Chapter 204

śrīpuruṣottama uvāca |
śṛṇu nārāyaṇīśri tvaṃ kāṣṭhahārasya vai kathām |
nāmnā jāṃgaladevasya mama bhaktasya śobhanām || 1 ||
[Analyze grammar]

niśāragrāmavāstavyo'bhavadbhaktaḥ kuṭumbavān |
śūdro jāṃgaladevākhyaḥ kāṣṭhahāro'tibhaktimān || 2 ||
[Analyze grammar]

nityamutthāya kalye'yaṃ muhūrte brāhmasaṃjñake |
kūpe snātvā hariṃ dhyātvā nivedya roṭakaṃ ca me || 3 ||
[Analyze grammar]

āranālena sākaṃ ca jalaṃ tataḥ praṇamya mām |
sugandhikāṣṭhagundrādidhūpaṃ kṛtvā madagrataḥ || 4 ||
[Analyze grammar]

vanyaṃ phalaṃ ca puṣpaṃ ca patraṃ ca tūlasījanim |
samarpya mahyaṃ bhakto'yaṃ patnīmāpṛcchya bālakān || 5 ||
[Analyze grammar]

rajjuṃ nītvā kuṭhāraṃ ca yātyaraṇya prage'nvaham |
vividhāni ca śuṣkāṇi kāṣṭhanyācchidya yatnataḥ || 6 ||
[Analyze grammar]

bhāraṃ baddhvā ca madhyāhne vṛkṣacchāyāmaye sthale |
sahanītaṃ roṭakaṃ ca smṛtvā māmatti manmanā || 7 ||
[Analyze grammar]

viśrāmaṃ prāpya vai paścāt tāpamāndye gṛhaṃ nijam |
prayātyeva hi kāṣṭhānāṃ bhāraṃ dhṛtvā sa mastake || 8 ||
[Analyze grammar]

yadā vṛkṣe śuṣkakāṣṭhaṃ śuṣkaśākhāṃ chinatti saḥ |
tadā tadā hariṃ smṛtvā natvā vṛkṣaṃ chinatti saḥ || 9 ||
[Analyze grammar]

patraṃ puṣpaṃ phalaṃ cet prāpyate mahyaṃ dadāti saḥ |
vṛkṣa nārāyaṇayogaṃ yāhi ceti vadatyapi || 10 ||
[Analyze grammar]

harekṛṣṇa hareviṣṇo bālakṛṣṇa pareśvara |
antaryāmiṃstarorasya kalyāṇaṃ kuru vakti ca || 11 ||
[Analyze grammar]

etādṛśo hi me bhakto vṛkṣaśreyovicāravān |
bhajate'raṇyamadhye'pi śrīpatiṃ māṃ pumuttamam || 12 ||
[Analyze grammar]

anye ca bahavaḥ kāṣṭhahārāḥ svayogamāgatāḥ |
kṛtā bhaktā vaiṣṇavāśca nāmakīrtanatatparāḥ || 13 ||
[Analyze grammar]

araṇye pippalataroradhastād vedikopari |
militvā kāṣṭhahāraiśca mūrtirme tu śilāmayī || 14 ||
[Analyze grammar]

darśanārthaṃ sthāpitā ca tatra puṇye kṣaṇe dine |
milanti cāpi madhyānhe bhajante kīrtayanti mām || 15 ||
[Analyze grammar]

pūjayanti hariṃ māṃ ca phalairjalairdalādibhiḥ |
vanyakandaistataḥ sarve bhuñjate yānti viśramam || 16 ||
[Analyze grammar]

śubhe dine prakurvanti mahotsavaṃ navaṃ navam |
patramaṇḍapaśobhābhistoraṇaiḥ puṣpahārakaiḥ || 17 ||
[Analyze grammar]

pranṛtyanti kīrtayanti mṛdaṃgādibhirādarāt |
evaṃ kīrtanabhaktānāṃ nṛtyaṃ ca kīrtanaṃ mama || 18 ||
[Analyze grammar]

priyaṃ jātaṃ tato lakṣmi pūjākāle ca nartane |
kīrtane cā'dṛśyarūpo bhavāmyākarṇayaṃstadā || 19 ||
[Analyze grammar]

athā'haṃ sādhurūpo vai vanī bhūtvā yayau tadā |
maṇḍale kāṣṭhahārāṇāṃ pippale vedikāsthale || 20 ||
[Analyze grammar]

satkṛtastaiḥ sādhurūpaḥ svāgataiḥ pūjitastathā |
bhojitaḥ phalakandādyaiḥ pādorvāhitastathā || 21 ||
[Analyze grammar]

dehe sammarditaścāpi vandito'haṃ tadā janaiḥ |
sthitastaiścāpi saṃpṛṣṭaḥ kathaṃ vai bhagavān prabhuḥ || 22 ||
[Analyze grammar]

nirākāro netralabhyo bhavedatra janārdanaḥ |
kathaṃ mokṣo bhavet kāṣṭhahārāṇāṃ vanināṃ tvihi || 23 ||
[Analyze grammar]

tadā'haṃ kamale jñānaṃ pradadau tatra cottamam |
kṛpayā ca prakāśaṃ vai hṛtsvakaravaṃ vaiṣṇavam || 24 ||
[Analyze grammar]

kāṣṭhānāṃ sañcaye nārāyaṇaḥ smartavya eva ca |
kāṣṭhānāṃ haraṇe cāpi smartavyaḥ śrīhariṃ sadā || 25 ||
[Analyze grammar]

bhārasya bandhane cāpi smartavyaḥ parameśvaraḥ |
vikraye'pi pravaktavyaṃ vikrīṇantu hariṃ janāḥ || 26 ||
[Analyze grammar]

rāmasamidhaḥ keśavasamidhaḥ kṛṣṇaśākhinaḥ |
vikrīṇantu janāḥ kṛṣṇasamidhaḥ kṛṣṇakāṣṭhakam || 27 ||
[Analyze grammar]

ityevaṃ raṭanīyo'yaṃ nārāyaṇaḥ pade pade |
anādiśrīkṛṣṇanārāyaṇo mokṣapradaḥ prabhuḥ || 28 ||
[Analyze grammar]

smaraṇīyaḥ sadā śrīmadbālakṛṣṇaḥ śriyāḥ patiḥ |
mokṣadātā sa evā''ste cāntarātmā dayānidhiḥ || 29 ||
[Analyze grammar]

svargadaḥ sukhadaścāpi sampadāṃ ca pradaḥ prabhuḥ |
śāśvatānandadaścāpi sṛṣṭisāgaratārakaḥ || 30 ||
[Analyze grammar]

oṃ namaḥ śrīkṛṣṇanārāyaṇāya svāmine namaḥ |
prajapantu sadā mantraṃ pāvanaṃ pārameśvaram || 31 ||
[Analyze grammar]

sarvārpaṇaṃ prakurvantu kāṣṭhahārā mayīśvare |
naiṣkarmyaṃ puṇyadaṃ sarvaṃ bhaktyākhyaṃ saṃbhaviṣyati || 32 ||
[Analyze grammar]

śrīkṛṣṇo bhagavānasti sarvakāraṇakāraṇam |
prakāśakānāṃ sarveṣāṃ prakāśasamprado hariḥ || 33 ||
[Analyze grammar]

yasya bhāsā sarvamidaṃ bhāsate ca vibhāti ca |
sṛṣṭyādau cā'kṣare dhāmni vartate parameśvaraḥ || 34 ||
[Analyze grammar]

rādhālakṣmīpatirmuktapatirbrahmapriyāpatiḥ |
prakṛtiḥ svecchayā tena vyaktiṃ nītā tathā pumān || 35 ||
[Analyze grammar]

tābhyāṃ sṛṣṭiḥ purā jātā nārāyaṇapraveśitā |
pradhānapuruṣau tābhyāṃ tābhyāṃ hiraṇyapūruṣaḥ || 36 ||
[Analyze grammar]

tato virāṭ tato brahmā tato maharṣayaḥ surāḥ |
mānavāśca tato jātāḥ paśavaḥ pakṣiṇo drumāḥ || 37 ||
[Analyze grammar]

evaṃ sarvamidaṃ jātaṃ kṛtaṃ śrīparamātmanā |
bhūtendriyārthadevādyā vāsitā paramātmanā || 38 ||
[Analyze grammar]

yathāpātraṃ haristeṣu vasate cāntare'sti saḥ |
prerakaḥ sa hariḥ kārye prakāśakaśca mādhavaḥ || 39 ||
[Analyze grammar]

nityasakhā hariḥ kṛṣṇo jīvasya pāralaukikaḥ |
iha loke'pi lokānāṃ sakhā draṣṭā hariḥ svayam || 40 ||
[Analyze grammar]

jīvānāṃ tu kṛtaṃ karma vīkṣya phalapradaḥ prabhuḥ |
phalaṃ dadāti jīvebhyo dehagehādisampadaḥ || 41 ||
[Analyze grammar]

svargaṃ vā narakaṃ cāpi yathākarma dadāti saḥ |
evaṃ sākṣī sadā kṛṣṇo bhavatīti nibodhata || 42 ||
[Analyze grammar]

sākāro bhagavānevaṃ sarvāntaryāmitāṃ gataḥ |
vyāpako vartate cāpi vartate netragocaraḥ || 43 ||
[Analyze grammar]

sādhurūpo vartate ca sādhurhariḥ svayaṃ prabhuḥ |
sādhoḥ prapūjane kṛṣṇapūjā bhavati śāśvatī || 44 ||
[Analyze grammar]

sādhurūpo milatyeva harirdayānidhiḥ paraḥ |
bhaktānāṃ pāvanaḥ kṛṣṇaḥ kṛpayā satsu vartate || 45 ||
[Analyze grammar]

sādhusevāparā bhaktāstaranti sṛṣṭivāridhim |
sādhavo brahmaparamā mokṣakā dehināṃ sadā || 46 ||
[Analyze grammar]

yeṣāṃ sarvamidaṃ brahmarūpaṃ dṛṣṭau pradīvyati |
nirvikalpakacittāste tārakā pāpināmapi || 47 ||
[Analyze grammar]

ye tu jīveśamāyādīnnekṣante brahmadarśinaḥ |
sukhinaste kṛṣṇasukhaiḥ sukhayanti śritān janān || 48 ||
[Analyze grammar]

kāmakrodhādirahitāḥ śrīharau lagnamānasāḥ |
devyadehā api santo vicaranti janā iva || 49 ||
[Analyze grammar]

kārayanti harerbhaktiṃ janānupadiśanti ca |
tārayanti janān sarvān narānnārīrnapuṃsakān || 50 ||
[Analyze grammar]

bhāvayanti kathāṃ ramyāṃ pālayanti vṛṣottamān |
mokṣayanti bandhanātte sādhavaḥ kṛṣṇarūpiṇaḥ || 51 ||
[Analyze grammar]

jīvānāṃ bahuyonīnāṃ svasvakarmaphalāni vai |
bhuñjānānāṃ pramoktāraḥ sādhavo bhavasāgarāt || 52 ||
[Analyze grammar]

yatra vasanti santaśca teṣu nārāyaṇaḥ svayam |
mānuṣyavigrahaṃ dhṛtvā vasatyevā'prakāśavān || 53 ||
[Analyze grammar]

sarvaprakāśayukto'pi naranāṭyaṃ samīhate |
kvacit kṛpāvaśāddhatte hyatimānavasatkriyāḥ || 54 ||
[Analyze grammar]

mānavaṃ bhagavantaṃ taṃ santo jānanti netare |
itare tu satāṃ yogājjānanti mādhavaṃ tataḥ || 55 ||
[Analyze grammar]

āśrayanti prasnihyanti ramante paramātmani |
ye te vai saṃsṛtermuktā yāntyante brahmadhāma ha || 56 ||
[Analyze grammar]

tasmin kṛṣṇe'nurajyante dīvyanti tatra modinaḥ |
ānandayanti tatraivā'śnuvate sukhasampadaḥ || 57 ||
[Analyze grammar]

jānannajānannapi yaḥ kṛṣṇe snihyennarākṛtau |
sa bhūtvaiva guṇātīto yātyante hyakṣaraṃ padam || 58 ||
[Analyze grammar]

kṛṣṇasya divyarūpatvāt tatsambandhāttadāśritāḥ |
divyā divyasvarūpāśca bhavanti brahmagāminaḥ || 59 ||
[Analyze grammar]

māyeśasya harermāyārahitatvācchritā api |
harerbalena māyāṃ vai taranti prākṛtā api || 60 ||
[Analyze grammar]

kāmabhāvena yā nāryo vrajāṅganā harau sadā |
snigdhāstā api muktiṃ vai gatā nirguṇavigrahāḥ || 61 ||
[Analyze grammar]

brahmapriyāḥ samastāśca bālakṛṣṇanarāyaṇe |
snigdhāstā nirguṇe kṛṣṇe nirguṇatvaṃ prapedire || 62 ||
[Analyze grammar]

kāmāt snehād guṇāt svārthāllagnāyāḥ paramātmani |
jahurguṇamayān dehān sadyastāḥ kṣīṇabandhanāḥ || 63 ||
[Analyze grammar]

mādhavo nirguṇaḥ kṛṣṇaḥ saccidānandavigrahaḥ |
tasya yogaṃ yayurye yā nirguṇā divyatāṃ gatāḥ || 64 ||
[Analyze grammar]

evaṃ harau satyarūpe snehānmokṣo bhaveddhruvaḥ |
sādhau snehāttathā mokṣaḥ santaḥ kṛṣṇasya mūrtayaḥ || 65 ||
[Analyze grammar]

satāṃ yogāt prayāntyeva dhāmā'kṣaraṃ paraṃ hareḥ |
harerekāntikā bhaktā vāñchanti sevanaṃ hareḥ || 66 ||
[Analyze grammar]

na svargaṃ nā'pavargaṃ vā na lokaṃ paramātmanaḥ |
naiśvaryāṇyabhivāñcchanti na vāñcchanti sarūpatām || 67 ||
[Analyze grammar]

sāmīpyaṃ nābhivāñcchanti naikatvaṃ tu kadācana |
vāñcchāvantaḥ sakāmāḥ syurnimnakoṭaya eva te || 68 ||
[Analyze grammar]

sarvārpaṇātmabhaktau sā trūṭīreva nigadyate |
ātmaniveditāyāṃ vai saṃkalpasyāpi cārpaṇam || 69 ||
[Analyze grammar]

kṛtaṃ yataḥ punarnaiva saṃkalpayanti svārthakam |
ata eva hi niṣkāmāḥ sarvathā hyuttamottamāḥ || 70 ||
[Analyze grammar]

hareḥ samājñayā sevāṃ vāñcchanti svecchayā tu na |
sevāphalaṃ paraṃ proktaṃ sarvaṃ tatra samāpyate || 71 ||
[Analyze grammar]

prasannatā phalaṃ kṛṣṇasevayā samavāpyate |
nā'smāt phalaṃ paraṃ tvanyanniṣkāmānāṃ hṛdi sthitam || 72 ||
[Analyze grammar]

sevayā labhyate śreṣṭhaṃ kiṃ sālokyādibhistataḥ |
ekatvaṃ tu sadā naiva vāñchanti dāsyahantṛ yat || 73 ||
[Analyze grammar]

ekībhāve kathaṃ sevā kathaṃ prasannatā sukham |
tato niṣkāmabhaktā vai priyā harerbhavanti hi || 74 ||
[Analyze grammar]

bhaktānniṣkāminaḥ kṛṣṇaḥ svāntike saṃprarakṣati |
premṇā kṛtāṃ ca tatsevāṃ premṇā cāṅgīkaroti saḥ || 75 ||
[Analyze grammar]

anicchadbhyo'pi bhaktebhyaḥ prasanno bhagavān hariḥ |
mahaiśvaryāṇi naijāni dadāti tvakṣare prabhuḥ || 76 ||
[Analyze grammar]

evaṃ santoṣiṇo bhaktāḥ kṛṣṇābhāḥ saṃbhavanti te |
tatkṛpayā sadā sarvaiḥ sākaṃ ramate māpatiḥ || 77 ||
[Analyze grammar]

ātmavat tatpriyāste ca santuṣṭā jñāninaḥ sukhāḥ |
niṣkāmā uttamāste vai bhaktā bhavanti tatpriyāḥ || 78 ||
[Analyze grammar]

bhojane śayane snāne gamane ramaṇe kṛtau |
khelane helane vāṇyāṃ vinode hasane dhṛtau || 79 ||
[Analyze grammar]

niṣkāmān sahavāsāṃstān rakṣatyeva janārdanaḥ |
asaṃśayāḥ sadā bhaktāḥ priyā bhavanti śārṅgiṇaḥ || 80 ||
[Analyze grammar]

ityevaṃ copadiṣṭāste lakṣmi sādhusuveṣiṇā |
kāṣṭhahārā mayā sarve'bhavaṃste jñānayoginaḥ || 81 ||
[Analyze grammar]

atha māṃ paramaṃ sādhuṃ jñātvā nārāyaṇātmakam |
śiśriyuste mumuduścā'rthayāmāsurataḥ param || 82 ||
[Analyze grammar]

sādhorguroryogataśced darśanaṃ paramātmanaḥ |
yogyā vayaṃ te śiṣyāḥ smastadā kāraya muktidam || 83 ||
[Analyze grammar]

athā'haṃ tānuvācedaṃ dhyānaṃ kurvantu vai hṛdi |
drakṣyatho'traiva śrīnāthaṃ pareśaṃ mādhavaṃ harim || 84 ||
[Analyze grammar]

ityuktāste netravṛttīścitte nidhāya keśavam |
dadhyustāvat sādhuveṣaṃ kṛṣṇaṃ māṃ vilulokire || 85 ||
[Analyze grammar]

sādhorveṣād divyarūpaṃ caturbhujaṃ pareśvaram |
śrīkāntaṃ rādhikākāntaṃ pareśaṃ vilulokire || 86 ||
[Analyze grammar]

kāṣṭhahārāḥ samastāste'kṣaraṃ dhāma mahojjvalam |
prapaśyan śrīharermuktaiḥ koṭyasaṃkhyairvirājitam || 87 ||
[Analyze grammar]

tatra siṃhāsanaṃ ramyaṃ gajāsanaṃ mahottamam |
tatra sthitaṃ hariṃ māṃ śrībālakṛṣṇaṃ śriyā'nvitam || 88 ||
[Analyze grammar]

vīkṣayāmāsurīśeśeśvaraṃ rādhāpatiṃ prabhum |
brahmapriyāpatiṃ kṛṣṇanārāyaṇaṃ pumuttamam || 89 ||
[Analyze grammar]

sevamānamanantaiśca muktairaikāntikaiḥ sukhaiḥ |
evaṃ vilokya sahasā hṛdaye sādhurūpiṇam || 90 ||
[Analyze grammar]

punaste dadṛśuḥ sarve tato bahiḥsthitaṃ yatim |
sādhuṃ vilokayāmāsuḥ sahasā snehasaṃbhṛtāḥ || 91 ||
[Analyze grammar]

utthāya māṃ parātmānaṃ jñātvā'raṇye samāgatam |
pupūjurāśliṣaṃścāpi papuḥ pādajalaṃ tataḥ || 92 ||
[Analyze grammar]

prasādaṃ ca mayā dattaṃ cakhaduste'timoditāḥ |
divyabhāvaṃ gatāḥ sarve daṇḍavat saṃpracakrire || 93 ||
[Analyze grammar]

utthāyotthāya dhanyaṃ ca manyamānāḥ pramodinaḥ |
nanṛtustālikātānaiḥ kīrtanaṃ cakrire tathā || 94 ||
[Analyze grammar]

mama pādatale jihvābhiśca cakruḥ sulohanam |
pādayorantike sarve luluṭurdhūlikāstare || 95 ||
[Analyze grammar]

atha śāntiṃ yayuścāpi vavandurmāṃ sanātanam |
sevanaṃ cā'rthayāmāsurdhāmni dṛṣṭaṃ yathā tathā || 96 ||
[Analyze grammar]

tathā'stvevaṃ samuccārya tiro'bhavaṃ druta tvaham |
atha te nirvikalpā vai mamopāsanavedinaḥ || 97 ||
[Analyze grammar]

divyā bhaktā abhavaṃśca kālenāpi tanutyajaḥ |
yayurme dhāma paramaṃ yatra sādhyā vasanti vai || 98 ||
[Analyze grammar]

evaṃ mayā kāṣṭhahārā uddhṛtā bhaktitatparāḥ |
lakṣmi jāṃgaladevādyāḥ sahasraśo'pi tatparāḥ || 99 ||
[Analyze grammar]

sakāmāstatra ye tvāsan prāpitāste divaṃ prati |
niṣkāmāḥ prāpitā lakṣmi vaikuṇṭhaṃ cākṣaraṃ tathā || 100 ||
[Analyze grammar]

kecittu prāpitā dhāma golokaṃ sumahojjvalam |
kecicca prāpitā lakṣmi śrīpuraṃ lalitāgṛham || 101 ||
[Analyze grammar]

anye śrībadarīdhāma śvetadvīpaṃ tathā'pare |
kecidavyākṛtaṃ dhāma prāpitāścāmṛtaṃ pare || 102 ||
[Analyze grammar]

evamete mayā lakṣmi coddhṛtāḥ kāṣṭhahāriṇaḥ |
paṭhanācchravaṇādasya bhuktirmuktirbhaveddhruvam || 103 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne jāṃgaladevādikāṣṭhahārāṇāṃ bhaktyā sādhurūpeṇa śrīharerdarśanaṃ cānte mokṣaṇaṃ cetyādinirūpaṇanāmā caturadhikadviśatatamo'dhyāyaḥ || 204 ||
[Analyze grammar]