Chapter 187

śrīpuruṣottama uvāca |
śṛṇu nārāyaṇīśri tvaṃ tathā cānyakathāṃ śubhām |
dhavalākhye pure tvāsīccarmakāro mṛtādanaḥ || 1 ||
[Analyze grammar]

grāmopaśalyavāsaśca mṛtānāṃ khuriṇāṃ sadā |
paśūnāṃ grāmamadhyāt sa śavānāmapahārakaḥ || 2 ||
[Analyze grammar]

carmaśuddhikaraścāpyaspṛśyo dūre pratiṣṭhati |
mṛtamāṃsādanaścāsīt sakuṭumbaḥ sadā hyaghī || 3 ||
[Analyze grammar]

kvacid vasatimāsādya kṛtvā tu carmavikrayam |
prāptadhanena godhūmādyannaṃ śākaphalādikam || 4 ||
[Analyze grammar]

krītaṃ svagṛhamānāyya pācayitvā bhunaktyapi |
kvaciccāraṇyamārjāraiḥ śṛgālaiḥ śaśakaistathā || 5 ||
[Analyze grammar]

vārāhaiśca tarakṣvādyaiḥ kvacit kacchapamatsyakaiḥ |
vidadhāti kuṭumbasya bhojanaṃ piśitāśanaḥ || 6 ||
[Analyze grammar]

evaṃ jātyā karmaṇā ca bhojanenā'tikilbiṣī |
mṛtādanākhyaścarmakṛd dūre tyājyo'vasat sadā || 7 ||
[Analyze grammar]

athaikadā tu varṣāyāṃ patitāyāmaharniśam |
jalapūraṃ samāyātaṃ bahuvegaṃ samantataḥ || 8 ||
[Analyze grammar]

tatraike prāṇino jīvā uhyante vaninastadā |
mṛtāśca jīvinaścāpi grāmyāśca paśavo'pi ca || 9 ||
[Analyze grammar]

ye caranti tṛṇakṣetre gocare te'pi kecana |
pūravegena varṣāyāṃ gṛhaṃ mantuṃ na śekire || 10 ||
[Analyze grammar]

ekā gauḥ pūravegena cohyamānā tu jīvitā |
carmakārasya vāsasyocchrāyasyaiva samīpataḥ || 11 ||
[Analyze grammar]

jalaiścākṛṣyamāṇā sā nirgatā vīkṣitā tadā |
carmakāreṇa dayayoddhartuṃ gāṃ vai samīhitam || 12 ||
[Analyze grammar]

mṛtādanaḥ svayaṃ puṣṭastartuṃ śakto balī dṛḍhaḥ |
śatahastamitāṃ rajjuṃ kaṭyāṃ badhvā jale'patat || 13 ||
[Analyze grammar]

rajjuprāntaṃ dvitoyaṃ tu datvā doṣṣu kuṭumbinām |
aparāṃ ca dṛḍhāṃ rajjuṃ mukulitāṃ gale'kṣipat || 14 ||
[Analyze grammar]

patitvā sahasā vārivege vahati yatra gauḥ |
tīrtvā vegena tasyāstu nimnabhāge puro'bhavat || 15 ||
[Analyze grammar]

pūreṇa cohyate dhenuścarmakāro'pi cohyate |
tīrasthā rajukādhrā ye te'nudhāvanti taṃ taṭam || 16 ||
[Analyze grammar]

taratā carmakāreṇa hastasya lāghavena vai |
mukulitāyā rajjvāstu prānto dhenugale kṛtaḥ || 17 ||
[Analyze grammar]

granthiḥ kṛtā ca sahasā śṛṃgayornihitā tu sā |
rajjuṃ kṛtvā lambamānāṃ prāntaṃ kaṭyāṃ babandha saḥ || 18 ||
[Analyze grammar]

atha kuṭumbinaḥ prāhā''karṣayantu balāditi |
kuṭumbibhiśca sā rajjurākṛṣṭā svakaradhṛtā || 19 ||
[Analyze grammar]

carmakāraḥ pūravegāt taṭamākarṣito'bhavat |
dhenuścāpi kaṭirajjuvaddhā cā''karṣitā'bhavat || 20 ||
[Analyze grammar]

tīraṃ prati samākṛṣṭā militvā tu kuṭumbibhiḥ |
carmakāreṇa sahitā sajīvā tīramāgamat || 21 ||
[Analyze grammar]

tadā gauḥ prāṇasaṃrakṣātuṣṭā''śīrvādamāha tān |
bhavatāṃ sarvapāpāni naṣṭāni mama rakṣaṇāt || 22 ||
[Analyze grammar]

godāne yatphalaṃ gojīvane yacca phalaṃ mahat |
gosevāyāṃ phalaṃ yacca tatsarvaṃ bhavatāṃ bhavet || 23 ||
[Analyze grammar]

prasūyamānādhenvāśca dāne yat phalamucyate |
tatphalaṃ bhavatāmastu mama prāṇaprarakṣaṇāt || 24 ||
[Analyze grammar]

svarṇadhenuphalaṃ yacca kapilādhenujaṃ phalam |
gomedhe ca phalaṃ yat tadastu vo mama rakṣaṇāt || 25 ||
[Analyze grammar]

pṛthvīrakṣāphalaṃ yacca prajārakṣāphalaṃ tu yat |
kanyārakṣāphalaṃ yattadastu vo mama rakṣaṇāt || 26 ||
[Analyze grammar]

satīrakṣāphalaṃ yacca bālarakṣāphalaṃ ca yat |
viprarakṣāphalaṃ yattadastu vo mama rakṣaṇāt || 27 ||
[Analyze grammar]

sādhurakṣāphalaṃ yacca devarakṣāphalaṃ ca yat |
śaraṇāgatarakṣotthaṃ vastadastu mamā'vanāt || 28 ||
[Analyze grammar]

bhītarakṣāphalaṃ yacca prāṇarakṣāphalaṃ ca yat |
mokṣadānaphalaṃ yattadastu vo mama rakṣaṇāt || 29 ||
[Analyze grammar]

dharmarakṣāphalaṃ yacca garbharakṣāphalaṃ ca yat |
mātṛsevāphalaṃ yacca vo'stu tanmama rakṣaṇāt || 30 ||
[Analyze grammar]

devapūjāphalaṃ yacca mṛtyutrāṇaphalaṃ ca yat |
gaṃgātīrthaphalaṃ yattad vo'stu mama prarakṣaṇāt || 31 ||
[Analyze grammar]

brahmahatyādipāpāni paśuhiṃsodbhavāni ca |
māṃsabhakṣaṇapāpāni līyantāṃ mama rakṣaṇāt || 32 ||
[Analyze grammar]

gavārthe brāhmaṇārthe vā sādhvarthe ca satīkṛte |
devārthe prāṇadātustu sarvapāpavināśanam || 33 ||
[Analyze grammar]

madarthe prāṇadā yūyaṃ madarthe kṛtajīvanāḥ |
mama rakṣākarā yūyaṃ jīvantu ṛddhisevitāḥ || 34 ||
[Analyze grammar]

bhuktiṃ muktiṃ mahāsmṛddhiṃ bhuñjantu svargasadṛśīm |
vaṃśo vo'stu sadā bhakto bhaktimān gavi gopātau || 35 ||
[Analyze grammar]

gopāle gopikākānte govinde gopabālake |
gopālabālake sneho goloke vasatiśca vaḥ || 36 ||
[Analyze grammar]

ityevaṃ gaurdadau tebhyaścāśīrvādāṃstadā śubhān |
kampamānā bhayodvignā śītārttā kṣudhitā tathā || 37 ||
[Analyze grammar]

atha śanaiśca tāṃ dhenuṃ sagarbhāṃ cāśrayecchukīm |
nināya carmakāraḥ sa svālaye tāṃ rarakṣa ha || 38 ||
[Analyze grammar]

dadau ghāsottamagrāsān siṣeve tṛṇavāribhiḥ |
nāsyāḥ kaścit samāyāti svāmī netuṃ na vidyate || 39 ||
[Analyze grammar]

tataḥ sā carmakārasya gṛhe vāsaṃ vyadhācca gauḥ |
tṛṇānyattvā pārśvabhūmau sāyamāgatya tiṣṭhati || 40 ||
[Analyze grammar]

carmakāro nijāṃ matvā sevate tu yathābalam |
daridro'pi yatitvā'pi go'rthaṃ tṛṇaṃ jalaṃ muhuḥ || 41 ||
[Analyze grammar]

ānayatyeva kṣetrādvā vanādvā dūrabhūmitaḥ |
evaṃ prasevamānasya mṛtādanasya tasya hi || 42 ||
[Analyze grammar]

gosevāyāḥ phalaṃ dhenorāśīrvādaphalaṃ tathā |
prāptaṃ tenaikadā prātaḥ preritastu mṛtādanaḥ || 43 ||
[Analyze grammar]

adya gṛhaṃ vilimpāmi gauramṛdā ca śakṛtā |
vicāryetthaṃ striyā sākaṃ nītvā sītāṃ khanitrikām || 44 ||
[Analyze grammar]

vaṃśapātradvayaṃ cāpi mṛdamāhartumeva ha |
nadītīraṃ yayau yatra gauramṛd labhyate śubhā || 45 ||
[Analyze grammar]

sītayā ca khanitreṇa garte khanati mṛttikām |
vitastimātraṃ khanitaṃ tīre pārśvagabhūstaram || 46 ||
[Analyze grammar]

tāvaccarustāmradhātoḥ svarṇarūpyakasaṃbhṛtaḥ |
nirgato bhūtalamadhyācchobhano daivavāñcchayā || 47 ||
[Analyze grammar]

mṛtādanena śīghraṃ vai tasmāt svarṇasya mudrikāḥ |
niṣkāsya vaṃśapātre mṛttikāguptāśca vai gṛham || 48 ||
[Analyze grammar]

ānītā pañcapātrāṇi na tu jānāti kaścana |
gṛhāntare tu vivare sarvāḥ kṣiptāḥ sugopitāḥ || 49 ||
[Analyze grammar]

gosevāyāḥ phalaṃ matvā sevate gāṃ sabhāryakaḥ |
tāmrapātraṃ tu garte vai yathā''sīt tattathā punaḥ || 50 ||
[Analyze grammar]

riktaṃ nidhāya saṃgopya mṛdbhirgṛhaṃ gato hi saḥ |
yathāpekṣaṃ nāṇakena bhuṃkte sukhāni sarvathā || 51 ||
[Analyze grammar]

bhuṃkte bhojanapānāni vastrāṇi modakāni ca |
yathā'nye naiva jānīyustathā bhuṃkte'rjitaṃ dhanam || 52 ||
[Analyze grammar]

tena pathā samāyātānatithīn sevate'pi ca |
goṣṭhe sthitān drumacchāyāpradeśe sevate'tithīn || 53 ||
[Analyze grammar]

phalāni śarkarāścāpi madhuparkaṃ dadātyapi |
vastraṃ jalaṃ yathāpekṣaṃ dadāti caṇakādikam || 54 ||
[Analyze grammar]

ghṛtapakvaṃ tailapakvaṃ pakvaṃ ca vahninā'pi yat |
sūryapakvamṛtupakvamannaṃ dadāti sādhave || 55 ||
[Analyze grammar]

yogyaṃ dadāti nā'yogyaṃ sevate sādhuyoginaḥ |
kuṭumbaṃ sevate sādhūn śṛṇoti bhajanāni ca || 56 ||
[Analyze grammar]

kathāṃ śṛṇoti me ramyāṃ sādhūktāṃ pāvanīṃ parām |
ahiṃsā paramo dharmo vighasāśī pramucyate || 57 ||
[Analyze grammar]

māṃsādanaṃ mahatpāpaṃ yāmyapurīprayojakam |
matsyādaḥ sarvamāṃsāśī kadāpi naiva mucyate || 58 ||
[Analyze grammar]

abhakṣyabhakṣaṇād bhraṣṭo na yāti mokṣaṇaṃ kvacit |
yāmyadūtāḥ pīḍayanti randhayanti yamālaye || 59 ||
[Analyze grammar]

taṃ tu māṃsādanaṃ nityaṃ pācayanti mahānale |
nikṛntanti mārayanti narake pātayanti ca || 60 ||
[Analyze grammar]

madyaṃ māṃsaṃ tathā cauryaṃ vyavāyaśceti kalmaṣam |
bhayaṃkaraṃ mahāghoraṃ kartavyaṃ naiva mānavaiḥ || 61 ||
[Analyze grammar]

janma cedaṃ mānavaṃ vai mokṣāya labhyate bhuvi |
mokṣaḥ sādhyo mānavairvai tyājyā doṣā aghāni ca || 62 ||
[Analyze grammar]

bahuṣvapi tu deheṣu pakṣiṣu ca paśuṣvapi |
madyamāṃsādayo bhuktāstatpāpānto na vidyate || 63 ||
[Analyze grammar]

asmin vai mānave bhāve puṇyaṃ kāryaṃ divaṃpradam |
bhaktiḥ kāryā hareścāpi mokṣo gamyaḥ pare'kṣare || 64 ||
[Analyze grammar]

evaṃ kathāṃ pāvanīṃ ca carmakāraḥ śṛṇoti vai |
tato'sya jātā sahasā mumukṣā sādhusaṃgataḥ || 65 ||
[Analyze grammar]

niyamān jagṛhe cā'hiṃsāṃ ca māṃsādivarjanam |
annabhojitvamevāpi nityaṃ śrīharisevanam || 66 ||
[Analyze grammar]

sādhūnāṃ sevanaṃ gavāṃ sevanaṃ pāpavarjanam |
dānaṃ yathārhaṃ pātrāya bhagavatkīrttanaṃ tathā || 67 ||
[Analyze grammar]

vratotsavāṃśca devānāṃ cāturmāsyavratāni ca |
evaṃvidhān sa niyamān jagrāha mokṣadān sadā || 68 ||
[Analyze grammar]

atha sādhurdharmaśālāyano nāmnā'ṭavīṃ bhraman |
nirambaraḥ samāyātaścarmakāragṛhāntikam || 69 ||
[Analyze grammar]

dadarśainaṃ carmakāro yoginaṃ yogamānasam |
smarantaṃ paramātmānaṃ japamālānvitaṃ śubham || 70 ||
[Analyze grammar]

digambaraṃ praśāntaṃ ca nirvikāraṃ sthirāśayam |
śīlavrataṃ rāgaśūnyaṃ surūpaṃ jaṭilaṃ munim || 71 ||
[Analyze grammar]

carmakārastu taṃ gatvā praṇāmamakaronmudā |
svāgataṃ te mahābhāga sādho jayo'stu te sadā || 72 ||
[Analyze grammar]

āyāhi mama vāse'tra carmakāro'smi jātitaḥ |
yadi tvaṃ manyase sādho gṛhaṃ pāvaya me'nagha || 73 ||
[Analyze grammar]

śrutvā śālāyanaḥ prāha kalyāṇaṃ satyavādinaḥ |
tavā'stu sādhubhaktasya bhaktasya bhagavānapi || 74 ||
[Analyze grammar]

vaśībhavati divyātmā tatra sādhostu kā kathā |
pāvanā bhagavadbhaktā api cāṇḍālayonayaḥ || 75 ||
[Analyze grammar]

carmakārāḥ prajāḥ sarvāścarmanaddhā bhavanti hi |
carmagarbhe carmayonau prajāyante hi carmataḥ || 76 ||
[Analyze grammar]

carmasnānaṃ kārayanti carma śṛṃgārayanti ca |
carmaṇyeva ca tailādyaiḥ kurvanti mardanādikam || 77 ||
[Analyze grammar]

bhūṣāmbarāṇi dehāya carmiṇe cārpayantyapi |
carmamayaṃ jagat sarva ko nāsti carmakārakaḥ || 78 ||
[Analyze grammar]

brahmā carmakāraścāste tatputrāścarmakārakāḥ |
bhakta tvaṃ carmakāro'si carmakārasya vaṃśajaḥ || 79 ||
[Analyze grammar]

prajānāṃ carmakāratve viśeṣo nāsti kaścana |
mugdhā ye carmaviṣaye carmakārā hi te matāḥ || 80 ||
[Analyze grammar]

amugdhāścarmaviṣaye brahmākārā hi te matāḥ |
sādhavo brahmasadanā brahmākārā bṛhatpriyāḥ || 81 ||
[Analyze grammar]

ātmā'yaṃ vidyate yāvad dehe sa carmakārakaḥ |
adeho jāyate bhaktyā mokṣo sa brahmakārakaḥ || 82 ||
[Analyze grammar]

ahamātmā sādhurūpo brahmarūpo bhavāmi ha |
harerbhaktyā snehamayyā brahmākāro bhavāmyaham || 83 ||
[Analyze grammar]

bhakta tvaṃ sādhuyogena brahmākāro bhavasyapi |
sādhubhaktāḥ sādhurūpāḥ sādhukāriṇa eva te || 84 ||
[Analyze grammar]

sādhvarthaṃ yasya sarvasvaṃ brahmātmā cocyate hi saḥ |
sa eva pāparahitaḥ puṇyātmā paṃktipāvanaḥ || 85 ||
[Analyze grammar]

ityevamuktvā sādhuḥ sa yayau tasyālayaṃ tadā |
carmakāro bhaktarājaścakre'sya svāgataṃ śubham || 86 ||
[Analyze grammar]

āsanaṃ pradadau ramyaṃ pādaprakṣālanaṃ vyadhāt |
papau pādāmṛtaṃ sarvaṃ kuṭumbasahito hi saḥ || 87 ||
[Analyze grammar]

pādasaṃvāhanaṃ cakre dehasammardanaṃ tathā |
madhuparkaṃ dadau miṣṭaṃ śarkarāṃ saktumityapi || 88 ||
[Analyze grammar]

dadau phalāni śreṣṭhāni pakvāni vividhāni ca |
jalaṃ ca śayanaṃ cāpi dadau viśrāntihetave || 89 ||
[Analyze grammar]

putrāḥ putryo dampatī ca sarvaṃ dehasya mardanam |
bhojayitvā pracakrurvai mārgaśramanivṛttaye || 90 ||
[Analyze grammar]

sādhurnidrāṃ parāṃ lebhe sarve cakruśca mardanam |
dehasaṃvāhanaṃ cāpi vyajanenā'nilā'rpaṇam || 91 ||
[Analyze grammar]

evaṃ sevāṃ pracakruste dharmaśālāyanasya vai |
dharmaśālāyano nidrāṃ kṛtvā ca bubudhe tadā || 92 ||
[Analyze grammar]

jalaṃ pītvā niṣasādāsane mālājapānvitaḥ |
mṛtādanādyāścāgre'sya niṣedurbhaktibhāvataḥ || 93 ||
[Analyze grammar]

sādhuḥ prāha sadā bhaktiḥ kartavyā paramātmanaḥ |
gosevā sādhusevā ca kartavyā muktaye tviha || 94 ||
[Analyze grammar]

gṛhāṇa mantraṃ divyaṃ tvaṃ kuṭumbena yuto hi mat |
svargaṃ divyaṃ tato mokṣaṃ lapsyase nā'tra saṃśayaḥ || 95 ||
[Analyze grammar]

ityuktaścarmakāraḥ sa kuṭumbasahitastadā |
mantraṃ jagrāha sādhośca harekṛṣṇanarāyaṇa || 96 ||
[Analyze grammar]

oṃ namaḥ śrīkṛṣṇanārāyaṇāya svāmine svāhā |
bālakṛṣṇaṃ tato bheje sādhūktapaddhatiṃ vrajan || 97 ||
[Analyze grammar]

tataḥ sa tīrthayātrāyāṃ sādhunā saha vai yayau |
kuṃkumavāpikākṣetraṃ cāśvapaṭṭasarovaram || 98 ||
[Analyze grammar]

suvarṇaṃ bahudhā tatra dāne yajñe samārpayat |
mandiraṃ kārayāmāsa sarastaṭe tathā ca saḥ || 901 ||
[Analyze grammar]

āśramaṃ racayāmāsa bhajanārthaṃ nijaṃ śubham |
vaṃśena sahitastatra sādhunā saha cā'vasat || 100 ||
[Analyze grammar]

athaikadā'haṃ kamale prasannastatra cāyayau |
darśanaṃ svaṃ dadau tasmai caturbhujaṃ sutaijasam || 101 ||
[Analyze grammar]

kuṭumbaṃ pūjayāmāsa śrīkṛṣṇaṃ māṃ sanātanam |
mṛtādano mama pādavāri prakṣālya saṃpapau || 102 ||
[Analyze grammar]

vimānaṃ tūrṇamāyātaṃ brahmadhāmno'tibhāsuram |
tatra mṛtādanaścādhyarohan mama nideśataḥ || 103 ||
[Analyze grammar]

gavā sākaṃ tayā tatrā'nayaṃ taṃ mama dhāma vai |
anyat sarvaṃ kuṭumbaṃ ca svarge devāstato'bhavan || 104 ||
[Analyze grammar]

puṇyaṃ bhuktvā dhenuvṛttaṃ yāsyanti dhāma me param |
sādhusevāprapuṇyaṃ ca mama bhakteḥ phalaṃ tathā || 105 ||
[Analyze grammar]

bhokṣyante ruciraṃ lakṣmi śāśvatānandapūritam |
evaṃ gosevayā māṃsādanapāpaṃ vināśitam || 106 ||
[Analyze grammar]

puṇyodbhavena ca sādhusamāgamo dhanāgamaḥ |
tīrthavāsaḥ parāmuktiḥ sarvaṃ tasya vyavartata || 107 ||
[Analyze grammar]

paṭhanācchravaṇādasya smaraṇānmananādapi |
bhuktirmuktirbhaveccāpi śāśvataṃ padamarjyate || 108 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne mṛtādananāmakacarmakārasya dhenoḥ prāṇarakṣaṇena māṃsādanādipāpanāśaḥ puṇyaprāptiḥ sādhoḥ samāgamaḥ svargaṃ mokṣaścetyādinirūpaṇanāmā saptāśītyadhika |
śatatamo'dhyāyaḥ || 187 ||
[Analyze grammar]