Chapter 174

śrīpuruṣottama uvāca |
śṛṇu nārāyaṇīśri tvaṃ yathā dehaṃ prapadyate |
kevalātmā'pi karmāḍhyaḥ kathayāmi yathātatham || 1 ||
[Analyze grammar]

ātmā'mbare karmabhiḥ svaiḥ sūkṣmeṇa saha vartate |
saṃkalpājjāyate harṣastena kāme pravartate || 2 ||
[Analyze grammar]

śukraśoṇitasaṃsṛṣṭastataḥ prāṇaḥ pravartate |
prāṇena vidhṛte śukre tatrā'pānaḥ pravartate || 3 ||
[Analyze grammar]

apānāt preryate śukraṃ rajaścākarṣayatyapi |
samānastena miśre ca jāyate bījatādharaḥ || 4 ||
[Analyze grammar]

udānaścodare garbhaṃ prati nayati miśraṇam |
nālārthaṃ miśraṇaṃ sthāne nābhau yojayati dhruvam || 5 ||
[Analyze grammar]

vyānaśca miśraṇe tatra vyāpnoti pākahetave |
pakvaṃ cāpatyarūpaṃ vai puṣṭaṃ nālena yoṣitaḥ || 6 ||
[Analyze grammar]

janma prāpya bahiryāti ṣāṭkauśikaṃ hi tanmatam |
mātṛto romalohitamāṃsāni santi tatra ha || 7 ||
[Analyze grammar]

pitṛtaḥ snāyvasthimajjā santi tatra balānvitāḥ |
evaṃvidhe bhautike'tra dehe māyā nirucyate || 8 ||
[Analyze grammar]

deho māyā''tmanaḥ proktā nirdeho'māyikaḥ sa tu |
māṃ yāti nityadā cendriyādyairātmā prapuṣṭaye || 9 ||
[Analyze grammar]

ahaṃ dehaḥ poṣyadharmo māyārūpo'smi tena vai |
mama dehasya sattvena jīvātmā'sti samaśnute || 10 ||
[Analyze grammar]

tasmāddehaḥ sadā māyā sarvaviṣayamodikā |
ātmā svakarmaṇā prāṇairdehabandhaṃ prapadyate || 11 ||
[Analyze grammar]

caturhotraṃ varṣma cetaddhotā bandhanamṛcchati |
karaṇaṃ karma kartā ca mukta etaccatuṣṭayam || 12 ||
[Analyze grammar]

catvāra ete hotāraḥ pratyekaṃ sapta sapta vai |
ghrāṇaṃ jihvā ca cakṣuśca tvak śrotraṃ mana ityapi || 13 ||
[Analyze grammar]

buddhiścetikaraṇāni saptaite guṇahetavaḥ |
gandho rasaśca rūpaṃ ca sparśaḥ śabdaśca vai tathā || 14 ||
[Analyze grammar]

mantavyaṃ cāpi boddhavyaṃ karmaite karmahetavaḥ |
ghrātā bhakṣayitā draṣṭā spraṣṭā śrotā tathā hyapi || 15 ||
[Analyze grammar]

mantā boddhā ca kartāraḥ saptaite kartṛhetavaḥ |
evaṃvidhā nijān bhāvān bhakṣayanti ca juhvati || 16 ||
[Analyze grammar]

saptasveteṣvasaṃgo yaḥ saptadhā mukta eva ha |
kāraṇādivihīno'haṃ karmā'lipto bhavāmyaham || 17 ||
[Analyze grammar]

kartṛtvaṃ me na caivā'sti tasmānmuktaḥ sadā'smyaham |
ahaṃmamatvahīno'haṃ muktabhāvaṃ bhajāmyaham || 18 ||
[Analyze grammar]

anyathā tu caturhotro māyābaddho bhavāmyaham |
adannannāni cā'vidvān mamatvena vihanyate || 19 ||
[Analyze grammar]

dehārthe bhakṣayannannaṃ poṣayan mamatānvitaḥ |
anātmabhakṣaṇaṃ kurvanmāyayā'yaṃ vihanyate || 20 ||
[Analyze grammar]

māyā tṛṣṇā tṛṣārūpā viṣayāṇāṃ vivardhate |
apeyapānaṃ kurvaṃśca māyayā'yaṃ vihanyate || 21 ||
[Analyze grammar]

apeyaṃ nā'rpitaṃ deve hyabhakṣyaṃ cā'niveditam |
yadvā'peyaṃ rasyametad daihyamaindriyikaṃ jalam || 22 ||
[Analyze grammar]

abhakṣyaṃ svādu caitadvai daihyaṃ bhautikamityapi |
ātmārthe pācayannā'yaṃ badhyate na tu mucyate || 23 ||
[Analyze grammar]

manasā gamyate sūkṣmaṃ bhakṣyaṃ peyaṃ śubhā'śubham |
vācā vā cakṣuṣā cāpi śrotreṇa ca tvacāpi ca || 24 ||
[Analyze grammar]

jihvayā gṛhyate yacca ghrāṇena yattu gṛhyate |
kareṇa padbhyāṃ liṃgena pāyunā yacca gamyate || 25 ||
[Analyze grammar]

buddhyā cittena cāhaṃkāreṇa yadbāhyagolakaiḥ |
gṛhyate bhujyate vyastaiḥ samastairvā'pi yad yadā || 26 ||
[Analyze grammar]

svapne jāgrati cānte vā madhye cādau ca yad yadā |
sarvaṃ bhakṣyaṃ ca peyaṃ ca svārthaṃ māyāmayaṃ hi tat || 27 ||
[Analyze grammar]

pacyamānaṃ dehinaṃ vai hanti pāśakaśādibhiḥ |
tatsarvaṃ tyajyate svārthaṃ vihāya paramātmani || 28 ||
[Analyze grammar]

bhakṣyaṃ peyaṃ bhavatyeva tadeva khalu nirguṇam |
evaṃ nirguṇayogajñaṃ jñānavahniḥ pravartate || 29 ||
[Analyze grammar]

sarvabhasmakaraścāpi māyābandhananāśakaḥ |
hareryogamakhaścāpi sarvasvatyāgadakṣiṇaḥ || 30 ||
[Analyze grammar]

satsevā'vabhṛthasnāno mokṣanadyavagāhanaḥ |
na tasya vidyate cā'yaṃ saṃsāro bhakṣyapānajaḥ || 31 ||
[Analyze grammar]

sakriyo vartamāno'pi niṣkriyaḥ sa tu pūruṣaḥ |
puruṣottamayogena koṭimokṣaprado'tra saḥ || 32 ||
[Analyze grammar]

kāminyā vartamāno'pi kāmanā'sya na māyikī |
patyā ca vartamānāyā ratirnāsyāstu māyikī || 33 ||
[Analyze grammar]

ātmārthaṃ cāpi kṛṣṇārthaṃ paravrahmārthameva ha |
dehāntaragamaḥ svārthaḥ śubhā'śubhaprabhogakṛt || 34 ||
[Analyze grammar]

kṛṣṇārthaḥ sarvathā lakṣmi parabrahmālayapradaḥ |
svārthe tṛṣṇāmaye jīve savāsane sarāgake || 35 ||
[Analyze grammar]

karma tiṣṭhati pūrvārjyaṃ madāśrayeṇa naśyati |
mayi sarvārpaṇenaiva karmaphalaṃ vinaśyati || 36 ||
[Analyze grammar]

sādhūnāṃ mama mūrteścāśrayeṇa divyatā bhavet |
yathā yathā mama yogastathā tathā hi divyatā || 37 ||
[Analyze grammar]

puṃyogena yathā patnyā divyatā laukikī śubhā |
sūryayogenā'mbarasya divyatā suprabhānvitā || 38 ||
[Analyze grammar]

svarṇayogena tāmrāṇāṃ divyatā ramaṇīyatā |
guṇayogena lokānāṃ divyatā vidyayā kṛtā || 39 ||
[Analyze grammar]

veṣayogena rājñāṃ ca divyatā'laṃkṛtikṛtā |
svarṇayogena devānāṃ puṇyena pitṛvargiṇām || 40 ||
[Analyze grammar]

aiśvaryeṇa tu siddhānāṃ tapobhiśca tapasvinām |
śiṣyāṇāṃ dāsavargāṇāṃ divyatā sevayā kṛtā || 41 ||
[Analyze grammar]

gandharvāṇāṃ gītikābhiḥ sādhūnāṃ tvacyutā'rpaṇāt |
divyatā tu satīnāṃ vai satyena ca vratena ca || 42 ||
[Analyze grammar]

brahmavratena sarvatra divyatā brahmacāriṇām |
īśvarāṇāṃ padaprāptyā muktānāṃ mama yogataḥ || 43 ||
[Analyze grammar]

divyatā sarvadā cāste lakṣmīnāṃ tu mamāṃ'gataḥ |
mama sā divyatā lakṣmi śāśvatī svanisargagā || 44 ||
[Analyze grammar]

etādṛśaṃ tu māṃ prāpya bhakto me divyatānvitaḥ |
śāśvatīṃ divyatāṃ prāpya modate mama dhāmani || 45 ||
[Analyze grammar]

māyendriyā'ntaḥkaraṇabhūtamātrādayo'sya ca |
mama yogena divyāste tato nārāyaṇo hyaham || 46 ||
[Analyze grammar]

mama yogena vai jīvā anantāḥ śivatāṃ gatāḥ |
madyogena narā bhaktyā nārāyaṇāstvasaṃkhyakāḥ || 47 ||
[Analyze grammar]

jātāścāpi ca jāyante vaikuṇṭhavāsino hi te |
golokavāsinaścāpi paradhāmanivāsinaḥ || 48 ||
[Analyze grammar]

akṣare vāsakartārastathā'nyadhāmavāsinaḥ |
īśalokanivāsāśca māyālokanivāsinaḥ || 49 ||
[Analyze grammar]

viṣṇurūpā viṣṇavaśca jāyante'saṃkhyakoṭayaḥ |
brahmāṇaścāpi jāyante vairājāścāpyasaṃkhyakāḥ || 50 ||
[Analyze grammar]

pradhānapuruṣāścāpi jāyante'nantasaṃkhyakāḥ |
muktāścāpi prajāyante'nantasaṃkhyā hi dhāmagāḥ || 51 ||
[Analyze grammar]

gāyantyapi pramodante nṛtyanti harṣitā harau |
kā tatra tu kathā lakṣmi māyāyāḥ sparśaleśikā || 52 ||
[Analyze grammar]

māyā'pi modate tatra māmāsādya maheśvarī |
ākṣarī paramā vidyā māyā'pi parivartate || 93 ||
[Analyze grammar]

evaṃ divyavidhānaṃ yo jānāti bhaktarāḍ yadi |
asya yogaḥ sadā divyastatra kā paridevanā || 54 ||
[Analyze grammar]

evaṃ mama pratāpena yogātmakena divyatā |
sarvotkṛṣṭā bhavatyeva nārāyaṇaparāyaṇā || 55 ||
[Analyze grammar]

ekaḥ śāstā hṛdayasthaḥ so'haṃ nārāyaṇaḥ paraḥ |
mayā yukto mama bhakto vahatyatha karoti ca || 56 ||
[Analyze grammar]

eko gururhṛdayasthaḥ so'haṃ kṛṣṇanarāyaṇaḥ |
mayā'nuśikṣito bhakto vahatyatha karoti ca || 57 ||
[Analyze grammar]

eko bandhurhṛdayasthaḥ śrīpatiḥ puruṣottamaḥ |
tena mayā'nuśiṣṭo'yaṃ vahatyatha karoti ca || 58 ||
[Analyze grammar]

ekaḥ svāmī hṛdayastho'nādikṛṣṇanarāyaṇaḥ |
tena mayā'nusaṃśliṣṭo bhaktaścānandamaśnute || 59 ||
[Analyze grammar]

ekaścāntarniyantā'haṃ paramātmā hṛdi sthitaḥ |
mayā saṃpreritaścā'yaṃ pravartate karoti ca || 60 ||
[Analyze grammar]

ekaḥ śrotā bhakṣayitā boddhā mantā'hameva ha |
ghrātā spraṣṭā tathā draṣṭā rasayitā'hameva ha || 61 ||
[Analyze grammar]

ānandayitā grahitā gantotsraṣṭā'hameva ca |
mayā'nubhukta evā'yaṃ bhuṃkte vetti pramodate || 62 ||
[Analyze grammar]

ahaṃ guruḥ parabrahma mayi vāso'sya sarvathā |
gurvarpaṇavidhātā'yaṃ karmaṇā nahi lipyate || 63 ||
[Analyze grammar]

evamasya bhavedatra jīvato jīvamuktatā |
dehānte mama dhāmnyeva syādasya nityamuktatā || 64 ||
[Analyze grammar]

ahaṃ dadāmyakhaṇḍaṃ me dhāmā'kṣaraṃ sukhāśrayam |
nityaṃ cā'sya bhavet sarvasaukhyāḍhyā'kṣaravāsitā || 65 ||
[Analyze grammar]

mama dhyānena mukto'yaṃ matsārūpyaṃ prapadyate |
madaiśvaryāṇi sarvāṇi labhate madanugrahāt || 66 ||
[Analyze grammar]

eṣā brāhmī mahāvidyā lakṣmi te'tra niveditā |
yāṃ prāpyaiva naro nārī brahmarūpaḥ prajāyate || 67 ||
[Analyze grammar]

etadarthaṃ mayā pūrvaṃ mama vidyā'tra golake |
omityekākṣaraṃ brahma dakārākhyā pravartitā || 68 ||
[Analyze grammar]

śreyaḥpradāṃ ca tāṃ prāpyā'suradevarṣibhoginaḥ |
prāpya te prādravan sarve yathāsvabhāvamādarāt || 69 ||
[Analyze grammar]

nānāvyavasitāḥ sarve sarpadevarṣidānavāḥ |
dakāraṃ vividhaṃ matvā yathāsvabhāvamāsthitāḥ || 70 ||
[Analyze grammar]

sarpāṇāṃ tu dakāreṇa daṃśane bhāva udgataḥ |
pravṛttastvasurāṇāṃ vai dambhabhāvaḥ svabhāvajaḥ || 71 ||
[Analyze grammar]

devānāṃ tu tadā dāne bhāvanā'bhūt svabhāvajā |
maharṣīṇāṃ svabhāvāttu dame'bhūd bhāvanā tadā || 72 ||
[Analyze grammar]

satāṃ tadanu bhāvastu dayāyā samajāyata |
mānavānāṃ dakṣiṇāyāṃ tato bhāvo vyajāyata || 73 ||
[Analyze grammar]

nārīṇāṃ darśane bhāvo dakāreṇa vyajāyata |
śṛṃgāramācarantyeva sarvāgryaṃ tāḥ svabhāvajam || 74 ||
[Analyze grammar]

rājñāṃ tu dohane bhāvaḥ pṛthvyā rāṣṭrasya cāpyabhūt |
rakṣasāṃ cāpi daityānāṃ daṇḍe bhāvo vyajāyata || 75 ||
[Analyze grammar]

gurūṇāṃ tu dakṣabhāve bhāvaḥ svabhāvajo'bhavat |
karmiṇāṃ daivabhāve tu bhāgye'bhūd vyavasāyinām || 76 ||
[Analyze grammar]

kṛpaṇānāṃ dainyabhāvo dakāreṇa svabhāvajaḥ |
īśvarāṇāṃ divyabhāvaḥ svabhāvajastato'bhavat || 77 ||
[Analyze grammar]

piśācānāṃ tu durgandhe bhāvaḥ svabhāvajo'bhavat |
kitavānāṃ tu duṣṭatve bhāvaḥ svabhāvajo'bhavat || 78 ||
[Analyze grammar]

ācāryāṇāṃ deśanāyāṃ bhāvaḥ svabhāvajo'bhavat |
dānavānāṃ dorbalatve digjaye bhāvanā'bhavat || 79 ||
[Analyze grammar]

gṛhasthānāṃ daurhṛdatve suputre bhāvanā'bhavat |
paśūnāṃ dantaviṣaye bhakṣye sā bhāvanā'bhavat || 80 ||
[Analyze grammar]

pitṝṇāṃ darśaparvādiśrāddhe bhāvastato'bhavat |
prajānāṃ deśavasatau bhāvanā dotthitā'bhavat || 81 ||
[Analyze grammar]

evaṃ lakṣmi vividhā vai dabrahmabhāvanāstadā |
svabhāvajā hi sarveṣāmabhavat karmakāriṇī || 82 ||
[Analyze grammar]

keṣāmapi na tvabhūtsā divyamokṣābhigāminī |
tato mayā punarbrahma hyupadiṣṭaṃ sa ityapi || 83 ||
[Analyze grammar]

sakāreṇa mumukṣūṇāṃ sādhusevā svabhāvajā |
gṛhasthānāṃ sādhubhāvo mokṣadaścetyabhūttadā || 84 ||
[Analyze grammar]

sannyāsaḥ sarvakarmādidharmāṇāṃ ca tato'bhavat |
satyaṃ vrataṃ satyadharmaḥ satyalokaḥ sadātmatā || 85 ||
[Analyze grammar]

sanātanatvamevā'pi saccidānandatā tathā |
sarvātmakatvaṃ sākāramūrtitvaṃ saguṇatvakam || 86 ||
[Analyze grammar]

saubhāgyaṃ sumanaskatvaṃ satītvaṃ samatā tathā |
samadarśitvamevā'pi sāragrāhitvamityapi || 87 ||
[Analyze grammar]

siddhimattvaṃ srāvaśūnyabrahmacaryavrataṃ tathā |
sureśvarārhaṇaṃ sevā śrīhareḥ sarvadarśinaḥ || 88 ||
[Analyze grammar]

so'haṃ japastathā sauropāsanā tu hiraṇmayī |
sanātanārṣavṛttiśca sāyujyaṃ sārṣṭimityapi || 89 ||
[Analyze grammar]

sālokyaṃ cāpi sārūpyaṃ sahabhāvo'pi sarvathā |
svāmisevakabhāvaścetyevaṃ dharmān sakārajān || 90 ||
[Analyze grammar]

jagṛhurmānavā devāḥ ṛṣayaḥ pitaro'pi ca |
munayo bhaktajīvāśca mokṣamārgaṃ hi jagṛhuḥ || 91 ||
[Analyze grammar]

śravaṇaṃ sevanaṃ sarvārpaṇaṃ samarpaṇaṃ vyadhuḥ |
evaṃ guruṃ parabrahma mokṣadaṃ prāpyate tataḥ || 92 ||
[Analyze grammar]

nijātmānaṃ brahmabhāvāpannaṃ matvā tu bhejire |
parameśaṃ nijasthaṃ ca samanubhūya bhejire || 93 ||
[Analyze grammar]

evaṃ lakṣmi jīvaloko yathāsvabhāvamātmanaḥ |
guroḥ sakāśāllabdhvā'pi santamasantamaśnute || 94 ||
[Analyze grammar]

śubhena vicaran lokaḥ śubhacārī prajāyate |
brahmacārī sadaivaiṣo ya indriyajaye rataḥ || 95 ||
[Analyze grammar]

pāpena vicaran lokaḥ pāpacārī bhavatyuta |
kāmacārī tu kāmena ya indriyasukhe rataḥ || 96 ||
[Analyze grammar]

dharmacārī tu dharmeṇa yajñayāgādike rataḥ |
puṇyacārī tu tapasā yastu vratādare rataḥ || 97 ||
[Analyze grammar]

apetavratakarmā tu kevalaṃ brahmaṇi sthitaḥ |
brahmarūpaścaran loke brahmaniṣṭho bhavatyapi || 98 ||
[Analyze grammar]

brahmacaryaṃ brahmarūpaṃ brahmaśīlaḥ sadā sukhī |
brahmaiva samidhaścāsya brahmāgnirbrahmasaṃbhavaḥ || 99 ||
[Analyze grammar]

sarvaṃ brahma samavāpya parabrahmā'dhigacchati |
ātmā brahma gururbrahma sa brahmaṇi samasthitaḥ || 100 ||
[Analyze grammar]

samāhitaḥ pare tatra brahmaṇi brahmaśīlavān |
parabrahma brahmacaryaṃ tadrato māṃ prapadyate || 101 ||
[Analyze grammar]

naro vāpi tathā nārī napuṃ vā na mānavaḥ |
yaḥ ko'pi syājjātigantā jātismaraḥ pravittimān || 102 ||
[Analyze grammar]

parabrahma samavāpya modate hi mayā saha |
atra vā tatra vā'pyasya kriyāḥ sarvā hi mokṣadāḥ || 103 ||
[Analyze grammar]

itiśrīlakṣmīnārāyaṇīyaṃsaṃhitāyāṃ tṛtīye dvāparasantāne muktidharme yathādehaprāptiḥ śubhāśubhakarmabhogo brahmā'vāptiḥ karmapratiṣṭhānaṃ phalārpaṇaṃ divyatālābho nityamuktatā'kṣaravāsitā sārūpyāvagamaścetyādinirūpaṇanāmā catusaptatyadhikaśatatamo'dhyāyaḥ || 174 ||
[Analyze grammar]