Chapter 143

śrīnārāyaṇīśrīruvāca |
parameśa kṛpāsindho kṛte dharmāḥ pṛthagvidhāḥ |
tretāyāṃ ca tato'pyanye bhavatā pūrvamīritāḥ || 1 ||
[Analyze grammar]

dvāpare kīdṛśāḥ santi yatra lokāśca śraddhayā |
pravartamānā dharmārthakāmamokṣān prayanti vai || 2 ||
[Analyze grammar]

mantrānnāmāni bhaktiṃ ca kurvāṇāste kathaṃvidhāḥ |
satyahīnā api muktiṃ vrajiṣyanti divaṃ ca vā || 3 ||
[Analyze grammar]

śrīpuruṣottama uvāca |
śṛṇu nārāyaṇīśri tvaṃ satyadharmāstu muktidāḥ |
tretādharmāḥ svabhāvātta mahaiśvaryapradatvataḥ || 4 ||
[Analyze grammar]

pradadatyaiśvarān lokān bhaumavairājavaiṣṇavān |
dvāparasya vṛṣā lakṣmi nikṛṣṭā kalmaṣaspṛśaḥ || 5 ||
[Analyze grammar]

tannāśārthaṃ kṛṣṇarūpo bhavāmi dvāpare muhuḥ |
mama yogena pāpā vai taranti sādhusaṃgamāt || 6 ||
[Analyze grammar]

śṛṇu dvāparadharmāṇi hrāsaṃ gatāni pūrvataḥ |
yatra bhaktipradhānā vai taranti netare janāḥ || 7 ||
[Analyze grammar]

tretāsiddhayaḥ sarvāstu naśyanti dvāpare yuge |
lobhau dhairyarahitatvaṃ vāṇijyaṃ kapaṭānvitam || 8 ||
[Analyze grammar]

atattvaniścayaścāpi varṇānāṃ dhvaṃsa ityapi |
viparyayastu sarveṣu karmaṇāṃ svasvayoginām || 9 ||
[Analyze grammar]

yātrā vadhaḥ paro daṇḍo māno darpo balaṃ kṣatiḥ |
akṣamā ca rajastamo bhūyo dvāparake yuge || 10 ||
[Analyze grammar]

āśramāścāpi dharmārthāḥ saṃkīryante vṛṣā'varāḥ |
śrutiśāstreṣu vaimatyaṃ bahutarkakṛtārthatā || 11 ||
[Analyze grammar]

dvaidhamutpadyate tena niścayo nādhigamyate |
anirṇītārthayogena dharmatattvaṃ hasatyapi || 12 ||
[Analyze grammar]

vaimatyena kṛto dharmo vyākūlaścāvasīdati |
vedaścaturdhā kṛṣṇena vyāsena vyasyate tataḥ || 13 ||
[Analyze grammar]

ṛṣiputraiḥ punarvedā bhidyante dṛṣṭivibhramaiḥ |
saṃhitā nūtanāścāpi jāyante tu maharṣibhiḥ || 14 ||
[Analyze grammar]

dvāpareṣu pravartante bhinnārthaistaiḥ svadarśanaiḥ |
evamādhvaryavaṃ karma prasthānairvividhaistataḥ || 15 ||
[Analyze grammar]

vikalpaiḥ saṃkṣayaiścāpi gauṇairmukhyaiḥ prakāṇḍakaiḥ |
vibhinnaguṇakaṃ tatra tatra deśe pravartate || 16 ||
[Analyze grammar]

evaṃ śraddhā ca viśvāso dhāraṇā bhāvanā'rhaṇā |
naśyanti kālayogena satyaṃ cāpi vinaśyati || 17 ||
[Analyze grammar]

niyāmyatvaṃ sthitiścātra nītirnaśyanti chadminī |
kāpaṭyaṃ cāpyasatyaṃ ca pratāritvaṃ vivardhate || 18 ||
[Analyze grammar]

evaṃ viparyayotpannā kudṛṣṭirdvāpare bhavet |
maraṇaṃ vighnajātāni jāyante ca muhurmuhuḥ || 19 ||
[Analyze grammar]

upadravā vyādhayaśca cintāścākasmikodbhavāḥ |
viṣayābhisandhayaśca jāyante dvāpare'dhikāḥ || 20 ||
[Analyze grammar]

vṛkṣagulmauṣadhayaśca prasahya tu yathābalam |
svakīyāśca prakurvanti prajāstu dvāpare tadā || 21 ||
[Analyze grammar]

oṣadhayo vilokyaitat praviṣṭāstu dharāṃ prati |
phālakṛṣṭāḥ prarohanti dvāpare vai tataḥ param || 22 ||
[Analyze grammar]

madhye tu dvāpare tatra nārohantyoṣadhīgaṇāḥ |
vinā bījaṃ tadā bījakṛṣiḥ samantato bhavet || 23 ||
[Analyze grammar]

bījaṃ mūlaṃ ca śākhāṃ ca kandaṃ daṇḍaṃ ca nālakam |
phalaṃ patraṃ mañjarīṃ ca granthiṃ tadaṃkuraṃ ca vā || 24 ||
[Analyze grammar]

jaṭāṃ tvacaṃ ca kāṇḍaṃ ca ropayanti tadā kṣitau |
tadvaṃśā oṣadhayastā jāyante dvāpare tataḥ || 25 ||
[Analyze grammar]

jīvikā tadadhīnā ca sarveṣāṃ jāyate tadā |
vyāpārāścauṣadhīnāṃ ca jāyante dvāpare tataḥ || 26 ||
[Analyze grammar]

anyathā jīvitaṃ tāsāṃ nāsti tretāyugātyaye |
vārtāvṛttiṃ kṛṣiṃ cāpi vāṇijyaṃ cāśrayanti te || 27 ||
[Analyze grammar]

hastodbhavā āpaścāpi bhavanti bhūkhanestadā |
kūpāśca dīrghikāścāpi pravartante tadā'bhitaḥ || 28 ||
[Analyze grammar]

svatvayuktā balinaśca prajāyante'dhipāstadā |
durbalā janahīnāśca svatvahīnā bhavanti ca || 29 ||
[Analyze grammar]

luṭyante balibhirvṛkṣavallīprabhṛtijīvikāḥ |
striyaḥ kṣetrāṇi putryaśca sutā dhanāni dhenavaḥ || 30 ||
[Analyze grammar]

maryādāyāḥ pratiṣṭhārthaṃ brahmā kṣatraṃ mahābalam |
kṣatāt trātuṃ prajāmūrdhni sthāpayatyeva bhūbhṛtam || 31 ||
[Analyze grammar]

varṇāśramapratiṣṭhāṃ ca karoti nirbhayāṃ tadā |
avṛṣṭirmaraṇaṃ vyādhiḥ pravartante'bhitastadā || 32 ||
[Analyze grammar]

dharmasargo yathā cāste tathā cā'dharmasargakaḥ |
samatulo dvāpare vai mānaveṣu pravartate || 33 ||
[Analyze grammar]

ardhadvāparaparyantaṃ tretādharmāḥ kvacit kvacit |
vidyante te'pi naśyanti dvāparārdhe gate sati || 34 ||
[Analyze grammar]

satyaṃ cānṛtasahitaṃ cā'steyaṃ steyamiśritam |
ahiṃsā hiṃsayā miśrā śīlaṃ duḥśīlayojitam || 35 ||
[Analyze grammar]

parigraho lobhayukto nītiranyāyasaṃspṛśā |
śaucaṃ cā'śaucasaṃspṛṣṭaṃ santoṣastṛṣṇikānvitaḥ || 36 ||
[Analyze grammar]

tapaḥ praśaṃsāsaṃbhinnaṃ svādhyāyo dhanakāmanaḥ |
īśadhyānaṃ kaṣṭanāśārthakaṃ bhaktirnijārthikī || 37 ||
[Analyze grammar]

sutadārādikaṃ cārdhasvārthaṃ cārdhavṛṣārthakam |
bhṛtyāstathāvidhāścārdhasvārthāścārdhaparārthakāḥ || 38 ||
[Analyze grammar]

rājāno'pi nijasyā'rdhasvārthāścārdhaparārthakāḥ |
ṛṣayopi tathā cārdhasvārthatapaḥparāyaṇāḥ || 39 ||
[Analyze grammar]

dvāpare samprajāyante sambandhāścārdhanaijikāḥ |
dharmakāryāṇi yajñāśca svārdhārthasādhakārthakāḥ || 40 ||
[Analyze grammar]

vṛṣṭyā cārdhaṃ kūpajalairardhaṃ bhojyānnamīyate |
dvāparottarabhāge vai niścitāyurna vidyate || 41 ||
[Analyze grammar]

vṛddhe jīvati putrādyā mriyante'rdhānṛtā yataḥ |
vṛkṣāścārdhāḥ phalantyeva vallikāśca striyastathā || 42 ||
[Analyze grammar]

puruṣāścārdhadhṛtayo bhavanti dvāparārdhake |
ardhaviśvāsino lokā mitho vyavaharanti ca || 43 ||
[Analyze grammar]

jāyamāne śubhe kārye tadarthaṃ phalati dhruvam |
nadīvegāstathārdhāpaḥ ṛtavaścārdhasatphalāḥ || 44 ||
[Analyze grammar]

tretārdhāyuṣyajanatāḥ kvacit kvacidbhavanti ca |
saṃkalpāt satyayuge vai sṛṣṭirasti sthale sthale || 45 ||
[Analyze grammar]

tretāyāṃ darśanāccāpi sṛṣṭirītiḥ pravartate |
tretānte sparśanāt sṛṣṭirdvāpare mithunādapi || 46 ||
[Analyze grammar]

dvāparārdhe gate sṛṣṭirmithunād viphalā kvacit |
evaṃ sarvā hi khanayo bījādhānyo bhavanti vai || 47 ||
[Analyze grammar]

puruṣā moghavīryāśca vāsanārdhapravartanāḥ |
viṣayārdhakṛtasnehāḥ pravartante'rdharāgataḥ || 48 ||
[Analyze grammar]

ardharugṇāḥ prajāścāpi balārdhavatya ityatha |
ardhahrasvāḥ pūrvataśca pravartante dvaye yuge || 49 ||
[Analyze grammar]

mantrāścārdhaṃ phalantyeva guravaścārdhabodhinaḥ |
dānaṃ vrataṃ dayā dharmaścārdhabhāvaṃ bhajanti vai || 50 ||
[Analyze grammar]

śiṣyāścārdhanideśasthā vartante'rdhasvamāninaḥ |
nāryaścārdhaṃ pātivratyaṃ samāsthāya vadhūṭikāḥ || 51 ||
[Analyze grammar]

kuṭumbaṃ sarvamevā'tra dvāpare'rdhārthasādhakam |
āśramāścā'rdhavṛṣiṇo varṇāścārdhanijaprathāḥ || 52 ||
[Analyze grammar]

devāścārdhaphaladāśca svāmino'rdhasurakṣiṇaḥ |
yuddheṣu cārdhavijayaścārdhabhaṭāḥ ṛtaṃjayāḥ || 53 ||
[Analyze grammar]

pradhānāścārdhagauṇāśca rājyaṃ cārdhaṃ prakāśate |
bhāgyaṃ cārdhaṃ phalatyeva nirṇayo'rdhaṛtaṃbharaḥ || 54 ||
[Analyze grammar]

ardharasāḥ prajāyante pūrṇarasāḍhyamūlinaḥ |
dvāpare śapathāścāpi lakṣmi cārdhayathārthakāḥ || 55 ||
[Analyze grammar]

vacanāni śreṣṭhināṃ ca tathaivā'rdhasthirāṇi ca |
viśvāso mahatāṃ cāpi tathaivārdhakṛtāspadaḥ || 56 ||
[Analyze grammar]

satyalokāddhi siddhanāmardhāḥ sarvatra gāminaḥ |
pitaraścāpi tadvacca bhavanti cārdhagāminaḥ || 57 ||
[Analyze grammar]

surāścāpi tathā bhūmau samāyāntyardhasaṃkhyayā |
pātālādisthitāścāpi tathaivā'rdhavihāriṇaḥ || 58 ||
[Analyze grammar]

aśaktāḥ sarvaśastatra dvāpare'rdhaprajā rame |
oṣadhayaścārdhabalā bhiṣajo'rdhaparīkṣakāḥ || 59 ||
[Analyze grammar]

daivajñāścārdhaboddhāraścikitsā'rdhāścikitsakāḥ |
yantratantrāṇi cārdhāni tathā'rdhakāryadāni vai || 60 ||
[Analyze grammar]

madhye bhagnāni jāyante'ntarāle lambayanti ca |
vārdhakyā'dārḍhyabhāve'pi kṣīṇadarśanaśaktayaḥ || 61 ||
[Analyze grammar]

kṣīṇādānagatiprāyāḥ kṣīṇānandā bhavanti ca |
kṣīṇaśravaṇasparśādyāḥ kṣīṇāsvādanagandhinaḥ || 62 ||
[Analyze grammar]

kṣīṇasattvārdhabalino dvāpare saṃbhavanti ca |
satyagṛhaṃ surā''vāsā gurukulāni dhārmikā || 63 ||
[Analyze grammar]

prāyaśo'rdhaṃ vinaśyanti dvāpare'rdhe gate kṣitau |
yajñaśālā utsavāśca devālayāśca sādhavaḥ || 64 ||
[Analyze grammar]

satyamānasaratnāni satyatīrthāni yāni ca |
ardhaṃ tāni vinaśyanti dvāpare'rdhe gate kṣitau || 65 ||
[Analyze grammar]

pavitratā'rdhanāśā ca spṛśyā'spṛśyā'rdhanāśanam |
vandyā'vandyārdhanāśaśca pūjyapūjārdhanāśanam || 66 ||
[Analyze grammar]

bhogyabhogārdhanāśaśca peyapānārdhanāśanam |
dhyeyadhyānārdhanāśaśca dvāpare'rdhe gate kṣitau || 67 ||
[Analyze grammar]

puruṣārthā'rdhanāśaśca kalpitārdhavināśanam |
dārḍhyaṃ cārdhāstitvaphalaṃ prāraॆbhāścārdhagocarāḥ || 68 ||
[Analyze grammar]

medhā cārdhavicārā ca yatnaścārdhaphalāvahaḥ |
mitrāṇi cārdhabhāvāni dāsyaṃ cārdhaṃ pravartate || 69 ||
[Analyze grammar]

paśavaścārdhaviśvāsāḥ pakṣiṇaścārdhasevinaḥ |
bhāṣāṇāmardhavijñānaṃ dvāpare'rdhe gate bhavet || 70 ||
[Analyze grammar]

ardhākarṣaṇarūpāṇi cārdhākarṣaṇaśaktayaḥ |
snehāspadādi cārdhāni dvāparerdhe gate kṣitau || 71 ||
[Analyze grammar]

rājyadaṇḍairniyamitāḥ prajāstiṣṭhanti nītigāḥ |
prakāśaṃ cārdhamevā'pi karma tatkarma gaṇyate || 72 ||
[Analyze grammar]

pracchannaṃ gaṇyate naiva cārdhaṃ dvāparibhirjanaiḥ |
daivabhayaṃ prayātyeva dvāpare'rdhaṃ prajāsu vai || 73 ||
[Analyze grammar]

pāpabhayaṃ tathā cārdhaṃ gaṇyate naiva tadyuge |
drohabhayaṃ tathā mithyābhayaṃ cārdhaṃ na gaṇyate || 74 ||
[Analyze grammar]

asatkarmabhayaṃ naiva gaṇyate'ghaṃ na manyate |
ardhamevaṃ jāyate vai dvāpare'rdhe hi padmaje || 75 ||
[Analyze grammar]

taṃ raścottarakāle tu tryaṃśaṃ satyaṃ prajīvati |
tribhāgāścāpi satyādernaśyantyeva dvaye'ntime || 76 ||
[Analyze grammar]

dvāpare'nte caturthāṃ'śā''yuṣyavanto hi dehinaḥ |
sahasrārdhaṃ samāraṃbhe tadardhaṃ madhyadvāpare || 77 ||
[Analyze grammar]

tadardhaṃ tryaṃśake yāte caturthāṃśe tadardhakam |
āyurvai hrāsamāpannaṃ sarveṣāṃ dehināṃ rame || 78 ||
[Analyze grammar]

aṣṭatālā mānavā vai satye bhavanti cocchritāḥ |
tretāyāṃ te ṣaṭṭālordhvā dvāparaṃ caturūrdhvakāḥ || 79 ||
[Analyze grammar]

dvāparārdhe tadardhāśca tato'rdhā daśahastakāḥ |
vṛkṣāścaturguṇordhvāśca hastinaśca drumārdhakāḥ || 80 ||
[Analyze grammar]

hastyardhordhvā ghoṭakāśca tadasamā govṛṣādayaḥ |
dvāpare te bhavantyeva bale tryaṃśavivarjitāḥ || 81 ||
[Analyze grammar]

dvāparānte nirbalāśca prāraṃbhāccaturaṃśinaḥ |
siddhimantastu ye santi te bhavantyūrdhadīrghakāḥ || 82 ||
[Analyze grammar]

punarhrasvāḥ svalpadehāstato'lpaparīṇāhakāḥ |
bhojanaṃ tu daśamāṇaṃ pañcamāṇaṃ tato'rdhakam || 83 ||
[Analyze grammar]

māṇamātraṃ tadardhaṃ ca dvāparānte bhavettadā |
divase tu pravāso vai satyayuge'mbare'sti ca || 84 ||
[Analyze grammar]

caturdaśasu lokeṣu pṛthvyāṃ dvīpāntare'pi ca |
tretāyāṃ tu pravāso vai vimānāpekṣa eva ha || 85 ||
[Analyze grammar]

divase ca tadā yānti mānavāḥ śatayojanam |
dvāpare tu tadardhaṃ ca dvāparārdhe tadardhakam || 86 ||
[Analyze grammar]

dvāparānte tadardhaṃ ca tato'rdhaṃ ca tataḥ param |
evaṃ hrasvaśarīrāṇāṃ pādakramo vikuñcitaḥ || 87 ||
[Analyze grammar]

prāṇāyāmairvinā teṣāṃ vyomagatirna vidyate |
bhvādhārā bhūnivāsaśca bhūkramā bhūprabhojinaḥ || 88 ||
[Analyze grammar]

evaṃ bhūmātarastatra dvāparānte prajā rame |
kṣudhātṛṣātitāpāḍhyā dvāpare'nte janā rame || 89 ||
[Analyze grammar]

asadāḍhyāḥ śāṭhyayuktāḥ svārthā'haṃkārasaṃbhṛtāḥ |
kalmaṣairbahubhiryuktā jāyante dvāpare'ntake || 90 ||
[Analyze grammar]

kṣudracittā dhairyahīnā gāmbhīryavarjitāstathā |
jāyante mānavā lakṣmi dvāpare'nte samastataḥ || 91 ||
[Analyze grammar]

striyaḥ śrīvarjitāścāpi maryādā'rdhavihantrikāḥ |
nijārdhasvatvamamatā'haṃkāragarvitāstathā || 92 ||
[Analyze grammar]

bhavantyeva kleśadāśca tathā'rdhadharmavarjitāḥ |
śriyastato varjayanti lakṣmyo viyanti tadgṛhāt || 93 ||
[Analyze grammar]

sampadaścāpasaranti ṛddhayo'pasaranti ca |
śiṣṭāśca sampadābhāsā bhavanti vai kusampadaḥ || 94 ||
[Analyze grammar]

janāḥ śiṣṭāḥ svaśiṣṭatvaṃ tyajanti dvāpare'rdhakam |
dvāparānte na śiṣṭatvaṃ kalmaṣairhanyate hi tat || 95 ||
[Analyze grammar]

kālaścāpi purā yaḥ sa kleśārdhātmā pravartate |
kāladūtā bhavaneṣu parābhavanti mānavān || 96 ||
[Analyze grammar]

vahnayo vāmabhāgārdhaṃ gatvā yānti pradakṣiṇam |
dvāpare'nte'rpitaṃ dravyaṃ pūjārthaṃ līyate'rdhakam || 97 ||
[Analyze grammar]

naijaṃ sarvaṃ bhaved dvedhā paraṃ śreṣṭhaṃ parārthakam |
parabhāvena sambhinnaṃ cittaṃ naijaṃ hi dvāparam || 98 ||
[Analyze grammar]

evaṃ lakṣmi vividhān vai dharmān śrayanti mānavāḥ |
pāpaṃ cārdhaṃ tathā cārdhaṃ puṇyaṃ kurvanti tatprajāḥ || 99 ||
[Analyze grammar]

arthaṃ kāmaṃ cehamānāḥ prajā hrāsaṃ vrajantyapi |
tatra mantraṃ japenme ca gāyatryākhyaṃ nirantaram || 100 ||
[Analyze grammar]

oṃ bhūrbhuvaḥ svaḥ śrīghanaśyāmāya vidmahe |
nīlakaṇṭhāya dhīmahi tanno hariḥ pracodayāt || 101 ||
[Analyze grammar]

oṃ bhūrbhuvaḥ svaḥ śrībālakṛṣṇāya vidmahe |
anādikṛṣṇāya dhīmahi tannaḥ kṛṣṇaḥ pracodayāt || 102 ||
[Analyze grammar]

oṃ bhūrbhuvaḥ svaḥ śrīnārāṇāya vidmahe |
vāsudevāya dhīmahi tanno viṣṇuḥ pracodayāt || 103 ||
[Analyze grammar]

oṃ śrībrahmapriyāvallabhāya svāhā namaḥ japet |
oṃśrīharipriyāvallabhāya namaḥ japet tathā || 104 ||
[Analyze grammar]

ṣaṭlakṣajapakartā vai taratyeva bhavārṇavāt |
dvāpare mantramenaṃ vai tato japet pramuktaye || 1051 ||
[Analyze grammar]

anādiśrīkṛṣṇanārāyaṇa kṛṣṇa śriyaḥpate |
rādhāpate parabrahma gopīpate jayāpate || 106 ||
[Analyze grammar]

lalitāśrīpate prajñāpate padmāvatīpate |
sukhadāśrīpate lakṣmīpate śrīmāṇikīpate || 107 ||
[Analyze grammar]

haṃsagaruḍavāraṇaturagādhipate prabho |
satāṃpate satīsādhvīpate sarvapate vibho || 108 ||
[Analyze grammar]

bhagavan puṇḍarīkākṣa tārayā'smān bhavārṇavāt |
dvāparād ghorarūpādvai cāntimasamayātmakāt || 109 ||
[Analyze grammar]

ityarthayed bhagavantaṃ parameśaṃ sanātanam |
pūjayenmāṃ dhārayecca hṛdaye mayi cārpayet || 110 ||
[Analyze grammar]

evaṃ mokṣaṃ dvāpare'nte cāpnuyurmānavā rame |
paṭhanācchravaṇāccāpi saṃhitāyā mamāpi ca || 111 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne dvāparayugadharmakarmasvabhāvāstathāvidhamānavānāṃ mokṣārthaṃ mantrādibhajanapradarśanamitinirūpaṇanāmā tricatvāriṃśadadhikaśatatamo'dhyāyaḥ || 143 ||
[Analyze grammar]