Chapter 171

śrīpuruṣottama uvāca |
evaṃ sampreritaścidānando yogī pratāpavān |
śrīmānasaṃ sarvapraśnottarāṇyāha kramād rame || 1 ||
[Analyze grammar]

ānupūrvyeṇa kamale tāni me gadataḥ śṛṇu |
āyuḥkarāṇi karmāṇi yāvad dehī prasevate || 2 ||
[Analyze grammar]

tāvadāyuḥprasandhānaṃ cehaiva jāyate'gragam |
puṇyaṃ sabhājanasevā sādhusevā śubhāśiṣaḥ || 3 ||
[Analyze grammar]

dānaṃdamaścendriyāṇāṃ brahmacaryaṃ tapaḥ śubham |
yogābhyāso bhajanaṃ ca sarvāṇyāyuḥkarāṇi vai || 4 ||
[Analyze grammar]

vahnisevauṣadhasevā'pyahiṃsā ghṛtabhojanam |
vighasāśitvamityetānyāyurvṛddhikarāṇi vai || 5 ||
[Analyze grammar]

satītīrthaṃ mātṛtīrthaṃ dharmatīrthaṃ surārcanam |
arāgitvaṃ hyabhogitvaṃ caitānyāyuḥkarāṇi vai || 6 ||
[Analyze grammar]

ṛṣyarpaṇaṃ tathā devārpaṇaṃ kṛṣṇārpaṇaṃ tathā |
nityamuktārpaṇaṃ brahmārpaṇaṃ cāyuḥkarāṇi vai || 7 ||
[Analyze grammar]

svargiṇā saha maitrī ca ravargā''yuḥsampradā bhavet |
evamāyuryaśodātṛ sevate karma bhāgyavān || 8 ||
[Analyze grammar]

āyuḥkṣayaparītātmā viparītāni sevate |
buddhirvyāvartate tasya vināśe samupasthite || 9 ||
[Analyze grammar]

balaṃ śaktiṃ samāśritya garvaṃ cāpyabhimānakam |
atyantaṃ bhogamādatte viruddhamapyanātmavān || 10 ||
[Analyze grammar]

niṣevate'tikaṣṭāni bhuṃkte'dhikāni śaktitaḥ |
duṣṭānnāmiṣapānāni viruddhāni mitho guṇe || 11 ||
[Analyze grammar]

bhuṃkte'mitāni gurūṇi hyajīrṇe'pi punaḥ punaḥ |
balātirekaṃ vyāyāmaṃ vyavāyaṃ cātisevate || 12 ||
[Analyze grammar]

satataṃ dhanalobhācca bhāravāhitvamṛcchati |
vegavāho bhavatyeva nitarāṃ jayakāṃkṣayā || 13 ||
[Analyze grammar]

vikṛtaiśca rasairyuktamannamatyaśnute jane |
mūtramalādivegaṃ ca ruṇaddhi karmapāśitaḥ || 14 ||
[Analyze grammar]

yogyāṃ nidrāṃ sevate na divā nidrāṃ prasevate |
ādatte cā'pyapakvāṃśca rasān rasanayā''hataḥ || 15 ||
[Analyze grammar]

rogavyādhimayo bhūtvā dehakṣayaṃ pravindati |
atirugṇo'pyanutsāhaḥ parājito'tikaṣṭakaiḥ || 16 ||
[Analyze grammar]

dhairyaṃ vihāya sahasā maraṇābhimukho bhavet |
api cedbandhanādīni viparītāni vindate || 17 ||
[Analyze grammar]

evaṃvidhairviparītaiḥ śarīraṃ cyavate drutam |
uṣmāruddhaḥ kūpitaśca vāyunā cātivegitāḥ || 18 ||
[Analyze grammar]

bandhān vicchidya sahasā prāṇān kṣipati koṣṭhalāt |
bhinatti marmasthānāni jīvasvāsthyakarāṇyapi || 19 ||
[Analyze grammar]

tataḥ sadyo jñānanāśe jīvaḥ pracyavate sthalāt |
kṣaraṃ dehaṃ tyajatyatra sthūlaṃ sūkṣmābhisaṃvṛtaḥ || 20 ||
[Analyze grammar]

jātimaraṇasaṃvijñaḥ punaścānyatra yāti hi |
anye paśyanti taṃ yāntaṃ tyajantaṃ sthūlavarṣma ca || 21 ||
[Analyze grammar]

tathāpi naiva vairāgyaṃ labhante na bhajanti mām |
mriyante tattathaivaite tyajanti sarvamatra ca || 22 ||
[Analyze grammar]

labhante maraṇe pīḍāṃ marmaṇāṃ ghātanādiṣu |
garbhasaṃkramaṇe cāpi labhante vedanāṃ tathā || 23 ||
[Analyze grammar]

janmakṛtāṃ dehakṛtāṃ punarmaraṇayojitām |
labhante vedanāṃ jīvāḥ pārastasyā na vidyate || 24 ||
[Analyze grammar]

yadā dehaṃ jahātyeva nirucchvāsaśca dṛśyate |
sa nirūṣmā nirucchvāso niḥśrīko hatacetanaḥ || 25 ||
[Analyze grammar]

mayā ca brahmaṇā tyakto mṛtātmetyucyate tadā |
srotobhiryairvijānāti cendriyārthān śarīrabhṛt || 26 ||
[Analyze grammar]

teṣāṃ prāṇanirodhena srotasāṃ pralayo bhavet |
srotasāṃ marmavāsānāṃ bhinneṣu marmasu priyaḥ || 27 ||
[Analyze grammar]

apriyo jāyate gacchan nābhijānāti kiñcana |
prāṇayuktaḥ sūkṣmadehasahitastrirucchvasya ca || 28 ||
[Analyze grammar]

niṣkrāman kampayatyāśu sthūlaṃ manāgacetanam |
kāyāt pracyuta evā'sau karmabhiḥ svaiḥ samāvṛtaḥ || 29 ||
[Analyze grammar]

amitaiḥ pāpakaiḥ puṇyaiḥ sahitaḥ sūkṣmadehavān |
prayāti gatimanyāṃ sa tredhā klṛptāṃ yathākṛtām || 30 ||
[Analyze grammar]

puṇyapāpasamaprāptāṃ gatiṃ prayāti mānavīm |
ihaivoccāvacān bhogān prāpnotyeva svakarmabhiḥ || 31 ||
[Analyze grammar]

aśubhaiḥ karmabhirlokā hyarvāggatiṃ prayānti vai |
niraye yatra pacyante karmaphalaiḥ prayānti tam || 32 ||
[Analyze grammar]

puṇyabhājastūrdhvagatiṃ tārāmayīṃ prayānti ha |
candramaṇḍalamevā'pi sūryamaṇḍalamityapi || 33 ||
[Analyze grammar]

evamādyāni ramyāṇi bhuktvā puṇyakṣaye punaḥ |
cyavante pṛthivīṃ yānti punarjanma punarmṛtim || 34 ||
[Analyze grammar]

punaḥ svargaṃ vā narakaṃ prayānti karmayojitāḥ |
na ca svarge'pi santoṣo dṛṣṭvā dīptatamāṃ śriyam || 35 ||
[Analyze grammar]

nīcoccamadhyamā devāḥ spṛhayanti haranti ca |
vicāryetthaṃ buddhimāṃstu sūkṣmaṃ dehaṃ harau prabhau || 36 ||
[Analyze grammar]

kṛtvā'rpaṇaṃ prayātyeva divyo bhūtvā'kṣaraṃ padam |
netraṃ netrasya vṛttiṃ ca golakaṃ devatāṃ tathā || 37 ||
[Analyze grammar]

viṣayaṃ rūpamevāpi jñānaṃ bodhaṃ ca veditām |
mananaṃ nirṇayaṃ cābhimatiṃ bhogaṃ samastakam || 38 ||
[Analyze grammar]

tathā''tmānaṃ ca saṃskārān smaraṇaṃ cāpi keśave |
ātmaniveditaṃ sarvaniveditaṃ vidhāya ca || 39 ||
[Analyze grammar]

sūkṣmaṃ dehaṃ tathā divyaṃ vidhāya vā vihāya ca |
saṃyogaṃ prakṛtestyakttvā brahmayogaṃ nidhāya ca || 40 ||
[Analyze grammar]

vāsanāṃ sarvathā dagdhā mama bhāvanayā rame |
prayātyeva parabrahma māṃ hariṃ puruṣottamam || 41 ||
[Analyze grammar]

evaṃ dehatrayaṃ tyaktvā labhate brahmaśāśvatam |
sarvagandhādiviṣayān bahiḥsrotāṃsi sarvathā || 42 ||
[Analyze grammar]

antaḥsrotāṃsi tadvacca phalaṃ bhogaṃ tathā mayi |
sarvaṃ nyasya trikaṃ tyaktvā yāti māṃ parameśvaram || 43 ||
[Analyze grammar]

karmakṣaye sthūladehakṣayo bhavati padmaje |
puṇyā'puṇyakṣaye sūkṣmadehakṣayaḥ prajāyate || 44 ||
[Analyze grammar]

brahmānandapravāheṇa vāsanākṣaya eva ca |
vāsanā liṃgadeho'yaṃ mama bhāvena līyate || 45 ||
[Analyze grammar]

ajñānākhyakāraṇasya dehasya vilayo'pi ca |
śṛṇu dehasya vai prāptirātmanastu yathā bhavet || 46 ||
[Analyze grammar]

saccidānandarūpasyā'devasyā'dehinastathā |
kāraṇairvividhairlakṣmi dehayogaḥ prajāyate || 47 ||
[Analyze grammar]

ātmā'yaṃ svacchadivyo'sti sa yatrā''ste'kṣare'thavā |
akṣarasya pradeśe vā sīmni māyārthasannidhau || 48 ||
[Analyze grammar]

sannidhidharmamādatte sphaṭikavat svabhāvataḥ |
ta eva dharmā pārakyāḥ pārakyairyāti vācyatām || 49 ||
[Analyze grammar]

kāśapravṛttiniyamā māyādharmā bhavanti tān |
labdhvā prakāśitaścā'haṃ pravṛtto niyamānvitāḥ || 50 ||
[Analyze grammar]

ityevaṃ manute cātmā māyātattvādivṛttibhiḥ |
nirṇayaṃ cābhimānaṃ vā cintanaṃ mananaṃ ca vā || 51 ||
[Analyze grammar]

māyāprabhātmakaṃ naijaprabhātmakaṃ sa vetti vai |
vedanaṃ naijamevā'pi miśraṃ māyāprabhātmakam || 52 ||
[Analyze grammar]

miśraṇaṃ cā'sya bhrāntiścā'vidyā'jñānā'bhidhaṃ hi tat |
tena pravartate cātmā puṇyapāpātmakarmasu || 53 ||
[Analyze grammar]

śubhā'śubhāni jāyante karmāṇi māyayā'sya tu |
śubhā'śubhānāṃ lepaśca jāyate'sya pravedane || 54 ||
[Analyze grammar]

jñāne lepāttatprajanyasaṃskāreṣvapi lepitā |
saṃskāre dharmarūpe yo lepaḥ sa svaccharūpiṇi || 55 ||
[Analyze grammar]

ādhāre jāyate jīve tairjīvaḥ saṃsaratyapi |
sveṣṭabhogādilabdhyarthaṃ sūkṣmayukto'pi cehate || 56 ||
[Analyze grammar]

tena sūkṣmaiḥ sameto'yaṃ labhate sthūlabhautikam |
sthūlaṃ jāḍyaṃ samāsādya sthūlaiḥ pakvo'tijāḍyavān || 57 ||
[Analyze grammar]

sthūlabhāvairbhogavāṃśca karmalubdho bhavatyasau |
prāpya prāpya ca karmāṇi kṣetraṃ kṣetraṃ punaḥ punaḥ || 58 ||
[Analyze grammar]

bhuṃkte bhogān bhogamayān bhāgyasaṃskāradān punaḥ |
labhate ca phalaṃ dīrghaṃ cirasevyaṃ ca taistataḥ || 59 ||
[Analyze grammar]

anekajanmabhoktavyaṃ cā'kṣayaṃ labhate phalam |
evaṃ lakṣmi hyasaṃgo'pi cā''karṣaṇasvabhāvataḥ || 60 ||
[Analyze grammar]

ākṛṣya cānyadharmān sa svārājyaṃ sthāpayatyapi |
arājā ca balī rājyamāhṛtya rājyavān yathā || 61 ||
[Analyze grammar]

tathā'yaṃ jāyate dehī samākarṣaṇayogavān |
amāyo'pi māyiko'yaṃ jāyate na nivartate || 62 ||
[Analyze grammar]

gāḍhād gāḍhataraṃ bhāvaṃ prapadyate na mucyate |
carmakāro yathā kuṇḍaṃ durgandhaṃ hyapi nojjhati || 63 ||
[Analyze grammar]

carmolbāvṛta evā'sau duṣṭaṃ dehaṃ na muñcati |
śubhaṃ tathā'śubhaṃ karma miśraṃ vā'yaṃ prapadyate || 64 ||
[Analyze grammar]

yathā prasūyamānastu phalī dadyāt phalaṃ bahu |
tathā'sya syād bahu puṇyaṃ sattvena manasā kṛtam || 65 ||
[Analyze grammar]

pāpaṃ cāpi tathā caiti pāpena manasā kṛtam |
manoyutastataścā'yaṃ mahālasaḥ pravartate || 66 ||
[Analyze grammar]

manobhṛtyo yathā cāsmai dadāti bhuṃkta eva saḥ |
punaścecchati bhogāṃśca tāvadāyurnivartate || 67 ||
[Analyze grammar]

kāmanāpreritaścā'yaṃ garbhavāse praṇīyate |
manasā puṇyapāpaiśca garbhe svapiti nirbalaḥ || 68 ||
[Analyze grammar]

śukraṃ śoṇitasaṃsṛṣṭaṃ kalalaṃ dehapūrvajam |
garbhāśaye samāpnoti śubhāśubhādisadṛśam || 69 ||
[Analyze grammar]

kaścid viśati kalale pūrvakarmānusārataḥ |
kaścidviśati budbude svasya karmānusārataḥ || 70 ||
[Analyze grammar]

kaścidviśati māṃse ca kaścit peśyāṃ svakarmataḥ |
kaścit karaṇḍe viśati kaścidaṃgāḍhyaputtale || 71 ||
[Analyze grammar]

kaścit pratyaṃgamūrtau ca kaścid bhrūṇe viśatyapi |
pūrvakarmānusāreṇa drutaṃ vā yadi vā ciram || 72 ||
[Analyze grammar]

prasūnālaprapuṣṭe vai kālenoṣṇyādipoṣite |
saprāṇe puttale jīvo viśatyeva svakarmataḥ || 73 ||
[Analyze grammar]

saukṣmyādavyaktabhāvācca jīvaḥ sūkṣmaśarīravān |
viśatyevā''ntaraklṛpte karmaṇā tatra sajjate || 74 ||
[Analyze grammar]

tatra brahma mahaccāste bījasyāpi prarakṣakam |
bījabījaṃ parabrahma nivasāmi sahā'pyaham || 75 ||
[Analyze grammar]

kartā kārayitā poṣṭā dhātā'vitā nibhālakaḥ |
sākṣī cā'saṃgavān tasya karmaphalapradāyakaḥ || 76 ||
[Analyze grammar]

sarveṣāṃ dehināṃ cāhaṃ bījabījaḥ sanātanaḥ |
āpūrakāṇāṃ tattvānāṃ prerayitā vasāmi ca || 77 ||
[Analyze grammar]

prāṇendriyādijīvāturmayā jīvanti jantavaḥ |
sa jīvaḥ sarvagātrāṇi garbhasyā''viśya vai tadā || 78 ||
[Analyze grammar]

dadhāti prajñayā sadyaḥ prāṇādhāre vyavasthitaḥ |
tena spandayate'ṅgādi sajīvo'yaṃ nigadyate || 79 ||
[Analyze grammar]

yathā svarṇadravaḥ svalpaḥ kṛtsnāṃ tāmrasya puttalīm |
karoti vai svarṇamayīṃ tathā jīvamayīṃ tanum || 80 ||
[Analyze grammar]

karoti cetanaścā'yamidaṃ jīvapraveśanam |
yathā vahnirlohapiṇḍe praviśya svasvarūpayet || 81 ||
[Analyze grammar]

tathā jaḍe praviśyā'yaṃ caitanyena nirūpayet |
yayā gṛhe pradīpo'pi dīpyamānaḥ prakāśate || 82 ||
[Analyze grammar]

ekasthānasthitaścāpi svaṃ cānyaṃ prati kāśate |
evaṃ hṛtstho'pi puruṣastridehaṃ prati kāśate || 83 ||
[Analyze grammar]

pūrvakṛtaṃ garbhayogyaṃ tatrolbe bhuṃkta ā nava |
daśame karmaṇāṃ tatra pūrvasya janmanastathā || 84 ||
[Analyze grammar]

jñānaṃ prajāyate cāpi tato bahiḥ prayāti saḥ |
garbhakarma kṣayaṃ prāptaṃ bālyakarma samāgatam || 85 ||
[Analyze grammar]

bhogārthaṃ tena vaśago bālo bhuṃkte kṛtaṃ nijam |
atha yuvā jāyamāno nisargaviṣayecchukaḥ || 86 ||
[Analyze grammar]

pravartate'tiviṣaye pāpaṃ punaḥ prajāyate |
nivartate viṣayebhyaḥ puṇyamasya prajāyate || 87 ||
[Analyze grammar]

dānaṃ vrataṃ brahmacaryaṃ sevā brahmapradhāraṇam |
damaḥ śāntirdayā tīrthaṃ vrataṃ ca saṃyamo yamaḥ || 88 ||
[Analyze grammar]

vyalīkā'nācaraṇaṃ ca parasvānāṃ vivarjanam |
mātāpitrośca śuśrūṣā devatā'tithipūjanam || 89 ||
[Analyze grammar]

gurupūjā'pyahiṃsā ca śaucamindriyanigrahaḥ |
śubhānāṃ cācaraṇaṃ ca satāṃ vṛttena vartanam || 90 ||
[Analyze grammar]

etāni yadi kurvīta dharmaḥ puṣṭaḥ prajāyate |
dharmaḥ saṃrakṣitaścainaṃ pāti vaṃśaṃ tathā divam || 91 ||
[Analyze grammar]

satāṃ sevāṃ prakurvīta kuryāt satsu dhruvāṃ sthitim |
ācāraṃ pālayet sarvaṃ yatra śāntirnirantarā || 92 ||
[Analyze grammar]

enaṃ dharmaṃ pālayed yo na sa durgatimāpnuyāt |
udayaṃ labhate nityaṃ dharmasya cetanasya ca || 93 ||
[Analyze grammar]

ācārā niyamā uktā abhyudayārthameva ha |
evaṃ niyamyate loko gurubhiḥ śāstravedibhiḥ || 94 ||
[Analyze grammar]

niyame vartamānaśca dehī yogī bhavediha |
viṣavidyāvidaṃ naiva viṣaṃ spṛśati vai tathā || 95 ||
[Analyze grammar]

niyame vartamānaṃ saṃsāraḥ spṛśati naiva ha |
yoge sthitaṃ na spṛśati māyā karma phalāni ca || 96 ||
[Analyze grammar]

yogī mukto jīvanmukto bhūtvā dehātpramucyate |
sarvalokeṣu yogastho mukto dehī viśiṣyate || 97 ||
[Analyze grammar]

guruḥ sa mokṣado loke saṃgahīno yato hi saḥ |
śubhaṃ ced dharmamārgeṇa samarjitaṃ tu dehinā || 98 ||
[Analyze grammar]

śubhabhogottaraṃ yadvā kālena mahatā'thavā |
saṃsārāttaraṇaṃ cāsya sādhuyogena saṃbhavet || 99 ||
[Analyze grammar]

pāpabhogottaraṃ yadvā paśupakṣyādijanmasu |
satāṃ yogena sahasā pāpanāśaḥ prajāyate || 100 ||
[Analyze grammar]

yānavāhanachāyādau patrapuṣpādiyogataḥ |
satāṃ sevāprasaṃgena puṇyamasya prajāyate || 101 ||
[Analyze grammar]

tataḥ sajjanmanā prāptiḥ svargasya vā parasya vā |
tataścaiśvaralokasya tato mokṣaṃ prayāti vā || 102 ||
[Analyze grammar]

evaṃ lakṣmi kṛtaṃ prāptaṃ bhuktvā karma pramucyate |
purā sṛṣṭau mamaivādeśataḥ pumān hyajāyata || 103 ||
[Analyze grammar]

śarīramātmanaḥ kṛtvā sa trailokyaṃ samasṛjat |
sthāvaraṃ jaṃgamaṃ ceti prakṛtiṃ triguṇātmikām || 104 ||
[Analyze grammar]

mama māyāsvarūpāṃ ca sṛṣṭvā puṃse tadā dadau |
prakṛtiḥ sā śarīrāṇāṃ yayā vyāptamidaṃ jagat || 105 ||
[Analyze grammar]

māyāśabalaḥ puruṣaḥ pradhānaṃ cāsṛjat tataḥ |
puṃyogena pradhānācca tattvāni vividhāni vai || 106 ||
[Analyze grammar]

hiraṣmayasvarūpāṇi hyajāyanta tato virāṭ |
tato brahmā tato devā mānavādyā imāḥ prajāḥ || 107 ||
[Analyze grammar]

māyāmayamidaṃ sarvaṃ kṣaraṃ tatparamakṣaram |
amṛtaṃ dhāma ca tadūrdhvaṃ paraṃdhāma me sthitam || 108 ||
[Analyze grammar]

mayā''diṣṭā īśvarāstu sṛṣṭimīśvarakoṭikām |
asṛjan tatsamīkṣyā'pi brahmā'sṛjaccaturvidhān || 109 ||
[Analyze grammar]

teṣāṃ kālaparimāṇaṃ vidhāya ca pitāmahaḥ |
sarjanaṃ pralayaṃ cāpyakalpayat sukhahetave || 110 ||
[Analyze grammar]

sukhaṃ tu duḥkhasammiśraṃ kāyamamedhyamityapi |
dehāḥ sarve nāśamukhāḥ saṃsāro ghorakaṣṭadaḥ || 111 ||
[Analyze grammar]

jātimaraṇayogāḍhyo dustaro'tiviḍambibhiḥ |
asaṃgaiḥ sujayaścāpi satāṃ saṃgayutairapi || 112 ||
[Analyze grammar]

nirvidyante vivekaiśca mārgamāṇāḥ paraṃpadam |
ta eva prāptametadvai varṣma tyaktvā prayānti vai || 113 ||
[Analyze grammar]

ityetat kathitaṃ lakṣmi te'tra dehasya mokṣaṇam |
yathā ca dehalabdhiśca mokṣaprāptiryathā ca tat || 114 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne muktidharmeṣu dehakṣayakāraṇāni dehaprāptikāraṇāni dehānmuktikāraṇāni cetyādinirūpaṇanāmā eka |
saptatyadhikaśatatamo'dhyāya || 171 ||
[Analyze grammar]