Chapter 52

śrīpuruṣottama uvāca |
śṛṇu nārāyaṇīśri tvaṃ kuñjalasturyaputrakam |
kapiñjalaṃ ca papraccha nūtanaṃ kiṃ vilokitam || 1 ||
[Analyze grammar]

śrutvā kapiñjalaḥ prāha kailāse dhavale girau |
śivasyā''ste divyamarthyaṃ mandiraṃ svargasannibham || 2 ||
[Analyze grammar]

sevitaṃ puṇyalokaiśca gaṇairgaṇībhiruttamam |
tatrā'haṃ gatavānadya gaṃgāpravāhasannidhau || 3 ||
[Analyze grammar]

gaṃgāhrado mahānasti tatra haṃsā vasantyapi |
vāritīre śilāyāṃ hiṃ kanyaikā saṃvilokitā || 4 ||
[Analyze grammar]

āsīnā muktakeśā ca rūpalāvaṇyaśobhitā |
divyā'laṃkāraśṛṃgārā'mbaraśobhānvitā śubhā || 5 ||
[Analyze grammar]

duḥkhākulā roditi sā'śrūṇi muñcati dhārayā |
muktāmauktikatulyāni patitāni hradodake || 6 ||
[Analyze grammar]

tebhyo bhavanti padmāni hṛdyāni surabhīṇi ca |
netrāśrujāni padmāni tarantyasaṃkhyakāni vai || 7 ||
[Analyze grammar]

tāni padmāni cādāya kaścitpuṇyamayo muniḥ |
digvāsā jaṭilo daṇḍī tāpaso bhasmavān kṛśaḥ || 8 ||
[Analyze grammar]

pūjayati haraṃ ratneśvaraṃ nṛtyati gāyati |
hasati susvaraṃ cāpi dṛṣṭametanmayā'dbhutam || 9 ||
[Analyze grammar]

pitaḥ kaḥ sa bhavettatra kā sā nārī ca vā bhavet |
nārī praroditi kasmād vada me sarvameva tat || 10 ||
[Analyze grammar]

śrutvā sa kuñjalaḥ putraṃ kapiñjalamuvāca ha |
putra śṛṇu mahādevī tvekadā prāha śaṃkaram || 11 ||
[Analyze grammar]

darśayasva mamaivā'dya kānanaṃ kānanottamam |
mahādevastathā'stvāha tataḥ sajjo babhūva ha || 12 ||
[Analyze grammar]

vṛṣabhaṃ cārurohā'pi gaṇairdevyā yuto haraḥ |
nandanākhyaṃ praviveśa vanaṃ divyaṃ manoharam || 13 ||
[Analyze grammar]

darśayāmāsa devyai tadvanaṃ smṛddhaṃ samantataḥ |
kalpavṛkṣān kalpavallīrdarśayāmāsa śaṃkaraḥ || 14 ||
[Analyze grammar]

pārvatī cākarottatra saṃkalpaṃ kanyakākṛte |
kalpavṛkṣāt tatastūrṇaṃ kanyaikā samajāyata || 15 ||
[Analyze grammar]

svasvarūpā svasamānā yuvatī kamalekṣaṇā |
padmānanā svarṇadehā saprabhā lambamūrdhajā || 16 ||
[Analyze grammar]

sugandhadehā divyā ca bhūṣāmbaravibhūṣitā |
divyaśṛṅgāraśobhāḍhyā vanadevī yathā śubhā || 17 ||
[Analyze grammar]

kanyā nanāma bhaktyā ca pādayoḥ śivayostadā |
pārvatī tāṃ tu putrīṃ svāṃ svīcakāra hi mānasīm || 18 ||
[Analyze grammar]

aśokasundarīnāmnīṃ prāha tāṃ pārvatī tataḥ |
somavaṃśe nahuṣākhyo nṛpaste vai patiḥ sute || 19 ||
[Analyze grammar]

bhaviṣyatīti tasyai sā varaṃ dattvā hi pārvatī |
vane visṛjya kailāsaṃ śaṃbhunā saha cāyayau || 20 ||
[Analyze grammar]

aśokasundarī reme nandane vanadevatā |
tāmekadā vipracitidaityātmajastu huṇḍakaḥ || 21 ||
[Analyze grammar]

dṛṣṭvā kāmena cāviṣṭaḥ patnīṃ kartuṃ samādiśat |
aśokasundarī prāha śivayorasmi kanyakā || 22 ||
[Analyze grammar]

nahuṣo me patirbhāvī pārvatī māṃ jagāda ha |
mā vṛthā tvaṃ prayatasva viparītaṃ bhaviṣyati || 23 ||
[Analyze grammar]

mahāśāpena yokṣyāmi gacchā'nyatra mahāsura |
śrutvā huṇḍastirobhūtvā cintayāmāsa vai punaḥ || 24 ||
[Analyze grammar]

kathaṃ bhāryā bhavet sā me kapaṭaṃ racayāmi tat |
vicāryetthaṃ devakanyārūpaṃ dadhāra huṇḍakaḥ || 25 ||
[Analyze grammar]

vane tatra tayā sārdhaṃ mitratāṃ kṛtavāṃstataḥ |
āśramaṃ me'tra gaṃgāyāstīre'stīti jagāda tām || 26 ||
[Analyze grammar]

aśokasundarī huṇḍāśramaṃ yayau sukhānvitā |
huṇḍikākanyayā sārdhaṃ nyavasattatra tāpasī || 27 ||
[Analyze grammar]

bhojane śayane cāpi vihāre sahage hi te |
vartete te sakhīrūpe snāne nidrāsthalādiṣu || 28 ||
[Analyze grammar]

rātrau te tvekaśayyāyāṃ supte tatra tu huṇḍikā |
huṇḍakaṃ nararūpaṃ ca vidhāyā'śokasundarīm || 29 ||
[Analyze grammar]

kāmabhāvena pasparśa tadā tvaśokasundarī |
aprāptanidrā taṃ jñātvā'suraṃ kapaṭakanyakām || 30 ||
[Analyze grammar]

uvāca mā spṛśā'tra tvaṃ bhasma tūrṇaṃ bhaviṣyasi |
trasto huṇḍastadā tūrṇaṃ papāta pādayoḥ punaḥ || 31 ||
[Analyze grammar]

aśokasundarī prāha mama bhartā nṛpo hi saḥ |
āgatyā'tra vane duṣṭa tava nāśaṃ vidhāsyati || 32 ||
[Analyze grammar]

ityuktvā prayayau tūrṇaṃ gaṃgātīre vanāntare |
tāpasī vartate tatrā'śokasundarī bhāminī || 33 ||
[Analyze grammar]

atha rājā ailaputra āyuḥ putrārthameva ha |
dattātreyāt prārthayacca suputraṃ sadgurorhareḥ || 34 ||
[Analyze grammar]

dattātreyo varadānaṃ dadau hi putravān bhava |
sarvaguṇaiḥ samupeto vaiṣṇavāṃśena saṃyutaḥ || 35 ||
[Analyze grammar]

putraste sārvabhaumaśca mahendrābho bhaviṣyati |
ityāśiṣaṃ samāsādya tvāyuḥ svarājyamāyayau || 36 ||
[Analyze grammar]

nāgābhidhe pure rājā cendumatyā striyā samam |
reme lebhe ca nahuṣaṃ putraṃ yathoktalakṣaṇam || 37 ||
[Analyze grammar]

huṇḍaśchidraṃ samāsādya putraṃ jahāra cāmbare |
nināya svagṛhe rātrau rākṣasyai cārpayat sutam || 38 ||
[Analyze grammar]

mārayitvā pācayitvā bhojanārthaṃ niveditam |
rākṣasī vikalānāmnī dayāvatī tu bālakam || 39 ||
[Analyze grammar]

rātrau viśiṣṭakuṭyāṃ sā nikṣipya cāgatā drutam |
hariṇaṃ pācayitvā ca bhojayāmāsa huṇḍakam || 40 ||
[Analyze grammar]

huṇḍastu nirbhayo jāto bālo mayā hi khāditaḥ |
atha vaśiṣṭhaḥ prātaśca dadarśa bālakaṃ śubham || 41 ||
[Analyze grammar]

vardhayāmāsa divyaṃ taṃ viṣṇulakṣaṇalakṣitam |
jñānaṃ śastrāṇi śāstrāṇi nītiṃ kalā vṛṣaṃ tathā || 42 ||
[Analyze grammar]

adhyāpayāmāsa bālaṃ rājyayogyaṃ cakāra ha |
indumatyai prātareva nāradaḥ prāha taddine || 43 ||
[Analyze grammar]

mā śokaṃ kuru putraste vaśiṣṭhasyā''śrame'sti vai |
huṇḍaṃ daityaṃ nāśayitvā vivāhyā'śokasundarīm || 44 ||
[Analyze grammar]

śivaputrīpatirbhūtvā gṛhaṃ te cā''gamiṣyati |
indropendrasamaḥ putro bhaviṣyati svatejasā || 45 ||
[Analyze grammar]

ityuktvā pūjanaṃ prāpya nārado'ntardadhe tadā |
atha putraṃ ca nahuṣaṃ vaśiṣṭhaḥ prāha putraka || 46 ||
[Analyze grammar]

phalānyānaya vanyāni dhanurdhārī prayāhi vai |
rājā tvājñāṃ samādāya yayau vanyārthameva ha || 47 ||
[Analyze grammar]

huṇḍastatrā''yayau dṛṣṭvā kumāraṃ devatopamam |
apahartuṃ nāśayituṃ manaścakre hi daityarāṭ || 48 ||
[Analyze grammar]

yuyudhe ca samāgatya nahuṣeṇa samaṃ balī |
nahuṣāya sahasrākṣo dadau śastrāṇi vai tadā || 49 ||
[Analyze grammar]

devā divyāni cāstrāṇi dadustadā hi vai kṣaṇāt |
indro rathaṃ dadau cāpi mātalisaṃyutaṃ śubham || 50 ||
[Analyze grammar]

viṣṇuścakrāt samutpādya cakraṃ dīptaṃ dadau tadā |
śaṃbhuḥ śūlaṃ dadau cāpi brahmāstraṃ pradadāvajaḥ || 51 ||
[Analyze grammar]

yuyudhe nahuṣaḥ so'yaṃ huṇḍena māyinā tadā |
devā devyaśca gandharvā jagurjayaṃ tu nāhuṣam || 52 ||
[Analyze grammar]

huṇḍo jñātvā nijaṃ śatruṃ yuyudhe cātivegataḥ |
tatra sarve dānavāśca yuyudhire cakampire || 53 ||
[Analyze grammar]

sehire dānavā naiva bāṇavarṣaṃ hi nāhuṣam |
mṛtāḥ kecid drutā kecinnaṣṭāḥ kecinmahāhave || 54 ||
[Analyze grammar]

rathasthena tu huṇḍena tāḍito nahuṣastadā |
tribhirdhvajaṃ praciccheda huṇḍasya sāyakairbalī || 55 ||
[Analyze grammar]

caturbhisturagāṃścāpi chatraṃ tvekena vai tathā |
daśabhiḥ sārathiṃ paścādekena ca bhujaṃ punaḥ || 56 ||
[Analyze grammar]

ciccheda nahuṣastatra śaktiṃ mumoca taddhṛdi |
huṇḍastu patito bhūmau mamāra prāṇatastadā || 57 ||
[Analyze grammar]

devāḥ praharṣaṃ jagmuśca puṣpavṛṣṭiṃ jayaṃ vyadhuḥ |
aśokasundarī śrutvā daityavadhaṃ praharṣitā || 58 ||
[Analyze grammar]

nahuṣaṃ prāpya covāca dharmapatnī bhavāmi te |
samudvahasva māṃ vīra devairhi nirmitā tava || 59 ||
[Analyze grammar]

nahuṣaḥ prāha bhadraṃ te gurorvākyottaraṃ priye |
bhadre tvāmudvahiṣyāmi rathe tiṣṭha mayā saha || 60 ||
[Analyze grammar]

iti tāṃ rathamārūḍhāṃ nītvā gurvāśramaṃ yayau |
nivedayāmāsa sarvaṃ gurave nṛpabālakaḥ || 61 ||
[Analyze grammar]

vaśiṣṭho harṣamāpannastithau lagne śubhe tayoḥ |
vivāhaṃ kārayāmāsa vahnibhūsurasannidhau || 62 ||
[Analyze grammar]

āśīrbhirabhinandyainaṃ preṣayāmāsa tatpuram |
nāgāhvayaṃ puraṃ gururnahuṣo'pi yayau tataḥ || 63 ||
[Analyze grammar]

pitaraṃ mātaraṃ natvā jagāda sarvaceṣṭitam |
āyuścendumatī labdhvā sabhāryaputramuttamam || 64 ||
[Analyze grammar]

mahotsavaṃ pracakrāte putrasyā''gamanaṃ prati |
nahuṣo'pi dhanurdhṛtvā mahendrasya rathena vai || 65 ||
[Analyze grammar]

jigāya pṛthivīṃ sarvāṃ saptadvipāṃ sapattanām |
pitaraṃ yājayāmāsa rājasūyādibhistataḥ || 66 ||
[Analyze grammar]

atha devāḥ samāgatya nāgāhvayaṃ purottamam |
abhyaṣiñcanmahātmānaṃ nahuṣaṃ vai narādhipam || 67 ||
[Analyze grammar]

ardhendrapadabhāg jāto nahuṣo vaiṣṇavāṃśavān |
śivaputrīpatiḥ śrīmān gurorbalāt pratāpavān || 68 ||
[Analyze grammar]

vaśiṣṭhasya pratāpena mahendro mānavo'bhavat |
śivāgurvīpratāpena kanyā cāśokasundarī || 69 ||
[Analyze grammar]

ardhendrāṇyabhavat tatra devī yā vanadevatā |
indumatīṃ nijaśvaśrūṃ siṣeve kiṃkarī yathā || 70 ||
[Analyze grammar]

atha gaṃgātaṭe yā tu roditi tāṃ śṛṇu striyam |
huṇḍe mṛte tu tatputro vihuṇḍastapa ācarat || 71 ||
[Analyze grammar]

devān hantuṃ kṛtamatistrailokyaṃ hantumudyataḥ |
piturvairaṃ hariṣyāmi haniṣyāmi narān surān || 72 ||
[Analyze grammar]

iti niścitya gaṃgāyāstaṭe sa nandane vane |
yayau yadā tadā viṣṇurnārīrūpo babhūva ha || 73 ||
[Analyze grammar]

mohayituṃ vihuṇḍaṃ taṃ nāśayituṃ tu yuktitaḥ |
tāṃ māyāṃ vaiṣṇavīṃ dṛṣṭvā mumoha tu vihuṇḍakaḥ || 74 ||
[Analyze grammar]

uvāca tāṃ varārohe saṃgamaṃ dehi me'naghe |
māyovāca yadi māṃ tvaṃ bhoktumicchasi cettadā || 75 ||
[Analyze grammar]

saptakoṭimitaiḥ puṣpaiḥ prasaṃpūjaya śaṃkaram |
kāmodāsaṃbhavairdivyaiḥ sugandhairdevadurlabhaiḥ || 76 ||
[Analyze grammar]

tatpuṣpāṇāṃ kṛtāṃ mālāṃ mama kaṇṭhe samarpaya |
tadā'haṃ supriyā bhāryā bhaviṣyāmi tavā'nagha || 77 ||
[Analyze grammar]

ityuktaścā'suraścāpi mārgayāmāsa taddrumam |
aprāpya tāṃ yayau nārīṃ papraccha taddrumaṃ punaḥ || 78 ||
[Analyze grammar]

nārī prāha drumo vai na tādṛśo vidyate kvacit |
kāmodā vidyate kanyā gaṃgāhrade pratiṣṭhati || 79 ||
[Analyze grammar]

kāmodākhyā tu sā sādhvī yadā hasati vai tadā |
utpadyante hi puṣpāṇi tasyā hāsācchubhāni vai || 80 ||
[Analyze grammar]

kāmodāni sugandhāni pītāni śobhanāni vai |
tenā'pyekena puṣpeṇa yaḥ pūjayati śaṃkaram || 81 ||
[Analyze grammar]

tasyepsitaṃ mahākāmaṃ sampūrayati śaṃkaraḥ |
tasyāstu rodanāccāpi lohitāni sumāni vai || 82 ||
[Analyze grammar]

prabhavanti na vai teṣāṃ sparśaṃ kuryāt kadācana |
rodanotthakusumānāṃ sparśe'niṣṭaṃ yato bhavet || 83 ||
[Analyze grammar]

gaṃgāhrade gaccha tatra prahāsaya ca tāṃ striyam |
yadvā taddhāsyajātāni puṣpāṇi tu bahūnyapi || 84 ||
[Analyze grammar]

gaṃgāpravāhe cāyānti patitāni gṛhāṇa ca |
ityukto dānavo gaṃgāpravāhe samalokayat || 85 ||
[Analyze grammar]

pravāhitāni kāmodārodanotthasumāni vai |
jagrāha tāni sāralyādapūjayacca śaṃkaram || 86 ||
[Analyze grammar]

aniṣṭaṃ tatprajātaṃ vai tena kruddho hi śaṃkaraḥ |
huṃkāramakarot tena dānavo vai mṛto'bhavat || 87 ||
[Analyze grammar]

devakāryaṃ kṛtaṃ tvevaṃ viṣṇunā prabhaviṣṇunā |
viṣṇurnārīsvarūpaḥ sa tirobhāvaṃ yayau tadā || 88 ||
[Analyze grammar]

devatāḥ suprasannāśca jātā huṇḍasya nāśanāt |
athā'bdhimathane jātā catasraḥ kanyakāḥ purā || 89 ||
[Analyze grammar]

alakṣmīrvāruṇī kāmodā ca lakṣmīścaturthikā |
uddālakāya cā'lakṣmīrdattā tadā'bdhinā tataḥ || 90 ||
[Analyze grammar]

varuṇāya ca vai devī vāruṇī tvabdhinā'rpitā |
kāmodā viṣṇave dattā tūlasī yā bhaviṣyati || 91 ||
[Analyze grammar]

lakṣmīśca viṣṇave dattā vaikuṇṭhasahavāsinī |
kāmodā sā tvabdhiputrī sudhotthā nāradāt khalu || 92 ||
[Analyze grammar]

śuśrāva viṣṇormānuṣye janma bhāvi punaḥ punaḥ |
kāmodā cā'sahamānā viṣṇorviyogameva sā || 93 ||
[Analyze grammar]

ruroda vai muhurgaṃgāmūle gatvā tadaikalā |
rodanāt khalu jātāni raktapuṣpāṇi tāni vai || 94 ||
[Analyze grammar]

tatpūjotthaphalaṃ daityamaraṇaṃ samajāyata |
kāmodāyā hāsyahetuṃ śṛṇu tatkathayāmi vai || 95 ||
[Analyze grammar]

yadā sā tulasīrūpā tadā viṣṇoḥ prapūjane |
nijapatrāṇi dattvaiva copayuktā bhaviṣyati || 96 ||
[Analyze grammar]

tayā saha jagannātho ramiṣyati sadaiva hi |
smṛtvaivaṃ hasati kanyā kāmodā vai kvacit kvacit || 97 ||
[Analyze grammar]

mañjarī hāsyajanyā ca boddhavyā tulasībhave |
tulasyāḥ patramekaṃ vā mañjarīṃ viṣṇave'rpayet || 98 ||
[Analyze grammar]

brahmaṇe śaṃkarāyā'pi tadeṣṭaphalabhāg bhavet |
itītthaṃ puṣpapūjotthaphalaṃ bodhyaṃ śubhāvaham || 99 ||
[Analyze grammar]

kapiñjala tathā nārī kāmodā rodanānvitā |
hāsyānvitā ca puṣpāṇāmutpādikā pradarśitā || 100 ||
[Analyze grammar]

vihuṇḍaḥ puṇyahartā'pi tubhyaṃ mayā pradarśitaḥ |
evaṃ viṣṇurūpagurostīrthayogena tūlasī || 101 ||
[Analyze grammar]

sadā pūjyā ca kāmodā tatpuṇyaṃ pūjyate'pi ca |
puṣpaiśca pūjyate devamaṇḍalaṃ sarvadā suta || 102 ||
[Analyze grammar]

gurutīrthaṃ mahatproktaṃ bhuktimuktipradaṃ sadā |
vihuṇḍo nāśamāpanno yayau kailāsameva saḥ || 103 ||
[Analyze grammar]

śaṃbhutīrthasya yogena huṇḍopi nṛpayogataḥ |
svargaṃ gato hi tasmādvai gurutīrthaṃ viśiṣyate || 104 ||
[Analyze grammar]

kuñjalaḥ kathayitvaivaṃ virarāma nijān sutān |
cyavanastu tadā lakṣmi śrutvā papraccha pakṣiṇam || 105 ||
[Analyze grammar]

ko bhavān vartate cātra divyajñānī vihaṃgama |
pakṣī prāha purā cā'haṃ kaśyapasya kulasya vai || 106 ||
[Analyze grammar]

vidyādharasya vai putro dharmaśarmā hi nāmataḥ |
mūrkho'hamabhavaṃ pūrṇaḥ kadācinmadgṛhaṃ prati || 107 ||
[Analyze grammar]

siddhāyano maharṣiśca sādhustatra samāgataḥ |
mayā prasevitaḥ so'pi jñānaṃ mahyaṃ dadau śubham || 108 ||
[Analyze grammar]

āśīrvādaṃ pradadau me siddhāyanaḥ sa vai ṛṣiḥ |
niḥsaṃgo niḥspṛho bhūtvā caikāntasthānasaṃśrayaḥ || 109 ||
[Analyze grammar]

sarvaprakāśako jñānī sarvadarśī bhaviṣyasi |
ekasthānasthitaścāpi vetsyasi tvaṃ trilokajam || 110 ||
[Analyze grammar]

evaṃ guroḥ prasādena vedmi sarvaṃ trilokajam |
bhavantaṃ cyavanaṃ vedmi sadguruṃ mokṣadaṃ param || 111 ||
[Analyze grammar]

kīrabhāve kāraṇaṃ ca mama vacmi niśāmaya |
saṃsargājjāyate pāpaṃ saṃsargāt puṇyamityapi || 112 ||
[Analyze grammar]

mayā krītaḥ śukaśiśustasya mugdho'bhavaṃ sadā |
māmevaṃ vadati so'pi tāta māmehi cā''syatām || 113 ||
[Analyze grammar]

snānaṃ gaccha mahābhāga devānarcaya cetyapi |
tasya vākyavinodena vismṛtaṃ dharmakarma me || 114 ||
[Analyze grammar]

atha vāṭīṃ gataścā'haṃ śākādyarthaṃ tadā gṛhe |
biḍālena hataḥ pakṣī mayā''gatya vilokitaḥ || 115 ||
[Analyze grammar]

atiduḥkhena tatpaścānmṛto'haṃ śukabhāvanaḥ |
maraṇe śukabhāvo'haṃ śukajanmagato'bhavam || 116 ||
[Analyze grammar]

jātismaro bhavāmyatra siddhāyanapratāpataḥ |
nāsti tīrthaṃ gurusamaṃ jñāne mokṣe hi sarvathā || 117 ||
[Analyze grammar]

sthalajādudakād bāhyaṃ malaṃ naśyati nā'ntaram |
gurutīrthāt pūrvajanmakṛtaṃ malaṃ vinaśyati || 118 ||
[Analyze grammar]

saṃsāre tāraṇāyaiva jaṃgamaṃ tīrthamuttamamam |
athā'haṃ tartumicchāmi guro cyavana tāraya || 119 ||
[Analyze grammar]

ityuktvā pakṣirāṭ putrasahito bhāryayā yutaḥ |
pādayorāgataścāpi cyavanasya mahātmanaḥ || 120 ||
[Analyze grammar]

cyavano bhagavannāmamantraṃ dadau śukāya vai |
jalaṃ ca pāyayāmāsa kṛṣṇanāmnā'bhimantritam || 121 ||
[Analyze grammar]

pakṣiṇaste guruṃ natvā smṛtvā nārāyaṇaṃ ca mām |
dehāṃstyaktvā pārṣadā me bhūtvā vaikuṇṭhamāyayuḥ || 122 ||
[Analyze grammar]

divyaṃ taṃ sadguruṃ tīrthaṃ labdhvā mokṣaṃ yayuryataḥ |
sarvatīrthottamaṃ tīrthaṃ gurutīrthaṃ bhavatyapi || 123 ||
[Analyze grammar]

naro nārī mokṣadātrī gurvī tīrthasvarūpiṇī |
vadhūrvā cā'dhavā cāpi bhaktā vai mokṣadāyinī || 124 ||
[Analyze grammar]

tāṃ samāśritya muktiṃ vai prāpaṇīyā hi śāśvatī |
sādhvī devī sevanīyā vadhūbhiḥ pāpanāśinī || 125 ||
[Analyze grammar]

brāhmī brahmapriyā cāpi haripriyā pativratā |
sādhuḥ satpuruṣaścāpi sadguruśca haripriyaḥ || 126 ||
[Analyze grammar]

bhuktimuktipradaścāpi sevanīyaḥ sadā janaiḥ |
paṭhanācchravaṇāllakṣmi cāsya mokṣo bhaved dhruvaḥ || 127 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vadhūgītāyāṃ gurutīrthe nahuṣakathānakaṃ kuñjalaśukakathānakaṃ kāmodākathānakaṃ cyavanakathānakaṃ cetyādinirūpaṇanāmā dvāpañcāśattamo'dhyāyaḥ || 52 ||
[Analyze grammar]