Chapter 50

śrīnārāyaṇīśrīruvāca |
gurutīrthasya māhātmyaṃ bhūyo'pi vada me pate |
jijñāsā vardhate śrotuṃ sulabhaṃ gurutīrthakam || 1 ||
[Analyze grammar]

śrīpuruṣottama uvāca |
dhanyā'si kṛtakṛtyā'si gurutīrthā'vagāhinī |
yoṣitāṃ dayayā lakṣmi śreyaḥkarī yato hyasi || 2 ||
[Analyze grammar]

kathayāmi tathā bhūyo gurutīrthaṃ niśāmaya |
sarvapāpaharaṃ cāpi śiṣyāṇāṃ mokṣadāyakam || 3 ||
[Analyze grammar]

divyatāpādakaṃ puṇyaṃ dharmātmakaṃ sanātanam |
sarvaiśvaryānvitaṃ śīghraṃ pratyakṣaphaladāyakam || 4 ||
[Analyze grammar]

guroḥ prasādāt kamale ihaiva phalabhāg bhavet |
paralokasukhaṃ bhuṃkte mahānandamavānuyāt || 5 ||
[Analyze grammar]

guroḥ prasādāt kamale trailokyaṃ sacarācaram |
pratyakṣaṃ dṛśyate śiṣyairīśalokagatiṃ prati || 6 ||
[Analyze grammar]

avyāhatagatimān syād vijñānaṃ vindate tathā |
yaśaḥ kīrti vyavahāraṃ prādhānyaṃ kṛpayā labhet || 7 ||
[Analyze grammar]

sūryavat sarvathā guruḥ prakāśako'ndhacakṣuṣām |
somavacchāntidaścāpi prakāśado niśātmake || 8 ||
[Analyze grammar]

dīpavad gṛhahṛdaye prabhādo vai guruḥ sadā |
divā sūryaḥ śaśī rātrau dīpo gṛhe guruḥ sadā || 9 ||
[Analyze grammar]

prakāśate śiṣyahṛdi gururbrahmaprakāśakṛt |
ato guruḥ paraṃ tīrthaṃ tārakaṃ jñānadānakaiḥ || 10 ||
[Analyze grammar]

vijñāyaivaṃ guruṃ gurvī sarvabhāvaiḥ prasādayet |
karmabhirmanasā dehairvāṇyā ca sevayā tathā || 11 ||
[Analyze grammar]

atrārthe te kathayāmi kathāṃ divyāṃ manoharām |
brahmaputro bhṛgustasya vaṃśe'bhūccyavano muniḥ || 12 ||
[Analyze grammar]

kadā'haṃ jñānasampannaḥ syāmityacintayan muhuḥ |
tadarthaṃ tīrthayātrāyāmagamajjñānalabdhaye || 13 ||
[Analyze grammar]

gaṃgāyātrāṃ badarītaścākapilāśramaṃ vyadhāt |
godāvaryāḥ sarasvatyā narmadāyāstathā vyadhāt || 14 ||
[Analyze grammar]

kāyaśca nirmalo jātaḥ sūryatejaḥsamaprabhaḥ |
oṃkāreśvaramāsādya vaṭacchāyāsthito'bhavat || 15 ||
[Analyze grammar]

narmadāyā jalaṃ pītvā kṣaṇaṃ dhyānaparo'bhavat |
tatra śuśrāva pakṣiṇāṃ bhāṣāṃ vijñānasaṃbhṛtām || 16 ||
[Analyze grammar]

śukaputrā hi catvāraścāsaṃste pitṛnandanāḥ |
ujjvalaśca samujjvalo vijvalaśca kapiñjalaḥ || 17 ||
[Analyze grammar]

ete kuṃjalaśukajāḥ pitṛmātṛparāyaṇāḥ |
phalānyāhṛtya pitṛbhyāṃ dadatyapi ca bhuñjate || 18 ||
[Analyze grammar]

krīḍanti pitṛnikaṭe mātṛsannidhimutsukāḥ |
svapanti ca cyavanasya paśyato nityameva te || 19 ||
[Analyze grammar]

sāyamāgatya te sarve nityaṃ sevāṃ caranti ca |
āgatāste caritvaiva piturnīḍaṃ sukhāvaham || 20 ||
[Analyze grammar]

pitaraṃ mātaraṃ cobhau praṇemuśca phalāni ca |
daduścāpi ca pitṛbhyāṃ mānitāḥ śrāntimāsthitāḥ || 21 ||
[Analyze grammar]

sambhāṣitāḥ sevitāśca pakṣavātādibhiśca te |
sevante sma pitarau ca pitarau dadatustadā || 22 ||
[Analyze grammar]

śubhāśīrvacanānyeva tataḥ papraccha tān pitā |
ujjvala tvaṃ cādya kasyāṃ diśāyāṃ vai gato'bhavaḥ || 23 ||
[Analyze grammar]

tatra dṛṣṭaṃ śrutaṃ cā'pyapūrvaṃ cenme nivedaya |
śrutvojjvalaḥ praṇamyaiva pitaraṃ prāha tatkathām || 24 ||
[Analyze grammar]

gaṃgādvīpaṃ jagāmā'dya rājā yatra hi dhārmikaḥ |
divodāso vartate vai satyadharmaparāyaṇaḥ || 25 ||
[Analyze grammar]

brāhmīdevī tasya patnī pātivratyaparāyaṇā |
suṣuve guṇarūpāḍhyāṃ suśīlāṃ cārumaṃgalām || 26 ||
[Analyze grammar]

divyādevītivikhyātāṃ kanyāṃ lāvaṇyaśevadhim |
prathame vayasi divyāṃ varayogyāṃ vilokya ca || 27 ||
[Analyze grammar]

pitā kāmarūpadeśarājaṃ citraprasenakam |
āhūya kanyāṃ pradadau citrasenāya dhīmate || 28 ||
[Analyze grammar]

vivāhayajñe rājā sa citraseno mamāra ha |
akṛtāgnipradakṣiṇā kanyā saubhāgyavarjitā || 29 ||
[Analyze grammar]

abhavad vai tadā rājā viprān papraccha kāraṇam |
asyā vivāhasamaye citraseno divaṃ gataḥ || 30 ||
[Analyze grammar]

asyā vai kīdṛśaṃ karma bhavatyeva bruvantu me |
śrutvā viprāḥ samāhurvai lagnakālastathāvidhaḥ || 21 ||
[Analyze grammar]

patimṛtyuśca vā patyuḥ pravrajitā ca rugṇatā |
atha rājā ca kālena tvindraprasthapuraṃ yayau || 32 ||
[Analyze grammar]

indraprasthanṛparūpasenāyemāṃ samārpayat |
rūpaseno'pi vai mṛtyuṃ gato vivāhanakṣaṇe || 33 ||
[Analyze grammar]

evaṃ yadā yadā yasmai rājā dadāti kanyakām |
tadbhartā vahnisākṣye vai mṛtyuṃ gacchati satvaram || 34 ||
[Analyze grammar]

ekaviṃśatisaṃkhyākā varā mṛtyuṃgatāstathā |
kanyā tvāste cā'kṣatā vai divodāsaḥ śuśoca ha || 35 ||
[Analyze grammar]

tato mantrivaco matvā svayaṃvaraṃ vyadhāpayat |
rājāno bahavastatra samāhūtāḥ samantataḥ || 36 ||
[Analyze grammar]

svayaṃvarasabhāmadhye yadā prāptā kumārikā |
rādhāsamāṃ candramukhīṃ vyalokayan nṛpāstadā || 37 ||
[Analyze grammar]

adattavaramālāyā rūpaṃ vīkṣya tu tāmasāḥ |
rājāno mohamāpannā haraṇārthaṃ samudyatāḥ || 38 ||
[Analyze grammar]

anye tasyāstu rakṣārthaṃ tadaivaṃ samaro'bhavat |
tatra mahān kṣayo jātaḥ kṣatriyāṇāṃ svayaṃvare || 39 ||
[Analyze grammar]

divyādevī suduḥkhārtā vairāgyaṃ samupāgatā |
yayau vindhyācale taptuṃ tapastatra ruroda sā || 40 ||
[Analyze grammar]

mayā tasyā rodanaṃ vai śrutaṃ dṛṣṭaṃ tadantike |
pitastasyāḥ kathaṃ tādṛgbhāgyaṃ rājanyanāśakam || 41 ||
[Analyze grammar]

kumāratvaṃ vane vāsaścārdhaṃ vivāhanaṃ tathā |
iti me saṃśayaścāsyāṃ vartate tanniṣūdaya || 42 ||
[Analyze grammar]

śrutvā putravacastatra śukaḥ kuṃjalako jagau |
pūrvajanmakṛtaṃ sarvaṃ śṛṇu putra hi kānyakam || 43 ||
[Analyze grammar]

sā kanyā pūrvamāsīdvai suvīravaiśyabhāminī |
vārāṇasyāṃ ca nāmnā vai citrā svatantragāminī || 44 ||
[Analyze grammar]

anācāraparā pāpā svairiṇī vyabhicāriṇī |
bhartāraṃ manyate naiva puṇyahīnā tu pāpinī || 45 ||
[Analyze grammar]

kutsayate patiṃ kleśakarī saddharmavarjitā |
paragṛhe vasati bhramatyapi sā gṛhe gṛhe || 46 ||
[Analyze grammar]

paracchidraṃ paśyati drāk sādhunindāparā tathā |
parahāsyakarī duṣṭā sadācāravivarjitā || 47 ||
[Analyze grammar]

suvīreṇa tu vaiśyena gṛhānniṣkāsitā hi sā |
duṣṭānāṃ saṃgatiṃ prāptā dūtīkarma cakāra sā || 48 ||
[Analyze grammar]

kulaṭā ca vyabhicārakarma kārayati parāḥ |
gṛhabhaṃgaṃ kārayati sādhūnāṃ dharmavartmanām || 49 ||
[Analyze grammar]

sādhvīṃ nārīṃ samāhūya dravyadānaiḥ pralobhayet |
manobhaṃgaṃ kārayati vyavāye yojayatyapi || 50 ||
[Analyze grammar]

sādhūnāṃ sā striyaṃ bhaṅtvā'pyanyasmai pradadātyapi |
evaṃ gṛhaśataṃ bhagnaṃ citrayā duṣṭayā purā || 51 ||
[Analyze grammar]

saṃgrāmaṃ sā mahāduṣṭā'kārayat patiputrakaiḥ |
evaṃ pāpaparā sā tu mṛtā yamapuraṃ gatā || 52 ||
[Analyze grammar]

bhuktvā ca yātanāḥ paścāt karmavipākamāgatā |
sā tvidānīṃ kṛtaṃ karma bhuṃkte roditi bhāminī || 53 ||
[Analyze grammar]

yasmād gṛhaśataṃ tasmādasyāḥ śataṃ varāḥ |
ekaviṃśatisahitā vivāhe ca svayaṃvare || 54 ||
[Analyze grammar]

pāpāyāḥ śubhasamaye tatsaṃkhyākā mṛtā varāḥ |
gṛhabhaṃgo na kartavyo yasya kasyāpi dehinaḥ || 55 ||
[Analyze grammar]

parabhaṃge nijabhaṃgo jāyate naiva saṃśayaḥ |
śrutvaivamujjvalaḥ prāha pitaścāsyā mahatkule || 56 ||
[Analyze grammar]

janma kathaṃ ca vai jātaṃ pāpāyā vada me'pi tat |
śrutvā putravacaścāpi kuñjalaḥ prāha putrakam || 57 ||
[Analyze grammar]

dūtī yatrā'bhavat sā vai tatraikadā tu bhūsuraḥ |
sādhudharmā siddhagatiḥ kucelo daṇḍavān yatiḥ || 58 ||
[Analyze grammar]

kaupīnamātravastraśca citrādvāramupasthitaḥ |
maunī jitendriyo jñānī vrahmabhaktiparāyaṇaḥ || 59 ||
[Analyze grammar]

tattvadarśī kṣudhātṛṣāvyāptaśca śramitaḥ sukhī |
dūrādhvānapariśrāntaścitrayā sa vilokitaḥ || 60 ||
[Analyze grammar]

nāmnā kṛṣṇāyanaṃ citrā dṛṣṭvā''juhāva taṃ gṛhe |
āsanaṃ ca dadau vāri bhojanaṃ madhuparkakam || 61 ||
[Analyze grammar]

dehasaṃvāhanaṃ cakre sādhuṃ matvā susevanam |
akarot sā prasannaḥ sā āśīrvādaṃ dadau śubham || 62 ||
[Analyze grammar]

rājaputrī bhavatvevaṃ kathayitvā yayau hi saḥ |
atha kālāntare citrā mṛtyuṃgatā tatastviha || 63 ||
[Analyze grammar]

sādhoḥ sevāphalenā'pi tadāśīrvādatastathā |
divodāsagṛhe putrī divyādevī vyajāyata || 64 ||
[Analyze grammar]

sā hi dattavattī cānnaṃ jalaṃ sevāṃ tathā''sanam |
tasmāt puṇyasya māhātmyād rājaputrī hi vartate || 65 ||
[Analyze grammar]

gṛhabhaṃgādipāpaiśca hyadhavātvaṃ punaḥ punaḥ |
sahate vai tataḥ sevā kartavyā satataṃ satām || 66 ||
[Analyze grammar]

guroḥ sevā prakartavyā sādhordharmavratasya ca |
sādhvyāḥ sevā prakartavyā sarvasampatkarī hi sā || 67 ||
[Analyze grammar]

rājaputrā mṛtā ye ye te purā bhāṇḍajātayaḥ |
nārīṇāṃ hārakāścāsan tena pāpena te mṛtāḥ || 68 ||
[Analyze grammar]

govipragurusādhūnāṃ sevāparāyaṇāḥ purā |
āsaṃścāpi ca vai tena rājaputratvamāgatāḥ || 69 ||
[Analyze grammar]

ataḥ sevyāḥ sādhavaśca guravaśca sadā hi tāḥ |
parabhaṃgo gṛhabhaṃgo na kartavyaḥ kadācana || 70 ||
[Analyze grammar]

śrutvojjvalaḥ punastatra papraccha pitaraṃ prati |
kathaṃ sā mucyate śokānmahāduḥkhād vadasva me || 71 ||
[Analyze grammar]

kathaṃ sā labhate mokṣaṃ taṃ copāyaṃ vadasva me |
pitā ca kuñjalaḥ prāha śrutvā putraṃ tamujjvalam || 72 ||
[Analyze grammar]

śṛṇu putra pravakṣyāmi tasyā duḥkhavināśakam |
sādhanaṃ mokṣaṇasyāpi yena śuddhā bhaviṣyati || 73 ||
[Analyze grammar]

harerdhyānājjapāccāpi vratācca gurusevanāt |
pāpanāśo mokṣaṇaṃ ca bhavedeva na saṃśayaḥ || 74 ||
[Analyze grammar]

divyo nārāyaṇaścāste'kṣare dhāmni parātparaḥ |
sarvajñaḥ sarvaśaktiśca sarvaiśvaryasamanvitaḥ || 75 ||
[Analyze grammar]

kiśoraḥ sarvaśobhāḍhyaḥ śrīkāntaḥ parameśvaraḥ |
māyikā''kāravarjyaḥ sa divyākārasamanvitaḥ || 76 ||
[Analyze grammar]

divyamukuṭamūrddhā ca divyacakrādiśobhanaḥ |
koṭicandrābhavadanaḥ padmapatranibhekṣaṇaḥ || 77 ||
[Analyze grammar]

sarvabhūṣaṇaśobhāḍhyaḥ kaustubhena virājitaḥ |
kamalākṛtasevaśca śrīvatsāṃkena rājitaḥ || 78 ||
[Analyze grammar]

manohārisvarūpaśca kāntaḥ kāntārhayauvanaḥ |
evaṃ dhyāyet satī nityaṃ sarvapāpaviśodhakam || 79 ||
[Analyze grammar]

hare nārāyaṇa kṛṣṇa śrīpate kamalāpate |
anādiśrīkṛṣṇanārāyaṇa śrīkṛṣṇamokṣakṛt || 80 ||
[Analyze grammar]

evaṃ kuryād bhajanaṃ vai japaṃ kuryāddhare iti |
vrataṃ kuryāt pūrṇimāyā lakṣmīnārāyaṇavratam || 81 ||
[Analyze grammar]

udyāpanena sahitaṃ kṛṣṇapūjānvitaṃ śubham |
gurostatra cyavanasya prakuryāt sevanaṃ hi sā || 82 ||
[Analyze grammar]

karmaṇā manasā vācā tadā duḥkhaṃ prahāsyati |
ityuktaṃ sarvamevaitat pakṣyapatyaṃ praṇamya ca || 83 ||
[Analyze grammar]

piturājñāṃ samādāya yatra sā tatra vai yayau |
pakṣibhāṣāṃ parityajya strīvāṇyā tāṃ jagāda ha || 84 ||
[Analyze grammar]

ujjvalaḥ sannidhau gatvā tāpasīṃ cedamabravīt |
kā tvaṃ bhavasi kasyā'si kasmādatra samāgatā || 85 ||
[Analyze grammar]

samācakṣva tvamanaghe tapasaścāpi kāraṇam |
divyādevī samuvāca pakṣyapatyaṃ vilokya sā || 86 ||
[Analyze grammar]

āścaryaṃ mahadāpannā pakṣin śṛṇu yathātatham |
ko bhavān me vadatvatra viśvāso yena jāyate || 87 ||
[Analyze grammar]

pakṣī prāha mahābhāge pakṣyahaṃ tava duḥkhahāḥ |
rudamānāṃ vilokyaitat pṛṣṭaṃ me vada kāraṇam || 88 ||
[Analyze grammar]

yathābalaṃ yatiṣye'haṃ tava duḥkhavināśane |
śrutvā divyādevikā sā jagāda pakṣiṇaṃ prati || 89 ||
[Analyze grammar]

karmaṇāṃ me phalaṃ bhuṃje divodāsasutā'smi ca |
śatādhikā hi patayo mṛtā udvāhanotsave || 90 ||
[Analyze grammar]

adhavā'haṃ hi tiṣṭhāmi tapo'rthamatra cāgatā |
pāpanāśo bhaved yena tamupāyaṃ karomi ca || 91 ||
[Analyze grammar]

ujjvalaśca samākarṇya pitroktaṃ prāha yoṣite |
sā'pi tathyaṃ hi tanmene prāyaścittamiyeṣa sā || 92 ||
[Analyze grammar]

papraccha pakṣiṇaṃ pūrvakṛtapāpasya niṣkṛtim |
ujjvalaḥ prāha viṣṇorvai dhyānaṃ kuru yathoditam || 93 ||
[Analyze grammar]

japaṃ kuru hare kṛṣṇanārāyaṇa pareśvara |
vrataṃ kuru śubhaṃ lakṣmīnārāyaṇavrataṃ param || 94 ||
[Analyze grammar]

pūrṇimāyāṃ nirāhāraṃ jāgaraṇasamanvitam |
udyāpanasametaṃ ca guroḥ saṃsevanaṃ kuru || 95 ||
[Analyze grammar]

guruścātra cyavano'sti narmadāyāḥ śubhe taṭe |
bhajasva taṃ mahātmānaṃ puṇyapuñjā bhaviṣyasi || 96 ||
[Analyze grammar]

ityuktā jagṛhe sarvaṃ pakṣitaḥ sā śubhodayā |
vrataṃ cakre japaṃ cakre dhyānaṃ cakre harestathā || 97 ||
[Analyze grammar]

cyavanasya vaṭe sevāṃ cakre gatvā gurorhi sā |
dehena manasā vācā sarvārpaṇena kanyakā || 98 ||
[Analyze grammar]

gurostu kṛpayā sādhvī varṣamadhye dadarśa ha |
divyaṃ nārāyaṇaṃ kṛṣṇanārāyaṇaṃ pareśvaram || 99 ||
[Analyze grammar]

ghanaśyāmaṃ sundaraṃ ca śaṃkhacakragadādharam |
sarvābharaṇaśobhāḍhyaṃ dṛṣṭvā nanāma pādayoḥ || 100 ||
[Analyze grammar]

daṇḍavad dharaṇiṃ prāpya cakāra gadgadā'bhavat |
uvāca ca hariścā'haṃ kṛpayā tava cāgataḥ || 101 ||
[Analyze grammar]

guroḥ prasādalābhena jātaṃ me darśanaṃ tava |
varaṃ vṛṇu mahābhāge dadāmi tava vāñchitam || 102 ||
[Analyze grammar]

śrutvā sā kanyakā vavre māmuddhara bhavārṇavāt |
tava pādau bhajiṣyāmi kāntabhaktiṃ pradehi me || 103 ||
[Analyze grammar]

mokṣe dāsīpadaṃ dehi yadi tuṣṭo'si nātha me |
hariḥ prāhā'stvevameva cāyāhi mama dhāma vai || 104 ||
[Analyze grammar]

tāvat sā'pyabhavad divyādevī lakṣmīsvarūpiṇī |
vimānavaramāsādya yayau vaikuṇṭhameva sā || 105 ||
[Analyze grammar]

ujjvalaḥ pitaraṃ prāha vṛttāntaṃ sarvameva ha |
pitā viveda sarvaṃ ca mahimānaṃ gurostadā || 106 ||
[Analyze grammar]

cyavanaḥ sarvakāmānāṃ pūrako vaiṣṇavo guruḥ |
sevitaḥ kanyayā tena yātā sā brahmadarśanam || 107 ||
[Analyze grammar]

tenaiva divyadehena yātā mokṣapadaṃ satī |
lakṣmīrjātā'parā dhāmni dhyānajapavratādibhiḥ || 108 ||
[Analyze grammar]

paṭhanācchravaṇāccā'sya pāpā'pi pāpaśodhitā |
bhūtvā yāyāddharerdhāma lakṣmi kāntā bhavenmama || 109 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vadhūgītāyāṃ gurutīrthe divyādevīmokṣaṇaṃ nāma pañcāśattamo'dhyāyaḥ || 50 ||
[Analyze grammar]