Chapter 91

śrīnārāyaṇīśrīruvāca |
ghātakināṃ satāṃ yogo yadi naivopajāyate |
kathamuddharaṇaṃ teṣāṃ bhavet kathaya cottamam || 1 ||
[Analyze grammar]

śrīpuruṣottama uvāca |
sādhavaḥ sarvataḥ śreṣṭhā mileyurna tadā bhuvi |
śreṣṭhatīrtheṣu gantavyamadhvarā'vabhṛthe ca vā || 2 ||
[Analyze grammar]

kuṃbhasūrye pragantavyaṃ tīrthe snātvā pramucyate |
kuṃkumavāpikātīrthe gomatītīrthamityapi || 3 ||
[Analyze grammar]

svarṇarekhā mahattīrthaṃ nārāyaṇahṛdaḥ svayam |
hiraṇyāsaṃgamastīrthaṃ somanāthe mahattamam || 4 ||
[Analyze grammar]

narmadāsāgarayogaścoṃkāreśvara ityapi |
śrīśailaścāpi sahyādriḥ paṃpāsarastathottamam || 5 ||
[Analyze grammar]

dakṣiṇodadhibhūtīraḥ setuḥ kanyākumārikā |
godāvarī candrabhāgā kāverī sarayūstathā || 6 ||
[Analyze grammar]

gaṃgā ca yamunā brahmaputrā sindhuḥ sarasvatī |
candravīnā śālavīnā mānapīṃgā tathā sarit || 7 ||
[Analyze grammar]

menakāṃgī ca śikṣāṃgī hyaṃgaśikṣāṃgikā tathā |
hoyāṃgahā cāmurā ca vīnā yānākṣikā tathā || 8 ||
[Analyze grammar]

bālakṛṣṇasaraścāpi dvikalākhyasarastathā |
ovī ca terimā dvīnā volgā ca nīparā tathā || 9 ||
[Analyze grammar]

nārāyaṇī sarvadīrghā viṣaturyasarovaram |
kaṅgūnadī nāyajīrā cittaṃ tuṃgānikaṃ saraḥ || 10 ||
[Analyze grammar]

āmajānā sariccāpi miśūrī mīnakaṃjhukī |
sulīvanasaro vinipegaṃ supārayaṃ saraḥ || 11 ||
[Analyze grammar]

erasaraḥ kāruliṃgī tathā'nyāḥ saritaḥ śubhāḥ |
yatra yatrā'haṃ munibhiḥ saha snātaḥ saritsu vai || 12 ||
[Analyze grammar]

sarovareṣu khāteṣu samudreṣu kṣitau rame |
tatra tatraiva tīrthasya vidhinā snānatastathā || 13 ||
[Analyze grammar]

ghātapāpani naśyanti punaścennā''cared yadi |
matpratimā'mṛtavārbhiḥ snātaḥ śuddhyati tatkṣaṇāt || 14 ||
[Analyze grammar]

matprasādā'śanenā'pi mama sevādibhistathā |
devālayādinirmityā sadyaḥ śuddhyati ghātakaḥ || 15 ||
[Analyze grammar]

mandirādervinirmātā manmūrtisthāpakastathā |
sādhvarthe prāṇadātā ca dharmārthe prāṇadāyakaḥ || 16 ||
[Analyze grammar]

śuddhyatyeva mahāpāpād ghātakākhyāt samūlataḥ |
puṣkaraṃ mānasaṃ cāpi himālayo girīśvaraḥ || 17 ||
[Analyze grammar]

badrikāśramatīrthaṃ ca pāvanāni samastataḥ |
mātṛtīrthaṃ pitṛtīrthaṃ niṣeveta hyatandritaḥ || 18 ||
[Analyze grammar]

gurutīrthaṃ satītīrthaṃ niṣeveta prayatnataḥ |
kāntatīrthaṃ jñānatīrthaṃ cātmatīrthaṃ tataḥ param || 19 ||
[Analyze grammar]

bhaktitīrthaṃ paraṃ tasmādahaṃ sarvottamottamaḥ |
māṃ niṣeveta satataṃ mucyate sarvapātakaiḥ || 20 ||
[Analyze grammar]

yasya ghātaḥ kṛtastasmai svarṇadānaṃ samarpayet |
hastidānaṃ rājyadānaṃ grāmadānaṃ samācaret || 21 ||
[Analyze grammar]

vaṃśasya jīvikādānaṃ kanyādānaṃ tathā''caret |
godānaṃ pṛthivīdānaṃ dadyād ghātavināśakam || 22 ||
[Analyze grammar]

dadyād yadvā svayaṃ svaṃ ca bhṛtyaṃ yathā'nugaṃ yathā |
dāsaṃ yathā yathā śiṣyaṃ yathā krayyaṃ tathā''rpayet || 23 ||
[Analyze grammar]

tenā''pi ghātapāpasya nāśo bhavati padmaje |
yathā toṣo bhavet tacca dadyāt sarvaṃ viśeṣataḥ || 24 ||
[Analyze grammar]

gṛhaṃ bhūṣā'mbarasampatpaśūn dadyāt samastataḥ |
ghātapāpasya nāśo vai tena saṃjāyate'pi ca || 25 ||
[Analyze grammar]

prabhāsaṃ naimiṣāraṇyaṃ gandhamādanaparvatam |
nīlādriṃ cāpi kailāsaṃ kṣetraṃ ca pauruṣottamam || 26 ||
[Analyze grammar]

śuklatīrthaṃ bhṛgutuṅgaṃ dharmāraṇyaṃ ca daṇḍakam |
vyāghrāraṇyaṃ vipāśāṃ ca karatoyāṃ ca gaṇḍakīm || 27 ||
[Analyze grammar]

karmanāśāṃ devadāruvanaṃ kālaṃjaraṃ tathā |
brahmasaro rāmahṛdaṃ citrakūṭa ca vindhyakam || 28 ||
[Analyze grammar]

evamādīni tīrthāni kṛtvā pāpaṃ vinaśyati |
vikhyāto himavān puṇyaḥ siddhanārāyaṇāśritaḥ || 29 ||
[Analyze grammar]

tatra prāṇī yadi yānti prapūjya devatāmunīn |
śuddhaḥ siddho divaṃ yāyād brahmalokaṃ sanātanam || 30 ||
[Analyze grammar]

kāmaṃ krodha lobhamohau madaṃ jitvā''rcya mātaram |
pitaraṃ ca guruṃ natvā gaṇeśaṃ tīrthamāviśet || 31 ||
[Analyze grammar]

tasya pātakanāśaśca tīrthābhigamanād bhavet |
agamyāni tu tīrthāni smṛtvā pāpamapānudet || 32 ||
[Analyze grammar]

brahma medhyaṃ brahma puṇyaṃ brahma svargyamanuttamam |
sādhavo brahma cetyuktāḥ pāvanaṃ brahma sarvadā || 33 ||
[Analyze grammar]

tadāśrayaṃ prakuryādvai pāvanāḥ sādhavaḥ sadā |
devāstu sādhavo yajñamayajanta hariṃ hi mām || 34 ||
[Analyze grammar]

yajñena karmaṇā nityabhajanena ca sevayā |
sevātmakāni dharmāṇi prathamānyuttamāni ca || 35 ||
[Analyze grammar]

āsaṃstairdharmakāryaiśca māhātmyaṃ prasacanta hai |
nākaṃ nityānandayuktaṃ dhāma cāpurhi sādhavaḥ || 36 ||
[Analyze grammar]

yatra sādhyā nityamuktā devā vasanti sevakāḥ |
anādinaśca vai pūrve pūrvatamā vasantyapi || 37 ||
[Analyze grammar]

teṣāmāśrayakaraṇānmuktireva na saṃśayaḥ |
idaṃ rahasyaṃ me lakṣmi śrīpateḥ paramātmanaḥ || 38 ||
[Analyze grammar]

brahmavidyā bhajanaṃ ca matkathā dhyānamutsavaḥ |
manmantradānamityebhistārayanti nijāśritān || 39 ||
[Analyze grammar]

śaraṇāgatarakṣā ca mokṣaśca pāpanāśanam |
bhaktilābho brahmaśīlaṃ bhavanti sādhusaṃgamāt || 40 ||
[Analyze grammar]

idaṃ lakṣmi  mataṃ kaścinmama śrīparamātmanaḥ |
śṛṇuyāt sa labheddhāma bhajitvā māṃ sataśca me || 41 ||
[Analyze grammar]

santaścā'haṃ nivasāmi viśvapaṭṭasaro'bhitaḥ |
anādiśrīkṛṣṇanārāyaṇaḥ śrīkṛṣṇanāmadhṛk || 42 ||
[Analyze grammar]

yatreme lomaśādyāśca ṛṣayaḥ sādhavo'pare |
svataḥprakāśāḥ ṛṣayo vasanti cākṣare tale || 43 ||
[Analyze grammar]

sa deśaḥ pāvano lakṣmi  jalaṃ pāpapraṇāśanam |
tapasā brahmacaryeṇa yajñaistyāgena sevayā || 44 ||
[Analyze grammar]

gatiṃ tāṃ na labhedaśvapaṭṭaṃ saṃsevya yāṃ labhet |
spṛṣṭānyaśvapaṭṭasarojalairgātrāṇi dehinām || 45 ||
[Analyze grammar]

yeṣāṃ teṣāṃ bhavenmuktirākṣarī me kṛpālavāt |
sarvāṇyaśvapaṭṭasarojalaiḥ kāryāṇi dehinām || 46 ||
[Analyze grammar]

karmāṇi te bhuvaṃ tyaktvā yāsyanti paramaṃ padam |
ghātapāpāni sarvāṇi naśyantyaśvasarovare || 47 ||
[Analyze grammar]

yāvadasthi manuṣyasya sarovare'tra tiṣṭhati |
tāvadvarṣasahasrāṇi svargaṃ bhuktvā pramucyate || 48 ||
[Analyze grammar]

cāndrāyaṇasahasrāṇi cāśvapaṭṭajalena vai |
tulyāni naiva jāyante śreṣṭhaṃ cāśvasarojalam || 49 ||
[Analyze grammar]

kuṃkumavāpikātīrthaṃ cāśvapaṭṭasarovaram |
lomaśasyā''śramaścaite saccidānandarūpiṇaḥ || 50 ||
[Analyze grammar]

agnau nikṣiptatṛṇavat pāpānyatra sarovare |
snātasyaiva vinaśyanti mokṣabhāk sa bhavediha || 51 ||
[Analyze grammar]

bhūtānāmiha sarveṣāṃ duḥkhopahatacetasām |
gatimanveṣyamāṇānāṃ cā'śvasaro'dhikā gatiḥ || 52 ||
[Analyze grammar]

anācārāśca ye kecidadharmaśaraṇāśca ye |
teṣāṃ muktipradaṃ cāśvasarovaraṃ mayā''śritam || 53 ||
[Analyze grammar]

aghaiśca prabalairvyāptān pāpinaḥ puruṣā'dhamān |
patato narake cāśvasaraḥ smṛtaṃ hi tārayet || 54 ||
[Analyze grammar]

amaṃgalā aśivāśca kalmaṣaiḥ kṛṣṇatāṃ gatāḥ |
te'śvapaṭṭajale snātvā śivāḥ śuklā bhavanti vai || 55 ||
[Analyze grammar]

kuṃkumavāpikādhūliṃ jano mūrdhnā bibharti yaḥ |
so'rkarūpastviha bhūtvā yāti brahma sanātanam || 56 ||
[Analyze grammar]

aśvapaṭṭasaraḥkṣetrā'nilaḥ spṛśati yaṃ janam |
tasya pāpmā bahurūpaḥ sadyo naśyati mūlataḥ || 57 ||
[Analyze grammar]

vyasanaiścāpadābhiśca vināśonmukhamānavam |
darśanādākṣaraṃ kṣetraṃ rakṣatyatha punāti tam || 58 ||
[Analyze grammar]

vāṅmanaḥkarmaṇāṃ pāpairgrastaṃ janaṃ tu pāpinam |
kuṃkumavāpikā tūrṇaṃ smṛtā tārayati dhruvam || 59 ||
[Analyze grammar]

saptā'varān saptaparān pitṝn tārayate saraḥ |
śrutaṃ pītaṃ vīkṣitaṃ ca spṛṣṭaṃ tathā'vagāhitam || 60 ||
[Analyze grammar]

darśanāt sparśanāt pānācāśvapaṭṭetikīrtanāt |
punātyapuṇyān puruṣān śataśaśca sahasraśaḥ || 61 ||
[Analyze grammar]

utkrāmadbhiśca yaḥ prāṇaiḥ smaret lomaśīṃ bhūmikām |
namet hṛdā'pi sahasā sa gatiṃ paramāṃ vrajet || 62 ||
[Analyze grammar]

na kālācca bhayaṃ tasya na pāpebhyo yamāttathā |
aśvapaṭṭasaraḥsnātasyaiva mokṣārthinastviha || 63 ||
[Analyze grammar]

śṛṇu lakṣmi  dvijatvaṃ vipratvaṃ sādhutvamityapi |
guṇaiḥ sañjāyate samyagguṇāstīrthaniṣevaṇāt || 64 ||
[Analyze grammar]

tīrthaṃ tu sthāvaraṃ cāpi jaṃgamaṃ cātmasaṃsthitam |
sthāvaraṃ mama yogena jaṃgamaṃ sādhavo mama || 65 ||
[Analyze grammar]

ātmastho'haṃ cāntarātmā tīrthatrayaṃ hi tārakam |
guṇāḥ puṇyena cāyānti doṣāḥ pāpena dehinām || 66 ||
[Analyze grammar]

puṇyaṃ satkāryakaraṇaiḥ santi kāryāṇi vai śṛṇu |
mama pūjā mama dhyānaṃ mama kīrtanamuttamam || 67 ||
[Analyze grammar]

mama karmakalāpaśca mama sevā nirantaram |
mama satāṃ sevanaṃ ca puṣpahārārcanādibhiḥ || 68 ||
[Analyze grammar]

jalabhojanadānādyaiḥ pādasaṃvāhanādibhiḥ |
naivedyārpaṇagandhāḍhyā'mbarakuṃkumasatphalaiḥ || 69 ||
[Analyze grammar]

ārārtrikanamaḥ pradakṣiṇastutikṣamāpanaiḥ |
yajñayāgādayaścāpi homā atithisevanam || 70 ||
[Analyze grammar]

anāthabālādisevā satīsādhvīprapūjanam |
mahīmānasvāgatādi goviprādiprasevanam || 71 ||
[Analyze grammar]

bhaktānāṃ jaraṭhānāṃ ca pitrorgurośca sevanam |
mālājapaśca lokānāmupakāravidhāpanam || 72 ||
[Analyze grammar]

ityevamādīni kāryāṇi kūpasarovidhāpanam |
udyānaśālākaraṇaṃ viśrāntidrumaropaṇam || 73 ||
[Analyze grammar]

prapāsatrādikaraṇaṃ dānakṣetrādirakṣaṇam |
vṛddhānāṃ mānanaṃ nityaṃ cāśritānāṃ ca rakṣaṇam || 74 ||
[Analyze grammar]

daivaṃ paitryaṃ sādhavaṃ ca satkāryaṃ sveṣṭadaivikam |
daiśikaṃ jñānadānādi bhaktidānādikaṃ tathā || 75 ||
[Analyze grammar]

evamādīni kurvīta satkāryāṇi śubhāni vai |
tena guṇābhavantyeva śīlavratādayaḥ śubhāḥ || 76 ||
[Analyze grammar]

guṇaiḥ sādhutvamevā'pi brahmiṣṭhatvaṃ ca jāyate |
bhuktirmuktiḥ kare tasya kartavyaṃ nā'vaśiṣyate || 77 ||
[Analyze grammar]

purā kaścid dvijāputro nāmnā kṛśāṃga aicchikam |
mahiṣaṃ navadhuryaṃ covāha śakaṭayojitam || 78 ||
[Analyze grammar]

daṇḍena tāḍayāmāsa tīvraśaṃkuyutena vai |
rudhiraṃ tena nirbhidya niḥsṛtaṃ tannitambataḥ || 79 ||
[Analyze grammar]

tad dṛṣṭvā mahiṣī mātā saśokā putragṛddhinī |
śocantaṃ taṃ sutaṃ prāha mā śucaḥ putra  pāpini || 80 ||
[Analyze grammar]

nā'yaṃ dvijo bhavatyeṣaścāṇḍālo vāhakastava |
dvije dāruṇatā nāsti dvijo maitro bhavet sadā || 81 ||
[Analyze grammar]

dvijaḥ sattvayutaḥ syāddhi dayāvān rakṣakastathā |
ahiṃsro bhaktisampannaḥ sarveṣvātmasamaḥ śuciḥ || 8 ||
[Analyze grammar]

adoṣe daṇḍapāte tu cāṇḍālo lubdhako'thavā |
pravartate ghātakaśca krūro nirdaya udvṛṣaḥ || 83 ||
[Analyze grammar]

ayaṃ pāpo dayāhīnaḥ svajātiṃ tvanuvartate |
śrutvaivaṃ dāruṇaṃ vākyaṃ mahiṣyāstu kṛśāṃgakaḥ || 84 ||
[Analyze grammar]

papraccha mahiṣīṃ natvā brūhi jānāsi māṃ yadi |
mātā me brāhmaṇī cāste kena vā dūṣitā bhavet || 85 ||
[Analyze grammar]

cāṇḍālo hi kathaṃ cā'haṃ mahiṣi  śaṃsa me drutam |
mahiṣī prāha viprāyāṃ vṛṣalena janistava || 86 ||
[Analyze grammar]

kṣetre sasyā'nvite rātrai śayyāyāṃ te pitustadā |
pitari nirgate kṣetre supto'bhūd vṛṣalo'nugaḥ || 87 ||
[Analyze grammar]

karmacārī svavāṭyāśca sastrīko'pi tadaikalaḥ |
andhakāre hyanāvīkṣyā''gatya te jananī tadā || 88 ||
[Analyze grammar]

śayyāyāṃ saha suptā ca kāmabhāvaṃ gatā satī |
labdhavatī tato garbhaṃ daivāt tvaṃ vṛṣalastataḥ || 89 ||
[Analyze grammar]

jānāmyahaṃ samīpasthā kṣetre baddhā ca bālikā |
sa tvaṃ vṛṣalād viprāyāṃ jātaścāṇḍālako hyasi || 90 ||
[Analyze grammar]

durguṇāste niṣekādvai vartante ghātamārakāḥ |
śrutvā kṛśāṃgakastūrṇaṃ natvā ca jananīṃ tadā || 91 ||
[Analyze grammar]

mahiṣīṃ ca tato natvā kṣamāpya mahiṣaṃ tataḥ |
pāpajanmavināśārthaṃ tapasyeva sthito'bhavat || 92 ||
[Analyze grammar]

śatavarṣaṃ tatra bhūmau kṣetre tepe sudāruṇam |
tāpayāmāsa devāṃśca mahendrastamupāyayau || 93 ||
[Analyze grammar]

kṛśāṃga  tapsyase kiṃ tvaṃ kṛṣiṃ tyaktvā sukhapradām |
varaṃ dadāmi vada me hyanavāpyaṃ dadāmi te || 94 ||
[Analyze grammar]

kṛśāṃgaḥ prāha cāṇḍālaścā'haṃ vipratvakāṃkṣayā |
tapāmi dehi vipratvaṃ pitṛdoṣaṃ nivāraya || 95 ||
[Analyze grammar]

mahendraḥ prāha taṃ cāho vipratvaṃ durlabhaṃ tava |
pitṛdoṣeṇa bījaṃ tvaṃ śuddho bhavituṃ nā'rhasi || 96 ||
[Analyze grammar]

pravinaṃkṣyasi pratyuta tadupārama yatnataḥ |
pāvitryaṃ prāpyate cāpi cāṇḍālatvaṃ na naśyati || 97 ||
[Analyze grammar]

evamuktvā yayāvindraḥ kṛśāṃgastu sthitastathā |
tapasyeva nidhanārthaṃ vaipryārthaṃ vā dṛḍhakriyaḥ || 98 ||
[Analyze grammar]

atiṣṭhadekapādenā'paraṃ varṣaśataṃ tathā |
punaścendraḥ samāgatyovāca virama yatnataḥ || 99 ||
[Analyze grammar]

brāhmaṇyaṃ durlabhaṃ caitat sāhasena vinaṅkṣyasi |
nahi śakyaṃ niṣekasthaṃ vṛṣalatvaṃ vyapohitum || 100 ||
[Analyze grammar]

evaṃsthite tapoyatnaḥ śīghraṃ tvaṃ na bhaviṣyasi |
tiryagyonigataḥ sarvo yadi mānuṣyamṛcchati || 101 ||
[Analyze grammar]

kenacit puṇyayogena cāṇḍālo jāyate purā |
tataḥ sahasrakālānte śūdratvaṃ vindate muhuḥ || 102 ||
[Analyze grammar]

atha kālāntare vaiśyo muhurbhūtvā tataḥ param |
kṣatriyaḥ puṇyayogena jāyate ca tataḥ param || 103 ||
[Analyze grammar]

brahmabandhuśca kālena tato vipraḥ prajāyate |
tataḥ kālāntare syācca śrotriyaśca tataḥ param || 104 ||
[Analyze grammar]

vipradharmān pālayitvā titikṣuḥ sādhutāṃ vrajet |
tatra ceddharṣaśokau ca kāmadveṣau kṛśāṃgakaḥ || 105 ||
[Analyze grammar]

atimānā'tivādau cā''viśete pātyate tu taiḥ |
tasmātte vṛṣalotthatvaṃ dūraṃ na syāt kadācana || 106 ||
[Analyze grammar]

ityuktvā prayayāvindraḥ kṛśāṃgaśca tato dṛḍhaḥ |
sahasravarṣamaparaṃ caikapadā hyatiṣṭhata || 107 ||
[Analyze grammar]

brahmacaryaparaḥ śuddho gṛṇan brahma sanātanam |
athā''yayau mahendraśca prāha varaṃ vṛṇu dhruvam || 108 ||
[Analyze grammar]

kṛśāṃgaḥ prāha śīlaṃ me sahasravarṣamuttamam |
tena me dīyatāṃ vipratvaṃ mahendra na cā'param || 109 ||
[Analyze grammar]

indraḥ prāha paraṃ kāmaṃ vṛṇīṣva mā tu vipratām |
cāṇḍālabījajātasya vṛthā te'yaṃ pariśramaḥ || 110 ||
[Analyze grammar]

ityuktvā prayayāvindraḥ kṛśāṃgaśca tataḥ param |
aśvapaṭṭasaraḥ prāpyā'tiṣṭhad varṣasahasrakam || 111 ||
[Analyze grammar]

vāyumātrāśanaḥ kṛśo'bhavacchuṣkastaruryathā |
papātorvyāṃ maraṇāya tāvadindra upāyayau || 11 ||
[Analyze grammar]

jagrāha patitaṃ cainaṃ varadānadayāparaḥ |
prāha varaṃ vṛṇīṣvā'tra dadāmi te kṛśāṃgaka || 113 ||
[Analyze grammar]

kṛśāṃgako varaṃ vavre brāhmaṇyaṃ dehi me sadā |
indraḥ prāha na te tadvai durlabhaṃ sulabhaṃ kvacit || 114 ||
[Analyze grammar]

koṭivarṣatapobhiśca prāpyate na tu sarvathā |
brāhmaṇebhyo'nutṛpyante pitaro devatādayaḥ || 115 ||
[Analyze grammar]

bhūdevo brāhmaṇaścāste brāhmaṇyaṃ tava durlabham |
anyaṃ varaṃ vṛṇīṣva tvaṃ pūjyatvaṃ śreṣṭhatāṃ ca vā || 116 ||
[Analyze grammar]

kṛśāṃgaḥ prāha cendra  tvaṃ samartho naiva dṛśyase |
kiṃ māṃ tudasi duḥkhāḍhyaṃ mṛtaṃ mārayase katham || 117 ||
[Analyze grammar]

dvijatvaṃ tu tribhirvarṇaiḥ prāpyate guṇakarmabhiḥ |
dvijatvaṃ cāpi vipratvaṃ samānaṃ guṇakarmabhiḥ || 118 ||
[Analyze grammar]

upavītena dvijanmā vijñānena ca vipratā |
brahmayogena tatraiva brāhmaṇatvaṃ prakīrtitam || 119 ||
[Analyze grammar]

niṣṭhayā brahmaṇi brahmiṣṭhatā mokṣe tu sādhutā |
ityevaṃ guṇayogena sarvaṃ bhavati sādhitam || 120 ||
[Analyze grammar]

vahnipākena pṛthivī bahuratnottamottamā |
puṇyapākena dehāśca viprasādhusvarūpiṇaḥ || 121 ||
[Analyze grammar]

guṇaiḥ paśurguṇairyakṣo rākṣaso'pi guṇairiha |
vipro guṇaiḥ kṣatriyādiḥ sādhurguṇaiśca muktarāṭ || 122 ||
[Analyze grammar]

naro nārāyaṇaścā'pi karmaguṇaiḥ prajāyate |
śocyastvaṃ naiva jānīṣe brāhmaṇyaṃ dhanamuttamam || 123 ||
[Analyze grammar]

labdhvā'pi naiva jānīṣe kṣatro bhavasi mānavān |
na yogyastvaṃ varaṃ dātuṃ yāhi śakra  nijālayam || 124 ||
[Analyze grammar]

vipraguṇān samāsthāya kathaṃ nārhāmi vipratām |
tapasā me mātṛdoṣaḥ pitṛdoṣaḥ kṣayaṃ gataḥ || 125 ||
[Analyze grammar]

brāhmaṇo'smi na sandeho yāhi śakra  nijālayam |
evamukto mahendro vai lakṣmi  dadau varaṃ śubham || 126 ||
[Analyze grammar]

kṛśāṃga  tvaṃ tapobhiśca śuddho'si pāvito'syapi |
kṛśānuragnirūpastvaṃ brahmakṣatrātmako bhava || 127 ||
[Analyze grammar]

sarvapūjyo brāhmaṇānāṃ sadā pūjyaḥ surottamaḥ |
viprottamaśca brahmiṣṭho bhava kalpāntareṣvapi || 128 ||
[Analyze grammar]

guṇaistvayā'rjitaṃ cātra vipratvaṃ ca guṇaistataḥ |
brahmiṣṭhatvaṃ sadā prāptaṃ cāgnitvaṃ prāptameva ha || 129 ||
[Analyze grammar]

ityevaṃ varadānaṃ tu datvā śakro yayau divam |
kṛśāṃgo'bhūt kṛśānuśca hyaśvapaṭṭasarovare || 130 ||
[Analyze grammar]

kṛśānutīrthamatrā''ste rame  brahmiṣṭhatāpradam |
sādhutvaṃ pāvanatvaṃ nirlepatvaṃ prāpyate'tra vai || 131 ||
[Analyze grammar]

itiśrīlakṣmīnārāyaṇīyasaṃhitāyāṃ tṛtīye dvāparasantāne ghātakināṃ tīrthayogena pāvanatvaṃ jaṃgamatīrthaṃ sādhujanādayaḥ aśvapaṭṭasarovare purā dvijāputrasya kṛśāṃgasya vṛṣalodbhavasya cāṇḍālatve'pi tapobhiścendravareṇa brahmiṣṭhatvabrāhmaṇyamayaṃ kṛśānutvaṃ cā'bhavadityādinirūpaṇanāmā caikanavatitamo'dhyāyaḥ || 91 ||
[Analyze grammar]