Chapter 180

śrīkṛṣṇa uvāca |
tataḥ śrīmaddhariḥ svāmī rādhike svavimānakam |
valgurāyarṣiṇā sārdhaṃ tīrāṇena ca bhūbhṛtā || 1 ||
[Analyze grammar]

pradarśitena mārgeṇa samavātārayat kṣitau |
tataścānyavimānāni tvavaterustu pṛṣṭhataḥ || 2 ||
[Analyze grammar]

jayaśabdāstu tūryāṇāṃ ninādāśca tadā'bhavan |
harṣaśabdāśca nārīṇāṃ bālānāṃ kalaghoṣaṇāḥ || 3 ||
[Analyze grammar]

prajānāṃ svāgataśabdāścābhavam paritastadā |
puṣpavarṣā'kṣatavarṣā cāndanī vṛṣṭirityapi || 4 ||
[Analyze grammar]

abhūttadā vimānādvai yadā harirbarhiryayau |
anye cāpi mahīmānāścāvaterurvimānataḥ || 5 ||
[Analyze grammar]

tīrāṇākhyanṛpastatra neme caraṇayorhareḥ |
kuṭumbaṃ rājakīyaṃ ca neme caraṇayorhareḥ || 6 ||
[Analyze grammar]

prakṣālya caraṇau pānaṃ vyadhuḥ sarve kuṭumbinaḥ |
hemahārān ratnahārān mauktikamaṇisañjitān || 7 ||
[Analyze grammar]

hareḥ kaṇṭhe nyadhuḥ sarve parabrahmaparātmanaḥ |
svāgataṃ puṣpamālābhirjayaśabdaiḥ pracakrire || 8 ||
[Analyze grammar]

reṇḍiyārasaptavāhye rathe rājā hariṃ tadā |
śvete niṣādayāmāsa tathā'nyān vājivāhane || 9 ||
[Analyze grammar]

rājasainyaiḥ kṛtamānaḥ pradhānaiharipūjitaḥ |
chatracāmaraśobhāḍhyo reje śrīkṛṣṇavallabhaḥ || 10 ||
[Analyze grammar]

tīrāṇākhyanagaryāṃ vai bahumānapuraḥsaram |
śrīhariṃ sārthasahitaṃ bhrāmayāmāsa bhūpatiḥ || 11 ||
[Analyze grammar]

pūjayāmāsuratyarthaṃ prajāḥ sarvāḥ sthale sthale |
āmadhyāhnaṃ pradāyaiva darśanaṃ ca nṛpālayam || 12 ||
[Analyze grammar]

devasabhāsamaṃ cendrasaudhāmaṃ prāpa vai prabhuḥ |
viśrāntiṃ ca kṣaṇaṃ kṛtvā snānādikamathācarat || 13 ||
[Analyze grammar]

dugdhapānādikaṃ sarvānakārayadati nṛpaḥ |
kṛtapūjo hariścāpi bhojayitvā kuṭumbinaḥ || 14 ||
[Analyze grammar]

mahīmānān ṛṣīn sarvān brahmapriyāśca sevakān |
svayaṃ ca bubhuje svāmikṛṣṇanārāyaṇaḥ prabhuḥ || 15 ||
[Analyze grammar]

rājādyāśca prasādaṃ śrīharerāpustadāśubham |
ārāmaṃ kṛtavantaśca sarve madhyāhnakottaram || 16 ||
[Analyze grammar]

rājā kuṭumbasahitaḥ kṛṣṇapādāvamardayat |
dehasaṃvāhanaṃ cakre sevālābhamavāpa ha || 17 ||
[Analyze grammar]

atha sāyaṃ sabhāsthāne viśālā'bhūt sabhā tadā |
lakṣaśo mānavā yatra niṣeduḥ sannidhau hareḥ || 18 ||
[Analyze grammar]

nāryo narāśca parito niṣedustasthurityapi |
atha rājā pupūjainaṃ copadābhiḥ pareśvaram || 19 ||
[Analyze grammar]

niṣasādā''sane rājā papraccha vinayānvitaḥ |
kathaṃ kṛṣṇa kṛte rājye bandhanaṃ nopasarpati || 20 ||
[Analyze grammar]

bhavatprāptyā bandhanāni chinnānīti ca vedmyaham |
tathāpi baddhabhāvatvād yathā na bandhanaṃ bhavet || 21 ||
[Analyze grammar]

tathā śādhi mahārāja kuṭumbaṃ vada śāntidam |
śrutvaivaṃ bhagavānāha sabhāyāṃ sarvaśṛṇvatām || 22 ||
[Analyze grammar]

bhavasāgaratīrasya prāpakaṃ pravadāmi te |
yathā na bandhanaṃ madhye kutracit syāt kadācana || 23 ||
[Analyze grammar]

prāṇasyā'nnamidaṃ sarvaṃ nātmanastu kadācana |
sthāvaraṃ jaṃgamaṃ sarvaṃ prāṇasyaivāsti bhojanam || 24 ||
[Analyze grammar]

sthite prāṇe tu tattvānāmapekṣā varṣmaṇi sthitā |
prāṇo vai prakṛteḥ kāryaṃ gate prāṇe na tṛṣṇikā || 25 ||
[Analyze grammar]

matvaivaṃ tu budho bhakṣye bhogye varteta nispṛhaḥ |
lubdhavannaiva varteta virāgasya na bandhanam || 26 ||
[Analyze grammar]

yathā''ruhya mahāvṛkṣamapahṛtya tato madhu |
vṛkṣaṃ tyajati tatraiva bhuktvā madhu tataḥ param || 27 ||
[Analyze grammar]

malaṃ tyajati tatpaścād dehastyājyo bhaviṣyati |
ityevaṃ cānusandhāya vartate na sa badhyate || 28 ||
[Analyze grammar]

yathā mārgaṃ mahāntaṃ vai janastvāśāśatākulaḥ |
patan phalaṃ na vindeta nirāśaḥ samprajāyate || 29 ||
[Analyze grammar]

smṛtvā sarvaṃ tathā vijñaścalaṃ matvā na badhyate |
āpatkāle yathā śaktajano'pi yāti mārdavam || 30 ||
[Analyze grammar]

tathā varteta māyāyāṃ mārdavena na badhyate |
yathā ca jarayā vyāptaḥ śanuhastagato'pi vā || 31 ||
[Analyze grammar]

bhogyāśāṃ prajahātyeva tathāvṛttirna badhyate |
parvatāśca drumāścāpi nityasaṃnyāsayoginaḥ || 32 ||
[Analyze grammar]

mamakāraṃ parityajya vartante niṣparigrahāḥ |
tathāvṛttiḥ rājyakartā nirlepo nahi badhyate || 33 ||
[Analyze grammar]

audakāḥ sṛṣṭayaḥ sarvā ātmabharaṇatatparāḥ |
parigrahaṃ na kurvanti tathāvṛttirna badhyate || 34 ||
[Analyze grammar]

śṛṇu cātretihāsaṃ tvaṃ tāpasānāṃ hitāvaham |
purā gṛhān parityajya dvijāḥ kecana vaiṣṇavāḥ || 35 ||
[Analyze grammar]

vanamabhyāgaman dhīrā brahmacaryaparāyaṇāḥ |
yatitulyā rūpavanto hyajātaśmaśravo'pi ha || 36 ||
[Analyze grammar]

indro dayāparo bhūtvā''babhāṣe pakṣirūpadhṛk |
aho bhavanto bālyādvai tyāgamārgamupāśritāḥ || 37 ||
[Analyze grammar]

kathaṃ gatā na gārhasthye ko hetustyajane'naghāḥ |
śrutvā tadṛṣayaḥ prāhurnispṛhasya tṛṇaṃ jagat || 38 ||
[Analyze grammar]

gārhasthye vā vane vāpi tasya bandho na vidyate |
vayaṃ vai nispṛhāstasmādvanamārgamupāśritāḥ || 39 ||
[Analyze grammar]

prakṣālanāddhi paṃkena paṃkā'sparśo hi cottamaḥ |
pakasparśo yasya jātastasyā'pekṣā jalasya vai || 40 ||
[Analyze grammar]

jalātmakena jñānena prakṣālanaṃ varaṃ matam |
yadvā cātapayogena śuṣkabhāvo varo mataḥ || 41 ||
[Analyze grammar]

kardamaḥ kṛkacībhūtvā svayaṃ viyogamāśrayet |
ārādhanaṃ hareścāstyātaparūpaṃ viśodhakam || 42 ||
[Analyze grammar]

yadvā ca vāyunā śuṣkabhāvo'pi cottamo mataḥ |
guruṃ vāyuṃ samāśrityā'vidyākardamanāśanam || 43 ||
[Analyze grammar]

tasmād guruṃ mahāntaṃ vai santaṃ vā parameśvaram |
tadvijñānaṃ samāśliṣya māyāṃ vināśayet sudhīḥ || 44 ||
[Analyze grammar]

karmā'pi sarvamevaitallaukikaṃ vaidikaṃ ca vā |
kurvannaiṣkarmyabhāvena siddhiṃ vindati mānavaḥ || 45 ||
[Analyze grammar]

siddhikṣetramidaṃ puṇyaṃ pakṣin karmaphalapradam |
devavaṃśān pitṛvaṃśān brahmavaṃśān sato janān || 46 ||
[Analyze grammar]

anusṛtyaiva yatkarma tatkarma phaladaṃ nṛṇām |
vayaṃ vartāmahe brahmavaṃśamāśritya vaidikam || 47 ||
[Analyze grammar]

gārhasthyaṃ cet tapoyuktaṃ yujyate mokṣadāyakam |
kintu vighnagṛhaṃ tadvai vayaṃ śāntā yatastataḥ || 48 ||
[Analyze grammar]

nairbalye sati sāralyaṃ cātmamārgasya saṃśrayet |
sabalānāṃ mahāmārgo gārhasthyaṃ bahutāpinām || 49 ||
[Analyze grammar]

na vayaṃ prabhavo voḍhuṃ gṛhadharmānato yamān |
sādhudharmān saṃśritāḥ smo yatra śreyo dhruvaṃ bhavet || 50 ||
[Analyze grammar]

saṃśaye nirṇaye cādyaṃ tyaktvā nirṇayamāśrayet |
śrutvaivaṃ vacanaṃ teṣāmṛṣīṇāṃ pakṣirāṭ svayam || 51 ||
[Analyze grammar]

jagāda tān gṛhadharmān kaṭhinān paramottamān |
jale nimajjitaścāpi jalasparśātirekavān || 52 ||
[Analyze grammar]

vahnau tu patitaścāpi dāhabhāvātirekavān |
kāmadharme sthitaścāpi kāmanāṃśavivarjitaḥ || 53 ||
[Analyze grammar]

kaścideva bhavelloke samarthaḥ puṇyāvānapi |
tādṛśaḥ syād gṛhasthaścellabhate śreya uttamam || 54 ||
[Analyze grammar]

tyāgena tvātmamātrasya kalyāṇaṃ labhate janaḥ |
gṛhadharmairasaṃkhyānāṃ kalyāṇakṛdbhavejjanaḥ || 55 ||
[Analyze grammar]

yathā sarvāstu sarito viśrāntiṃ yānti vāridhau |
tathā sarvāṇi bhūtāni viśramante gṛhigṛhe || 56 ||
[Analyze grammar]

tyāgavanto mahātmāno nispṛhā api yoginaḥ |
gṛhadharmasthitān vṛkṣān saphalānāśrayanti vai || 57 ||
[Analyze grammar]

paropakaraṇaṃ tatra gṛhadharme prajāyate |
atithīnāmāśrayo vai pakṣiṇāṃ gṛhadharmavān || 58 ||
[Analyze grammar]

arjitaṃ gṛhadharmaiśca nītyā satyena yuktayā |
vibhajyaiva gṛhī bhuṃkte kuṭumbāśritabhikṣukān || 59 ||
[Analyze grammar]

nṛpaṃ cāgantukaṃ cāpyanāthaṃ pipīlikādikān |
smṛtvā tebhyo yathāyogyaṃ datvā bhuṃkte gṛhī sadā || 60 ||
[Analyze grammar]

prātardevā hi tṛpyanti madhyāhne'tithibhikṣukāḥ |
tataḥ paraṃ ca pitaraścānte vai kṣudrajantavaḥ || 61 ||
[Analyze grammar]

gṛhiṇā randhitaṃ cānnaṃ bhuñjate sarvadehinaḥ |
vighasāśī gṛhī tasmād datvā gṛhṇāti nānyathā || 62 ||
[Analyze grammar]

ghasaṃ pāpaṃ svātmamātrodaraṃbharatvamucyate |
vigataṃ tu ghasaṃ pāpaṃ yatrā'nye yānti tarpaṇam || 63 ||
[Analyze grammar]

yajño dānaṃ tapo homaḥ svādhyāyaśceśvarārpaṇam |
ṣaḍetāni yatra santi vighasāśitvameva tat || 64 ||
[Analyze grammar]

śreṣṭhaṃ vai sarvadharmebhyo vighasāśitvamuttamam |
pālayitvā ca taddharmaṃ śreyaḥ paramamarjayet || 65 ||
[Analyze grammar]

loko'yaṃ bhogadasteṣāṃ svargo'pi cātisaukhyakṛt |
tato'pi ca phalādhikye paraṃ śreyo bhavedapi || 66 ||
[Analyze grammar]

sarvārpaṇavidhānena prāptavyaṃ paramaṃ padam |
nedṛśaṃ karmabhūmau vai śreṣṭhaṃ tvanyad gṛhāśramāt || 67 ||
[Analyze grammar]

ahamindro'smi yatayaḥ karmaṇā''ptaḥ sureśatām |
sūryacandrādayaḥ sarve'bhavan prāg vighasāśinaḥ || 68 ||
[Analyze grammar]

vartante tvadhunā svarge vighasāśina eva te |
vaikuṇṭhastho hariḥ sākṣād vighasāśī virājate || 69 ||
[Analyze grammar]

goloke'pi tathā kṛṣṇo vighasāśī virājate |
caturbhujo vāsudevo viṣṇuśca vighasāśanaḥ || 70 ||
[Analyze grammar]

haro brahmā vasiṣṭhādyā vighasāśina eva te |
vartante bhogamārgasthā api dvandvavivarjitāḥ || 71 ||
[Analyze grammar]

īśvarārpaṇadharmāṇo gamiṣyanti paraṃ padam |
evaṃ vai yatayo brahma gacchanti vighasāśinaḥ || 72 ||
[Analyze grammar]

sāyaṃ prātarvibhajyā'nnaṃ kuṭumbe'tithibhikṣuke |
pareśe ca sure bhūte pitari svajane'pi ca || 73 ||
[Analyze grammar]

anāthe cāśrite bhṛtye śvādau cānāthake tathā |
nāryāṃ gavi ca samprāpte yācake ca gurāvapi || 74 ||
[Analyze grammar]

dāse dāsyāṃ karmacāre prajāyāṃ bhautikātmasu |
vibhajyānnādikaṃ sarvaṃ yathāyogyaṃ tu dharmataḥ || 75 ||
[Analyze grammar]

avaśiṣṭaṃ samaśnanti ye te syurvighasāśinaḥ |
te lokaguravo bhūtvā jāyante śāśvatāśinaḥ || 76 ||
[Analyze grammar]

tridivaṃ ca mahadrājyaṃ prāpya śāśvatavārṣikam |
īśvarārpaṇapuṇyena prayāntyapunarāgamam || 77 ||
[Analyze grammar]

tasmād vighasabhoktāro bhavanti bandhanojjhitāḥ |
gṛhadharmān samāśritya bahavastatpadaṃ yayuḥ || 78 ||
[Analyze grammar]

tasmād bhavanto bālāśca bhavantu vighasāśinaḥ |
etad vidustapo viprāḥ saptarṣayastathā pare || 79 ||
[Analyze grammar]

ityuktāste dharmayuktaṃ vacaḥ śrutvā yatīśvarāḥ |
tyāgāśramaṃ vihāyaiva gārhasthyaṃ samupāśritāḥ || 80 ||
[Analyze grammar]

cakruḥ sarvārpaṇaṃ kṛṣṇe vighasāśā maharṣayaḥ |
ātmanivedanadharmāśrayāḥ sarve tato'bhavan || 81 ||
[Analyze grammar]

sastrīputrakuṭumbāḍhyāścānte brahma yayuḥ purā |
tasmād rājan gṛhadharmaḥ kaṭhino'pi sukhāvahaḥ || 82 ||
[Analyze grammar]

paropakārapuṇyāḍhyaḥ satsevāprāpakaḥ sadā |
parameśvarasevāderlābhadaḥ śreṣṭhako yataḥ || 83 ||
[Analyze grammar]

vighasāśī bhavān nityaṃ vartayatu sahāśritaiḥ |
sarvendriyakriyāsveva kṛṣṇaṃ dhyāyatu māṃ muhuḥ || 84 ||
[Analyze grammar]

bandhanaṃ te na vai bhāvi mama yogāt kadācana |
mama yogāt sadā śāntistava rājan bhaviṣyati || 85 ||
[Analyze grammar]

rakṣā'tra pratimāṃ me ca kuru sarvārpaṇaṃ mayi |
ananyabhaktaṃ tvāṃ bhūbhṛt nayiṣye brahmadhāma te || 86 ||
[Analyze grammar]

ye ye mamārpaṇadharmaparāyaṇā janā iha |
teṣāmahaṃ samuddhartā karmabandhanasāgarāt || 87 ||
[Analyze grammar]

ityuktvā bhagavāṃstatra virarāma prajāstu tāḥ |
pupūjuḥ paramātmānaṃ mantrān jagṛhurādarāt || 88 ||
[Analyze grammar]

vighasāśivratavatyo jātāḥ sarvāśca taddināt |
ityevaṃ rādhike sabhāṃ samāpya bhagavāṃstataḥ || 89 ||
[Analyze grammar]

snānasandhyādikaṃ cakre tataśca bhojanādikam |
sarve te mahīmānāśca bhuktavanto viśaśramuḥ || 90 ||
[Analyze grammar]

rājā kuṭumbasahitaṃ siṣeve nidritaṃ harim |
prātarbubodha ninadairvādyānāṃ śrīharistataḥ || 91 ||
[Analyze grammar]

kṛtvā nityavidhiṃ siṃhāsane cāgatya saṃsthitaḥ |
tāvad rājādayaḥ sarve tvāyan pūjayituṃ harim || 92 ||
[Analyze grammar]

bahupadā arpitāśca rājñā tīrāṇakena vai |
tasya rājñyastathā kanyāḥ samājagmuḥ kareṣu tu || 93 ||
[Analyze grammar]

dhṛtvā pūjanapātrāṇi pupūjuḥ parameśvaram |
rādhike kanyakāḥ ṣaṭ ca jagṛhuḥ śrīhareḥ karam || 94 ||
[Analyze grammar]

kumāradānamāsādya kṛtakṛtyāstadā'bhavan |
atha viśrāntimāsādya kṛtvā vai bhojanādikam || 95 ||
[Analyze grammar]

alvīnaranareśena prārthito gantumutsukaḥ |
girīśarṣivanditaśca sajjo'bhavaddharistadā || 96 ||
[Analyze grammar]

tadā vādyānyavādyantā'gāyanta gītikāstathā |
jayaśabdān praśṛṇvānaḥ prāpya satkaraṇādikam || 97 ||
[Analyze grammar]

harirnaijaṃ vimānaṃ cādhyāruroha tathā pare |
āruruhurvyomamārge vimānānyabhavaṃstadā || 98 ||
[Analyze grammar]

māṃgalikaninādaiśca yantraśabdādibhistathā |
vardhitaścāśiṣā kṛṣṇanārāyaṇastathā pare || 99 ||
[Analyze grammar]

pratasthire'tivegena vimānaiḥ kṣaṇamātrataḥ |
girīśākhyāṃ bhuvaṃ prāpyā'bdhiyutaṃ rāṣṭramuttamam || 100 ||
[Analyze grammar]

prasanno'bhūddhariḥ śṛṇvan jayaśabdān vilokayan |
alvīnaraḥ puro gatvā svāgatārthamupasthitaḥ || 101 ||
[Analyze grammar]

eti harirmahārāja iti prajāḥ samutsukāḥ |
draṣṭuṃ svāgatamādhātuṃ sajjāścāsan bhuvastale || 102 ||
[Analyze grammar]

vilokayantyaścākāśaṃ kīrtanaṃ cakrurutsukāḥ |
rādhike'kṣatapuṣpādidhṛtahastāḥ striyo narāḥ || 103 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne tīrāṇanṛparājyaṃ gatvā tīrāṇānagaryāṃ sasainyasvāgatarūpeṇa bhramitvā bhojanādi kṛtvā sāyaṃ sabhāyāṃ vighasāśitvadharmopadeśena nirbandhanatāmuktvā rātrau viśramya prātaḥ pūjāṃ pragṛhya bhuktvā sajjo bhūtvā harirdvitīyāyām alvīnararājyamājagāmetyādinirūpaṇanāmā'śītyadhikaśatatamo'dhyāyaḥ || 180 ||
[Analyze grammar]