Chapter 83

śrīnārāyaṇīśrīruvāca |
kena vai hetunā sādhurnārāyaṇo nigadyate |
yadyapi bahavastatra hetavaḥ syurdṛḍhavratāḥ || 1 ||
[Analyze grammar]

tathāpi saralaṃ hetuṃ yadvā śreṣṭhamanuttamam |
duṣkaraṃ vā'vagantuṃ taṃ samicchāmi tathā vada || 2 ||
[Analyze grammar]

śrīpuruṣottama uvāca |
śṛṇu lakṣmi mahataśca hetūn bahuvidhānapi |
kṣamā śīlaṃ virāgaśca śāntistathā'parigrahaḥ || 3 ||
[Analyze grammar]

vaitṛṣṇyaṃ svādaśūnyatvaṃ cā''tmaniṣṭhatvamityapi |
alolupatā dveṣādirāhityaṃ sarvamitratā || 4 ||
[Analyze grammar]

ātmasādhanakartavyaṃ mayi sarvasamarpaṇam |
asneho bandhaśūnyatvaṃ māyākaiṃkaryavarjanam || 5 ||
[Analyze grammar]

dehendriyādiyātrātanmātranirvāhaṇā'rjanam |
pratīkṣā mokṣalokasya mamā'haṃvarjanaṃ tathā || 6 ||
[Analyze grammar]

navonmeṣārambhahāniḥ sthairyaṃ cātmani netare |
śīlaṃ manaso nairmalyaṃ sādhutve kāraṇāni vai || 7 ||
[Analyze grammar]

paropakāro yasyā'sti mokṣamārgapradarśanam |
vrataṃ śīlaṃ ca yasyā'sti nārāyaṇārthamuttamam || 8 ||
[Analyze grammar]

tapaścograṃ ca yasyā'sti māyābandhanavarjitam |
vṛttayaścāpi sarvā vai yasya madgocaraḥ sadā || 9 ||
[Analyze grammar]

hyetaccatuṣṭayaṃ lakṣmi sādhutve mukhyakāraṇam |
nahi kāṣāyavastrāṇi nahi cihnāni bāhyataḥ || 10 ||
[Analyze grammar]

nahi dīkṣā nahi vāsaḥ sādhutve śreṣṭhahetavaḥ |
ātmamokṣavidhātāro māyāmokṣādyabhīpsavaḥ || 11 ||
[Analyze grammar]

parabrahmaṇi niṣṇātāstāpasāḥ sādhusattamāḥ |
sādhvyaścāpi satīdharmaparāḥ śīlaparā mama || 12 ||
[Analyze grammar]

rāgaśūnyā bhaktimatyaḥ sādhvyaḥ sādhvīvibhūṣaṇāḥ |
śarīre bhogaśūnyatvaṃ sādhusopānamādimam || 13 ||
[Analyze grammar]

indriyarāgaśūnyatvaṃ sopānaṃ ca dvitīyakam |
antaḥkaraṇavaśatā sopānaṃ ca tṛtīyakam || 14 ||
[Analyze grammar]

ātmanaścārpaṇaṃ kṛṣṇe sopānaṃ taccaturthakam |
jñāne manmūrtivāsaśca sopānaṃ pañcamaṃ ca tat || 15 ||
[Analyze grammar]

mokṣaphalaprayatnaśca sopānaṃ ṣaṣṭhameva tat |
turyāvasthāsthitirnityaṃ sopānaṃ cā'ntimaṃ hi tat || 16 ||
[Analyze grammar]

saptasopānamārūḍhaḥ sādhureva saduttamaḥ |
api sādhvyastathācārāḥ sādhvyuttamā matā mama || 17 ||
[Analyze grammar]

ta ete hyuccakakṣāsthāḥ santaḥ sādhvyo mayoditāḥ |
madhyakakṣāgatāṃścāpi darśayāmi nibodha me || 18 ||
[Analyze grammar]

dehendriyādirāgasthāstajjanyasukhalipsavaḥ |
kintu sarvārpaṇāḥ kṛṣṇe mayi cātmanivedinaḥ || 19 ||
[Analyze grammar]

māyāyā gauṇabalino madbale cottamāspadāḥ |
evaṃvidhā madhyamāste sādhavaḥ sādhvikāḥ priye || 20 ||
[Analyze grammar]

atha tato'pi nimnasthān śṛṇu lakṣmi madarthakān |
sarvathā rāgayuktāśca dehendriyādiyoginaḥ || 21 ||
[Analyze grammar]

labdhadīkṣā api svārthaparāyaṇā madāśrayāḥ |
kṛtvo'gre māṃ pradarśyā'pi tyāgāśramanivāsinaḥ || 22 ||
[Analyze grammar]

tyāgagandhasya mātrāṃ ca svalpāṃ naiva vidanti ca |
tathāpi kaṣṭamāsādya tyāgamārge sthitā iva || 23 ||
[Analyze grammar]

vartante ye nimnacittā jālāvṛttā haridhvajāḥ |
ta ete nāmataḥ sarve sādhavo vai bhavanti hi || 24 ||
[Analyze grammar]

yathā kāṣṭhakṛto hastī yathā vyāghraśca carmajaḥ |
tathā'mbareṇa yaḥ sādhustrayaste vyarthaśaktayaḥ || 25 ||
[Analyze grammar]

ajñānāṃ bhayadāścaite vijñānāmupalā iva |
āśritānāṃ neṣṭadāste trayo viśvāsaghātakāḥ || 26 ||
[Analyze grammar]

niścitārthavighātāste samunnativirodhinaḥ |
asatkācasamāścaite saṃgād bhaṃganirūpakāḥ || 27 ||
[Analyze grammar]

tapaḥ śrutaṃ ca śaktiścā'pyetat sādhutvalakṣaṇam |
kṣamā bhaktirvirāgaśca sādhutve kāraṇāni vai || 28 ||
[Analyze grammar]

etādṛśe tu sādhau vai tṛpte tṛptāḥ surādayaḥ |
yathā hi sulabhe kṣetre phalaṃ vindati karṣukaḥ || 29 ||
[Analyze grammar]

tathā samarpya sādhau vai phalaṃ dātā samaśnute |
asādhau dattamevaitanmoghaṃ syānnātra saṃśayaḥ || 30 ||
[Analyze grammar]

adannasādhurhantyannamadyamānaṃ ca hanti tam |
taṃ cā'nnaṃ pāti yaḥ sādhuradannannaṃ ca rakṣati || 31 ||
[Analyze grammar]

rakṣaṇaṃ paraloke'pi pātre'rpitaṃ karoti tat |
prabhurhyannamadan sādhurdātāraṃ poṣayatyapi || 32 ||
[Analyze grammar]

puṇyena karmaṇā tasmāt satpātre'nnaṃ niyojayet |
yadeva dadataḥ puṇyaṃ tadevaṃ pratigṛhṇataḥ || 23 ||
[Analyze grammar]

yadyubhe sādhurūpe vai pātre syātāṃ hi nirmale |
yatra vai sādhavaḥ santi śrutavṛttopayoginaḥ || 34 ||
[Analyze grammar]

tatra dānaphalaṃ puṇyaṃ jāyate vai sahasradhā |
ye brahmaśuddhāḥ satataṃ śīlaśuddhāśca sādhavaḥ || 35 ||
[Analyze grammar]

tapasyabhiratāścāpi bhaktāḥ pūjyatamā hi te |
taiśca sadbhiḥ kṛtaḥ panthā divya eva na saṃśayaḥ || 36 ||
[Analyze grammar]

tena yātā na muhyanti māyāyāṃ caiśvare sthale |
paraṃ pāraṃ pragacchanti brahmavāhā hi sādhavaḥ || 37 ||
[Analyze grammar]

duranvayaṃ duḥpradharṣaṃ durāpaṃ duratikramam |
sadāśīrvādataḥ sarvamabhyeti nātra saṃśayaḥ || 38 ||
[Analyze grammar]

surāpo bhrūṇahāḥ stenau gurutalpaniṣevaṇaḥ |
sādhunā tīryate sarvamenasaśca pramucyate || 39 ||
[Analyze grammar]

sarvapūjyāḥ pūjyadhanā vidyāvanto hi sādhavaḥ |
tapasvino dānaratā bhaktimanto hi tārakāḥ || 40 ||
[Analyze grammar]

imaṃ ca brahmalokaṃ ca mokṣasthānamanuttamam |
sādhusevāsukṛtinaḥ prapadyante tu laukikāḥ || 41 ||
[Analyze grammar]

pūjitāḥ pūjayantyete mānitā mānayantyapi |
prajvālya pāpipāpāni tārayanti hi sādhavaḥ || 42 ||
[Analyze grammar]

yo bhartā sevakaistuṣṭo bhartustuṣṭāśca sevakāḥ |
yatraivaṃ sādhubhāvo'sti tatra kalyāṇakoṭayaḥ || 43 ||
[Analyze grammar]

adbhirgātrānmalamiva tamo'gniprabhayā yathā |
sādhośca sevayā tadvat sarvapāpamapohati || 44 ||
[Analyze grammar]

svasti karoti sarvasya pāvayatyapi dehinaḥ |
etatkriyāparaḥ sādhuḥ śreyaḥkartā jagattraye || 45 ||
[Analyze grammar]

jīvānāṃ muktaye lakṣmi mayā sāma vinirmitam |
sādhavaḥ sāma gāyanti bodhayanti janāniha || 46 ||
[Analyze grammar]

upadiśanti mantrādīn kīrtayanti ca māṃ muhuḥ |
varṇayanti kathāṃ me ca caritrāṇi bahūni ca || 47 ||
[Analyze grammar]

guṇānme mama kāryāṇi nirūpayanti sarvathā |
evaṃ sāmnā gītikābhirvācayanti hi sādhavaḥ || 48 ||
[Analyze grammar]

vidvāṃso māṃ śāstramukhaiḥ prasaṃgāyanti nityadā |
kavayanti ca kavayaḥ stuvanti cārthasādhakāḥ || 49 ||
[Analyze grammar]

evaṃ sāmnā hi bahudhā māmarjayanti mānavāḥ |
sāmnā gurormukhātprāpya māṃ ca dānena sādhayet || 50 ||
[Analyze grammar]

dānaṃ samastabhāvena samarpaṇaṃ niveditā |
ātmasamarpaṇaṃ dānaṃ tenā'rjayecca māṃ sadā || 51 ||
[Analyze grammar]

sādhavo dānayogena cārjayanti dadatyapi |
jñānadānaṃ mantradānaṃ nāmadānaṃ harestathā || 52 ||
[Analyze grammar]

prasādadānaṃ mālādipradānaṃ śikṣaṇārpaṇam |
lābhadānaṃ sukhadānaṃ mokṣadānaṃ parātparam || 53 ||
[Analyze grammar]

dadatyabhayaṃ dānaṃ tat tapodānaṃ śubhāspadam |
puṇyadānaṃ prakurvanti sādhavaḥ sādhubhūṣaṇaḥ || 54 ||
[Analyze grammar]

kṛpādānaṃ tathā ramyāśīrvādānāṃ pradānakam |
darśanasya pradānaṃ ca sevādānaṃ śubhāvaham || 55 ||
[Analyze grammar]

sadguṇānāṃ pradānaṃ ca tena tena hi sādhavāḥ |
māṃ hariṃ cārjayantyeva bhaktebhyaśca dadatyapi || 56 ||
[Analyze grammar]

dīkṣādānaṃ cātmadānaṃ kṛtvā'pi tārayanti te |
bhaktidānaṃ śubhaṃ kṛtvā tārayanti janān bhavāt || 57 ||
[Analyze grammar]

antataścāśrayadānaṃ caraṇāmṛtadānakam |
vāgdānaṃ sākṣitādānaṃ kṛtvā'pi tārayanti te || 58 ||
[Analyze grammar]

manodānaṃ snehadānaṃ pāvitryādipradānakam |
sadācārakriyāśikṣādānaṃ smṛtipradānakam || 59 ||
[Analyze grammar]

kaṇṭhīdānaṃ cihnadānaṃ kṛtvā'pi tārayanti te |
mūrtidānaṃ pātradānaṃ kṛtvā'pi tārayanti te || 60 ||
[Analyze grammar]

atha bhedaṃ yojayanti dānaṃ sāma ca yatra na |
deho'yaṃ malasaṃyukto malinaḥ kṣaṇabhaṅguraḥ || 61 ||
[Analyze grammar]

ātmā śuddho harerbhakto muktiyogyo hi śāśvataḥ |
evaṃ bhedaṃ vivekaṃ vai yojayanti ca sādhavaḥ || 62 ||
[Analyze grammar]

atha daṇḍaṃ vartayanti prāyaścittaṃ vidharmiṇi |
amārgagaṃ janaṃ santo niyamayanti sadvrataiḥ || 63 ||
[Analyze grammar]

prāyaścittaiḥ kṛcchracāndrāyaṇādibhiḥ kriyātmakaiḥ |
dravyavyayātmakairyajñamahotsavaiḥ sukhotsavaiḥ || 64 ||
[Analyze grammar]

annasatrairbhojanādyaiḥ pūjādānārpaṇādibhiḥ |
śreyaskaraistathā''yāsairyojayanti viśuddhaye || 65 ||
[Analyze grammar]

dharmakarmādibhiścāpi yojayantiprasahya tān |
yadvā prabaladaṇḍena niyamayanti sādhavaḥ || 66 ||
[Analyze grammar]

yathā pāpāni naśyeyurmokṣaṃ vindeyureva ca |
evaṃ hitātmadaṇḍena yojayanti hi sādhavaḥ || 67 ||
[Analyze grammar]

garviṣṭhānāṃ tu vai krūraṃ daṇḍaṃ kurvanti vai kvacit |
teṣāṃ niṣkalmaṣatārthaṃ muktyarthaṃ cāpi sādhavaḥ || 68 ||
[Analyze grammar]

daivikaṃ vā śubhaṃ daṇḍaṃ prerayanti japādikam |
yena niṣkalmaṣatvaṃ ca prāpya yānti paraṃ padam || 69 ||
[Analyze grammar]

pāpī vā puṇyaśālī vā miśrito vobhayādibhiḥ |
bhaktimān vā hyabhakto vā nāstiko vā''stiko'pi vā || 70 ||
[Analyze grammar]

yaḥ kaścidvā bhaved dehī nayanti śaraṇaṃ puraḥ |
saṃskṛtyopāyabhedaiśca pāvayanti punaḥ punaḥ || 71 ||
[Analyze grammar]

prasādayitvā satataṃ kṛtvā śuddhaṃ sanātanam |
nijatulyaṃ tataḥ santo nayanti dhāma cā'kṣaram || 72 ||
[Analyze grammar]

evaṃ satāṃ sadā lakṣmi paropakāraśālitā |
apratidānalabhyā vai tayā śuddhyanti dehinaḥ || 73 ||
[Analyze grammar]

yathā cā'haṃ tathā te vai guravo lokatārakāḥ |
ānakhaśikhaṃ santastu pavitrā mama mūrtayaḥ || 74 ||
[Analyze grammar]

yathā vai śarkarākhaṇḍaḥ sarvathā miṣṭasadrasaḥ |
bhāgatyāgo na tatrā'sti tathā te sādhavo mama || 75 ||
[Analyze grammar]

yathā vā navanītasya piṇḍaḥ snehātmako'khilaḥ |
bhāgatyāgo na tatrā'sti tathā te sādhavo mama || 76 ||
[Analyze grammar]

yathā vā mauktikaḥ śuddhaḥ svaccho vā sphaṭikastathā |
kaustubho vā maṇiryadvat tathā te sādhavo mama || 77 ||
[Analyze grammar]

yathā vā kāmadhenurgauryathā dugdhaṃ ca nirjalam |
yathā vā kanakaṃ śuddhaṃ tathā te sādhavo mama || 78 ||
[Analyze grammar]

yathā cintāmaṇiḥ śreṣṭho yathā kalpataruśca vā |
kalpavallī yathā śreṣṭhā tathā te sādhavo mama || 79 ||
[Analyze grammar]

yathā me hṛdayaṃ śreṣṭhaṃ yathā mūrtiśca me parā |
yathā'kṣaraṃ paraṃ dhāma tathā te sādhavo mama || 80 ||
[Analyze grammar]

yathā viṣṇuḥ sadā śuddhaḥ yathā śīlaṃ vratottamam |
yathā śāntirmahaddravyaṃ tathā te sādhavo mama || 81 ||
[Analyze grammar]

yathā kṣetraṃ kaṇisasyānvitaṃ gauḥ prasavonmukhī |
yathā yajño dakṣiṇāntastathā te sādhavo mama || 82 ||
[Analyze grammar]

yathā vṛkṣāḥ phalāḍhyāśca puṣpāḍhyā vallayo yathā |
camatkārī yathā tyāgī tathā te sādhavo mama || 83 ||
[Analyze grammar]

yathā ratnamayī pṛthvī māyā guṇamayī yathā |
ātmā cā'śatrayāḍhyaśca tathā te sādhavo mama || 84 ||
[Analyze grammar]

yathā'haṃ sarvasāmarthyo yathā lakṣmīrhi sampadaḥ |
yathā kṛṣṇātmakaṃ sarvaṃ tathā te sādhavo mama || 85 ||
[Analyze grammar]

yathā sudarśanaṃ cakraṃ yathā daṇḍo yamasya ca |
yathā prasannatā viṣṇostathā te sādhavo mama || 86 ||
[Analyze grammar]

yathā śaṃbhukṛtā bhaktiryathā sevā satīkṛtā |
yathā snehaḥ kāmakṛtastathā te sādhavo mama || 87 ||
[Analyze grammar]

yathā kṣamā sādhuniṣṭhā yathā bhaktagataṃ vacaḥ |
dāsyaṃ sādhvīgataṃ yadvat tathā te sādhavo matāḥ || 88 ||
[Analyze grammar]

vrataṃ patnīgataṃ yadvat tṛptirnistṛṣṇagā yathā |
gaṃgāmbhaḥ pāvanaṃ yadvat tathā te sādhavo mama || 89 ||
[Analyze grammar]

yathā vaṃśaḥ putragato dānaṃ kanyāgataṃ yathā |
pūjā gaṇeśagā yadvat tathā te sādhavo mama || 90 ||
[Analyze grammar]

yathā'haṃ sādhurevā'smi sādhvī tvaṃ ca virājase |
yathā yogaścāvayorvai tathā te sādhavo mama || 91 ||
[Analyze grammar]

kimvadhikaṃ vedayāmi praśaṃsā nā'tralabhyate |
bhagavantaḥ sādhavo me bhakto'haṃ sarvathā satām || 92 ||
[Analyze grammar]

anarpya mama sadbhyo yo bhuṃkte svodarasaṃbharaḥ |
jāyate sa kṛśe deśe kṛśo vai brahmarākṣasaḥ || 93 ||
[Analyze grammar]

sādhūcitaṃ pūjanaṃ cā'kṛtvā yo modate gṛhe |
svagarvāt so'pi dehānte jāyate brahmarākṣasaḥ || 94 ||
[Analyze grammar]

dhanaiśvaryayutaścāpi sevate na sato janān |
nindati cā'vajānāti sa bhaved brahmarākṣasaḥ || 95 ||
[Analyze grammar]

guṇābhimānasandṛbdho prā'jñān paśyati vai sataḥ |
daridrāṃścā'vajānāti sa bhaved brahmarākṣasaḥ || 96 ||
[Analyze grammar]

ajeyānapi sādhūṃśca tiraskārān karoti yaḥ |
mithyādoṣān prāhiṇoti sa bhaved brahmarākṣasaḥ || 97 ||
[Analyze grammar]

ajātaśatrūn sādhūn yaḥ kleśe yojayatīśvaraḥ |
sampanno'pi mṛtaḥ paścājjāyate brahmarākṣasaḥ || 98 ||
[Analyze grammar]

vidvānapi sataḥ śāntānavamatya jugupsati |
hīyamāno'pi durvṛttaiḥ sa bhaved brahmarākṣasaḥ || 99 ||
[Analyze grammar]

yastu mitramukhaḥ śatrurbhavati śvāsaghātakaḥ |
anāryaścāryavidveṣṭā jāyate brahmarākṣasaḥ || 100 ||
[Analyze grammar]

ayatsu vartamānaśca sato bhāvaṃ viḍambate |
praśaṃsati duṣṭabhāvān jāyate brahmarākṣasaḥ || 101 ||
[Analyze grammar]

mahadguṇaistu yo hīno mahat prārthayate'khilam |
sato'vamantā tadyoge jāyate brahmarākṣasaḥ || 102 ||
[Analyze grammar]

tapasvinaṃ kṣamāyuktaṃ guruṃ vijñāninaṃ prabhum |
prasahya cā'vamantā yo jāyate brahmarākṣasaḥ || 103 ||
[Analyze grammar]

sādhūn vanecarān vīkṣya nottiṣṭhate purastu yaḥ |
nātmahitaṃ cared yastu jīvan vai rākṣaso hi saḥ || 104 ||
[Analyze grammar]

rākṣaso'pi harerbhaktān sādhūnnatvā prasevate |
prasādayati sevābhiścāśīrvādān suvindati || 105 ||
[Analyze grammar]

sadguṇān sukhadān lakṣmi yo gṛhṇāti sato janāt |
sa eva jāyate loke sādhurvai sādhuvartanaḥ || 106 ||
[Analyze grammar]

na janma nāpi yatnaśca na veṣaḥ sādhutā'rjakaḥ |
sādhusatsaṃgasevādi kāraṇaṃ sādhutāgrahe || 107 ||
[Analyze grammar]

ta eva tārakā lakṣmi darśanāt sparśanādapi |
sevanāt paricaraṇāt taranti dehino bhavāt || 108 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne sādhutve vividhaprayojakakāraṇādi sādhustavanā'stavanaphalādi cetikathananāmā tryaśītitamo'dhyāyaḥ || 83 ||
[Analyze grammar]