Chapter 163

śrīpuruṣottama uvāca |
sūryadevo balasyā'sṛksamidhaṃ prāpya bījakam |
yayāvākāśamārgeṇa laṃkādhipo rurodha tam || 1 ||
[Analyze grammar]

samudre cāpi rāvaṇagaṃgāyāṃ bījakāni vai |
nipetustajjaratnāni jātāni dīptimanti ha || 2 ||
[Analyze grammar]

ujjvalāścārurāgāste padyarāgā hi toyajāḥ |
saugandhikotthā guṇinaḥ kuruvindodbhavāstathā || 3 ||
[Analyze grammar]

sphāṭikajāḥ prabhāvanto bahuvarṇāstathā'pare |
jātā bandhūkaguñjendragopajapā'sṛksannibhāḥ || 4 ||
[Analyze grammar]

dāḍimakiṃśukapuṣpasindūrotpalasannibhāḥ |
padmakuṃkumalākṣājarasavarṇāḥ prabhāyutāḥ || 5 ||
[Analyze grammar]

rāge sāndrāḥ svaprabhayā bhānti ye sphuṭamadhyinaḥ |
sphāṭikajāḥ sūryabhābhiḥ pārśvāni rañjayanti te || 6 ||
[Analyze grammar]

kusuṃbhanīlamiśrābhā ugraraktāmbujaprabhāḥ |
anye puṣkarapuṣpābhā hiṃgulavattviṣo'pare || 7 ||
[Analyze grammar]

cakorapīkasārasanetrabhāścāpare'pi ca |
kokanadottamapuṣpatviṣaścānye bhavantyapi || 8 ||
[Analyze grammar]

prabhāvakāṭhinyagurutvakaiḥ prāyaḥ samā ime |
sphāṭikajāḥ padmarāgāḥ nīlaraktaprabhāyutāḥ || 9 ||
[Analyze grammar]

ete saugandhikotthāstu maṇayaḥ prāyaśaḥ samāḥ |
etebhyo raṃgato nyūnā maṇayaḥ kuruvindajāḥ || 10 ||
[Analyze grammar]

nirarciṣo'ntarbahulā nā'tiprabhāvaśālinaḥ |
tatsadṛśā āndhradeśe tumburudeśake tathā || 11 ||
[Analyze grammar]

sadharmāṇaḥ prajāyante svalpamūlyā hi te matāḥ |
raṃgādhikyaṃ gururevaṃ ca snigdhatā samatācchatā || 12 ||
[Analyze grammar]

arciṣmattā mahattā ca maṇīnāṃ śraiṣṭhyabodhakāḥ |
ye tu karkarasadṛśāśchidramalādiyoginaḥ || 13 ||
[Analyze grammar]

prabhāhīnāḥ saparuṣā vivarṇāste na cottamāḥ |
sadoṣaṃ maṇimābaddhya śokacintā''mayāṃstathā || 14 ||
[Analyze grammar]

mṛtyuṃ duḥkhaṃ vittanāśaṃ labhate nātra saṃśayaḥ |
padmarāgasamā vijātīyā bhavanti pañca ca || 15 ||
[Analyze grammar]

kalasapurajāścāpi tumburudeśajāstathā |
muktapāṇīyajātāśca siṃhalotthāḥ śrīpūrṇakā || 16 ||
[Analyze grammar]

kalasotthāstuṣayogā bhavanti maṇayo hi te |
tāmravarṇāstumburutthā kṛṣṇāḥ siṃhaladeśajāḥ || 17 ||
[Analyze grammar]

muktā namaḥsvabhāvāśca śrīpūrṇā dīptivarjitāḥ |
tuṣayoge tāmravarṇā bhavanti snehino'pi ca || 18 ||
[Analyze grammar]

ye praghṛṣṭā varjayanti dīptiṃ te nimnajātikāḥ |
aṃgulyākrāntamūrdhā yo bibharti pārśvakṛṣṇatām || 19 ||
[Analyze grammar]

anyasya sannidhisthasya guṇān yaśca bibhartyapi |
nikṛṣṭamūlyavān sa syānmuktāmaṇiḥ samo'pi vai || 20 ||
[Analyze grammar]

jāte kṛtrimasandehe śāṇe taṃ parilekhayet |
svajātakasamutthena vilikhecca parasparam || 21 ||
[Analyze grammar]

vajraṃ vā kuruvindaṃ vā vimucyā'nyena kenacit |
na śakyaṃ lekhanaṃ kartuṃ padmarāgendranīlayoḥ || 2 ||
[Analyze grammar]

yatra lekhaḥ sa nimno vai maṇirnottama ucyate |
yadvā kṛtrima evāpi rekhāyukto bhaved yadi || 23 ||
[Analyze grammar]

kṛtrimo doṣavāṃścāpi dhāryo naiva maṇiḥ kvacit |
satyena maṇinā sākaṃ kaustubhena samaṃ ca vā || 24 ||
[Analyze grammar]

caṇḍālastveka evāpi dvijātīṃstu bahūnapi |
dūṣayatyeva tadvacca duṣṭo hanti guṇānapi || 25 ||
[Analyze grammar]

satyapadmarāgadhartā sapatneṣu vasannapi |
nā''padbhirabhibhūyeta na vighnairabhibhūyate || 26 ||
[Analyze grammar]

nopadravairnopasargairna doṣairabhibhūyate |
varṇadīptiyutaṃ śreṣṭhaṃ taddhīnaṃ hīnameva tat || 27 ||
[Analyze grammar]

śreṣṭhaṃ ratnaṃ sadā dhāryaṃ na kaniṣṭhaṃ kadācana |
mūlyahīnasya dhartāraṃ mūlyahīnaṃ karoti tat || 28 ||
[Analyze grammar]

atha brahmapriyā vo'tra marakatān vadāmi tu |
balapittasamidbījaṃ gṛhṇan vāsukirambare || 29 ||
[Analyze grammar]

pradudrāva yadā tatra garuḍastamarodhayat |
bījāni nyapataṃścāpi māṇikyaparvatasthale || 30 ||
[Analyze grammar]

turuṣkapādapeṣvevaṃ nalikāvanavalliṣu |
śvetasāgaratīre ca marakatāstato'bhavan || 341 ||
[Analyze grammar]

garuḍasya cañcurandhrād bījāni patitānyapi |
tebhyo jātāḥ śukakaṇṭhaśirīṣapuṣparaṅgiṇaḥ || 32 ||
[Analyze grammar]

khadyotapṛṣṭhasadṛśāḥ śaivalaśādbalaprabhāḥ |
kalhāraśaṣpatulyāśca bhujaṃgabhujasataprabhāḥ || 33 ||
[Analyze grammar]

patraraṃgāstathā pittajātāste maṇayo matāḥ |
bhujaṅgabhogabījotthairviṣaṃ sarva praśāmyati || 34 ||
[Analyze grammar]

sarvauṣadhimantragaṇairyanna śakyaṃ cikitsitum |
mahā'hidaṃṣṭrāprabhavaṃ viṣaṃ tvetaiḥ praśāmyati || 35 ||
[Analyze grammar]

atyantaṃ tu haridvarṇaṃ komalaṃ saprabhaṃ tathā |
kāñcanacūrṇamadhyābhaṃ ratnaṃ taduttamaṃ matam || 36 ||
[Analyze grammar]

sarvasaṃsthānaguṇavat samānarūpavattathā |
guru sūryakarasparśāt pradīpayati cāśramam || 37 ||
[Analyze grammar]

vidutprabhāyā yogād yaccāntardīptiyutaṃ bhavet |
bhavecca śādvalanibhaṃ haritaṃ śreṣṭhameva tat || 38 ||
[Analyze grammar]

varṇā yatra tu bahulā madhye svacchakarāśrayam |
sābhraṃ snigdhaṃ viśuddhaṃ ca barhiprabhaṃ samantataḥ || 39 ||
[Analyze grammar]

tannyūnaṃ pūrvato bodhyaṃ kiñcicchreṣṭhaṃ hiṃ gaṇyate |
śabalaṃ rūkṣaṃ malinaṃ kaṭhoraṃ karkaraṃ yathā || 40 ||
[Analyze grammar]

miśraṃ śilotthajatunā marakataṃ na tūttamam |
mārakataiḥ kaṇaiḥ klṛptaṃ sandhitaṃ vā tathāvidham || 41 ||
[Analyze grammar]

śreyaskāmairna taddhāryaṃ jetavyaṃ tanna vai kvacit |
bhallātakasya pavanairvaiṣamyaṃ yānti yatprabhāḥ || 42 ||
[Analyze grammar]

kṛtrimāste marakatā naiva dhāryāḥ kadācana |
vajratulyāstathā muktāstulyā marakatā api || 43 ||
[Analyze grammar]

yeṣāṃ prabhā cordhvagā vai ṛjvī vā vakragāminī |
tiryagālocyamānānāṃ sadyo vā sā praṇaśyati || 44 ||
[Analyze grammar]

ete vijātayo bodhyā marakatāḥ śubhāvahāḥ |
snānā''camanajapyeṣu rakṣāmantrakriyāvidhau || 45 ||
[Analyze grammar]

gohiraṇyādidāneṣu sādhane'nuṣṭhite'pi ca |
daivapaitryātitheyeṣu gurusaṃpūjaneṣu ca || 46 ||
[Analyze grammar]

bādhyamāneṣu vividhairdoṣajātairviṣodbhavaiḥ |
doṣahīnaṃ guṇavacca kāñcanapratiyojitam || 47 ||
[Analyze grammar]

saṃgrāme jayakārye ca dhāryaṃ marakataṃ sadā |
padmarāgādhikaṃ mūlyaṃ mārakataṃ prakīrtitam || 48 ||
[Analyze grammar]

doṣādhikye mūlyahānirmārakate'pi jāyate |
evaṃ mārakatāḥ proktā nīlamaṇīn vadāmi vaḥ || 49 ||
[Analyze grammar]

netrayugmasamidbījaṃ balasya yatpapāta ha |
siṃhale kacchadeśe ca sā bhūmirbahuṣā'bhitaḥ || 50 ||
[Analyze grammar]

indranīlavatī jātā nīlāste naikajātayaḥ |
nīlābjabhṛṃgaśārṅgābhā harakaṇṭhasamā api || 51 ||
[Analyze grammar]

giriśṛṃganibhā vārdhijalābhāḥ śikhiraṅgiṇaḥ |
nīlīraṃgā pīkakaṇṭhasamābhāste mahāguṇāḥ || 52 ||
[Analyze grammar]

mṛtpāṣāṇaśilārandhrāḥ karkarāstruṭisaṃyutāḥ |
abhrikāpaṭalacchāyā varṇaduṣṭā bhavantyapi || 53 ||
[Analyze grammar]

padmarāgaguṇān sarvānāpnoti cendranīladhṛk |
padmarāge parīkṣā yā saivendranīlave'pi ca || 54 ||
[Analyze grammar]

vahnau kṣiptaḥ padmarāgo vahniṃ krameta yāvatā |
tato'dhikaścendranīlaḥ kṣiptaḥ krameta cānale || 59 ||
[Analyze grammar]

parīkṣā saiva boddhavyā yathārthasya maṇeḥ śubhā |
tathāpi na parīkṣārthaṃ guṇānāṃ nāśakārake || 56 ||
[Analyze grammar]

vahnau maṇirnidhātavyo yato duṣṭo bhaveddhi saḥ |
so'narthāya bhaved bhartuḥ kartuḥ kārayitustathā || 57 ||
[Analyze grammar]

kācotpalakaravīravaidūryasphaṭikādayaḥ |
indranīlasamāstvete maṇayo'pi bhavanti hi || 58 ||
[Analyze grammar]

kāṭhinyagurutā''dhikye śraiṣṭhyameṣāṃ prajāyate |
indranīlastāmravarṇaḥ karavīrotpalaprabhaḥ || 55 ||
[Analyze grammar]

yasya madhyagatā bhāti nīlasyendrāyudhaprabhā |
tamindranīlamityāhurmahārhaṃ bahudurlabham || 60 ||
[Analyze grammar]

yasya varṇasya bhūyastvāt śrīre śataguṇe sthitaḥ |
nīlatāṃ tannayet sarvaṃ mahānīlaḥ sa ucyate || 61 ||
[Analyze grammar]

padmarāgasya yanmūlyaṃ māṣamātrasya dhāryate |
tanmūlyaṃ cendranīlasya dhāryate guṇabhāmataḥ || 62 ||
[Analyze grammar]

atha lakṣmyaḥ pravakṣyāmi vaidūryasyodbhavādikam |
balāsurasya nādātmasamidbījodbhavā hi te || 63 ||
[Analyze grammar]

anekavarṇā śobhābhirāmakāntiyutāḥ khalu |
vidūre parvate kāmarūpakāmākṣikīkṣitau || 64 ||
[Analyze grammar]

vaidūryāste maṇayaśca prāvṛḍghanāvabhāsinaḥ |
visphulliṃgasamā jātāstejasvino'pi vai śubhāḥ || 69 ||
[Analyze grammar]

śreṣṭhā mayūrakaṇṭhābhā veṇudalanibhāstathā |
cāpapakṣanibhāste'pi praśastā varabhāgyadāḥ || 66 ||
[Analyze grammar]

girikācāḥ śiśupālāḥ kācāśca sphaṭikāstathā |
dhūmrāśceti ca vaidūryajātayo'pi samā yathā || 67 ||
[Analyze grammar]

likhyābhāvāt kācasaṃjñaḥ śiśupālo laghutvataḥ |
girikācastvadīptitvāt sphaṭikaścojjvalatvataḥ || 68 ||
[Analyze grammar]

paladvayagurormūlyamindranīlasamaṃ matam |
nāmābhāguṇabhedairhi bhedo mūlye prajāyate || 69 ||
[Analyze grammar]

snehalaghutāmṛdutā bhede liṅgāni sarvadā |
maṇibandhe dhṛtā lābhapradāścenmūlyaṣaḍguṇāḥ || 70 ||
[Analyze grammar]

etanmūlyaṃ tvākareṣu bhūdeśe bahulaṃ bhavet |
suvarṇaḥ ṣoḍaśamāṣastatsaptāṃśastu saṃjñakaḥ || 71 ||
[Analyze grammar]

śāṇaścaturmāṣamāṇo māṣakaḥ pañcakṛṣṇalaḥ |
palasya daśamo bhāgo dharaṇaḥ parikīrtitaḥ || 72 ||
[Analyze grammar]

dharaṇe'dhikatāṃ prāpte mūlyamadhikaṃ gauravāt |
atha lakṣmyaḥ puṣparāgānmaṇīn vadāmi bodhataḥ || 73 ||
[Analyze grammar]

balāsurasya tvaksamidbījāni himaparvate |
patitāni tato jātāḥ puṣparāgā mahāguṇāḥ || 74 ||
[Analyze grammar]

āpītapāṇḍarāḥ padmarāgāḥ pāṣāṇajātayaḥ |
āpītalohitāste tu kauruṇḍakābhidhānakāḥ || 79 ||
[Analyze grammar]

svacchalohitapītāstu kāṣāyakābhidhānakāḥ |
ānīlaśuklasnigdhāste somānakābhidhānakāḥ || 76 ||
[Analyze grammar]

atyantalohitāste ye padmarāgā hi te matāḥ |
sunīlāste puṣparāgā indranīlābhidhānakāḥ || 77 ||
[Analyze grammar]

mūlya vaidūryasadṛśaṃ dhāraṇād yoṣitāṃ sadā |
putrarūpaṃ phalaṃ śuddhaḥ prayacchati na saṃśayaḥ || 78 ||
[Analyze grammar]

atha lakṣmyaḥ pravakṣyāmi karketanān maṇīniha |
vāyurbalasya tu nakhasamidbījamupāgamat || 79 ||
[Analyze grammar]

padmavaneṣu cikṣepa karketanāstato'bhavan |
madhusomarudhirābhāstāmrapītānalopamāḥ || 80 ||
[Analyze grammar]

nīlaśvetaparuṣāśca vyādhyādidoṣahārakāḥ |
snigdhāḥ śuddhāḥ samavarṇāḥ pītāścitrā gurutvinaḥ || 81 ||
[Analyze grammar]

rekhāvraṇadoṣahīnāḥ karketanāste pāvanāḥ |
svarṇapatreṇa veṣṭayitvā tāpayedanalena ca || 82 ||
[Analyze grammar]

prakāśameti cet karketanaḥ sa roganāśakṛt |
kleśanāśakaścāpyāyuṣpradaśca sukhavaṃśadaḥ || 83 ||
[Analyze grammar]

alaṃkṛtau dhṛtaścā'yaṃ dhana dhānyaṃ dadāti ca |
pūjāṃ ca bāndhavāṃścāpi dadātyujjvalatāmapi || 84 ||
[Analyze grammar]

eke nīlāśca vikṛtā mlānāḥ kaluṣiṇastathā |
tejodīptihīnavarṇā bhavanti karkasadṛśāḥ || 85 ||
[Analyze grammar]

aguṇāste duḥkhadā vai na dhāryā hi kadācana |
sūryakiraṇamāsādya tejaḥ paridhiyoginaḥ || 86 ||
[Analyze grammar]

jāyante ye te'gramūlyāḥ karketanā bhavanti vai |
atha brahmapriyā vo'tra bhīṣmaratnāni vacmyaham || 87 ||
[Analyze grammar]

balāsurasya vai vīryasamidbījaṃ himālaye |
taduttare pradeśe cā'patad bhīṣmāṇi vai tataḥ || 88 ||
[Analyze grammar]

śaṃkhā'bjābhāni bhāvanti syonākasannibhāni ca |
jātāni kaṇṭhadhṛtyā tu sampatpradāni tāni vai || 89 ||
[Analyze grammar]

bhīṣmamaṇidharaṃ dṛṣṭvā palāyante tu dūrataḥ |
vṛkā dvīpinaḥ śarabhā vyāghraśārdūlakuṃjarāḥ || 90 ||
[Analyze grammar]

bhīṣmamaṇiścā'ṅgulīyo guṇayukto dhṛto yadi |
pitṛtarpaṇakārye ca bahutṛptiprado hi saḥ || 91 ||
[Analyze grammar]

sarpā'ṇḍajā''khuvṛścikaviṣāṇi yānti śaṃ tathā |
jalāgnicauravairibhīrnaśyatyevā'sya dhāraṇāt || 92 ||
[Analyze grammar]

meghaśaivalaraṅgaṃ ca paruṣaṃ pītamaprabham |
vivarṇaṃ malinaṃ dūrād varjayeddhānido yataḥ || 93 ||
[Analyze grammar]

mūlyaṃ yathāguṇaṃ kalpyaṃ deśakālādiśobhanam |
atha vai pulakān vacmi maṇīn brahmapriyā hi vaḥ || 94 ||
[Analyze grammar]

balāsurasya nakharasamidbījaṃ bhujaṅgamāḥ |
cikṣipuḥ parvateṣūrdhvaṃ nimnagātvapi cottare || 956 ||
[Analyze grammar]

deśe tato hi maṇayaḥ pulakāstu vijajñire |
dāśārṇe vāgade melakake kālagake'pi ca || 96 ||
[Analyze grammar]

guñjā'ñjanakṣaudravarṇā mṛṇālābhāstathā'bhavan |
gandharpavahnikadalībhāsāḥ śreṣṭhāstathā'bhavan || 17 ||
[Analyze grammar]

śaṃkhā'bjabhṛṃgārkatulyacitrabhaṃgā arekhakāḥ |
maṅgalāste vṛddhidā vai pulakāḥ parikīrtitāḥ || 18 ||
[Analyze grammar]

kākaśvarāsabhajambūkavṛkograsvarūpiṇaḥ |
samāṃsagṛdhramukhabhā mṛtyudāste dhṛtā yadi || 19 ||
[Analyze grammar]

mūlyameṣāṃ palabhāre śatāni pañca mudrikāḥ |
atha lakṣmyo rudhirākhyaṃ ratnaṃ vaḥ kathayāmyaham || 100 ||
[Analyze grammar]

balāsurasya rūpākhyasamidbījaṃ hutāśanaḥ |
ninye cikṣepa revāyāṃ nimnakṣitāvapi dhruvam || 101 ||
[Analyze grammar]

indragopanibhāścāpi śukacañcunibhāstathā |
puṣṭā rudhiravarṇāste rudhirāścā'bhavan hi te || 102 ||
[Analyze grammar]

madhye candrapāṇḍurāste śuddhavarṇāstulābhinaḥ |
indranīlasamāścāpi bhṛtyaiśvaryapradā hi te || 103 ||
[Analyze grammar]

pakvāste suravajrākhyā lābhadā sampadāṃ pradāḥ |
atha lakṣmyaḥ sphaṭikākhyāna maṇīn vacmi śubhāvahān || 104 ||
[Analyze grammar]

kāverīvindhyayavanacīnanepālabhūmiṣu |
balāsurasya medākhyasamidbījaṃ tu lāṅgalī || 105 ||
[Analyze grammar]

cikṣepā''kāśamārge'pi tailaṃ tat sphaṭikaṃ hyabhūt |
mṛṇālaśaṃkhadhavalāḥ kiñcidvarṇāntarānvitāḥ || 106 ||
[Analyze grammar]

pāpanāśakarā yogyaguṇamūlyā hi te'bhavan |
atha śeṣo balā''ntrān vai samidbījasvarūpiṇaḥ || 107 ||
[Analyze grammar]

keralādau pracikṣepa vidrumāste tato'bhavan |
śaśalohitavarṇāśca guñjājapānibhā api || 108 ||
[Analyze grammar]

sunīlā devakaromā jātā bhinnā hi te tathā |
prasannaṃ komalaṃ snigdhaṃ surāṃgaṃ vidrumaṃ hitam || 109 ||
[Analyze grammar]

dhanadhānyaṃkaraṃ loke viṣārtibhayanāśanam |
evaṃ jātāni ratnāni jāyante bījavaṃśataḥ || 110 ||
[Analyze grammar]

khanijāśca prajāyante vāhneyā maṇayo'pi ca |
brahmapriyāḥ samastā vo maṇayaḥ kathitā mayā || 111 ||
[Analyze grammar]

balasya mama bhaktasya nirmittena samudbhavāḥ |
dhāraṇādvācanāccāpi mama smaraṇakārakāḥ || 112 ||
[Analyze grammar]

balastato vimānena yayau dhāma mamaiva saḥ |
jayādyāśca bhavatyo'tra vartante yoṣito mama || 113 ||
[Analyze grammar]