Chapter 111

śrīkṛṣṇa uvāca |
śṛṇu tvaṃ rādhike divyakiśoraṃ darśanaṃ param |
paradhāmagataṃ rūpaṃ darśayāmāsa mādhavaḥ || 1 ||
[Analyze grammar]

rūpānurūpāvayavaṃ koṭikāmāśrayaṃ śubham |
sarvatejomayaṃ sarvānandaśāntidayābhṛtam || 2 ||
[Analyze grammar]

apārakaruṇāyuktaṃ tathā vātsalyaśevadhim |
anantānanta sauhārdasnehapremaprapūritam || 3 ||
[Analyze grammar]

sarvagandharasādyuktaṃ sarvapuṣṭibalānvitam |
sarvābhṛtaprasavaṃ ca sarvasparśasukhapradam || 4 ||
[Analyze grammar]

mukuṭādivibhūṣābhiḥ śobhitaṃ ca manoharam |
divyāmbarasuśobhaṃ ca sarvacihnavirājitam || 5 ||
[Analyze grammar]

rādhālakṣmīyutaṃ pārśve prabhāpāravatīyutam |
māṇikīsahitaṃ divyaṃ brahmapriyābhivanditam || 6 ||
[Analyze grammar]

asaṃkhyamuktadhāmādiprastutaṃ cāvatārakaiḥ |
pārṣadairīśvaraiḥ sarvairīśvarībhirnataṃ tathā || 7 ||
[Analyze grammar]

saguṇairnirguṇaistattvaiḥ sṛṣṭipālaiḥ pravanditam |
ṛṣibhiḥ pitṛbhirdevairmānavairjaḍacetanaiḥ || 8 ||
[Analyze grammar]

pātālavāsibhiścāpi śaktibhiśca stutaṃ prabhum |
sarvaṃ yatra mamau sūkṣmaṃ yasmācca niryayāvidam || 9 ||
[Analyze grammar]

sarvātmakaṃ tataḥ sūkṣmaṃ camatkāraprapūritam |
sarvāścaryāśritaṃ bālakṛṣṇaṃ śrīkambharāsutam || 10 ||
[Analyze grammar]

kuṃkumavāpikākṣetraṃ cāśvapaṭṭasarovaram |
divyākṣaraṃ paraṃ kṣetraṃ darśayāmāsa vai prabhuḥ || 11 ||
[Analyze grammar]

pitṛkanyā viṃśatiśca daśasāhasrasevikāḥ |
sarvāstāḥ pitṛputryo vai mumuhuḥ śrīharau tadā || 12 ||
[Analyze grammar]

vavrire kāntamātmānaṃ sarvātmavallabhaṃ prabhum |
prajākanyāḥ koṭisaṃkhyā vavrire kāntameva tam || 13 ||
[Analyze grammar]

aryamṇā ca prajābhiśca bālakṛṣṇāya cārpitāḥ |
anādiśrīkṛṣṇanārāyaṇena svīkṛtāśca tāḥ || 14 ||
[Analyze grammar]

kṛtakṛtyā abhavaṃśca prāptavyaḥ prāpta eva yat |
bhagavān svavimāneṣu tābhyo vāsaṃ tadā dadau || 15 ||
[Analyze grammar]

athā'ryamāṇa bhagavānāha kārukaparvate |
sindhumūle sadā mūtyā stheyaṃ tvayā'tra bhūtaye || 16 ||
[Analyze grammar]

trītarājye cāruṇānāṃ rakṣārthaṃ paścime sthale |
aryamaṃstava rājyaṃ tad bhaviṣyati sukhāvaham || 17 ||
[Analyze grammar]

ityevaṃ bhagavān kṛṣṇanārāyaṇastu bhāsvate |
aryamṇe pradadau kurukarādriṃ sindhupārśvagam || 18 ||
[Analyze grammar]

āruṇā divyavasanā divyarūpāśca tatstriyaḥ |
prāpya tat sundaraṃ sthānaṃ mumudurdevatā iva || 19 ||
[Analyze grammar]

kaṃ sukhaṃ tatpradā yā aśmanām irā kṣitiḥ śubhā |
kaśmerā parvatabhūmiḥ kāruparvataśobhanā || 20 ||
[Analyze grammar]

tatrā'ryamā svayaṃ vāsaṃ cakre śrīsahitaḥ sadā |
śrībhūmiḥ pāvanī sā cā'bhavacchrīnagarī sadā || 21 ||
[Analyze grammar]

evaṃ sarvaṃ vyavasthāpya haristīrthavidhitsayā |
vidhāpayituṃ tīrthāni nadīrnadān sarāṃsi ca || 22 ||
[Analyze grammar]

prajāḥ svasvapradeśāṃśca gantumājñāpya vai tataḥ |
vimānairniryayau kṛṣṇo yātumādiśya vai nṛpān || 23 ||
[Analyze grammar]

brahmapriyākumārībhirdevapitrarṣibhiḥ saha |
sasnau sa brahmaputryāṃ vai lāśahākhyasarojale || 24 ||
[Analyze grammar]

tataḥ sasnau sindhumūle tataśca terimājale |
āmūrāyā jale sasnau homāṃgāyā jale tataḥ || 25 ||
[Analyze grammar]

mahatyāśca jale aṃgaśikṣāṃgāyā jale tataḥ |
śikṣāṃgāyā jale sasnau manikaṅgvā jale tataḥ || 26 ||
[Analyze grammar]

pannāmnyāśca jale cāpi śālāvatyā jale'pi ca |
irāvatyā jale snātvā sundarāraṇyamāyayau || 27 ||
[Analyze grammar]

pitṛkanyā hariḥ prāha bhavatyo'tra mama priyāḥ |
dvirūpiṇyo bhavantveva mūlacchāyātmikāḥ śubhāḥ || 28 ||
[Analyze grammar]

mūlātmikā mama kṣetre vasantu tu mayā saha |
chāyātmikā nadīrūpā vasantu tīrthabhūmigāḥ || 29 ||
[Analyze grammar]

brahmaputrī lavahītā candrāvatī irāvatī |
śālāvatī mīnakaṅgū lāṭiśā kāniśā tathā || 30 ||
[Analyze grammar]

māpīṃgā cāpi sīkyāṃgā aṃgasvāṃgā harāṃgikā |
mauktikā tārimā cāpi pannāmā tvāṃgahā tathā || 31 ||
[Analyze grammar]

mannāmnī maṇivarṇā ca raṃgavarṇā ca sundarī |
etāḥ sarvāḥ svanāmnaiva khyātiṃ yāsyatha me priyāḥ || 32 ||
[Analyze grammar]

bhavatibhyo mayā dattaṃ sāmarthyaṃ pāpanāśakam |
mokṣadaṃ puṇyadaṃ smṛddhipradaṃ putrādisampradam || 33 ||
[Analyze grammar]

bhavatīnāṃ mahimānaṃ kathayāmi mama priyāḥ |
yāsāṃ sākṣāddhareryogo divyatāpādakaḥ śubhaḥ || 34 ||
[Analyze grammar]

muktatādāyako yogo yāsāṃ nārāyaṇena vai |
tāsāṃ vai divyatā nityamuktatā kamalāsamā || 35 ||
[Analyze grammar]

rādhikayā samā lakṣmyā samāḥ śriyā samāstathā |
yūyaṃ prabhāsamā divyā yūyaṃ pāravatīsamāḥ || 36 ||
[Analyze grammar]

yūyaṃ vai māṇikītulyā mama prāṇasamāḥ priyāḥ |
yuṣmatsaṃsargamāptānāṃ mama dhāmni nivāsanam || 37 ||
[Analyze grammar]

bhavatīnāṃ jale snātā ye pakṣipaśavo janāḥ |
kīṭāḥ pataṃgajantvādyāste yāsyanti paraṃ padam || 38 ||
[Analyze grammar]

yathā gaṃgā ca yamunā yathā sarasvatī satī |
tathā yūyaṃ sarvamokṣapradā divyāḥ stha tārikāḥ || 39 ||
[Analyze grammar]

yathā ca gaṇḍakī śreṣṭhā gomatī svarṇalekhikā |
tathā yūyaṃ sadā me vai nivāsārhāḥ stha yoṣitaḥ || 40 ||
[Analyze grammar]

mama mūrterjalaṃ yadvat tattathaiva ca vo jalam |
brahmakamaṇḍaluvārisadṛśaṃ vo jalaṃ śubham || 41 ||
[Analyze grammar]

virājāyā yathā vāri brahmahradajalaṃ yathā |
pāvanaṃ vo jalaṃ yadvadāmūla vārdhisaṃgamāt || 42 ||
[Analyze grammar]

mahāpāpātipāpānāṃ ghātahatyādibhāvinām |
akṛtyajāyamānānāṃ kṣālanaṃ vo jale sadā || 43 ||
[Analyze grammar]

pītaṃ spṛṣṭaṃ tathā dṛṣṭaṃ ghrātaṃ cācamanīkṛtam |
kaṇamātrajalaṃ vo'stu pāvakaṃ mama yogataḥ || 44 ||
[Analyze grammar]

āsurā rākṣasā daityā mlecchāḥ pāpāśca dānavāḥ |
śuddhimeṣyanti salilādbhavatīnāṃ yuge yuge || 45 ||
[Analyze grammar]

pretā bhūtā rākṣasādyā asadgatigatāstathā |
yadākadācit snānena muktimeṣyanti vai kṣaṇāt || 46 ||
[Analyze grammar]

śālāvatyā cāṃgaśikṣāyā madhye tu mayā kratuḥ |
menakāṃgātaṭe yatra prathamastu kṛtaḥ śubhaḥ || 47 ||
[Analyze grammar]

tathātra lāśahānāmnastaḍāgasya samīpataḥ |
dvitīyo'yaṃ mahāyajñaḥ kṛto vai vaiṣṇavaḥ śubhaḥ || 48 ||
[Analyze grammar]

ādyā vaikuṇṭhasadṛśī golokena samā parā |
bhūmirdivyā bhavatīnāṃ yogācca mokṣasadṛśī || 49 ||
[Analyze grammar]

tatratyāśca prajāḥ sarvā mama pārṣadarūpiṇī |
mama brahmapriyātulyāḥ satyaḥ sādhvyaḥ striyo'pi ca || 50 ||
[Analyze grammar]

bālā madbālatulyāśca vṛddhā me vṛddhasadṛśāḥ |
samānā me samabhāvāḥ pāvanā mama yogataḥ || 51 ||
[Analyze grammar]

bhavatīnāṃ taṭe vāsaṃ kurvāṇā dehinaḥ khalu |
jarā'ṇḍasvedabhedotthāścatvāro'pi prajīvinaḥ || 52 ||
[Analyze grammar]

pāvanā me bhaktiyuktā viṣṇutulyā matā mama |
bhavatīnāṃ jale vāsaṃ kurvāṇā jantavastu ye || 53 ||
[Analyze grammar]

sadā vaikuṇṭhavāsāste bhaviṣyanti na saṃśayaḥ |
bhavatīnāṃ kaṇavyāptāḥ pavanā yānti yaddiśam || 54 ||
[Analyze grammar]

te deśāḥ pāvanā viṣṇulokatulyā hi dehinām |
bhavatīnāṃ jale yeṣāmasthikhaṇḍaḥ patedapi || 55 ||
[Analyze grammar]

yadvā bhasma śavasyāpi patetsvalpaṃ yadā tadā |
te jīvāḥ pāvanā bhūtvā yāsyanti mama dhāma vai || 56 ||
[Analyze grammar]

bhavatīnāṃ smaraṇena prātarnāmnā tu yāḥ prajāḥ |
yatra kvāpi kariṣyanti snānaṃ vāpījalādiṣu || 57 ||
[Analyze grammar]

gṛhe vā parvate'raṇye samudre yānavāhane |
brahmaputryādināmneva te prāpsyanti kratoḥ phalam || 58 ||
[Analyze grammar]

atha gaṃgā cājanābhe abrikte ca narāyaṇī |
irāvatī brahmadeśe trivitte brahmaputrikā || 59 ||
[Analyze grammar]

śyāmadeśe menakāṃgā prācīneṃ'gaśivāṃgikā |
sarvāstā gomatītulyā golokā''vāsadāyikāḥ || 60 ||
[Analyze grammar]

sarvatīrthaphalaṃ yāyāt snātvā smṛtvā'pi mānavaḥ |
bhavatīnāṃ taṭe kaścid dāsyatyapi ca ḍhabbukam || 61 ||
[Analyze grammar]

koṭimudrāpradānasya phalamāpsyati mānavaḥ |
rūpyakaṃ vā svarṇamudrāṃ ratnaṃ ca hīrakaṃ ca vā || 62 ||
[Analyze grammar]

mauktikaṃ cāpi māṇikyaṃ maṇiṃ tāmraṃ varāṭikām |
dāne dāsyanti ye tīre teṣāṃ koṭiguṇaṃ phalam || 63 ||
[Analyze grammar]

vastraṃ bhūṣāḥ kajjalādi śṛṃgāraṃ candanādikam |
pāduke vāhanaṃ vāpi tathopakaraṇādikam || 64 ||
[Analyze grammar]

gṛhaṃ gṛhasya sāmagrīścānnaṃ rasaṃ ca bhojanam |
yo vā dāsyati bhāvena tasya puṇyamanantakam || 65 ||
[Analyze grammar]

gajaṃ cāśvamajāṃ dhenuṃ dogdhrīṃ kanyāṃ ca vāṭikām |
dāne dāsyati tīre vastasya puṇyamanantakam || 66 ||
[Analyze grammar]

vidyāṃ vidyārthināṃ cāpi sāhāyyaṃ pāṭhaśālikām |
dāsyati vastaṭe teṣāṃ svargaṃ syāt samanantakam || 67 ||
[Analyze grammar]

ahaṃ nārāyaṇaḥ svāmī jalāddhastacatuṣṭaye |
tīre dānapradātāro yāsyanti mama dhāma te || 68 ||
[Analyze grammar]

nārīṇāṃ cāpi bālānāmanāthānāṃ ca yoginām |
sādhvīnāṃ ca satāṃ sevāṃ kartavyā'nantapuṇyadā || 69 ||
[Analyze grammar]

anaṃgānāmadhanānāmagṛhāṇāmanāyuṣām |
sevanaṃ vastaṭe kāryaṃ tasya puṇyamanantakam || 70 ||
[Analyze grammar]

māghe pūrvadale yajñaḥ prathamaḥ pañcamītithau |
samārabdho menakāṃgātaṭe tatra dine tu yaḥ || 71 ||
[Analyze grammar]

kariṣyati kratuṃ tatra vaiṣṇavaṃ raudrameva vā |
svargarājyaṃ brahmarājyaṃ prāpsyanti mokṣaṇaṃ tathā || 72 ||
[Analyze grammar]

ekādaśyāṃ samāptiśca kṛtā tasyeti taddine |
bhojanādīni dāsyanti prāpsyanti paramāṃ gatim || 73 ||
[Analyze grammar]

lakṣmīnārāyaṇasaṃhitāyāḥ pārāyaṇaṃ tataḥ |
ārabhya kārayiṣyanti prāpsyanti mama dhāma te || 74 ||
[Analyze grammar]

mandire mama tatraivotsavaṃ ca mama sannidhau |
kārayiṣyanti ye bhaktāsteṣāṃ mokṣastu śāśvataḥ || 75 ||
[Analyze grammar]

dṛḍhaṃ ca mandiraṃ nūnaṃ kārayitvā tu tattaṭe |
lakṣmīrādhāprabhāpāravatīśrīmāṇikīyutam || 76 ||
[Analyze grammar]

saptamūrtisvarūpaṃ mā sthāpayiṣyanti ye janāḥ |
tebhyo dhāma paraṃ sthānaṃ dāsyāmi mama śobhanam || 77 ||
[Analyze grammar]

pūjāpravāhaṃ vṛttiṃ ca jīvanaṃ dānabhojanam |
dāsyanti ye bhavatīnāṃ taṭe manmandire janāḥ || 78 ||
[Analyze grammar]

tebhyaḥ svargāṇi ramyāṇi dhāmāni dyutimanti ca |
dāsyāmyajasraṃ divyāni śāśvatāni na saṃśayaḥ || 79 ||
[Analyze grammar]

mandire dīpadānaṃ ca bhavatīnāṃ jale tathā |
dīpadānaṃ kariṣyanti teṣāṃ cakṣurhi śāśvatam || 80 ||
[Analyze grammar]

sarvaṃ jñānamayaṃ divyaṃ vidhāsye muktidaṃ śubham |
tulasīṃ campakaṃ padmaṃ tadudyānaṃ phalānvitam || 81 ||
[Analyze grammar]

kārayiṣyanti ye bhaktāstānnayiṣyekṣarālayam |
mama vaiṣṇavabhaktānāṃ pūjāṃ bhojanadakṣiṇām || 82 ||
[Analyze grammar]

sevāṃ pādasya dāsyaṃ vā kariṣyanti tu ye janāḥ |
sādhvīnāṃ vā pārṣadānāṃ kariṣyanti prasevanam || 83 ||
[Analyze grammar]

annadhanā'mbareṣṭādyaistānnayiṣye'kṣaraṃ padam |
bhavatīnāṃ taṭe ramye grāme cāvasathādiṣu || 84 ||
[Analyze grammar]

sādhurūpeṇa satataṃ vicariṣyāmi vallabhaḥ |
sādhvīrūpeṇa me patnyo vicariṣyanti sarvadā || 85 ||
[Analyze grammar]

tāsāṃ pūjā'nnadānādyaiḥ kāryā svaśreyase janaiḥ |
bhavatīnāṃ jale tāśca snāsyanti tīrthahetave || 86 ||
[Analyze grammar]

mama bhaktāvatārāśca me'vatārā yuge yuge |
snāsyanti bhavatīnāṃ vai salileṣu punaḥ punaḥ || 87 ||
[Analyze grammar]

māghe saritsu caitāsu ye tu snāsyanti dehinaḥ |
teṣāṃ pāpāni vilayaṃ yāsyanti koṭijanmanām || 88 ||
[Analyze grammar]

nadīnāṃ saṃgamādau ca kuṃbhalagne tu ye janāḥ |
snāsyanti dūrato gatvā yāsyanti paramaṃ padam || 89 ||
[Analyze grammar]

mayā kṛpayā pitṛkanyāstīrthīkṛtāḥ sadā |
matpriyā bhavathā'to vai mattulyā nā'tra saṃśayaḥ || 90 ||
[Analyze grammar]

māghamāse bhavatīnāṃ jaleṣu svargavāsinaḥ |
devāśca pitaraścāpi samāyāsyanti nityaśa || 91 ||
[Analyze grammar]

sarvatīrthāni lokebhyaścāgamiṣyanti sarvataḥ |
koṭitīrthātmakaṃ vāri bhavatīnāṃ bhaviṣyati || 92 ||
[Analyze grammar]

satyaṃ svargādikaṃ sarvaṃ bhavatīnāṃ jale tadā |
bhaviṣyati na sandeho yūyaṃ śreṣṭhatamāstataḥ || 93 ||
[Analyze grammar]

tattaddeśodbhavāḥ santo nivatsyanti hi vastaṭe |
bhavatīnāṃ supāvitryaṃ vardhayiṣyanti sādhavaḥ || 94 ||
[Analyze grammar]

putrapautrakalatrādidhanadhānyā'mbarādikam |
bhūṣākṣetrodyānarājyasampatsmṛddhipradaṃ tathā || 95 ||
[Analyze grammar]

sarveṣṭasukhadaṃ svargamokṣadaṃ vaṃśadaṃ śubham |
bhavatīnāṃ jale snānaṃ kṛtaṃ sarvaṃ vidhāsyati || 96 ||
[Analyze grammar]

bhavatīnāṃ taṭe vāsakṛtāṃ mokṣo bhaviṣyati |
muṇḍanaṃ kārayiṣyanti ye tatpāpāni sarvathā || 97 ||
[Analyze grammar]

nāśameṣyanti ca śuddhiṃ yāsyanti cātmanāṃ tataḥ |
bhavatīnāṃ taṭe dīkṣāṃ grahīṣyanti narāḥ striyaḥ || 98 ||
[Analyze grammar]

te muktā mama dhāmasthatulyā dehayutā api |
snānaṃ dānaṃ tapo homaṃ svādhyāyaṃ pitṛtarpaṇam || 99 ||
[Analyze grammar]

anāthapālanaṃ gopālanaṃ dīnasahāyanam |
kariṣyanti janā ye'tra taṭe te mokṣabhāginaḥ || 100 ||
[Analyze grammar]

kumāradānakartāraḥ kanyādānavidhāyinaḥ |
brahmadhāmagatiṃ cānte yāsyanti śāśvataṃ padam || 101 ||
[Analyze grammar]

bhavatīnāṃ jale tvekavāraṃ snāsyanti ye janāḥ |
smṛtvā śatakulānyeva tāni yāsyanti mokṣaṇam || 102 ||
[Analyze grammar]

bhavatīnāṃ taṭe śrāddhaṃ mṛtānāṃ puṇyasatkriyāḥ |
devānāṃ sthāpanaṃ vṛkṣe jalapānaṃ tathā''layam || 103 ||
[Analyze grammar]

āśrayaṃ dharmaśālāṃ ca sāhāyyaṃ vipadātmanām |
kariṣyanti janā ye'tra te prāpsyanti parāṃ gatim || 104 ||
[Analyze grammar]

bhavatīnāṃ mandirāṇi kāriṣyanti ye janāḥ |
kuladevīṃ kūlavāsā mānayiṣyanti vaśca ye || 105 ||
[Analyze grammar]

pūjayiṣyanti vividhairnūtanairmiṣṭabhojanaiḥ |
jalapuṣpaphalārghyaiśca teṣāṃ svargaṃ hi śāśvatam || 106 ||
[Analyze grammar]

avagrahā'tivṛṣṭyādipīḍā teṣāṃ na vai bhavet |
ṛṣīṇāṃ mama śiṣyāṇāṃ mandire pratimārcanam || 107 ||
[Analyze grammar]

kariṣyanti janāsteṣāṃ dāridryaṃ naiva dṛśyate |
ityevaṃ rādhike tābhyo dadāvāśīrvacāṃsi saḥ || 108 ||
[Analyze grammar]

itiśrīlakṣmīnārāyaṇīyasahitāyāṃ dvitīye tretāsantāne brahmaputryādibhyo hariṇā dattadivyadarśanam daśasahasrāṇi viṃśatiśceti kanyakā'rpaṇam aryamṇe kaśmerāpradeśarājya |
dānam brahmaputryādīnāṃ nadīrūpeṇāpi bhavanam tāsu harikṛtasnānam varadānāni tīrthaphalāni dānaphalāni cetinirūpaṇanāmaikādaśādhikaśatatamo'dhyāyaḥ || 111 ||
[Analyze grammar]