Chapter 36

śrīpuruṣottama uvāca |
śṛṇu nārāyaṇīśri tvaṃ prākaṭyaṃ me tataḥ param |
vedhaso'rcimārganāmni vatsare cātha kalpake || 1 ||
[Analyze grammar]

saptaṣaṣṭyadhike cāṣṭaśate'tha pañcame manau |
rudrakukṣeḥ samudbhūto vidyutsrāvo hi rākṣasaḥ || 2 ||
[Analyze grammar]

saḥ pracakre tapaścograṃ śaṃbhutoṣaṇahetave |
sūryacandrāgnitejobhyaścātitejo'bhilabdhaye || 3 ||
[Analyze grammar]

pañcaśateṣu varṣeṣu gateṣu śaṃkaraḥ svayam |
tutoṣa parayā prītyā varārthaṃ cānvarodhayat || 4 ||
[Analyze grammar]

so'pi vavre varaṃ sūryacandrāgnitejasāṃ param |
tejo me syād yatheṣṭaṃ vai devādyanāśyameva ca || 5 ||
[Analyze grammar]

tathā'stviti haraḥ prāha varaṃ labdhvā'timodavān |
tapastyaktvojjvalo bhūtvā svargaṃ cāyāti yāti ca || 6 ||
[Analyze grammar]

apsaraso mumuhuśca devyo'pi mohamāgatāḥ |
cañcalāstaṃ vīkṣya cānududruvurvāritāḥ suraiḥ || 7 ||
[Analyze grammar]

devānāṃ svargaloke vai kleśo'yaṃ nūtano'bhavat |
daityo'pi rākṣasarūpaṃ pragṛhya devatojjvalaḥ || 8 ||
[Analyze grammar]

devābharaṇabhūṣāḍhyaḥ svargāt svargaṃ prayāti ca |
mohayatyeva devīśca kalahaṃ janayatyapi || 9 ||
[Analyze grammar]

sūryādhikaḥ surūpaśca sutejāḥ suprabhādharaḥ |
bhūtvā sūryaṃ samabhyeti tiraskaroti bhāskaram || 10 ||
[Analyze grammar]

candraṃ vahniṃ samabhyeti tiraskaroti tejasā |
vaḍavāgniṃ samabhyeti grahānabhyeti vai tathā || 11 ||
[Analyze grammar]

pātālādau maṇidhrāṃścābhyeti tiraskaroti ca |
mahājale tale cāpi sāmudre maṇiyādasām || 12 ||
[Analyze grammar]

prakāśān vai tiraskṛtya garvaṃ svīyaṃ karoti saḥ |
sarvarūpadharo daityo jñātvā balaṃ nijaṃ mahat || 13 ||
[Analyze grammar]

iyeṣa rājā bhavituṃ yayau kuberapattanam |
yuyudhe'ti kubereṇa cātmasāt kṛtavān purīm || 14 ||
[Analyze grammar]

tato vahniṃ yayau yuddhe jigāya svavaśaṃ nyadhāt |
candraṃ jetuṃ yayau cāpi so'pi tadvaśago'bhavat || 15 ||
[Analyze grammar]

sūryaṃ jetumiyeṣāpi yuddhārthaṃ prayayau ravim |
yuyudhe caturo māsān vidyutsrāvo mahāsuraḥ || 16 ||
[Analyze grammar]

parājayaṃ na cāpnoti śramaṃ yāti na vai manāka |
vidyutaḥ prakaṭīkṛtya lokān dagdhān karoti ca || 17 ||
[Analyze grammar]

sūryādadhikatejobhirdahatyetajjagattrayam |
hāhākārastadā jātaḥ sūryaḥ khinnaḥ śuśoca ha || 18 ||
[Analyze grammar]

sasmāra paramaṃ brahma parameśaṃ sanātanam |
anādiśrīkṛṣṇanārāyaṇaṃ māṃ puruṣottamam || 19 ||
[Analyze grammar]

saśrīko'haṃ samāyātaḥ sūryarakṣākaraḥ prabhuḥ |
hiraṇmayaḥ pareśo vai sarvatejo'straśastravān || 20 ||
[Analyze grammar]

īśanīsaṃjñayā sarvaśaktimatyā tvayā saha |
lakṣmi sūryakṛtasvārhapūjā''gatādisatkriyaḥ || 21 ||
[Analyze grammar]

sudarśanena cakreṇā'śātayaṃ cāsuraṃ hi tam |
vidyutsrāvo vināśaṃ ca prāpaccābdhau papāta saḥ || 22 ||
[Analyze grammar]

jagatsu tasya visṛṣṭān vahnīnaśāmayaṃ tvaham |
tadā devarṣigandharvagrahamānavakoṭibhiḥ || 23 ||
[Analyze grammar]

saṃstuto'haṃ sarvabhūṣu paryaṭanaṃ cakāra vai |
sūrye hiraṇmayaścā'haṃ hiraṇyakeśavān hariḥ || 24 ||
[Analyze grammar]

candre rājatadeho'haṃ kūpyakeśaḥ svayaṃ hariḥ |
vahnau prabhojjvaladehaḥ prabhāśmaśrurbhavāmyaham || 25 ||
[Analyze grammar]

bhūtale tu tvayā sākaṃ mānavairabhiyācitaḥ |
anādiśrīmahāvidyunnārāyaṇo'bhavaṃ tadā || 26 ||
[Analyze grammar]

vaidyutīśrīyutaścāhaṃ loke'tra mānave'vasam |
manvantaraṃ tu kālaṃ vai mānavānāṃ hi muktaye || 27 ||
[Analyze grammar]

smara lakṣmi ca me te ca prākaṭyaṃ vai tathoditam |
anyāstathā'vatārā me jātā vai bahavo bhuvi || 28 ||
[Analyze grammar]

paṭhanācchravaṇāccāsya duḥkhahānirbhavediha |
bhuktiścātra bhavettvante muktirme śāśvate pade || 29 ||
[Analyze grammar]

atha te'nyacca me vacmi prākaṭyaṃ śṛṇu sundari |
vedhaso'bdhimathanākhye vatsare ca navādhike || 30 ||
[Analyze grammar]

catvāriṃśe'tha dvipañcāśadūrdhve kalpake śate |
tṛtīye ca manau lakṣmi loke'bhavaṃ tvayā saha || 31 ||
[Analyze grammar]

rasātalasya daityasya rasabhakṣasya vai sutaḥ |
madhubhakṣo'bhavad daityo balavān tapasā purā || 32 ||
[Analyze grammar]

sa tu tepe tapastīvraṃ sundarākhye girau tadā |
śaṃkaraṃ tapasā''rādhya varaṃ vavre hi śaṃkarāt || 33 ||
[Analyze grammar]

rasān bhoktuṃ madhūn bhoktuṃ śaktirme vipulā bhavet |
yathā yathā bhakṣayāmi tathā tathā ca pācanam || 34 ||
[Analyze grammar]

bhavedeva na cā'jīrṇaṃ bhavenme vai kadācana |
aruciścāpi me na syātpuṣṭirbalaṃ mahad bhavet || 35 ||
[Analyze grammar]

śrutvaivaṃ śaṃkaraḥ prāha cā'hatvauṣadhipādapān |
rasān madhūn bhuṃkṣva kā cānyathā maraṇaṃ tava || 36 ||
[Analyze grammar]

ityevaṃ varadānaṃ vai datvā'dṛśyo haro'bhavat |
madhubhakṣo'suraścāpi sundarādrau drumādiṣu || 37 ||
[Analyze grammar]

praviśya māyayā sarvān madhūn cūṣati cāntarān |
patrapuṣpādikasthān sa madhūn cūṣati sarvaśaḥ || 38 ||
[Analyze grammar]

phalāni naiva jāyante śuṣyanti ca dalānyapi |
navāṃ'kurāṇi sarvāṇi nārohanti tataḥ param || 39 ||
[Analyze grammar]

mūlarasaṃ stambarasaṃ sthāṇurasaṃ tataḥ param |
skandharasaṃ ca śākhānāṃ rasān bhuṃkte samastakān || 40 ||
[Analyze grammar]

upaśākhārasāṃścāpi patrarasān sa cūṣati |
puṣparasān phalarasān cūṣatyeva samastakān || 41 ||
[Analyze grammar]

vṛkṣebhyaścāpi valībhyaḥ stambebhyastṛṇamūlataḥ |
kandebhyaśca śalākābhyo rasān bhuṃkte samastakān || 42 ||
[Analyze grammar]

māyayā śatarūpaśca sahasrāyutarūpavān |
koṭyarbudā'bjarūpaśca bhūtvā bhūtvā'tikhādati || 43 ||
[Analyze grammar]

yathā yathā rasān bhuṃkte pacanti sarvaśaśca te |
puṣṭo bhavati balavāṃśca samartho bhojane'dhikaḥ || 44 ||
[Analyze grammar]

māyayā cāyatavapuḥ parvateṣu vaneṣu ca |
araṇyeṣu mahodyāneṣvapi saudhadrumeṣu ca || 45 ||
[Analyze grammar]

vāṭikāsu kṛṣisasyeṣvapi sarveṣu śākhiṣu |
aṃkureṣu tathā''meṣu pakvā'pakveṣu sarvathā || 46 ||
[Analyze grammar]

madhūn rasān sadā bhuṃkte karoti śuṣkaśākhinaḥ |
śuṣkāyante hyaraṇyāni kṣetrāṇi ca vanāni ca || 47 ||
[Analyze grammar]

prajābhiśca paśubhiśca pakṣibhirjantubhistathā |
prāṇibhirnaiva cāpyante rasāśca madhavo'pi ca || 48 ||
[Analyze grammar]

kṣudhābhiḥ pīḍitā sarve mriyante'kālamṛtyavaḥ |
avagrāhaṃ vinā jātaṃ durbhikṣaṃ prāṇanāśakam || 49 ||
[Analyze grammar]

mānavānāṃ ca lokeṣu pātālebhyaḥ samāyayau |
mahāsuraḥ pṛthivīsthānacūṣad drulatātarūn || 50 ||
[Analyze grammar]

pārthivān sārvabhaumāṃśca vallītṛṇādipādapān |
cakre sarvāṃśca sahasā nīrasān śuṣkavigrahān || 51 ||
[Analyze grammar]

mānavānāṃ bhojanāni devānāṃ bhojanāni ca |
praṇaṣṭāni samastāni rasamūlāni sarvathā || 52 ||
[Analyze grammar]

madhūni sarvajātīni pītāni tena rakṣasā |
vardhitaḥ sa tu balavān vāyuvad vyāpako'bhavat || 53 ||
[Analyze grammar]

udbhijjeṣu mahāśaktyā vyāpakaḥ so'bhavad varāt |
māyayā cāpi daityaḥ saḥ sarvānnakhādako'bhavat || 54 ||
[Analyze grammar]

nirarthakā yato meghā kṛṣirnirarthikā tathā |
pṛthvyāḥ rasapradānatvaṃ nirarthakaṃ kṛtaṃ tadā || 55 ||
[Analyze grammar]

bījānāṃ rasaśaktiśca sarvā nirarthikā kṛtā |
prajārthaṃ cāsureṇaiva jagat kṣudhāprapīḍitam || 56 ||
[Analyze grammar]

kṛtaṃ tena tato lokāścārādhayan hariṃ ca mām |
anādiśrīkṛṣṇanārāyaṇaṃ śrīpuruṣottamam || 57 ||
[Analyze grammar]

śrutvā tu prārthanāṃ teṣāṃ jñātvā'suropapīḍanam |
virasatvaṃ cauṣadhīnāmājagāma bhuvaṃ prati || 58 ||
[Analyze grammar]

śaṃkhacakragadāpadmaśārṅgādihetimān svayam |
divyarūpo hariḥ so'haṃ yuyudhe tena vai tadā || 59 ||
[Analyze grammar]

sudarśanena cakreṇa madhubhakṣo hato mayā |
tvaṃ mayā mādhavī lakṣmīḥ kṛtvā drumeṣu veśitā || 60 ||
[Analyze grammar]

sarvapādapajātīnāṃ madhurūpā rasātmikā |
tvamabhavastadā lakṣmi mādhavīśrīḥ samūrjitā || 61 ||
[Analyze grammar]

anādiśrīmadhunārāyaṇaścā'haṃ prajāsvapi |
gocaro nyavasaṃ manvantarakālaṃ tvayā saha || 62 ||
[Analyze grammar]

praveśāttavavṛkṣāśca rasānvitāstadā'bhavan |
sarvalokeṣu sarvatra madhuvāhā hi pādapāḥ || 63 ||
[Analyze grammar]

abhavan sindhavaścāpi madhukṣarāśca dhenavaḥ |
oṣadhayo madhugarbhā mādhavīvāsitāstadā || 64 ||
[Analyze grammar]

babhūvuḥ pallavitāśca phalitāśca madhupradāḥ |
mādhavo'haṃ tadā lakṣmi rasātmakastvayā saha || 65 ||
[Analyze grammar]

avasaṃ cāpi vṛkṣādau mādhavyā parameśvaraḥ |
lokā apūjayaṃstatra mādhavīmādhavau ca nau || 66 ||
[Analyze grammar]

smara tvaṃ mādhavīrūpaṃ māṃ ca madhurasātmakam |
anye'pi ca tadā devā maharṣayaśca māṃ priye || 67 ||
[Analyze grammar]

pupūjuḥ parayā prītyā prāṇadaṃ parameśvaram |
etatte kathitaṃ nārāyaṇi prākaṭyameva me || 68 ||
[Analyze grammar]

te'pi rakṣākaraṃ lokaprajānāṃ sarvadehinām |
athā'pyanyat pravakṣyāmi prākaṭyaṃ te ca me'pi ca || 69 ||
[Analyze grammar]

vedhaso vatsare pañcāśattame nāradābhidhe |
aṣṭāśītyūrdhvake catuśśate kalpe'ṣṭame manau || 70 ||
[Analyze grammar]

tiṣye ca saptatau bhūmau daityāśca dānavāstathā |
asurā nāstikā dharmahaṇo'bhavan samastataḥ || 71 ||
[Analyze grammar]

dharmāśca mānavā naṣṭāḥ krauryaṃ pravartitaṃ bahu |
māṃsādāścābhavan sarve mlecchavarṇā narāḥ striyaḥ || 72 ||
[Analyze grammar]

pāpātmānaḥ pāpakarāḥ pāpamātraparāyaṇāḥ |
sarvādāḥ sarvabhakṣāśca sarvabhoktāra utpathāḥ || 73 ||
[Analyze grammar]

paśūn pakṣigaṇān jantūn bhakṣayanti hi mānavāḥ |
mānavān mānavāścāpi bhakṣayantīti kā kathā || 74 ||
[Analyze grammar]

anyeṣāṃ prāṇināṃ lakṣmi hāhākāro'bhavad bhuvi |
āraṇyakā hi paśavo bhakṣitā mānavaiḥ khalu || 75 ||
[Analyze grammar]

pakṣiṇo bhakṣitāścāpi milanti na yathā tathā |
vanāraṇyānyabhavaṃśca paśupakṣikṣayāṇi vai || 76 ||
[Analyze grammar]

paśupakṣivihīnāni tataste mānavāḥ khalu |
grāmyān paśūn pakṣiṇaśca bhakṣayituṃ samārabhan || 77 ||
[Analyze grammar]

mahiṣyaścāvikā ūraṇyaśca sarvāḥ prabhakṣitāḥ |
aśvā uṣṭrā gardabhāśca vṛṣabhāścāpi bhakṣitāḥ || 78 ||
[Analyze grammar]

hastinaścāpi gavayā hariṇā vānarā api |
ṛkṣāḥ siṃhāḥ śvāpadāśca śvānaśca śūkarādayaḥ || 79 ||
[Analyze grammar]

sarve'pi bhakṣitāḥ krūraiḥ rākṣasairdaityadānavaiḥ |
mānavaistādṛśaiḥ sarvairgāvo vatsāśca bhakṣitāḥ || 80 ||
[Analyze grammar]

dhenavaśca prabhakṣyante māṃsādaiśca yadā kṣitau |
tadā rakṣārthamevā'haṃ cāyāmyaprerito'pi san || 81 ||
[Analyze grammar]

devā goṣu sthitāḥ sarve tāsāmārādhanāvaśaḥ |
devānāṃ duḥkhahantā'haṃ gavāṃ rakṣākaraḥ prabhuḥ || 82 ||
[Analyze grammar]

dharmarakṣākaraścāpi pṛthvyāṃ sākaṃ tvayā priye |
tūrṇaṃ cāgatavān sākṣāt sarvaśastradharo hariḥ || 83 ||
[Analyze grammar]

anādiśrīkṛṣṇanārāyaṇaḥ śrīpuruṣottamaḥ |
dhenurakṣānimittaṃ vai samālambya pareśvaraḥ || 84 ||
[Analyze grammar]

sarvarakṣākaro dharmarakṣakaḥ śrīpatiḥ prabhuḥ |
kalerdoṣavihantā'haṃ śīghraṃ vai gocaro'bhavam || 85 ||
[Analyze grammar]

ākṣarākhye rathe sthitvā hanyate yatra gauḥ kṣitau |
tatsthale vyomamārgeṇa tūrṇaṃ gatvā'hanaṃ hi tam || 86 ||
[Analyze grammar]

gohantāraṃ ghātakaṃ ca ghātakānaparānapi |
ahanaṃ tatra tatraiva tena ruṣṭāstadagragāḥ || 87 ||
[Analyze grammar]

saṃbhūya māṃ prahantuṃ te cāyayurvai sthale sthale |
mlecchaprāyā dānavāśca daityāścāsurakoṭayaḥ || 88 ||
[Analyze grammar]

ahanaṃ tān saṃgare'haṃ bhramitvā sakalāṃ kṣitim |
koṭyarbudā hatā hiṃsrāḥ sāttvikyo mocitāḥ prajāḥ || 89 ||
[Analyze grammar]

mama vāyuprasaṃgena śiṣṭāśca sattvino'bhavan |
gavāṃ rakṣā kṛtā viprarakṣā rakṣā satāṃ tathā || 90 ||
[Analyze grammar]

dharmarakṣā kṛtā cāpi devāḥ santoṣitā mayā |
satyadharmāḥ sthāpitāśca mlecchā nṛpā vihiṃsitāḥ || 91 ||
[Analyze grammar]

ahiṃsā sthāpitā cāpyupāsanā mama cāhitā |
devānāṃ pūjanārthaṃ ca sarvaṃ saṃsthāpitaṃ punaḥ || 92 ||
[Analyze grammar]

sevādharmo dayādharmaḥ sthāpitaśca mayā punaḥ |
anādiśrīnāthanārāyaṇaḥ pṛthvyāṃ sthiro'bhavam || 93 ||
[Analyze grammar]

anāthānāṃ tu dhenūnāṃ rakṣako nāthanāmadhṛk |
tvaṃ ca lakṣmi ghenumatīśrīrnāmnā cābhavastadā || 94 ||
[Analyze grammar]

yugārdhaṃ ca pṛthivyāṃ vai sthitvā'haṃ puruṣottamaḥ |
tvayā sākaṃ yayau dhāmā'kṣaraṃ smara tadā janum || 95 ||
[Analyze grammar]

mamaivaṃ tiṣyalokānāṃ śikṣārthaṃ vai punaḥ punaḥ |
aṃśā''veśakalābhūtyādyavatārā bhavantyapi || 96 ||
[Analyze grammar]

teṣāṃ vai gaṇanā nāsti kāryavaśād bhavanti yat |
kāryaṃ niṣpādya līyante mayyeva śivaśaṃbhuje || 97 ||
[Analyze grammar]

kalpe kalpe svayaṃ svecchāvaśo bhaktavaśo'thavā |
samāgacchāmi bhūmau vai kṛpayā hitakṛt prabhuḥ || 98 ||
[Analyze grammar]

anādiśrīkṛṣṇanārāyaṇo'haṃ puruṣottamaḥ |
avatārī parabrahma svayaṃ śrīparameśvaraḥ || 99 ||
[Analyze grammar]

paṭhanācchravaṇāccāsya bhuktirmuktirbhavedapi |
yatheṣṭaphalasatprāptirbhavedapīha sarvathā || 100 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne vedhaso'ṣṭacatvāriṃśe vatsare vidyutsrāvarākṣasasya sūryacandrādivijeturvināśārtham anādiśrīmahāvidyunnārāyaṇasya |
īśanīśrīsahitasya navacatvāriṃśe vatsare ca madhubhakṣādidaityanāśārtham anādiśrīmadhunārāyaṇasya mādhavīśrīsahitasya pañcāśattame vatsare ca gohantṝṇāṃ dharmahantṝṇāṃ tiṣye daityānāṃ nāśārtham anādiśrīnāthanārāyaṇasya dhenumatīśrīsahitasya ca prākaṭyamityādinirūpaṇanāmā ṣaṭtriṃśo'dhyāyaḥ || 36 ||
[Analyze grammar]