Chapter 86

śrīnārāyaṇīśrīruvāca |
kiṃ kṛtveha tu rājānaścānye dhanamadāstayā |
balagarvāśca vai lokā aśnuvate paraṃ sukham || 1 ||
[Analyze grammar]

śrīpuruṣottama uvāca |
brahmiṣṭhānāṃ sadā sevā kartavyā sukhamicchatā |
sādhūnnārāyaṇabhaktān vṛddhāṃścāpyabhipūjayet || 2 ||
[Analyze grammar]

paurajānapadāṃścāpi sādhujanān bahuśrutān |
bhaktyā dānena sevābhirnamaskāraiḥ samarcayet || 3 ||
[Analyze grammar]

yathā''tmānaṃ yathā putrāṃstathā sādhūn prasevayet |
ye cā'pyeṣāṃ pūjyatamāstān viśeṣeṇa pūjayet || 4 ||
[Analyze grammar]

santaḥ pūjyā namaskāryā mānyā devā yathā bhuvi |
teṣu tuṣṭeṣu rājyādisampadaḥ susukhāḥ sadā || 5 ||
[Analyze grammar]

kṛṣṇadhyānaprasaktānāṃ brahmabhaktiṃ prakurvatām |
dharmajñānāṃ satāṃ nityaṃ sevāṃ kīrtiṃ samācaret || 6 ||
[Analyze grammar]

devaiśca pitṛbhiścāpi gandharvairbrāhmaṇaistathā |
vasubhiśca tathā''dityai rudraiśca pūjitā yataḥ || 7 ||
[Analyze grammar]

adaivaṃ daivataṃ kuryudaiṃvataṃ cā'pyadaivatam |
yamiccheyuḥ sa devaḥ syād yo naṣṭaḥ sa parābhavet || 8 ||
[Analyze grammar]

parivādaprakartāro naśyeyurnātra saṃśayaḥ |
tasmātsādhūnpūjayecceśvarān vai sukhaduḥkhayoḥ || 9 ||
[Analyze grammar]

ete bhojyāśca pūjyāśca kimicchavaiḥ suvastubhiḥ |
namaskāraiścā'rpaṇādyai rakṣyāśca pitṛvannṛpaiḥ || 10 ||
[Analyze grammar]

ītīnāṃ cāpi vighnānāṃ śāntiḥ sadbhiḥ prajāyate |
brahmavarcasvinaḥ santo yajñāḥ sākṣād bhavanti vai || 11 ||
[Analyze grammar]

brahmiṣṭhaṃ bhaktisampannaṃ dharmaśīlaguṇānvitam |
vāsayeta gṛhe rājā santaṃ mokṣapradaṃ sadā || 12 ||
[Analyze grammar]

satāṃ mukhe havirdattaṃ pratigṛhṇanti ceśvarāḥ |
pitaro devatāścāpi muktāstṛpyanti yoginaḥ || 13 ||
[Analyze grammar]

ṛṣayo vasavaḥ siddhā manavo bhāskarāḥ śivāḥ |
surāśca viṣṇavo brahmāṇaśca sādhyā marudgaṇāḥ || 14 ||
[Analyze grammar]

vālakhilyāśca gandharvāḥ kinnarāḥ puruṣottamāḥ |
avatārāḥ sata āviśyā'nnaṃ sukhāḥ prabhuñjate || 15 ||
[Analyze grammar]

yatra no bhagavadbhaktā utsave vā mahotsave |
tāḥ sampadastathā''nandāḥ śmaśānāntāḥ prakīrtitāḥ || 16 ||
[Analyze grammar]

yatrotsaveṣu santaśca vidyante śubhadarśanāḥ |
ta utsavā ūrdhvagatipradāḥ puṇyamayāḥ śubhāḥ || 17 ||
[Analyze grammar]

santaṃ vinā mahārājyaṃ śmaśānaṃ yāmyapuṣṭikṛt |
satā yuktaṃ vanaṃ cāpi divyaṃ golokamuktidam || 18 ||
[Analyze grammar]

sādhuṃ yatra sthale santaṃ viharantaṃ sthitaṃ ca vā |
paśyanti yamadūtāśca nābhiyanti sthalaṃ hi tat || 19 ||
[Analyze grammar]

sādhuṃ janaṃ vilokyaiva vighnā viyanti dūrataḥ |
rogā māyāḥ kālavegāstrastā viyanti dūrataḥ || 20 ||
[Analyze grammar]

yena yenaiva santo'tra haviṣā tarpitā muhuḥ |
ye santamanuvṛttāśca teṣāṃ puṇyamanantakam || 21 ||
[Analyze grammar]

na te pretya vinaśyanti na te yānti parābhavam |
yadvai satāṃ mukhātprāptaṃ pratigṛhṇanti sadvacaḥ || 22 ||
[Analyze grammar]

pāpino'pi janāste vai na prayānti parābhavam |
yatkiñcid dṛśyate loke śrūyate paṭhyate tathā || 23 ||
[Analyze grammar]

sarvaṃ tacchrīmatāṃ puṇyasatāmāśīrvacobhavam |
bhūmiḥ papraccha pūrvaṃ vai śvetavārāhamīśvaram || 24 ||
[Analyze grammar]

gṛhiṇāṃ pāpakarmāṇi kena naśyanti mūlataḥ |
vārāhaśca tadovāca dhyātvā śreṣṭhatamaṃ vacaḥ || 25 ||
[Analyze grammar]

sādhūn saṃsevamānānāṃ pāpaṃ sarvaṃ vilīyate |
sādhūn sadā praseveta pavitrān lokadhārakān || 26 ||
[Analyze grammar]

ebhyo bhūtiśca kīrtiśca smṛddhirbuddhiḥ prajāyate |
bhaktiḥ prajāyate tena pāvanī matirīyate || 27 ||
[Analyze grammar]

mahāyajño harerbhaktaḥ sādhureva na saṃśayaḥ |
sādhuṃ seveta satataṃ bhūme sarvavibhūtaye || 28 ||
[Analyze grammar]

viprebhyaśca pare santi guravastūpadeśakāḥ |
gurubhyaścopadeṣṭṝbhya upādhyāyā pare matāḥ || 29 ||
[Analyze grammar]

tebhyaḥ parā sadā cāryā ācāryebhyastu śīlinaḥ |
brahmacārebhya utkṛṣṭā bhaktāḥ śrīparamātmanaḥ || 30 ||
[Analyze grammar]

bhaktebhya uttamāḥ santi sadā cātmanivedinaḥ |
ātmā'rpitebhya utkṛṣṭāḥ sādhavo mama mūrtayaḥ || 31 ||
[Analyze grammar]

apareṣāṃ pareṣāṃ ca parebhyaścāpi te pare |
matto'pi paramāḥ santaḥ satāṃ dāso bhavāmyaham || 32 ||
[Analyze grammar]

sādhavo yaṃ praśaṃsanti sa naro mādhavo bhavet |
sādhūnākrośayati yaḥ parābhavati so'cirāt || 33 ||
[Analyze grammar]

yathā mahārṇave kṣiptaṃ lavaṇaṃ saṃvilīyate |
tathā pāpāni sādhau vai kṣiptāni yanti līnatām || 34 ||
[Analyze grammar]

sādhavo yaṃ praśaṃsanti sa jāto'tra pravardhate |
yaśasā sampadā smṛddhyā puṣṭyā lakṣmyā striyā sutaiḥ || 35 ||
[Analyze grammar]

sādhavaḥ saṃvidantyeva mārgaṃ svargasya vai tathā |
mokṣasyāpi nirayasya karmaṇāṃ ca gatiṃ tathā || 36 ||
[Analyze grammar]

bhāgyānāṃ ca gatiṃ cāpi vidanti sādhavo janāḥ |
āgatā'nāgate cāpi vidanti janmakarmabhiḥ || 37 ||
[Analyze grammar]

sarveṣāṃ kṣatravargāṇāṃ tejāṃsi prabalāni ca |
brāhmaṇeṣu praśāmyanti brāhmaṇānāṃ tu sādhuṣu || 38 ||
[Analyze grammar]

sādhūn vai sevamānānāṃ rajaḥ sarvaṃ praṇaśyati |
icchan kīrtiṃ ca bhūtiṃ ca lokāṃścāpyuttamottamān || 39 ||
[Analyze grammar]

satāṃ cānumate tiṣṭhed rājā śreṣṭhī tathetaraḥ |
janmanaiva camatkārī brahmiṣṭho yastu jāyate || 40 ||
[Analyze grammar]

namasyaḥ sarvabhūtānāṃ sa sādhuścā'cyutātmajaḥ |
sarvathā suhṛdaḥ santaḥ śreyo mātravidhāyakāḥ || 41 ||
[Analyze grammar]

smṛtibhiḥ kṛṣṇayuktābhirgīrbhiśca maṃgalādibhiḥ |
āśritānāṃ suśreyāṃsi cānudhyāyanti pūjitāḥ || 42 ||
[Analyze grammar]

śrīśca vṛddhiśca tejaśca vibhūtiśca pratāpinī |
lakṣmyaḥ sarvavidhāḥ sādhusaṃkalpena bhavanti hi || 43 ||
[Analyze grammar]

sādhavo vividhāḥ santi durāsadāḥ parārthinaḥ |
kecinnārāyaṇasattvāḥ śīlasattvāśca kecana || 44 ||
[Analyze grammar]

vratasattvāstapaḥsattvā dhyānasattvāstathā'pare |
vairāgyasattvā vidyādisattvā bhaktibalāḥ pare || 45 ||
[Analyze grammar]

dharmasattvāstathaudāsīnyādimukhyā bhavantyapi |
api sevyāḥ sarvavidhāḥ sāro grāhyo mumukṣuṇā || 46 ||
[Analyze grammar]

siṃhasattvāḥ santi kecin mṛgasattvāstathā'pare |
sarpasattvāḥ parecāpi kapisattvāstathā'pare || 47 ||
[Analyze grammar]

agnisattvāstathā cā'nye jalasattvāstathā'pare |
kṣmāsattvā vāyusattvāśca bhayantyevaṃprakāriṇaḥ || 48 ||
[Analyze grammar]

asahāḥ siṃhasattvā vai sarvasahā mṛgā iva |
dveṣagarāḥ sarpatulyā hārakāḥ kapisadṛśāḥ || 49 ||
[Analyze grammar]

pāpaghnā vahnisattvāste śāntidā jalasattvinaḥ |
kṣamante kṣmāsamāścāpi guṇagrāhā marutsamāḥ || 50 ||
[Analyze grammar]

siṃhasarpakapitulyān yāvadarthaṃ samāśrayet |
mokṣārthaṃ cetarān sarvānāśrayenmatimān janaḥ || 51 ||
[Analyze grammar]

sādhavo hi mahātmāno devānāmapi devatāḥ |
satataṃ pūjayet sādhūn dāsyena paricaryayā || 52 ||
[Analyze grammar]

ekadā mālatīdevī papraccha svapatiṃ nṛpam |
citraketuṃ namaskṛtya trailokyapūjitaṃ satī || 53 ||
[Analyze grammar]

kena vṛttena rājaṃstvaṃ trailokyamadhitiṣṭhasi |
śraiṣṭhyametādṛśaṃ kena prāptaṃ brūhi vratena vai || 54 ||
[Analyze grammar]

citraketustu tāṃ prāha sādhusevāvrataṃ mama |
vandhyaṃ dinaṃ na me yāti sādhusevāmṛte kvacit || 55 ||
[Analyze grammar]

agrataḥ sādhavo me vai pṛṣṭhataḥ sādhavo'tra me |
pārśvayoḥ sādhavaḥ santi sabhāyāṃ sādhavaśca me || 56 ||
[Analyze grammar]

yātrāyāṃ sādhavo me ca bhojane cotsavādiṣu |
ārambhe sādhavo me vai vartante brahmaśīlinaḥ || 57 ||
[Analyze grammar]

teṣāṃ dāsyaṃ vrataṃ me'sti tena bṛhadvratena vai |
adhitiṣṭhāmi lokāṃstrīn harerbhaktiṃ karomi ca || 58 ||
[Analyze grammar]

anyāni me śṛṇu patni vṛtāni śobhanānyapi |
loke yairmānyatā cāste cā'pradhṛṣyatvamityapi || 59 ||
[Analyze grammar]

nā'sūyāmi kvacit sādhūn sammanye tān yathāsukham |
brahmiṣṭhānnā'vajānāmi nā'parādhyāmi karhicit || 60 ||
[Analyze grammar]

abhyarcyā'bhyanupṛcchāmi sevāṃ karomi nityadā |
sadaṇḍavannamaḥ kṛtvā pādau gṛhṇāmi vāri ca || 61 ||
[Analyze grammar]

yāmājñāṃ te nirdiśanti vahāmi toṣayāmi tān |
sato nityaṃ śṛṇomyeva kathā'mṛtaratān prabhūn || 62 ||
[Analyze grammar]

etacchreṣṭhamamṛtaṃ vai divyaṃ cakṣuśca pāragam |
yad brahmiṣṭhamukhād vākyaṃ śāstraṃ cā''jñā pravartate || 63 ||
[Analyze grammar]

brahmiṣṭhāstapasā bhaktyā sidhyanti dhībalāḥ sadā |
ātmabalāṃ mama balairyuktāste tārayantyapi || 64 ||
[Analyze grammar]

vasanto brāhmīrvasatīryatayaḥ samadarśanāḥ |
nirvāṇasthā hi te bhūmau śreyapradāḥ sukhapradāḥ || 65 ||
[Analyze grammar]

bhūmistaṃ vai nigirati yo brahmiṣṭhaṃ na sevate |
abhimānaḥ śriyaṃ hanti smṛddhasyā'pyalpamedhasaḥ || 66 ||
[Analyze grammar]

abhimānaṃ tato hitvā hitvā rājamadaṃ tathā |
pādasaṃvāhanaṃ nityaṃ karomi vai satāṃ mudā || 67 ||
[Analyze grammar]

māṃ ca bhaktaṃ citraketuṃ śrutvā śrutvā hi sādhavaḥ |
bhūbhāgāt svargabhāgācca pātālāt sāgarādapi || 68 ||
[Analyze grammar]

satyalokāt samāyānti nāradādyā hi pāvanāḥ |
dhanyaṃ bhāgyaṃ mama cāste yaḥ koṭistrīpatirnṛpaḥ || 69 ||
[Analyze grammar]

sādhubhakta iti khyāto yaṃ pratiyanti sādhavaḥ |
yadgṛhaṃ sādhusampannaṃ yannāryaḥ sādhusevikāḥ || 70 ||
[Analyze grammar]

yo rājā vighasā'śyasmi tato dhanyetaro nu kaḥ |
yo yo vai yācate kiṃcid dadāmyeva tu tatkṣaṇam || 71 ||
[Analyze grammar]

pratoṣayāmi satataṃ sādhūn viprāṃśca yoginaḥ |
rājyaṃ yathā svendriyārthaṃ sādhvarthaṃ me mataṃ bahu || 72 ||
[Analyze grammar]

brahmiṣṭhārthaṃ mama rājyaṃ mokṣārthaṃ vartate priye |
apīḍayan rājavargaṃ pradadyāṃ sarvamaihikam || 73 ||
[Analyze grammar]

yathā me sādhavaḥ pūjyāstathā'nu brāhmaṇā api |
ṛtvikpurohitācāryāḥ śiṣyāḥ sambandhibāndhavāḥ || 74 ||
[Analyze grammar]

striyo bālā bālikāścā'nāthā nirāśrayāstathā |
śaraṇāgatalokāścā'bhyāgatā bhikṣukāstathā || 75 ||
[Analyze grammar]

anādhārāśca me pūjyā vanino gṛhiṇo'pi ca |
satkarmāṇaḥ sadā pūjyāḥ śrutavanto harerjanāḥ || 76 ||
[Analyze grammar]

ato'nyathā vartamānā daṇḍyāḥ śāstranayena vai |
bhaktidharmaḥ sadācāro jñānaṃ cātmavivecanam || 77 ||
[Analyze grammar]

ahiṃsā satyamasteyamārjavaṃ dama īśitā |
akrodhaścā'nabhimānaścā'droho hrīḥ kṣamā damaḥ || 78 ||
[Analyze grammar]

titikṣā vāsanānāśastṛṣṇānāśaḥ pavitratā |
yasminnetāni dṛśyante na tvakāryāṇi vai priye || 79 ||
[Analyze grammar]

satpātraṃ tadbhavelloke sarvadā mānamarhati |
apūrvaṃ cāpi pūrvaṃ vā pārakyaṃ naijameva vā || 80 ||
[Analyze grammar]

yadvā viśeṣitaṃ vāpi saṃpratyāgatameva vā |
brahmiṣṭhaṃ śreyasisthaṃ yat tatpātraṃ mānamarhati || 81 ||
[Analyze grammar]

loke bhavanti bahavaścābhimānabharā janāḥ |
asūyādveṣayuktāścā'sahamānāḥ parānnarān || 82 ||
[Analyze grammar]

parakhyātiṃ sahante na parasaukhyaṃ paronnatim |
na sahante ca dahyanti tato nindanti sajjanān || 83 ||
[Analyze grammar]

aprāmāṇyaṃ satāṃ vākye vaidike lokasammate |
matvā'tilaṃghanaṃ cāpi kurvanti dharmasetuṣu || 84 ||
[Analyze grammar]

avyavasthāṃ ca kurvanti svayaṃ paṇḍitamāninaḥ |
hetuvādān bruvantaśca satsu drohaṃ prakurvate || 85 ||
[Analyze grammar]

ākroṣṭārastathā śāstraviruddhavādinaḥ khalāḥ |
mūḍhāḥ kaṭukavācaśca narāḥ pāpaparāyaṇāḥ || 86 ||
[Analyze grammar]

svatulyān suhitān sṛtvā śuno'rcayanti vai khalāḥ |
mālati tādṛśā dambhā naraśvāno jagattraye || 87 ||
[Analyze grammar]

kalyāṇaṃ naiva kurvanti nāśayanti nijān parān |
ātmanāśaṃ cā''hvayanti te daṇḍyāḥ sarvathā nṛpaiḥ || 88 ||
[Analyze grammar]

yathā śvā bhaṣituṃ caiva khādituṃ cā'vasajjate |
tathā te lokamaryādāṃ nāśayituṃ jvalanti vai || 89 ||
[Analyze grammar]

tasmād rājñi lokamelaṃ dharmaṃ cātmahitaṃ śubham |
hṛdayaṃ deśakālau ca vīkṣyā''jñāṃ vartayejjanaḥ || 90 ||
[Analyze grammar]

evaṃ nityaṃ vartamānaḥ śāśvatīrvardhate samāḥ |
rājāno vā dhanino vā balino vā janāstviha || 91 ||
[Analyze grammar]

tathaiva vartamānāścennābhibhavanti vai kvacit |
ṛṇamuktā harerbhaktā bhūtvā'nte yānti mokṣaṇam || 92 ||
[Analyze grammar]

ityevaṃ citraketurvai mālatīṃ prāha sā'pi tu |
harerbalaṃ paraṃ prāpyā'sevatā'harniśaṃ sataḥ || 93 ||
[Analyze grammar]

abhajatparamātmānaṃ sevāpūjanakīrtanaiḥ |
naijaṃ karmakalāpaṃ sā cakāra vai satāṃ kṛte || 94 ||
[Analyze grammar]

nṛpājñayā hi satataṃ bheje satpuruṣān śubhān |
bhojanairdānasevābhirjalavastraphalārpaṇaiḥ || 95 ||
[Analyze grammar]

sā ca bhaktyārūḍhabhāvā dadarśa māṃ pareśvaram |
pūjāyāṃ divyarūpaṃ vai caturbāhuṃ vimānagam || 96 ||
[Analyze grammar]

yayāce mokṣaṇaṃ cāpi tvājñāmādāya bhūbhṛtaḥ |
tūrṇaṃ ca bhautikaṃ tyaktvā cāruroha vimānakam || 97 ||
[Analyze grammar]

divyā caturbhujā jātā lakṣmīsakhī śubhānanā |
mālatī vartate dhāmni brahmapriyā narāyaṇī || 98 ||
[Analyze grammar]

evaṃ sādhuprasaṃgena rājā sādhurhi citrakṛt |
patyuḥ sādhoḥ prasaṃgena mokṣamārgamavāpa sā || 99 ||
[Analyze grammar]

mokṣagatimavāpyaiva mālatī tu ramāsakhī |
jātā brahmapriyā lakṣmi satsaṃgo yāvadarthakaḥ || 100 ||
[Analyze grammar]

nirdhano vā dhanavāṃśca saguṇo nirguṇo'pi vā |
sādhvāśrayaṃ samālambya bhavatyeva narāyaṇaḥ || 101 ||
[Analyze grammar]

madaṃśo bhaktivegena jāyate cordhvakīrtimān |
tārakaḥ sarvalokānāṃ dhārakaḥ sarvadharmiṇām || 102 ||
[Analyze grammar]

prāpakaścā'kṣarasyāpi rakṣakaśca nijāntike |
paṭhanācchravaṇādasya bhuktirmuktirbhavedapi || 103 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne dhanamadibalagarvinṛpādīnāmapi paramaśreyasi citraketormālityā dṛṣṭāntena sādhupratāpaphalādivarṇananāmā ṣaḍaśītitamo'dhyāyaḥ || 86 ||
[Analyze grammar]