Chapter 84

śrīnārāyaṇīśrīruvāca |
kṛpāsindho jīvabandho cātmaprāṇapate vibho |
karmakṣetre naranārīdehe prāpte śubhāvahe || 1 ||
[Analyze grammar]

śreyo'rthinā daridreṇa bhāgyahīnena sarvathā |
yatra naiva tu sādhūnāṃ labhyate'pi samāgamaḥ || 2 ||
[Analyze grammar]

tatra kṛtvā vidhiṃ kiṃ ca prāpyeta mokṣaṇaṃ nijam |
ātmakalyāṇavāñcchāvān kalyāṇaṃ labhate katham || 3 ||
[Analyze grammar]

śrīpuruṣottama uvāca |
śṛṇu nārāyaṇīśri tvaṃ śreṣṭhaṃ pṛcchasi śobhanam |
karmakṣetramidaṃ cāste labdhvā mānuṣamuttamam || 4 ||
[Analyze grammar]

mātuḥ sevāṃ prakurvīta gṛhatīrthasya sarvathā |
yathā yathā nijā mātā prasannā syāttathā tathā || 5 ||
[Analyze grammar]

sevayitvā cā'rjayedvai tadāśiṣaḥ supuṇyadāḥ |
dāridryanāśikāścāpi śreyasāṃ sampradāḥ śubhāḥ || 6 ||
[Analyze grammar]

mātuśca sevayā bhāgyaṃ bhāgyahīnasya vardhate |
mātā nārāyaṇī brāhmī śreyaḥ karoti cāśiṣā || 7 ||
[Analyze grammar]

evaṃ pituḥ śubhā sevā kartavyā tīrtharūpiṇaḥ |
tadāśīrvādalābhena śreyaḥ puṇyaṃ hi labhyate || 8 ||
[Analyze grammar]

bhāgyaṃ bhavedviśālaṃ ca sampannaṃ śreyasā bhṛtam |
athaivaṃ sevayā bhāgyodayena syāt satī matiḥ || 9 ||
[Analyze grammar]

śāstrārthacintane yogyā tato jñānaṃ samarjayet |
jñānottaraṃ vivekaśca tato dhyeyaṃ hariṃ tu mām || 10 ||
[Analyze grammar]

dhyāyīta bhaktiṃ kurvīta mamaiva sarvadā śubhām |
bahudhā yatra nairmalyaṃ sthairyaṃ ca manaso bhavet || 11 ||
[Analyze grammar]

nāmajapaṃ prakurvīta hare kṛṣṇa narāyaṇa |
anādiśrīkṛṣṇanārāyaṇa śrīpuruṣottama || 12 ||
[Analyze grammar]

evaṃ vai kīrtanaṃ kurvan kārayan bhajanaṃ param |
sakhāyaṃ saṃvidadhīta sakhīn bhaktān vivardhayet || 13 ||
[Analyze grammar]

satsaṃgamaṇḍalaṃ paścāt sthāpayet saṃbhajeta mām |
kīrtanaṃ me sadā kuryāt sāyaṃ caikatra maṇḍalam || 14 ||
[Analyze grammar]

harerbhaktā maṇḍale ye te bodhyāḥ sādhavastadā |
śāstraśravaṇalābhena vṛddhavākyena vā sadā || 15 ||
[Analyze grammar]

sādhuguṇān sakhīn prāptvā satsaṃgaṃ vardhayet tataḥ |
evaṃ kṛtvā viśālaṃ vai vidadhīta svamaṇḍalam || 16 ||
[Analyze grammar]

mahāpuṇyapratāpena khalu satsaṃgamaṇḍalāt |
mumukṣutā bhavecchreṣṭhā tato bhaktyā subhāvayā || 17 ||
[Analyze grammar]

bhajitvā mā''tmakalyāṇaṃ prakurvīta sa bhaktarāṭ |
evaṃ lakṣmi balaṃ naijaṃ sabījaṃ vardhayet sadā || 18 ||
[Analyze grammar]

satsaṃgapoṣakaṃ yena bhuktirmuktirbhavettataḥ |
nāmakīrtanatulyaṃ vai sulabhaṃ sādhanaṃ nahi || 19 ||
[Analyze grammar]

alabdhasādhusaṃgasya nāmakīrtanamuttamam |
sādhvī jihvā nijā bodhyā tatsamāgamamācaret || 20 ||
[Analyze grammar]

sādhvī matirnijābodhyā tayā manvīta mādhavam |
manaḥ sādhu nijaṃ bodhyaṃ tena manvīta māṃ sadā || 21 ||
[Analyze grammar]

devaḥ sādhuritikṛtvā tena seveta keśavam |
evaṃ saṃgatimāsādya māṃ bhajeta sanātanam || 22 ||
[Analyze grammar]

ācāryā vā guravaśca koṭikalyāṇakāriṇaḥ |
evamātmabalenaiva terurbhavārṇavāt svayam || 23 ||
[Analyze grammar]

tārayāmāsuranyāṃśca śrīhareḥ kṛpayā tviha |
yatamānaṃ nijaṃ bhaktaṃ sāhāyyavarjitaṃ hariḥ || 24 ||
[Analyze grammar]

svayaṃ tatrā'vatīryaiva coṣitvā hṛdaye'pi ca |
bhaktamaṇḍalamadhye vā coṣitvā śreya arpayet || 25 ||
[Analyze grammar]

nahi kīrtanakṛt kaścidaniṣṭaṃ vindati priye |
sa eva tatra sādhurvai kīrtanena prajāyate || 26 ||
[Analyze grammar]

ayi lakṣmi śvapaco'pi gṛhe saṃkīrtayaṃśca mām |
sudūro'pi sādhumanāḥ sādhusnigdho hi sādhuvat || 27 ||
[Analyze grammar]

carmakāro'pi śīlāḍhyo mama bhaktiparāyaṇaḥ |
sādhusnigdhaḥ sādhureva kīrtayanmāṃ svakarmakṛt || 28 ||
[Analyze grammar]

mleccho'pi śīlayuktaścenmama bhaktiparāyaṇaḥ |
sādhusnigdhaḥ sādhureva kīrtayanmāmahiṃsakaḥ || 29 ||
[Analyze grammar]

ghātakī vyādha evā'pi śīlavratastyajan hatim |
sādhusnigdhaḥ sādhureva kīrtayanmāmahiṃsakaḥ || 30 ||
[Analyze grammar]

dhvajī cakrī ca vā sādhuḥ sādhusnehaparāyaṇaḥ |
śīlavrato'hiṃsakaśca kīrtayanmāmaharniśam || 31 ||
[Analyze grammar]

gaṇikā ca vyavāyī ca sādhusnehaparāyaṇau |
sādhūśīlavratau kīrtayantau māṃ kāmavarjitau || 32 ||
[Analyze grammar]

dhīvaraścāpi matsyādaḥ śīlavrato'pyahiṃsakaḥ |
sādhusnehaparaḥ sādhuḥ kīrtayanmāṃ pareśvaram || 33 ||
[Analyze grammar]

jallādo hārakaḥ stenaḥ sādhusnehaparāyaṇāḥ |
śīlavratāḥ karmaśūnyāḥ sādhavaśced raṭanti mām || 34 ||
[Analyze grammar]

bhujiṣyā vṛndalo vāpi sādhū śīlaparau yadā |
sādhusnigdhau kīrtayantau māṃ hariṃ puruṣottamam || 35 ||
[Analyze grammar]

bhāṇḍā naṭā nartakāśca kuśīlavāśca sādhavaḥ |
śīlavratāḥ sādhusnigdhāḥ kīrtayantaśca māṃ harim || 36 ||
[Analyze grammar]

bahurūpā narmakārāḥ śavahārāśca sādhavaḥ |
śīlavratāḥ sāghusnigdhāḥ kīrtayantaśca māṃ harim || 37 ||
[Analyze grammar]

sarvādā gaṇikeśāśca godhādāḥ sarpabhojanāḥ |
sādhavaḥ śīlavratinaḥ sādhusnigdhā raṭanti mām || 38 ||
[Analyze grammar]

jālagrāhāḥ piśitādāḥ santyajya krūravartanām |
sādhavaḥ śīlavratinaḥ sādhusnigdhā raṭanti mām || 39 ||
[Analyze grammar]

agnidā garadāḥ śūlapradāḥ pāśapradā api |
raṭanto māṃ sādhuśīlā sādhusnigdhā hi sādhavaḥ || 40 ||
[Analyze grammar]

śastrajīvī cikitsākṛcchavāṃgibhedino yadi |
raṭanto māṃ sādhuśīlāḥ sādhusnigdhā hi sādhavaḥ || 41 ||
[Analyze grammar]

bhārṣṭrabhaṭṭhīkarāścāpi vanāraṇāvighātinaḥ |
śīlaparāḥ sādhusnigdhāḥ sādhavo hi raṭanti mām || 42 ||
[Analyze grammar]

unmattaśca vicittaśca śaṭhaḥ svārthī hi sādhavaḥ |
sādhusnigdhāḥ śīlaparā māṃ raṭanti vidurguṇāḥ || 43 ||
[Analyze grammar]

āsurā rākṣasā daityā dānavāḥ pāpino'pi ca |
sādhusnigdhāḥ śīlavantaḥ sādhavo māṃ raṭantyapi || 44 ||
[Analyze grammar]

bhūtāḥ pretāḥ piśācādyā raṭanto māṃ hi sādhavaḥ |
śīlaparāḥ sādhuvratāḥ sādhusnigdhāstathā mayi || 45 ||
[Analyze grammar]

mādhukaghnā matsyahārāḥ śakunighnā hi sādhavaḥ |
sādhuśīlā sādhusnigdhāḥ karmaśūnyā raṭanti mām || 46 ||
[Analyze grammar]

paśuvāhāḥ pañjariṇo viśvāsaghātakāśca te |
raṭanto māṃ sādhuśīlāḥ sādhusnigdhā hi sādhavaḥ || 47 ||
[Analyze grammar]

tiryagvṛttaya ātmastrīraktavikrayiṇo'pi tu |
raṭanto māṃ sādhuśīlāḥ sādhusnigdhā hi sādhavaḥ || 48 ||
[Analyze grammar]

yantriṇāścakriṇaścāpi śastriṇaḥ sādhavo hi te |
raṭanto māṃ sādhuśīlāḥ sādhusnigdhā hi sāttvikāḥ || 49 ||
[Analyze grammar]

rājabhaṭādhipā nyāyādhipā nṛpā hi sādhavaḥ |
raṭanto māṃ sādhuśīlā sādhusnigdhā hi sāttvikāḥ || 50 ||
[Analyze grammar]

muṣkacchedakarā daṃṣṭrāhārāśca liṅgakṛttinaḥ |
raṭanto māṃ sādhuśīlā sāghusnigdhā hi sāttvikāḥ || 51 ||
[Analyze grammar]

akarmāṇo vikarmāṇo nṛśaṃsā api sādhavaḥ |
raṭanto māṃ sādhuśīlā sādhusnigdhā hi sādhavaḥ || 52 ||
[Analyze grammar]

daurhṛdanāśakā dhātubhojinaḥ śaucavarjitāḥ |
raṭanto māṃ sādhuśīlā sāghusnigdhā hi sādhavaḥ || 53 ||
[Analyze grammar]

yeṣāṃ vai pañcakaṃ siddhaṃ sādhavaste sadā matāḥ |
niṣkāmatā hyalobhitvaṃ nirmānitvaṃ niḥsvāditā || 54 ||
[Analyze grammar]

niḥsnehitā ca sarvatra santastatpañcavṛttayaḥ |
kāmavāsanāhīnatvaṃ niṣkāmitā yathāyatham || 55 ||
[Analyze grammar]

āvaśyakātiriktecchāhīnatvaṃ lobhavarjitā |
agarvaḥ sarvathā nirmānitvaṃ stabdhatvavarjitā || 56 ||
[Analyze grammar]

prāṇayātrārthabhojyāptirniḥsvāditvaṃ hi tat smṛtam |
evaṃ śīlaparāḥ sādhurbhaktimārgaparāyaṇaḥ || 57 ||
[Analyze grammar]

tarati tārayatyanyān mahābhāgavato hi saḥ |
yeṣāṃ vā pañcakaṃ cānyanmumukṣutvaṃ kathāśrutiḥ || 58 ||
[Analyze grammar]

bhaktasādhoḥ saṃgatiśca sevābhaktipravartanam |
ātmanivedanaṃ ceti pañcavatsādhavo matāḥ || 59 ||
[Analyze grammar]

yeṣāṃ vā pañcakaṃ cānyat prātaḥsnānaprapūjanam |
madhyāhne haraye bhojyanivedanaṃ sadā'nvaham || 60 ||
[Analyze grammar]

upārjanasya viṃśāṃ'śo'rpaṇīyo haraye tathā |
mālikāvartanaṃ nityaṃ cānte tvātmanivedanam || 61 ||
[Analyze grammar]

ta ete sādhavaḥ syuśca gṛhe vane ca nirjane |
samāje vāpi jīvānāṃ tārakāste bhavanti vai || 62 ||
[Analyze grammar]

duṣṭaguṇān vihāyaiva sadguṇānarjayettu yaḥ |
sādhuratra bhavet so'pi bhajate ceddhariṃ sadā || 63 ||
[Analyze grammar]

māyā pāpaṃ pāpavanto jīvā māyāvinaḥ khalu |
māyādurguṇamutsṛtya sadguṇān prāpya madratāḥ || 64 ||
[Analyze grammar]

dharmavaśāśrayā loke sādhavaḥ sādhubhūṣaṇāḥ |
saṃsāriṇastu ye jīvāḥ sarve durguṇasaṃbhṛtāḥ || 65 ||
[Analyze grammar]

paścātprāpya satāṃ śreṣṭhaguṇān bhavanti sādhavaḥ |
māyāmalena hīnāste santo bhavanti nirmalāḥ || 66 ||
[Analyze grammar]

dīyamānāni ratnāni kambalānyambarāṇi ca |
sampadaḥ sukhabhogyāśca nā'vekṣate hṛdā'pi yaḥ || 67 ||
[Analyze grammar]

bhogyabhoktṛtvavṛttiśca yasya nā''vartate muhuḥ |
sādhuvṛttiḥ sa vijñeyastāpaso doṣatāpanaḥ || 68 ||
[Analyze grammar]

jaihvayaṃ śaiśnyaṃ jitaṃ yena jitaṃ sarvaṃ mahātmanā |
aśrāvyo badhiro yaścā'pyaprekṣye netravarjitaḥ || 69 ||
[Analyze grammar]

aspṛśye tvagvihīnaścāpyaghreye ghrāṇavarjitaḥ |
akathye jihvayā hīnaścā'bhakṣye rasanākṣayaḥ || 70 ||
[Analyze grammar]

agrāhye hastaśūnyaścāpyagamye pādavarjitaḥ |
atyājye pāyuśūnyaścāpyayogye kāmavarjitaḥ || 71 ||
[Analyze grammar]

aliṅgye liṅgaśūnyaśca sarvathā matparāyaṇaḥ |
videhaḥ sādhurevā'yaṃ parasyāpi gatipradaḥ || 72 ||
[Analyze grammar]

āsyabhūrmṛgavadyasya śayyā cā''jagarī yathā |
nidrā ca jalavad yasya kalpanā vyomapuṣpavat || 73 ||
[Analyze grammar]

dehaśchāyāsamo yasya vastujātaṃ tu svapnavat |
smṛddhayo bhasmavad yasya samutsavaḥ śmaśānavat || 74 ||
[Analyze grammar]

astitvaṃ nāstitātulyaṃ sādhuḥ so'yaṃ saduttamaḥ |
yasya sarvaṃ mayi cāste mattulyaḥ sādhureva saḥ || 75 ||
[Analyze grammar]

yathā''kāśagataṃ cā'mbhaṃ vidyudvegāt pravarṣati |
tathā sādhoḥ prasaṃgācca bhaktaḥ snehena varṣati || 76 ||
[Analyze grammar]

yathā meghā vilīyante vāyuvegena cāmbare |
tathā sādhoḥ prasaṃgena līyante pāpakoṭayaḥ || 77 ||
[Analyze grammar]

yathā vai jāgrataḥ svāpnaṃ līyate tatkṣaṇaṃ tathā |
sādhoryogena līyante kaṣāyāstatkṣaṇaṃ rame || 78 ||
[Analyze grammar]

yathā tamovināśo vai sūryabhābhiḥ prajāyate |
tathā sādhoścamatkārairlīyante kalmaṣāṇi vai || 79 ||
[Analyze grammar]

yathā putraprasavena līyante śokakoṭayaḥ |
tathā sādhuprasaṃgena līyante śokakoṭayaḥ || 80 ||
[Analyze grammar]

yathā lagnaprasaṃge ānandā bhavanti sotsavāḥ |
tathā sādhuprasaṃgena mokṣānandotsavodbhavāḥ || 81 ||
[Analyze grammar]

yathā māturdarśanena sukhaṃ bālasya jāyate |
tathā sādhordarśanena sukhaṃ bhaktasya jāyate || 82 ||
[Analyze grammar]

yathā miṣṭānnalābhena modante bālabālikāḥ |
tathā vai sādhulābhena modante bhaktakoṭayaḥ || 83 ||
[Analyze grammar]

yathā varṣartumāsādya kekā vadanti kekinaḥ |
tathā sādhvartumāsādya kīrtayanti harerjanāḥ || 84 ||
[Analyze grammar]

yathaikaputranāśena vṛddhapitrorvidehatā |
tathā satāṃ viyoge tu bhaktānāṃ syād videhatā || 85 ||
[Analyze grammar]

yathā vandhyā putralābhe harṣonmattā prajāyate |
tathā sādhorgṛhe lābhe harṣonmattā mamā''śritāḥ || 86 ||
[Analyze grammar]

yathā sugandhasārādyaiḥ praphullaṃ mānasaṃ tathā |
śrīkṛṣṇasādhudharmādyairbhaktamanaḥ praphullati || 87 ||
[Analyze grammar]

yathā'tīṣṭasya lābhena sarvānandā bhavanti vai |
tathā sādhorāgamane sarvānandā bhavanti hi || 88 ||
[Analyze grammar]

yathā nāṭyagataṃ pātraṃ raṅgaṃ prasannayatyati |
tathā sādhoḥ sevakaśca sādhūn prasannayatyati || 89 ||
[Analyze grammar]

yathā sādhvī hariṃ kāntaṃ sadā prasevate sukhā |
tathā bhakto hariṃ sādhuṃ sevate ca mudā sukhaḥ || 90 ||
[Analyze grammar]

yathā vyādhasya putrādau snehaḥ sadā prapoṣaṇe |
tathā bhaktasya sādhvādau snehaḥ sadā pramokṣaṇe || 91 ||
[Analyze grammar]

yathā gaurvatsamāsādya dadāti dhārayā payaḥ |
bhaktaḥ sādhūn samāsādya sarvasvaṃ pradadāti ha || 92 ||
[Analyze grammar]

yathā vṛkṣā jalaṃ pītvā praphullitā navā'ṅkurāḥ |
tathā bhaktāḥ sataḥ prāpya bahvārpaṇanavāṃ'kurāḥ || 93 ||
[Analyze grammar]

yathā nadyaḥ pūravṛddhyā hyunmattā āptumapnidhim |
tathā bhaktā bhaktivṛddhyā hyunmattā āptumīśvaram || 94 ||
[Analyze grammar]

yathā ca nāpito rājasevā prāpya pramodate |
tathā bhaktaḥ sādhusevāṃ prāpya sadā pramodate || 95 ||
[Analyze grammar]

yathā yuvā ca yuvatīṃ prāpyaiti tattadātmatām |
tathā bhakto hariṃ sādhuṃ prāpyaiti tattadātmatām || 96 ||
[Analyze grammar]

yathā rājā''jñayā bhṛtyā vartante namramārgiṇaḥ |
tathā sādhvājñayā bhaktā vartante dharmamārgiṇaḥ || 97 ||
[Analyze grammar]

yathā dīpo rātriyoge prakāśate svayamprabhaḥ |
tathā bhaktaḥ sādhuyoge prakāśate hariprabhaḥ || 98 ||
[Analyze grammar]

yathā pakvaṃ phalaṃ vṛkṣaṃ jahātyeva hi kālataḥ |
tathā pakvaphalo bhakto jahātyeva tu māyikam || 99 ||
[Analyze grammar]

yathā patnī dharmaśīlā'nusaratyeva satpatim |
tathā sādhvīṃ ca vā sādhumanuvrajati bhaktarāṭ || 100 ||
[Analyze grammar]

nārāyaṇanivāsena yathā nārāyaṇāyate |
tathā sādhutvavāsena vyaktirvai sādhavāyate || 101 ||
[Analyze grammar]

yadvadbhaktinivāsena bhakto bhavati mānavaḥ |
lakṣmi sādhutvavāsena sādhurbhavati mānavaḥ || 102 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne sādhusamāgamarahitasyāpimokṣopāyāḥ sādhulābhaḥ sādhutvalābhastadvividhatā cetyādinirūpaṇanāmā caturaśīti |
tamo'dhyāyaḥ || 84 ||
[Analyze grammar]