Chapter 184

śrīpuruṣottama uvāca |
śṛṇu nārāyaṇīśri tvaṃ vṛkṇadevasya pāvanīm |
bhaktasya me kathāṃ pūrve jātāṃ pāpapraṇāśinīm || 1 ||
[Analyze grammar]

dhruvālaye tu nagare jātyā śūdro'tidharmavān |
vṛkṇadevābhidhāno'bhūd bhṛtyaḥ sandeśahārakaḥ || 2 ||
[Analyze grammar]

bhāvaśūrābhidhānasya nṛpaternāstikasya vai |
vṛkṇadevo mama bhakto bhāvaśūrastu nāstikaḥ || 3 ||
[Analyze grammar]

dvayornityaṃ mitrayostu vivādaḥ parijāyate |
vṛkṇadevaḥ sadā vakti bhaja rājan prabhuṃ harim || 4 ||
[Analyze grammar]

bhāvaśūraḥ prativakti bhaja bhāgyaṃ ca karma ca |
vṛkṇadevo vrate prāpte mahotsave nṛpaṃ muhuḥ || 5 ||
[Analyze grammar]

vakti dānaṃ pūjanaṃ ca dharmakāryaṃ vidhehi vai |
rājā sarvaṃ manyate vai mṛṣā dānaṃ ca pūjanam || 6 ||
[Analyze grammar]

na svargaṃ nāpi puṇyaṃ vā nāsti dharmādikaṃ tathā |
svabhāvājjāyate sarvaṃ yathākṣetraṃ tathodbhavaḥ || 7 ||
[Analyze grammar]

yena kenāpi bījena rājñyā tu janitaḥ sutaḥ |
rājā prajāyate tadvad vaṃśānukāriṇī sthitiḥ || 8 ||
[Analyze grammar]

rājabījaṃ daridrāyāṃ jātaṃ dīnaḥ prajāyate |
svabhāvo vā nijaṃ karma bhāgyaṃ sarvatra tiṣṭhati || 9 ||
[Analyze grammar]

abhāgyasya kṛte naiva rājyaṃ samupatiṣṭhate |
rājyabhāgyasya dāridryaṃ naiva kvāpyupatiṣṭhati || 10 ||
[Analyze grammar]

sūryasya kiraṇaṃ vārau praviṣṭaṃ śītatā vrajet |
śītaṃ jalaṃ mahāvahneḥ prasaṃgāduṣṇatāṃ vrajet || 11 ||
[Analyze grammar]

pṛthvījanyaṃ samastaṃ vai pṛthvyāṃ pṛthvītvameti hi |
evaṃ khaniprabhāveṇa nisargeṇa mahān laghuḥ || 12 ||
[Analyze grammar]

jāyate vai yathāklṛpta bhaktestatra na gauravam |
bhāgyasya gauravaṃ yadvā karmaṇaścāsti gauravam || 13 ||
[Analyze grammar]

karma nisargajanyaṃ vai svabhāvavat pravartate |
dvipado dvābhyāṃ yātyeva caturbhistu catuṣpadaḥ || 14 ||
[Analyze grammar]

śatapādaḥ śatenaiva tathā klṛptiḥ gatistathā |
gajo bhuṃkte dvyānanābhyāṃ vṛkṣaḥ sahasramūlakaiḥ || 15 ||
[Analyze grammar]

ṣaḍānanaiḥ kārtikastu brahmācaturmukhaistathā |
yathā klṛptistathā grāso vāḍavāgnestu sāgaraḥ || 16 ||
[Analyze grammar]

deśe kāle kṛtaṃ karma bhāgyarūpaṃ prajāyate |
tena rājyaṃ sukhaṃ svaṃrga pitṛvaṃśāgataṃ milet || 17 ||
[Analyze grammar]

bhaktestatra na hetutvaṃ vṛkṇadeva nibodha tat |
ityevaṃ nṛpatirnityaṃ vṛkṇadevaṃ nirasyati || 18 ||
[Analyze grammar]

athaivaṃ puṣkale kāle yāte nṛpatirekadā |
papraccha vṛkṇadevaṃ tvaṃ kathaṃ vṛkṇo'si me vada || 19 ||
[Analyze grammar]

yadi bhaktiḥ kāraṇaṃ vai sukhe svaṣṭe tadā bhavān |
kathaṃ bhakteḥ pratāpena vṛkṇatvaṃ na jahāti vai || 20 ||
[Analyze grammar]

vṛkṇadevastataḥ prāha bhāvaśūraṃ nṛpaṃ prati |
vṛkṇatvaṃ karmaṇā jātaṃ bhaktyā mārṣṭuṃ hi śakyate || 21 ||
[Analyze grammar]

rājannārāyaṇo viṣṇurbhaktecchāpūrako'sti hi |
bhaktaścecchati sāmrājyaṃ dadātyeva hariḥ prabhuḥ || 22 ||
[Analyze grammar]

bhaktaścecchati cārogyaṃ dadātyeva narāyaṇaḥ |
yān yān kāmān kāmayate pūrayatyeva tān hariḥ || 23 ||
[Analyze grammar]

sakāmasya tu kāmānāṃ pūrakaḥ parameśvaraḥ |
akāmasya mahānandapradātā parameśvaraḥ || 24 ||
[Analyze grammar]

satyaṃ vai vartate sarvaṃ bhaktyā tuṣyati mādhavaḥ |
pratoṣito hariḥ sarvaṃ dadātyeva na saṃśayaḥ || 25 ||
[Analyze grammar]

bhāvaśūrastadā prāha sarvaṃ mṛṣā prabhāṣase |
na vṛkṇatvaṃ tiroyāti svāsthyaṃ nāṃ'ke pratiṣṭhate || 26 ||
[Analyze grammar]

bhaktau me nāsti viśvāso yathā karmaṇi vartate |
tathāpi vṛkṇadevā'tra paṇaṃ kiñcitkaromi vai || 27 ||
[Analyze grammar]

ahaṃ rājā'smyavṛkṇastvaṃ bhṛtyo vṛkṇaḥ pravartase |
karmaṇā niyataṃ tvetannaitad viparivartate || 28 ||
[Analyze grammar]

yadi bhaktibalaṃ heturbhaved viparivartane |
avṛkṇavṛkṇabhāvasyā''vayorvinimayo'stviha || 29 ||
[Analyze grammar]

tadā bhaktibalaṃ matvā kariṣye bhajanaṃ hareḥ |
anyathā te vacaḥ satyaṃ naiva manye kathaṃcana || 30 ||
[Analyze grammar]

ityevaṃ nṛpatervākyaṃ śrutvā vṛkṇo'pi māṃ prabhum |
sasmāra parayā bhaktyā sannidhau nṛpatestadā || 31 ||
[Analyze grammar]

prakāśe sarvalokānāṃ vyājahāra nṛpo yathā |
tathā bhavatu sarvātmannevaṃ prāha punaḥ punaḥ || 32 ||
[Analyze grammar]

vṛkṇadevasya bhaktyaiva snehena vaśatāṃ gataḥ |
ahaṃ lakṣmi tadā guptastiṣṭhaṃstatraiva vṛkṇatām || 33 ||
[Analyze grammar]

vṛkṇadevasya cākṛṣya nṛpahastadvaye'kṣipam |
rājā tūrṇaṃ tadā vṛkṇo'bhavat prakoṣṭhayostathā || 34 ||
[Analyze grammar]

kaphoṇikayoḥ kubjaścā'bhavaścā''kṛṣṭanāḍikaḥ |
śuṣkakāṣṭhāyitaṃ hastadvayaṃ tānāyitaṃ drutam || 35 ||
[Analyze grammar]

sarveṣāṃ paśyatāṃ tatra bhūmipatervyajāyata |
vṛkṇadevasya hasto tu vṛkṇatāvarjitau drutam || 36 ||
[Analyze grammar]

abhavatāṃ yathākāryakarau nirbandhanāḍikau |
suraktāḍhyau puṣṭiyuktau yatheṣṭakāryakāriṇau || 37 ||
[Analyze grammar]

etādṛśaṃ mahāścaryaṃ vīkṣya siṣmiyire janāḥ |
rājā mene'tivādasya phalaṃ nāstikatodbhavam || 38 ||
[Analyze grammar]

bhaktiṃ mene tathā satyāṃ karmaṇāṃ parivartinīm |
bhakterbalaṃ paraṃ mene nāstikyaṃ pramumoca saḥ || 39 ||
[Analyze grammar]

evaṃ vai vṛkṇatārogo janmajo'sya mayā rame |
tadā bhaktergauravārthaṃ taddvayoḥ parivartitaḥ || 40 ||
[Analyze grammar]

atha rājā'bhavadbhaktastyaktvā garvaṃ tu karmaṇaḥ |
svabhāvasya tathā garvaṃ tatyāja vṛkṇatābalāt || 41 ||
[Analyze grammar]

'atha rājñī śīladharmānāmnī śuśoca vai tadā |
putraputryaśca bhṛtyāśca prajāśca śuśucurhyati || 42 ||
[Analyze grammar]

vṛkṇadevo'pi nṛpatiṃ vīkṣya vṛkṇaṃ śuśoca ha |
prārthayat paramātmānaṃ rājño rogasya nuttaye || 43 ||
[Analyze grammar]

rājāpi vṛkṇadevānme mantraṃ jagrāha vai tadā |
oṃ namaḥ śrīkṛṣṇanārāyaṇāya svāmine svāhā || 44 ||
[Analyze grammar]

jajāpa mālikāmātramaṣṭottaraśataṃ tadā |
tāvadahaṃ bhaktarakṣākṛt prādurabhavaṃ kṣaṇāt || 45 ||
[Analyze grammar]

śaṃkhacakragadāpadmavaijayantīdharaḥ prabhuḥ |
śrīlakṣmīsahitastūrṇaṃ brahmatejo'ntare'mbare || 46 ||
[Analyze grammar]

rājā dadarśa māṃ divyaṃ vṛkṇadevo dadarśa mām |
prajāḥ sarvāstadā māṃ cālokayāmāsurīśvaram || 47 ||
[Analyze grammar]

jayakāraṃ jagaduśca nemustuṣṭuvuracyutam |
menire dhanyabhāgyaṃ ca darśanaṃ yatparātmanaḥ || 48 ||
[Analyze grammar]

ekabhaktasya yogena bahūnāṃ darśanaṃ hyabhūt |
mayā divyaṃ tu madrūpaṃ tirobhāvya śubhaṃ vapuḥ || 49 ||
[Analyze grammar]

kṛtvā rājñaḥ sannidhau ca gatvā spṛṣṭo nṛpastadā |
nāstikyaṃ sahasā naṣṭaṃ rājā dharmaparo'bhavat || 50 ||
[Analyze grammar]

yathā bhaktastathā rājā dhārmikau tau babhūvatuḥ |
rājā prajādayaḥ sarve paraṃ modaṃ prapedire || 51 ||
[Analyze grammar]

ānandamutsavaṃ cakrurmama darśanalābhataḥ |
nārāyaṇaṃ ca māṃ sarve pūjayāmāsurādarāt || 52 ||
[Analyze grammar]

atha bhṛtyo vṛkṇadevaḥ papraccha māṃ tataḥ prabhum |
kathaṃ me vṛkṇatā cāsīt kathaṃ gatā vadā'tra me || 53 ||
[Analyze grammar]

tadā'haṃ kamale sarvaṃ vṛttāntaṃ pūrvajanmajam |
śrāvayāmāsa bhaktebhyo vṛkṇatādāyakaṃ hyagham || 54 ||
[Analyze grammar]

pūrvamāsīd bhavān kīśabhikṣukaḥ kīśarakṣakaḥ |
vānarān khelayitvā ca vasatau ca prajājanāt || 55 ||
[Analyze grammar]

grāmīṇebhyo'nnavastrādyairlabdhairvṛttiṃ samācarat |
bhallukau dvau nakulāśca pañca sapta tu vānarāḥ || 56 ||
[Analyze grammar]

dvau sarpau vṛścikā aṣṭau vaśe te hyabhavaṃstadā |
teṣāṃ khelaviśeṣaistvaṃ kuṭumbavṛttimācaraḥ || 57 ||
[Analyze grammar]

kuṭumbinaste sarve'pi tattajjantupraśikṣakāḥ |
āsaṃste'pi ca tān jantūn khelayitvā'mbarā'nnakam || 58 ||
[Analyze grammar]

upārjayaṃstadā vṛttiṃ jīvikāṃ cābhyavartayan |
evaṃ vai vartamāneṣu grāmānte saṃsthiteṣu ca || 59 ||
[Analyze grammar]

rātrau supteṣu sarveṣu vṛko'raṇyāt samāgataḥ |
tasya gandhaṃ viditvaiva vānaraḥ prathama drutam || 60 ||
[Analyze grammar]

aplavata bhayāttasyā'patattava tu vakṣasi |
hastau kīśasya te bhāle netrayoḥ patitau tadā || 61 ||
[Analyze grammar]

nakhaiścarma lalāṭasya bhinnā'bhavattadā tava |
tvaṃ sahasā nidrito'pi bhayaṃ matvā paraṃ paśum || 62 ||
[Analyze grammar]

apaśyan taṃ nijaṃ kīśaṃ lohayaṣṭyā hyatāḍayaḥ |
bhagnau tvagrapadau tasya tāvattu bhalluko'pi ca || 63 ||
[Analyze grammar]

bhayaśabdaṃ sampracakre paśavo'nye'pi cukruśuḥ |
tvayotthātha bhayaṃ prāpya vīkṣito bhayakṛd vanī || 64 ||
[Analyze grammar]

vṛkaḥ krūro vānarādo nātidūre hyupasthitaḥ |
ākrośaṃ tvaṃ paraṃ kṛtvā tīkṣṇakuntena taṃ vṛkam || 65 ||
[Analyze grammar]

pradhāvya bhedayāmāsithaiva tvaṃ hṛdaye tadā |
papātā'pi mamārā'pi vṛkastvaṃ nirbhayo'bhavaḥ || 66 ||
[Analyze grammar]

bhallukādyāḥ prāṇinaste nirbhayāśca tadā'bhavan |
vānarasya sadā naijabandhanasthasya vai tadā || 67 ||
[Analyze grammar]

vinā vicāraṃ sahasā pādau bhagnau ruṣā tvayā |
vānaraścāti vai kaṣṭaṃ prāpa tatra tavā''śritaḥ || 68 ||
[Analyze grammar]

śaraṇasthā''śritaścāpi jīvikāsādhanaṃ tathā |
putravat pālitaścāpi lohadaṇḍena tāḍitaḥ || 69 ||
[Analyze grammar]

hastayorbhañjitastasya kaṣṭākrośanakāriṇaḥ |
vastrakhaṇḍauṣadhādyaiśca pādaprasevanaṃ kṛtam || 70 ||
[Analyze grammar]

māsānte cāgrapādau tau nīrujau samajāyatām |
kintu bhugnau vṛkṇarūpau vakrau sadā hyatiṣṭhatām || 71 ||
[Analyze grammar]

tatphalaṃ tu tvayā labdhaṃ cātra janmani vṛkṇatām |
idānīṃ yāvadevaitad duḥkhaṃ te tad vyajāyata || 72 ||
[Analyze grammar]

athāpi tvaṃ vānarasya bhallukasya ca khelane |
pūrvayugodbhavāṃ gāthāṃ jāmbavato hanūmataḥ || 73 ||
[Analyze grammar]

agāyathā yuddharūpāṃ droṇādryuddharaṇānvitām |
mama sambandharūpāṃ vai bhaktibhāvasamanvitām || 74 ||
[Analyze grammar]

tena kīrtanapuṇyena vṛkṇo'pi tvaṃ susampadā |
yukto bhavasi rājño'syāśraye'pi dhanavānasi || 75 ||
[Analyze grammar]

bhaktimān vartase cātra bhaktiṃ kārayasi dhruvām |
bhaktibalaṃ tu te jātaṃ yenā'haṃ te vaśe'smi vai || 76 ||
[Analyze grammar]

āgatastava rakṣārthaṃ vṛkṇatā vāritā tava |
śṛṇu cāyaṃ nṛpo yo'yaṃ vṛko mṛto vyajāyata || 77 ||
[Analyze grammar]

so'yaṃ sākaṃ tvayā cāste rājā nāstikabhāvavān |
dveṣavān dharmakāryādau vartate prāk svabhāvataḥ || 78 ||
[Analyze grammar]

vṛkasyaiva nimittena kīśasya karabhagnatā |
abhavat tatphalaṃ cārdhaṃ vṛkasyaiva bhavediti || 79 ||
[Analyze grammar]

rājño'sya vṛkṇatā prāptā tava pāpaṃ nṛpe gatam |
śṛṇu cāpi vṛkaścāyaṃ kathaṃ vai nṛpatāṃ gataḥ || 80 ||
[Analyze grammar]

tṛtīye prāgbhave cāyaṃ krodhī vipro'bhavattadā |
nāmnā prāṇadharaścāpi lokāḥ prāṇaharaṃ jaguḥ || 81 ||
[Analyze grammar]

udvejanaḥ kleśadaśca dharme karmaṇi cotsave |
vivāhe vācane dāne balād gṛhṇāti cādhikam || 82 ||
[Analyze grammar]

atṛptaścātivādena haṭhena kalinā'pi ca |
dhanaṃ cānnaṃ vastujātaṃ prasahyā''datta eva saḥ || 83 ||
[Analyze grammar]

tapasvyapi tapastasya krodhena niṣphalaṃ yathā |
tathā'bhavat satṛṣṇasya krodhitasya vṛthā tapaḥ || 84 ||
[Analyze grammar]

tathāpi devapūjādyairleśena tapasā'pi ca |
tathaiva pāpapuñjena mṛto yamālayaṃ yayau || 85 ||
[Analyze grammar]

citraguptaḥ śubhaṃ cāsyā'śubhaṃ nyavedayattadā |
pūrvaṃ kiṃ te prabhoktavyaṃ yatheṣṭaṃ vada pāraye || 86 ||
[Analyze grammar]

ityevaṃ yamarājasya śrutvā vacotiroṣavān |
jagād prathamaṃ pāpaṃ bhoktavyaṃ tu mayā yama || 87 ||
[Analyze grammar]

tato yāmyāni duḥkhāni bhoktuṃ yamena yojitaḥ |
bhuktvā nirayaduḥkhāni śeṣeṇa vṛkatāṃ gataḥ || 88 ||
[Analyze grammar]

tatra tava kareṇā'sya maraṇaṃ samajāyata |
puṇyaiḥ pūrvakṛtairasya rājyaṃ svalpaṃ hi vartate || 89 ||
[Analyze grammar]

svabhāvāḥ prāgjanmajātāstyajyante naiva kenacit |
pūrvasvabhāvadoṣeṇa kalahaścāsya rocate || 90 ||
[Analyze grammar]

tathāpi vṛkṇadeva tvaṃ nibodhayasi pratyaham |
bhaktyarthaṃ śubhavākyādyaistenā'sya vardhate śubham || 91 ||
[Analyze grammar]

śanaiḥ phalaṃ drumādau vai śanairghṛtaṃ payasyapi |
śanaiḥ putraphalaṃ patnyāṃ śanaiḥ saṃskāraśodhanam || 92 ||
[Analyze grammar]

śanairjñānaṃ śanairvidyā śanairdravyārjanādikam |
śanaiḥ samāgamai raṃgo jāyate'bhyāsavartinām || 93 ||
[Analyze grammar]

evaṃ rājño'sya kālena puṇyaṃ cāpi pravartate |
pāpaṃ vṛkṇatvamātraṃ ca vartate'dya manāgapi || 94 ||
[Analyze grammar]

tathāpi bhaktayogena bhaktiyogena me tathā |
mama yogena sarvaṃ tatpāpaṃ vināśameṣyati || 95 ||
[Analyze grammar]

śvaprātaścāsya nṛpatervṛkṇabhāvo gamiṣyati |
krauryaṃ nāstikatā cāpi sarvaṃ naṣṭaṃ bhaviṣyati || 96 ||
[Analyze grammar]

aikāntiko mama bhakto bhaviṣyati yathā bhavān |
ubhayoścāpi me dhāmavāso'nte vai bhaviṣyati || 97 ||
[Analyze grammar]

vānarādyā ime putrā vṛkṇa te krūrabhāvanāḥ |
idānīṃ mānavā jātāste'pi yāsyanti mokṣaṇam || 98 ||
[Analyze grammar]

ityevaṃ varadānaṃ vai datvā'haṃ ca tiro'bhavam |
śvojāte prātarevā'sya rājñastu vṛkṇatā gatā || 99 ||
[Analyze grammar]

bhajanaṃ me cakārāti hare kṛṣṇanarāyaṇa |
kālena me dhāma divyaṃ bhāvaśūro nṛpo yayau || 100 ||
[Analyze grammar]

vṛkṇadevādayaścāpi muktiṃ kālena te yayuḥ |
evaṃ lakṣmi prabhaktasya rakṣāṃ karomi nityadā || 101 ||
[Analyze grammar]

bhaktayogena jīvānāṃ kalyāṇaṃ jāyate dhruvam |
bhaktayogena bhaktiḥ syānmama yogastathā bhavet || 102 ||
[Analyze grammar]

pāpanāśo bhaveccāpi satsaṃgaḥ śevadhirnṛṇām |
svalpaḥ kṛto'pi phalati śroturvaktuśca mokṣadaḥ || 103 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vṛkṇadevākhyabhaktasya bhaktyā vṛkṇatānāśo bhaktayogena bhāvaśūranṛpatermokṣaṇaṃ prāgjanmavṛttāntādi cetinirūpaṇanāmā caturaśītyadhikaśatatamo'dhyāyaḥ || 184 ||
[Analyze grammar]