Chapter 77

śrīnārāyaṇīśrīruvāca |
sādhvīdharmān samastān vai vaktumarhasi mādhava |
sādhvyaḥ sarvā bhavaddehājjātā māyāparā hi tāḥ || 1 ||
[Analyze grammar]

loke'tra vai kathaṃ tābhirvartitavyaṃ nirantaram |
kṛṣṇadhavā hi tyāginyaḥ sāṃkhyayoginya eva tāḥ || 2 ||
[Analyze grammar]

haripriyāśca tāḥ sarvāḥ kṛṣṇakāntā hi yoṣitaḥ |
brāhmyastāśca mahābhāgavatyaḥ sāttvatya eva tāḥ || 3 ||
[Analyze grammar]

sarvathā''tmanivedinyo varteran kena cā'dhvanā |
pātivratyaṃ kathaṃ tāsāṃ vinā vivāhitaṃ patim || 4 ||
[Analyze grammar]

śrīpuruṣottama uvāca |
śṛṇu nārāyaṇīśri tvaṃ tyāgadīkṣitayoṣitām |
dīkṣā vivāha evāsti mayā sākaṃ hi yojitaḥ || 5 ||
[Analyze grammar]

oṃnamaḥ śrīkṛṣṇanārāyaṇāya pataye svāhā |
iti mantreṇa sā sādhvī vivāhitā'gnisannidhau || 6 ||
[Analyze grammar]

homaṃ kṛtvā dīkṣitā sā mama mūrtyā samaṃ tadā |
pūjayitvā ca māṃ prāptā niveditā'gnimaṇḍape || 7 ||
[Analyze grammar]

mama kāṣāyāmbarāṇi svīcakāra ca sā satī |
gurvājñayā ca me kāntā jātā'sti dīkṣitakṣaṇāt || 8 ||
[Analyze grammar]

ataścā'syāḥ kṛṣṇa eva patiścā'smi narāyaṇaḥ |
vivāhitaiva sā cāste pātivratyaṃ sadā mayi || 9 ||
[Analyze grammar]

pālanīyaṃ tayā sādhvyā pāvanyā mama yoṣitā |
mamā'dhvanā hi gaccheyurvarteraṃśca mamā'dhvanā || 10 ||
[Analyze grammar]

divyabhaktyā ca varteran mokṣādhvanā sadadhvanā |
sādhusevāṃ prakuryuśca sādhavo mama mūrtayaḥ || 11 ||
[Analyze grammar]

niṣkāmavṛttyā varteran sevayeyustathaiva ca |
sarvathā''tmanivedinyo bhaveyurmama mūrtiṣu || 12 ||
[Analyze grammar]

sādhvīdharmāḥ strīdharmāste vivāhe ṛṣibhiḥ kṛtāḥ |
sahadharmādicāriṇyo bharturbhavanti lagnake || 13 ||
[Analyze grammar]

tasmāllagnavatī patnī yathā patyurnideśinī |
tathā tyāgavatī sādhvī patyurme'sti nideśinī || 14 ||
[Analyze grammar]

agniṃ sākṣiṇamāsādya guruṃ ca pitarāvapi |
gaṇeśaṃ ca tathā māṃ ca patnī sādhvī same hyubhe || 15 ||
[Analyze grammar]

pātivratyaṃ paraṃ dharmaṃ gṛhṇītaḥ sa vṛṣaḥ samaḥ |
pātnīvratyaṃ tathā patyurharerme ca samaṃ tathā || 16 ||
[Analyze grammar]

sahadharmacarī bharturbhavatyagnyādisannidhau |
sahadharmacaraḥ patnyā bhavatyagnyādisannidhau || 17 ||
[Analyze grammar]

sahadharmacaraṃ kāntamanusmaret sadā'rpitā |
susvabhāvā suvacanā suvṛttā sukhadarśanā || 18 ||
[Analyze grammar]

ananyacittā sumukhī bhartuḥ sadharmacāriṇī |
bhavet saddharmaparamā bhavet saddharmabhāginī || 19 ||
[Analyze grammar]

devadevaṃ svabhartāraṃ sādhvī nityaṃ vilokayet |
śuśrūṣāṃ paricaryāṃ ca kuryād divyakriyā'nvitā || 20 ||
[Analyze grammar]

nā'nyabhāvā hyavimanāḥ subhāvā sukhadāyinī |
putravaktramivā'bhīkṣṇaṃ bhartrānanaṃ vilokayet || 21 ||
[Analyze grammar]

namet suniyamāḍhyā ca bhartāraṃ dharmacāriṇī |
jñātvā dampatīdharmāṃśca sahadharmān nijāśritān || 22 ||
[Analyze grammar]

matvaiva dharmaparamā bhavet bhartusamavratā |
devadevaṃ hi bhartāraṃ seveta śāntisaṃyutā || 23 ||
[Analyze grammar]

suprasannamukhī bharturbhavedevāpi śikṣitā |
tāḍitoktā paruṣāṇi vaśyā tathāpi nityadā || 24 ||
[Analyze grammar]

nānyaṃ naraṃ spṛśet sādhvī nirīkṣeta na kāmataḥ |
hāsyabhāvādibhiścāpi nānyena saha vartayet || 25 ||
[Analyze grammar]

bhartṛvarjaṃ priyaṃ nāsti yasyā ucchiṣṭameva tat |
bhartṛyuktaṃ priyaṃ sarvaṃ mahāprasāda eva tat || 26 ||
[Analyze grammar]

bhartrājñā bhagavatsvājñā bhartā śrīparameśvaraḥ |
bhartrārohā bhaved yā sā bhavedvai dharmacāriṇī || 27 ||
[Analyze grammar]

daridraṃ vyādhitaṃ dīnaṃ duḥkhitaṃ śramitaṃ mṛdum |
patiṃ kāntamupāste yā sā bhaved dharmabhāginī || 28 ||
[Analyze grammar]

putriṇī kanyakā mātā cānapatyā ca niṣphalā |
patipriyā patiprāṇā yā sā syād dharmabhāginī || 29 ||
[Analyze grammar]

dāsyaṃ bhṛtyatvamevāpi kaiṃkaryaṃ kurvatī ca yā |
śuśrūṣaṇaṃ paricaryāṃ kurvatī dharmabhāginī || 30 ||
[Analyze grammar]

vinītā komalavṛttiḥ snigdhā patyau sthirāśayā |
patyarthakṛtasarvasvā sā bhaved dharmabhāginī || 31 ||
[Analyze grammar]

na kāmeṣu na bhogeṣu naiśvaryeṣu sukheṣu na |
spṛhā yasyā yathā kānte sā sādhvī dharmabhāginī || 32 ||
[Analyze grammar]

prāgutthānapriyā prātargṛhasevāparāyaṇā |
sammārjanapralepādiśuddhiparā ca yā sadā || 33 ||
[Analyze grammar]

agnikāryaparā cāpi devakāryaparā tathā |
kartavyārthaparā yā syāt sā bhaved dharmabhāginī || 34 ||
[Analyze grammar]

devatā'tithibhṛtyānāṃ patyurvṛddhajanasya ca |
yathāpekṣaṃ pradattvaiva jalādi toṣayettu yā || 35 ||
[Analyze grammar]

tān sarvān bhojayitvaiva śeṣānnaṃ bhuṃkta eva yā |
tuṣṭapuṣṭakuṭumbā ca sā bhaveddharmabhāginī || 36 ||
[Analyze grammar]

śvaśrūśvaśurayoḥ pādau sevamānā natā sadā |
mātṛpitṛparā nityaṃ sā bhaveddharmabhāginī || 37 ||
[Analyze grammar]

sādhūn dīnānanāthāṃśca bibhartyannādibhistu yā |
yathāśakti svāmidharmā sā bhaveddharmabhāginī || 38 ||
[Analyze grammar]

brahmiṣṭhāvat patisthā yā patyanyaṃ puruṣaṃ kvacit |
api catuḥkhanisthaṃ vai nekṣate baddhanetrikā || 39 ||
[Analyze grammar]

durlabhā tādṛśī loke vinā lakṣmīṃ hṛdi sthitām |
vinā satīṃ śaṃbhuhṛtsthāṃ cā'dṛśyabhāvamāsthitām || 40 ||
[Analyze grammar]

vrataṃ carati yā svāmyaṃ duścaraṃ patinoditam |
paticittā patihitā sā bhaveddharmabhāginī || 41 ||
[Analyze grammar]

puṇyametat svargametat tapaścaitad vrataṃ ca tat |
bhartā hyeva paro devo yasyā nārāyaṇaḥ svayam || 42 ||
[Analyze grammar]

patirdevo hi nārīṇāṃ patirguruḥ patirgatiḥ |
patirbanghuḥ patirbhāgyaṃ patiḥ prāṇaḥ parāyaṇaḥ || 43 ||
[Analyze grammar]

patiprasādaḥ svargo'sti nirayaḥ patyatoṣaṇam |
akāryaṃ cāpyadharmaṃ vā prāṇanāśakaraṃ ca vā || 44 ||
[Analyze grammar]

patirbrūyāt tathā kuryāt pātivratyaṃ paro vṛṣaḥ |
dāridryaṃ vyādhirāpadvā śatrutā śāpadagdhatā || 45 ||
[Analyze grammar]

vicittatvaṃ ca vā patyuḥ sarvaṃ svānuguṇaṃ kriyāt |
subhāgyaṃ sarvamevaitanmatvā seveta vai patim || 46 ||
[Analyze grammar]

evaṃ sarvasvārpaṇā yā vartate patigāminī |
āpaddharmānanuprekṣya sā prātivratyayoginī || 47 ||
[Analyze grammar]

patiścā'haṃ sadā sādhvyā yathā loke vivāhitaḥ |
sādhvī madarthamevā'tra varteta matparāyaṇā || 48 ||
[Analyze grammar]

madarthasnānaśuddhiśca madarthā'malatānvitā |
madarthaṃ ca kṛtaveṣā madarthaṃ rūpaśālinī || 49 ||
[Analyze grammar]

madarthasarvasaṃskārā sādhvī me vai pativratā |
raktāmbarā madarthaṃ kāṣāyavastrā madarthinī || 50 ||
[Analyze grammar]

puṇḍracandrādiyuktā ca madarthaṃ gandhayoginī |
madarthaṃ puṣpahārā ca madarthaṃ mālyadhāriṇī || 51 ||
[Analyze grammar]

madarthaṃ kaṇṭhapaddhastabhūṣā sādhvī pativratā |
madarthaṃ bhojanāhārā madarthaṃ pānayoginī || 52 ||
[Analyze grammar]

madarthaṃ kṛtaśṛṃgārā madarthaṃ bhogavāhanā |
madarthaṃ kṛdalaṃkārā sādhvī sā me pativratā || 53 ||
[Analyze grammar]

madarthaṃ keśaveṣā ca madarthaṃ kṛtakañcukī |
madarthaṃ kṛtaśāṭī ca madarthaṃ kaṭivastriṇī || 14 ||
[Analyze grammar]

madarthaṃ karapādā ca madarthakṛtamastakā |
madarthakṛtkabandhā ca madarthāntaracāriṇī || 55 ||
[Analyze grammar]

madarthaguṇabhāvā ca madarthānandavarṣiṇī |
mannāmaguṇamagnā ca sādhvī sā me pativratā || 56 ||
[Analyze grammar]

madarthanityasattvasthā madarthanityarājasī |
madartharodhasaṃyuktā madarthasneharakṣiṇī || 57 ||
[Analyze grammar]

madarthahṛdayā nityaṃ madarthakāmakāriṇī |
evaṃ vai vartamānā yā sā me harivratā satī || 58 ||
[Analyze grammar]

api puṇyamapi dharmaṃ karma cācaraṇaṃ śubham |
yadvā'nyat kurvatī sādhvī śīlasaubhāgyayoginī || 59 ||
[Analyze grammar]

matparā syānmadviśrāntā matprāṇā mallayānvitā |
manmūrtireva varteta sā sādhvī me harivratā || 60 ||
[Analyze grammar]

madarthatyāgadharmā ca madarthasatyaśālinī |
madarthaṃ ca kṛtasvāpā madarthaṃ jāgrati sthitā || 61 ||
[Analyze grammar]

madarthaṃ vyāpṛtā cāste madarthaṃ vinivṛttikā |
evaṃ madarthasantoṣā madarthā'hiṃsanavratā || 62 ||
[Analyze grammar]

madarthayajñasannyāsā madarthahomasatkriyā |
madarthaṃ brahmacaryasthā madarthaṃ cā'parigrahā || 63 ||
[Analyze grammar]

madarthaśaucācārā ca madarthaṃ tapaāsthitā |
madarthaṃ svādhyāyaparā madarthopāsanāyutā || 64 ||
[Analyze grammar]

madarthendriyavyāpārā madarthamānasā sadā |
madarthā'haṃ cantanā ca madarthanirṇayānvitā || 65 ||
[Analyze grammar]

madarthasattvayatnā ca madarthabhāvanāśrayā |
madarthaiśvaryasiddhiśca madarthadhyānasaṃsthitā || 66 ||
[Analyze grammar]

madarthaśuklamārgasthā madarthā'tithipūjanā |
madarthapācanakāryā madarthāhāragocarā || 67 ||
[Analyze grammar]

madarthagṛhaśālāḍhyā madarthagītikīrtanā |
madarthaṃ nṛtyabhāvasthā madarthaṃ ca kathāśravā || 68 ||
[Analyze grammar]

madarthaṃ ca mahotsāhā madarthatīrthacāriṇī |
madarthaṃ kṛtayātrā ca madarthapuṣpavāṭikā || 69 ||
[Analyze grammar]

madarthaṃ kṛtavyāpārā madarthakrayavikrayā |
madarthaṃ kṛṣiyatnāḍhyā madarthaṃ rāṣṭrarakṣiṇī || 70 ||
[Analyze grammar]

madarthaṃ sevanaṃ yasyā madarthaṃ bhṛtyatānvitā |
madarthaṃ dāsyamāpannā madarthaṃ sarvasaṃvidhā || 71 ||
[Analyze grammar]

madarthagamanā''dānā madarthā''locanānvitā |
evaṃ madarthatāṃ prāptā sādhvī sā me harivratā || 72 ||
[Analyze grammar]

madarthaṃ kārtikavratā madarthaṃ pauṣatāpasī |
madarthaṃ caitrapuṇyāḍhyā madarthaṃ śrāvaṇīsthitā || 73 ||
[Analyze grammar]

madarthaṃ dīpadā cāpi madarthaṃ paṃktibhojanā |
madarthaṃ śiṣyatāṃ prāptā madarthaṃ gurutāṃ gatā || 74 ||
[Analyze grammar]

madarthaṃ sarvaśiṣyābhiḥ samanvitā'pi sevikā |
gurvī gurupadaṃ prāptā manmūrtiścāpi sā satī || 75 ||
[Analyze grammar]

sādhvī sādhvīsamācārā sā sādhvī me harivratā |
evaṃvidhā tyāgadharmā mama lakṣmi pativratā || 76 ||
[Analyze grammar]

rādhāsakhyastathā lakṣmīsakhyaḥ śrīsakhya ityapi |
māṇikīsakhya evāpi satīsakhyaśca yāḥ śubhāḥ || 77 ||
[Analyze grammar]

sāvitrīsakhya evāpi sītāsakhyaśca yāstathā |
bhaktisakhyaśca yāḥ sarvā nārāyaṇyaśca yā matāḥ || 78 ||
[Analyze grammar]

vāsudevyastathā kārṣṇyo brahmapriyāśca yāstathā |
vaiṣṇavyo bhagavatyaśca brāhmyo muktānya ityapi || 79 ||
[Analyze grammar]

yāstathā pārameśvaryaṃ īśānyaścāpi yoṣitaḥ |
īśvaryaścāpi sarvāstāḥ sādhvyo me vai pativratāḥ || 80 ||
[Analyze grammar]

yāsāṃ yadarthaṃ sarvasvaṃ kāntārthaṃ sarvameva me |
ityanyonyaṃ sādhusādhvībhāvo'haṃ parameśvaraḥ || 81 ||
[Analyze grammar]

māṃ vinā nahi sādhvyastāstā vinā nahi cāsmyaham |
parasparānuyogasthā bhogamuktipradā nṛṇām || 82 ||
[Analyze grammar]

devānāmīśvarāṇāṃ ca siddhānāṃ brahmavādinām |
sarveṣāṃ dehinaḥ cāpi bhogadā muktidā vayam || 83 ||
[Analyze grammar]

nibodha lakṣmi māhātmyaṃ te sakhīnāṃ tavāpi ca |
mamāpi mama muktānāṃ māhātmyaṃ cāvadhehi tat || 84 ||
[Analyze grammar]

ahaṃ san bhagavān sākṣātparabrahmapareśvaraḥ |
cit sādhvī tvaṃ satīvargā brahmapriyā haripriyāḥ || 85 ||
[Analyze grammar]

tadyogena sadānando mahānandā'sti cāvayoḥ |
śāśvatānanda evā'sti tadbhoktā mukta eva ha || 86 ||
[Analyze grammar]

ahaṃ sādhuḥ ramā sādhvī lakṣmīḥ satī sadā'sti vai |
śrīḥ sampat māṇikī saukhyaṃ pañcaitad daivataṃ param || 87 ||
[Analyze grammar]

sādhuḥ sarvavidhaṃ saukhyaṃ dadāti ca karoti ca |
sādhvī sarvavidhaṃ saukhyaṃ dadāti ca karoti ca || 88 ||
[Analyze grammar]

satī satyaṃ vartayati sampad bhadratvamuttam |
rakṣatyeva tataḥ saukhyaṃ pravartata hi śāśvatam || 89 ||
[Analyze grammar]

sarvadā muktitulyaṃ vai parabrahmabhṛtaṃ mahat |
evaṃ lakṣmi sadā sādhvī pārabrāhmī satī mama || 90 ||
[Analyze grammar]

sarvānandaparipūrṇā modate svāminā mayā |
anādiśrīkṛṣṇanārāyaṇena paramātmanā || 91 ||
[Analyze grammar]

dehaścā'yaṃ naro nārī nātmā nārī naro'pi vā |
ātmārāmā munayaśca sādhavaḥ sādhvikāstathā || 92 ||
[Analyze grammar]

brahmātmaniṣṭhā madyogā madbhāvā macchrayāstathā |
narā nāryaḥ śeṣabhūtāsteṣu nārāyaṇo'smyaham || 93 ||
[Analyze grammar]

naramāśrayati yā sā nārī cātmā madāśritaḥ |
evaṃ sarve tathā''tmāno nāryaścāśrayadharmataḥ || 94 ||
[Analyze grammar]

āśrayado naraścā'haṃ nārāyaṇaḥ patiḥ prabhuḥ |
evaṃ tattvaṃ viditveha sādhvī saubhāgyayoginī || 95 ||
[Analyze grammar]

mama kāntāṃ viditvā svāṃ pātivratyaṃ sadā''caret |
alokakāntā sā sādhvī kṛṣṇakāntā pativratā || 96 ||
[Analyze grammar]

loke yuvā bhavet kānto yuvatyā dehayogataḥ |
ahantu sarvadā kānto garbhe bālye ca yauvane || 97 ||
[Analyze grammar]

vārdhakye maraṇe cāpi prete lokāntare'pi ca |
saṃsāre svargalokādau mokṣe'pi kānta eva ha || 98 ||
[Analyze grammar]

sarvātmanāṃ bhavāmyeva sarvātmanā hi śāśvataḥ |
ātmanyahaṃ sadā cāsmi niyāmako'ntare sthitaḥ || 99 ||
[Analyze grammar]

tathā tatrāpi nityaṃ vai kānto'smi kāntatā mayi |
kāntātvaṃ mama yogena cātmasveva hi vidyate || 100 ||
[Analyze grammar]

evaṃ śāśvatikaḥ kāntaḥ sarvāsāṃ saṃbhavāmyaham |
matkāntyā kāntimanto vai muktāḥ sarve tatheśvarāḥ || 101 ||
[Analyze grammar]

devāśca mānavādyāśca tiryañcastaravo'pi ca |
jaḍāśca cetanāścāpi māyā ca māyikā api || 102 ||
[Analyze grammar]

matkāntyā kāntimanto ye tāḥ kāntā me nisargataḥ |
evaṃ kāntātmakaṃ sarvaṃ vaidhavyaṃ nāsti vai kvacit || 103 ||
[Analyze grammar]

tasmāt sādhvyo bhajeyurmāṃ kāntaṃ saubhāgyayojitāḥ |
evaṃ lakṣmi rahasyaṃ vai sādhvīnāṃ tu mayeritam || 104 ||
[Analyze grammar]

sarvātmanāṃ ceritaṃ ca gūḍhaṃ tattvārthasaṃbhṛtam |
tasmānmado na kartavyaḥ pumānahamiti kvacit || 105 ||
[Analyze grammar]

ātmā'hamiti kṛtvaiva bhajanīyaḥ patiḥ prabhuḥ |
anādiśrīkṛṣṇanārāyaṇaścā'haṃ patiḥ paraḥ || 106 ||
[Analyze grammar]

sādhvīrahasyametadvai jñātvā ye yāstathā prajāḥ |
maṃsyante cā''cariṣyanti te prāpsyanti parāṃ gatim || 107 ||
[Analyze grammar]

bhuktiṃ muktiṃ tathā''psyanti sukhaṃ cā''nandamityapi |
mama yogaṃ śāśvataṃ ca nirvāṇapadamuttamam || 108 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne satīsādhvīnāṃ pātivratyaparākāṣṭhādivijñānanirūpaṇanāmā saptasaptatitamo'dhyāyaḥ || 77 ||
[Analyze grammar]