Chapter 185

śrīpuruṣottama uvāca |
śṛṇu nārāyaṇīśri tvaṃ kathāṃ bhaktasya śobhanām |
nāmnā mañjulakeśasya halavādgrāmavāsinaḥ || 1 ||
[Analyze grammar]

halavānagare lakṣmi vipro mañjulakeśavān |
vartate syā'tibhakto me dharme'tyantakṛtaśramaḥ || 2 ||
[Analyze grammar]

nityaṃ triṣavaṇasnāyī trisandhyāvandanā'rhaṇaḥ |
viṣṇuṃ śivaṃ gaṇeśaṃ ca satīmarkaṃ prage'rcayan || 3 ||
[Analyze grammar]

stotrapāṭhaṃ prakurvaṃśca nityamarthayate harim |
harekṛṣṇa hareviṣṇo tvadbhaktiḥ sarvadā'stu me || 4 ||
[Analyze grammar]

māhātmyaṃ ca tava śreṣṭhamekāntikī tu dāsatā |
bhakteṣu te tathā kṛṣṇa tvayi doṣamatirna me || 5 ||
[Analyze grammar]

tvadekāntikabhaktānāṃ satāṃ saṃgo'stu me sadā |
darśanaṃ sarvadā cāstu mūrtīnāṃ te satāmapi || 6 ||
[Analyze grammar]

dharme matirdṛḍhā me'stu vyavasāyo mamā'stu me |
madyamāṃsādikasparśo'pi me mā'stu kadācana || 7 ||
[Analyze grammar]

abhakṣyāṇāṃ bhakṣaṇaṃ me palāṇḍorlaśunasya ca |
mā'stu mā'stu tathā caurye mano me cañcalaṃ kvacit || 8 ||
[Analyze grammar]

nindane tava bhaktānāṃ pravṛttirme ca mā'stvapi |
devānāṃ nindane cāpi saṃkalpo'pi ca mā'stu me || 9 ||
[Analyze grammar]

āsurāṇāṃ nāstikānāṃ saṃgo mā'stvapi me kvacit |
rāgo'pi viṣaye mā'stu snehastvayi sadā'stu me || 10 ||
[Analyze grammar]

ātmaniveditā kṛṣṇa tvayi cā'stu sadā mama |
pātivratyaṃ kṛṣṇanārāyaṇa tvayi sadā'stu me || 11 ||
[Analyze grammar]

evaṃ kuṭumbasahito nityamarthayate hi mat |
agālitaṃ jalaṃ naiva pibatyapyaniveditam || 12 ||
[Analyze grammar]

annaṃ phalādikaṃ naiva bhunaktyapyaniveditam |
vastrāmbaravibhūṣādi na yuṃkte'pyaniveditam || 13 ||
[Analyze grammar]

yānaṃ vāhanamevāpi na yuṃkte cā'niveditam |
śṛṃgāraṃ copakaraṇaṃ yattad bhogyaṃ nivedya vai || 14 ||
[Analyze grammar]

upayuṃkte nijārthe vai mahābhāgavato yathā |
karoti pūjanaṃ nityaṃ mama nārāyaṇasya saḥ || 15 ||
[Analyze grammar]

bhikṣārthaṃ ca tato yāti nagare prāpya bhikṣitam |
gṛhamāgatya tat pacyaṃ pācayitvā nivedya me || 16 ||
[Analyze grammar]

bhuṃkte kuṭumbasahitastulasīpatrasaṃyutam |
lakṣmīnārāyaṇasaṃhitākathāṃ vācayatyapi || 17 ||
[Analyze grammar]

prajājanān cāgatāṃśca śrāvayatyeva cāśrame |
patnīyuto'yaṃ bhūdevo lakṣmi putrādisaṃyutaḥ || 18 ||
[Analyze grammar]

mahābhāgavato dharmaṃ dṛḍhaṃ sampālayatyatha |
kvacij jñātijanā jñātibhojane cāhvayantyapi || 19 ||
[Analyze grammar]

vipraṃ taṃ kintu vipro'sau bhuṃkte na jñātibhojanam |
agālitairjalaiścāpyasaṃskṛtānnādi randhitam || 20 ||
[Analyze grammar]

matvā bhuṃkte na tatrāpi palāṇḍavādipradūṣitam |
laśunādivimiśraṃ vā bhuṃkte naiva kadācana || 21 ||
[Analyze grammar]

itihetorjñātijanā śoṣaṃ kurvanti taṃ prati |
sa ca mañjulakeśo vai sahate sarvameva ha || 22 ||
[Analyze grammar]

athaikadā svasambandhigṛhe yayau tu mañjulaḥ |
sambandhinastu taṃ prāhurbhavadarthaṃ tu śuddhimat || 23 ||
[Analyze grammar]

pācayitvā bhojanaṃ vai dāsyāmo bhuṅkṣva tṛptidam |
viśvāsayitvaiva tato randhitānne manāgapi || 24 ||
[Analyze grammar]

surāṃ daduste jñātvaiva ruṣānvitāḥ subhojane |
mañjulakeśo gandhena jñātvā pātrasthabhojane || 246 ||
[Analyze grammar]

surāsammiśraṇaṃ svalpaṃ śarkarākesarānvitam |
tatyāja bhojanaṃ tadvai jalaṃ tatyāja tadgṛhe || 26 ||
[Analyze grammar]

viśvāsaghātaruṣṭaśca śaśāpa mañjulastadā |
yo'yaṃ surāṃ dadau mahyaṃ viśvāsya bhojanena vai || 27 ||
[Analyze grammar]

so'yaṃ vicitto bhavatu pramattonmatta eva ca |
evamukte tu sahasā janānāṃ sannidhau tadā || 28 ||
[Analyze grammar]

mañjulaputraśvaśuro vicittonmattatāṃ gataḥ |
bhrāntacitto'bhavattūrṇaṃ maryādāṃ parihāya ca || 29 ||
[Analyze grammar]

vāṇīṃ duṣṭāṃ tathā ceṣṭāṃ duṣṭāṃ nirambarāṃ vyadhāt |
nāmnā pāśupateśākhyaḥ śvaśuraḥ śāpadaṇḍitaḥ || 30 ||
[Analyze grammar]

vimanā bhraṣṭabhānaścopadravaṃ bahudhā'karot |
janānāṃ sannidhau tiṣṭhan vivastraśca pramehati || 31 ||
[Analyze grammar]

rauti nṛtyati tālaiśca kūrdatyapi ca dhāvati |
ākrośati prahasati cā'sambaddhaṃ pragāyati || 32 ||
[Analyze grammar]

pātravastrāṇi samprāpya vibhidya sphoṭayatyapi |
avācyavācaṃ vadati ceṣṭāṃ karoti pāśavīm || 33 ||
[Analyze grammar]

evaṃ vai śāpadoṣeṇa vaicittyaṃ sahasā gataḥ |
upadravān bahuśastu karotyatarkitānapi || 34 ||
[Analyze grammar]

kuṭumbaṃ bahudhā tasyodvignaṃ jātamupadravāt |
prārthayāmāsa vipraṃ taṃ śāpanivṛttaye tadā || 35 ||
[Analyze grammar]

āha mañjulakeśo'pi tyajantvabhakṣyabhakṣaṇam |
kurvantu śuddhimevāpi prāyaścittaṃ vrataṃ mahat || 36 ||
[Analyze grammar]

brahmakūrcākhyamevā'taḥ śuddhyuttaraṃ makhaṃ śubham |
vaiṣṇavaṃ samprakurvantu godānāni dadatvapi || 37 ||
[Analyze grammar]

mantrāṃśca vaiṣṇavāṃstatra kṛṣṇanārāyaṇasya ha |
gṛhṇantu bhaktikāryārthaṃ tataḥ svāsthyaṃ bhaviṣyati || 38 ||
[Analyze grammar]

evaṃ tu kathitāḥ pāśupateśasya kuṭumbinaḥ |
abhakṣyabhakṣaṇaṃ tatyajuścakrurbrahmakūrcakam || 39 ||
[Analyze grammar]

vaiṣṇavaṃ ca makhaṃ cakrurdadurdānāni sadgavām |
omanādikṛṣṇanārāyaṇaḥ svāmī patiśca me || 40 ||
[Analyze grammar]

itimantraṃ tathā cānyān mantrāṃśca jagṛhustadā |
vaiṣṇavāste ca sañjātā harekṛṣṇa japanti ca || 41 ||
[Analyze grammar]

sarvametat kṛtaṃ cāpi vaicittyaṃ na nivartate |
tadā mañjulakeśo'pi nirāhāro'tibhaktimān || 42 ||
[Analyze grammar]

saptāhaṃ cāsane tiṣṭhan bālakṛṣṇajapān vyadhāt |
prārthayāmāsa cātyarthaṃ sambandhinaḥ sametya ca || 43 ||
[Analyze grammar]

athā'haṃ bhaktarakṣārthaṃ bhaktecchāpūraṇāya vai |
yayāvadṛśyarūpaśca śuśrāva kīrtanādikam || 44 ||
[Analyze grammar]

saptāhe tu vyapagate'ṣṭame dine prage'rcane |
ārārtrikottāraṇe'haṃ śālagrāme svarūpavān || 45 ||
[Analyze grammar]

divyarūpaṃ mama tebhyo'darśayaṃ śrīprasevitam |
tejomaṇḍalamadhyasthaṃ svarṇahārālirājitam || 46 ||
[Analyze grammar]

divyaveṣaṃ bhūṣaṇāḍhyaṃ kirīṭavaraśobhitam |
śaṃkhacakragadāpadmadharaṃ cāśīḥpradaṃ śubham || 47 ||
[Analyze grammar]

prasannavadanaṃ kāntaṃ rakṣārthaṃ samupāgatam |
etādṛśaṃ tu te māṃ saṃvīkṣya mohamupāyayuḥ || 48 ||
[Analyze grammar]

lagnāsteṣāṃ tu sarveṣāṃ śrīkṛṣṇe cittavṛttayaḥ |
indriyāṇi samastāni līnāni mayi bhāsure || 49 ||
[Analyze grammar]

yathā samādhimāptāste tathā lagnāstadā'bhavan |
mūrterme paramānandaṃ prāpuste'labhyamuttamam || 50 ||
[Analyze grammar]

sukhitā me sukhenaiva brahmānandayujo'bhavan |
madanyasmṛtiśūnyāśca svarūpamātravedinaḥ || 51 ||
[Analyze grammar]

abhavaṃste yathā muktā dhāmasthāḥ sthiracetanāḥ |
evaṃ kṣaṇaṃ sukhaṃ datvā kṛtvā tejolayaṃ tataḥ || 52 ||
[Analyze grammar]

sādhurūpo'bhavaṃ tūrṇaṃ kāṣāyāmbaradhṛṅamuniḥ |
mālāṃ kare dadhan kṛṣṇanārāyaṇeti saṃjapan || 53 ||
[Analyze grammar]

śrāvayan bhagavannāma cetayan bahirānayan |
te sarve matsvaraṃ śrutvottasthuḥ samādhibhāvataḥ || 54 ||
[Analyze grammar]

agre vilokayāmāsuḥ sādhurūpaṃ hariṃ tu mām |
praṇemuḥ premayuktāste vihvalā divyamānasāḥ || 55 ||
[Analyze grammar]

śrīkṛṣṇakṛṣṇakṛṣṇeti japanto māmupāyayuḥ |
cakrire daṇḍavat sarve nipetuḥ pādayośca me || 96 ||
[Analyze grammar]

mukhaṃ samādhau yad dṛṣṭaṃ tad dṛṣṭvā sādhuveṣiṇaḥ |
aujjvalyaṃ cāpi tad dṛṣṭvā dṛṣṭvā prasannatāṃ ca tām || 57 ||
[Analyze grammar]

yuvatvaṃ cāpi tad dṛṣṭvā niścikyuḥ prabhurāgataḥ |
sādhurūpo rakṣaṇārthaṃ bhaktecchāpūraṇāya vai || 58 ||
[Analyze grammar]

arghyaṃ ca madhuparkaṃ ca śreṣṭhāsanaṃ jalaṃ daduḥ |
phalaṃ ca bhojanaṃ yogyaṃ hṛdayāni ca te daduḥ || 59 ||
[Analyze grammar]

sarvasvamarpaṇaṃ cakrurnipetuḥ pādayormuhuḥ |
pādasaṃvāhanaṃ cakrurbhujābhyāṃ māṃ samāśliṣan || 60 ||
[Analyze grammar]

prakṣālya payasā pādau dugdhaṃ papuśca te tadā |
dhanyāḥ sma bhaktayogena bhagavantamupāgatāḥ || 61 ||
[Analyze grammar]

dhanyo mañjulakeśo'yaṃ bhaktaḥ putrīpateḥ pitā |
dhanyo'smākaṃ ca jāmātā yatpitā haritatparaḥ || 62 ||
[Analyze grammar]

dhanyā putrī satī sādhvī kṛṣṇalīlābhidhānikā |
yasyāḥ śvaśuro bhagavatprasannatāṃ samārjayat || 63 ||
[Analyze grammar]

aho bhaktaprasaṃgena śatānāṃ tu kuṭumbinām |
sambandhināṃ śatānāṃ ca mokṣaṇaṃ jāyate dhruvam || 64 ||
[Analyze grammar]

yatra bhakto bhāgavato grāme'pi vasati prabhuḥ |
grāmīṇāste bhaktayogānmuktiṃ yānti na saṃśayaḥ || 65 ||
[Analyze grammar]

yatra bhakto bhaved grāme tatra pāpāni dehinām |
naiva tiṣṭhanti kamale naśyanti bhaktakīrtanaiḥ || 66 ||
[Analyze grammar]

yatra bhaktasya sañcāro mārge vāṭyāṃ gṛhāntike |
tatra vighnāni naśyanti māṃgalyaṃ tu pade pade || 67 ||
[Analyze grammar]

yadgrāme bhaktavasatistasya sīmno'ntare sthale |
yāmyadūtā bhayaṃ prāptāḥ praviśanti na vai kvacit || 68 ||
[Analyze grammar]

yatra bhaktanivāso vai bhūtale vā jale'mbare |
tattīrthaṃ sarvathā pāpidehināṃ tārakaṃ śubham || 69 ||
[Analyze grammar]

yatra bhaktastatra devāḥ samāyānti samarhitāḥ |
muktā nārāyaṇo lakṣmyaḥ samāyānti vasanti ca || 70 ||
[Analyze grammar]

siddhayaścāpi yogāścaiśvaryāṇi vividhānyapi |
vasanti bhaktasārthāste smṛddhayaḥ kalpapādapāḥ || 71 ||
[Analyze grammar]

vasavaḥ pārṣadāścāpi bhaktagṛhe vasanti ca |
jaṃgamaṃ cetanaṃ tīrthaṃ bhakto bhavati sarvathā || 72 ||
[Analyze grammar]

jayastatra śriyastatra rasāstatra maharddhayaḥ |
dharmastatra mahāmokṣo yatra bhakto virājate || 73 ||
[Analyze grammar]

bhaktāparādhakartāro bhaktasya kṛpayā hi te |
pāpā api supuṇyāḥ syurbhaktā dayālavo yataḥ || 74 ||
[Analyze grammar]

asmākaṃ pāpabhāgyaṃ vai puṇyātmakaṃ vyavartata |
adya bhaktaprasaṃgena dhanyo bhaktasamāgamaḥ || 75 ||
[Analyze grammar]

dveṣiṇāmapi muktirvai śrīkṛṣṇena vidhīyate |
tathā no dveṣiṇāṃ muktirmañjukeśena kāryate || 76 ||
[Analyze grammar]

adya yajño'pi saphalo dānāni saphalāni ca |
brahmakūrcavrataṃ cāpi saphalaṃ saphalaṃ januḥ || 77 ||
[Analyze grammar]

saphalāḥ smṛddhayo'smākaṃ cakṣūṃṣi saphalānyapi |
yeṣāṃ gehe hariḥ sākṣāt sādhurūpo virājase || 78 ||
[Analyze grammar]

pāpaṃ kṣamasva bhagavan madyapānādijaṃ tu naḥ |
bhaktāparādhaṃ bhagavan kṣamasva puruṣottama || 79 ||
[Analyze grammar]

śāpo mañjulakeśena dattaḥ pāśupateśake |
vṛddhe conmattatārūpo nivartyatāṃ ramāpate || 80 ||
[Analyze grammar]

yathā svāsthyaṃ bhavedasya vilīyeta vicittatā |
tathā sādho harekṛṣṇa śīghraṃ kṛpāṃ vidhehi naḥ || 81 ||
[Analyze grammar]

evaṃ te cārthayāmāsurmañjukeśo'pi māṃ tadā |
pāśupateśavaicittyanāśārthamārthayanmuhuḥ || 82 ||
[Analyze grammar]

śrutvā bhaktasya vāñcchārthaṃ datvā kamaṇḍalorjalam |
pāyayitvā drutaṃ pāśupateśaṃ viprameva ca || 83 ||
[Analyze grammar]

vaicittyaṃ nāśayāmāsa tadā'haṃ kamale drutam |
atha svastho'bhavat so'pi sahasā bhānavān śuciḥ || 84 ||
[Analyze grammar]

pādasaṃvāhanaṃ cakre me tato daṇḍavannamaḥ |
gadgadākṣaravāṇyā ca kṣamasveti jagāda ha || 85 ||
[Analyze grammar]

mokṣaṃ dehi kṛpāpārāvāra kṛṣṇeti cāha mām |
mayā dhairyaṃ pradattaḥ sa pupūja paramādarāt || 86 ||
[Analyze grammar]

sāghuyogyaṃ samastaṃ vai dadau hṛdyaṃ tu bhāvanam |
evaṃ vicittatāṃ tasya bhaktayogādapāharam || 87 ||
[Analyze grammar]

bhaktiṃ pradattavāṃścāpi mantraṃ ca dattavāṃstadā |
oṃ namaḥ śrīkṛṣṇanārāyaṇāya svāmine svāhā || 88 ||
[Analyze grammar]

agṛhṇaṃste mantramimaṃ jepuśca paramādarāt |
grāmīṇāśca camatkāraṃ sādhuṃ śrutvā samāyayuḥ || 89 ||
[Analyze grammar]

sahasraśo janā lakṣmi viprādyā vīkṣya māṃ tathā |
camatkāraṃ śubhaṃ sākṣād vīkṣya mā śaraṇaṃ yayuḥ || 90 ||
[Analyze grammar]

sarve mantreṇa ca mayā saṃskṛtāste tu vaiṣṇavāḥ |
bhūtvā māṃ bhejire lakṣmi mayā''śīrvādayojitāḥ || 91 ||
[Analyze grammar]

athā'haṃ sampradāyaiva majjukeśāya sadvaram |
yathecchasi tathā sarvaṃ vacanātte bhaviṣyati || 92 ||
[Analyze grammar]

ayaṃ pāśupateśo'pi kuṭumbasahitaḥ khalu |
bhaktyā me cāntakāle vai muktimeṣyati cottamām || 93 ||
[Analyze grammar]

atra grāme tu ye bhaktā bhajiṣyanti pareśvaram |
te te siddhīḥ susaṃsiddhāḥ prāpsyanti pāramārthikīm || 94 ||
[Analyze grammar]

atra yāmyā na yāsyanti vighnā yāsyanti dūrataḥ |
bhaktiścātra pratāpātte bhakta lokeṣu vatsyati || 95 ||
[Analyze grammar]

ityuktvā'haṃ sādhurūpaṃ saṃjahāra tiro'bhavam |
bhaktāste bhaktimāpannā bhajitvā māṃ tato'ntime || 96 ||
[Analyze grammar]

samaye ca vimānena pārṣadaiḥ saha pārṣadāḥ |
bhūtvā dhāmā'kṣaraṃ me te yayurlakṣmi suvarculāḥ || 97 ||
[Analyze grammar]

mañjukeśo'pi bhakto me yayau dhāmā'kṣaraṃ mama |
tadyogena manuṣyāśca pare'pi padavīṃ parām || 98 ||
[Analyze grammar]

nārāyaṇasya śaraṇaṃ vaikuṇṭhādau yayustathā |
evaṃ bhaktasya kamale duḥkhahā sarvadā'smyaham || 99 ||
[Analyze grammar]

paṭhanācchravaṇādasya smaraṇānmananādapi |
bhuktirmuktirbhavedeva śrīharerme pratāpataḥ || 100 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne mañjulakeśākhyabhaktavipraśāpenonmattatā prāptasya pāśupateśaviprasya bhagavatā śāpamokṣaṇaṃ paramamokṣaṇaṃ ca kṛtamityādinirūpaṇanāmā pañcāśītyadhikaśatatamo'dhyāyaḥ || 185 ||
[Analyze grammar]