Chapter 69

śrīrādhikovāca |
kathaṃ kṛṣṇa tava sevā kartavyā''rādhanā tathā |
kenā'rcanena te kṛṣṇa prītiḥ samupajāyate || 1 ||
[Analyze grammar]

kāni dānāni deyāni prīṇanāya harestava |
kāni puṇyāni śastāni kṛṣṇatuṣṭikarāṇi ca || 2 ||
[Analyze grammar]

śrīkṛṣṇa uvāca |
sarvadānāni śastāni śrīkṛṣṇasya pratuṣṭaye |
bhaktyā samarcanenā'yaṃ śrīkṛṣṇaḥ parituṣyati || 3 ||
[Analyze grammar]

yapsveṣṭaṃ tatpradeya vai kṛṣṇāya prīṇanārthakam |
puṇyaṃ tatrā'rpaṇaṃ sarva kṛṣṇatuṣṭikaraṃ priye || 4 ||
[Analyze grammar]

śraddadhānairbhaktiparaiḥ samuddiśya śriyaḥ patim |
dīyante yāni dānāni tāni yānti na vai kṣayam || 5 ||
[Analyze grammar]

tā eva tithayaḥ śreṣṭhā yatra kṛṣṇo hyavāpyate |
yāsu satāṃ kṛtā sevā tadnyāstithayo'dhamāḥ || 6 ||
[Analyze grammar]

pūjiteṣu ca sādhuṣu pūjitaḥ parameśvaraḥ |
yastān dveṣṭi sa hīnātmā hīnāṃ yoniṃ prayāti ca || 7 ||
[Analyze grammar]

sato'rcayan jano bhaktyā nārī vā kṛṣṇatatparā |
māmakī sā tanuścāsti hyahaṃ vaiṣṇavadehavān || 8 ||
[Analyze grammar]

sādhavo nā'vamantavyā budho vā'pyabudhā api |
santo divyāstanavo me tatastānarcayet sadā || 9 ||
[Analyze grammar]

karmaṇā manasā vācā'rpaṇena sevayā'pi vā |
bhojanenā'rcanenāpi santoṣaṇīyāḥ sādhavaḥ || 10 ||
[Analyze grammar]

prātarutthāya māṃ smṛtvā snātvā ca śubhavastubhiḥ |
manmūrteḥ pūjanaṃ kuryāt satāṃ sevā hi pūjanam || 11 ||
[Analyze grammar]

ārādhanā tu me bhaktirdāsyaṃ śreṣṭhaṃ sadā'dhikam |
dhyānaṃ me mama sādhūnāṃ kartavyaṃ mokṣahetave || 12 ||
[Analyze grammar]

pādasaṃvāhanaṃ kāryaṃ sādhūnāṃ sarvadā priye |
tadindriyeṣvahaṃ tvasmi tattuṣṭau toṣaṇaṃ mama || 13 ||
[Analyze grammar]

rasagandhayutaiḥ puṣpaiḥ pūjanīyāsta eva tu |
campakaḥ kunda āmraśca dhavalaḥ khadirastathā || 14 ||
[Analyze grammar]

śatagoṭastathā'śoko bakulaḥ karavīrakaḥ |
tilakaśca japā jātī yūthikā padminī tathā || 15 ||
[Analyze grammar]

kamalī sthalapadmā ca tulasī kaumudī tathā |
sūryamukhī cammilikā pārijātaḥ sukesaraḥ || 16 ||
[Analyze grammar]

ketako hāraśṛṃgāraḥ kadambo devadārukaḥ |
sarjataruḥ kalpavallī caitatpuṣpāṇi rādhike || 17 ||
[Analyze grammar]

pūjāyāṃ me pradeyāni varjayitvā tu ketakīm |
bilvapatraṃ śamīpatraṃ bhṛṃgapatraṃ ca taulasam || 18 ||
[Analyze grammar]

tamālamālatīpatraṃ praśastaṃ mama pūjane |
vīrudhāṃ supravālaiśca darbhaiḥ samarcayecca mām || 19 ||
[Analyze grammar]

pravālairbīsatantvādyairdurvāṅkuraiḥ samarcayet |
kuḍmalaiścandanaiḥ kuṃkumośīrakesaraistathā || 20 ||
[Analyze grammar]

sugandhakāṣṭhadhūpaiśca pṛṇomyahaṃ sadā priye |
haviṣā saṃskṛtā ye ca yavagodhūmaśālayaḥ || 21 ||
[Analyze grammar]

tilamudgādayo māṣā vrīhayaśca priyā mama |
godānāni pavitrāṇi bhūmipradānakāni ca || 22 ||
[Analyze grammar]

vastrānnasvarṇadānāni prītaye mama rādhike |
māghe tilāścendhanāni deyāni priyatāṃ hariḥ || 23 ||
[Analyze grammar]

phālgune vrīhayo vastraṃ mṛgacarmādi śasyate |
caitre susūkṣmavastrāṇi śayanānyāsanāni ca || 24 ||
[Analyze grammar]

vaiśākhe gandhayuktāni deyāni surabhīṇi ca |
udakumbhāḍhyadhenuśca tālavṛntaḥ sucandanaḥ || 25 ||
[Analyze grammar]

deyāstena bhavetputro dhanaṃ bhāryā sutā ca gauḥ |
śṛṇuyācca kathā nityaṃ bhaktyā saṃpūjayeddharim || 26 ||
[Analyze grammar]

tasyā'śvamedhayajñasya dakṣiṇāsahitasya ca |
suvarṇabhūmidānasya'śvagonāgarathasya ca || 27 ||
[Analyze grammar]

dānasya puṇyamagryaṃ vai jāyeta nātra saṃśayaḥ |
nārī naraḥ pādamekaṃ kathāṃ yaḥ śṛṇuyāt hareḥ || 28 ||
[Analyze grammar]

sa śuciḥ puṇyavān loke sarvatīrthāśrito hi saḥ |
gaṃgāyāṃ naimiṣāraṇye puṣkare mānase tathā || 29 ||
[Analyze grammar]

nārāyaṇe'śvapaṭṭe ca kokāmukhe prayāgake |
māghe yatpuṇyamagryaṃ ca tat kathāśravaṇād bhavet || 30 ||
[Analyze grammar]

rājasūyaphalaṃ yacca svarge yacca mahat phalam |
bhūmiloke phalaṃ yattat kathāyāḥ śravaṇād bhavet || 31 ||
[Analyze grammar]

sautrāmaṇeḥ phalaṃ yacca miṣṭānnadānajaṃ ca yat |
sūryacandragrahe ratnapradānasya ca yatphalam || 32 ||
[Analyze grammar]

durbhikṣe rakṣaṇād yacca phalaṃ jñāterjanasya ca |
devāgnisādhuviprāṇāṃ pālane rakṣaṇe ca yat || 33 ||
[Analyze grammar]

pitroḥ śvaśurayoḥ sevādharme bhrātuśca yatphalam |
jyeṣṭhe'patyau gavi sevājanyaṃ yacca phalaṃ bhavet || 34 ||
[Analyze grammar]

tatphalaṃ rādhike me'tra kathāyāḥ śravaṇe bhavet |
upānadyugalaṃ chatraṃ lavaṇāmalakādikam || 35 ||
[Analyze grammar]

jyeṣṭhe jalaṃ praśītaṃ ca sūkṣmāmbaraṃ ca takrakam |
dadhi copānahau chatraṃ deyaṃ me prītaye priye || 36 ||
[Analyze grammar]

āṣāḍhe vyajanaṃ dugdhaṃ śarkarā cāmbarāṇi ca |
deyāni rādhike yānaṃ vāhanāni harergṛhe || 37 ||
[Analyze grammar]

śrāvaṇe sarvadānāni dadyānmatprītaye priye |
annavastropakaraṇarasādīni samantataḥ || 38 ||
[Analyze grammar]

bhādre dadyātpāyasāni lavaṇaṃ saguḍaudanam |
navakaṇāṃstathā me prītaye ca madhusarpiṣī || 39 ||
[Analyze grammar]

āśvine navadhānyāni vṛṣaṃ cāśvaṃ suvarṇakam |
tāmrapātrāṇi vastrāṇi dīpādīni samarpayet || 40 ||
[Analyze grammar]

kārtike svarṇarajate maṇimuktāphalādikam |
dīpān navānnamiṣṭānnaṃ dadyādvai prītaye mama || 41 ||
[Analyze grammar]

mārgaśīrṣe vāhanāni kharoṣṭrā'śvatarān dadet |
nāgānajāvikān gantrīṃ śakaṭān prītaye mama || 42 ||
[Analyze grammar]

pauṣe deyaṃ prabhaktyā ca gṛhaprāvaraṇādikam |
prāsādanagarādīni cānnaṃ ṣaḍrasasaṃyutam || 43 ||
[Analyze grammar]

dāsīdāsamalaṃkārān dadyādvai mama tuṣṭaye |
yadyadiṣṭatamaṃ kiñcit yacchakyaṃ ca gṛhe śuci || 44 ||
[Analyze grammar]

puruṣottamatuṣṭyarthaṃ deyaṃ tat sārvakāmikam |
yaḥ kārayet śrīkṛṣṇasya mandiraṃ so'kṣaraṃ vrajet || 45 ||
[Analyze grammar]

dadetpuṣpaphalāḍhyāṃścārāmān yaḥ so'kṣaraṃ vrajet |
pūrvajāni paścimāni kulānyaṣṭotarāṇi saḥ || 46 ||
[Analyze grammar]

tārayedātmanā sārdhaṃ viṣṇormandirakārakaḥ |
imāśca pitaro devā gāthā gāyanti sādhavaḥ || 47 ||
[Analyze grammar]

api naḥ svakule kaścit kṛṣṇabhakto bhaviṣyati |
harermandirakartā yaḥ sukhaṃ dāsyati no hi saḥ || 48 ||
[Analyze grammar]

api naḥ santatā syād vai kṛṣṇālayavilepakaḥ |
mandire mārjanakartā bhakto yenoddhṛtā vayam || 49 ||
[Analyze grammar]

api naḥ santatau jāto dhvajaṃ śrīkṛṣṇamandire |
dāsyati ca pradīpaṃ sudhūpaṃ puṣpānulepanam || 50 ||
[Analyze grammar]

api naḥ sa kule bhūyādekādṛśyāṃ kariṣyati |
udyāpanaṃ mama pūjāmupavāsaṃ ca dānakam || 51 ||
[Analyze grammar]

mahāpātakayukto'pi kṛṣṇāvasathacitrakṛt |
vimuktapāpo bhavati dhanyaṃ janmā'sya yo'sti me || 52 ||
[Analyze grammar]

dhanyo rājā manuḥ pūrvo yo loke mānavān vṛṣān |
pravartayāmāsa nityaṃ viṣṇubhaktiparān parān || 53 ||
[Analyze grammar]

kuṃkumavāpikākṣetre devālayānakārayat |
vibhūtibhiḥ śrīkṛṣṇasya nārāyaṇasya cālayān || 54 ||
[Analyze grammar]

citrayāmāsa śucibhiḥ pañcavarṇaiḥ sucitrakaiḥ |
dīpapātrāṇi satataṃ kṛṣṇanārāyaṇālaye || 55 ||
[Analyze grammar]

sauvarṇāni ca pātrāṇi ghṛtapātrāṇi vai dadau |
nānāvarṇā vaijayantīrmālā hārān dadau mudā || 56 ||
[Analyze grammar]

srajaśca kaṇṭhikā divyā mahāraṃjanarañjitāḥ |
mañjiṣṭhā navaraṃgīyāḥ śvetapāṭalikāśritāḥ || 57 ||
[Analyze grammar]

ārāmān vividhān ramyān puṣpāḍhyān phalaśālinaḥ |
latāpallavasaṃkhyāptān devadārubhirāvṛtān || 58 ||
[Analyze grammar]

hradān manoharān divyāsanakuṃjavirājitān |
kārayāmāsa parito mandirāya dadau ca tān || 59 ||
[Analyze grammar]

mañcānalaṃkṛtāṃsteṣu kuśalaiḥ samadhiṣṭhitān |
gandharvavidyārāgajñaiḥ ratnajaḍitakāsanān || 60 ||
[Analyze grammar]

kārayāmāsa subhagān divyān devālayopamān |
yeṣu nityaṃ prapūjyante yatayo brahmacāriṇaḥ || 61 ||
[Analyze grammar]

śrotriyā vipravaryāśca ṛṣayaḥ sādhavo'malāḥ |
satyaḥ sādhvyaḥ sāṃkhyayoginyaśca brahmaparāḥ striyaḥ || 62 ||
[Analyze grammar]

itthaṃ tenaiva manunā kṛtā kṛṣṇanarāyaṇe |
bhaktiśca bhāryayā sārdhaṃ yayāvante hareḥ padam || 63 ||
[Analyze grammar]

evaṃ rājā jyāmagho'pi kṛtavān manuvad bhuvi |
pareśasya parāṃ bhaktiṃ yayau brahmapadaṃ param || 64 ||
[Analyze grammar]

tasmādvai rādhike tvaṃ ca kuru devālayaṃ mama |
māmarcayasva yatnena sādhūn sādhvīrmadāśritāḥ || 65 ||
[Analyze grammar]

sadācārān kathāvaktṝn lokakalyāṇakārakān |
mama bhaktipradān samyaksaṃprapūjaya rādhike || 66 ||
[Analyze grammar]

vāsobhirbhūṣaṇaiḥ ratnairgobhirbhūkanakādibhiḥ |
bhojanairjalapānādyairaṃgasaṃvāhanādibhiḥ || 67 ||
[Analyze grammar]

vibhave sati devasya prīṇanaṃ kuru sarvathā |
ityuktā rādhikā cāpi kṛṣṇadevālayaṃ param || 68 ||
[Analyze grammar]

kārayāmāsa goloke mandiraṃ candraśobhanam |
anādiśrīkṛṣṇanārāyaṇasya pratimāṃ śubhām || 69 ||
[Analyze grammar]

sampratiṣṭhāpya ca rādhā cakāra sevanādikam |
sammārjanaṃ lepanaṃ ca śṛṃgāraṃ bhojanādikam || 70 ||
[Analyze grammar]

śarkarādipradānaṃ ca dīpaṃ dhūpaṃ pradakṣiṇam |
nīrājanaṃ cotsavaṃ ca cakāra rādhikā svayam || 71 ||
[Analyze grammar]

āyatākṣī pātrasammārjanaṃ kṛṣṇālaye'karot |
gītaṃ ca kīrtanaṃ cāpi svayaṃ rādhā hyavākarot || 72 ||
[Analyze grammar]

evaṃ rādhā'karod bhaktiṃ patyurvākyena sarvadā |
patyurvākyaṃ vṛddhavākyaṃ satī cet prakaroti vai || 73 ||
[Analyze grammar]

duruktaṃ vā samuktaṃ vā snigdhaṃ tad ghṛtavad bhavet |
āpadbhujaṃgadaṣṭasya mantrahīnasya sarvathā || 74 ||
[Analyze grammar]

vṛddhavākyaiṣadhānyeva kurvanti viṣaśūnyatām |
vṛddhavākyāmṛtaṃ pītvā taduktānyanumanya ca || 75 ||
[Analyze grammar]

yā tṛptirjāyate puṃsāṃ somapāne na vai tathā |
yeṣāṃ vṛddhā na śāstāraste jīvanto'pi vai mṛtāḥ || 76 ||
[Analyze grammar]

śocyāsta eva naṣṭāśca bhaviṣyanti pade pade |
āpadgrāhagṛhītānāṃ vṛddhā yatra na mārgadāḥ || 77 ||
[Analyze grammar]

na vā mocayitāraśca teṣāṃ śāntirna vidyate |
āpatsamudramagnānāṃ majjatāṃ vyasanormiṣu || 78 ||
[Analyze grammar]

vṛddhavākyairvinā teṣāmuddhāro na kathaṃcana |
tasmād yo vṛddhavākyāni śṛṇuyād vidadhāti vā || 79 ||
[Analyze grammar]

sa sadyaḥ siddhimāpnoti vṛddhāśīrbhiḥ punaḥ punaḥ |
rādhike yena tuṣṭaḥ syāṃ tathā kāryaṃ tvayā sadā || 80 ||
[Analyze grammar]

ahaṃ dhyāyāmi me mūlasvarūpaṃ puruṣottamam |
māṃ dhyāyanti kapilādyāḥ kapilaṃ mānavāḥ pare || 81 ||
[Analyze grammar]

vāsudevādayo vyūhā dhyāyanti puruṣottamam |
vāsudevaṃ vikuṇṭhastho dhyāyatyapi narāyaṇaḥ || 82 ||
[Analyze grammar]

nārāyaṇaṃ dhyāyati śrīviṣṇurviṣṇuṃ prajājanaḥ |
evaṃ pravartitaṃ dhyānaṃ guroḥ paramparāgatam || 83 ||
[Analyze grammar]

gurau viṣṇurvartate ca viṣṇau bhūmā virājate |
bhūmni bṛhad bṛhatyeva parabrahma virājate || 84 ||
[Analyze grammar]

evaṃ svātmavicāreṇa dhyāyet kṛṣṇanarāyaṇam |
seveta taṃ pareśānaṃ vandetā''rādhayedapi || 85 ||
[Analyze grammar]

sarvaṃ samarpayedasmai parātmane'ntarātmane |
māyikātmā'ntarātmāno yogena syāt parātmavān || 86 ||
[Analyze grammar]

māyāyāṃ sthitajīvasya dīrghakālena tadguṇāḥ |
māyākṛtā bhavantyasya kāmakrodhādayo malāḥ || 87 ||
[Analyze grammar]

janmajanmāntarā''yātāstairmalino'yamucyate |
svabhāvo māyayā vyāpto bahujanmagateṣvapi || 88 ||
[Analyze grammar]

anvavartata ātmānaṃ satāṃ yogena jīryati |
parameśāśrayeṇāpi jīryatyeva tataḥ prabhoḥ || 89 ||
[Analyze grammar]

kṛpayā mokṣamārgasya bhaktyātmakasya cārjanam |
tena yāti parabrahma jyāmaghastu yayau yathā || 90 ||
[Analyze grammar]

paṭhanācchravaṇāccāsya smaraṇācchrāvaṇādapi |
svargamokṣau bhavetāṃ vai rādhike nātra saṃśayaḥ || 91 ||
[Analyze grammar]

yathā rādhā tathā nārī kṛṣṇasaubhāgyamāpnuyāt |
yathā ca garuḍastadvannaro dāsyamavāpnuyāt || 92 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne prabhoḥ sevā'rcanadānapūjādiphalamāhātmyādinirūpaṇanāmā navādhikaṣaṣṭitamo'dhyāyaḥ || 69 ||
[Analyze grammar]