Chapter 205

śrīpuruṣottama uvāca |
śṛṇu nārāyaṇīśri tvaṃ bhaktasya paṇyakāriṇaḥ |
nāmnā vātsalyadhīrasya kathāṃ paramapāvanīm || 1 ||
[Analyze grammar]

nāgaśālāyane grāme bhakto vaiśyo'bhavanmama |
kuṭumbadhanavāṭyādidhenukṣetrādisampadā || 2 ||
[Analyze grammar]

vardhamāno'timānyaśca lokānāṃ ca nṛpasya ca |
viprāṇāṃ pūjakaścātidhyānavṛttirharau mayi || 3 ||
[Analyze grammar]

pūjāpāṭhaparo nityaṃ bhaktikīrtanatatparaḥ |
tīrthasādhusatīmantā gosevaḥ surasevakaḥ || 4 ||
[Analyze grammar]

vṛddhā'bhipūjakaścānnadānadharmaparāyaṇaḥ |
dhanāḍhyaḥ sa dhanaṃ varṣe varṣe yajñārthamuttamam || 5 ||
[Analyze grammar]

dadātyeva tathā vṛkṣāropaṇārthaṃ dadātyapi |
vāpīkūpataḍāgānāṃ khātārthaṃ ca dadātyapi || 6 ||
[Analyze grammar]

jīrṇadevālayādīnāmuddhāre vitaratyapi |
anāthabāladīnānāṃ sahāyārthaṃ dadātyapi || 7 ||
[Analyze grammar]

govṛṣaśvaśukānāṃ ca pārāvātādipakṣiṇām |
ghāsā'nnakaṇakān śreṣṭhī dadātyeva sudharmavān || 8 ||
[Analyze grammar]

vyadhādannādisatrāṇi dharmaśālāḥ śubhāśrayāḥ |
prapāparvāṇi ramyāṇi vedikāścatvarādiṣu || 9 ||
[Analyze grammar]

sīmni jalānnasatrāṇi kuṭīścāśrayadāyikāḥ |
akarot sa ca devānāṃ pūjāpravāhamuttamam || 10 ||
[Analyze grammar]

evaṃ nityaṃ tasya lakṣmi dravyaṃ dāne'pi dīyate |
akṣayyaṃ vardhate nityaṃ vātsalyadhīranāṇakam || 11 ||
[Analyze grammar]

etādṛśaḥ sa bhakto me vrate mahotsavaṃ param |
karoti rājavacchreṣṭhopacārairbahumūlyakaiḥ || 12 ||
[Analyze grammar]

vādyagāyanagītyādyaiḥ kīrtanairbhajanairapi |
nṛtyotsavādibhiścāpi kārayatyeva sūtsavam || 13 ||
[Analyze grammar]

niveditānnasalilamiṣṭānnaphalapāyasaiḥ |
tarpayatyeva sarvān sa mahotsave samāgatān || 14 ||
[Analyze grammar]

pūrve dattaṃ tataścātra labdhaṃ tato'pi dīyate |
lapsyate cā'kṣayaṃ sarvaṃ nārāyaṇāya dīyate || 15 ||
[Analyze grammar]

evaṃ matvā dadātyeva dattaṃ cā'kṣayatāṃ vrajet |
vṛddhiṃ yāyānna tu hrāsaṃ tasmād deyaṃ viśeṣataḥ || 16 ||
[Analyze grammar]

puṇyaṃ phalaṃ mahaccāpi dānasya svargamuttamam |
prasannatā hareścāpi tṛptiścātmagatā bhavet || 17 ||
[Analyze grammar]

sukhadaṃ sarvathā dānaṃ rasā'nnadhanasampadām |
gṛhakṣetravāṭikānāṃ dhenūnāṃ payasāṃ tathā || 18 ||
[Analyze grammar]

dravyāṇāmupakaraṇānāṃ ca dānaṃ tathā'kṣayam |
dātavyaṃ sarvathā sampadyuktaiḥ sampanmiliṣyati || 19 ||
[Analyze grammar]

adattaṃ labhyate naiva nārīdhanagṛhādikam |
dattamevā''pyate sarvaṃ sukhaṃ cendriyadehajam || 20 ||
[Analyze grammar]

lakṣmi vātsalyadhīrastu satre satre sthale sthale |
lilekha kṛṣṇanāmāni kapāṭeṣu prapāsu ca || 21 ||
[Analyze grammar]

kuṭīṣu bhittiṣu pātreṣvapi vastreṣu vastuṣu |
japate śrīkṛṣṇanārāyaṇaṃ śrīvallabham prabhum || 22 ||
[Analyze grammar]

evaṃvidhasya bhaktasya nityaṃ prapūjakasya me |
gṛhaṃ cā'haṃ jagāmaiva bhūtvā tu jaṭilo yatiḥ || 23 ||
[Analyze grammar]

ahaṃ cākāritastena bhojanārthaṃ tṛṇāsane |
mayā cābhihito bhaktaḥ pādaprakṣālanāya me || 24 ||
[Analyze grammar]

suvarṇakalaśe bhṛtvā jalaṃ sugandhimiśritam |
snehenā'kṣālayat pādau papau vāri prasādajam || 25 ||
[Analyze grammar]

athāpi bhaktarāṭ tūrṇaṃ mayā punarniveditaḥ |
dehasammardanārthaṃ vai tailaiḥ sugandhisārakaiḥ || 26 ||
[Analyze grammar]

so'pi prasannamanasā me'ṅgānyamardayattathā |
mayoktaḥ sa tataścā'pyuṣṇādbhiḥ snāpayituṃ tu mām || 27 ||
[Analyze grammar]

drāguṣṇādbhiḥ saha tatrāyayāvutsāhavān svayam |
mayā nirākṛtaḥ so'pi yācitastatstriyaṃ prati || 28 ||
[Analyze grammar]

tūrṇaṃ sā sahasā mañjulikānāmnī pativratā |
patyājñayopatasthe māṃ snāpayituṃ niḥśaṅkinī || 29 ||
[Analyze grammar]

prasannamānasā sādhvī dadau svarṇāsanaṃ tu me |
ahaṃ kaupīnamātrāḍhyo niṣasāda śubhāsane || 30 ||
[Analyze grammar]

sā hastābhyāṃ satī sādhvī bhaktānikā ca māṃ muhuḥ |
sarvāṃgeṣu prasammṛdya snapayāmāsa bhāvukī || 31 ||
[Analyze grammar]

mayā tasyai darśitā vai vikṛtirjāgratātmikā |
tathāpi sā viśaṃkā māṃ snapayāmāsa sādaram || 32 ||
[Analyze grammar]

sparśaṃ punaḥ punaḥ kṛtvā sarvāṃgeṣu pativratā |
prasannamānasā mañjulikā na vikṛtiṃ yayau || 33 ||
[Analyze grammar]

dhīrā sthirā dharmavatī tuṣṭāva ca kṛtāñjaliḥ |
prasanno bhava muktātman yatte sevāṃ karomi te || 34 ||
[Analyze grammar]

patyurājñā yathā syātte sevāṃ kuryāṃ visaṃśayā |
sādhurnārāyaṇaḥ sākṣād divyamūrtiḥ svayaṃ hariḥ || 35 ||
[Analyze grammar]

tasya sevā tu bhāgyena labhyate khalu yoṣitā |
patyājñā cet tavā'smyeva yataścāsmi pativratā || 36 ||
[Analyze grammar]

uktaścaivaṃ tathā'haṃ ca lakṣmi tatpatimāhvayam |
patnī te dīyatāṃ mahyaṃ bādhate mānasaṃ mama || 37 ||
[Analyze grammar]

patiḥ prapūjya pādau me tadā tathā'stu saṃdadau |
sā'pi matparabhāvā ca vyajāyatā''jñayā rame || 38 ||
[Analyze grammar]

aspṛṣṭvā tāṃ tadā tūrṇaṃ divyaścaturbhujo'bhavam |
anādiśrīkṛṣṇanārāyaṇaḥ śrīpuruṣottamaḥ || 39 ||
[Analyze grammar]

sā'pi dhanyāṃ manyamānā svāṃ papāta ca pādayoḥ |
tasyāḥ patiśca vātsalyadhīro'pi premavihvalaḥ || 40 ||
[Analyze grammar]

sādhurūpaṃ hariṃ māṃ ca jñātvā papāta pādayoḥ |
bhaktān samāhvayāmāsa sevāṃ cakre ca tatkṣaṇam || 41 ||
[Analyze grammar]

vastravibhūṣaṇaiścāpi candanaiḥ kuṃkumādibhiḥ |
arpayāmāsa sarvaṃ me bhojanaṃ ca jalaṃ phalam || 42 ||
[Analyze grammar]

mañcaṃ svarṇāsanaṃ cāpi śṛṃgāraṃ ca parārhaṇam |
nīrājanaṃ cakārāpi śayanaṃ me dadau tataḥ || 43 ||
[Analyze grammar]

atha sādhusvarūpo'haṃ sarvaiḥ sampūjitaḥ prabhuḥ |
yayācire ca bhaktāśca tathā vātsalyadhīrakaḥ || 44 ||
[Analyze grammar]

bhuktirlabdhā divyagatirdīyatāṃ parameśvara |
jñānaṃ māhātmyasampannaṃ dīyatāṃ te parātparam || 45 ||
[Analyze grammar]

ahaṃ lakṣmi dadau tasmai tebhyaśca jñānamuttamam |
snehaḥ kāryo bhagavati mayi śrīparameśvare || 46 ||
[Analyze grammar]

sarvārpaṇaṃ vidheyaṃ ca niḥśaṃkaṃ mayi mādhave |
niḥspṛhatvaṃ vidheyaṃ ca sāṃsārikeṣu sarvathā || 47 ||
[Analyze grammar]

vairāgyaḥ sarvathā rakṣyo bandhanasya vichittaye |
kṛṣṇe mayyanurāgaśca prema sneho'tisnigdhatā || 48 ||
[Analyze grammar]

kartavyā sarvathā nārīnarairmadarpaṇāya vai |
yatitavyaṃ nityaśaśca prāpto bhavāmi tena ha || 49 ||
[Analyze grammar]

snehena hṛdaye'khaṇḍaṃ smaraṇaṃ me harerbhavet |
mama mūrteḥ sadā sphurtirvarteta tena saukhyadā || 50 ||
[Analyze grammar]

anyabhānāstu saṃkalpāścodayaṃ neyureva ha |
vilīnā māyayā sākaṃ nirbījāste bhavanti vai || 51 ||
[Analyze grammar]

pūrṇapremavatāṃ pūrṇāḥ saṃkalpā mama gocarāḥ |
nānyagocarā jāyante sarvadā bhaktiyoginām || 52 ||
[Analyze grammar]

viparīte deśakālasaṃgādau cet tu māyikaḥ |
saṃkalpo yadyutpadyeta tadā vyathā bhaveddhṛdi || 53 ||
[Analyze grammar]

yathā netre tīkṣṇasūcīkṣepe vyathā bhavettathā |
yathā tīkṣṇā śalyadhārā hṛdgatā vai vyathāṃ kriyāt || 54 ||
[Analyze grammar]

tathodbhūtā'nyasaṃkalpo vyathāṃ kuryājjanaṃ śritam |
etādṛśaḥ paraḥ snehaḥ kartavyo mayi keśave || 55 ||
[Analyze grammar]

snehastu mama māhātmyajñānād bhavati vardhitaḥ |
varamālāgrahaṇācca naisargiko bhavedapi || 56 ||
[Analyze grammar]

kaṇṭhī mālā varamālā mantro me ca varaḥ smṛtaḥ |
tadādāne bhavet snehaḥ kanyāyā iva kāntake || 57 ||
[Analyze grammar]

adṛṣṭe'pi bhavet snehaḥ sarvādhāre hi rakṣake |
tadarpaṇātmikā vṛttiḥ sarvā bhaktasya jāyate || 58 ||
[Analyze grammar]

karagrahe'pi saṃsparśe snehaścātīva vardhate |
sarvātmanā'rpaṇe snehaḥ niḥsīmā sampravardhate || 59 ||
[Analyze grammar]

guroḥ prasaṃgataḥ sneho guruḥ sādhujano mataḥ |
satāṃ prasaṃgamāsādya māhātmyaṃ cāpnuyānmama || 60 ||
[Analyze grammar]

dehe daihikaviṣaye sampatsvapi vivekavān |
rāgaṃ hitvā harau kṛṣṇe mayi snehaṃ vivardhayet || 61 ||
[Analyze grammar]

jaḍaṃ dehaṃ daihikaṃ ca na mantavyaṃ nijaṃ kvacit |
ātmā'haṃ cetano divyo bhagavaccharaṇāgataḥ || 62 ||
[Analyze grammar]

saccidānandarūpo'smi mukto'smi brahmasaṃsthitaḥ |
māyā me nāsti loke'tra vinā hariṃ na kiñcana || 63 ||
[Analyze grammar]

evaṃ vivekavān kṛṣṇe snigdho bhavati sarvathā |
ahantāmamatāhīnaḥ sarvarāgādivarjitaḥ || 64 ||
[Analyze grammar]

na mātā na pitā me'sti na strī na dravyamasti me |
na putro na sutā me'sti na gehaṃ me na vāṭikā || 65 ||
[Analyze grammar]

pūrvabhaveṣu bahavo jātā vai janakādayaḥ |
ajñānena mayā cātra vismṛtāstattathā tvime || 66 ||
[Analyze grammar]

ātmano nahi mātā'sti kutaḥ pitā kuto gṛham |
ahantāmamatārāgadveṣāścāpi kutastarāḥ || 67 ||
[Analyze grammar]

evaṃ vivekināṃ sarvā naśyanti mamatādikāḥ |
mayyeva śrīharau cāhaṃmamatvaṃ tūpajāyate || 68 ||
[Analyze grammar]

satyaṃ tanmokṣadaṃ bhaktāstarantyetena majjanāḥ |
vivekahīnāḥ saṃsāre badhyante na taranti te || 69 ||
[Analyze grammar]

yathā nāṭyagṛhe prauḍhāḥ kiśorā raṃgabhūkṛte |
nāṭyasampādanārthaṃ vai veṣān vahanti cocitān || 70 ||
[Analyze grammar]

veṣāṇāṃ kuśalāsteṣāṃ dhārayanti suveṣakān |
sajjayanti suśobhāḍhyān śṛṃgārayanti śobhanān || 71 ||
[Analyze grammar]

kiśorān strīsvarūpāṃśca klṛptayanti surūpiṇaḥ |
tatra veṣadharo veṣasampādakān janān yadi || 72 ||
[Analyze grammar]

manyeta pitarau janmapradau mauḍhyāttadā tu saḥ |
ajña eva bhavet sarvavivekādivivarjitaḥ || 73 ||
[Analyze grammar]

tathā dehopi veṣo'sti dehādau pitarau na tu |
mantavyau cātmanā brahmarūpeṇa vartinā tviha || 74 ||
[Analyze grammar]

evameva yathā nānājātiṣu bahavo gatāḥ |
dehasyotpādakāścāpi tathā'sya varṣmaṇo'pi tau || 75 ||
[Analyze grammar]

evaṃ vivekaṃ kṛtvaiva strīputradhanasampadi |
snehaṃ tyaktvā prakuryādvai snehaṃ mayi pareśvare || 76 ||
[Analyze grammar]

dehe'hantā vinaṣṭā syād daihike mamatā tataḥ |
ātmaniṣṭhābalaṃ nityaṃ pravardhetā'kṣarapradam || 77 ||
[Analyze grammar]

varṇāśramābhimānaśca layaṃ yāyād vivekataḥ |
muktiṃ pratyeva valayaṃ nijātmanaḥ samudbhavet || 78 ||
[Analyze grammar]

tad gṛhītvā bhujāyāṃ vai kṛṣṇaṃ kāntaṃ samāśrayet |
bhuktirmuktirbhavedasya karasthā naiva saṃśayaḥ || 79 ||
[Analyze grammar]

gṛhastho'pi bhaveccāpi mantavyaḥ sādhureva saḥ |
bhajet kṛṣṇaṃ tu yastādṛgjñānaniṣṭho virāgavān || 80 ||
[Analyze grammar]

yasmāddharirna vai dūre durlabhaḥ sādhureva saḥ |
tasmād bandhā vinaśyanti sevyaḥ sādhuḥ sa eva saḥ || 81 ||
[Analyze grammar]

brahmātmanā vartate'sau dehādibhāvavarjitaḥ |
sarvārpaṇātmanā lakṣmi tasmāt kiñcinna śiṣyate || 82 ||
[Analyze grammar]

apityāgavatāṃ tyaktagehādīnāmapi kvacit |
abhimānaṃ bhaveccettadasya yogād vilīyate || 83 ||
[Analyze grammar]

evaṃ sa paṇyakṛcchreṣṭhī lakṣmi mayā nibodhitaḥ |
mahāsādhusamo jātaḥ patnīputrādisaṃyutaḥ || 84 ||
[Analyze grammar]

vyāpārān sarvathā kṛṣṇe'rpitān cakre kuṭumbayuk |
viśeṣataścātmaniṣṭhāṃ māhātmyaṃ me viveda saḥ || 85 ||
[Analyze grammar]

atha vairāgyamāpannaḥ patnyā sākaṃ sa bhaktarāṭ |
iyeṣa vaiṣṇavīṃ dīkṣāṃ sādhavīṃ sādhusammatām || 86 ||
[Analyze grammar]

mamā''jñayā sa pradadau putrebhyo dhanasampadaḥ |
svayaṃ vātsalyadhīraḥ sa mañjulikāsatīyutaḥ || 87 ||
[Analyze grammar]

dīkṣāṃ jagrāha mantraṃ ca sādhuryatyāśramo'bhavat |
sādhvī patnī ca tasyā'bhūt sāṃkhyayoginyataḥ param || 88 ||
[Analyze grammar]

vātsalyāyananāmā'yaṃ mayā sādhustadā kṛtaḥ |
vairāgyeṇa yutastīrthayātrārthamudyamaṃ vyadhāt || 89 ||
[Analyze grammar]

tiro'bhavaṃ tvahaṃ drāk ca sādhuḥ prajāṃ praṇamya ca |
putrānāpṛcchya tīrthārthaṃ cā'śvapaṭṭasaro yayau || 90 ||
[Analyze grammar]

ākṣaraṃ paramaṃ kṣetraṃ prāpa kuṃkumavāpikām |
anādiśrīkṛṣṇanārāyaṇaṃ māṃ prāṅnibhālitam || 96 ||
[Analyze grammar]

tīrthaṃ cakre'bhitastatrovāsa śrīlomaśāśrame |
mañjulikā mahāsādhvī brahmapriyāsu cā'vasat || 92 ||
[Analyze grammar]

ubhau tau sādhurūpau māṃ bhajete cātmavedinau |
vartamānāvimau lakṣmi paśya mañjulikāṃ satīm || 93 ||
[Analyze grammar]

taveyaṃ sevikā cāste pāvanī bhaktisaṃbhṛtā |
niḥsaṃśayā'bhavad yā sā sādhave me purā gṛhe || 94 ||
[Analyze grammar]

arpaṇārthaṃ sthitā patyurājñayā'tra tataḥ sthitā |
divyā divyasvarūpā'dya vartate brahmayoginī || 95 ||
[Analyze grammar]

vātsalyāyanasādhuśca vartate brahmarūpavān |
ātmaniṣṭhastathā samyagjñānī snehaparaṃ gataḥ || 96 ||
[Analyze grammar]

māyāṃ kālaṃ ca karmā'pi gaṇayatyeva naiva saḥ |
madbalāt sarvatattvānāmucchraye vartate hyasau || 97 ||
[Analyze grammar]

ākaśe'yaṃ prayātyeva dehenānena sarvathā |
samudre parvate'raṇye meghe prayātyanargalaḥ || 98 ||
[Analyze grammar]

vahnau candre tathā sūrye lokālokācale divi |
merau yāti punaryāti svāśrayaṃ yogapāragaḥ || 99 ||
[Analyze grammar]

mama mūrtiṃ sadā dhyāyati matkṛpayā sādhurāṭ |
dhartuṃ kartuṃ ca saṃhartuṃ samartho vidyate'dhunā || 100 ||
[Analyze grammar]

mamopāsanayā lakṣmi sevayā cāpyaśaṃkayā |
mama yogena divyatvaṃ prāpto'yaṃ muktavat sadā || 101 ||
[Analyze grammar]

evaṃ bhaktiṃ prakurvanto bhavanti divyavigrahāḥ |
paṭhanācchravaṇādasya bhuktirmuktistathā bhavet || 102 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne paṇyakṛto vātsalyadhīrākhyabhaktasya tatpatnyā mañjulikādevyā bhaktyā prasanno bhagavān darśanaṃ dadau sādhubhūtau tau ca vartete ityādinirūpaṇanāmā pañcādhikadviśatatamo'dhyāyaḥ || 205 ||
[Analyze grammar]