Chapter 170

śrīnārāyaṇīśrīruvāca |
muktidharmān kṛṣṇakānta mohacchedanakārakān |
jīvānāmanukampārthaṃ vadatrā sarvasammatān || 1 ||
[Analyze grammar]

śrīpuruṣottama uvāca |
śṛṇu nārāyaṇīśri tvaṃ sarvasakhīsamanvitā |
siddhidān muktidān dharmān vakṣyāmi hitakāriṇaḥ || 2 ||
[Analyze grammar]

akṣaraṃ paramaṃ vyoma saccidānandalakṣaṇam |
muktisthānaṃ paradhāma mamā'sti lakṣmi vetsi tat || 3 ||
[Analyze grammar]

mayā śrīkṛṣṇarūpeṇa golokaḥ sevyate sadā |
rādhādigopikāvṛndaiḥ sevitena nijātmanā || 4 ||
[Analyze grammar]

prathamaṃ paramaṃdhāma dvitīyaṃ cākṣaraṃ padam |
golokastṛtīyaṃ dhāma muktisthānaṃ mamā'sti tat || 5 ||
[Analyze grammar]

vaikuṇṭhe tu caturthe vai nārāyaṇo vasāmyaham |
lakṣmyādibhiḥ pārṣadādyaiḥ sevitaḥ parameśvaraḥ || 6 ||
[Analyze grammar]

pañcame vāsudevo'haṃ saṃkarṣaṇādibhiḥ saha |
vasāmyavyākṛte dhāmni muktisthāne sadā priye || 7 ||
[Analyze grammar]

ṣaṣṭhe'mṛtākhye loke'haṃ bhūmā nāmnā vasāmi ca |
īśvarāṇāṃ nyāyakartā mahārājādhirājakaḥ || 8 ||
[Analyze grammar]

saptame śrīpuradhāmni vasāmi lalitāpatiḥ |
mahālakṣmīpūjito'haṃ mahāviṣṇusvarūpadhṛk || 9 ||
[Analyze grammar]

yeyaṃ śrīkambharālakṣmīrgopālakṛṣṇasaṃyutā |
bhūtale vartate cā'dya mātā me bhāgyaśālinī || 10 ||
[Analyze grammar]

aṣṭame prākṛte dhāmni māyāmaye tu pauruṣe |
nivasāmi patiścā'haṃ prakṛteḥ puruṣātmakaḥ || 11 ||
[Analyze grammar]

mahāpuruṣarūpasya muktisthānaṃ hi tattathā |
sādāśaivaṃ navamaṃ ca nityakailāsanāmakam || 12 ||
[Analyze grammar]

vaiṣṇavaṃ daśamaṃ dhāma śrīviṣṇurūpasevitam |
vairājaṃ dhāma vai caikādaśaṃ tvīśvarakoṭikam || 13 ||
[Analyze grammar]

dvādaśaṃ mātsyamevāpi kaurmaṃ trayodaśaṃ tathā |
caturdaśaṃ tu vārāhaṃ paścadaśaṃ tu kāpilam || 14 ||
[Analyze grammar]

ṣoḍaśaṃ cāpi hāreyaṃ vāsudevīyakaṃ tataḥ |
aṣṭādaśaṃ tu pārthaṃ vai dāttātreyaṃ tataḥ param || 15 ||
[Analyze grammar]

viṃśaṃ haṃsāśritaṃ dhāmaikaviṃśaṃ nārasiṃhakam |
ārṣabhaṃ dvāviṃśakaṃ ca trayoviṃśaṃ tu vāmanam || 16 ||
[Analyze grammar]

caturviṃśaṃ parśurāmāśrayaṃ yājñaṃ tataḥ param |
rāmadhāma tataścāpi saptaviṃśaṃ kumāravat || 17 ||
[Analyze grammar]

aṣṭāviṃśaṃ hāyagrīvaṃ nāradaṃ tu tataḥ param |
triṃśaṃ tu rājarājāḍhyaṃ vyāsasya tvekatriṃśakam || 18 ||
[Analyze grammar]

bauddhaṃ dvātriṃśakaṃ trayastriṃśaṃ tu mohinīśritam |
nāpuṃsakaṃ catustriṃśaṃ tathā'saṃkhyāni cā'kṣare || 19 ||
[Analyze grammar]

akṣarasya pradeśeṣu sīmasvetāni santi vai |
bahūni me svarūpāṇi cāvatārāstathā rame || 20 ||
[Analyze grammar]

anantāśca tato dhāmānyapyanantāni santi me |
bhaktānāṃ bhāvanāpūrtyai kṛtāni tāni tattathā || 21 ||
[Analyze grammar]

muktisthānāni sarvāṇi yathābhakti yathāsthiti |
prāpyante mānavaistānyupāsanābalibhiḥ priye || 22 ||
[Analyze grammar]

evamanyāni loke'tra bhavanti ca bahūnyapi |
jalāvaraṇavaikuṇṭhaṃ satyaṃ dhāmā'pi vedhasaḥ || 23 ||
[Analyze grammar]

badaryāśramamevā'pi naranārāyaṇasya me |
tataḥsthānaṃ śubhaṃ muktipradaṃ laukikamuktidam || 24 ||
[Analyze grammar]

śvetadvīpābhidhaṃ dhāma nirannamuktasevitam |
śeṣe yatrā'hamevā''sse lakṣmīrevādisevitaḥ || 25 ||
[Analyze grammar]

cāndraṃ sthānaṃ tathā sauraṃ sthānaṃ me yatra rājate |
mūrtirhiraṇmayī divyā vahnau cāpi tathā sthitā || 26 ||
[Analyze grammar]

kauberaṃ cāpi yāmyaṃ ca mārutamaindramityapi |
aiśānaṃ cāpi kailāsaṃ śaivaṃ ca vāruṇaṃ jale || 27 ||
[Analyze grammar]

merau sthānānyasaṃkhyāni muktitulyasukhāni vai |
pātāleṣu tathā santi sthānāni sukhadānyapi || 28 ||
[Analyze grammar]

aihikamuktiyogyāni bhavanti tāni padmaje |
sāntāni tāni sarvāṇi brahmāṇḍasthāni yāni vai || 29 ||
[Analyze grammar]

cirasthasukhadānyeva muktitulyāni santi hi |
aiśvarāṇyapi dhāmāni sāntāni pralaye khalu || 30 ||
[Analyze grammar]

prākṛtāni samastāni nāśayogyāni tāni hi |
ciramuktipraśastāni bhavanti mama vāñcchayā || 31 ||
[Analyze grammar]

vinā'kṣarapadaṃ lakṣmi bṛhaddhāma vinā'pare |
lokāḥ sthānāni divyāni kāśante'ntarbhavanti ca || 32 ||
[Analyze grammar]

parabrahmasvarūpo'haṃ yadā bhavāmi yogavān |
rādhāyukto ramāyuktastadā dhāmāni matkṛte || 33 ||
[Analyze grammar]

sarvāṇyāvirbhavantyeva brahmato'kṣaradhāmani |
brahmātmakāni sarvāṇi brahmāntāni hi padmaje || 34 ||
[Analyze grammar]

kvaciccā'kṣaradhāmā'pi mayi sarvaṃ vilīyate |
paradhāmasthite'nādiparabrahmaṇi svāmini || 35 ||
[Analyze grammar]

paradhāma sadā me'sti yato'kṣarādayo muhuḥ |
āvirbhavanti kāśante muktānāṃ koṭayo'pi ca || 36 ||
[Analyze grammar]

mamā''śritāśca vā ye tu mamā'vatāramāśritāḥ |
mameśvarānāśritā vā mama mūrtimupāśritāḥ || 37 ||
[Analyze grammar]

mamāṃ'śānāśritā ye vā madvibhūtimupāśritāḥ |
matsādhūnāśritā ye vā macchaktiṃ samupāśritāḥ || 38 ||
[Analyze grammar]

madbhaktidhyānaniratā mama sevāparāyaṇāḥ |
matsādhusevane saktā matsādhvīsevane tathā || 39 ||
[Analyze grammar]

matkalāmāśritā ye vā madāveśamupāśritāḥ |
madvaṃśamāśritā ye ca mama patnīrupāśritāḥ || 40 ||
[Analyze grammar]

madarthamātmasarvasvaniveditvamupāśritāḥ |
te sarve mama mārgasthā mama mārgamupāśritāḥ || 41 ||
[Analyze grammar]

mama mārge pravṛttāśca mama mārge pragāmiṇaḥ |
mama snehabharāḥ sarve mama sānnidhyamāgatāḥ || 42 ||
[Analyze grammar]

mama muktiṃ prayāntyeva mayā maddhāma prāpitāḥ |
kramamārgādhirūḍhāste prayānti paramaṃ padam || 43 ||
[Analyze grammar]

mānavāḥ ṛṣayo devāḥ pitaro munayastathā |
santaḥ siddhāḥ satpuruṣāḥ satyaḥ sādhvyaḥ pativratāḥ || 44 ||
[Analyze grammar]

ātmanivedino ye ca vaiṣṇavā matsuyoginaḥ |
teṣāmāśrayamāptā ye te sarve kramaśaḥ khalu || 45 ||
[Analyze grammar]

madaṃśopāsanāśaktyā māmeṣyanti śanaiḥ śanaiḥ |
muktidharmaḥ kramavāṃśca puṣṭo bhavati tairiha || 46 ||
[Analyze grammar]

sākṣānmāṃ ye cāśrayanti vedasaṃhitayā vidaḥ |
teṣāṃ kramaṃ vinā prāptirdhāmnaḥ purasya me bhavet || 47 ||
[Analyze grammar]

evaṃ vai bahavo yātā māmupāśritya matpadam |
matsvarūpopāsakāstu kramād yāsyanti matpadam || 48 ||
[Analyze grammar]

evaṃ lakṣmi mayā loke muktimārgaḥ kṛpākṛtaḥ |
taṃ sṛtvā laṃghayiṣyanti bhavā'raṇyaṃ mamāśritāḥ || 49 ||
[Analyze grammar]

ekadā'śvapaṭṭasarastaṭe śrīmānaso muniḥ |
niṣaṇṇo brahmavṛkṣā'dho bhūtale prajapan harim || 50 ||
[Analyze grammar]

dadarśa yogipuruṣaṃ jñānavijñānapāragam |
sarvatattvārthakuśalaṃ sukhaduḥkhavivekinam || 51 ||
[Analyze grammar]

jātismaraṃ puṇyapāpakovidaṃ cātmavedinam |
jñātāraṃ ca gatīnāṃ vai karmaṇāṃ dehivartinām || 52 ||
[Analyze grammar]

carantaṃ muktavat siddhaṃ praśāntaṃ ca jitendriyam |
dīpyamānaṃ śriyā brāhmyā'ntardhānavidyāvedinam || 53 ||
[Analyze grammar]

tathā'dṛśyairbhāgavatairbhaktairyāntaṃ śanairanu |
śrīmānasaḥ samutthāya yoginaṃ prāṇamat puraḥ || 54 ||
[Analyze grammar]

svāgatādyaiścidānandābhidhaṃ taṃ paryatoṣayat |
bhāvena śraddhayā bhaktyā sevayā tuṣṭa eva saḥ || 546 ||
[Analyze grammar]

cidānandaḥ samuvāca yogyaṃ śrīmānasaṃ munim |
śṛṇu sādho kṛpayā'tra vadāmi kṛṣṇapreritaḥ || 56 ||
[Analyze grammar]

kṛṣṇasyaiva jagat sarvaṃ kṛṣṇārthaṃ parikalpitam |
kṛṣṇārthaṃ yojitaṃ sarvaṃ muktaye divyatāptaye || 57 ||
[Analyze grammar]

kṛṣṇaṃ vihāya cā'nyasmai yojitaṃ laukikāptaye |
laukikāptipradaṃ syāttanna tu śāśvatamuktaye || 68 ||
[Analyze grammar]

vividhaiḥ karmabhirlokāḥ puṇyayogaiśca kevalaiḥ |
prayāntyeva śubhāṃ martyā devalokādisaṃsthitim || 59 ||
[Analyze grammar]

na tatra sukhamatyantaṃ na tatra śāśvatī sthitiḥ |
sthānāttu mahato bhraṃśo duḥkhalabdhāt punaḥ punaḥ || 60 ||
[Analyze grammar]

aśubhā gatayaḥ prāptāstādṛśyaśca mayā tvayā |
purā bahvyo nipātāntāḥ kaṣṭāḥ pāpābhisaṃbhṛtāḥ || 61 ||
[Analyze grammar]

kāmakrodhamahāmohatṛṣṇārāgādisaṃbhṛtāḥ |
yatra muhurhi maraṇaṃ mananaṃ yatra vai muhuḥ || 62 ||
[Analyze grammar]

āhārā vividhā bhuktāḥ pītāḥ stanā asakhyakāḥ |
mātaro vividhā dṛṣṭāḥ pitaro'pi pṛthagvidhāḥ || 63 ||
[Analyze grammar]

sukhāni ca vicitrāṇi narāṇāṃ yoṣitāṃ tathā |
duḥkhānyapi vicitrāṇi rodanāni bahūnyapi || 64 ||
[Analyze grammar]

vakṣaḥkuṭṭāni bahudhā kṛtāni tatra tatra ca |
śirastāḍanamevā'pi cā''tmaghātā hyanekadhā || 65 ||
[Analyze grammar]

priyairvivāsā bahudhā saṃvāsāścā'priyaiḥ saha |
duḥkhāptānāṃ sañcitānāṃ dhanānāṃ nāśanāni ca || 66 ||
[Analyze grammar]

avamānāḥ sukaṣṭāśca nṛpebhyaḥ svajanāditaḥ |
śārīrā mānasā vāpi vedanāścātidāruṇāḥ || 67 ||
[Analyze grammar]

tiraskārāścograrūpā vadhā bandhāśca dāruṇāḥ |
pāravaśyātikaṣṭāni rogakaṣṭāni vai tathā || 68 ||
[Analyze grammar]

yātanā yamajāścāpi niraye patanānyapi |
janmarogāśca bahavo jarārogāśca dāruṇāḥ || 69 ||
[Analyze grammar]

vyasanāni samastāni trāsadāni muhurmuhuḥ |
loke'sminnanubhūtāni dvandvajāni mayā tvayā || 70 ||
[Analyze grammar]

tvayā'nādikṛṣṇayogāt tyaktaṃ jālaṃ hi mānasam |
daihikaṃ ca sadā tyaktaṃ śrīharau paramātmani || 71 ||
[Analyze grammar]

sukhī cā''sse'tra parame pāvane caraṇe hareḥ |
aśvapaṭṭasarakṣetre mokṣade divyamuktavat || 72 ||
[Analyze grammar]

ahaṃ vicārya ca sarva paraṃ vairāgyamāptavān |
anādiśrīkṛṣṇanārāyaṇapādamupāśritaḥ || 73 ||
[Analyze grammar]

lokatantraṃ tyaktavāṃśca duḥkhārttaḥ sādhuvṛttimān |
sarvaṃ duḥkhaṃ cā'nubhūya tvimaṃ mārgamanuṣṭhitaḥ || 74 ||
[Analyze grammar]

tataḥ siddhimavāpā'pi prasādātparamātmanaḥ |
athā'haṃ śrīkṛṣṇanārāyaṇaśrīvallabhaṃ prabhum || 75 ||
[Analyze grammar]

dṛṣṭvā natvā pūjayitvā prayāmi paramaṃ padam |
nā'haṃ punarihā''gantā tīrthaṃ kṛtvā prayāmyaham || 76 ||
[Analyze grammar]

tvāṃ dṛṣṭvā ca punaḥ siddhirdivyā me'tra vyajāyata |
āsiddherāprajāsargādātmano'pi gatīḥ śubhāḥ || 77 ||
[Analyze grammar]

nopalabdhā'smyuttare vai tatheyaṃ siddhiruttamā |
śubhaṃ sarvaṃ mayā nyastaṃ nārāyaṇe parātmani || 78 ||
[Analyze grammar]

na me tataḥ śubhaṃ cāpi bhoktavyamavaśiṣyate |
itaḥ paraṃ gamiṣyāmi śrīhareḥ paramaṃ padam || 79 ||
[Analyze grammar]

parabrahmapadaṃ śreṣṭhaṃ mā te bhūdatra saṃśayaḥ |
nā'haṃ punarihā''gantā sṛṣṭilokaṃ hi dukhadam || 80 ||
[Analyze grammar]

tvāṃ divyaṃ tu paraṃ bhaktaṃ dṛṣṭvā gurorhareriha |
prīto'smi te cātmavedin brūhi kiṃ karavāṇi te || 81 ||
[Analyze grammar]

kālo'yaṃ vidyate śubhro bhakte'rpayituṃ mānasam |
ātmanivedibhaktasya sevayā sarvamāpyate || 82 ||
[Analyze grammar]

prasādena mahāmuktirāpyate nā'tra saṃśayaḥ |
yathā tvaṃ syāḥ prasanno'tra tathā sevāṃ pradarśaya || 83 ||
[Analyze grammar]

bhṛśaṃ prīto'smi bhavato bhaktyopāsanayā hareḥ |
paripṛcchasva bhāṣeyaṃ sarvaṃ yattava vāñcchitam || 84 ||
[Analyze grammar]

bahu manye ca te bhaktiṃ bhṛśaṃ tvāṃ pūjayāmi ca |
yenā'haṃ kṛtakṛtyo'smi kiṃ dadāmi drutaṃ vada || 85 ||
[Analyze grammar]

ityuktaḥ śrīmānaso'pi prapūjya taṃ suvastubhiḥ |
cidānandaṃ divyajanaṃ papraccha bahudhāmatim || 86 ||
[Analyze grammar]

kathaṃ dehaḥ kṣayameti kathaṃ dehaḥ prapadyate |
kathaṃ dehī saṃsaraṃśca saṃsārātparimucyate || 87 ||
[Analyze grammar]

kathaṃ māyā līyate ca kathaṃ māyāṃ prapadyate |
ekaṃ dehaṃ parityajya kathamanyaṃ prapadyate || 88 ||
[Analyze grammar]

kathaṃ nijā'rjite cātmā śubhāśubhe bhunakti ca |
śubhā'śubhe prabhuktvā ca kathaṃ brahmā'bhipadyate || 89 ||
[Analyze grammar]

videhasyā'sya jīvasya karma kva vā pratiṣṭhati |
karmaṇāṃ phalanāśārthaṃ kasyā''śraya upāsyate || 90 ||
[Analyze grammar]

kathaṃ kena pratāpena divyatā'tra samarthyate |
kathaṃ vā nityamuktatvaṃ kathaṃ vā'kṣaravāsitā || 91 ||
[Analyze grammar]

kathaṃ sārūpyamevā'pi bhavettāni nirūpaya |
ityevaṃ lakṣmi papraccha cidānandaṃ hi mānasaḥ || 92 ||
[Analyze grammar]

cidānandastu kṛpayā smṛtvā māṃ parameśvaram |
sarvān praśnān yathāyuktān vicāryottaramāha ha || 93 ||
[Analyze grammar]

itiśrīlakṣmīnārāyaṇīyasaṃhitāyāṃ tṛtīye dvāparasantāne muktidharmeṣu vividhadhāmnāṃ nirdeśaḥ śrīmānasacidānandayoginormithaḥ praśnāścetyādinirūpaṇanāmā saptatyadhikaśatatamo'dhyāyaḥ || 170 ||
[Analyze grammar]