Chapter 151

śrīnārāyaṇīśrīruvāca |
parameśa kṛpāsindho'vatārī tvaṃ svayaṃ hariḥ |
jāto'si jagatāmuddhārārthaṃ jānāmi sarvathā || 1 ||
[Analyze grammar]

tava yogaṃ na ye prāptāstādṛśā bhāgyavarjitāḥ |
teṣāṃ pañcamahāpāpapāpināmuddhṛtiḥ katham || 2 ||
[Analyze grammar]

brahmahatyā surāpānaṃ svarṇasteyaṃ satīratiḥ |
tatprasaṃgī kathaṃ kṛṣṇoddhareyuste vadā'tra me || 3 ||
[Analyze grammar]

śrīpuruṣottama uvāca |
śṛṇu lakṣmi pravadāmi teṣāmuddhārasādhanam |
kṛpā me pāpipāpānāṃ prajvāliketi niścitam || 4 ||
[Analyze grammar]

mayā vai kṛpayā loke tīrthāni sukṛtāni hi |
sajīvāni tathā nirjīvāni camatkarāṇi ha || 5 ||
[Analyze grammar]

yatsparśād darśanāccāpi pāpāni prajvalanti vai |
aśvapaṭṭasarastīrthaṃ sarvapāpapraṇāśanam || 6 ||
[Analyze grammar]

nārmadaṃ śuklatīrthaṃ vai bhagukṣetraṃ tathā param |
oṃkāraṃ ca mahat tīrthaṃ sarvapāpapraṇāśanam || 7 ||
[Analyze grammar]

somanāthaṃ dvārikā ca gomatī svarṇalekhikā |
nārāyaṇahradastīrthaṃ sarvapāpapraṇāśakam || 8 ||
[Analyze grammar]

bhadrāvatī sābhramatī godāvarī sarasvatī |
kāverī tāmraparṇī ca gaṃgā ca yamunā tathā || 9 ||
[Analyze grammar]

gokarṇaṃ mādhuraṃ kṣetraṃ kapālamocanaṃ tathā |
haridvāraṃ viśālā ca kauravaṃ puṣkaraṃ tathā || 10 ||
[Analyze grammar]

saṃbhalaṃ brahmaputrā ca gaṇḍakī kāñcanī sarit |
gāgarā sindhurevāpi tathā pampāsarovaram || 11 ||
[Analyze grammar]

setubandho jagannāthaḥ kāpilaṃ tīrthamuttamam |
mānasākhyasaraścāpi sarvapāpapraṇāśanam || 12 ||
[Analyze grammar]

kedāraṃ ca patatkāyaṃ cerāvatī mahānadī |
menakāṃgī ca śikṣāṃgī bālakṛṣṇasarovaram || 13 ||
[Analyze grammar]

kṛṣṇānadī ca kauberaṃ saro mannāmikānadī |
cāṃgaśikṣāṃgikā śālavīnā tryaṃgisarovaram || 14 ||
[Analyze grammar]

nārāyaṇasaraścāpi śrīstanākhyasarovaram |
dvikalākhyasaraścāpi līnā yānākṣiṇī nadī || 15 ||
[Analyze grammar]

obī coralakākhāto yūralā nīparā nadī |
nārāyaṇī mahādīrghā sarvapātakanāśinī || 16 ||
[Analyze grammar]

volgā śāvanarī cāpi ahamambarikā nadī |
dvīnadī rānanā cāpi pralayāyasarovaram || 17 ||
[Analyze grammar]

nāyajharānadī śreṣṭhā tathā caṇḍasarovaram |
kaṅgūnadī cāmajhānā parīmā ca sarittathā || 18 ||
[Analyze grammar]

supāravaryakasaro mekāṃjhī ca mahānadī |
vinipādasaraścāpi sulavākhyasarovaram || 19 ||
[Analyze grammar]

evamādīni tīrthāni mayā kṛtāni padmaje |
mahāpāpādipāpānāṃ nāśanāya bhuvastale || 20 ||
[Analyze grammar]

sarvakhaṇḍeṣu deśeṣu kṛpayoddharaṇāya vai |
tatra snātā janā yānti śuddhiṃ muktiṃ parāṃ mama || 21 ||
[Analyze grammar]

yatra yatrā'vatārā me yatrā'vatārabhūmayaḥ |
tatra tīrthakṛto lokā mucyante sarvapātakaiḥ || 22 ||
[Analyze grammar]

yatra mūrteḥ pratiṣṭhā me yatra yajñā bhavanti ca |
snānaṃ cā'vabhathaṃ yatra mucyante tatra pātakaiḥ || 23 ||
[Analyze grammar]

yatra devā vicaranti santaśca paṃktipāvanāḥ |
satyo yatra nivasanti mucyante tatra pātakaiḥ || 24 ||
[Analyze grammar]

brahmacārijanā yatra yatayo yatra santi ca |
sādhavo brahmaśīlāśca mucyante tatra pātakaiḥ || 25 ||
[Analyze grammar]

brahmaprasādo yatrā''ste yatra vai brahmabhojanam |
vaiśvadevā bhuṃjate ca mucyante tatra pātakaiḥ || 26 ||
[Analyze grammar]

pitṛtīrthaṃ paraṃ tīrthaṃ mātṛtīrthaṃ tato'dhikam |
gurutīrthaṃ tataḥ śreṣṭhaṃ mucyante tatra pātakaiḥ || 27 ||
[Analyze grammar]

pativratā paraṃ tīrthaṃ tīrthaṃ patnīvrataḥ patiḥ |
gurusevi śiṣyatīrthaṃ mucyante tatra pātakaiḥ || 28 ||
[Analyze grammar]

videhāḥ sādhavo yatra brahmaniṣṭhāśca dehinaḥ |
kīrtanaṃ mandiraṃ yatra mucyante tatra pātakaiḥ || 29 ||
[Analyze grammar]

tapo dhyānaṃ japo homaḥ svādhyāyo yatra santi ca |
gāvo yatra prapūjyante mucyante sarvapātakaiḥ || 30 ||
[Analyze grammar]

brāhmaṇārthe gavārthe vā sādhvarthe'sūn parityajet |
devārthe cāpi pitrarthe mātrarthe'sūn parityajet || 31 ||
[Analyze grammar]

svāmyarthe cāpi patyarthe satyarthe'sūn parityajet |
dharmārthe cāpi yajñārthe mokṣārthe'sūn parityajet || 32 ||
[Analyze grammar]

tadā sarvāṇi pāpāni naśyantyeva na saṃśayaḥ |
kuryādanaśanaṃ vāpi bhṛgoḥ patanamityapi || 33 ||
[Analyze grammar]

jvalantaṃ vā viśedagniṃ jalaṃ tīrthe viśecca vā |
tadā sarvāṇi pāpāni vinaśyanti na saṃśayaḥ || 34 ||
[Analyze grammar]

datvā cā'nnaṃ tu viduṣe yaścā''jīvanameva ha |
tasya pāpāni naśyanti brahmahatyā vyapohati || 35 ||
[Analyze grammar]

yajñānāmavabhṛthake snātvā mucyeta pātakaiḥ |
sarvasvaṃ viduṣe dadyāt sādhave harimūrtaye || 36 ||
[Analyze grammar]

tasya pāpāni naśyanti dānāt satāṃ prasevanāt |
triveṇyāṃ snānamātreṇa naśyantyaghāni sarvaśaḥ || 37 ||
[Analyze grammar]

sadā triṣavaṇaḥ snāti namati sarvadevatāḥ |
ekabhukto vartate'sya naśyantyaghāni sarvaśaḥ || 38 ||
[Analyze grammar]

hareḥ pādodake snātvā mucyate brahmahatyayā |
pañcagavyaṃ varṣamātraṃ pītvā mucyeta madyapaḥ || 39 ||
[Analyze grammar]

svarṇasteyī muśalena hato nṛpaiḥ pramucyate |
agamyāgamanaḥ kuryāccāndrāyaṇāni pañcaṣāḥ || 40 ||
[Analyze grammar]

patiteṣu prasaṃgī ca kuryād vratāni tāni vai |
taptakṛcchraṃ caredvā tu saṃvatsaramatandritaḥ || 41 ||
[Analyze grammar]

sarvasvadānaṃ vā dadyāt sarvapāpapraśodhakam |
puṇyakṣetre gayādau ca gamanaṃ pāpanāśakam || 42 ||
[Analyze grammar]

amāvāsyātithiṃ prāpya pūjayed yo hariṃ tu mām |
sādhūn viprān bhojayitvā mucyate sarvapātakaiḥ || 43 ||
[Analyze grammar]

upoṣitaścaturdaśyāṃ kṛṣṇapakṣe tu śārṅgiṇe |
vaivasvatāya kālāya sarvabhūtakṣayāya ca || 44 ||
[Analyze grammar]

yamāya dharmarājāya mṛtyave cāntakāya ca |
pratyekaṃ tilasaṃyuktān dadyādaṣṭa jalāñjalīn || 45 ||
[Analyze grammar]

pūjayeddharmadevaṃ ca sarvapāpaiḥ pramucyate |
brahmacaryamadhaḥśayyāmupavāsaṃ sato'rcanam || 46 ||
[Analyze grammar]

prakurvīta smaret kṛṣṇaṃ mucyate sarvapātakaiḥ |
ṣaṣṭhyāmupoṣitaḥ śukle saptamyāṃ sūryamarcayet || 47 ||
[Analyze grammar]

sataḥ saṃbhojayeccāpi mucyate sarvapātakaiḥ |
ekādaśyāṃ nirāhāraḥ samabhyarcya hariṃ tu mām || 48 ||
[Analyze grammar]

dvādaśyāṃ bhojayet sādhūnmucyate sarvapātakaiḥ |
nityaṃ japettīrthasevāṃ devasādhuprapūjanam || 49 ||
[Analyze grammar]

kuryādvai śraddhayā nityaṃ mucyate sarvapātakaiḥ |
grahaṇādau grahaṇānte dadyād dānāni cāpi yaḥ || 50 ||
[Analyze grammar]

hīrakaratnadhānyānāṃ dravyāṇāṃ ca bhuvāmapi |
gṛhāṇāṃ bhojanānāṃ ca mucyate sarvapātakaiḥ || 51 ||
[Analyze grammar]

yo mahāpāpayukto'pi puṇyatīrtheṣu bhāvitaḥ |
niyamena tyajet prāṇānmucyate sarvapātakaiḥ || 52 ||
[Analyze grammar]

brahmaghnaṃ vā kṛtaghnaṃ vā mahāpātakadūṣitam |
bhartāraṃ coddharennārī pativratā satī śubhā || 53 ||
[Analyze grammar]

pativratā tu yā nārī bhartuḥ śuśrūṣaṇotsukā |
na tasyā vidyate pāpamiha loke paratra ca || 54 ||
[Analyze grammar]

parabrahmaparaḥ sādhuḥ sādhvī lakṣmīparāyaṇā |
śiṣyo gurubrahmasevī mucyate sarvapātakaiḥ || 55 ||
[Analyze grammar]

phalgutīrthādiṣu snātaḥ sarvapuṇyaphalaṃ labhet |
mamā''jñāyāṃ tu yaḥ snāto mahāpāpān samuddharet || 56 ||
[Analyze grammar]

sarvasvaṃ sādhave dadyād dadyācchrīharaye tu me |
dadyāllakṣmyai mahālakṣmyai mucyate sarvapātakaiḥ || 57 ||
[Analyze grammar]

sampado nidhirūpāśca dadyād devāya viṣṇave |
yajñārthaṃ cāpi dadyācca mucyate sarvapātakaiḥ || 58 ||
[Analyze grammar]

brahmagṛhād bahirnaiva gantavyaṃ yasya vai kvacit |
yadṛcchālābhasantoṣī spṛśyate nahi pātakaiḥ || 59 ||
[Analyze grammar]

svayaṃ duḥkhāni saṃvāhya parān sukhān karoti yaḥ |
sarvāśīrvādapātraṃ sa spṛśyate pātakairna vai || 60 ||
[Analyze grammar]

vighasāśī bhaved yastu guruprasādabhojakaḥ |
bhikṣābhojanasantuṣṭaḥ pātakaṃ nā'sya vidyate || 61 ||
[Analyze grammar]

sādhuvṛttistathā caivāyā'citavṛttiko bhavet |
yadṛcchālābhasantuṣṭaḥ spṛśyate naiva pātakaiḥ || 62 ||
[Analyze grammar]

sadā kṛṣṇakathāmagno brahmajñānaprado janaḥ |
satsaṃgabodhamiṣṭānno mucyate sarvapātakaiḥ || 63 ||
[Analyze grammar]

brahmātmā brahmavitsevī brahmiṣṭhasevitastathā |
ātmavivekavān yaḥ sa spṛśyate naiva pātakaiḥ || 64 ||
[Analyze grammar]

yathā'pekṣāgrahaścāpi yathātyāgaviḍambanaḥ |
yathādhyānarataścāpi spṛśyate naiva pātakaiḥ || 65 ||
[Analyze grammar]

iṣṭāniṣṭe tṛṣāśūnyo lābhālābhe kṣudhākṣayaḥ |
grāhyāgrāhye kriyāśūnyaḥ spṛśyate nahi pātakaiḥ || 66 ||
[Analyze grammar]

dīno vā nirdhano vāpi dhanāḍhyo nṛpatiśca vā |
yathāśakti praseveta sataḥ pāpaiḥ pramucyate || 67 ||
[Analyze grammar]

navanidhīn pradadyādvai yajñe pāpaiḥ pramucyate |
padmaṃ cāpi mahāpadmaṃ makaraṃ kacchapaṃ diśet || 68 ||
[Analyze grammar]

mukundaṃ cāpi nandaṃ ca nīlaṃ śaṃkhaṃ tathā'rpayet |
mahāśaṃkhaṃ pradadyācca mucyate sarvabandhanāt || 69 ||
[Analyze grammar]

na saṃkhyayā nidhirbodhyaḥ kintu dānena karmaṇā |
dīno'pi datvā devāya padmānidhipatirmaṃtaḥ || 70 ||
[Analyze grammar]

mahāśaṃkhadhanī vāpyadātā kadarya ucyate |
śṛṇu lakṣmi kathayāmi dātāraṃ tu nidhīśvaram || 71 ||
[Analyze grammar]

svalpavitto'pi yo dadyāt prayatnena nijaṃ dhanam |
devārthe ca makhārthe ca satyarthe yataye sate || 72 ||
[Analyze grammar]

viṣṇubhaktāya puṇyārthe brahmaniṣṭhāya sādhave |
tad dravyaṃ padmasaṃjñaṃ vai padmanidhipatirhi saḥ || 73 ||
[Analyze grammar]

svalpaṃ vā bahulaṃ dravyaṃ sarvasvaṃ vai nijaṃ dhanam |
yātrānirvāhamātraṃ tu vihāya yaḥ samarpayet || 74 ||
[Analyze grammar]

devādibhyo dhanaṃ tasya mahāpadmanidhirmatam |
sāttvikaṃ taddhanaṃ proktaṃ dātā'pi sāttviko hi saḥ || 75 ||
[Analyze grammar]

asaṃkhyaṃ paraloke'sya dhanaṃ lakṣmīḥ karoti vai |
madbhaktārthaṃ prasannātvaṃ sarvaṃ tasmai dadāsi hi || 76 ||
[Analyze grammar]

tasmād vai devabhaktānāṃ nirlobhānāmamū nidhī |
akṣayau divyanāmānau padmākṛpāprapūritau || 77 ||
[Analyze grammar]

śṛṇu vai makaraṃ vacmi dravyaṃ kleśairupārjitam |
svayaṃ svārthaparo bhuṃkte dāne dadāti naiva hi || 78 ||
[Analyze grammar]

dadyād vivṛddhaye varṣe kusīdārthaṃ pralobhavān |
navāṃ navāṃ ca maitrīṃ vai kṛtvā jīrṇāṃ vihāya tu || 79 ||
[Analyze grammar]

evaṃ dravyasya nāśo vai pūrvapūrvaiḥ prajāyate |
khaḍgabāṇādiśastrāṇāṃ saṃgrahe'pi vinaśyati || 80 ||
[Analyze grammar]

adānakaṃ svārthamātraṃ dravyaṃ tanmākaro nidhiḥ |
maraṇe sati sarvasvaṃ vinaṣṭaṃ tatparairbhavet || 81 ||
[Analyze grammar]

śṛṇu vai kacchapaṃ lakṣmi bahuyatnaiḥ samarjitam |
na bhuṃkte na dadātyeva lobhena viśvasenna ca || 82 ||
[Analyze grammar]

kṣipatyeva hi bhūgarte koṣe nirupayogi tat |
sañcite tvekapuruṣaṃ maraṇānte parairapi || 83 ||
[Analyze grammar]

rājabhiścauralokairvā hriyate kacchapaṃ hi tat |
mākaraṃ rājasaṃ proktaṃ kācchapaṃ tāmasaṃ sadā || 84 ||
[Analyze grammar]

mākaraṃ tvardhapāpaṃ ca kācchapaṃ pūrṇapāpakam |
śṛṇu lakṣmi mukundaṃ ca nidhiṃ yatnaiḥ samarjayet || 85 ||
[Analyze grammar]

kintu kośe pṛthivyāṃ vā nikṣipyā'pi punaḥ punaḥ |
uddhṛtyoddhṛtya veśyāsu nartakīgāyikāsu ca || 86 ||
[Analyze grammar]

bhāṇḍeṣu vyasane kleśe vyayaṃ karoti nityadā |
evaṃ pāpaparā sampad dravyaṃ mukundanāmakam || 87 ||
[Analyze grammar]

pāpakṛñcāpi vai bodhyo mukundakośabhṛnnidhiḥ |
śṛṇu nandaṃ nidhiṃ cāpi vakṣyāmi padmaje hi te || 88 ||
[Analyze grammar]

rajastamomahānandī hyādhāraḥ syāt kulasya vai |
sarve kuṭumbino dravyaṃ bhuñjate premabhāvataḥ || 89 ||
[Analyze grammar]

stutayaścāpi jāyante bahubhāryā bhavanti ca |
svārthārthaṃ dravyabhogaśca paropakṛtaye'pi ca || 90 ||
[Analyze grammar]

pūrvamitreṣu śaithilyaṃ prītimanyaiḥ karoti ca |
evaṃvidhaṃ nijaṃ dravyaṃ nandanidhyātmakaṃ hi tat || 91 ||
[Analyze grammar]

śṛṇu lakṣmi kathayāmi nīlaṃ nidhiṃ tathottaram |
nīlena svadhanenāpi sāttviko vai bhavet sadā || 92 ||
[Analyze grammar]

vastradhānyādisaṃgrāhī taḍāgādi karoti ca |
tripauruṣo nidhiścāyaṃ tvāmrārāmādi kārayet || 93 ||
[Analyze grammar]

dharmakāryaṃ karotyevodyānaṃ dadāti viṣṇave |
śaṃkhaṃ nidhiṃ kathayāmi śṛṇu lakṣmi vipatpradam || 94 ||
[Analyze grammar]

ekasyaiva dhanaṃ śaṃkhaḥ svayaṃ bhuṃkte dhanāntakam |
na kulaṃ na ca vaṃśo'pi bhuṃkte yasya dhanaṃ rame || 95 ||
[Analyze grammar]

kadannabhuk parijano na ca śobhanavastradhṛk |
svārthapoṣaṇamātrecchurdadyātparanare vṛthā || 96 ||
[Analyze grammar]

śṛṇu lakṣmi mahāśaṃkhaṃ nidhiṃ bhogārthameva na |
pareṣveva hi vartante dhanāni na gṛhe manāk || 97 ||
[Analyze grammar]

evaṃ bodhyā hi nidhayo jñātvā tān vyayamācaret |
tīrthadevasatāṃ kārye sarvapāpaiḥ pramucyate || 98 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne sarvamahāpāpādināśopāyānāṃ nirūpaṇaṃ navanidhīnāṃ dhanaviniyogādiprayojyanāmakatvaṃ ceti kathananāmā ekapañcāśadadhikaśatatamo'dhyāyaḥ || 151 ||
[Analyze grammar]