Chapter 97

śrīnārāyaṇīśrīruvāca |
kiṃ kartavyaṃ mānavena lokavyāyāmaśālinā |
dehayātrāṃ lokayātrāṃ kiṃdharmaḥ san vibhāvayet || 1 ||
[Analyze grammar]

śrīpuruṣottama uvāca |
drohaṃ vihāya stainyaṃ ca tyaktvā vyavāyamityapi |
tyaktvā kāyena pāpāni śreṣṭhaṃ sarvaṃ samācaret || 2 ||
[Analyze grammar]

grāmyavārtā ca pāruṣyaṃ paiśūnyaṃ ca mṛṣāvacaḥ |
vācā catvāri santyajya satyaṃ saṃvyāharet sadā || 3 ||
[Analyze grammar]

parasvānāmanākāṃkṣāṃ sarvadehiṣu mitratām |
karmaphalādāvāstikyaṃ manasā dhārayet sadā || 4 ||
[Analyze grammar]

vāsanā nodbhāvayecca tṛṣṇāṃ tyajet parigraham |
bhayadaṃ ca vihāyaivā''tmanā sādhuṃ samāśrayet || 5 ||
[Analyze grammar]

sarvasvārpaṇamāsādya navadhābhaktimācaret |
premṇā dhyānena māṃ labdhvā vrajettu paramaṃ padam || 6 ||
[Analyze grammar]

evaṃ sadā''carecchreṣṭhaṃ śubhaṃ hitaṃ ca satphalam |
aśubhaṃ viparītaṃ ca nā''carettu kadācana || 7 ||
[Analyze grammar]

mātuḥ sevāṃ pituḥ sevāṃ patyuḥ sevāṃ striyāstathā |
guroḥ sevāṃ gavāṃ sevāṃ kuryād vṛddhasya sevanam || 8 ||
[Analyze grammar]

devasevāṃ satāṃ sevāṃ satīsevāṃ samācaret |
ātithyaṃ ca paropakārādikaṃ cācaret sadā || 9 ||
[Analyze grammar]

bhajanaṃ me prakuryācca dīnasevāṃ samācaret |
lokasevāṃ rāṣṭrasevāṃ prajāsevāṃ samācaret || 10 ||
[Analyze grammar]

tīrthasevāṃ brahmasevāṃ mokṣasevāṃ samācaret |
śṛṇu lakṣmi purā tīrthaṃ prasevya sādhumaṇḍalam || 11 ||
[Analyze grammar]

ālambāyanasaṃjñaśca maharṣirmokṣamāptavān |
siṃhāraṇye mahātīrthe gokarṇe ṛṣirāṭ svayam || 12 ||
[Analyze grammar]

lakṣavarṣāṇyavasat saḥ sādhūnāṃ sevayā sukhī |
daśavarṣo'bhavad yāvattāvat saurāṣṭradeśajaḥ || 13 ||
[Analyze grammar]

keśariṇīṃ nijāṃ natvā prasūṃ prāha sa bālakaḥ |
mātarme jāyate cecchā satāṃ samāgame muhuḥ || 14 ||
[Analyze grammar]

anityaḥ khalu saṃsāro mānuṣyaṃ durlabhaṃ tathā |
harerbhaktirdurlabhā ca durlabhaḥ satsamāgamaḥ || 15 ||
[Analyze grammar]

gṛhaṃ ca vāṭikā patnī bāndhavāśca dhanānyapi |
gāvo bhṛtyāśca sulabhāḥ paraṃ bandhanakāriṇaḥ || 16 ||
[Analyze grammar]

durlabhāḥ sādhavo bhaktirnārāyaṇāśrayastathā |
mokṣo'pi durlabho mātaḥ sādhayettān pumān budhaḥ || 17 ||
[Analyze grammar]

evaṃ me vartate buddhiryathā śādhi karomi tat |
mātā prāha sutaṃ dhanyo vartase tvaṃ hi devatā || 18 ||
[Analyze grammar]

ābālyātte tu saṃkalpā vivekasaṃbhṛtāḥ suta |
dhanyā'haṃ jananī te'pi pitā dhanyo'pi te suta || 19 ||
[Analyze grammar]

yatputro bhagavadbhaktiṃ kartumicchasi sevanam |
satāṃ mokṣamavāptuṃ ca matiste dhanyapātriṇī || 20 ||
[Analyze grammar]

adya putra samākarṇya pārameśvaramuttamam |
vivekaṃ te bahupuṇyā bhavāmi mokṣakāṃkṣiṇaḥ || 21 ||
[Analyze grammar]

saṃkalpāste bhavantyeva pūrṇā bhaktau hareḥ śubhāḥ |
sevāyāṃ ca satāṃ putra nairvighnyaṃ te sadā'stu ca || 22 ||
[Analyze grammar]

bālyakrīḍādikaṃ tyaktvā tyaktvā yuvatvakalpanām |
rāgādikamanādṛtya mokṣe buddhistavā'sti yat || 23 ||
[Analyze grammar]

prasannā'haṃ mama putra tārako'si kuṭumbinām |
mānuṣaṃ janma mokṣārthaṃ tadanyāni bhavābdhaye || 24 ||
[Analyze grammar]

bhavābdhidāni santyajya saphalīkuru mānavam |
vinivedya janakāya labdhvā''jñāṃ pāragāminīm || 25 ||
[Analyze grammar]

yāhi cā'punarāvṛttilābhāya satpadālayam |
yatra te sādhavo dhīrā śrūyante brahmapāragāḥ || 26 ||
[Analyze grammar]

nirguṇā brahmaguṇakā mokṣadā yāhi tatra vai |
smara mā māṃ prasūṃ kvāpi pitaraṃ bāndhavān gṛham || 27 ||
[Analyze grammar]

bandhanāni vicitrāṇi janmabhuvaṃ sakhīṃstathā |
mā smara viṣayān putra mā dhyānaṃ dehi laukike || 28 ||
[Analyze grammar]

mā pravāhe rasānāṃ cā''svādānāṃ pata karhicit |
mā prasaṃgaṃ viṣayāṇāṃ kvāpi te putra jāyatām || 29 ||
[Analyze grammar]

mokṣamārgaśca te putra nirvighno'ntaṃ pravartatām |
mānavasya tu dehasya satsevāyāṃ samarpaṇam || 30 ||
[Analyze grammar]

sadaiva kuru putra tvaṃ niḥśreyaḥ śubhamāpnuyāḥ |
ante nārāyaṇaprāptiste'stu dhāmni nivāsitā || 31 ||
[Analyze grammar]

pitaraṃ brahmatāraṃ te pṛṣṭvā yāhi śubhaṃ kuru |
ityuktvā putramūrdhānamajighrad dhanyamānasā || 32 ||
[Analyze grammar]

bhojanaṃ kārayāmāsa dhairyaṃ cograṃ dadau prasūḥ |
tyāgāśramārthaṃ putrāyā'preṣayat pitaraṃ prati || 33 ||
[Analyze grammar]

putro yayau tu pitaraṃ sukhāsīnaṃ nanāma ca |
sarvaṃ nivedayāmāsa brahmatārāya yogine || 34 ||
[Analyze grammar]

brahmatāro'pi vipro vai prāha putraṃ śubhātmakam |
aho dhanyo'smi satataṃ yadgṛhe putra īdṛśaḥ || 35 ||
[Analyze grammar]

bhagavadbhaktitānaśca sādhusatsaṃgamānasaḥ |
abhogo bhogakāmādirahito bālyataḥ śubhaḥ || 36 ||
[Analyze grammar]

pūrvapuṇyena vai putro jāyate bhaktimān vratī |
sādhurvirāgavāṃścāpi naiṣṭhikaścaurdhvaśīlavān || 37 ||
[Analyze grammar]

bhaja putra hariṃ nityaṃ prasevaya satojanān |
gokarṇe tīrthake gatvā''tmānaṃ mokṣe niveśaya || 38 ||
[Analyze grammar]

saphalaṃ śreṣṭhaphalakaṃ mānavaṃ varṣma saṃkuru |
putravānasmi putreṇa tvādṛśena suyoginā || 39 ||
[Analyze grammar]

śatajanmakṛtaṃ puṇyaṃ yadodeti tadā bhavet |
jijñāsā mokṣamārge vai sādhusevāpathe'pi ca || 40 ||
[Analyze grammar]

bandhanaṃ tu dṛḍhaṃ sevātmakaṃ kuṭumbibandhuṣu |
chitvā śūro bhavet kaścinmokṣasaṃgarasaṃplutaḥ || 41 ||
[Analyze grammar]

kīṭe pataṃgake deve dānave mānave khage |
sarīsṛpe paśau siddhe ṛṣau bhogāḥ samāḥ khalu || 42 ||
[Analyze grammar]

ta eva vārijāḥ kledā bhautikāste prabhojanāḥ |
indriyāṇi samānāni prāṇāstulyāśca vāyujāḥ || 43 ||
[Analyze grammar]

divasāśca samānā vai prayānti dehināṃ tathā |
nidrālavo yatante na mokṣārthaṃ daivavarjitāḥ || 44 ||
[Analyze grammar]

nirayārthāsta evā'tra paratra santi nirmitāḥ |
mokṣaḥ pumartha ātmārtho'nye dehārthā na muktaye || 45 ||
[Analyze grammar]

trirāśīn yaḥ samuttīryottare tūrye viśettu vai |
sa eva deva evā'tra ceśvaraḥ so'pi muktarāṭ || 46 ||
[Analyze grammar]

sa eva kṛtakṛtyo'sti sādhurevā'sti so'pi ca |
nārāyaṇaḥ sa evā'sti tārako gurureva saḥ || 47 ||
[Analyze grammar]

durjayaṃ kāmasaṃkalpaṃ durjeyaṃ strīdhanādikam |
durjeyaṃ mānasaṃ svasya durjayā vāsanā tathā || 48 ||
[Analyze grammar]

tṛṣṇā cāpi ca durjeyā jitā tvayā kṛtātmanā |
jitaṃ yenā'tra śiśnaṃ ca rasanā yena sañjitā || 49 ||
[Analyze grammar]

manorājo jito yena sarvaṃ jitaṃ jitātmanā |
prāpnuhi vijayaṃ putrā'sāre māyāmaye drutam || 50 ||
[Analyze grammar]

prāpnuhi vijayaṃ pare brahmaṇyapi sanātane |
śreyaste'stu śubhaṃ te'stu pramodaste'stu sūtsavaḥ || 51 ||
[Analyze grammar]

śāśvatānandamagnaśca bhava mukto hareḥ pade |
tvāṃ dṛkṣyāmyakṣare dhāmni yuktamaṇḍalamadhyagaḥ || 52 ||
[Analyze grammar]

patnīyuto hi tvāṃ putra nārāyaṇasvarūpiṇam |
ityuktaḥ kṛtatilakaḥ kṛtasnehaḥ suto'pi ca || 53 ||
[Analyze grammar]

natvā pitroḥ pādajalaṃ pītvā kṛtvā ca maṃgalam |
bhrātṛśataṃ tathā natvā yayau gokarṇatīrthakam || 54 ||
[Analyze grammar]

hare kṛṣṇa hare viṣṇo hare kṛṣṇanarāyaṇa |
hare rādhāpate lakṣmīpate hare hare prabho || 55 ||
[Analyze grammar]

ityevaṃ bhajanaṃ kurvan karatālena vai tataḥ |
padbhyāṃ yayau jālikātaḥ somanāthaṃ sutīrthakam || 56 ||
[Analyze grammar]

bhavanāthaṃ śarabhaṃ ca satītīrthaṃ tato yayau |
tatastīrthaṃ ca gokarṇaṃ viṣṇuṃ pupūja sādaram || 57 ||
[Analyze grammar]

divyakarṇābhidhaṃ nārāyaṇaṃ natvā tato yayau |
svargalakṣmīmahātīrthaṃ tato brāhmīṃ mahānadīm || 58 ||
[Analyze grammar]

tato gokarṇaśaṃbhuṃ ca ṛṣivāsāṃstato yayau |
nārikeladrumāṇāṃ sa vane vāsaṃ tato'karot || 59 ||
[Analyze grammar]

ārādhanāṃ hareścakre sādhusevāṃ cakāra saḥ |
japaṃ cakāra me nāmnāṃ kṛṣṇanārāyaṇaprabho || 60 ||
[Analyze grammar]

bhajanaṃ pracakāraivaṃ satataṃ māṃ smaraṃstathā |
satāṃ bhikṣānnalābhena dehayātrāṃ nyavartayat || 61 ||
[Analyze grammar]

navā'yutasamāścāsīdbhikṣānnaparipoṣakaḥ |
tataḥ sahasravarṣāṇi kandamūlā'śano'bhavat || 62 ||
[Analyze grammar]

pañcasāhasravarṣāṇi tataḥ śuṣkadalāśanaḥ |
athā'bhavattato vāyvāhāro'tiṣṭhat samādhigaḥ || 63 ||
[Analyze grammar]

ātmānamātmani dhyāyan yuyuje paramātmanā |
lakṣavarṣe prayāte tu sampūrṇe cāmbarāttataḥ || 64 ||
[Analyze grammar]

viṣṇorvimānamāyātaṃ pārṣadairdivyaśobhanaiḥ |
sahitaṃ tadvilokyā'yamālambāyanasādhurāṭ || 65 ||
[Analyze grammar]

vihāya bhautikaṃ tūrṇaṃ divyadeho'bhavattadā |
caturbhujaḥ śaṃkhacakragadāpadmādicihnakaḥ || 66 ||
[Analyze grammar]

viṣṇoḥ pārṣadavaryaśca natvā ṛṣigaṇān muniḥ |
yayau dhāma harekṛṣṇa vadan vismāpayan janān || 67 ||
[Analyze grammar]

atha prayāṇe ṛṣayaścā'stuvan taṃ munīśvaram |
asmānnaya mahābhakta dhāma vaikuṇṭhamuttamam || 68 ||
[Analyze grammar]

sa cāha ṛṣayaḥ sarve sajjā bhavantu satvaram |
gatvā vaikuṇṭhamevā'haṃ cāgacchāmi vimānakaiḥ || 69 ||
[Analyze grammar]

sahito bhavato netuṃ pṛṣṭvā viṣṇuṃ narāyaṇam |
omityuktaśca ṛṣibhiryayau tūrṇaṃ harergṛham || 70 ||
[Analyze grammar]

pārṣadaiḥ satkṛtaścā'yaṃ vimānādavatāritaḥ |
vaikuṇṭhe divyasaudhāgrye nyāviśat saudhamuttamam || 71 ||
[Analyze grammar]

adṛṣṭvā śrīhariṃ saudhe tūrṇaṃ viniryayau bahiḥ |
mārgayāmāsa taṃ saudhaṃ yatrā''ste śrīnarāyaṇaḥ || 72 ||
[Analyze grammar]

gatvā kṛtvā daṇḍavacca pūjāṃ cakāra vai hṛdā |
jaya nārāyaṇakṛṣṇetyuvācā'pi punaḥpunaḥ || 73 ||
[Analyze grammar]

netrāśrūṇi mumocā'pi gadgadaścā'bhavatkṣaṇam |
papāta pādayorviṣṇoḥ papau pādā'mṛtaṃ tataḥ || 74 ||
[Analyze grammar]

svāgatena hariṇā'sau pṛṣṭo jagāda hṛdgatam |
kṛpayā te prabho prāptaścaraṇau śāśvatau mudā || 75 ||
[Analyze grammar]

gokarṇe nivasantaśca munayo ye tapodhanāḥ |
prayāṇakāle māmāhuḥ sahayānāya dhāma te || 76 ||
[Analyze grammar]

mayā tvabhihitaṃ cāste gatvā tvāyāmi sarvathā |
ājñāṃ hareḥ samādāya sajjā bhavantu sarvaśaḥ || 77 ||
[Analyze grammar]

ityuktāste pratīkṣante vaikuṇṭhāgamanaṃ prati |
yadyājñā te bhaved yāmi cānayāmi tavā'ntikam || 78 ||
[Analyze grammar]

nārāyaṇastadā prāha yogyaṃ bhakta tvayā kṛtam |
paraṃ nibodha me kiñcit sārāt sārataraṃ param || 79 ||
[Analyze grammar]

mama bhaktiṃ vinā syānna vāso vaikuṇṭhake mama |
gokarṇe santi ṛṣayastapodravyāstapaḥpriyāḥ || 80 ||
[Analyze grammar]

manonigrahavantaścendriyanigrahiṇastathā |
ātmamātraratā nityaṃ jñānamātraparāyaṇāḥ || 81 ||
[Analyze grammar]

vratamātraparāścāti bahavo rāgavarjitāḥ |
yogakriyāparāścāpi śuṣkatapasivartinaḥ || 82 ||
[Analyze grammar]

mama bhaktivihīnāste vinā vai madupāsanam |
kathamarhā bhaveyuścāgamārthaṃ mama dhāma te || 83 ||
[Analyze grammar]

abhaktānāṃ na vaikuṇṭhaṃ yadyapi tapatāṃ sadā |
karmaṭhānāṃ na vaikuṇṭhaṃ hyanārādhanavedinām || 84 ||
[Analyze grammar]

mama dhāmā''game hetuḥ snehabhaktiḥ sadā mama |
mama bhaktasya vai sevā mayi cātmaniveditā || 85 ||
[Analyze grammar]

dhyānaṃ me bhajanaṃ cāpi kīrtanaṃ satataṃ mama |
tapasāṃ ca vratānāṃ ca dānānāṃ mayi cā'rpaṇam || 86 ||
[Analyze grammar]

sarvakarmārpaṇaṃ cāpi dīkṣāyā grahaṇaṃ mama |
mama mantrasya divyasya grahaṇaṃ kāraṇaṃ tathā || 87 ||
[Analyze grammar]

mamā''rādhanamevāpi vaikuṇṭhāgamane yataḥ |
apakvā ye yoginaste tapanti cirakālinaḥ || 88 ||
[Analyze grammar]

daśalakṣasamāḥ kecit kecillakṣasamāstathā |
anye bahuyugāḥ santi sahasraśaścirāyuṣaḥ || 89 ||
[Analyze grammar]

yāhi tebhyaḥ pradehyenaṃ mantraṃ mokṣapradaṃ mama |
dīkṣāṃ datvā nāmasatraṃ pravartaya mahāmakham || 90 ||
[Analyze grammar]

anādiśrīkṛṣṇanārāyaṇo me śaraṇaṃ patiḥ |
mantrametaṃ pradatvā'tha dīkṣāṃ dehi prasāttvikīm || 91 ||
[Analyze grammar]

kaṇṭhe tu taulasīṃ kaṇṭhīṃ mālāṃ ca japamālikām |
tilakaṃ candrakaṃ cāpi cakrādyaṃkanamityapi || 92 ||
[Analyze grammar]

anādiśrīkṛṣṇanārāyaṇa śrīpuruṣottama |
rādhālakṣmīpate kṛṣṇanārāyaṇa vibho prabho || 93 ||
[Analyze grammar]

evaṃ satataṃ sādhūnāṃ kīrtanaṃ samprakāraya |
divāniśaṃ mahāyajñaṃ tatra tiṣṭhantu dīkṣitāḥ || 94 ||
[Analyze grammar]

yeṣāmārādhanā pūrṇā bhaktiḥ pūrṇā bhaviṣyati |
tānahaṃ nityadā naijavimānena suvarcasā || 95 ||
[Analyze grammar]

samāneṣye hi vaikuṇṭhaṃ yāhi satraṃ pravartaya |
ityukto bhaktarāṭ natvā''lambāyano hi pārṣadaḥ || 96 ||
[Analyze grammar]

āyayau divyadehena vimānena purālayam |
gokarṇaṃ tejasā tūrṇaṃ prakāśitaṃ tadā'bhavat || 97 ||
[Analyze grammar]

dudruvuḥ saṃbhramayuktāḥ ṛṣayastaṃ tu pārṣadam |
sajjībhūtān sato natvā''dideśa viṣṇubhāṣitam || 98 ||
[Analyze grammar]

nāmasaṃkīrtanasatraṃ kurvantvatra sudīkṣitāḥ |
ṛṣayo'pi tathā cakrurvaikuṇṭhalabdhaye śubhāḥ || 99 ||
[Analyze grammar]

vividuste ca māhātmyaṃ bhakteḥ śreṣṭhaṃ tapobalāt |
bhaktā bhūtvā dīkṣitāśca labdhvā te japamālikām || 100 ||
[Analyze grammar]

savādyakīrtanaṃ cakrurdivāniśaṃ hi muktaye |
lakṣaśo munayaścāpi prajālokāstathā'pare || 101 ||
[Analyze grammar]

śrutvā tatkīrtanaṃ tatra militvā bhajanaṃ vyadhuḥ |
tattīrthaṃ vaikuṇṭhasatranāmnā khyātiṃ gataṃ tataḥ || 102 ||
[Analyze grammar]

māsānte ye bhaktipakvā jātāsteṣāṃ kṛte hariḥ |
āyayau svavimānena lakṣmīśrīsahitaḥ prabhuḥ || 103 ||
[Analyze grammar]

ninye sahasrasādhūṃśca vaikuṇṭhe parameśvaraḥ |
evaṃ māsāntarānte ca trimāsānte'pi kāṃścana || 104 ||
[Analyze grammar]

catuṣpaṃcādimāsānte ninye lakṣajanān hariḥ |
pakvāḥ pakvāḥ prabhūtvā ca ṛṣayo yānti dhāma te || 105 ||
[Analyze grammar]

gokarṇasthāḥ sādhavaste varṣānte sarvaśo gatāḥ |
vaikuṇṭhaṃ paramaṃ dhāma mahāścaryamabhūddhi tat || 106 ||
[Analyze grammar]

nāmasatraṃ samārabhya devādyā mānavāstataḥ |
gokarṇe tīrthake yānti vaikuṇṭhaṃ parameśvaram || 107 ||
[Analyze grammar]

ityevaṃ kathitaṃ lakṣmi bhaktimāhātmyamuttamam |
sādhoḥ saṃgena bhagavān kārayitvā tu kīrtanam || 108 ||
[Analyze grammar]

pāvayitvā tāpasāṃśca ninye dhāmottamaṃ nijam |
varṣānte sādhurevā'yaṃ nāmasatraṃ samāpya ca || 109 ||
[Analyze grammar]

yayau dhāma harerdivyadeho divyavimānagaḥ |
koṭiśaḥ sādhavastatra siṃhā'raṇye tato'bhavan || 110 ||
[Analyze grammar]

viṣṇudhāmasamaṃ dhāma gokarṇaṃ tadabhūnmahat |
evaṃ lakṣmi satāṃ sevā phalatyeva cireṇa ha || 111 ||
[Analyze grammar]

satsaṃgo'pi phalatyeva cireṇā'pi nṛjanmanām |
tasmāt satāṃ susatsaṃgaḥ kartavyaḥ phalado bhavet || 112 ||
[Analyze grammar]

paṭhanācchravaṇādasya smaraṇānmuktido'pi ca |
satsaṃgayogo bhavati lakṣmi śāśvatamokṣadaḥ || 113 ||
[Analyze grammar]

itiśrīlakṣmīnārāyaṇīyasaṃhitāyāṃ tṛtīye dvāparasantāne lokavyāyāmaśālibhirapi satsaṃgena muktirlabhyate tāpasairapi tathetyarthe ālambāyanasādhoḥ saṃgena lakṣādhilakṣamānavānāṃ gokarṇe muktiprāptirityādinirūpaṇanāmā saptanavatitamo'dhyāyaḥ || 97 ||
[Analyze grammar]