Chapter 6

śrīpuruṣottama uvāca |
śṛṇu nārāyaṇīśri tvaṃ tato'pi cā'ṣṭame punaḥ |
ajasya niyamākhye vatsare kalpe tu pañcame || 1 ||
[Analyze grammar]

saptame tu manau vartamāne tatra tadā'pyaham |
anādiśrīkṛṣṇanārāyaṇaḥ śrīpuruṣottamaḥ || 2 ||
[Analyze grammar]

mānāvānāṃ sukhārthaṃ vai tadā prakaṭito'bhavam |
pātāle tvekadā nāgāḥ kāmarūpadharāḥ priye || 3 ||
[Analyze grammar]

saṃkarṣaṇaṃ prīṇayituṃ mahārudraṃ pracakrire |
yajñe tatra mahārudre phaṇādhrāṇā kulāni vai || 4 ||
[Analyze grammar]

dvāpañcāśatsahasrāṇi saṃhatāni tadā'bhavan |
kṛṣṇā raktāstathā citrāḥ śvetāḥ śvitrāśca karburāḥ || 5 ||
[Analyze grammar]

nīlāḥ pītāśca haritāḥ svastikāścandrakāstathā |
paṭṭiśā dviphaṇāścāpi triphaṇāśca catuḥphaṇāḥ || 6 ||
[Analyze grammar]

śatānanāstathā nāgāḥ sahasraphaṇino'pare |
nāgarājāḥ karkaṭakāḥ śītalā ḍiṇḍimāstathā || 7 ||
[Analyze grammar]

bhūphiṇḍādyāḥ koḍiphāśca pāṇḍurāḥ paṇḍakāstathā |
śūlakā daṇḍakāścāpi dvimukhā divyacākṣuṣāḥ || 8 ||
[Analyze grammar]

oṃkārāstilavarṇāśca pāraḍaṅkāḥ kaṇāśanāḥ |
tiryagdhārāḥ sūtradhārā mudrapṛṣṭhā dvipṛṣṭhakāḥ || 9 ||
[Analyze grammar]

dvijihvā bahujihvāśca bahudaṃṣṭrā viṣālayāḥ |
kālakūṭāḥ samaṇayaḥ kārdamikāśca vārśayāḥ || 10 ||
[Analyze grammar]

ānalikāścānilakā mārucchrayāḥ sapakṣakāḥ |
ugrakāḥ śāntadāsāśca māhālasyā viḍambinaḥ || 11 ||
[Analyze grammar]

ityevaṃ bahujātīyāḥ kaṇādhrāḥ saṃhatāstadā |
saṃkarṣaṇaṃ yajñadevaṃ nijeṣṭaṃ cānalānanam || 12 ||
[Analyze grammar]

ījire toṣayāmāsurmiṣṭāhutibhirutsukāḥ |
sahasradivasaṃ naijaṃ yajñaṃ niyamato vyadhuḥ || 13 ||
[Analyze grammar]

gurusteṣāṃ svastiko'bhūt śeṣo'bhūnnṛpatistadā |
agragaṇyo yajamānaścānye puṇyāśca ṛtvijaḥ || 14 ||
[Analyze grammar]

pātālīyāni miṣṭāni sāmudrāṇi rasāni ca |
phalānyāraṇyajanmāni pārthivānyadanāni ca || 15 ||
[Analyze grammar]

kaṇāṃśca sasyajāṃścāpi kandāṃścauṣadhiśākhinaḥ |
samidhaśca vividhā vai gundrāṇi vividhāni ca || 16 ||
[Analyze grammar]

bhūvikārāṇi sarvāṇi bhojyāni havyakāni ca |
vratā''danāni yogyāni juhuvustatra cādhvare || 17 ||
[Analyze grammar]

saṃkarṣaṇo mahādevo nijamaṇḍalamaṇḍitaḥ |
pātālīyasurāḍhyaśca gāruḍaiḥ surakoṭibhiḥ || 18 ||
[Analyze grammar]

surāṇībhiśca sahitastṛptiṃ parāṃ makhe yayau |
pratyakṣo'bhūd rudrarūpadharastatrāntime dine || 19 ||
[Analyze grammar]

pūrṇāhutau pāyasādyairvṛtaistilaiśca piṣṭakaiḥ |
miṣṭarasaiḥ kriyamāṇāyāṃ kaṭvoṣadhibhistadā || 20 ||
[Analyze grammar]

prasanno'smītyāha sarpān tṛpto'smīti punaḥ punaḥ |
varaṃ vṛṇudhvaṃ sukhino bhavantvityāha tānpunaḥ || 21 ||
[Analyze grammar]

tadā rājā prajādyāste sarpā yayācire tataḥ |
vayaṃ vai mānave loke bhavāmo rājyabhāginaḥ || 22 ||
[Analyze grammar]

karma kṛtvā prayāsyāmo muktiṃ svargaṃ paraṃ layam |
dehyevaṃ varadānaṃ cet prasanno'si sukarṣaṇaḥ || 23 ||
[Analyze grammar]

varayogyāḥ sma ca viṣṇo sakarṣaṇa nijeṣṭada |
saṃkarṣaṇo vicāryaiva kṣaṇāntare jagāda tān || 24 ||
[Analyze grammar]

āraṇyavāsāḥ satataṃ mahāraṇyanivāsinaḥ |
bhavantu rājyabhoktāraḥ pṛthvyāṃ surasabhoginaḥ || 25 ||
[Analyze grammar]

mā mānavān bhūnivāsānudvejayantu vai kvacit |
ityevaṃ niyamaṃ kṛtvā varaṃ dadāmi vo dvijāḥ || 26 ||
[Analyze grammar]

evaṃ vai vartamāneṣu bhavatsu sukhamuttamam |
bhaviṣyati sukhaṃ yāntvabhyudayaṃ satataṃ dvijāḥ || 27 ||
[Analyze grammar]

ityuktvā ca haviṣyānnaṃ pūrṇāhutisvarūpakam |
labdhvā saṃkarṣaṇo devaḥ sasuro'dṛśyatāṃ yayau || 28 ||
[Analyze grammar]

atha nārāyaṇīśri vai tataste phaṇino'pi vai |
balino varadāne na satṛṣṇā mānave guṇe || 29 ||
[Analyze grammar]

mānaveṣu ca bhogeṣu gṛdhgino mohamāritāḥ |
āyayurvāyuvivarairbhūlokaṃ vai samantataḥ || 30 ||
[Analyze grammar]

kāmarūpadharāḥ sarve narā nāryo hi mānavāḥ |
sarpākṛtayo naivaiṣāṃ santi yadā''gatā bhuvi || 31 ||
[Analyze grammar]

pracchannāste mānaveṣu vartante ca vasanti ca |
hartuṃ rājyāni bhogāṃśca kāpaṭyabhṛtyakarmiṇaḥ || 32 ||
[Analyze grammar]

sarvatra bhūtale te vai rūpasaundaryaśālinaḥ |
nāgāścāpi ca nāginyo'bhavan bhṛtyakriyāparāḥ || 33 ||
[Analyze grammar]

rājasu śreṣṭhiṣu vipravargeṣvamātyaseviṣu |
sattāvatsu pradhāneṣu gṛhiṣvapyavasaṃśca te || 34 ||
[Analyze grammar]

bhṛtyā dāsāstathā dāsyo bhūtvā varṇānukāriṇaḥ |
vivāhitāśca kanyā vai mitho mānavayonibhiḥ || 35 ||
[Analyze grammar]

samūhurmānavakanyā nāgāśca nararūpiṇaḥ |
evaṃ sambandhamāpannā labdhvā'vasarameva te || 36 ||
[Analyze grammar]

daśanti sma narān rātrau nidrāvaśān kvacit kvacit |
mriyante saṃdaṃśitāśca nṛpā rājñyaśca sarvathā || 37 ||
[Analyze grammar]

śreṣṭhinaśca dhanāḍhyāśca sarve varṇeṣu sattamāḥ |
riktaṃ sthalaṃ ca sampattiṃ nijāṃ kṛtvā ca te tataḥ || 38 ||
[Analyze grammar]

bhuṃjate smoragāḥ kāmarūpadhrāḥ pṛthivīśvarāḥ |
saṃkarṣaṇasya vacanaṃ nānuṣṭhitaṃ hi tāmasaiḥ || 39 ||
[Analyze grammar]

svārthaparaiśchadmadharaiḥ pracchannabhogatatparaiḥ |
evaṃ tairmānavī sṛṣṭiḥ prāyaśo vai vināśitā || 40 ||
[Analyze grammar]

pracchannadaṃśadoṣaiśca nijasvārthaparāyaṇaiḥ |
nāgajātīyugaptā'pi nijasṛṣṭirvivardhitā || 41 ||
[Analyze grammar]

mānavānāṃ kriyāḥ sarvā devārādhanamityapi |
luptaṃ luptaṃ yajñakāryaṃ sandhyā luptā tathā''hutiḥ || 42 ||
[Analyze grammar]

śrāddhaṃ luptaṃ tathā dānaṃ damo luptaśca mānuṣaḥ |
ṛṣīṇāṃ gotrasaṃkalpāstathā luptāḥ samantataḥ || 43 ||
[Analyze grammar]

saṃskārā mānavā luptā udbhūtāścoragakriyāḥ |
vratāni cāpi luptāni luptamāvāhanādikam || 44 ||
[Analyze grammar]

arghaṃ luptaṃ raveścāpi vaiśvadevo layaṃ gataḥ |
pretakāryaṃ tathā luptaṃ devālayā nirarhaṇāḥ || 45 ||
[Analyze grammar]

kathāṃśāśca layaṃ prāptā viprā nṛpā mṛtāḥ khalu |
brahmacārinivāsāśca guruvāsā layaṃ gatāḥ || 46 ||
[Analyze grammar]

satyaḥ sādhvyo mṛtāścāpi māritā nāgakoṭibhiḥ |
sādhavo'pi mṛtāścāpyāvāsā grāmāḥ purāṇi ca || 47 ||
[Analyze grammar]

amānavāstu te jātā nāgakopaiḥ samantataḥ |
pravarāṇāṃ ca nāmāni layaṃ gatāni vāsiṣu || 48 ||
[Analyze grammar]

na jñāyante janaiścaitat kuta evaṃ vyajāyata |
atha devā yajñahīnāḥ pitarastṛptivarjitāḥ || 49 ||
[Analyze grammar]

śatavarṣe gate kāle'vicāryan samāhitāḥ |
kuta evaṃ kathaṃ jātaṃ nāstikyaṃ bhūtale'śubham || 50 ||
[Analyze grammar]

mānavānāṃ śataṃ varṣāṇāṃ gataṃ bhūtale'pi naḥ |
āmantraṇāvāhanādi naiva bhavati vai katham || 51 ||
[Analyze grammar]

dṛṣṭyā tu divyayā vīkṣya jñātavanto narā mṛtāḥ |
sarpā rājyāni kurvanti prajāḥ sarpātmikā api || 52 ||
[Analyze grammar]

kāmarūpadharāḥ sarpā nāginyo yoṣitaistathā |
iṣṭarūpapradhāriṇyo bhuñjate bhūmisampadaḥ || 53 ||
[Analyze grammar]

etajjātamaniṣṭaṃ vai dharmakarmavivarjitam |
tiryañcastāmasāḥ sarpāḥ pracchannachadmakāriṇaḥ || 54 ||
[Analyze grammar]

bhuñjate mānavān bhogān devarṣyunnatighātinaḥ |
mānavānāṃ bahudhā vai ghāto jātaḥ purādiṣu || 55 ||
[Analyze grammar]

vasatyādau na vidyante mānavāḥ phaṇino'ntarā |
araṇyādau pravidyante mānavā viralāḥ kvacit || 56 ||
[Analyze grammar]

te tvasmābhiścetanīyā nāgebhyo maraṇaṃ prati |
nāgānāṃ māraṇopāyān bodhanīyāśca pratyapi || 57 ||
[Analyze grammar]

ityabhimantrya kamale āyayuste bhuvastalam |
ilāvṛttaṃ madhyakhaṇḍaṃ cāraṇyānīsamanvitam || 58 ||
[Analyze grammar]

yatrā''sate dvijāḥ śuddhāstvaraṇye sarpavarjitāḥ |
gāruḍāścāpyatharvajñā homakarmaparāyaṇāḥ || 59 ||
[Analyze grammar]

ṛṣīn devān pravilokya dvijāḥ svāgatamācaran |
madhuparkaṃ pradāyaivā''gamane hetumityapi || 60 ||
[Analyze grammar]

jijñāsavaḥ samapṛcchan devāstadā'vadannabhi |
vijānantu dvijāḥ sarve mānavā nāgakoṭibhiḥ || 61 ||
[Analyze grammar]

mṛtāḥ sarve viṣayogairmriyante'pi dine dine |
nāgā mānavarūpāste saṃkarṣaṇavarād bhuvi || 62 ||
[Analyze grammar]

samāgatya hi vartante mārayitvā tu mānavān |
bhuñjānā mānavān bhogān modante chadmavartinaḥ || 63 ||
[Analyze grammar]

dharmakarmārādhanāvāhanārhaṇā'rpaṇādikam |
daivaṃ paitryaṃ tathā sauryaṃ viniṣṭaṃ karma jātakam || 64 ||
[Analyze grammar]

bhavanto'raṇyavāsāśca jīvantīti hareḥ kṛpā |
yatra nāgā na cāyatā diṣṭyā yūyaṃ hi jīvatha || 65 ||
[Analyze grammar]

nāgānāṃ māraṇopāyānātharvaṇagatān manūn |
japitvā nāgasṛṣṭīnāṃ bhūmau kurvantu saṃkṣayam || 66 ||
[Analyze grammar]

nāgayajñaṃ prakurvantu sārvabhaumā dvijāstviha |
ārādhayantu lokeśaṃ parameśaṃ kratau tathā || 67 ||
[Analyze grammar]

parabrahmā'kṣarātītaṃ śrīpatiṃ puruṣottamam |
nijarakṣāṃ prakurvantu drāvayantūragānitaḥ || 68 ||
[Analyze grammar]

ityuktvā pitaro devāḥ prayayurnijamandiram |
vipra ścerāvṛtakhaṇḍasthitā yajñaṃ pracakrire || 69 ||
[Analyze grammar]

tatra gāruḍasaṃjño vai niṣṇāto'tharvakarmasu |
hotā'bhavat tadā yajñe'nye viprā havanaṃ vyadhuḥ || 70 ||
[Analyze grammar]

atha sarpāḥ patantyeva na ca yajñe vikarṣitāḥ |
asamarthāstu te mantrā ūcurviprān samāhitāḥ || 71 ||
[Analyze grammar]

ārādhayantu deveśeśvareśvareśvareśvaram |
sa vai yuṣmaddhitaṃ viprāḥ kariṣyati pareśvara || 72 ||
[Analyze grammar]

ityuktāste drutaṃ lakṣmi brahmasatraṃ pracakrire |
gāruḍākhyadvijasyaiva guhe sahasrabhūsurāḥ || 73 ||
[Analyze grammar]

tatra tūrṇaṃ hariścāyādakṣarādhipatiḥ prabhuḥ |
yo'haṃ so'haṃ tvayā sākaṃ śrīpatiḥ puruṣottamaḥ || 74 ||
[Analyze grammar]

gāruḍasya gṛhamadhye paśyatāṃ dvijayoginām |
śaṃkhacakragadāpadmadharo mantraiḥ prasevitaḥ || 7 ||
[Analyze grammar]

mūrtimadbhistathā vedairyuktastatrā'bhavaṃ puraḥ |
vīkṣyotthāya dvijā mahyaṃ nemuḥ svāgatamācaran || 76 ||
[Analyze grammar]

āsanaṃ madhuparkaṃ ca daduḥ pādyaṃ samarhaṇam |
sarve nivedayāmāsuḥ kaṣṭaṃ mānavanāśanam || 77 ||
[Analyze grammar]

ahaṃ svastītyuvācaitān gataṃ bhayaṃ ca vo'dhunā |
kurvantu sarpasatraṃ vai niyuñjantu manūnimān || 78 ||
[Analyze grammar]

ityuktā gāruḍā viprā mama vākyena noditāḥ |
nāgasatraṃ vyadhustūrṇaṃ jagurmantrān phaṇāhanaḥ || 79 ||
[Analyze grammar]

ommāmarttyasadorvvimartyasadovvisa |
rpiṇo'thāpyasarpiṇoggarasañjuṣaḥ |
ommiṣammṛtaṅkalmaṣiṇo'mbhūjuṣiṇo'nvabhujino |
'vapatantviha havīṃṣi juhma om || 80 ||
[Analyze grammar]

omvviṣasiṇo danntaggāriṇo nnṛhaṇino |
'nṛjusariṇoddharmahaṇo vvappatantviha |
oṃ śatarasraviṇo'bdhirasraviṇo'pyanugkṣaranntviha |
rauddrakārcciṣṣu vvāpatanntviha || 81 ||
[Analyze grammar]

oṃ śammṛtijuṣo'timmṛtijuṣotiphphaṇijuṣo |
'tippuṣijuṣovvābhippatanntviha |
ombhūtiñjuṣo'tinnatiñjuṣo'śchadmañjuṣo |
'dhippatiñjuṣombhitaṣpatanntviha || 82 ||
[Analyze grammar]

itimantrāñjagustatra gāruḍā bhūsurāstadā |
juhuvuḥ krūrabījādyairnāgānāmantrya mantrakaiḥ || 83 ||
[Analyze grammar]

āsamudrāntabhūbhāgādāgatyāgatya cāmbarāt |
nāgāḥ patanti kuṇḍe vai tadā kṣveḍānalolbaṇe || 84 ||
[Analyze grammar]

sahasraśo mṛtā dagdhāḥ śeṣā baddhāśca rajjubhiḥ |
mantrabaddhā na vai śaktāścātmānaṃ moktumeva te || 85 ||
[Analyze grammar]

atha baddho'nantaśeṣastuṣṭāva māṃ pareśvaram |
rakṣa nātha kṛpāsindho mocayā'smān mahānalāt || 86 ||
[Analyze grammar]

sthāsyāmo na kṣitau kṛṣṇanārāyaṇa pareśvara |
śaraṇe patitām rakṣa jīvadānaṃ pradehi naḥ || 87 ||
[Analyze grammar]

anantaśeṣo bhakto'smi sadā te'haṃ janārdana |
ityukto'haṃ tadā prāhā'nantaṃ bhūsthān phaṇādharān || 88 ||
[Analyze grammar]

sarvajātīyanāgāṃstvaṃ nītvā yāhi hyadhastalam |
mā punaścātra vai loke mānave svapadaṃ kuru || 89 ||
[Analyze grammar]

ityuktaḥ svīcakāraiva sarvaṃ mayā pramocitaḥ |
sarpāḥ sarve mocitāśca mṛtyumukhāddhi gāruḍāt || 90 ||
[Analyze grammar]

ananto mama bhaktaśca pupūja māṃ pareśvaram |
tadā tvaṃ jānakījanye śeṣaputrī tadā'bhavaḥ || 91 ||
[Analyze grammar]

ānantī tvaṃ ca śeṣeṇā'rpitā mahyaṃ hi dakṣiṇā |
tadā''tharvaṇagāruḍadvijaputrāya śārṅgiṇe || 92 ||
[Analyze grammar]

rakṣiṇe nāgasarpāṇāṃ śrīśāya paramātmane |
atha yajño niyamito mayā parihṛtastadā || 93 ||
[Analyze grammar]

śeṣaḥ sarpakulānyeva sarvabhūtalagāni vai |
nītvā yayau bilānyeva pātālākhyāni vai tadā || 94 ||
[Analyze grammar]

mānavo'yaṃ tato loko garahīno mayā kṛtaḥ |
athelāvṛttakhaṇḍasthān mānavān sarvabhūmiṣu || 95 ||
[Analyze grammar]

avāsayaṃ cā'karavaṃ bahuvaṃśayutāṃstathā |
punarvai mānavaṃ varṣaṃ mānavaḥ saṃbhṛtaṃ tataḥ || 96 ||
[Analyze grammar]

daivapaitryaparāḥ sarve mama yogena bhūsurāḥ |
babhūvurbahuvijñāśca svastimantaśca devatāḥ || 97 ||
[Analyze grammar]

anādiśrīgarutmannārāyaṇo'haṃ tadā'bhavam |
ānantī tvaṃ mama patnī śeṣakanyā tadā'bhavaḥ || 98 ||
[Analyze grammar]

anādiśrīkṛṣṇanārāyaṇaḥ śrīpuruṣottamaḥ |
avatārī svayaṃ tatra prākaṭyaṃ kṛtavān mama || 99 ||
[Analyze grammar]

tato'vatārā bahavastadvarṣe brahmaṇo'bhavan |
vedmyahaṃ sarvamevaitat smarā''nanti purābhavam || 100 ||
[Analyze grammar]

bhūloke mānavānāṃ vai tadā rakṣā mayā kṛtā |
tvayā sākaṃ tataścākalpāntaṃ sthiro'bhavaṃstataḥ || 101 ||
[Analyze grammar]

paṭhanācchravaṇāccāsya kīrtanātsmaraṇādapi |
nāgabhīrjāyate naiva bhuktirmuktirbhavettathā || 102 ||
[Analyze grammar]

itiśrīlakṣmīnārāyaṇīyasaṃhitāyāṃ tṛtīye dvāparasantāne vedhaso'ṣṭamavatsare sarpāṇāṃ śāsanārtham bhūmāvanādigarutmannārāyaṇasya prākaṭyamitinirūpaṇanāmā ṣaṣṭho'dhyāyaḥ || 6 ||
[Analyze grammar]