagavantaṃ hariṃ tu mām |
bhaktau yuvāṃ yatastasmādahaṃ dṛṣṭipathaṃ gataḥ || 82 ||
[Analyze grammar]

kalyāṇaṃ bhavatorastu prayāmi mama mandiram |
ityuktvā karṣukān dhairyaṃ datvā śrībhagavāṃstataḥ || 83 ||
[Analyze grammar]

oṃ namaḥ śrīkṛṣṇanārāyaṇāya svāmine svāhā |
datvā mantraṃ karṣukebhyo bhaktābhyāṃ ca tiro'bhavat || 84 ||
[Analyze grammar]

karṣukāste camatkāraṃ vīkṣya cakrurmamāśrayam |
pūjanaṃ bhajanaṃ ceti kṣetrapo'pi viśeṣataḥ || 85 ||
[Analyze grammar]

mahāmayo'pi sahasā nārāyaṇasamāgamāt |
nirāmayo'bhavallakṣmi nāñjo'pi cā'ñjanojjhitaḥ || 86 ||
[Analyze grammar]

te sarve nityadā bhejurmāṃ śrīrādhāramāṃpatim |
pūjanaṃ bhojane dhyānaṃ ramaṇe smaraṇaṃ mama || 87 ||
[Analyze grammar]

cakruśca kīrtanaṃ nityaṃ dehānte ca tataḥ param |
vimānenā''yayau cāhaṃ viṣṇuvimānaśobhanaḥ || 88 ||
[Analyze grammar]

pārṣadaiḥ sahitaścā'śvapaṭṭasīmni tadā drutam |
karṣukānnijalokaṃ ca ninye divyaśarīriṇaḥ || 89 ||
[Analyze grammar]

nāñjaṃ bhaktaṃ punarninye ninye nirāmayaṃ tataḥ |
evaṃ dhāmā'kṣaraṃ prāptā bhaktā me kṣetrapā api || 90 ||
[Analyze grammar]

lakṣmi kṣetrodbhavaṃ dhānyaṃ nūtanaṃ me samarpayet |
cirbhaṭaṃ makkikāṃ cāpi patraṃ puṣpaṃ samarpayet || 91 ||
[Analyze grammar]

kandaṃ phalaṃ ca daṇḍaṃ ca miṣṭaṃ śākaṃ ca mañjarīm |
stambaṃ nālaṃ ca kāṇḍaṃ ca śākhāṃ vā me samarpayet || 92 ||
[Analyze grammar]

kaṇaṃ ca badaraṃ vāpi mṛdaṃ vā pāvanīmapi |
arpayenmāṃ tu yo bhaktyoddharāmi taṃ samarpakam || 93 ||
[Analyze grammar]

samidhastulasīpatraṃ candanadruṃ phaladrumam |
tṛṇaṃ darbhaṃ cāṃkuraṃ vā'rpayenme muktibhāktu saḥ || 94 ||
[Analyze grammar]

kārpāsaṃ pūlakaṃ vāpi śimbiṃ vā kośameva vā |
gucchaṃ vā kuṇḍikāṃ vā me'rpayenmokṣagato bhaveta || 95 ||
[Analyze grammar]

tilān vā godhumakāṃśca caṇakān dvidalāstathā |
nivārān vā sārikā vā kharjuraṃ vā samarpayet || 96 ||
[Analyze grammar]

śarkarāṃ vā haridrāṃ vā lavaṇaṃ cārdrakaṃ ca vā |
āranālaṃ ca vividhaṃ laviṃgaṃ pūgikāphalam || 97 ||
[Analyze grammar]

elāṃ ca kesaraṃ vāpi me'rpayenmuktibhāg bhavet |
āsanaṃ vāpi pātraṃ vā latāṃ vā vetramityapi || 98 ||
[Analyze grammar]

yānaṃ vastraṃ carvaṇaṃ ca tailaṃ sugandhamuttamam |
śṛṃgāraṃ cārpayenmahyaṃ jāyate mokṣabhāgdhi saḥ || 99 ||
[Analyze grammar]

dugdhaṃ rasaṃ ca pakvānnaṃ miṣṭapānaṃ ca śītalam |
vyajanaṃ vyañjanaṃ cāpi me'rpayenmokṣabhāg bhavet || 100 ||
[Analyze grammar]

ātmārpaṇena sarve vai kamale yānti matpadam |
paṭhanācchravaṇādasya smaraṇādapi mokṣabhāg || 101 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne kṣetrapasya nāñjabhaktasya mahāmayabhaktasya karṣukāṇāṃ ca caurebhyorakṣaṇaṃ bhagavatā kṛtamityādinirūpaṇanāmā saptādhikadviśatatamo'dhyāyaḥ || 207 ||
[Analyze grammar]