Chapter 206

śrīpuruṣottama uvāca |
śṛṇu nārāyaṇīśri tvaṃ vanapālasya vai kathām |
nāmnā tilakaraṃgasya śūdrasyā'raṇyavāsinaḥ || 1 ||
[Analyze grammar]

mahākālavane lakṣmi vanapālo'tibhaktimān |
āsīt tilakaraṃgākhyaḥ śivabhakto'tibhāvanaḥ || 2 ||
[Analyze grammar]

sureśikāsarittīre vṛkṣaṣaṇḍe kṛtālayaḥ |
araṇyarakṣaṇaṃ nityaṃ bhraman karoti sāyudhaḥ || 3 ||
[Analyze grammar]

vanyakandaphalāhāraḥ kvacillabdhā'nnabhojanaḥ |
ṛtupakvakaṇāhāro vartate sakuṭumbakaḥ || 4 ||
[Analyze grammar]

vanevāse'pi satataṃ prāṇihiṃsāvivarjitaḥ |
dayādharmaparo yogye kāle śaṃkarapūjakaḥ || 5 ||
[Analyze grammar]

prātaḥ snātvā vārighaṭaṃ bhṛtvā śrīśaṃkarālayam |
gatvā'bhiṣekaṃ carati bilvapatrāṇi candanam || 6 ||
[Analyze grammar]

karṇikāyāḥ kanakānāṃ puṣpārpaṇaṃ karoti ca |
madhyānhe'pi jalādhārī datvā prapūjya śaṃkaram || 7 ||
[Analyze grammar]

tato naivedyaṃ prāpyaiva bhuṃkte sāyaṃ tathaiva ca |
dhūpaṃ dīpaṃ sunaivedyaṃ nīrājanaṃ pradakṣiṇam || 8 ||
[Analyze grammar]

ārādhanaṃ namaskāraṃ kṛtvā karoti kīrtanam |
svapityeva tatastatra vedyāṃ śaṃkarasannidhau || 9 ||
[Analyze grammar]

prātarutthāya sammārjya gālavādanapūrvakam |
kṛtvā smaraṇaṃ śaṃbhośca tataḥ snātuṃ prayāti ca || 10 ||
[Analyze grammar]

asya patnī śikhādevī tathaiva śaṃkarārhaṇam |
nityaṃ karoti śaktyā vai liṅgaṃ saṃsnāpayatyapi || 11 ||
[Analyze grammar]

mandire vasati tatra divase bhaktiyoginī |
vāṭapravāsinaḥ kecinnarā nāryo'pi mārgagāḥ || 12 ||
[Analyze grammar]

yadyāyānti viśrāmyanti tebhyo jalaṃ phalaṃ sthalam |
dadāti sā śikhādevī satkaroti yathāyatham || 13 ||
[Analyze grammar]

śaṃkarasya guṇān dharmān camatkārān vadatyapi |
śaṃkaro vai bhaktabhaktiṃ vilokya ca tutoṣa ha || 14 ||
[Analyze grammar]

ekadā vaiṣṇavo bhūtvā yātrālustatra cāgataḥ |
kṛtavaiṣṇavatilakaḥ skandhe kṛtasupeṭikaḥ || 15 ||
[Analyze grammar]

kukṣau śālagrāmayukto nārāyaṇaṃ raṭan muhuḥ |
śikhādevī tu taṃ dṛṣṭvā vāsaṃ vedyāṃ dadau tataḥ || 16 ||
[Analyze grammar]

nidhāya peṭikāṃ tatra snātuṃ sukeśikānadīm |
yayau snātvā snāpayitvā śālagrāmaṃ prapūjya ca || 17 ||
[Analyze grammar]

āyayāvāsane vedyāṃ niṣasāda kṣaṇaṃ sthiraḥ |
tāvat tilakaraṃgo'pi vanāntarādupāgataḥ || 18 ||
[Analyze grammar]

ānīya kandamūlāni nidadhe vedikopari |
yātrāluṃ viṣṇuyuktaṃ ca dṛṣṭvā nanāma pādayoḥ || 19 ||
[Analyze grammar]

svāgatādi punaścakre phalamūlāni śaṃbhave |
nivedya pradadau tasmai papracchā''gamanaṃ kutaḥ || 20 ||
[Analyze grammar]

kva gamyate mahārāja yadīṣṭaṃ vasa madgṛhe |
śrutvaivaṃ śaṃkaraḥ prāha bhaktārthaṃ tvāgamo mama || 21 ||
[Analyze grammar]

gamyate yatra bhakto'sti tīrthaṃ madiṣṭaṃ sarvathā |
yatra bhaktā nivasanti tatra vasāmi sādhuvat || 22 ||
[Analyze grammar]

tvaṃ bhakto'si vane nityaṃ satāmātithyakārakaḥ |
tvadgṛhaṃ pāvanīkṛtya yāsyāmyanyat sutīrthakam || 23 ||
[Analyze grammar]

śrutvaitad vanapālo'pi papraccha punareva tam |
kva tīrthaṃ pāvanaṃ sādho vidyate yatra gamyate || 24 ||
[Analyze grammar]

jaṭī prāha tadā bhaktaṃ tīrthaṃ satāṃ samāgamaḥ |
yatra satsaṃga utkṛṣṭastatra vai gamyate mayā || 25 ||
[Analyze grammar]

sādhavo bahavaḥ santi saṃsārānmokṣakāriṇaḥ |
viṣṇordhyānaparāścāpi śrīkṛṣṇārpaṇakāriṇaḥ || 26 ||
[Analyze grammar]

tyāginaśca tapoyuktā nigrahe ca yame ratāḥ |
sevābhaktiparāścāpi vanāraṇyanivāsinaḥ || 27 ||
[Analyze grammar]

yadgṛhe vartate viṣṇuḥ śaṃbhurvā śrīnarāyaṇaḥ |
vāsudevo bālakṛṣṇastadgṛhaṃ tīrthamuttamam || 28 ||
[Analyze grammar]

yatra hiraṇyavarṇaśca hiraṇyakeśavān prabhuḥ |
sarvaḥ suvarṇamūrtiḥ śrīharirvirājate sadā || 29 ||
[Analyze grammar]

tattīrthaṃ pāvanaṃ bhakta tatra tīrthe vasāmyaham |
bhūritejodivyamūrtirbhagavān yatra rājate || 30 ||
[Analyze grammar]

yatra bhaktā hareḥ santi sādhvyaśca sādhavo'pi ca |
tattīrthe pāvanaṃ bhakta tatra vai gamyate mayā || 31 ||
[Analyze grammar]

saccidānandarūpaṃ yat pūrṇaṃ brahma prakāśakṛt |
mahātejo yataḥ saṃprakāśate'tra vasāmyaham || 32 ||
[Analyze grammar]

tameva puṇḍarīkākṣaṃ nārāyaṇaṃ pumuttamam |
dhyātvā parātparaṃ divyaṃ parameśamupaimyaham || 33 ||
[Analyze grammar]

tenedaṃ ca jagat pūrṇaṃ pūrṇena puruṣeṇa vai |
taṃ śyāmasundaraṃ kṛṣṇaṃ bālakṛṣṇamupaimyaham || 34 ||
[Analyze grammar]

karmaphalapradātāraṃ jīvānāmīśvareśvaram |
mukteśvaraṃ divyamūrtiṃ lakṣmīpatimupaimyaham || 35 ||
[Analyze grammar]

yasya mūrteścāti tejo mahad vyāpakamūrdhvagam |
sarvasthaṃ brahmasaṃjñaṃ ca taṃ śrīpatimupaimyaham || 36 ||
[Analyze grammar]

yasyā'nvayena sarvatra mahaḥ śreṣṭhaṃ prakāśate |
mūrtavat phaladaṃ cāste taṃ tejasvinamemyaham || 37 ||
[Analyze grammar]

īśvarā devatāḥ siddhā yatpratāpena mādhavāḥ |
bhavanti taṃ divyamūrtiṃ śrīkṛṣṇaṃ samupaimyaham || 38 ||
[Analyze grammar]

yasya mūrtau samādhiṃ samprāptasya divyayoginaḥ |
māyātatkāryatattvānāṃ layo'sti tamupaimyaham || 39 ||
[Analyze grammar]

cidākāśo'tisukhavān mahānandabhṛtaḥ sadā |
yanmūrteḥ svacchatātmā''ste taṃ pareśamupaimyaham || 40 ||
[Analyze grammar]

yadakṣaraṃ brahmadhāma divyaṃ vyoma mahaḥ sukham |
sarvānandapradaṃ yasya tamupaimi hariṃ prabhum || 41 ||
[Analyze grammar]

yadakṣaraṃ samasteṣu māyāyāṃ māyikeṣu ca |
ātmatattveṣu cāpyāste taṃ prabhuṃ samupaimyaham || 42 ||
[Analyze grammar]

puruṣe prakṛtau kāle yadanvayatayā balam |
samastakāryakāritvaṃ taṃ kṛṣṇaṃ samupaimyaham || 43 ||
[Analyze grammar]

sṛṣṭitrayaṃ ca yasmādvai śobhate layameti ca |
sṛṣṭitraye vartamānaṃ taṃ hariṃ samupaimyaham || 44 ||
[Analyze grammar]

yatprasādād divyadṛṣṭirmānavo'pi suro'pi vā |
sarvaṃ brahmekṣate taṃ māṇikīkāntamupaimyaham || 45 ||
[Analyze grammar]

anantāḥ śaktayo yasmādanantaiśvaryakoṭayaḥ |
prabhavanti ca rudrādyāstaṃ pareśamupaimyaham || 46 ||
[Analyze grammar]

aṣṭāṃgayoginaḥ santaḥ sādhyā devāśca yaṃ prabhum |
samādhau saṃprapaśyanti taṃ hariṃ samupaimyaham || 47 ||
[Analyze grammar]

yanmūrtau dehināṃ nāḍīprāṇāmbarāṇi sarvathā |
saṃkucitānyākṛṣṭāni jāyante tamupaimyaham || 48 ||
[Analyze grammar]

īśvarā brahmarudrādyā mādṛśāḥ sādhavastathā |
nārāyaṇā hyasaṃkhyātā yaṃ śritvaiśvaryaśālinaḥ || 49 ||
[Analyze grammar]

bhagavanto bhavantyeva nārāyaṇyo bhavantyapi |
avatārā'vatāriṇyastamupaimi pareśvaram || 50 ||
[Analyze grammar]

bhaja tvaṃ sarvathā taṃ ca devaṃ śrīpatimīśvaram |
sarveśaṃ sarvaśaktīnāṃ dhartāraṃ rādhikāpatim || 51 ||
[Analyze grammar]

ahaṃ bhajāmi taṃ devaṃ viṣṇuṃ śrīparameśvaram |
anye bhajitvā taṃ devaṃ paraṃ padaṃ purā yayuḥ || 52 ||
[Analyze grammar]

yānti yāsyanti cānye'pi bhaja taṃ parameśvaram |
ityevamuktvā śānto'bhūd rudro vai bhaktavatsalaḥ || 53 ||
[Analyze grammar]

tato lakṣmi śikhādevī tathā tilakaraṃgakaḥ |
jñātvā sādhuṃ brahmaniṣṭhaṃ rudrasamaṃ vavandatuḥ || 54 ||
[Analyze grammar]

aho sādho dhanyabhāgyamasmākaṃ vai kuṭumbinām |
jñānametādṛśaṃ cā'dya labdhavanto yataḥ sataḥ || 55 ||
[Analyze grammar]

bhavādṛśasya sādhorvai darśanaṃ durlabhaṃ tviha |
vanapānāṃ kathaṃ sādhusaṃgamo mokṣado bhavet || 56 ||
[Analyze grammar]

viṣṇorbhakto bhavānāste vayaṃ bhaktā harasya ca |
harasya darśanaṃ kasmād bhavettadvada śobhanam || 57 ||
[Analyze grammar]

śrutvā śaṃbhustadā prāha śaṃbhostu darśanaṃ tava |
vṛttīrniruddhya cātraiva bhaviṣyati na saṃśayaḥ || 58 ||
[Analyze grammar]

antarvṛttīḥ samādhāya paśyantu māṃ hṛdantare |
sādhumūrtau darśanaṃ te bhaviṣyati harasya vai || 59 ||
[Analyze grammar]

ityuktāste tilakādyā vanapāstatra cābdhije |
antarvṛttīstadā kṛtvā dhyāyanti hṛtsu yāvatā || 60 ||
[Analyze grammar]

tāvat sādhuḥ svayaṃ rudrastriśūladhṛg vyajāyata |
trinetro vyāghracarmadhṛk satīśrīpārvatīpatiḥ || 61 ||
[Analyze grammar]

harau magno'tisukhakṛt saumyarūpaḥ samujjvalaḥ |
mahāyogī gaṇeśādyaiḥ sahitaḥ samadṛśyata || 62 ||
[Analyze grammar]

atha tatra hareḥ rūpaṃ caturbhujasya me śubham |
lakṣmyā samaṃ mahādivyaṃ harasya hṛdaye param || 63 ||
[Analyze grammar]

vyadṛśyata mahānandabhṛtaṃ śaṃkarapūjitam |
śaṃbhostu hṛdayāt tacca nirgataṃ śobhanaṃ bahiḥ || 64 ||
[Analyze grammar]

śaṃbhunā pūjyamānaṃ ca vyadṛśyata sukhapradam |
evaṃ tu darśanaṃ datvā sādhurūpastu śaṃkaraḥ || 65 ||
[Analyze grammar]

viṣṇurūpaṃ nijarūpaṃ tirobhāvayadeva saḥ |
sādhurūpo'bhavacchīghraṃ hṛdaye ca tataḥ param || 66 ||
[Analyze grammar]

sarvān tilakaraṃgādīn bahirvṛttīnakārayat |
utthitā dadṛśuḥ sādhuṃ yathāpūrvaṃ jaṭādharam || 67 ||
[Analyze grammar]

jñānavantaśca taṃ śaṃbhuṃ sveṣṭadevaṃ satīpatim |
nipetuḥ pādayoḥ sarve śaṃbhoḥ saṃvāhanaṃ vyadhuḥ || 68 ||
[Analyze grammar]

aparādhakṣamāṃ yayācire muktiṃ yayācire |
śaṃbhuḥ prāha sadā cāsmi vaiṣṇavo bhaktavatsalaḥ || 69 ||
[Analyze grammar]

bhaktānāṃ śrīharau bhaktiṃ kārayitumihāgataḥ |
nārāyaṇaṃ hṛdaye'haṃ rakṣāmi sarvadā prabhum || 70 ||
[Analyze grammar]

dhyāyāmi taṃ paraṃ brahma bālakṛṣṇaṃ śriyāḥ patim |
bhavanto mama bhaktāśca bhajantu parameśvaram || 71 ||
[Analyze grammar]

ityuktvā pradadau lakṣmi mantraṃ tebhyaḥ svayaṃ haraḥ |
oṃ namaḥ śrīkṛṣṇanārāyaṇāya svāmine svāhā || 72 ||
[Analyze grammar]

atha nārāyaṇapūjāṃ bhajanaṃ cā''dideśa tān |
muktyarthaṃ vacanaṃ datvā sahasā sa tiro'bhavat || 73 ||
[Analyze grammar]

tatastilakaraṃgo'pi bheje śaṃbhoḥ samājñayā |
bālakṛṣṇaṃ prabhuṃ māṃ vai patnīkuṭumbayuk sadā || 74 ||
[Analyze grammar]

vane vanyānmānavāṃśca tata ārabhya sarvathā |
narānnārīścāhvayitvā kārayatyeva kīrtanam || 75 ||
[Analyze grammar]

harekṛṣṇa harekṛṣṇa bālakṛṣṇa ramāpate |
hareviṣṇo hare jiṣṇo'nādikṛṣṇa śriyaḥpate || 76 ||
[Analyze grammar]

evaṃ saṃkīrtanaṃ nityaṃ karoti kārayatyapi |
vane vedyāṃ nityamevā'rcayatyeva janārdanam || 77 ||
[Analyze grammar]

phalapuṣpādibhiḥ kṛṣṇaṃ nārāyaṇaṃ hariṃ tu mām |
toṣayatyeva ca nīrājanaṃ kṛtvā tataḥ param || 78 ||
[Analyze grammar]

nṛtyatyeva savādyaṃ ca premṇā sāyaṃ niśāgame |
sādhuṣveva haraścāste hare harirvirājate || 79 ||
[Analyze grammar]

matvaivaṃ vanamadhye'pi sādhūn sadā prasevate |
karmaṇā manasā vācā dehena ca dhanena ca || 80 ||
[Analyze grammar]

patrapuṣpaphalaistoyaiścātmārpaṇena sevate |
sādhvarthaṃ kṛtasarvasvaḥ pratyakṣasādhusevanaḥ || 81 ||
[Analyze grammar]

pratyakṣaniścayaḥ samyak samarpya sevate sataḥ |
bhāryā sukhārthinī sarvaṃ tyaktvā sukhaṃ virāgiṇī || 82 ||
[Analyze grammar]

yathā tathā sataḥ sādhvī sevate paramārthinī |
putraputryādikāścāsya sevante sādhumīśvaram || 83 ||
[Analyze grammar]

sarvaṃ vai vartate sādhau haro harirnarāyaṇaḥ |
brahma mokṣo mahānandaḥ sādhuṣu śāśvataṃ sukham || 84 ||
[Analyze grammar]

sādhureva paraṃbrahma sādhurdevo guruḥ paraḥ |
sādhujano harermūrtiḥ sādhoḥ sevā hi muktidā || 85 ||
[Analyze grammar]

ityevaṃ te prasevante vanapā vanyavastubhiḥ |
athaikadā kārtikasya kṛṣṇāṣṭamīdine tu te || 86 ||
[Analyze grammar]

mahotsavaṃ pracakrurvai vane kuñje tu dārave |
vṛkṣaśākhānaddhadolāṃ vallīpallavapuṣpitām || 87 ||
[Analyze grammar]

śobhitāṃ saṃvidhāyaiva māṃ kṛṣṇaṃ te nyaṣādayan |
āndolanaṃ pracakruśca kīrtanaṃ pūjanaṃ mama || 88 ||
[Analyze grammar]

janmamahotsavaṃ cakruranāderme tadā tvaham |
nṛtyagītottaraṃ rātrau brahmapriyāsamanvitaḥ || 89 ||
[Analyze grammar]

divyakiśorarūpeṇa pratyakṣastvarito'bhavam |
divyadivyātidivyāḍhyarūpabhūṣāmbarānvitaḥ || 90 ||
[Analyze grammar]

prāvirāsaṃ sudolāyāṃ tejaḥparidhisatprabhaḥ |
prasannahāsyavadanaḥ kiśoro māṇikīpatiḥ || 91 ||
[Analyze grammar]

rādhālakṣmīpatiprajñāpramāśrīkamalāpatiḥ |
āścaryaṃ te yayuḥ sarve kṣaṇaṃ cakruśca darśanam || 92 ||
[Analyze grammar]

atha mūrtisvarūpo'hamabhavaṃ ca drutaṃ tataḥ |
pramodamagnāste sarve prārthayāmāsurutsukāḥ || 93 ||
[Analyze grammar]

harekṛṣṇa dayāsindho tārayā'smānnijāñjanān |
saṃsārasāgarādasmāttava dhāma pradehi naḥ || 94 ||
[Analyze grammar]

tathā'stvevamahaṃ tebhyo varaṃ dadau tadā rame |
mūrtermukhād varadānaṃ datvā cāttvā tadarpitam || 95 ||
[Analyze grammar]

adṛśyo'hamabhavaṃśca te cakruḥ parihārakam |
atha kālāntare prāpte tilakaraṃgayoginaḥ || 96 ||
[Analyze grammar]

śikhādevyāstathā cānyavanapānāṃ kṛpāvaśaḥ |
muktidātā vimānena hyupasthito'bhavaṃ vane || 97 ||
[Analyze grammar]

divyadehān vidhāyaitān vimāne tānnyaṣādayam |
agamaṃ divyadhāmordhvaṃ cākṣaraṃ paramaṃ mama || 98 ||
[Analyze grammar]

evaṃ muktiṃ dattavān vai vanapebhyaḥ paraṃ padam |
anye'pi vanapāstatra bhajante mā hariṃ prabhum || 99 ||
[Analyze grammar]

prayānti cākṣaraṃ dhāma prāpte cāyuṣyasīmake |
ye ye śaṃbhornideśena bhajante māṃ janārdanam || 100 ||
[Analyze grammar]

nayāmi tānmama dhāmā'kṣaraṃ lakṣmi parātparam |
paṭhanācchravaṇādasya bhuktirmuktirbhavedapi || 101 ||
[Analyze grammar]

itiśrīlakṣmīnārāyaṇīyasaṃhitāyāṃ tṛtīye dvāparasantāne tilakaraṃgasya vanapasya śivabhaktasya sādhurūpaśivoktabhaktyā nārāyaṇopāsanayā paramamuktiprāptirityādinirūpaṇanāmā ṣaḍadhikadviśatatamo'dhyāyaḥ || 206 ||
[Analyze grammar]