Chapter 90

śrīpuruṣottama uvāca |
śṛṇu nārāyaṇīśri tvaṃ yeṣāṃ svargaṃ hi śāśvatam |
dānadharmayutā nityaṃ devabhaktāḥ śubhāśayāḥ || 1 ||
[Analyze grammar]

tapaḥsatyaparāḥ śuddhā yānti svargaṃ nirāmayam |
guruśuśrūṣāvadātā vidyāśīlasuśobhanāḥ || 2 ||
[Analyze grammar]

pratigrahāgharucayo yānti svargaṃ nirāmayam |
svārthāt kīrterbhayād vyādheḥ kaṣṭād dāridryadūṣaṇāt || 3 ||
[Analyze grammar]

jñānāllobhādāśrayācca snehāt sambandhayojanāt |
sahavāsādbhaktimanto yānti svargaṃ nirāmayam || 4 ||
[Analyze grammar]

kṣamādhairyatitikṣāḍhyāḥ satkāryeṣu sadotthitāḥ |
pūjādyācārasampannā yānti svargaṃ nirāmayam || 5 ||
[Analyze grammar]

madyamāṃsavyavāyādinivṛttāścauryavarjitāḥ |
devaprasādabhoktāro yānti svargaṃ nirāmayam || 6 ||
[Analyze grammar]

dharmaśālāprakartāro deśoddhārādikāriṇaḥ |
drumodyānāśramapāśca yānti svargaṃ nirāmayam || 7 ||
[Analyze grammar]

grāmanagarapātāraḥ prajārakṣāvidhāyakāḥ |
āpatsahāyadāḥ sarve yānti svargaṃ nirāmayam || 8 ||
[Analyze grammar]

bhūṣāmbarapradātāraścānnapānapradāstathā |
kuṭumbasevakāḥ sarve yānti svargaṃ nirāmayam || 9 ||
[Analyze grammar]

hiṃsādrohādinivṛttāḥ soḍhāraścāpadāṃ sadā |
śaraṇasya pradāḥ sarve yānti svargaṃ nirāmayam || 10 ||
[Analyze grammar]

āśrayadāstathāpekṣyaparyaṃkaśayanapradāḥ |
yānavāhanadātāro yānti svargaṃ nirāmayam || 11 ||
[Analyze grammar]

grāmakṣetrādidātāro gṛhagovṛṣadāstathā |
pātropakaraṇaprādā yānti svargaṃ nirāmayam || 12 ||
[Analyze grammar]

vṛddhaṃ guruṃ suraṃ kāntaṃ mātaraṃ pitaraṃ harim |
śuśrūṣayanti sādhvīṃ ca yānti svargaṃ nirāmayam || 13 ||
[Analyze grammar]

snehavanto yathāyogyaṃ hitakārāḥ kuṭumbinām |
parārthasādhakāḥ sujñā yānti svargaṃ nirāmayam || 14 ||
[Analyze grammar]

dharmāḍhyā mādhavabalā jitatṛṣṇā jitecchavaḥ |
ārādhanaratā dhīrā yānti svargaṃ nirāmayam || 15 ||
[Analyze grammar]

aparādhidayāvanto vatsalā mārdavānvitāḥ |
adaṇḍaroṣāḥ śāstrajñā yānti svargaṃ nirāmayam || 16 ||
[Analyze grammar]

ātitheyāḥ śaraṇyāśca sahasradāḥ susādhavaḥ |
anekatrāṇakartāro yānti svargaṃ nirāmayam || 17 ||
[Analyze grammar]

svarṇarūpyakaratnānāṃ dātāro vāsasāṃ tathā |
mauktikānāṃ pradātāro yānti svargaṃ nirāmayam || 18 ||
[Analyze grammar]

mahotsaveṣu dravyāṇāṃ vastūnāṃ cārpakāstathā |
yautakādipradātāro yānti svargaṃ nirāmayam || 19 ||
[Analyze grammar]

vaivāhikānāṃ vastūnāṃ dīkṣāṃgānāṃ tathā pradāḥ |
dāsadāsīpradāścāpi yānti svargaṃ nirāmayam || 20 ||
[Analyze grammar]

prapā''rāmasabhākūpasarasāṃ ca vidhāyakāḥ |
dīrghikāsatrakartāro yānti svargaṃ nirāmayam || 21 ||
[Analyze grammar]

kṣetravasatisaudhānāṃ gahvarasaritāṃ tathā |
jalāśayānāṃ dātāro yānti svargaṃ nirāmayam || 22 ||
[Analyze grammar]

kaṇānāṃ dvidalānāṃ ca dhānyānāṃ dāyinastathā |
rasānāṃ ca pradātāro yānti svargaṃ nirāmayam || 23 ||
[Analyze grammar]

miṣṭānnānāṃ phalānāṃ ca kandānāṃ patriṇāṃ tathā |
śākānāṃ ca pradātāro yānti svargaṃ nirāmayam || 24 ||
[Analyze grammar]

duḥkhānāṃ hārakā ye ca tāpasantāpanāśakāḥ |
vipadvināśakā lakṣmi yānti svargaṃ nirāmayam || 25 ||
[Analyze grammar]

yatra kvāpi kule jātā api snehasvabhāvinaḥ |
vaṃśavistāravantaśca putrapautrasutānvitāḥ || 26 ||
[Analyze grammar]

dayāvantaḥ sādhuśīlā lajjāmaryādayā sthitāḥ |
amṛṣāhṛdayāḥ śāntā yānti svargaṃ nirāmayam || 27 ||
[Analyze grammar]

parā'niṣṭā'prakartāro nindādveṣā'spṛśo janāḥ |
santuṣṭyā gurusevāḍhyā yānti svargaṃ nirāmayam || 28 ||
[Analyze grammar]

āśīrvādagṛhītāraḥ puṇyakāryaniṣeviṇaḥ |
puṇyasāhāyyakartāro yānti svargaṃ nirāmayam || 29 ||
[Analyze grammar]

pratiṣṭhāyāmalubdhāḥ svagaurave snehavarjitāḥ |
nirmānā dāsavadbhāvā yānti svargaṃ nirāmayam || 30 ||
[Analyze grammar]

nirapekṣā dhanānāṃ ca mahāsantoṣasaṃbhṛtāḥ |
aparigrahasarvasvā yānti svargaṃ nirāmayam || 31 ||
[Analyze grammar]

parigrahe sadā cāpyakṛtalambakarā'nanāḥ |
luñcābhakṣyādiśūnyāśca yānti svargaṃ nirāmayam || 32 ||
[Analyze grammar]

sarvaghātādiśūnyāśca tathā'tmaghātavarjitāḥ |
brahmaghātādiśūnyāśca yānti svargaṃ nirāmayam || 33 ||
[Analyze grammar]

sahadharmasthitā nityaṃ gṛhasthā dharmikarmiṇaḥ |
bhaktidānaparāḥ śuddhā yānti svargaṃ nirāmayam || 34 ||
[Analyze grammar]

śīlavratinaḥ satataṃ vanavratina eva ca |
sannyāsavrataśīlāśca yānti svargraṃ nirāmayam || 35 ||
[Analyze grammar]

kṛtasyā''ghātakāścāpi viśvāsasyā'pyaghātakāḥ |
īṣṭasyā'ghātakāḥ puṇyā yānti svargaṃ nirāmayam || 36 ||
[Analyze grammar]

lokopakārakārāśca mokṣopakārakārakāḥ |
hitopakārakārāśca yānti svargaṃ nirāmayam || 37 ||
[Analyze grammar]

śāstropakārakārāśca kalopakārakārakāḥ |
udyogopakārakārā yānti svargaṃ nirāmayam || 38 ||
[Analyze grammar]

navīnayojanāvanto deśavighnanivārakāḥ |
prajāsaukhyaprakartāro yānti svargaṃ nirāmayam || 39 ||
[Analyze grammar]

aghātā ye sadā santi cā'hiṃsāvrataśīlinaḥ |
devāśritāścātmatṛptā yānti svargaṃ nirāmayam || 40 ||
[Analyze grammar]

aghātayitvā ye santi ghātakākhyā janāstviha |
teṣāṃ saṃgaṃ na kurvanti yānti svargaṃ nirāmayam || 41 ||
[Analyze grammar]

śrīnārāyaṇīśrīruvāca |
aghātayitvā'pi ca ye ghātakāḥ santi mānavāḥ |
tāṃstān veditumicchāmi pradarśaya hare'tra me || 42 ||
[Analyze grammar]

śrīpuruṣottama uvāca |
śṛṇu lakṣmi kathayāmi tādṛśān mānavānapi |
ahiṃsayitvā'pi janā hiṃsakāḥ saṃbhavanti tān || 43 ||
[Analyze grammar]

ghātavaduḥkhado yaḥ syād ghātakaḥ sa tu kīrtitaḥ |
ghātavat phaladaścāpi ghātakaḥ samprakīrtyate || 44 ||
[Analyze grammar]

bhikṣukaṃ svayamāhūya bhikṣārthe tithivarjitam |
brūyānnāstīti yaḥ kāle vidyād bhikṣuhaṇaṃ tu tam || 45 ||
[Analyze grammar]

nyāyasthitaṃ tu yo rājā daṇḍyaṃ matvā tataḥ param |
vṛttiṃ harati tasmāt sa jīvahā vṛttihārakaḥ || 46 ||
[Analyze grammar]

tṛṣitānāṃ gavāṃ vighnaṃ tathānyeṣāṃ karoti yaḥ |
jalahā goghna evāpi prāṇahā sa bhavediha || 47 ||
[Analyze grammar]

yaśca śāstraṃ niyamāṃśca śāsanaṃ copadeśanam |
hanti cājño dūṣayati nyāyahā śāstrakārahā || 48 ||
[Analyze grammar]

nijaputrīṃ yuvatīṃ ca samaye sadṛśe vare |
na prayacchati kanyāhā dharmahā sa bhavediha || 49 ||
[Analyze grammar]

adharmiṣṭhaśca yaḥ sādhudvijapūjyādidehiṣu |
marmabhedaṃ kriyācchokaṃ pūjyahā sa mato bhavet || 50 ||
[Analyze grammar]

paṃgorandhasya mūrkhasya nāryāścā'nāthadehinaḥ |
sarvasvahartā bhavati jīvahā sarvahā tathā || 51 ||
[Analyze grammar]

grāmāraṇyavanādau cā'śramakṣetragṛhādiṣu |
agnidātā sarvahā vai grāmahā brahmahā mataḥ || 52 ||
[Analyze grammar]

viṣadaścā'stranikṣeptā rodhayitā ca mardakaḥ |
pāśado bhayamārgadarśako'niṣṭauṣadhipradaḥ || 53 ||
[Analyze grammar]

abhicāraprado mithyākalaṃkado yaśaḥprahā |
rājyahā ca kalāyantrasādhanādyapahārakaḥ || 54 ||
[Analyze grammar]

aṅguṣṭhahā ṛtuhā ca dharmahā yajñahā tathā |
lagnahā pāṭhahā pūjāghātako bhaktighātakaḥ || 55 ||
[Analyze grammar]

garbhahā netrahā hastaghātako liṃgahā tathā |
bījahā muṣkahā jīvyapaśuhāraka iṣṭahā || 56 ||
[Analyze grammar]

gurūṇāṃ dhikpravaktā ca sarve te prāṇaghātinaḥ |
mokṣahā cātmahā prokto nāstiko brahmahā mataḥ || 57 ||
[Analyze grammar]

śīlahā dharmahā proktaḥ pāpakṛt svargahā mataḥ |
satītvadūṣako nārīghnaścokto dharmahā api || 58 ||
[Analyze grammar]

brahmaṇaḥ śrīharerbhītiṃ tyaktvā me paramātmanaḥ |
hano bhavanti te tasmāt sarve'pi brahmaghātinaḥ || 59 ||
[Analyze grammar]

nirayā yāmyalokā vai teṣāṃ tu śāśvatīḥ samāḥ |
pretabhāvāstathā garbhavāsāstiryagbhavādayaḥ || 60 ||
[Analyze grammar]

nārakāste narakasthā yatra kvāpi bhavanti vai |
sarvadā duḥkhabhoktāraḥ sukhaleśavivarjitāḥ || 61 ||
[Analyze grammar]

nahi teṣāmayaṃ lokaḥ svargaṃ naiva kuto'kṣaram |
kintu madbhaktimāsādya taranti kṛpayā cirāt || 62 ||
[Analyze grammar]

śrīnārāyaṇīśrīruvāca |
nanu pāpakarāṇāṃ te kṛpā vai jāyate katham |
tatrāpi ghātakānāṃ vai krūrāṇāṃ lokanāśinām || 63 ||
[Analyze grammar]

śrīpuruṣottama uvāca |
śṛṇu nārāyaṇīśri tvaṃ yathā me jāyate kṛpā |
kramaṃ te viśadaṃ cātra vakṣyāmi yena mokṣaṇam || 64 ||
[Analyze grammar]

ghātakānāṃ tīvravegavatāṃ śāpā bhavanti vai |
prāṇināṃ śāpaniḥśvāsaiḥ puṇyahānirdrutaṃ bhavet || 65 ||
[Analyze grammar]

śīghraṃ ca duḥkhabhogānāmānantyamupatiṣṭhati |
gṛhaṃ dvārā sutāḥ putryaḥ kuṭumbaṃ paśavo dhanam || 66 ||
[Analyze grammar]

acirādeva naśyanti dāridryaṃ jāyate'saham |
rogā bhayaṃkarāścāpi sarvanāśo'pi jāyate || 67 ||
[Analyze grammar]

annasalilavastrāṇāṃ prāptiḥ sarvā vilīyate |
bhikṣukāḥ kiṃkarā yadvat kadaryāste bhramanti ca || 68 ||
[Analyze grammar]

dhikkārā'maṃgalāḥ sthānahīnā vivāsitāstataḥ |
śvavalloke vibhramanti duḥkhadāridryadharṣitāḥ || 69 ||
[Analyze grammar]

duḥkhānyetāni saṃbhuktvā ciraṃ dhairyavivarjitāḥ |
titikṣārahitā duḥkhadaṇḍairmārdavamāgatāḥ || 70 ||
[Analyze grammar]

śocanti sutarāṃ kvāpi bhāgyaṃ daivaṃ hariṃ tathā |
hṛdaye śaraṇaṃ yānti duḥkhanivārakaṃ prati || 71 ||
[Analyze grammar]

idaṃ duḥkhamasahyaṃ me līyatāṃ nā''care punaḥ |
aho nārāyaṇa duḥkhaṃ mama nāśaya cā'saham || 72 ||
[Analyze grammar]

śaraṇaṃ te patito'smi cāsahyaṃ tvaṃ nivāraya |
dānaṃ puṇyaṃ tīrthayātrāṃ kariṣye satkriyāṃ śubhām || 73 ||
[Analyze grammar]

japaṃ sevāṃ satāṃ vāpi kariṣye mānatāṃ hareḥ |
vrataṃ tapo guroścāpi prāyaścittaṃ karomi ca || 74 ||
[Analyze grammar]

ityevaṃ śubhasaṃkalpāḥ prajāyante'vaśasya vai |
rājadaṇḍairlokadaṇḍairdevadaṇḍairvipadgaṇaiḥ || 75 ||
[Analyze grammar]

duḥkhadaṇḍairyāmyadaṇdairmahākaṣṭātikaṣṭakaiḥ |
prajāyante śubhā buddhistato yāti hṛdā harim || 76 ||
[Analyze grammar]

dharmaṃ puṇyaṃ vrataṃ bhaktiṃ japaṃ dānaṃ śubhaṃ prati |
evaṃ śubhaprasaṃgena śubhakriyāvidhāyinā || 77 ||
[Analyze grammar]

manākpuṇyaṃ prāpyate vai pāpadhvaṃso manāṅ manāk |
śanaiḥ puṇyakriyābhiśca suyogāḥ saṃbhavanti ca || 78 ||
[Analyze grammar]

satāṃ sevā tīrthasevā paropakāra ārjavam |
bhajanaṃ ghātapāpebhyo bhayaṃ me smaraṇaṃ tathā || 79 ||
[Analyze grammar]

evaṃ cireṇa karaṇairyāti me śaraṇaṃ satām |
sādhavo mama bhaktāśca mantradānaṃ ca mālikām || 80 ||
[Analyze grammar]

nāmakīrtanabhaktiṃ ca satsaṃgaṃ kārayanti tam |
evaṃ puṇyodaye citte nairmalye ca mumukṣutā || 81 ||
[Analyze grammar]

jāyate līyate bubhukṣatā sampadyate śritaḥ |
śiṣyaḥ sa vaiṣṇavaḥ syācca jijñāsati hariṃ gurum || 82 ||
[Analyze grammar]

kathāsatsaṃgasevābhirvardhate bhajane'niśam |
ārādhanāyāḥ sopānaṃ yathā yathā'dhirohati || 83 ||
[Analyze grammar]

tathā tathopāsanā me vardhate prabalā sukhā |
evaṃ dagdhā'gha eva syāt puṇyaśevadhirityapi || 84 ||
[Analyze grammar]

tato dāsyaṃ mama cāptastataścātmaniveditām |
tataḥ kṛpā me bhavati jāyate paṃktipāvanaḥ || 85 ||
[Analyze grammar]

sādhurvā jāyate bhakto mukto vā jāyate śubhaḥ |
paradhāmā'rha evā'pi jāyate ca maheśvaraḥ || 86 ||
[Analyze grammar]

evaṃ lakṣmi naro nārāyaṇo bhavati sā kṛpā |
kāraṇaṃ tatra boddhavyā mokṣadā manniyojitā || 87 ||
[Analyze grammar]

pāpāḥ pāpatamāścāpi tarantyeva cireṇa ha |
yātanāduḥkhabhogāścā'sahyāste gurusadṛśāḥ || 88 ||
[Analyze grammar]

daṇḍā nivartane loke bhavanti hetavaḥ kvacit |
evamārttāḥ prāyaśo māṃ bhajanti bahuduḥkhitāḥ || 89 ||
[Analyze grammar]

arthārthinaśca vai tadvat tarantyapi na saṃśayaḥ |
sādhavastārakāḥ śīghraṃ cen milanti kṛpāvaśāḥ || 90 ||
[Analyze grammar]

tebhyo datvā manaḥprāṇāṃstaranti pāpino'pi ca |
prātaḥ sampūjya sādhūṃśca vṛddhān praṇamya sarvadā || 91 ||
[Analyze grammar]

gurūn samarpya viprāṃśca taranti pāpakoṭitaḥ |
arpayed vastujātaṃ ca toṣayet sādhusattamān || 92 ||
[Analyze grammar]

mama bhaktāḥ śīladharmā niḥspṛhāḥ svādavarjitāḥ |
puṇyābdhayaḥ sādhavo ye tebhyo dattaṃ mahāphalam || 93 ||
[Analyze grammar]

kāmakrodhādirahitāḥ sarvasahā jitendriyāḥ |
tāpasā hitamaitrāśca tebhyo dattaṃ mahāphalam || 94 ||
[Analyze grammar]

arāgā jñānavijñānapāragāḥ satyasadvratāḥ |
mokṣamārgaratāḥ santastebhyo dattaṃ mahāphalam || 95 ||
[Analyze grammar]

yeṣāṃ śiṣyāḥ pratīkṣante suvṛṣṭimiva karṣukāḥ |
tebhyo dattaṃ prajāyeta sahasraguṇitaṃ tviha || 96 ||
[Analyze grammar]

śīlacāritrayuktā ye kṛśā''yajīvikādayaḥ |
bhikṣukāḥ sādhavo viprāsteṣu dattaṃ mahāphalam || 97 ||
[Analyze grammar]

svabhaktāḥ svagṛhāvāsāḥ svabalāḥ svāśrayā dvijāḥ |
pāvanāścārthinaścet syusteṣu dattaṃ mahāphalam || 98 ||
[Analyze grammar]

yasya satrāṇi vidyante baṭavaḥ sādhavo gṛhe |
bhuñjate yasya tasyāpi satre dattaṃ mahāphalam || 99 ||
[Analyze grammar]

hṛtasarvavidhasvāśca bhaktimātraparāyaṇāḥ |
anāthāḥ sādhavo ye syusteṣu dattaṃ mahāphalam || 100 ||
[Analyze grammar]

pārāyaṇasthitā yajñasthitā mahotsavasthitāḥ |
tebhyaḥ pūrtyarthamevāpi dattaṃ sarvaṃ mahāphalam || 101 ||
[Analyze grammar]

āpatkāle kṛśaprāṇāḥ kṛśadravyāḥ kṛśavratāḥ |
tathāpi sādhuśīlā ye tebhyo dattaṃ mahāphalam || 102 ||
[Analyze grammar]

tyāgavantaśca niḥsnehā dambhamānavivarjitāḥ |
sādhavaḥ sādhubhūṣā ye tebhyo dattaṃ mahāphalam || 103 ||
[Analyze grammar]

jāpakā brahmasarvasvā bhaikṣācārāstapasvinaḥ |
santo mṛṣāgandhaśūnyāstebhyo dattaṃ mahāphalam || 104 ||
[Analyze grammar]

bālā'parādhaśūnyāśca cātmā'parādhavarjitāḥ |
brahmā'parādhaśūnyā ye tebhyo dattaṃ mahāphalam || 105 ||
[Analyze grammar]

satāṃ ye tu kṛpāpātrāṇyapi bhaktā harestathā |
sādhvīsantoṣapātrāṇi tebhyo dattaṃ mahāphalam || 106 ||
[Analyze grammar]

ityevaṃ kamale dattvā sādhubhyo dānamuttamam |
annajalāmbarayogyavastvātmakaṃ taret tataḥ || 107 ||
[Analyze grammar]

naukā vai sādhavaḥ santi pāpinaḥ prastarāḥ khalu |
sādhunaukāstarantyeva tārayantyapi cā''śritān || 108 ||
[Analyze grammar]

paṭhanācchravaṇāccāsya ghātapāpapraṇāśanam |
sādhusevāphalaṃ prāpya svargaṃ labheta śāśvatam || 109 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne svargagāminaḥ aghātayitvā'pi ghātakinaḥ kṛpayā kramoddhāraḥ satsevayoddhāraścetyādinirūpaṇanāmā navatitamo'dhyāyaḥ || 90 ||
[Analyze grammar]