Chapter 110

śrīkṛṣṇa uvāca |
ityevaṃ rādhike pūrvapṛthivyāṃ sāgarāntike |
prāgjyotiṣādideśeṣu raṇo'bhūddānavāntakṛt || 1 ||
[Analyze grammar]

tatasteṣāṃ viśuddhyarthaṃ yajñaṃ punastu vaiṣṇavam |
śālāvatīnadīmūle lāśahāsarasastaṭe || 2 ||
[Analyze grammar]

brahmaputrottare pārśve śatayojanavistare |
sarovarā'bhitaścakre'nādikṛṣṇanarāyaṇaḥ || 3 ||
[Analyze grammar]

samāhūtāḥ prajāḥ sarvā yuddhadeśīyamānavāḥ |
vimānaiḥ sarvatobhadrairghaṭyā krośasahasragaiḥ || 4 ||
[Analyze grammar]

sarve surāḥ samāyātāḥ ṛṣayaḥ pitarastathā |
saptāhaścā'bhavad yajño'tyutkṛṣṭahavanādibhiḥ || 5 ||
[Analyze grammar]

havyānāṃ nahi saṃkhyā'sti rasānāṃ gaṇanā'pi na |
bhojyānāmapi nā'nto'sti peyānāṃ tatra kā kathā || 6 ||
[Analyze grammar]

abjādhikā mahīmānāḥ saṃhatāstatra sāttvikāḥ |
pārthivāśca narā nāryo yuddhaśuddhimabhīplavaḥ || 7 ||
[Analyze grammar]

devānāṃ ca maharṣīṇāṃ pitṝṇāṃ gaṇanā tu na |
āhūtāni ca tīrthāni nadā nadyaśca sāgarāḥ || 8 ||
[Analyze grammar]

lāśahāsarasaścāpsu brahmaputrājaleṣu ca |
śālāvatyāstathā nadyā mūle tīrthāni cāyayuḥ || 9 ||
[Analyze grammar]

śatayojanavistāro bhūdeśo devatāśrayaḥ |
goloka iva samabhūd vaikuṇṭha iva cā'bhavat || 10 ||
[Analyze grammar]

brahmaloka iva vāpi hyakṣaraṃ ceva vā'bhavat |
yatrā'nādikṛṣṇanārāyaṇaḥ śrīparameśvaraḥ || 11 ||
[Analyze grammar]

svayaṃ virājate yatra brahma brahmarṣayastathā |
ṛṣayaśca surāścāpi jagatāṃ pitarastathā || 12 ||
[Analyze grammar]

tatra kiṃ nāma vai nyūnaṃ rādhike ṛddhivarjitam |
yatra brahmapriyāḥ santi santi vai kalpavallayaḥ || 13 ||
[Analyze grammar]

svayaṃ brahmā haro viṣṇuścāryamā tatra kā kṣatiḥ |
yatra vahniḥ saptajihvaścaturvedadharo hyajaḥ || 14 ||
[Analyze grammar]

pañcānanaḥ svayaṃ rudrastatra kā nyūnatā bhavet |
lokakalyāṇadā devā īśvarā yatra sāttvikāḥ || 15 ||
[Analyze grammar]

yatra mokṣapradāḥ śuddhā maharṣayaśca vaiṣṇavāḥ |
pāvanā lokaśuddhyarthaṃ militāstīrtharūpiṇaḥ || 16 ||
[Analyze grammar]

yatra pravartate yajño vaiṣṇavo vaiṣṇavaiḥ suraiḥ |
tatra kā nāma kalyāṇe nyūnabhūmiḥ prajāyate || 17 ||
[Analyze grammar]

kalpavallyastathā muktā nadā nadyo drumāstathā |
surāstattvāni cā'jahruryajñasāmagrikāḥ parāḥ || 18 ||
[Analyze grammar]

pañcagavyāni sarvān vai pāyayāmāsurīśvarāḥ |
ṛṣayo ye vimānasthā nārāyaṇasahasthitāḥ || 19 ||
[Analyze grammar]

prajānāṃ yuddhagānāṃ ca dehaśuddhiṃ yathāvidhi |
kārayāmāsurutsāhāt tato mantraṃ ca vaiṣṇavam || 20 ||
[Analyze grammar]

śaraṇaṃ śrīkṛṣṇanārāyaṇo'stu mama sarvathā |
oṃ namaḥ śrīkṛṣṇanārāyaṇāya svāmine svāhā || 21 ||
[Analyze grammar]

kālamāyāpāpakarmaśatruyāmyakuhṛdbhayāt |
śūlamīnadhvajadhanuścakrasvastikavānava || 22 ||
[Analyze grammar]

brahmā'haṃ śrīkṛṣṇanārāyaṇabhakto'smi śāśvataḥ |
anādiśrīkṛṣṇanārāyaṇaḥ svāmī patiśca me || 23 ||
[Analyze grammar]

prathamaṃ śaraṇaṃ mantraṃ dvitīyaṃ tu samarpaṇam |
ṣoḍaśākṣarayuktaṃ ca prathamaṃ ca dvitīyakam || 24 ||
[Analyze grammar]

tṛtīyaṃ rakṣaṇaṃ mantraṃ dvitriṃśadakṣaraṃ tathā |
caturthaṃ brahmabhāvaṃ ca haryardhāṃgapradaṃ manum || 25 ||
[Analyze grammar]

dvātriṃśadakṣaraṃ daduḥ ṛṣayaste caturdaśa |
maṃkaṇako maṃkirayaḥ kūrmo prācīnabarhaṇaḥ || 26 ||
[Analyze grammar]

trītaḥ prabhūtānakaśca ruśāyī khāsanastathā |
aṃgaśyāmaḥ ārakarṇo brahmadāso hyanāmayaḥ || 27 ||
[Analyze grammar]

śyāmalarṣimalayarṣiścaite manūn dadustadā |
havanottaramete vai prajābhyastaulasīḥ srajaḥ || 28 ||
[Analyze grammar]

daduścā'bjapramāṇābhyaḥ prajābhyaḥ śāsanāddhareḥ |
kṛṣṇanārāyaṇasvāmī śrīhariṃ śaraṇaṃ mama || 29 ||
[Analyze grammar]

yajñe mantraṃ dadustābhyaḥ pāvanyaścā'karotprajāḥ |
lāśahāsalile sarvāḥ snāpayāmāsa keśavaḥ || 30 ||
[Analyze grammar]

śālāvatyāśca salile brahmaputrījale tathā |
evaṃ sarvāḥ prajā nārīrnarān bālāṃśca bālikāḥ || 31 ||
[Analyze grammar]

pāvayāmāsa bhagavān sarvajñātīyamānavān |
vahniṃ devān havyarasaiḥ santṛpya pitṛdevatāḥ || 32 ||
[Analyze grammar]

pārṣadān kanyakāścāpi santṛpya yuddharakṣitān |
bhojayāmāsa bhagavān miṣṭānnairabjamānavān || 33 ||
[Analyze grammar]

yajñaprasādamāsādya kṛtakṛtyāśca te'bhavan |
avabhṛthaṃ vidhāyaiva sabhāyāṃ bālakṛṣṇakaḥ || 34 ||
[Analyze grammar]

ajamājñāpayāmāsa pāritoṣikahetave |
brahmā natvā bālakṛṣṇaṃ prabhuṃ śrīkṛṣṇavallabham || 35 ||
[Analyze grammar]

prakāśaṃ prāha sarvābhyaḥ prajābhyo'bhayadānakam |
parabrahmā'kṣarātītaḥ sarvāvatārakāraṇam || 36 ||
[Analyze grammar]

vāsudevādikavyūhā utpadyante yataḥ khalu |
kālo mahāpūruṣaśca māyā yasya tu śaktayaḥ || 37 ||
[Analyze grammar]

avatārāśca dhāmāni jāyante yasya mūrtitaḥ |
so'yaṃ śrībālakṛṣṇo'sti svāmiśrīkṛṣṇavallabhaḥ || 38 ||
[Analyze grammar]

kaṃbharāśrīsutaḥ śrīmadgopālabālako hariḥ |
aśvapaṭṭasaraḥkṣetre'kṣarakṣetre nivāsakṛt || 39 ||
[Analyze grammar]

kuṃkumavāpikāsaṃsthaḥ prabhāpāravatīpatiḥ |
kṛṣṇābrahmapriyārādhāramālakṣmīpatiḥ prabhuḥ || 40 ||
[Analyze grammar]

māṇikīlalitāhaṃsāmañjulāsaguṇāpatiḥ |
jayāśāntādayāmuktādevīhaimīkalāpatiḥ || 41 ||
[Analyze grammar]

satāṃ svāmī muktikāntaḥ sṛṣṭisvāmī pareśvaraḥ |
sarvadhāmeśo'ntarātmā dehināṃ phaladaḥ svayam || 42 ||
[Analyze grammar]

yadāśrayeṇa jñātavyaṃ prāptavyaṃ nāvaśiṣyate |
yatparo na samo yena kaścidanyo na vidyate || 43 ||
[Analyze grammar]

āruṇaiḥ prārthanīyā yā muktiḥ śāśvatikā parā |
tasyā dātā tvayaṃ svāmī patiḥ kāntaḥ paro hariḥ || 44 ||
[Analyze grammar]

parāmuktiḥ sameṣṭavyā hyetasmācchrīharerjanāḥ |
asmākaṃ vijayastvasya pratāpena sadā'sti vai || 45 ||
[Analyze grammar]

nārāyaṇādyāḥ satataṃ yaṃ bhajāmaḥ sa eva saḥ |
asya mūrtiṃ pūjayadhvaṃ bhajadhvaṃ tvenameva ca || 46 ||
[Analyze grammar]

sevāmasya prakurudhvaṃ tiṣṭhadhvaṃ vacane'sya ca |
asya vāṇī mahāvedā asya kriyā vṛṣo mahān || 47 ||
[Analyze grammar]

asya mūrtiḥ sadā sevyā hyayaṃ dhyeyaḥ sadā janaiḥ |
asya sparśād pavitrā vai jāyante jaḍacetanāḥ || 48 ||
[Analyze grammar]

yuddhe hatāstu ye devā devapakṣāstathā ca ye |
sajīvāḥ santu te sarve kṛpayā'sya kṣaṇādiha || 49 ||
[Analyze grammar]

pṛthvyāṃ jale'mbare ye vā mṛtā devānusāriṇaḥ |
śīghraṃ bhavantu divyāste samāyāntu hariṃ prati || 50 ||
[Analyze grammar]

ityuktvā jalamādāya kamaṇḍalau hareḥ padāt |
cikṣepa cāmbare brahmā jalaṃ tanmeghasadṛśam || 51 ||
[Analyze grammar]

vardhamānaṃ drutaṃ ca prā'sarad bhūvyomavāriṣu |
amṛtaṃ tattadā bhūtvā jīvayāmāsa vai mṛtān || 52 ||
[Analyze grammar]

surapakṣān sarvajīvān kṛtrimānaparāṃstathā |
tadeva jalamevā'bhūt spṛṣṭaṃ dānavasuptiṣu || 53 ||
[Analyze grammar]

tathāpi dānavā naiva sajīvā abhavaṃstadā |
śrīśasvāmikṛṣṇanārāyaṇasyecchā hi tādṛśī || 54 ||
[Analyze grammar]

spṛṣṭaṃ samaṃ surapakṣā jīvitā na tu dānavāḥ |
atha brahma tadā tebhyo dadau mantracatuṣṭayam || 55 ||
[Analyze grammar]

jīvitebhyo haristatra pradadau pāritoṣikam |
vijetṛbhyastathā tatra dadau supāritoṣikam || 56 ||
[Analyze grammar]

dehadvayaṃ muktiyogyaṃ caikaṃ paraṃ tu bhūsthitam |
preṣayāmāsa tān sarvān muktiyogyān pade'kṣare || 57 ||
[Analyze grammar]

bhūyogyān bhagavānāha svayaṃ prasannamānasaḥ |
yajñahavyaṃ prasādaṃ ca pānaṃ miṣṭaṃ subhojanam || 58 ||
[Analyze grammar]

gṛhṇantu ceti te sarve bhuktavantastadājñayā |
atha rājakumārāṃśca ṛṣīn sainyāni cāpi ca || 59 ||
[Analyze grammar]

samāhūya hariḥ prāha prajāśca sakalāstathā |
pāvitā vai mayā deśā bhavatāṃ tīrtharūpiṇaḥ || 60 ||
[Analyze grammar]

kṛtā mokṣapradā nadyo nadāḥ sarāṃsi parvatāḥ |
daityadānavanāśo'ti kṛtaścātra bhuvastale || 61 ||
[Analyze grammar]

ete rājakumārāśca vaiṣṇavāste mamāśritāḥ |
mayā nṛpāsaneṣveva sthāpyante mama bālakāḥ || 62 ||
[Analyze grammar]

prajāścāpi bhavatyo me bālikāḥ santi sarvathā |
nṛpā''jñāyāṃ pravartantu mamā''jñaiṣā hi śāśvatī || 63 ||
[Analyze grammar]

mama bhaktiṃ prakurvantu mānyā me ṛṣayastathā |
śṛṇvantvapi vibhāgena yathā rājyaṃ dadāmi tat || 64 ||
[Analyze grammar]

ayaṃ brahmā prajānāṃ ca pitāmahaḥ svayaṃ prabhuḥ |
yasya nāma vadāmyasmai kirīṭaṃ pradadātu saḥ || 65 ||
[Analyze grammar]

jalapānadvīpabhūmirdīyate sūryaketave |
philīpadvīpasaṃghātā dīyante bījajaṃgine || 66 ||
[Analyze grammar]

vāraṇīyadvīpabhūmiḥ sāraketāya dīyate |
ārdramānadvīpabhūmiḥ raktakeśāya dīyate || 67 ||
[Analyze grammar]

dīyate prācīnarājyaṃ vijñavihaṃgamāya ca |
piṃgacipiṃgarājyaṃ tu piṃgakeśāya dīyate || 68 ||
[Analyze grammar]

maṃgūbhūmirdāyate ca āhavamaṃgalāya tu |
mañcuraṇo'rpyate prabhākirīṭāya pradeśakaḥ || 69 ||
[Analyze grammar]

lāśahākhyapradeśaśca trītarṣaye pradīyate |
trītavittetināmnā ca prasiddhaṃ rājyamastu tat || 70 ||
[Analyze grammar]

ṛṣirājyaṃ bhavatvetad vasantu tatra cāruṇāḥ |
chāyāśarīrarūpāśca brahmātmajñānavedinaḥ || 71 ||
[Analyze grammar]

kārurājyaṃ dīyate ca kūrmiṇe tu maharṣaye |
ṛṣirājyaṃ tadapyastu vaiṣṇavaṃ pāvanaṃ sadā || 72 ||
[Analyze grammar]

ilādeśasya vai rājya svayaṃ brahmā karotu ca |
brahmadeśaḥ sadā cā'stu tīrthaṃ cairāvatī nadī || 73 ||
[Analyze grammar]

pannāmanadikābhūmiṃ viṣṇuḥ praśāstu sarvadā |
śyāmadeśo brahmapūrve pannāmnītīrthamastu ca || 74 ||
[Analyze grammar]

prākcayanākhyabhūmeśca rakṣako'stu śivaḥ sadā |
vināyakāśca prācīnarakṣakāḥ santu tatparāḥ || 75 ||
[Analyze grammar]

aṃgaśikṣāṃgadeśānāṃ rājā'pi śaṃkaraḥ svayam |
svagaṇaiḥ saharājyaṃ tacchāstu prācīnadakṣiṇam || 76 ||
[Analyze grammar]

sumātṛke pradeśe ca tiṣṭhantu mātaraḥ sadā |
śivasatyo rakṣaṇārthaṃ sāmudradaityanāśikāḥ || 77 ||
[Analyze grammar]

evametāni rājyāni bhavantu vaiṣṇavāni vai |
iṭyevaṃ rādhike kṛṣṇanārāyaṇena bhāṣitam || 78 ||
[Analyze grammar]

brahmā ca pradadau tasmai tasmai rājyakirīṭakam |
harirdadau svayaṃ cāpi viṣṇave'jāya śaṃbhave || 79 ||
[Analyze grammar]

tilakaṃ kaisaraṃ kṛtvā kaṇṭhīṃ mālāṃ ca taulasīm |
nūtanebhyaśca pradadau bālakṛṣṇaḥ svayaṃ tadā || 80 ||
[Analyze grammar]

athā''ha ca haristebhyo rājabhyo hitakṛdvacaḥ |
guravo'pi mayā vo'tra dīyante bhaktihetave || 81 ||
[Analyze grammar]

karvarījalapānānāṃ guruḥ kūrmīti vai ṛṣiḥ |
prācīnānāṃ philīpānānāṃ guruḥ śaṃbhurmaheśvaraḥ || 82 ||
[Analyze grammar]

prācīnottarabhāgānāṃ guruḥ prācīnabarhaṇaḥ |
śyāmalānāṃ cipiṃgānāṃ guruḥ śyāmalako muniḥ || 83 ||
[Analyze grammar]

malayānāṃ malayarṣirilāyā brahmadāsakaḥ |
lāśahānāṃ gurustrīto lūśānāṃ lūśayastathā || 84 ||
[Analyze grammar]

vāraṇānāṃ mātaraśca gurvyo bodhyāḥ ṛṣipriyāḥ |
ārdramānagururbrahmā brāhmāṇāmapi viśvasṛṭ || 85 ||
[Analyze grammar]

maṃgūjānāṃ maṃkaṇako gurustaddeśavāsinām |
maṃcūrāṇāṃ prajādīnāṃ maṃkirayo gururmataḥ || 86 ||
[Analyze grammar]

bhūtānāṃ tu prabhūtānaḥ pannāmānāmanāmayaḥ |
prākcayanapradeśānāṃ cayanarṣirgururmataḥ || 87 ||
[Analyze grammar]

aṃgaśikṣāṃgadeśānāmaṃgaśyāmalako guruḥ |
ārākāṇāmārakarṇaḥ khasīnānāṃ tu khāsanaḥ || 88 ||
[Analyze grammar]

ete taddeśarājānāṃ prajānāṃ guravaḥ sadā |
maharṣayo mayā dattā mahābhāgavatottamāḥ || 89 ||
[Analyze grammar]

svīcakruste'pi rājāno vaiṣṇavā vaiṣṇavān gurūn |
harṣaṃ prāpuśca te sarve ṛṣayo bhūbhṛtaḥ prajāḥ || 90 ||
[Analyze grammar]

atha śrībhagavān bhaktahṛdayajñaḥ prajā''rttihā |
abjarūpadharo bhūtvā mimile sarvadehinaḥ || 91 ||
[Analyze grammar]

caraṇau pradadau sarvavakṣassu cihnaśobhitau |
aṣṭakoṇaścordhvarekhā svastiko yavavajrakau || 92 ||
[Analyze grammar]

jāmbūphalaṃ dhvajoṃ'kuśaḥ padmaṃ dakṣapade'bhavan |
trikoṇaḥ kalaśaścāpi goṣpadaṃ ca dhanuṣyakam || 93 ||
[Analyze grammar]

mīnā'rdhacandrakau vyoma vāme tu caraṇe'bhavan |
kacchapaśca garuḍaśca śikharaṃ karihaṃsakau || 94 ||
[Analyze grammar]

vimānaṃ sūryamevaite pādagrantheradho'bhavan |
dakṣe pade harestatra ghuṭikā'ḍguṣṭhadigbhavā || 95 ||
[Analyze grammar]

vāme tu ghuṭikānimne lakṣmīḥ saudhaṃ drumaśca gauḥ |
siṃhāsanaṃ ca pañcaite pade samabhavan hareḥ || 96 ||
[Analyze grammar]

atha mīnadhvajadhanuścakrasvastikaśūlinam |
padmabāṇadaṇḍayutaṃ dakṣaṃ karaṃ tu siddhidam || 97 ||
[Analyze grammar]

nirbhayacakrasahitaṃ śrīrekhaṃ samayūrakam |
vaṃśīcihnaṃ kalpavallīyutaṃ cā'śvavṛṣānvitam || 98 ||
[Analyze grammar]

vāmaṃ karaṃ tu śubhadaṃ kṛtvā dvayostadā'ñjalim |
prajānāṃ ca nṛpādīnāṃ pradadau mūrddhasu prabhuḥ || 99 ||
[Analyze grammar]

mudrikāḥ kalpaphaladāḥ pradadau pratimānavam |
kalpamūrtiṃ nijāṃ pūjākarmaṇe pradadau prabhuḥ || 100 ||
[Analyze grammar]

annavastrarddhibāhulyaṃ pradadāvāśiṣastathā |
dadau divyaṃ darśanaṃ ca paradhāmavirājitam || 101 ||
[Analyze grammar]

rādhike kṛpayā yatra prasannaḥ parameśvaraḥ |
tatra triguṇajīvānāṃ samo lābho harerbhavet || 102 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne prāgjyotiṣādideśānāṃ vaiṣṇavanṛpavyavasthā ṛṣivyavasthā kṛpāvarṣaṇaṃ divyadarśanaṃ cetyādinirūpaṇanāmā |
daśādhikaśatatamo'dhyāyaḥ || 110 ||
[Analyze grammar]