Chapter 51

śṛṇu nārāyaṇīśri tvaṃ kuñjalastu tataḥ param |
dvitīyaṃ svasutaṃ cāpi papraccha vinayānvitam || 1 ||
[Analyze grammar]

samujjvala kimapūrvaṃ dṛṣṭavān śrutavān vada |
śrutvā samujjvalaḥ prāha himavantaṃ giriṃ pitaḥ || 2 ||
[Analyze grammar]

āhārārthaṃ pragacchāmi paśyāmi kautukaṃ navam |
mānasaṃ yatsaraścāste tatra dṛṣṭaṃ vadāmi tat || 3 ||
[Analyze grammar]

bahuhaṃsasamākīrṇo haṃsa ekaḥ samāgataḥ |
sa ca kṛṣṇo mahātejāḥ kṛṣṇahaṃsānvitaḥ śubhaḥ || 4 ||
[Analyze grammar]

trayaścānye'pi śuklāśca cañcupādaistu kṛṣṇakāḥ |
āyayuste caturṇṇāṃ vai patnyo haṃsyaḥ samāyayuḥ || 5 ||
[Analyze grammar]

bhayaṃkaryaścordhvakeśyaḥ kṛṣṇavarṇā vibhīṣaṇāḥ |
kṛṣṇā haṃsā jale sasnurna sasnuśca trayo'pare || 6 ||
[Analyze grammar]

catasro haṃsikāścāpi naiva sasnuḥ sarovare |
kṛṣṇā haṃsā jalāttasmādvinirgatyā''yayurdrutam || 7 ||
[Analyze grammar]

trayo'nye haṃsakāścāpyāyayuruḍḍīya vindhyakam |
śiṣṭāścatasro haṃsyo'pi vindhyācalamupāyayuḥ || 8 ||
[Analyze grammar]

haṃsā haṃsyo mahābhītā babhramuḥ paritastataḥ |
niṣaṇṇā duḥkhadagdhāśca vṛkṣaśākhāsu saṃhitāḥ || 9 ||
[Analyze grammar]

tatra kaścit samāyāto lubdhakastu dhanurdharaḥ |
śilāpṛṣṭhe niṣasāda bhillī tataḥ samāgatā || 10 ||
[Analyze grammar]

dvāvetau cyavanau dṛṣṭvā maharṣiṃ taṃ praṇematuḥ |
cyavanasya pādajalaṃ pītvā divyau babhūvatuḥ || 11 ||
[Analyze grammar]

vimānavaramāruhya yayatuḥ svargameva tau |
devau divyatamau bhūtvā hṛṣṭau sākṣānmayi hi tau || 12 ||
[Analyze grammar]

atha haṃsāstadoḍḍīya cyavanasyaiva pādayoḥ |
rajassu te samaluṭhan tathā pādajalaṃ papuḥ || 13 ||
[Analyze grammar]

cyavanenā'bhiṣiktāste śvetā babhūvureva ca |
kṛṣṇatvaṃ līnatāṃ prāptaṃ yayuścā'dṛśyatāṃ tataḥ || 14 ||
[Analyze grammar]

ke tvāsan vai pitarhaṃsāḥ kṛṣṇavarṇā hi te purā |
paścāt śvetāḥ kathaṃ jātāḥ kva gatāste tataḥ param || 15 ||
[Analyze grammar]

kuñjalastat samākarṇya prāha putraṃ samujjvalam |
śṛṇu putra kathayāmi divyaṃ kathānakaṃ tu tat || 16 ||
[Analyze grammar]

tānyāsan sarvatīrthāni cā'ṣṭaṣaṣṭimatāni vai |
eteṣu mānavāḥ snātvā pāpāni kṣālayanti ca || 17 ||
[Analyze grammar]

govadhākhyaṃ mahāpāpaṃ strīvadhākhyaṃ tathāvidham |
svāmidrohātmakaṃ pāpaṃ surāpānātmakaṃ tathā || 18 ||
[Analyze grammar]

hemasteyodgataṃ pāpaṃ gurunindātmakaṃ tathā |
bhrūṇahatyā mahāghorā rājadrohastathāvidhaḥ || 19 ||
[Analyze grammar]

mitradrohaśca viśvāsaghātaśca devabhedanam |
vṛtticchedo gocarasya nāśanaṃ vahnidāhanam || 20 ||
[Analyze grammar]

sādhusādhvīvināśaśca garadānaṃ bhayaṃkaram |
mātāpitṛvadhaścāpi bālikābhoga ityapi || 21 ||
[Analyze grammar]

paśuhatyā mātṛsaṃgo viṃśatipātakāni vai |
tathā'nyāni pātakāni mānavāḥ kṣālayanti hi || 22 ||
[Analyze grammar]

taiḥ pāpaiḥ kṛṣṇatāṃ yānti prāptāni tīrthakāni vai |
tāni pāpāni sarvāṇi kṣālayituṃ nijāni hi || 23 ||
[Analyze grammar]

bhūtvā haṃsasvarūpāṇi gatāni mānasaṃ saraḥ |
snātvā naiva vinaṣṭāni pāpāni tena vai punaḥ || 24 ||
[Analyze grammar]

narmadāyāstīramāptā haṃsāścāsan suduḥkhitāḥ |
pāpaprakṣālanaṃ tīrthaṃ cintayanto drume sthitāḥ || 25 ||
[Analyze grammar]

tairdṛṣṭau divyarūpau ca vyādhīvyādhau divaṃgatau |
parasparaṃ vadamānau cyavanasya gurorbalam || 26 ||
[Analyze grammar]

brahmahatyā gurughātaścā'gamyāgamanādikam |
gohatyā ca surāpānaṃ naṣṭaṃ gurorbalāddhi nau || 27 ||
[Analyze grammar]

divyau jātau svargayānau dhanyaṃ pādaṃ gurorbhuvi |
itiśrutvā ca te haṃsāścyavanasyā'ntikaṃ yayuḥ || 28 ||
[Analyze grammar]

luluṭhuḥ pādarajasi pādavāri papuśca te |
cyavano'pi tadā revatoyaiścā''prokṣayaddhi tān || 29 ||
[Analyze grammar]

sarve haṃsāḥ śvetavarṇā bhūtvā natvā muniṃ muhuḥ |
yayuścā'dṛśyatāṃ tatra haṃsā haṃsyo'pi sarvaśaḥ || 30 ||
[Analyze grammar]

gurutīrthaṃ pātakānāṃ śāmakaṃ paramottamam |
sarvatīrthāni mānāni gurutīrthe bhavanti vai || 31 ||
[Analyze grammar]

kṛṣṇahaṃsā'nvitaścaiko yaścāsīt kṛṣṇahaṃsakaḥ |
sarvatīrthasametaḥ sahyabhūt prayāgarājakaḥ || 32 ||
[Analyze grammar]

trayaścānye tu haṃsāste revā godā ca puṣkaram |
haṃsyaścāpi catasrastā gaṃgā ca brahmaputrikā || 33 ||
[Analyze grammar]

sarasvatī ca kāverī hyāsaṃstatra hi haṃsikāḥ |
ityetat kathitaṃ sarvaṃ gurutīrthaniṣevaṇam || 34 ||
[Analyze grammar]

sarvapāpaharaṃ mokṣapradaṃ vai gurutīrthakam |
atha vai kuñjalaḥ putraṃ papraccha ca tṛtīyakam || 35 ||
[Analyze grammar]

kiṃ vijvala tvayā dṛṣṭamāścaryaṃ kathayā'tra me |
vijvalaḥ pitaraṃ prāha nūtnaṃ vilokitaṃ tu yat || 36 ||
[Analyze grammar]

pitaścā'haṃ navalakṣā'bhidhaṃ vai parvataṃ yayau |
devavṛndaiścāpsarobhiḥ ṛṣibhiḥ sevitaṃ śubham || 37 ||
[Analyze grammar]

divyavṛkṣaiḥ samākīrṇaṃ phalapuṣpanataiḥ sadā |
yogino navalakṣāṇi vartante yatra parvate || 38 ||
[Analyze grammar]

ānandakānanaṃ nāma vanaṃ tatra prabhāsate |
vimalaṃ ca sarastatra viśālaṃ cāvalokitam || 39 ||
[Analyze grammar]

yādobhirvividhairyuktaṃ haṃsakāraṇḍavādibhiḥ |
kinnaroragagandharvaiścāraṇādyaiḥ suśobhitam || 40 ||
[Analyze grammar]

vimānaṃ tatra vārīṇāmupari cāmbare śubham |
suvarṇakalaśairyuktaṃ dṛṣṭaṃ sahasā kānakam || 41 ||
[Analyze grammar]

chatradaṇḍapatākābhī rājamānaḥ pumān śubhaḥ |
kinnarairapsarobhiśca gandharvādyairmaharṣibhiḥ || 42 ||
[Analyze grammar]

stūyamāno mahāsiddhairdṛṣṭaḥ surūpa uttamaḥ |
sarvābharaṇaśobhāṃgo ratnahārādirājitaḥ || 43 ||
[Analyze grammar]

tatpārśve tvekakāntā ca varānanā suśobhitā |
muktāhārayutā cā'pi valayaiḥ kaṃkaṇairyutā || 44 ||
[Analyze grammar]

divyāmbarā suśṛṃgārā yuvatī cārcitā sthitā |
tau dvau hṛṣṭau vimānāccā'varohayatāṃ bhūtale || 45 ||
[Analyze grammar]

snātavantau ca yāvattau mṛtau tāvaddhi tau taṭe |
śavo divyau taṭe staśca tau dvau pṛthak taṭe sthitau || 46 ||
[Analyze grammar]

nāryau dve ca narau dvau ca tāveva vīkṣitau mayā |
tatra vaimānikau dvau yau tau śastreṇa nijau śavau || 47 ||
[Analyze grammar]

bhakṣayāmāsatustatra nārī nārīṃ naro naram |
kṣudhayā pīḍyamānau bhakṣayataḥ piśitaṃ nijam || 48 ||
[Analyze grammar]

anye dve ca striyau tāta cāyāte tvambarāt pṛthak |
hasataḥ khādamānau tāvasmadyoge'pi nārpitam || 49 ||
[Analyze grammar]

annaṃ svalpaṃ jalaṃ svalpaṃ kasmaicittvapinā'rpitam |
evaṃ tau bhakṣayitvaiva pītvā jalaṃ divaṃ prati || 50 ||
[Analyze grammar]

gatau vimānamāruhya dṛṣṭaṃ sarvaṃ mayā navam |
kimetad vada me tāta svamāṃsabhakṣaṇaṃ kutaḥ || 51 ||
[Analyze grammar]

śrutvā putrasya tadvākyaṃ kuñjalaḥ prāha putrakam |
śṛṇu vijvala loko'yaṃ karmabhūmirhi vartate || 52 ||
[Analyze grammar]

puṇyakarmā modate'tra paratra bhojanādibhiḥ |
dattaṃ dānaṃ samāyāti purato yatra yāti saḥ || 53 ||
[Analyze grammar]

adattaṃ naiva cāyāti svarge'nyatra ca vā gataḥ |
yādṛśaṃ vapate bījaṃ kṣetre tu kṛṣikārakaḥ || 54 ||
[Analyze grammar]

labhate tādṛśaṃ tatra phalaṃ bījasajātikam |
yādṛśaṃ kriyate karma tādṛśaṃ labhyate phalam || 55 ||
[Analyze grammar]

karmadāyādako lokaḥ pūrvakarmavaśānugaḥ |
pūrvaṃ dattaṃ kṛtaṃ caitat phalarūpaṃ niṣevyate || 96 ||
[Analyze grammar]

pañca sṛṣṭāni garbhe'sya dehinaḥ karmajāni vai |
yaśovittaṃ jīvikā ca vidyā ca maraṇaṃ tathā || 57 ||
[Analyze grammar]

devatvaṃ vā mānuṣatvaṃ paśutvaṃ pakṣitā'thavā |
tiryaktvaṃ sthāvaratvaṃ ca smṛddhayo bhojanādikam || 58 ||
[Analyze grammar]

ātmanā vihitaṃ yādṛk tādṛk samupatiṣṭhati |
pūrvadehakṛtaṃ kaścit kartumalaṃ hi nā'nyathā || 59 ||
[Analyze grammar]

śubhā'śubhaṃ kṛtaṃ karma kartāramanugacchati |
upabhogādṛte tasya nāśa eva na vidyate || 60 ||
[Analyze grammar]

suśīghramapi dhāvantaṃ svakarma cānudhāvati |
upatiṣṭhati tiṣṭhantaṃ gacchantamanugacchati || 61 ||
[Analyze grammar]

chāyāvad vartate lagnaṃ bhogaṃ phalaṃ dadāti tat |
yena yatropabhoktavyaṃ daivena tatra nīyate || 62 ||
[Analyze grammar]

karmabhūmiriyaṃ tāta cānyā bhogāya dhūmayaḥ |
colarājaḥ subāhvākhyo dadau dānāni bhūriśaḥ || 63 ||
[Analyze grammar]

ratnāni ca suvarṇāni rājatādīni koṭiśaḥ |
annaṃ jalaṃ ca sulabhaṃ matvā dadau na tattadā || 64 ||
[Analyze grammar]

purodhāścolarājasya jaiministamupādiśat |
śraddhayā vidhivat pātre dehi cānnaṃ dhanādikam || 65 ||
[Analyze grammar]

annadānāt paraṃ nāsti prāṇināṃ tṛptidaṃ drutam |
tasmādannaṃ payoyuktaṃ pradehi kṣatriyarṣabha || 66 ||
[Analyze grammar]

tāraṇāya hitāyaiva sukhasampattihetave |
grāsāgramapi dātavya muṣṭiprasthaṃ ca vā nṛpa || 67 ||
[Analyze grammar]

śraddhayā vā parvadine vipraṃ santaṃ prabhojaya |
ekabhojanalabhyaṃ vai phalaṃ nityaṃ bhunakti hi || 68 ||
[Analyze grammar]

pūrvajanmani dattānnaṃ janmāntare sadā labhet |
nityaṃ prabhujyate dattaṃ dehyannaṃ cā'vicārayan || 69 ||
[Analyze grammar]

prāṇarūpaṃ yato'nnaṃ tat pradehi tvaṃ prayatnataḥ |
svarge loke sadā cānnaṃ dattamamṛtamīyate || 70 ||
[Analyze grammar]

śrutvā nṛpatiḥ papraccha svargaguṇān vadā'tra me |
jaiminiḥ svargalābhāṃścā'kathayad vai subāhave || 71 ||
[Analyze grammar]

sarvakāmapradānyudyānāni svarge bhavanti vai |
sarvartuphalapuṣpāṇi vimānāni ca santi vai || 72 ||
[Analyze grammar]

apsarasaśca divyāśca hemaśayyāsanāni ca |
sarvakāmasamṛddhyo vidyante kalpavallijāḥ || 73 ||
[Analyze grammar]

na rogā na jarā mṛtyurna śoko na himā''tapau |
na tatra kṣutpipāsā ca na glāniścāpi vidyate || 74 ||
[Analyze grammar]

evaṃvidhaguṇaṃ svargaṃ doṣāṃstatrāpi tān śṛṇu |
atra dattaṃ hi labhyeta nā'dattaṃ tatra labhyate || 75 ||
[Analyze grammar]

doṣo mahānayaṃ svarge'tiśayo doṣa ityapi |
adattasyā'tra bhogyasyā'santoṣastatra vai sadā || 76 ||
[Analyze grammar]

anyaśriyaṃ parāṃ dṛṣṭvā samudvegaḥ sadā'sti ca |
akasmāt patanaṃ cāpi vāsanāvaśavartitā || 77 ||
[Analyze grammar]

phalabhūmirmatā dyauśca karmabhūmiriyaṃ matā |
tasmādannaṃ pradattaṃ yat tatsvarge bhujyate suraiḥ || 78 ||
[Analyze grammar]

śrutvā nṛpaḥ ṛṣiṃ prāha nirdoṣaṃ vada me padam |
jaiminiścāha bhagavatpadaṃ nirdoṣameva ha || 79 ||
[Analyze grammar]

ābrahmabhavanā lokāḥ sadoṣāḥ karmaṇā'rjitāḥ |
māyālokāḥ samastā vai doṣavanto guṇātmakāḥ || 80 ||
[Analyze grammar]

aguṇaṃ tu padaṃ viṣṇornārāyaṇasya śārṅgiṇaḥ |
bhaktiyogagatāstatra sādhvyo gacchanti sādhavaḥ || 81 ||
[Analyze grammar]

rājā prāha na me svargaṃ gantumicchā pravartate |
yasmādvai patanaṃ tatra gantavyaṃ naiva sarvathā || 82 ||
[Analyze grammar]

dānaphalaṃ ca bhogo vai bhogānte patanaṃ yadi |
dānameva na kartavyaṃ pātaphalaṃ mayā kvacit || 83 ||
[Analyze grammar]

kariṣye dhyānabhaktyādi yajiṣye kamalāpatim |
dāhapralayavarjyaṃ ca gamiṣye paramaṃ padam || 84 ||
[Analyze grammar]

śrutvā taṃ jaiminiścāha rājan dharmo nṛpasya yaḥ |
anicchatā'pi kartavyo dānaṃ yajñaḥ pradānakam || 85 ||
[Analyze grammar]

ādāvannaṃ suyajñeṣu jalaṃ tāmbūlamambaram |
kāñcanaṃ bhūmidānaṃ ca godānaṃ cetaracca yat || 86 ||
[Analyze grammar]

vaikuṇṭhe'pi phalaṃ bhuṃkte dānadharmasya śāśvatam |
sādhubhyastu vibhāgaikaṃ gogrāsaṃ ca tataḥ param || 87 ||
[Analyze grammar]

bhṛtyādibhyaścaikabhāgaṃ prayacchanti tapodhanāḥ |
evamannasya dānena divyalokagatā api || 88 ||
[Analyze grammar]

kṣudhātṛṣāvihīnāśca nityatṛptā hareḥ sthale |
tiṣṭhanti nānyathā rājan dehyannaṃ dhanamityapi || 89 ||
[Analyze grammar]

dānājjñānaṃ tataḥ siddhistatastṛptiṃ gamiṣyasi |
adāne tvaṃ gataścāpi vaikuṇṭhe kṣudhamāpyasi || 90 ||
[Analyze grammar]

śrutvā rājā tadā prāha dānaṃ cet tṛptikāraṇam |
yogināṃ ca satāṃ tyāgavatāṃ mokṣe hi kā gatiḥ || 91 ||
[Analyze grammar]

adattadānāḥ ṛṣayaḥ karapātrā hi sādhavaḥ |
aparigrahasarvasvā mokṣe tṛptāḥ kathaṃ vada || 92 ||
[Analyze grammar]

śrutvā prāha ṛṣistaṃ vai jñānabhaktiparāyaṇāḥ |
mūrtyānandena tṛptāste sadā kṣuttṛḍvivarjitāḥ || 93 ||
[Analyze grammar]

rājā prāha tathaivā'haṃ yatiṣye jñānabhaktimān |
dānaṃ bandhapradaṃ naiva kartavyaṃ niścikāya saḥ || 94 ||
[Analyze grammar]

jñānaṃ kṛtvā tathā svalpāṃ bhaktiṃ kṛtvā mamāra saḥ |
subāhuḥ pramadāyukto vimānodagramāśritaḥ || 95 ||
[Analyze grammar]

yayau svargaṃ pūrvakṛtaṃ puṇyaṃ bhoktaṃ vidhānataḥ |
nā'bhuktaṃ kṣīyate puṇyaṃ kṛtaṃ svarṇādidānajam || 96 ||
[Analyze grammar]

kṣudhā jātā mahātīvrā tṛṣāpi ca tathāvidhā |
rājā vai priyayā sārdhaṃ kṣudhātṛṣāprapīḍitaḥ || 97 ||
[Analyze grammar]

svarge ruddhaḥ karmaṇā vai vaikuṇṭhaṃ naiva gacchati |
hṛṣīkeśo dṛśyate na vimānaṃ nordhvamṛcchati || 98 ||
[Analyze grammar]

svarge rājā vyākulo vai jātaḥ kṣudhādipīḍitaḥ |
itaścetaśca vegaiśca dhāvati kṣmādhipastadā || 99 ||
[Analyze grammar]

sarvābharaṇaśobhāṃgaścandanādivibhūṣitaḥ |
apsarobhiḥ sevyamāno devaiśca satkṛto'pi ca || 100 ||
[Analyze grammar]

adattaṃ nā''ptavān rājā'mṛtaṃ cānnaṃ prabhojanam |
jalaṃ ca nā''ptavān svarge babhrāma pīḍito muhuḥ || 101 ||
[Analyze grammar]

bhāryāṃ saṃprāha rājānaṃ satyaṃ dānaphalaṃ surāḥ |
bhuñjate'mṛtamevā'tra dattamannaṃ purā tu yat || 102 ||
[Analyze grammar]

annavāripradānaṃ tu na kṛtaṃ bhūtale nṛpa |
kṣudhā māṃ tvāṃ bādhate'tastṛṣā cogrā pravartate || 103 ||
[Analyze grammar]

bhojanaṃ salilaṃ cātra labhyate na vimānake |
amṛtaṃ bhojanaṃ nāsti cānyadevagṛhe iva || 104 ||
[Analyze grammar]

yāmaḥ pṛthvyāṃ bhojanārthaṃ jalārthaṃ nanu pārthiva |
ityukto bhūpatiḥ rājñyā vimānena drutaṃ kṣitim || 105 ||
[Analyze grammar]

ājagāma vane ramye nandane tatra vai ṛṣim |
dadarśa vāmadevaṃ sa sabhāryo nṛpatistataḥ || 106 ||
[Analyze grammar]

avatīrya namaścakre dattāsane hyupāviśat |
ṛṣikṛtaṃ svāgatādi jagrāhā'tha nirāmayam || 107 ||
[Analyze grammar]

pṛṣṭo rājā jagādarṣiṃ nirāmayo bhavāmi na |
kṣudhā me bādhate cāpi tṛṣā cātīva dāruṇā || 108 ||
[Analyze grammar]

tābhyāṃ śāntiṃ na gacchāmi sukhaṃ vindāmi naiva ca |
śrutvaiva vāmadevastaṃ prāha rājan hitaṃ śṛṇu || 109 ||
[Analyze grammar]

annadānaṃ jaladānaṃ tvayā dattaṃ na bhūtale |
hariścārādhito naiva naivedyaphalavāribhiḥ || 110 ||
[Analyze grammar]

tena doṣeṇa svarge na vaikuṇṭhe'pi na te kṛte |
bhojanaṃ vidyate rājan sarvamanyat pravidyate || 111 ||
[Analyze grammar]

ārādhitastvayā viṣṇurjñānabhaktyā tu śuṣkayā |
tena prāptaṃ tvayā svargaṃ śuṣkaṃ bhojanamantarā || 112 ||
[Analyze grammar]

annaṃ tvamṛtarūpeṇa svarge cāvāpyate nṛpa |
vaikuṇṭhe brahmatṛptyātma pīyūṣaṃ prāpyate sadā || 113 ||
[Analyze grammar]

kaṭutiktakaṣāyāśca kṣārāmblamadhurāstathā |
snigdhāścopaskarāḥ sarve nānārūpāśca bhūgatāḥ || 114 ||
[Analyze grammar]

dattāḥ sarvā hyavāpyante oṣadhyaḥ puṣṭihetavaḥ |
sādhavaḥ pitaro devā bhojitā yena bhūpate || 115 ||
[Analyze grammar]

sa eva bhuṃkte svarge'pi bhojanasya phalāmṛtam |
miṣṭānnapānamevā'tra dāne dattaṃ na vai tvayā || 116 ||
[Analyze grammar]

svaśarīraṃ tvayā puṣṭamannairamṛtasadṛśaiḥ |
adattaṃ ca yatastasmād bhuṃkṣva kṣudhātṛṣāphalam || 117 ||
[Analyze grammar]

yadi te kṣutpratīkāro hyabhīṣṭo vartate tadā |
yāhi nandanasarasi snātvā bhuṃkṣva śavaṃ nijam || 118 ||
[Analyze grammar]

evamuktaḥ subāhuśca vāmadevaṃ praṇamya tu |
nandanākhyavane gatvā sasnau taṭākavāriṇi || 119 ||
[Analyze grammar]

tāvacchavau samutpannau rājño rājñyā hi tau śavau |
nijau tau bhakṣitavantau tṛptau jātau tadā hi tau || 120 ||
[Analyze grammar]

hasataśca striyau dve ye prajñā śraddhā hi te mate |
dānamārgaṃ parityajya jñānamārge gataṃ nṛpam || 121 ||
[Analyze grammar]

lobhamārge sthitaṃ bhūpaṃ hasataste hyubhe striyau |
asmadyoge'pi dattaṃ na bhuṃkṣva rājan phalaṃ ciram || 122 ||
[Analyze grammar]

atha rājā vāmadevaṃ yayau bhuktvā punarvane |
uddhāro me yathā syādvai tathā vidhehi cārthayat || 123 ||
[Analyze grammar]

vāmadevaḥ kare datvā jalaṃ rājñyā nṛpasya ca |
śamyāḥ kṛṣṇārpaṇaṃ puṇyamakārayad divaḥpradam || 124 ||
[Analyze grammar]

rājā kṛṣṇārpaṇaṃ cakre puṇyaṃ gurostu pādayoḥ |
puṇyahīno'bhavacchīghraṃ pāpahīno babhūva ca || 125 ||
[Analyze grammar]

phalamūlānnasalilairviṣṇumapūjayattadā |
tṛpto viṣṇurgurorvākyāt pratyakṣaḥ samajāyata || 126 ||
[Analyze grammar]

pārṣadaiḥ sahito divye vimāne ca nṛpīṃ nṛpam |
nītvā pīyūṣasaṃvārdhau vaikuṇṭhamanayat prabhuḥ || 127 ||
[Analyze grammar]

nityatṛptistadā jātā naivedyasalilārpaṇaiḥ |
evaṃ śrutvā vijvalo'bhūt saṃhṛṣṭaḥ sadgurorbalam || 128 ||
[Analyze grammar]

gururmokṣapradātā ca viṣṇutulyo bhavatyapi |
pāpatāpaśamayitā nityatṛptiprado guruḥ || 129 ||
[Analyze grammar]

paṭhanācchravaṇāccāsya puruṣārthacatuṣṭayam |
sādhanaṃ cāpi kṛtvaiva brahmalokaṃ vrajejjanaḥ || 130 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vadhūgītāyāṃ gurutīrthe tīrthānāṃ pāpanāśakaṃ gurupadam adattānnajaladānakasya subāhunṛpateḥ svaśavabhakṣakasya vāma |
devākhyaguroryogānnityatṛptirmokṣāvāptiścetyādinirūpaṇanāmaikapañcāśattamo'dhyāyaḥ || 51 ||
[Analyze grammar]