Chapter 152

śrīpuruṣottama uvāca |
śṛṇu nārāyaṇīśri tvaṃ pāpoddhārakarān sutān |
dharmasya balayuktān vai yadāśrayena mokṣaṇam || 1 ||
[Analyze grammar]

dharmadevāttu kāmaṃ vai śraddhā tu suṣuve sutam |
madarthaṃ yojitaḥ kāmo mokṣāya parikalpate || 2 ||
[Analyze grammar]

dharmadevāttu darpaṃ vai śrīḥ putraṃ suṣuve śubham |
madarthaṃ yojito darpo mokṣāya parikalpate || 3 ||
[Analyze grammar]

dharmadevāttu niyamaṃ dhṛtistu suṣuve sutam |
madarthaṃ yojitaścāyaṃ mokṣāya parikalpate || 4 ||
[Analyze grammar]

dharmadevāttathā tuṣṭiḥ santoṣaṃ suṣuve sutam |
madarthaṃ yojitaścā'yaṃ mokṣāya parikalpate || 5 ||
[Analyze grammar]

dharmadevāttathā puṣṭirlobhaṃ tu suṣuve sutam |
madarthaṃ yojito lobho mokṣāya parikalpate || 6 ||
[Analyze grammar]

dharmadevāttathā medhā śrutaṃ tu suṣuve sutam |
madarthaṃ yojitaścāyaṃ mokṣāya parikalpate || 7 ||
[Analyze grammar]

dharmadevāttathā putraṃ daṇḍaṃ tu suṣuve kriyā |
madarthaṃ yojito daṇḍo mokṣāya parikalpate || 8 ||
[Analyze grammar]

daṇḍānujaṃ nayaṃ cāpi vinayaṃ ca nayā'nujam |
trayaste yojitā matto mokṣāyaite bhavanti vai || 9 ||
[Analyze grammar]

dharmadevāttathā buddhirbodhaṃ tu suṣuve sutam |
madarthaṃ yojito bodho mokṣāya parikalpate || 10 ||
[Analyze grammar]

dharmadevāttathā lajjā sunayaṃ suṣuve sutam |
sunayo yojitaḥ kṛṣṇe mokṣāya parikalpate || 11 ||
[Analyze grammar]

dharmadevāttathā vapurvyavasāyamasūyata |
madarthaṃ vyavasāyaśca yojito mokṣado bhavet || 12 ||
[Analyze grammar]

dharmadevāttathā śāntiḥ kṣemaṃ tu suṣuve sutam |
madarthaṃ yojitaḥ kṣemo mokṣāya parikalpate || 13 ||
[Analyze grammar]

dharmadevāttathā siddhiḥ sukhaṃ tu suṣuve sutam |
sukhastu yojitaḥ kṛṣṇe mokṣāya parikalpate || 14 ||
[Analyze grammar]

dharmadevāttathā kīrtiḥ suṣuve ca yaśaḥ sutam |
yaśaḥ saṃyojitaṃ kṛṣṇe mokṣāya parikalpate || 15 ||
[Analyze grammar]

dharmapautrāśca vai sarve madarthaṃ yadi yojitāḥ |
te sarve'pi tu mokṣāya bhavanti pāpanāśakāḥ || 16 ||
[Analyze grammar]

kāmaputro mahānando harṣaputro'timānakaḥ |
niyamasya virāmastu santoṣasya tu tarpaṇaḥ || 17 ||
[Analyze grammar]

lobhasya sañcayaḥ putraḥ śrutasya nirṇayaḥ sutaḥ |
daṇḍasya kṛcchrasaṃjñaśca nayasya vardhanaḥ sutaḥ || 18 ||
[Analyze grammar]

vinayasya sutaścābhyudayo bodhasya śantanuḥ |
sunayasya sutastejo vyavasāyasya āyakaḥ || 19 ||
[Analyze grammar]

kṣemasya rakṣaṇaṃ putraḥ sukhasya modasaṃjñakaḥ |
yaśasaścotsavaḥ putraḥ pautrā dharmasya vai mayi || 20 ||
[Analyze grammar]

yojitā mokṣadāḥ sarve pāpānāṃ nāśakā rame |
satāṃ yogena yoktavyā divyāste tārayanti vai || 21 ||
[Analyze grammar]

śṛṇu lakṣmi pāpadān vai puṇyakṣayakarānapi |
adharmasya sutān duṣṭakriyācārapravartakān || 22 ||
[Analyze grammar]

hiṃsā patnī tvadharmasya tasyāṃ jajñe'nṛtaṃ sutaḥ |
asatyamanṛtaṃ proktaṃ duḥkhadaṃ pāpakāri tat || 23 ||
[Analyze grammar]

tasya svasā nirṛtiśca tatsutau narakaṃ bhayam |
māyā ca vedanā ceti kanyake dve tathā mate || 24 ||
[Analyze grammar]

māyāsutastathā mṛtyuḥ sarvabhūtāpahārakaḥ |
vedanāyāḥ sutaścāpi duḥkhākhyaḥ samajāyata || 25 ||
[Analyze grammar]

mṛtyorvyādhijarāśokatṛṣṇākrodhāśca jajñire |
nirṛtiḥ saṃprajajñe ca vināśaṃ duḥsahaṃ sutam || 26 ||
[Analyze grammar]

brahmā tu nirṛteḥ putraṃ duḥsahaṃ kṣudhitaṃ kṛśam |
kākasvanaṃ nimnamukhaṃ samuvāca vaco hitam || 27 ||
[Analyze grammar]

mā tvaṃ khāda jagaccedaṃ vṛttiṃ dadāmi te suta |
adhārmikasya vāsaste vāso bhavatu sarvadā || 28 ||
[Analyze grammar]

paryuṣitaṃ sakīṭaṃ ca tathā śvabhiravekṣitam |
bhagnabhāṇḍagataṃ cāpi mukhavātopasaṃhatam || 29 ||
[Analyze grammar]

ucchiṣṭaṃ svinnamevāpi cā'valīḍhamasaṃskṛtam |
udakyopahataṃ bhuktamudakyā tava tad bhavet || 30 ||
[Analyze grammar]

aśraddhayā hutaṃ dattamasnātairyadavajñayā |
tyaktaṃ duṣṭaṃ ca sarvaṃ te mayā yakṣa samarpitam || 31 ||
[Analyze grammar]

paṃktibhede ca kapaṭe pākabhede pratāraṇe |
kalahe ca kumele ca bhavitā vasatistava || 32 ||
[Analyze grammar]

apoṣyamāṇe vṛddhe ca baddhe gavi hyapoṣite |
bālānāṃ poṣaṇahīne gṛhe vāsaḥ sadā tava || 33 ||
[Analyze grammar]

vṛthopavāsino martyān dyūtastrīvyasanasthitān |
baiḍālavṛttikāṃścāpi śaṭhānabhibhaviṣyasi || 34 ||
[Analyze grammar]

duḥkhadānāṃ tu pāpānāṃ tathā viśvāsaghātinām |
śaraṇārthiviruddhānāṃ gṛhe vāsaḥ sadā tava || 35 ||
[Analyze grammar]

tvayā gehe nirdaye vai sadā stheyaṃ hi duḥsaha |
na stheyaṃ dhārmike gehe devagehe kadācana || 36 ||
[Analyze grammar]

yaḥ saṃskṛtādo vidhinā śucirantastathā bahiḥ |
alolupo jitakāmastadgehaṃ cāpavarjaya || 37 ||
[Analyze grammar]

yatra maitrī gṛhe bālavṛddhayoṣinnareṣu ca |
tathā svajanavargeṣu gṛhaṃ taccāpi varjaya || 38 ||
[Analyze grammar]

yoṣito'bhiratā yatra na bahirgamanotsukāḥ |
lajjānvitāḥ sadā gehaṃ yakṣa tatparivarjaya || 39 ||
[Analyze grammar]

vayaḥsambandhayogyāni śayanānyaśanāni ca |
yatra gehe satāṃ sevā tadgṛhaṃ tvaṃ vivarjaya || 40 ||
[Analyze grammar]

yatra kāruṇikā nityaṃ sādhukarmasvavasthitāḥ |
sāmānyopaskarairyuktāstadgṛhaṃ saṃvivarjaya || 41 ||
[Analyze grammar]

yatrāsanasthāḥ sahasottiṣṭhanti gurusannidhau |
vṛddhānāṃ sannidhau cāpi tadgṛhaṃ saṃvivarjaya || 42 ||
[Analyze grammar]

tarugulmādibhirdvāraṃ na viddhaṃ yasya veśmanaḥ |
udyānaśobhaṃ bhavanaṃ śreyastatparivarjaya || 43 ||
[Analyze grammar]

yatra puṃsāṃ marmabhedo jāyate na dhvanirgṛhe |
vāṇī vā tādṛśī nāsti tadgṛhaṃ parivarjaya || 44 ||
[Analyze grammar]

devatāpitṛmartyānāmatithīnāṃ ca pūjanam |
tatprasādāśanaṃ yatra tadgṛhaṃ parivarjaya || 45 ||
[Analyze grammar]

satyavākyān kṣamāśīlānahiṃsrānnānutāpinaḥ |
puruṣānpramadāścāpi tyajethāścā'nasūyakān || 46 ||
[Analyze grammar]

bhartṛśuśrūṣaṇe yuktāmasatstrīsaṃgavarjitām |
kuṭumbabhartṛśeṣānnapuṣṭāṃ ca tyaja yoṣitam || 47 ||
[Analyze grammar]

brāhmaṇaṃ vedavijñānaṃ sāttvikaṃ devapūjakam |
adhvarādiparaṃ tuṣṭaṃ śāntaṃ tyaja sadā śubham || 48 ||
[Analyze grammar]

kṣatriyaṃ rakṣakaṃ cāpi dātāraṃ dharmamārgagam |
nyāyamātraparaṃ bhaktaṃ tyaja duḥsaha sadbalam || 49 ||
[Analyze grammar]

vaiśyaṃ tu vyavasāyasthaṃ satyadharmaparāyaṇam |
ahiṃsakaṃ dānaparaṃ bhaktaṃ gosevakaṃ tyaja || 50 ||
[Analyze grammar]

śūdraṃ sevāparaṃ bhaktaṃ śāntiṃ niṣkapaṭaṃ tyaja |
patnī patiryatra ratau parasparasahāyinau || 51 ||
[Analyze grammar]

dharmaparau mokṣaparau tadgṛhaṃ sarvathā tyaja |
yatra putro guroḥ pūjāṃ devānāṃ ca tathā pituḥ || 52 ||
[Analyze grammar]

patnī ca bhartuḥ kurute tatra duḥsaha mā vasa |
prātaḥ sāyaṃ kṛtalepaṃ devapūjābhisaṃskṛtam || 53 ||
[Analyze grammar]

gṛhaṃ satāṃ pādapūtaṃ na tvaṃ śaknoṣi vīkṣitum |
bhāskarā'dṛṣṭaśayyāni nityāgnisalilāni ca || 54 ||
[Analyze grammar]

sūryāvalokadīpāni dānadvārarddhimanti ca |
satāṃ prasādapātrāṇi lakṣmyā gehāni bhājanam || 55 ||
[Analyze grammar]

yatra nārāyaṇaścāpi lakṣmīścāpi prapūjyate |
yatra vai sādhavaḥ sādhvyastatrā'lakṣmībhayaṃ kutaḥ || 56 ||
[Analyze grammar]

yatrokṣā candanaṃ vīṇā ādarśo madhusarpiṣī |
miṣṭājyatāmrapātrāṇi tadgṛhaṃ na tavāśrayaḥ || 57 ||
[Analyze grammar]

yatra kaṇṭakino vṛkṣā yatra mādakavallikāḥ |
bhāryā vivāhaśūnyā ca valmīka tatra saṃvasa || 58 ||
[Analyze grammar]

yatra gṛhe narāḥ pañca strītrayaṃ gotrayaṃ tathā |
andhakāro niragniśca tadgrahaṃ vasatistava || 59 ||
[Analyze grammar]

ekacchāgaṃ dvivāleyaṃ trigavaṃ pañcamāhiṣam |
ṣaḍaśvaṃ saptamātaṃgaṃ gṛhaṃ śoṣaya duḥsaha || 60 ||
[Analyze grammar]

kuddāladātrapitakaṃ tadvat sthālyādi bhājanam |
sarvāṇyupakaraṇāni musalolūkhalau tathā || 61 ||
[Analyze grammar]

strīṇāṃ khaṭvī tathā cānyat kṣiptaṃ yatra ca tatra ca |
amārjitaṃ ca malinaṃ gṛhaṃ tava pratiśrayam || 62 ||
[Analyze grammar]

musalolūkhale strīṇāmāsanaṃ cāpyudumbare |
avaskare mantraṇaṃ ca tadgṛhe vasa duḥsaha || 63 ||
[Analyze grammar]

laṃghyante yatra dhānyāni pakvā'pakvāni veśmani |
tadvacchātrāṇi tatra tvaṃ yatheṣṭaṃ cara duḥsaha || 64 ||
[Analyze grammar]

sthālīpidhāne yatrāgnirdatto darvīphalena vā |
gṛhe tatra hi riṣṭānāmaśeṣāṇāṃ samāśrayaḥ || 65 ||
[Analyze grammar]

mānuṣāsthi gṛhe yasya divārātraṃ mṛtasthitiḥ |
tatra duḥsaha vāsaste tathā'nyeṣāṃ ca rakṣasām || 66 ||
[Analyze grammar]

yatra padmamahāpadmau yuvatī modakāśinī |
vṛṣabhairāvatau yatra tadgṛhaṃ tyaja sarvathā || 67 ||
[Analyze grammar]

aśastrā devatā yatra saśastraścā'havaṃ vinā |
kalpyante manujairarcyāstat parityaja mandiram || 68 ||
[Analyze grammar]

paurajānapadā yatra prākprasiddhamahotsavāḥ |
kriyante pūrvavadgehe tatra gṛhe na saṃvasa || 69 ||
[Analyze grammar]

śūrpavātaghaṭo'mbhobhiḥ snānaṃ vastrāmbuvipruṣaiḥ |
nakhāgrasalilaiścāpi tān yāhi hatalakṣaṇān || 70 ||
[Analyze grammar]

deśācārayutaṃ jñātidharmayutaṃ ca sotsavam |
japahomaparaṃ devamaṃgaleṣṭiyutaṃ gṛham || 71 ||
[Analyze grammar]

śaucācārayute lokaśasyaṃ pūjyaṃ sadāśrayam |
gṛhaṃ mā spṛśa tatratyān mā vilokaya duḥsaha || 72 ||
[Analyze grammar]

ityevaṃ duḥsahasyādau lakṣmi brahmā dadau gṛham |
nivāsārthaṃ hyadharmasya sahayug duḥsaho'bhavat || 73 ||
[Analyze grammar]

duḥsahasyā'bhavadbhāryā malinīnāma nāmataḥ |
kaliputrī kalahajñā kleśadharmāvalambinī || 74 ||
[Analyze grammar]

tasyāḥ putrā aṣṭasaṃkhyāḥ kanyāścāṣṭau bhayapradāḥ |
dantākṛṣṭistathoktiśca parivartastṛtīyakaḥ || 75 ||
[Analyze grammar]

aṅgadhṛk śakuniścāpi gaṇḍaprāntaratistathā |
garbhahā sasyahā ceti kanyānāmānyapi śṛṇu || 76 ||
[Analyze grammar]

niyojikā tu prathamā dvitīyā tu virodhinī |
svayaṃhārakarī cāpi bhrāmaṇī ṛtuhāriṇī || 77 ||
[Analyze grammar]

smṛtihantrī bījahantrī vidveṣiṇī tathā'ṣṭamī |
bhayadāstāstadeteṣāṃ tāsāṃ kāryāṇi me śṛṇu || 78 ||
[Analyze grammar]

dantākṛṣṭiḥ prasūtānāṃ bālānāṃ daśanasthitaḥ |
karoti sa jvarotpādaṃ tacchāntiḥ sitasarṣapaiḥ |
śayanasyoparikṣiptaiḥ kṣaumavastravidhāraṇāt || 79 ||
[Analyze grammar]

tathoktināmako vakti duḥsahasyā'stu saṃsthitiḥ |
tacchāntyarthaṃ tu māṃgalyaṃ kīrtanīyo janārdanaḥ || 80 ||
[Analyze grammar]

parivartaḥ karotyeva garbhāṇāṃ parivartanam |
rakṣāṃ kurvīta rakṣoghnamantraiśca sitasarṣapaiḥ || 81 ||
[Analyze grammar]

aṅgadhṛk sphuraṇaṃ duṣṭaṃ cāṃgānāṃ prakaroti vai |
kuśaistasyāṃkasaṃsparśānnivṛttirjāyate tadā || 82 ||
[Analyze grammar]

kākādipakṣisaṃsthaśca śakuniḥ śakunaṃ sadā |
karoti duṣṭamevā'tra kāryatyāgo nivartanam || 83 ||
[Analyze grammar]

gaṇḍakālakṣaṇānte ca gaṇḍaprānto vasatyapi |
sarvārambhān prahantyeva devastutyā nivāraṇam || 84 ||
[Analyze grammar]

gomūtrasarṣapasnānaistadṛkṣagrahapūjanaiḥ |
dhamotsavādikaraṇairgaṇḍavān yāti vai layam || 85 ||
[Analyze grammar]

garbhahā garbhanāśī vai nityaṃ śaucād vinaśyati |
daivamālyādirakṣādimantrebhyaḥ sa tu naśyati || 86 ||
[Analyze grammar]

sasyahā kṣetrabhūbhāge sasyarddhimupahanti ca |
tasmād rakṣāṃ prakurvīta jīrṇopānadvidhāraṇāt || 87 ||
[Analyze grammar]

tathā'pasavyagamanāccāṇḍālasya praveśanāt |
bahirbalipradānācca satāṃ caraṇavāsanāt || 88 ||
[Analyze grammar]

cauryavyavāyamadyādau niyojikā tu mānavān |
niyojayati tacchāntiṃ kuryāt sādhusamāgamāt || 89 ||
[Analyze grammar]

dīkṣādigrahaṇāddharmād vratāttīrthaniṣevaṇāt |
virodhinī kurute vai dampatyośca virodhanam || 90 ||
[Analyze grammar]

bandhūnāṃ suhṛdāṃ pitroḥ putraiḥ parasparaṃ sadā |
tasyāḥ śāntiṃ prakurvīta śāstrācāraniṣevaṇāt || 91 ||
[Analyze grammar]

svayaṃhārakarī kanyā dhānyaṃ khalāddharatyapi |
gobhyaḥ payastathā sarpiḥ payaso'pi haratyapi || 92 ||
[Analyze grammar]

samṛddhimṛddhimaddravyādapahanti mahānasāt |
ardhasiddhaṃ tathā'nnaṃ ca yadannāgārasaṃsthitam || 93 ||
[Analyze grammar]

saṃpariveṣitaṃ cānnaṃ sā'rdha bhuṃkte ca bhuṃjatā |
uccheṣaṇa manuṣyāṇāṃ haratyannaṃ hi sā tathā || 94 ||
[Analyze grammar]

karmāntāgāraśālābhyaḥ siddharddhiṃ sā haratyapi |
gostrīstanebhyaśca payaḥ kṣīrahartrī tadaiva sā || 95 ||
[Analyze grammar]

dadhno ghṛtaṃ tilāttailaṃ surāgārāt tathā surām |
rāgaṃ kusuṃbhakādīnāṃ kārpāsāt sūtramityapi || 96 ||
[Analyze grammar]

tacchāntyarthaṃ prakuryācca dvandvaṃ śikhaṇḍinoḥ śubham |
kṛtrimāṃ ca striyaṃ tatra gṛhe nyaset sthale'pi ca || 97 ||
[Analyze grammar]

rakṣāmantraṃ tathā lakṣmyā rakṣāmantraṃ samuccaret |
lakṣmi lakṣmi mahālakṣmi lalite kambhare sati |
hārikāṃ hana duṣṭāṃ tvaṃ hārikā nāśametu ca || 98 ||
[Analyze grammar]

iti prārthya gṛhe bhasma sthale goṣṭhe nidhāpayet |
homāgnidevatādhūpabhasmādibhirvinaśyati || 99 ||
[Analyze grammar]

udvegaṃ janayatyanyā hyekasthānanivāsinaḥ |
puruṣasya tu duḥkhadā bhrāmaṇī sā bhavatyapi || 100 ||
[Analyze grammar]

tasyātha rakṣāṃ kurvīta vikṣiptaiḥ sitasarṣapaiḥ |
āsane śayane corvyāṃ yatrāste sa tu mānavaḥ || 101 ||
[Analyze grammar]

atha puṣpaṃ haratyanyā strīṇāṃ sā ṛṇahāriṇī |
kurvīta tīrthadevaukaścaityaparvatasānuṣu || 102 ||
[Analyze grammar]

nadīsaṃgamakhāteṣu snapanaṃ tatpraśāntaye |
cikitsāśaḥ prayuñjīta varauṣadhamṛtupradam || 103 ||
[Analyze grammar]

smṛtiṃ harati nārīṇāṃ narāṇāṃ smṛtihā hi sā |
viviktadeśasevitvācchrīharerbhajanāttathā || 104 ||
[Analyze grammar]

snigdhabhojanapānāñca tasyāścopaśamo bhavet |
bījāhāpariṇī cā'nyā vīryaṃ rajo haratyapi || 105 ||
[Analyze grammar]

hareḥ prasādamedhyānnabhojanaistīrthayātrayā |
tasyāścopaśamaḥ prokto haste kāmaphaladhṛteḥ || 106 ||
[Analyze grammar]

dveṣiṇī dveṣamādadhyācchāntyarthaṃ juhuyāttilān |
madhukṣīravṛtāktāṃśca mitravindeṣṭimācaret || 107 ||
[Analyze grammar]

eteṣāṃ tu kumārāṇāṃ kanyakānāṃ ca padmaje |
anyānyapi hyapatyāni vacmi nāmakriyādikam || 108 ||
[Analyze grammar]

dantākṛṣṭeḥ kanyake dve vijalpā kalahā tathā |
ubhe kleśaprade śāntiḥ kartavyā homakarmaṇā || 109 ||
[Analyze grammar]

dūrvāṃkurānmadhughṛtakṣīrāktān balikarmaṇi |
vikṣipejjuhuyāccaivānalaṃ mitraṃ ca kīrtayet || 110 ||
[Analyze grammar]

tathokteḥ kālajihākhyaḥ putro'sādhūn prabādhate |
parivartasutau dvau tu virūpavikṛtau rame || 111 ||
[Analyze grammar]

tau tu vṛkṣāgraparikhāprākārāṃ'bhodhisaśrayau |
garbhahānikarau tasmād garbhiṇī nā'bhirohayet || 112 ||
[Analyze grammar]

vṛkṣamaṭṭaṃ parikhāṃ ca prākāraṃ ca mahodadhim |
aṅgadhṛgaḥ suto lakṣmi piśuno nāma nāmataḥ || 113 ||
[Analyze grammar]

so'sthimajjāgataḥ puṃsāṃ balamarttyajitātmanām |
śakuneḥ pañcaputrāśca śyenaḥ kākaḥ kapotakaḥ || 114 ||
[Analyze grammar]

gṛdhraścolūka ityete śyeno mṛtyuprado mataḥ |
kaḥ kālakaraścāpi hyulūko rākṣasapradaḥ || 115 ||
[Analyze grammar]

gṛddho vyādhipradaścāpi kapoto yamamārgadaḥ |
tasya śyenādayo yasya nilīyeyuḥ śirasyatha || 116 ||
[Analyze grammar]

narastadvarjayed gehaṃ kapotākrāntamastakam |
śyenaḥ kapoto gṛdhraśca kākolūkau gṛhe rame || 117 ||
[Analyze grammar]

praviṣṭaḥ kathayedantaṃ vasatāṃ tatra veśmani |
svapne'pi hi kapotāderdarśanaṃ nahi śasyate || 118 ||
[Analyze grammar]

gaṇḍaprāntarateḥ putrā rājasvalyanivāsinaḥ |
śrāddhaparvanivāsāśca nābhigacchettadā striyam || 119 ||
[Analyze grammar]

garbhahasya suto nighno mehinī cāpi kanyakā |
praviśya garbhamattyeko bhuktvā mohayate'parā || 120 ||
[Analyze grammar]

jāyante bālakāstasmānmaṇḍukāḥ kacchapāḥ sṛpāḥ |
purīṣaṃ vā bhavatyeva tasmād garbhavatī satī || 121 ||
[Analyze grammar]

śmaśānakaṭabhūmiṃ catuṣpathaṃ varjayenniśi |
vṛkṣacchāyāṃ varjayeccottarīyaṃ na parityajet || 122 ||
[Analyze grammar]

śasyahasya sutaścaikaḥ kṣudrako hanti ṛddhikām |
amaṃgalyadine vaptuḥ kṣetraṃ phalati naiva ha || 123 ||
[Analyze grammar]

niyojikāyāḥ kanyāśca mattonmattā pramattikā |
navā ceti viśantyetā nāśāya sarvadehinām || 124 ||
[Analyze grammar]

adharmādyairyojayanti parastrīnarasaṃgame |
virodhinyāstrayaḥ putrā nodako grāhakastathā || 125 ||
[Analyze grammar]

tamaḥpracchādakaśceti hyācāravarjite gṛhe |
paiśunyaṃ kurute tvādyo gṛhṇāti grāhako hi tat || 126 ||
[Analyze grammar]

tṛtīyastamasā krodhaṃ janayantyatiduḥkhadāḥ |
svayaṃhāryāstrayaḥ putrāścauryeṇa janitā rame || 127 ||
[Analyze grammar]

sarvahāryardhahārī ca vīryahārī tathaiva ca |
anācāragṛhe kleśagṛhe vasanti te sadā || 128 ||
[Analyze grammar]

bhrāmaṇyāḥ kākajaṃghākhyaḥ putro dharmavivarjite |
ramate gāyati cāpi bhunakti hāsyameti ca || 129 ||
[Analyze grammar]

kanyātrayaṃ ca kucahā vyaṃjanahā ca jātahā |
yasyā na kriyate lokaḥ samyag vaivāhiko vidhiḥ || 130 ||
[Analyze grammar]

kālātīto'thavā tasyā haratyekā kucadvayam |
vṛddhiśrāddhamadatvā ca tathā'narcya ca mātaram || 131 ||
[Analyze grammar]

vivāhitāyāḥ kanyāyā harati vyaṃjanaṃ parā |
tṛtīyā tvamvagnimadhye vidhūpe sūtikāgṛhe || 132 ||
[Analyze grammar]

adīpaśastramusalebhūtisarṣapavarjite |
praviśya jātamapatyaṃ harate tadvinaśyati || 133 ||
[Analyze grammar]

sā jātahāriṇī nāma sughorā piśitāśanā |
tasmāt surakṣaṇaṃ kāryaṃ yatnataḥ sūtikāgṛhe || 134 ||
[Analyze grammar]

smṛtihāputrako nāmnā pracaṇḍaścā'ttukāmanaḥ |
līkāśca caṇḍaputrāste sarve cāṇḍālayonayaḥ || 135 ||
[Analyze grammar]

līkāstvadharmavaṃśaṃ vai vāsayanti haranti ca |
bījahā bījanāśārthaṃ yatate śuddhivarjite || 136 ||
[Analyze grammar]

vidveṣiṇīsutau puṃsāmapakāraprakāśakau |
ekastu svaguṇān loke prakāśayati pāpyapi || 137 ||
[Analyze grammar]

dvitīyastu guṇān maitrīṃ lokasthāmapakarṣati |
ityete dausahāḥ sarve yaiḥ prajāḥ kaṣṭamāpnuyuḥ || 138 ||
[Analyze grammar]

teṣāṃ śāntiḥ prakartavyā tattadbalikriyā'rhaṇaiḥ |
makhai raudrairvaiṣṇavaiśca daivairbhautaiśca cāṇḍikaiḥ || 1301 ||
[Analyze grammar]

hareḥ sampūjanairbhaktyā vratairārādhanairapi |
satāṃ sevāviśeṣaiśca camatkārisadarhaṇaiḥ || 140 ||
[Analyze grammar]

ityevaṃ kathitaṃ lakṣmi pāṣānāṃ pāpanāśanam |
śāntyādikarmabhiścāpi prasaṃgād riṣṭakāni ca || 141 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne dharmavaṃśavarṇanamadharmavaṃśavarṇanaṃ duḥsahasya nivāsasthānāni duḥsahavaṃśānāmupadravādivarṇanamityādinirūpaṇanāmā dvāpañcāśadadhikaśatatamo'dhyāyaḥ || 152 ||
[Analyze grammar]