Chapter 115

śrīnārāyaṇīśrīruvāca |
ahaṃ jātā bahuvāraṃ sṛṣṭau vai bhavatā saha |
lakṣmīrnārāyaṇī śrīśca bhārgavī mādhavī ramā || 1 ||
[Analyze grammar]

vṛndā ca tulasī śivarājñīśrīḥ kamalā pramā |
padmā vidyāparā padmāvatī śatasahasraśaḥ || 2 ||
[Analyze grammar]

mama rūpāṇi loke'tra vidyante śrīhare prabho |
jijñāsā me samutpannā mahālakṣmīḥ kadā katham || 3 ||
[Analyze grammar]

samutpannā ca kinnāmnī pṛthvyāṃ kṛṣṇanarāyaṇa |
yadyapyahaṃ vijānāmi śvaśrūṃ me jananīṃ tava || 4 ||
[Analyze grammar]

mahālakṣmīṃ cā'tha gajānanāṃ surāṣṭrake'parām |
camatkārapure jātāṃ kṣīrodasāgarodbhavām || 5 ||
[Analyze grammar]

dvitīyāṃ tāṃ vijānāmi tathā mahāhiraṇmayīm |
tṛtīyāṃ tāṃ vijānāmi tadanyā yadi bhūsthitā || 6 ||
[Analyze grammar]

mahākāryakarī cā''ste cet tāṃ mahyaṃ prakīrtaya |
yāṃ śrutvā sampraharṣāmi yadbalaṃ ca camatkṛtim || 7 ||
[Analyze grammar]

śrīpuruṣottama uvāca |
śṛṇu lakṣmi kathayāmi vartamānāṃ tu bhūtale |
camatkārakarīṃ pūjyāṃ mahālakṣmīṃ tu dakṣiṇe || 8 ||
[Analyze grammar]

kāñcanyāṃ tu nagaryā sā mātā vai rājate satī |
purā śaṃbhormohanārthaṃ kāmadevaḥ samāyayau || 9 ||
[Analyze grammar]

kailāse daivakāryārthaṃ śaṃkareṇa sa bhasmitaḥ |
citrakarmā gaṇo bhasma kiñcid dhṛtvā tu puttalam || 10 ||
[Analyze grammar]

racayāmāsa tatraivā''veśayāmāsa jīvanam |
bālakaścetanaḥ so'pi sañjāto roṣavānati || 11 ||
[Analyze grammar]

śatarudrīyapāṭhī ca papāṭha śaṃkarāntike |
śaṃbhurbhūtvā prasannastaṃ varārthaṃ prāha vai tadā || 12 ||
[Analyze grammar]

varaṃ vavre sa me rājyaṃ trailokye syādakaṇṭakam |
pratiyoddhrastraśastrāṇi vṛthā bhavantu sarvathā || 13 ||
[Analyze grammar]

mamā'straśastramantrāśca mā bhavantu vṛthā kvacit |
tathetyāha tadā śaṃbhuḥ rājyamasmai tathā dadau || 14 ||
[Analyze grammar]

ṣaṣṭivarṣasahasrāṇi rājyaṃ bhavatvakaṇṭakam |
tadā vīkṣya svayaṃ brahmā bhaṇḍāsuretināmataḥ || 15 ||
[Analyze grammar]

bhaṇḍāsphoṭo hyayaṃ jāta iti matvā jagāda ha |
athā'yaṃ rudrabhālasya krodhānalāt prabharjitaḥ || 16 ||
[Analyze grammar]

bhasmotpannaḥ punastasmād rudrajo dānavo'bhavat |
vavṛdhe śīghramevā'sau śukraṃ samāhvayat gurum || 17 ||
[Analyze grammar]

mayaṃ samāhvayat pūjāṃ cakre tayostataḥ punaḥ |
mayaṃ taṃ śilpinaṃ prāha purātanī purī tu yā || 18 ||
[Analyze grammar]

daityeśvarāṇāṃ cāste tāṃ bhagnāṃ punarnavāṃ kuru |
tacchrutvā tu mayo gatvā cakre navaṃ puraṃ hi tat || 19 ||
[Analyze grammar]

yatra sthitvā tu daityena trailokyaṃ śāsitaṃ purā |
tatrā'bhiṣiktaḥ śukreṇa daiteyaiḥ sa mahābalaiḥ || 20 ||
[Analyze grammar]

śuśubhe parayā smṛddhyā tejobhiśca balādibhiḥ |
hiraṇyakaśipuryaṃ vai kirīṭaṃ prāk dadhāra ha || 21 ||
[Analyze grammar]

kirīṭaṃ taṃ sajīvaṃ cā'vināśyaṃ śukradhāritam |
dadhau bhaṇḍaścāmare dve sajīve śaktiśobhite || 22 ||
[Analyze grammar]

na rogo na ca duḥkhāni jāyante yanniṣevaṇāt |
ātapatraṃ dadhau yasya chāyāsthān nā'strakoṭayaḥ || 23 ||
[Analyze grammar]

bādhante na vināśo na parājayo na jāyate |
vijayākhyaṃ dhanuḥ śaṃkhaṃ ripughnaṃ bhūṣaṇāni ca || 24 ||
[Analyze grammar]

siṃhāsanaṃ taijasaṃ cā'kṣayaśauryaṃ dadau kaviḥ |
evaṃ rājā samāvṛttastasyā'ṣṭau tu mahābalāḥ || 25 ||
[Analyze grammar]

pradhānāḥ sainyapūjyāścā'bhavan trilokigāminaḥ |
indraśatruramitraghno vidyunmālī vibhīṣaṇaḥ || 26 ||
[Analyze grammar]

ugrakarmogradhanvā ca vijayaḥ śrutipāragaḥ |
sarve vai vedaśāstrajñāḥ karmakāṇḍaparāyaṇāḥ || 27 ||
[Analyze grammar]

yuddhaviśāradā māyāviśāradāḥ pratāpinaḥ |
atha daityaṃ viśukraṃ sa dakṣāṃsena sasarja ha || 28 ||
[Analyze grammar]

vāmāṃsena viṣāṃgaṃ sa sasarja duṣṭaśekharam |
dhūminīṃ bhaginīṃ cāpi kaṇṭhāt sasarja bhaṇḍakaḥ || 29 ||
[Analyze grammar]

sumohinī kumudvatī citrāṃgī sundarī tathā |
catasro vanitāstasya daityaputryo'rpitāstadā || 30 ||
[Analyze grammar]

syandanāsturagā nāgā vimānāni sahasraśaḥ |
sambabhūvurjitalokāḥ śukrācāryamatānugāḥ || 31 ||
[Analyze grammar]

bhaṇḍo babhūva bhakto'sau śaṃkarasya sadaityakaḥ |
gṛhe gṛhe rudrayajñāstadā cāsan samantataḥ || 32 ||
[Analyze grammar]

ṛco yajūṃṣi sāmāni tantrāṇi ca pratigraham |
pravartante sma daityānāṃ samūhe'pi tathā'dhvare || 33 ||
[Analyze grammar]

tadā yajñeṣu daityānāṃ bubhujurhavyabhojinaḥ |
bhrātṛbhyāmugravīryābhyāṃ pradhānaiśca balaistathā || 34 ||
[Analyze grammar]

diśo jigāya sarvāśca reje mahendravattadā |
brahmāṇḍaṃ khaṇḍayāmāsa śauryavīryasamucchritaḥ || 35 ||
[Analyze grammar]

bahuvāraṃ devatādyā nirjitā raṇamūrdhani |
brahmaviṣṇumaheśādyāstaṃ dṛṣṭvā dīptatejasam || 36 ||
[Analyze grammar]

palāyanaparāḥ sarve sve sve dhāmni sadā'vasan |
kecitpātālagarbheṣu kecidambudhivāriṣu || 37 ||
[Analyze grammar]

kecid digantakoṇeṣu kecit kuñjeṣu bhūbhṛtām |
vilīnā bhṛśavitrastā viceruśchannaveṣiṇaḥ || 38 ||
[Analyze grammar]

pitṝn siddhānsādhyadevān nāgān yajñān digīśvarān |
brahmāṇaṃ padmanābhaṃ ca rudraṃ vajriṇamityapi || 39 ||
[Analyze grammar]

matvā tṛṇāyitān sarvān lokān bhaṇḍaḥ śaśāsa ha |
evaṃ rājyaṃ kṛtavato bhaṇḍasya jitakāśinaḥ || 40 ||
[Analyze grammar]

ṣaṣṭivarṣasahasrāṇi vyatītāni tataḥ param |
hīyamānabalān devān samprekṣya kamalāpatiḥ || 41 ||
[Analyze grammar]

ugraṃ bhaṇḍāsuraṃ hantuṃ trailokyaṃ cāpi rakṣitum |
sasarja sahasā māyāṃ svātmarūpāṃ vimohinīm || 42 ||
[Analyze grammar]

nijarūpā lalitā sā babhūva paradevatā |
mahālakṣmīḥ svayaṃ yā'sti kaṃbharā jananī mama || 43 ||
[Analyze grammar]

pāśāṃkuśadhanurbāṇapariṣkṛtacaturbhujā |
sā mātā paramā śaktiḥ parabrahmasvarūpiṇī || 44 ||
[Analyze grammar]

yā mahāvaiṣṇavī daityavrātavilayakāriṇī |
tāmuvāca harirmāyāṃ bhaṇḍaṃ daityaṃ niṣūdaya || 45 ||
[Analyze grammar]

evamājñāṃ samāsādya sā yayāce'psarogaṇam |
harirdadāvapsarasaḥ sāpi viśvācikādibhiḥ || 46 ||
[Analyze grammar]

yayau yā himagiriṃ yatrāste bhaṇḍakāsuraḥ |
tatra sā tu mahālakṣmīrmūle campakaśākhinaḥ || 47 ||
[Analyze grammar]

nivāsamakarod ramyaṃ gāyantīṃ madhurasvaram |
śrutvā daityaścāgatastāṃ yayāce madanāturaḥ || 48 ||
[Analyze grammar]

sāpi hāvāṃstathā bhāvān ceṣṭā vārtāśca mañjulāḥ |
kṛtvā'haraddhi daityānāṃ manāṃsi bhaṇḍakasya ca || 49 ||
[Analyze grammar]

visasmarustadā bhaṇḍo daityāḥ sāyaṃ śrīśaṃkaram |
sandhyāṃ stotraṃ pūjanaṃ ca vṛddhānāṃ sevanādikam || 50 ||
[Analyze grammar]

vijahuste yajñakāryaṃ tathā sarvaṃ śubhāvaham |
evaṃ śukraṃ nijācāryaṃ visasmaśca pūjanam || 51 ||
[Analyze grammar]

iyaṃ devī mohayitvā rurodha daityapuṃgavān |
avamānahataḥ śukraḥ kopito'bhūttadā muhuḥ || 52 ||
[Analyze grammar]

daityānāha na vai yogyā bhavanto rājyaṛddhaye |
patantu pararājyādvai mado vo yātu saṃkṣayam || 53 ||
[Analyze grammar]

jaḍībhūtānasurāṃśca māyākṛtān vilokya tu |
indrādyāḥ kṛtasannāhāstapo'rthaṃ yamunāṃ yayuḥ || 54 ||
[Analyze grammar]

makhamāraṃbhayāmāsurvaiṣṇavaṃ baladaṃ śubham |
nārāyaṇyā mahālakṣmyāḥ pūjāṃ cakrurhi devatāḥ || 55 ||
[Analyze grammar]

ugre tapasi saṃsthānā japadhyānaparāyaṇā |
ananyamānasā lakṣmīḥ sāvadhānā babhūva sā || 56 ||
[Analyze grammar]

bahvabdeṣu vyatīteṣu svayaṃ śukraḥ purohitaḥ |
daityānāha bhavatāṃ vai vināśārthaṃ surādayaḥ || 57 ||
[Analyze grammar]

yajñaṃ dhyānaṃ tapaścāpi kurvanta yamunātaṭe |
jātimātraṃ hi bhavatāṃ haniṣyati surādayaḥ || 58 ||
[Analyze grammar]

hariḥ sarvān bhavatpakṣān haniṣyatyacirāt khalu |
tenaiva nirmitā māyā mahālakṣmīsvarūpiṇī || 59 ||
[Analyze grammar]

tasyāṃ mugdhān bhavataśca vīkṣyendrādyāstapanti vai |
gatvā śīghraṃ tatra vighnaṃ samācarata vai drutam || 60 ||
[Analyze grammar]

śrutvā bhaṇḍāsurayuktā daityā yuddhaviśāradāḥ |
yamunātaṭamāsādya vighnaṃ cakrurmahāraṇam || 61 ||
[Analyze grammar]

tapovighnakarān daityān vīkṣya bhaktārthakāriṇī |
mahālakṣmīrakarodvai mahāprākāramujjvalam || 62 ||
[Analyze grammar]

alaṃghyaṃ dānavaidaityairindraprasthābhidhaṃ dṛḍham |
taṃ dṛṣṭvā bhaṇḍakaścāpi viṣaṇṇaḥ svapuraṃ yayau || 63 ||
[Analyze grammar]

śrutavarmā sakhā bhaṇḍaṃ prāha rājan vacaḥ śṛṇu |
ṣaṣṭivarṣasahasrāṇāṃ rājyaṃ tava śivārpitam || 64 ||
[Analyze grammar]

tato'ntastava rājyasya kālo'yaṃ śivanoditaḥ |
aśakyapratikāryo'yaṃ tasmāt kālaṃ prayāpaya || 65 ||
[Analyze grammar]

kāle tu bhogaḥ kartavyaḥ kāle nivṛttiruttamā |
ityupadeśaṃ saṃśrutvā vireme bhaṇḍakāsuraḥ || 66 ||
[Analyze grammar]

devatā indraprasthe vai viśāle vanavistare |
kuṇḍaṃ suyogyavistāraṃ kṛtvā vahniṃ nidhāya ca || 67 ||
[Analyze grammar]

kṛtvā dṛḍhāṃ pratijñāṃ vai mahālakṣmīṃ prapūjya ca |
parito havanaṃ cakruḥ prītyarthaṃ tu śriyā hareḥ || 68 ||
[Analyze grammar]

brahmabhūtā bhaviṣyāmo bhokṣyāmo vā triviṣṭapam |
ityevaṃ havanaṃ cakrustāvat prādurbabhūva ha || 69 ||
[Analyze grammar]

cakrākāraṃ mahattejastanmadhye pārameśvarī |
jaganmātā jīvadātrī nārāyaṇī pareśvarī || 70 ||
[Analyze grammar]

vyūhatejomayī brahmānandinī harisundarī |
pāśāṃkuśekṣukodaṇḍapadmamālā lasatkarā || 71 ||
[Analyze grammar]

dṛṣṭvā tāṃ mumuhurdevāḥ praṇemurvigatajvarāḥ |
tuṣṭuvuḥ śrīmahālakṣmīṃ lalitāṃ vaiṣṇavīṃ prasūm || 72 ||
[Analyze grammar]

jaya lakṣmi jaganmātarjaya lakṣmi parātpare |
jaya kalyāṇanilaye jaya sarvakalātmike || 73 ||
[Analyze grammar]

jaya brāhmi mahālakṣmi brahmātmike parātmike |
jaya nārāyaṇi śānte jaya śrīlalite rame || 74 ||
[Analyze grammar]

jaya śrīvijaye devīśvari śrīde jayarddhide |
namaḥ sahasraśīrṣāyai sahasrānanalocane || 75 ||
[Analyze grammar]

namaḥ sahasrahastābjapādapaṃkajaśobhite |
aṇoraṇutare lakṣmi mahato'pi mahīyasi || 76 ||
[Analyze grammar]

atalaṃ te smṛtau pādau vitalaṃ jānunī tava |
rasātalaṃ kaṭiste ca kukṣiste pṛthivī matā || 77 ||
[Analyze grammar]

hṛdayaṃ bhuvaḥ svaste'stu mukhaṃ satyaṃ śiro matam |
dṛśaścandrārkadahanā diśaḥ karṇā bhujāḥ surāḥ || 78 ||
[Analyze grammar]

marutastu tavocchvāsā vācaste śrutayo matāḥ |
krīḍā te lokaracanā sakhā te parameśvaraḥ || 79 ||
[Analyze grammar]

āhāraste sadānando vāsaste hṛdaye hareḥ |
dṛśyādṛśyasvarūpāṇi rūpāṇi bhuvanāni te || 80 ||
[Analyze grammar]

śiroruhā ghanāste vai tārakāḥ kusumāni te |
dharmādyā bāhavaste ca kālādyā hetayastava || 81 ||
[Analyze grammar]

yamāśca niyamāścāpi karapādanakhāstava |
stanau svāhāsvadhākārau sarvajīvanadugdhadau || 82 ||
[Analyze grammar]

prāṇāyāmastava śvāso rasanā te sarasvatī |
mahīruhāste'ṅgaruhāḥ prabhātaṃ vasanaṃ tava || 83 ||
[Analyze grammar]

ādau dayā dharmapatnī sasarja nikhilāḥ prajāḥ |
hṛtsthā tvaṃ vyāpinī lakṣmīrmohinī tvaṃ tathā parā || 84 ||
[Analyze grammar]

idānīṃ dṛśyase brāhmī nārāyaṇī priyaṃkarī |
namastasyai mahālakṣmyai gajamukhyai namo namaḥ || 85 ||
[Analyze grammar]

sarvaśaktyai sarvadhātryai mahālakṣmyai namo namaḥ |
yā sasarja virājaṃ ca tato'jaṃ viṣṇumīśvaram || 86 ||
[Analyze grammar]

rudraṃ tathā surāgryāṃśca tasyai lakṣmyai namo namaḥ |
triguṇāyai nirguṇāyai hariṇyai te namo namaḥ || 87 ||
[Analyze grammar]

yantratantrātmikāyai te jaganmātre namo namaḥ |
vāgvibhūtyai gurutanvyai mahālakṣmyai namo namaḥ || 88 ||
[Analyze grammar]

kaṃbharāyai sarvavidyābharāyai te namo namaḥ |
jayālalitāpāñcālīramātanvai namo namaḥ || 89 ||
[Analyze grammar]

padmāvatīramāhaṃsīsuguṇā''jñāśriyai namaḥ |
namaḥ stutā prasannaivaṃ chandayāmāsa sadvaraiḥ || 90 ||
[Analyze grammar]

devāḥ prāhuśca tuṣṭā ced bhaṇḍāsuraṃ vināśaya |
durdharaṃ jīvitaṃ saukhyaṃ dehi te śaraṇārthinaḥ || 91 ||
[Analyze grammar]

mahālakṣmīḥ samuvāca muditāḥ santu nirbhayāḥ |
bhaṇḍāsuraṃ nāśayiṣye lalitā'haṃ mahāsatī || 92 ||
[Analyze grammar]

stāvakā me bhaviṣyanti śrīyaśodharmasaṃbhṛtāḥ |
vidyāvinayasampannā nirogā dīrghajīvinaḥ || 93 ||
[Analyze grammar]

putramitrakalatrāḍhyā bhaviṣyanti susampadaḥ |
itilabdhavarā devāḥ satraṃ cakruḥ prapūrṇakam || 94 ||
[Analyze grammar]

atha sā lalitā lakṣmīrvaramālāṃ karotthitām |
anādiśrīmahāviṣṇusvarūpāya parātmane || 95 ||
[Analyze grammar]

tatraiva paśyatāṃ sarvasurāṇāṃ cārpayad gale |
devadundubhayo nedurjayaśabdāstadā'bhavan || 96 ||
[Analyze grammar]

gītayaścā'bhavaṃstatrā'psarasāṃ surayoṣitām |
nanṛtuścāpsarasaśca jagurgāndharvasattamāḥ || 97 ||
[Analyze grammar]

ṛṣayaḥ stavanaṃ cakrurāśīrvādaparāyaṇāḥ |
sādhavo namanaṃ cakruḥ sevāṃ cakruśca pārṣadāḥ || 98 ||
[Analyze grammar]

lakṣmyādyāḥ pūjanaṃ cakrurdampatyoścendraprasthake |
yautakāni daduścāpi bhūṣaṇāni dhanāni ca || 99 ||
[Analyze grammar]

ratnāni vividhānyeva dampatībhyāṃ surādayaḥ |
bhojanāni vyadhustatra vivāhānte surādayaḥ || 100 ||
[Analyze grammar]

atha brahmā prajagāda bhaṇḍāsurakṣayāya tu |
mahālakṣmīṃ lalitākhyāṃ parabrahmahariṃ tathā || 101 ||
[Analyze grammar]

dharmasya rakṣaṇārthāya devānāṃ rakṣaṇāya ca |
tadā tūrṇaṃ mahālakṣmīrnārāyaṇājñayā tadā || 102 ||
[Analyze grammar]

sasmāra divyahetīṃśca cakrādīn divyavigrahān |
āyayurmūrtimantaste tasthuśca purato hareḥ || 103 ||
[Analyze grammar]

jagrāha tān mahālakṣmīḥ sarvakāmākṣiṇī satī |
sarvakāmapradasya śrīnārāyaṇasya cājñayā || 104 ||
[Analyze grammar]

sarvadevān sahāyāṃścā'dṛśyanārāyaṇānvitān |
nītvā daityānnāśayituṃ pratasthe jayavardhitā || 105 ||
[Analyze grammar]

sainyāni pārṣadānāṃ ca gaṇānāṃ dyusadāṃ tathā |
devīnāṃ cāpi siddhānāṃ niryayuḥ sajjahetayaḥ || 106 ||
[Analyze grammar]

sahasraśo gavāśvāśca siṃhāḥ śārdūlakāḥ khagāḥ |
vṛṣabhāḥ śarabhāścāpi haṃsāśca garuḍāstathā || 107 ||
[Analyze grammar]

vimānāni sahasrāṇi yānāni ca rathāstathā |
sāyudhāḥ kalpajāścendraprasthād viniryayustadā || 108 ||
[Analyze grammar]

mahālakṣmīmahāsainyaṃ śrīlakṣmīkamalānvitam |
durgāsatīmahācaṇḍīdevīkoṭisamanvitam || 109 ||
[Analyze grammar]

divyaṃ cā'vyāhatagati niryayau tvambareṇa tat |
divyā'straśastramantrādyairvardhitaṃ rakṣitaṃ tathā || 110 ||
[Analyze grammar]

gaganaṃ satyalokāntaṃ śabditaṃ sainyagarjaṃnaiḥ |
sarve nārāyaṇāśceśāḥ śrutvā tūrṇaṃ samāyayuḥ || 111 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne kāmadevabhasmata utpannasya bhaṇḍāsurasya nāśārthamindraprasthā''gatadevānāṃ makhe prādurbhūtalalitāmahālakṣmīsainyasannāhādinirūpaṇanāmā pañcadaśādhikaśatatamo'dhyāyaḥ || 115 ||
[Analyze grammar]