Chapter 166

śrīnārāyaṇīśrīruvāca |
amṛtaṃ ca viṣaṃ ceti dvayaṃ loke pravartate |
sudhā'mṛtaṃ garaṃ viṣaṃ rasyaṃ taddvayameva hi || 1 ||
[Analyze grammar]

arasya tadbhavedvā na bhaveccet kīdṛśaṃ hare |
yaj jñātvā'yaṃ lokajano virajyeta dadhīta vā || 2 ||
[Analyze grammar]

śrīpuruṣottama uvāca |
samudramathane pūrvaṃ samutpannaṃ mahāviṣam |
papau śrīśaṃkaro yogī tamastuvan maharṣayaḥ || 3 ||
[Analyze grammar]

atyugraṃ kālakūṭākhyaṃ saṃhṛtaṃ bhagavan hara |
tvayā surakṣitaṃ sarvaṃ pratiṣṭhitaṃ kṛpānidhe || 4 ||
[Analyze grammar]

samartho'si maheśo'si rakṣako'si viṣādana |
sadā jaya suyogiṃstvaṃ brahmā'si saṃgavarjitaḥ || 5 ||
[Analyze grammar]

śrutvaivaṃ prahasan śaṃbhurviṣaṃ prāhetaranmunīn |
na viṣaṃ kālakūṭākhyaṃ saṃsāro viṣamulbaṇam || 6 ||
[Analyze grammar]

saṃharet tadviṣaṃ yastu sa samartho hyanena kim |
yogī sarvaprayatnena saṃharenmāyikaṃ viṣam || 7 ||
[Analyze grammar]

māyikasya ye viṣasya hartāraste hi śaṃkarā |
śaṃ kurvanti guravo vā devāḥ santo'tinirmalāḥ || 8 ||
[Analyze grammar]

yogino vā mahātmānaḥ śāntidā mokṣadā hi te |
saṃsāraviṣahartāraḥ samarthāste hi sādhavaḥ || 9 ||
[Analyze grammar]

sanakādyāḥ sādhavaste śukādyā yoginastathā |
satyaśca brahmacāriṇyo vāsanākṣayakārikāḥ || 10 ||
[Analyze grammar]

saṃsāro'yaṃ dvividho'sti mūrtaścā'mūrta ityapi |
mūrto vai dampatīrūpo'mūrtastu vāsanātmakaḥ || 11 ||
[Analyze grammar]

mithyājñānaṃ vāsanāyāḥ kāraṇaṃ vāsanābalāt |
gārhasthyaṃ viṣayāṇāṃ ca bhogavattvaṃ sarāgiṇām || 12 ||
[Analyze grammar]

rāge dveṣaḥ sakhārūpaḥ sāhāyyado'pyaniṣṭake |
etau dvau bhavato doṣau pravartakau nivartakau || 13 ||
[Analyze grammar]

saguṇā sā pravṛttiśca nivṛttiśca kriyākarī |
sakriyasya bhavedādyakṣaṇasambandha udbhavaḥ || 14 ||
[Analyze grammar]

vṛddhiḥ puṣṭirdṛḍhatā ca hrāsaḥ kṣayo layādikam |
punaḥ karmānusāreṇodbhavo layāntako bhavet || 15 ||
[Analyze grammar]

evaṃ saṃsāracakre'tre bhramannapi vivekavān |
rāgadveṣādirahito mukto bhavati bandhanāt || 16 ||
[Analyze grammar]

garāṇi santi bahūni vadāmi śṛṇu padmaje |
miṣṭaṃ garaṃ kuṭumbasyā'bhimānaṃ janmato bhavet || 17 ||
[Analyze grammar]

mātā pitā sakhā bandhuścābhimānaṃ mahad garam |
gṛhaṃ me vāṭikā me ca kṣetraṃ me peṭikā ca me || 18 ||
[Analyze grammar]

dhanaṃ me ca suvarṇaṃ me'mbaraṃ me garamuttamam |
mānyaṃ mama vaco nitya maduktaṃ satyameva tat || 19 ||
[Analyze grammar]

agryaṃ vākyaṃ cā'pradhṛṣyaṃ mamaiva mānyameva tat |
vijayo me niścayo me mānyo nānyasya kasyacit || 20 ||
[Analyze grammar]

nirṇītaṃ ca mayā yat tat svīkāryaṃ sarvathā janaiḥ |
garaṃ caitanmahatproktaṃ yanmadena prapīḍyate || 21 ||
[Analyze grammar]

balaṃ viṣaṃ paraṃ proktaṃ kleśada yuddhakṛddhi tat |
kalājñānaṃ garaṃ cāpi sampadgaraṃ nu nāśakṛt || 22 ||
[Analyze grammar]

viṣayāstu garaṃ lakṣmi mahānirayapātinaḥ |
viṣayā viṣamevā'sti yadāveśo'pratikriyaḥ || 23 ||
[Analyze grammar]

tṛṣṇā viṣaṃ paraṃ lakṣmi rāgo viṣaṃ mahattaram |
dveṣo viṣaṃ vahnirūpaṃ cintā garaṃ tu nāśakṛt || 24 ||
[Analyze grammar]

kāmo garaṃ samastānāṃ viṣāṇāṃ viṣamulbaṇam |
nirayotthaṃ nirayāṇāṃ pradaṃ nirayavāsadam || 25 ||
[Analyze grammar]

moho viṣaṃ tathā'niṣṭakaraṃ duḥkhapradaṃ mahat |
mugdhaḥ kṛtyaṃ na jānāti mohadagdho vinaśyati || 26 ||
[Analyze grammar]

sattā viṣaṃ paraṃ cāste rājyaṃ viṣaṃ tu mārakam |
jihvāśiśnodaragṛdhnā viṣaṃ kālaprakūṭakam || 27 ||
[Analyze grammar]

nāstikatvaṃ guroḥ pitroravamānaṃ viṣaṃ guru |
hanyate yena sahasā'dhogatiṃ nāśameti ca || 28 ||
[Analyze grammar]

śāpo viṣaṃ duḥkhitānāṃ satāmasnigdhatā viṣam |
adharmaśca viṣaṃ svargadāhakaṃ bhūtināśakam || 29 ||
[Analyze grammar]

nindā cauryaṃ balātkāro viṣāṇīmāni mūlataḥ |
nikṛntanāni karturvai vināśakāni cā'cirāt || 30 ||
[Analyze grammar]

matsaro'sahanaṃ cerṣyā netraṃ hṛnmānasaṃ tu taiḥ |
nijaṃ nijaṃ tu bhavanaṃ kṛtaṃ ca dahyate pumān || 31 ||
[Analyze grammar]

evaṃ viṣairāvṛto'yaṃ cāvidyāpariveṣṭitaḥ |
nārakī sarvathā cāste viṣametad durantakam || 31 ||
[Analyze grammar]

udbhijjaḥ svedajaścāpi tathā'ṇḍajo jarāyujaḥ |
tyāgābhāvād bhramantyevā'jñānavāsanakarmabhiḥ || 33 ||
[Analyze grammar]

ṣāṭkauśikaṃ sagaraṃ ca bhajatyeva kalevaram |
prathamaṃ pitṛto janma bījadānātmakaṃ matam || 34 ||
[Analyze grammar]

garbhājjanma dvitīyaṃ ca bālarūpaṃ tu tanmatam |
tṛtīyaṃ brahmasūtrācca vivāhāśca caturthakam || 341 ||
[Analyze grammar]

pañcamaṃ sarvasannyāsāt ṣaṣṭhaṃ tu maraṇottaram |
saptamaṃ mokṣabhāktvaṃ ca tato janma na vidyate || 36 ||
[Analyze grammar]

baijikaṃ pāśavaṃ cāpi mānavaṃ karmabandhanam |
ācyutaṃ praitakaṃ cāpyapunarbhavaṃ hi saptamam || 37 ||
[Analyze grammar]

evametāni janmāni viṣāktāni bhavanti hi |
bījamātrasya cādhānaṃ baijikaṃ janma cocyate || 38 ||
[Analyze grammar]

paśuvad bhrūṇajanmāptaṃ pāśavaṃ bālajanma tat |
manuṃ mantraṃ ca gāyatrīṃ yajñopavītamityapi || 39 ||
[Analyze grammar]

mānavāṃśca vṛṣāneti mānavaṃ janma ceti tat |
vivāhaḥ karmabandhaśca kārāgārasamā sthitiḥ || 40 ||
[Analyze grammar]

karmabandhanarūpaṃ tajjanma dāmpatyarūpakam |
sarvaṃ tyaktvā virāgaḥ san sanyāsaṃ labhate tu yaḥ || 41 ||
[Analyze grammar]

tasya janmā''cyutaṃ proktaṃ hareḥ śaraṇayāyinaḥ |
dehatyāge pretabhāve sūkṣmaśarīrayogakṛt || 42 ||
[Analyze grammar]

dharmādharmayuto dehī bhramatyeveti janma tat |
praitakaṃ procyate punarbhavārthaṃ yatra tatra vā || 43 ||
[Analyze grammar]

mokṣārthaṃ nirguṇāṃ bhaktiṃ kṛtvā tyaktvā ṛṇāni ca |
chitvā bandhān saṃvilīya vināśya garalāni ca || 44 ||
[Analyze grammar]

yaḥ prayāti harerdhāmā'punarbhavaṃ hi janma tat |
anuttaraviṣādaḥ sa mahāmṛtāda eva saḥ || 45 ||
[Analyze grammar]

saptamaṃ janma cāsādya maraṇaṃ nā'sya vidyate |
evaṃ lakṣmi ṣaḍviṣāṇi viśālāni bhavanti vai || 46 ||
[Analyze grammar]

krūrāṇi dāhakānyeva pācakāni samantataḥ |
garbhe duḥkhānyanekāni yonimārge'pi vai tathā || 47 ||
[Analyze grammar]

bhūtale cāpi śayyāyāṃ kaumāre yauvane tataḥ |
bhoge yoge vyavahāre vārdhake pāravaśyage || 48 ||
[Analyze grammar]

aśaktau nirdhane roge maraṇe pretake tathā |
yāmye khanau viṣāktāni duḥkhānyeva vivekinaḥ || 49 ||
[Analyze grammar]

tiryakṣu mānave yākṣe paiśāce rākṣase sure |
pitṛgaṇe bhogavatsu gāndharve cāpsarogaṇe || 50 ||
[Analyze grammar]

aindre brāhme prākṛte vairāje prajāpatigṛhe |
pauruṣe kālakavale duḥkhaṃ viṣaṃ mahattamam || 51 ||
[Analyze grammar]

pārthivaṃ ca tathā''pyaṃ ca taijasaṃ cāpi mārutam |
vyaumaṃ ca mānasaṃ cāpi bauddhaṃ tathā''bhimānikam || 52 ||
[Analyze grammar]

prākṛtaṃ ca viṣaṃ duḥkhaṃ cādau madhye tathā'ntake |
vartamānāni duḥkhāni bhaviṣyanti garāṇi ca || 53 ||
[Analyze grammar]

deśe kāle kriyāyāṃ ca duḥkhāni vividhāni ca |
chinnamūlataruryadvat tvavaśaḥ patati kṣitau || 54 ||
[Analyze grammar]

puṇyavṛkṣakṣayād devā gāṃ patanti parā api |
pāpajanyaṃ tathā duḥkhaṃ prasahya duḥkhamityapi || 55 ||
[Analyze grammar]

nārakāṇāṃ narake'pi rājñāṃ cā'prāpya mānasam |
vihitā'karaṇāccāpi yatīnāṃ varṇināṃ tathā || 56 ||
[Analyze grammar]

saṃsārabhayamagnānāṃ duḥkhaṃ virāgiṇāmapi |
kīṭapakṣimṛgāṇāṃ ca paśūnāṃ gajavājinām || 57 ||
[Analyze grammar]

garaṃ duḥkhaṃ duḥkhavaccā'tyajato duḥkhameva tat |
vaimānikānāṃ sarveṣāṃ duḥkhaṃ kalpādhikāriṇām || 58 ||
[Analyze grammar]

sthānābhimānināṃ cāpi manvādīnāṃ viṣaṃ sthalam |
devānāṃ cāpi daityānāmanyonyavijigīṣayā || 59 ||
[Analyze grammar]

rakṣasāṃ ca nṛpāṇāṃ ca viṣaṃ duḥkhaṃ jagattraye |
śramārthamāśramāḥ santi viśrāmo vidyayā bhavet || 60 ||
[Analyze grammar]

vidyā duḥkhamapātre ca tasmāt satpātratāṃ labhet |
sādhusaṃgena satataṃ jāyate satyapātratā || 61 ||
[Analyze grammar]

tayā dhāryaṃ bhaved brahma kṛpayā'pi satāṃ rame |
netre dhāryaṃ parabrahma karṇe dhāryo haristathā || 62 ||
[Analyze grammar]

kṛṣṇo dhāryastvacāṃ yoge viṣṇurdhāryo rasāśraye |
ghrāṇe dhāryaḥ parameśaḥ pade dhāryaḥ prabhuḥ svayam |
pāyau liṅge cāntarātmā dhāryo vyāpaka īśvaraḥ || 63 ||
[Analyze grammar]

dhāryo manasi māyeśo hṛdi dhāryo narāyaṇaḥ |
buddhau dhāryo mādhavaśca ṛṣīkeśastu cintane || 64 ||
[Analyze grammar]

pṛthvyāṃ dhāryaḥ paramātmā jale dhāryo jaleśayaḥ |
dhāryastejasi dhāmeśo vāyau dhāryo virāṭpatiḥ || 65 ||
[Analyze grammar]

mahāviṣṇuścā'mbare ca dhāryo'haṃ tu nijātmani |
draṣṭavyo'haṃ tato lakṣmi śrotavyo'haṃ tathā hariḥ || 66 ||
[Analyze grammar]

ghrātavyaśca rasitavyaḥ sparśitavyo'hameva ca |
mantavyaścāpi boddhavyo'haṃkartavyo'pyahaṃ hariḥ || 67 ||
[Analyze grammar]

cetayitavya evā'haṃ vaktavyo'haṃ tathā prabhuḥ |
ādātavyaśca gantavyaḥ sargāyitavya ityaham || 68 ||
[Analyze grammar]

ānandayitavya evā'haṃ tattve tattve sthito'smyaham |
prāṇe prayāṇe yāne ca pāne sthairye sthito'smyaham || 69 ||
[Analyze grammar]

sarvātmānaṃ carantaṃ māṃ samupāsīta cātmavān |
annasthaṃ cāpi vāristhaṃ prāṇasthaṃ mānase sthitam || 70 ||
[Analyze grammar]

vijñānasthamupāsīta māṃ hariṃ puruṣottamam |
indriyasthaṃ ca mātrāsthaṃ kālasthaṃ jīvasaṃsthitam || 71 ||
[Analyze grammar]

sarvasthaṃ māmupāsīta saṃsāraviṣachittaye |
amṛtaṃ cākṣareśaṃ māṃ paramātmānamāntaram || 72 ||
[Analyze grammar]

prasannaṃ harimīśeśaṃ sahasthaṃ sahajaṃ prabhum |
ajñānaṃ tu malaṃ kṣveḍaṃ tyaktvā māṃ jñānagocaram || 73 ||
[Analyze grammar]

cā'parokṣaṃ viditvaivā'mṛtatvaṃ tvāpnuyād bṛhat |
jñānamevā'bhyasennityaṃ madgocaraṃ pradhānataḥ || 74 ||
[Analyze grammar]

jñānenaikena bhāyukto bhaktisnehānuyojitaḥ |
tyaktasaṃgaviṣo mukto māmupaiti na saṃśayaḥ || 75 ||
[Analyze grammar]

iha loke pare vāpi kartavyaṃ nā'sya vidyate |
jīvanmukto yatastasya vāsanā'pi layaṃgatā || 76 ||
[Analyze grammar]

jñānabhaktirataścā'yaṃ brahmavitparamārthataḥ |
evaṃ sa muktaḥ saṃsārād duḥkhaviṣādivarjitaḥ || 77 ||
[Analyze grammar]

gurvāśraye sthito yāti dhāmā'kṣaraṃ parātmanaḥ |
yoginaḥ sarvapāpāni jīryante garalāni ca || 78 ||
[Analyze grammar]

krīḍannapi na lipyeta garairnānāvidhairapi |
dhyānaṃ nirviṣamevā''ste śrīhareḥ sarvadā rame || 79 ||
[Analyze grammar]

brahmaśīlo mama dhyānaṃ kuryād guroḥ prasaṃgamāt |
mayi tattānatābhāvaṃ prānte mallīnatāmapi || 80 ||
[Analyze grammar]

vindatyeva hi madbhakto garaṃ tvasyā'mṛtaṃ bhavet |
evaṃ garāṇi sarvāṇi cāmṛtānyasya bhānti ha || 81 ||
[Analyze grammar]

bhūtāni sūkṣmamātrāṇi viṣayā viṣayodbhavāḥ |
aguṇāśca guṇāścāpi kriyā garāṇi yāni tu || 82 ||
[Analyze grammar]

tāni sarvāṇyamṛtāni kalpitāni pare mayi |
evaṃ vai viṣapo bhaktaḥ samartho netaraḥ kvacit || 83 ||
[Analyze grammar]

pṛthvīṃ jalaṃ ca tejaśca dhartuṃ śakto hyayaṃ bhavet |
vāyuṃ vyoma tathā dhartuṃ cāṣṭāvṛttīstatheśvarān || 84 ||
[Analyze grammar]

dhartuṃ śakto bhaveccā'yaṃ prakṛtiṃ puruṣaṃ hyapi |
kālaṃ dhartuṃ samarthaśca bhavet tadātmako mama || 85 ||
[Analyze grammar]

akṣarātmā bhaveccāpi muktān dhartuṃ prabhurhyapi |
yathā'haṃ tu tathā so'yaṃ prāraṃbhāvananāśanam || 86 ||
[Analyze grammar]

kartuṃ jāyeta śakto madātmakaiśvarabhāvavān |
pārameśapadaṃ prāpya sarvaṃ kartuṃ prabhurbhavet || 87 ||
[Analyze grammar]

viṣaṃ vidyādanubhūtyā parihāraṃ vicintayet |
aviṣaṃ vā cograviṣaṃ bhuktvā viṣaṃ vināśayet || 88 ||
[Analyze grammar]

aviṣāḥ sādhavaḥ proktā ugraviṣo haristvaham |
sādhusaṃgānmama pānānnirviṣo jāyate viṣī || 89 ||
[Analyze grammar]

aviṣasya mama snehādbhaktyā mama prasādanam |
prasādena drutaṃ muktiḥ pratijñaiṣā rame mama || 90 ||
[Analyze grammar]

garbhastho jāyamāno vā bālo vā taruṇo'pi vā |
vṛddho vā mucyate dehī prasādātparamātmanaḥ || 91 ||
[Analyze grammar]

aṇḍajaścodbhijja uta svedajo'pi pramucyate |
jarājo vā naro nārī mucyate me prasādavān || 92 ||
[Analyze grammar]

mamaivāṃśā dehino'pi mama yogaviśeṣiṇaḥ |
mama bhāvena sampannāḥ prayānti paramāṃ gatim || 93 ||
[Analyze grammar]

mayā nibhālitā bhaktā mamāṃ'śā matpadāśritāḥ |
kṛpāpātrāṇi taranti saṃsāraviṣasāgaram || 94 ||
[Analyze grammar]

yathā tailaṃ jalayoge taratyevordhvamudgatam |
tathā dehī kṛṣṇayoge taratyevordhvamudgataḥ || 95 ||
[Analyze grammar]

yathā vahniḥ svabhāvena yātyūrdhvamedhito hyati |
tathā dehī subhaktyā me yātyūrdhvaṃ vardhito hyati || 96 ||
[Analyze grammar]

yathā yogī mahaiśvaryairbrahmadvāraṃ prayāti vai |
tathā so'yaṃ mamaiśvaryaiḥ parabrahma prayāti hi || 97 ||
[Analyze grammar]

yathā gopī hyajaṃ prāpya gāyatrītvamupāgamat |
tathā gopo hariṃ prāpya golokaṃ samavāpnuyāt || 98 ||
[Analyze grammar]

yathā lakṣmīrhariṃ prāpya hṛdaye vāsamāpa sā |
tathā bhakto hariṃ prāpyā'kṣare vāsamavāpnuyāt || 99 ||
[Analyze grammar]

yathā māyā hariṃ prāpya harau sā pravilīyate |
tathā bhakto hariṃ prāpya harau sampravilīyate || 100 ||
[Analyze grammar]

yathā patnī kāntalagnā pṛthaktve naiva vetti saḥ |
tathā bhakto harau lagno bhedaṃ naijaṃ na vetti ca || 101 ||
[Analyze grammar]

yathā tu śarkarā dugdhe rasatāmupayāti ca |
tathā kṛṣṇe kṛṣṇakarmā bhaktau dugdhatvamṛcchati || 102 ||
[Analyze grammar]

yathā snigdhaṃ mānasaṃ vai snehapātre milatyapi |
tathā snigdho mama bhakto mayyapṛthaṅ milatyapi || 103 ||
[Analyze grammar]

yathā''nandaḥ pramodaśca sukhānyātmani cā'pṛthak |
tathā bhakto divyarūpaḥ paramātmani cā'pṛthak || 104 ||
[Analyze grammar]

ityevaṃ te mayā lakṣmi viṣahāratvamīritam |
paṭhanācchravaṇādasya viṣaṃ sarvaṃ vyapohati || 105 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne saṃsāraviṣāṇāṃ taddharaṇopāyānāṃ ca nirūpaṇanāmā ṣaṭṣaṣṭyadhikaśatatamo'dhyāyaḥ || 166 ||
[Analyze grammar]