Chapter 33

śrīkṛṣṇa uvāca |
caturthe vatsare bhādrapade'ṣṭamyā dine kṛtam |
rādhike śrīharikṛṣṇacaritraṃ kathayāmi te || 1 ||
[Analyze grammar]

kuṃkumavāpikānāryaḥ kanyakāścāpi koṭiśaḥ |
vrataṃ ca ṛṣipañcamyāścakrurvai ṛṣipūjanam || 2 ||
[Analyze grammar]

rājasvalyasthitau sparśadoṣasaṃsargahānaye |
vratāṃgaṃ pūjanaṃ dānaṃ cakruḥ sarvāstataḥ param || 3 ||
[Analyze grammar]

ṣaṣṭhyāṃ gaurīvrataṃ cakrurāvāhya pupujuśca tām |
saptamyāṃ bhojayāmāsuḥ pāyasādinivedanaiḥ || 4 ||
[Analyze grammar]

aṣṭamyāṃ dūrvayā gaurīṃ pūjayāmāsureva ca |
aṣṭavarṣīyakanyānāṃ gaurīrūpeṇa pūjanam || 5 ||
[Analyze grammar]

candanādyaiḥ kuṃkumādyairakṣatādyaiḥ sugandhibhiḥ |
śṛṃgārairvividhairvastrairalaṃkārairvibhūṣaṇaiḥ || 6 ||
[Analyze grammar]

phalaiḥ puṣpaiśca miṣṭānnaiḥ pānaistāmbūlakaistathā |
iṣṭavastupradānaiśca cakrurnīrājanādikam || 7 ||
[Analyze grammar]

gītaṃ nṛtyaṃ tathā cakruratha gaurīvisarjanam |
kartuṃ sarvāḥ striyaḥ kanyā yayuścāśvasarovaram || 8 ||
[Analyze grammar]

gauryāḥ pratimā sarvābhirvṛtā skandheṣu pārthivī |
sarvaśṛṃgāraśobhāḍhyā divyakesaripṛṣṭhagā || 9 ||
[Analyze grammar]

divyāyāṃ śibikāyāṃ ca dhṛtā cāmaracchatriṇī |
evaṃ nītvā pratimāṃ śrīgaurīṃ gāyanti yoṣitaḥ || 10 ||
[Analyze grammar]

vāditrāṇāṃ ninādāśca bhavantyutsavabodhakāḥ |
darśakāśca narā nāryo yayuḥ sahasraśaśca tām || 11 ||
[Analyze grammar]

gaurīṃ cānte vīkṣituṃ vai tvaśvapaṭṭottare taṭe |
yayau sākaṃ gopikābhiḥ kambharāśrīrhareḥ prasūḥ || 12 ||
[Analyze grammar]

hariṃ bālaṃ saha nītvā gaurīvisarjanotsave |
tīre gatvā striyo gaurīṃ sthāpayāmāsurutsukāḥ || 13 ||
[Analyze grammar]

nāvyāropya tadā pūjāṃ pracakruḥ prārthanāṃ tathā |
anādiśrīkṛṣṇanārāyaṇaḥ śaṃkaravattu naḥ || 14 ||
[Analyze grammar]

taveva kāntimān kānto bhūyāditi prasīda naḥ |
evaṃ samprārthya ca puṣpāñjaliṃ dadustataḥ param || 15 ||
[Analyze grammar]

vāditrāṇāṃ ninādeṣu cakrurjale visarjanam |
jayaśabdāstadā svargadvāramāsādya yoṣitām || 16 ||
[Analyze grammar]

devān saṃharṣayāmāsuḥ pitṝṃścarṣivarāṃstathā |
kṛte visarjane gauryāścamatkāro'bhavattadā || 17 ||
[Analyze grammar]

vyāghraḥ kaścinmahāpuṣṭo vaṭavṛkṣocchrayāyataḥ |
akasmādāgatastatra yatra śrībālakṛṣṇakaḥ || 18 ||
[Analyze grammar]

netre prasphārya ca mukhaṃ vyādāya vāsanāṃ sṛjan |
karṇāvutthāpya pucchaṃ ca dhunvan romāṇi carma ca || 19 ||
[Analyze grammar]

krodhaṃ pradarśayan pūrvapādāgreṇa mahīṃ likhan |
kūrdanaṃ kṛtavān śīghraṃ dhartuṃ śrībālakṛṣṇakam || 20 ||
[Analyze grammar]

stabdhāḥ sarvā narā nāryo niśceṣṭā bhītito'bhavan |
garjanayā'ntarīkṣaṃ ca kampamānaṃ tadā'bhavat || 21 ||
[Analyze grammar]

vṛkṣāścakampire vāyuḥ kṣaṇaṃ nirgatiko'bhavat |
kṣitiḥ kampamayī jātā hṛdayāni cakampire || 22 ||
[Analyze grammar]

hāhākāro mahān jāto vyāghre cotpatite tadā |
dudruvuḥ parito lokā mṛpyurūpavilokanāḥ || 23 ||
[Analyze grammar]

mātā tu kambharālakṣmīḥ prāha gaurī prarakṣatu |
anyāśca kanyakāstatra cakrurvai niyamaṃ tadā || 24 ||
[Analyze grammar]

rakṣite kṛṣṇakānte'tra pūjāṃ kurmo niśāmukhe |
gauryāścāpi ca durgāyāḥ punaḥ sarvopacārakaiḥ || 25 ||
[Analyze grammar]

ityevaṃ niyamaṃ cakrurjepurvai śrīnarāyaṇam |
tasthurnetre karābhyāṃ ca prāvṛtya draṣṭumakṣamāḥ || 26 ||
[Analyze grammar]

śrīrādhikovāca |
ka āsīt sa mahāvyāghraḥ sāyaṃ kasmāt samāgataḥ |
anyān tyaktvā hi taṃ bālaṃ dhartumeva samudyataḥ || 27 ||
[Analyze grammar]

śrīkṛṣṇa uvāca |
raktadeśajaścāsīt śāvadīnasya cānujaḥ |
mleccho vai rākṣaso bhrāturvairaniryātanecchukaḥ || 28 ||
[Analyze grammar]

kāmarūpadharo vyomni jale pragatimānapi |
araṇye'pi kṛtāvāso vyāghrāyate kvacit kvacit || 29 ||
[Analyze grammar]

janāyate manuṣyeṣu pakṣiṣu vihagāyate |
evaṃvidho hi malino malināśaya eva saḥ || 30 ||
[Analyze grammar]

yadā śrīhariṇā tasya bhrātā cāraktadeśake |
hatastadā samudre'yaṃ gata āsīt pravāsakṛt || 31 ||
[Analyze grammar]

abriktadeśe sarito nāvilāyāstaṭādati |
viprakṛṣṭe sthale kretuṃ suvarṇādikhanimṛdaḥ || 32 ||
[Analyze grammar]

svarṇamṛdaḥ samādāya svagṛhaṃ sa samāgataḥ |
śrutavān svāgrajamṛtyuṃ kanyānāṃ haraṇādikam || 33 ||
[Analyze grammar]

gurormṛtyuṃ viplavaṃ ca rājyaṃ jallāvaśaṃ tathā |
bālotsavād vaiparītyaṃ balyutsave'pyanarthadam || 34 ||
[Analyze grammar]

vilokya vaiśasaṃ sarvaṃ cukrodhātiśuśoca ha |
rājyaṃ sainyaṃ vyomagatirgururdevī yatiprathāḥ || 35 ||
[Analyze grammar]

samartheṣu satsu nāśo balīyo bhālalekhanam |
samarthe bhrātari dravye vipule'bdhiprarakṣite || 36 ||
[Analyze grammar]

deśe bhaṭairyute nāśo gṛhe eveti śocanam |
asainyo'pi samāgatya hatvā videśajo janaḥ || 37 ||
[Analyze grammar]

pakṣiṇā nāśayitvā cākṣatasya tasya sarvathā |
kanyakāmātṛharaṇaṃ yatkāryaṃ taddhi śocanam || 38 ||
[Analyze grammar]

aho śrutvā na me mṛtyurna vā śauryaṃ pravardhate |
kiṃ vṛthā jīvanenaivaṃ parābhūtasya dehinaḥ || 39 ||
[Analyze grammar]

ghātayiṣyāmi taṃ śatrumānayiṣyāmi putrikāḥ |
yadvā prāṇān pradāsyāmi dhigbalaṃ yad vṛthābalam || 40 ||
[Analyze grammar]

vicintyaivaṃ svarṇanāvaṃ parityajya gṛhādikam |
saha nītvā janān naijān bahurūpadharān yatīn || 41 ||
[Analyze grammar]

saurāṣṭre cāyayau hantuṃ kṛṣṇanārāyaṇaṃ prabhum |
kuṃkumavāpikākṣetraṃ cāśvapaṭṭasarovaram || 42 ||
[Analyze grammar]

viśālaṃ ca dadarśā'sau lomaśasyā''śramaṃ śubham |
sarvaṃ dadarśa ca muhuśchidraṃ hantuṃ samīkṣate || 43 ||
[Analyze grammar]

nityaṃ carati drugulme vasatyapi drumeṣu ca |
sagaṇo bhramati kṣetre naikarūpadharaḥ khalu || 44 ||
[Analyze grammar]

tatra kecana vṛkṣeṣu kākāyante kvacit kvacit |
gṛdhrāyante tathā cānye vṛkāyante saro'ntike || 45 ||
[Analyze grammar]

śukāyante cāpare tu gavāyante tathetare |
kecittu vṛṣabhāyante mārjārāyanta ityapi || 46 ||
[Analyze grammar]

maśakāyante kecicca chidraṃ draṣṭuṃ punaḥ punaḥ |
labdhuṃ cā'vasaraṃ hantuṃ kṛṣṇanārāyaṇaprabhum || 47 ||
[Analyze grammar]

mīnāyante jale tvanye bālāyante ca kecana |
kanyārūpadharāścānye bhavante tatsahāyinaḥ || 48 ||
[Analyze grammar]

evaṃ kṛte'pi kṛṣṇaṃ taṃ hantuṃ chidraṃ na cā''pnuvan |
tadā nirāśāḥ satataṃ bhūtvā rājānujaṃ krudhā || 49 ||
[Analyze grammar]

prāhurnaiva hi labhyeta chidraṃ varṣaśatairapi |
tasmāt prasahya hantavyo yadbhavet tadbhavediti || 50 ||
[Analyze grammar]

evaṃ tu saṃvidaṃ kṛtvā tvāyayuḥ sarasastaṭe |
śataṃ vīrā militvaiva hanmastaṃ rājaghātinam || 511 ||
[Analyze grammar]

ekaikena kramād bhāvyaṃ vyāghrarūpeṇa vai śanaiḥ |
prathamaṃ kanyakārūpairviśantu strījaneṣu hi || 52 ||
[Analyze grammar]

ityevaṃ tu śataṃ kanyāḥ kanyāsu viviśustadā |
hantuṃ śrībālakṛṣṇaṃ taṃ sandhyāyāṃ krūravṛttayaḥ || 53 ||
[Analyze grammar]

dṛṣṭvā hantuṃ susāralyaṃ strīṣu madhye narāyaṇam |
ekalaṃ cā'rakṣakaṃ ca matvā rājā'nujaḥ svayam || 54 ||
[Analyze grammar]

vairaniryātanārthāya vyāghraḥ sa prathamo'bhavat |
utplutya bālakaṃ kṛṣṇaṃ yāvaddhartuṃ gato'suraḥ || 65 ||
[Analyze grammar]

tāvat kṛṣṇaḥ svayaṃ tatra śarabho'bhūjjanārdanaḥ |
jagrāha vyāghrarūpaṃ taṃ vallīdīnaṃ nṛpānujam || 66 ||
[Analyze grammar]

gale dhṛtvā harirvyāpādayāmāsā'suraṃ drutam |
jayaśabdā harestatrā'bhavan puṣpapravarṣaṇam || 57 ||
[Analyze grammar]

devaiḥ kṛtaṃ duḥkhahānaṃ strībhiḥ śiro'vatāritam |
śāvadīnā mahākālī kanyā gaurīsvarūpiṇī || 58 ||
[Analyze grammar]

svayaṃ śarabhacaraṇe samāgatya nanāma tam |
bhagavāṃstu tadā bālo'bhavat strīṣu yathā purā || 19 ||
[Analyze grammar]

vyāghro vyāghrān samutpādya tato mamāra tatra ha |
tattīrthaṃ śārabhaṃ tatra jātamaśvasarovare || 60 ||
[Analyze grammar]

yatra snātaṃ ca kṛṣṇena hatvā taṃ tvasuraṃ tadā |
atha devī mahākālī kṛṣṇaṃ tuṣṭāva kiṃkarī || 61 ||
[Analyze grammar]

mayā jñātaṃ na bhagavan vighnaṃ te yadupasthitam |
kṣetrapālena na jñātaṃ kathaṃ kasmādidaṃ nviti || 62 ||
[Analyze grammar]

śrīhariḥ prāha subhage madicchā''sīttathāvidhā |
hantavyo'yaṃ mayā duṣṭo jānīyānna yathā satī || 63 ||
[Analyze grammar]

kṣetrapālo na jānīyāttathā kāryaṃ mayā yataḥ |
tvayā ca kṣetrapālena na jñātaṃ tatpraveśanam || 64 ||
[Analyze grammar]

idānīṃ paśyataṃ kanyāścaitāḥ śataṃ sunūtanāḥ |
tatsahāyā asurāste channarūpā bhavanti vai || 65 ||
[Analyze grammar]

hantuṃ māṃ tvāgatāste'tra kramād vyāghrabhavecchavaḥ |
hato'yamagraṇīstena trastāśchannā bhavanti te || 66 ||
[Analyze grammar]

devyā ca kṣetrapālena yāvad dṛṣṭāśca kanyakāḥ |
abhavan vyāghrarūpāste militā vyāghrajeṣu ca || 67 ||
[Analyze grammar]

devīṃ kanyā hariṃ hantumutpeturyugapattadā |
martavyaṃ vā māraṇīyāśceti kṛtvā viniścayam || 68 ||
[Analyze grammar]

tāvat kṛṣṇo yuddhaśaṃkhaṃ dadhmau śīghraṃ bhayaṃkaram |
siṃho devīvāhanaśca drāgeva prasamāgataḥ || 69 ||
[Analyze grammar]

vyāghrāṇāṃ ninadāstatra babhūvurviśvabhañjakāḥ |
vyāghrāraṇyaṃ samagraṃ tu ninādaiścābhipūritam || 70 ||
[Analyze grammar]

grahāḥ prakampire vṛkṣā bhūścacāla sarastathā |
siṃho'pi garjanāṃ cakre phenāni nyapatad bhuvi || 71 ||
[Analyze grammar]

uḍḍīyante sma ca vyomni phenajālāni garjanāt |
tebhya siṃhā vyajāyanta kṣaṇāt pañcaśatāni hi || 72 ||
[Analyze grammar]

siṃhān dṛṣṭvā balivyāghrāḥ kecit siṃhāstadā'bhavan |
siṃhānāṃ vai tadā tatra saṃgrāmo'bhūd bhayaṃkaraḥ || 73 ||
[Analyze grammar]

siṃhasainyobhayayośca ghātanaṃ mukhapannakhaiḥ |
āntrāṇāṃ karṣaṇaṃ kaṇṭhacoṣaṇaṃ bahvajāyata || 74 ||
[Analyze grammar]

nārī naiva hi hantavyā cetyabhūd dharmasaṃgaraḥ |
siṃhāḥ patanti saṃgrāme hanyante kṛtrimāśca te || 75 ||
[Analyze grammar]

mūlabhūtāstu hanyante śātravāḥ keśarāśrayāḥ |
nyūnā bhavanti saṃkhyāyāṃ mṛtāste sarvathā mṛtāḥ || 76 ||
[Analyze grammar]

vardhante ca tadā devīsiṃhā mṛtodbhavāḥ punaḥ |
vīkṣituṃ siṃhasaṃgrāmaṃ nṛsiṃho bhagavānapi || 77 ||
[Analyze grammar]

tvāyayau dhāmatastatra garjayan svargamaṇḍalam |
krośāt krośaṃ samutpatya vyomni yuddhyanti siṃhajāḥ || 78 ||
[Analyze grammar]

dadarśa bhagavāṃścāpi jagarjā'mbarasaṃsthitaḥ |
devīsiṃho yayau cābhi cakre svāgatamambare || 79 ||
[Analyze grammar]

siṃhajāstu tadā siṃhā nijaghnuḥ śeṣato'surān |
nipeturvyasavaḥ sarve mṛtāḥ śataṃ puro hareḥ || 80 ||
[Analyze grammar]

tadātmāno hareścānugrahācchrīnṛsiṃhātmani |
prayayurvilayaṃ tatra niṣpāpā kṣetrayogataḥ || 81 ||
[Analyze grammar]

kṛtrimāścā'kṛtrimāśca mṛtāste narasiṃhake |
layaṃ yātā yayurdhāmni nṛsiṃhena samaṃ tadā || 82 ||
[Analyze grammar]

ye devīsiṃhajāścānye śiṣṭāḥ phenodbhavā api |
śrīharistannivāsārthaṃ dadau dakṣiṇagaṃ vanam || 83 ||
[Analyze grammar]

siṃhāraṇyaṃ tu tajjātaṃ siṃhavāsamayaṃ sadā |
vaṃśastvavicalasteṣāṃ bhavediti harirdadau || 84 ||
[Analyze grammar]

varadānaṃ tathā bhojyaṃ vanyaṃ paśukulaṃ dadau |
atha vyāghro mṛto yaśca vallīdīnastadā tataḥ || 85 ||
[Analyze grammar]

jātā vyāghrā hyabhavan ye siṃharūpā'vidhārakāḥ |
hatā api mṛtā naiva tebhyo nārāyaṇaḥ prabhuḥ || 86 ||
[Analyze grammar]

stuvadbhyaḥ pradadau jīvadānaṃ svāsthyaṃ nirāmayam |
vāsāraṇyaṃ dadau nityaṃ vyāghrāraṇyaṃ tu taddhyabhūt || 87 ||
[Analyze grammar]

vyāghrāṇāṃ vanayogyānāṃ vaṃśāḥ siṃhairhi miśritāḥ |
vyāghrāraṇye tathā siṃhāraṇye syustaddharirdadau || 88 ||
[Analyze grammar]

varadānaṃ ca saurāṣṭre'raṇye vasanti te'niśam |
vyāghrāste cā'surā mlecchāḥ siṃhāstu daivikā hi te || 89 ||
[Analyze grammar]

evaṃ vasanti saurāṣṭre dakṣiṇāraṇyakeṣu vai |
aśvapaṭṭasarastīre siṃhavyāghramahāmṛdham || 90 ||
[Analyze grammar]

yatrā'bhūnnarasiṃhaśca vyomno yatrā''yayau tadā |
siṃhavyāghramahātīrthaṃ pāvanaṃ tatprakathyate || 91 ||
[Analyze grammar]

yuddhottaraṃ niśārambhe babhūva vṛṣṭiruttamā |
bhūtalaṃ svacchatāṃ prāptaṃ sarve svaṃ svaṃ gṛhaṃ yayuḥ || 92 ||
[Analyze grammar]

kanyakāstāstataścakrurvrataṃ pūjāṃ ca jāgaram |
durgāyāśca tathā gauryā kṛṣṇarakṣānimittakam || 93 ||
[Analyze grammar]

rātryante pūjitāṃ durgāṃ gaurīṃ kṣamāpya vai jale |
cakrurvisarjanaṃ durgāgauryostato hariṃ prati || 94 ||
[Analyze grammar]

yayuḥ sarvā darśanārthaṃ menire kṛtakṛtyatām |
atha dānāni dattvaiva sampūjya lomaśaṃ gurum || 95 ||
[Analyze grammar]

pitarau pūjayitvā ca cakrurvai pāraṇāṃ tataḥ |
yayau kālī svanilayaṃ siṃho'pyadṛśyatāṃ gataḥ || 96 ||
[Analyze grammar]

svasthaṃ cābhūttu saurāṣṭraṃ nirbhayaṃ rādhike tataḥ |
anādiśrīkṛṣṇanārāyaṇasyaiṣā camatkṛtiḥ || 97 ||
[Analyze grammar]

śrūyate paṭhyate yena tasya śreyaḥ paraṃ bhavet |
aihikaṃ cāpi saubhāgyaṃ bhavet santānatantujam || 98 ||
[Analyze grammar]

itiśrīlakṣmīnārāyaṇīyasaṃhitāyāṃ dvitīye tretāsantāne gaurīpūjanavisarjane vallīdīnākhyavyāghrāsurasya śatena vyāghrasiṃharūpadhāriṇā'suravrajena saha vināśanamityādinirūpaṇanāmā trayastriṃśattamo'dhyāyaḥ || 33 ||
[Analyze grammar]