Chapter 34

śrīkṛṣṇa uvāca |
ākarṇaya mahāprājñe rādhike pañcamābdikam |
camatkāraṃ kṛṣṇanārāyaṇasyā''tmā''tmanaḥ param || 1 ||
[Analyze grammar]

pañcame vatsare prāpte prabhorjanmotsavaṃ pitā |
kārayāmāsa vidhivat sarvadevaprapūjanam || 2 ||
[Analyze grammar]

gāndharvāṇāṃ samājaṃ ca yojayāmāsa gāyane |
maṇḍapaṃ kārayāmāsa sauvarṇāmbarabhūṣitam || 3 ||
[Analyze grammar]

naikaputtalikāśobhaṃ sarvadṛśyavirājitam |
viśvakarmā svayaṃ tatra racayāmāsa devatāḥ || 4 ||
[Analyze grammar]

mayaśca śambaraścāpi dadhatustatsahāyatām |
jale sthalyāḥ sthale cā'pāṃ pṛthvyāṃ cābdheśca darśanam || 5 ||
[Analyze grammar]

bhittau sabhāsadāṃ cāpi parṣadi yoṣitāṃ tathā |
vyomni starasya koṇeṣūdyānānāṃ darśanaṃ yathā || 6 ||
[Analyze grammar]

rājamārge nadīnāṃ ca niḥśreṇyāṃ gartadarśanam |
gopure dīrghakoṣṭhānāṃ koṣṭhe gopuradarśanam || 7 ||
[Analyze grammar]

evaṃ vilokane bhrāntā api vaijñānikeśvarāḥ |
aśaktāścā'bhavan gantuṃ mārgadarśakamantarā || 8 ||
[Analyze grammar]

praveśe gamane sthāne niṣadane vilokane |
kuṇṭhitavṛttayaścāsan sabhyā vinā tu darśakān || 9 ||
[Analyze grammar]

evaṃvidhe maṇḍape'tra bālakṛṣṇaṃ niṣādya ca |
divye siṃhāsane ramye pupūjuḥ parameśvarāḥ || 10 ||
[Analyze grammar]

upadāste dadurdivyāḥ pitā tāḥ pratigṛhya ca |
prāsādikaṃ dadau tebhyaḥ putrotsave'tiharṣitaḥ || 11 ||
[Analyze grammar]

evaṃ samarcanaṃ kṛtvā pūruṣāḥ sadasi sthitāḥ |
atha devyaḥ samāyātāḥ pūjanārthaṃ harestataḥ || 12 ||
[Analyze grammar]

kuṃkumā'kṣatagandhādyaiḥ puṣpadarbhādibhistathā |
aṃkurairvividhaiścāpi navadhānyādibhistathā || 13 ||
[Analyze grammar]

vastrālaṃkārabhūṣādyaiḥ rāmaṇīyakavastubhiḥ |
nīrājanairdukhahārā'vatāraiḥ samapūjayan || 14 ||
[Analyze grammar]

upadāḥ pradadustāśca bhojyasthālīrnyadhuḥ puraḥ |
śarkarāphalabījāni nyadhuḥ rasān purastriyaḥ || 15 ||
[Analyze grammar]

atha pattanavāstavyāḥ pupūjuḥ parameśvaram |
pupūjuḥ kanyakāścāpi hyāśīrvādān dadurdvijāḥ || 16 ||
[Analyze grammar]

yatayo munayaścānyāḥ satyaḥ sādhvyaḥ pativratāḥ |
āśīrvādān dadustasmai kṛṣṇāya paramātmane || 17 ||
[Analyze grammar]

atha pūjottaraṃ tatra tasthire gāyakā janāḥ |
gāndharvā vādakāścāpi devamānavajātijāḥ || 18 ||
[Analyze grammar]

hāhā hūhūrnāradaśca parvataścitradarśanaḥ |
sudarśanastumburuśca viśvāvasuḥ parāvasuḥ || 19 ||
[Analyze grammar]

meghasvanastāranādo dharaṇidhro'nugālavaḥ |
vaṃśadharastaraṇiko jalaghoṣaśca vaiṇikaḥ || 20 ||
[Analyze grammar]

āmramañjuścālaṃbuṣo rāṃbheyaḥ śaṃkhakarṭakaḥ |
ityete devagāndharvāścūḍavarmapurogamāḥ || 21 ||
[Analyze grammar]

cakrurvai gāyanaṃ tatrotsave maṇḍapavartinaḥ |
savāditraṃ tālamānagrāmamūrchādiśobhitam || 22 ||
[Analyze grammar]

athaibhyo bhagavāṃstuṣṭo hīrakamauktikasrajaḥ |
dadau tato manuṣyāṇāṃ gandharvā āyayuḥ sabhām || 23 ||
[Analyze grammar]

citrarathaḥ pratolaśca sāraṃgo maṇirañjakaḥ |
tāramerustānasainyo jagannātho harītakaḥ || 20 ||
[Analyze grammar]

bāṣpavarṣī dhūmramedhā śaśakundaḥ kapardakaḥ |
ete cānye ca gandharvāścakrurgāyanavādane || 25 ||
[Analyze grammar]

tebhyo harirdadau ramyaṃ vibhinnaṃ pāritoṣikam |
svarṇarūpyābhūṣaṇāni svarṇamudrā'mbarāṇi ca || 26 ||
[Analyze grammar]

atha dānavadaityānāṃ gāndharvā āyayuḥ sabhām |
kambukīrtirgālavādo nassvano bhujaghoṣaṇaḥ || 27 ||
[Analyze grammar]

khātadhvāno golabhūpaścaite cakruḥ pragāyanam |
tebhyo dadau harirmuktāmaṇipravālamālikāḥ || 28 ||
[Analyze grammar]

atha nāgāścāraṇāśca sūtamāgadhabandinaḥ |
brahmabhaṭṭāśca vidyādhrāḥ kinnarāḥ kiṃpumaṃśakāḥ || 29 ||
[Analyze grammar]

āyayuḥ kāvyaracanaiḥ sahitāḥ parṣadi drutam |
kauśalyaṃ darśayāmāsuḥ svasvakṛteḥ samājake || 30 ||
[Analyze grammar]

varṇayāmāsuratyartha kṛṣṇanārāyaṇaṃ prabhum |
pitā tebhyo dadau yogyaṃ pāvitoṣikavastukam || 31 ||
[Analyze grammar]

nartakyo gāyikāścāpi sagītinṛ्tyavartanam |
cakrurhareḥ pratoṣārthaṃ haristuṣṭo dadau dhanam || 32 ||
[Analyze grammar]

bhūṣāḥ śṛṃgārapātrāṇi dravyāṇi vividhāni ca |
mālā'mvarāṇi divyāni strīyogyaṃ pāritoṣikam || 33 ||
[Analyze grammar]

evaṃ santoṣitāstatra janmotsave'rthino janāḥ |
gateṣu teṣu sarveṣu muktā dhāmanivāsinaḥ || 34 ||
[Analyze grammar]

akṣarā'mṛtagolokavaikuṇṭhādinivāsinaḥ |
āśīrvādān dadustasmai sveṣṭāya paramātmane || 35 ||
[Analyze grammar]

tān sarvān śrīharikṛṣṇaḥ utthāyotthāya cāsanāt |
kṛtvā vakṣasi yugapannaikadhā pariṣasvaje || 36 ||
[Analyze grammar]

bahurūpadharaḥ kṛṣṇo jagrāha puṣpamālikāḥ |
candanā'kṣatacandrāṃśca pūjāṃ taiḥ paritaḥ kṛtām || 37 ||
[Analyze grammar]

tebhyaḥ prāsādikaṃ datvā parihāraṃ cakāra saḥ |
sabhāyāḥ parihārānte pitā tebhyastu bhojanam || 38 ||
[Analyze grammar]

dadau naikavidhaṃ pānaṃ tāmbūlaṃ toṣikaṃ tathā |
sarve tadutsavaṃ kṛtvā yayurnaijaṃ sthalālayam || 39 ||
[Analyze grammar]

evaṃ mahotsave jāte jayakāro'bhavanmahān |
sarvalokeṣu jayatāt kṛṣṇanārāyaṇo'rbhakaḥ || 40 ||
[Analyze grammar]

ityevaṃ janavācastvaśrūyanta sarvato bhuvi |
mahādāneśvarastvāste śrīmadgopālakṛṣṇakaḥ || 41 ||
[Analyze grammar]

arthināmarthanāṃ cātikramyā'rpayati cepsitam |
annaṃ pānaṃ bhojanaṃ ca dravyaṃ vastraṃ ca vāhanam || 42 ||
[Analyze grammar]

yadyadiṣṭamādatte'rthī śrīmadgopālakṛṣṇataḥ |
ityevaṃ bhuvane jātaṃ yaśo vyāptaṃ janeṣu ca || 43 ||
[Analyze grammar]

śrutvā himagirau dālbhyo bako gavāyanastathā |
sālāyanaḥ svastidharmā ṛṣayo vanavāsinaḥ || 44 ||
[Analyze grammar]

sahasraṃ brāhmaṇānāṃ tat tapatāṃ vedapāṭhinām |
sādhudharmasthitānāṃ tvagjaṭāvalkaladhāriṇām || 45 ||
[Analyze grammar]

siṃhavyāghramṛgahasticarmāmbarapradhāriṇām |
āgataṃ tīrthayātrārthaṃ kṛtvā kurusthalāplavam || 46 ||
[Analyze grammar]

puṣkaraṃ siddhabhūmiṃ ca kṛtvā saurāṣṭramāyayau |
kecanā'trā'bhavan divyāḥ sādhavo brahmacāriṇaḥ || 47 ||
[Analyze grammar]

vānaprasthāstathā'nye ca gṛhasthāḥ sādhusadṛśāḥ |
tapodharmaratāḥ śāstraviśāradāśca yoginaḥ || 48 ||
[Analyze grammar]

kuṃkumavāpikākṣetraṃ tvāyayuḥ pāvanaṃ param |
viśrutaṃ triṣu lokeṣu mokṣadaṃ bhagavatsthalam || 49 ||
[Analyze grammar]

aśvapaṭṭasaro ramyaṃ naikakrośasuvistaram |
devakhātaṃ mahāmiṣṭajalaṃ ramyaṃ śaśiprabham || 50 ||
[Analyze grammar]

sarvatīrthanivāsaṃ ca viśvaṃbharasamāśritam |
vilokya sundaraṃ pūrve vanaṃ puṣpaphalānvitam || 51 ||
[Analyze grammar]

sarvartusmṛddhamamlānaṃ śāntiṃ te lebhire sthirām |
lomaśasyā''śramadeśe māyā yatra na vidyate || 52 ||
[Analyze grammar]

āmravaṇe tu ṛṣayaḥ svāsanāni pracakrire |
sasnuḥ pūjādikaṃ kṛtvā bubhujire phalāni ca || 53 ||
[Analyze grammar]

atha pradakṣiṇaṃ cakruraśvapaṭṭasarovaram |
āyayurlomaśaṃ draṣṭuṃ mahābhāgavataṃ munim || 54 ||
[Analyze grammar]

āśrame sthitavantaṃ ca jambūvṛkṣatalāśrayam |
natvā sahasramunayaścātmānaṃ dhanyamāpnuvan || 55 ||
[Analyze grammar]

lomaśaḥ svāgataṃ cakre'rghyā''sanavandanādibhiḥ |
phalaiḥ pānaiḥ svarṇakadalyādiphalaiḥ subhojanaiḥ || 56 ||
[Analyze grammar]

evamṛṣikṛtaṃ sarvaṃ svāgataṃ jagṛhuśca te |
athā''yayurhareḥ saudhaṃ draṣṭuṃ śrīparameśvaram || 57 ||
[Analyze grammar]

anādiśrīkṛṣṇanārāyaṇaṃ bālasvarūpiṇam |
sahasrarūpadhṛk kṛṣṇo yugapattān suṣasvaje || 58 ||
[Analyze grammar]

āścaryaṃ paramaṃ prāpurdālbhyādyāḥ ṛṣayastadā |
caturbhujaṃ tathā cāṣṭabhujaṃ sahasrabāhukam || 59 ||
[Analyze grammar]

dadṛśuḥ kecana bālaṃ brahmadhāmagataṃ prabhum |
pūjanaṃ pādasalilaṃ vandanaṃ saṃvidhāya te || 60 ||
[Analyze grammar]

yayuḥ pūrvadiśāṃ naijāsanaṃ tvāmravaṇaṃ tataḥ |
atha dvitīyadivase bhikṣārthaṃ kṛṣṇamandiram || 61 ||
[Analyze grammar]

āyayuste tu ṛṣayastadā śrībālakṛṣṇakaḥ |
ghṛtapātraṃ godhūmānāṃ piṣṭapātraṃ ca śarkarām || 62 ||
[Analyze grammar]

vyañjanāni tathā tailapātraṃ ca veṣavārakam |
dvidalāṃ taṇḍulāṃścāpi pārśve nyasya haristataḥ || 63 ||
[Analyze grammar]

svahastābhyāṃ dadau tebhyo vipulaṃ ca yatheṣṭakam |
ekaikasmādapi pātrād dattaṃ na nyūnatāṃ gatam || 64 ||
[Analyze grammar]

sahasrādhikasādhūnāmṛṣīṇāṃ bhojanāya ca |
tadāścaryaṃ tu te jagmuḥ kṛṣṇapratāpavedinaḥ || 65 ||
[Analyze grammar]

gatāste saṃgṛhītvā cāmānnāni subahūnyapi |
pācayitvā bubhujire śāntimāpustadā''mṛtīm || 66 ||
[Analyze grammar]

atha sāyaṃ hariḥ pitrā sākaṃ sādhusamājakam |
draṣṭuṃ tatra gato yatrarṣayaḥ kesaricarmasu || 67 ||
[Analyze grammar]

kṛtāsanā virājante brahmadhyānaparāḥ śubhāḥ |
bālakṛṣṇaśca pitaraṃ samuvāca tadā haṭhāt || 68 ||
[Analyze grammar]

sihacarma ca tāta pradāpayā''sanāya me |
ityuktvā cāṃguliṃ dīrghā kṛtvā tātaṃ punaḥ punaḥ || 69 ||
[Analyze grammar]

siṃhacarmaṇaḥ prāptyarthamanurodhaṃ cakāra saḥ |
tad dṛṣṭvā ca ṛṣirdālbhyaḥ pitaraṃ prāha vai hasan || 70 ||
[Analyze grammar]

kimayaṃ cecchati bālaḥ kiṃca vakti punaḥ punaḥ |
pitā prāha vṛthā bālaḥ karoti haṭhameva vai || 71 ||
[Analyze grammar]

icchatyayaṃ siṃhacarma yatprāpyaṃ naiva jāyate |
dālbhyaḥ prāha kumāra tvaṃ siṃhamāroḍhumicchasi || 72 ||
[Analyze grammar]

siṃho'yaṃ vidyate nainamāroḍhuṃ śakyate'nyakaiḥ |
kumāraḥ prāha ca ṛṣe dehi me tvāsanāya tat || 73 ||
[Analyze grammar]

dālbhyaḥ prāha vanasthānāmṛṣīṇāṃ yogyameva tat |
nānyayogyaṃ tataḥ putra dātavyaṃ naiva vidyate || 74 ||
[Analyze grammar]

śrutvā śrīmatkṛṣṇanārāyaṇaḥ prāha pradehi me |
naitad deyamṛṣiḥ prāha tadā śrīmannarāyaṇaḥ || 75 ||
[Analyze grammar]

siṃhaśabdaṃ cakāroccaigarjinārūpamulbaṇam |
tacchrutvā carmarūpāste siṃhā vyāghrā mṛgādayaḥ || 76 ||
[Analyze grammar]

sarve sajīvatāṃ prāptāḥ kṛṣṇanārāyaṇecchayā |
carmoparisthāḥ ṛṣayo nipeturbhūtale'bhitaḥ || 77 ||
[Analyze grammar]

trāsaṃ prāpuḥ satyasiṃhān vyāghrān dṛṣṭvā bhayaṃkarān |
dudruvuste tu parito vyāghrāstu garjanādibhiḥ || 78 ||
[Analyze grammar]

araṇyaṃ cāntarīkṣaṃ ca pūrayāmāsurucchritam |
āsamudrāntamevaiṣāṃ śabdāścākampayan mahīm || 79 ||
[Analyze grammar]

dhāvamānāḥ śataśaste siṃhāstathā mṛgādayaḥ |
yeṣāṃ yeṣāmabhavaṃśca carmāṇyete sajīvakāḥ || 80 ||
[Analyze grammar]

bhūtvā kṛṣṇapade natvā'raṇyaṃ siṃhādayo yayuḥ |
dālbhyādyāḥ ṛṣayo yogaistānniroddhaṃ na śekire || 81 ||
[Analyze grammar]

ityevaṃ tu tadā vīkṣya camatkāraṃ hareḥ punaḥ |
prapannāḥ pādayorviṣṇornārāyaṇasya te'stuvan || 82 ||
[Analyze grammar]

ekamevā'dvitīyaṃ yad brahmottamaṃ pracakṣate |
taṃ tvāmātmeśvaraṃ viṣṇo praṇatāḥ sma prasīda naḥ || 83 ||
[Analyze grammar]

ekarāṭ saddharmasindho'nādisaṃbhava hṛtsthita |
viśvaksena vṛṣāvarta praṇatāḥ sma prasīda naḥ || 84 ||
[Analyze grammar]

śuciśravo'mṛtavārdhe sanātanā'kṣayā'kṣara |
havyabhuṅ mañjukeśā'ja praṇatāḥ sma prasīda naḥ || 85 ||
[Analyze grammar]

hṛṣīkeśā'graja puṣpahāsa bāla janārdana |
carācaraniyantastvāṃ praṇatāḥ sma prasīda naḥ || 86 ||
[Analyze grammar]

savitustvaṃ vareṇyo'si hiraṇyagarbhasaṃsthitaḥ |
vāsudeva kṛpāsindho praṇatāḥ sma prasīda naḥ || 87 ||
[Analyze grammar]

anantā''syā'nantapādā'nantaśaktiguṇāśraya |
hotaḥ potarhomaheto praṇatāḥ sma prasīda naḥ || 88 ||
[Analyze grammar]

nārāyaṇa parabrahma śrīmadgopālabālaka |
kambharāśrīgṛhajanma praṇatāḥ sma prasīda naḥ || 89 ||
[Analyze grammar]

puruṣottama viśvātmannūrdhvakarmana divaspate |
sarvasākṣin surāṣṭreśa praṇatāḥ sma prasīda naḥ || 90 ||
[Analyze grammar]

sarvebhyaḥ śreyasāṃ dātā devānāṃ daivataṃ mahat |
trātā bhartā ca poṣṭā ca śaraṇaṃ bhava naḥ prabho || 91 ||
[Analyze grammar]

yaṃ na paśyanti paśyanto'smādṛśāḥ ṛṣayo'pi ca |
tān paśyan bālarūpastvaṃ śaraṇaṃ bhava naḥ prabho || 92 ||
[Analyze grammar]

bhūmādistambaparyantaṃ vyāptaṃ yena carācaram |
māyājālaṃ kṛtaṃ yena namāmastaṃ śubhārbhakam || 93 ||
[Analyze grammar]

yasyā'kṣiṇī sūryacandrau yadbāhū bhūmaśaṃkarau |
yatpādau kṣīraśukleśau namāmastaṃ kṛpā'rbhakam || 94 ||
[Analyze grammar]

āsanāni vinaṣṭāni kesariṇo vanaṃ yayuḥ |
āsanārthaṃ bālakṛṣṇa pūryantāṃ no manorathāḥ || 95 ||
[Analyze grammar]

evaṃ stuto'tha bhagavān rādhike prāha vai ṛṣīn |
āgacchantu mahābhāgāḥ spṛśantu mama pannakham || 96 ||
[Analyze grammar]

bhavatāṃ tvāsanānyā''virbhaviṣyanti dadhatviha |
ityuktāste ṛṣayastu dālbhyabakādayastadā || 97 ||
[Analyze grammar]

paspṛśuḥ śrīharervāmapādāṃguṣṭhaṃ kramāttataḥ |
aṃguṣṭhasya nakhāttatra siṃhacarmādi yasya yat || 98 ||
[Analyze grammar]

tattadāvirbabhūvaitajjagrāha munirāṭ tu tat |
sarveṣāṃ tāni carmāṇi śrīhariṇā'rpitāni vai || 99 ||
[Analyze grammar]

tataḥ sarve hariṃ nārāyaṇaṃ samarcayan mudā |
jagṛhuśca manuṃ tatra gopālakṛṣṇato'khilāḥ || 100 ||
[Analyze grammar]

oṃ namaḥ śrīkṛṣṇanārāyaṇāya svāmine svāhā |
tilakaṃ tolasīṃ mālāṃ nāma kṛṣṇanarāyaṇam || 101 ||
[Analyze grammar]

vaiṣṇavāḥ ṛṣayo bhūtvā divyadṛṣṭiyujastataḥ |
tīrthayātrā samāpyaiva himaśailaṃ punargatāḥ || 102 ||
[Analyze grammar]

tattīrthaṃ dālbhyatīrtheti nāmnā pūrvataṭe'bhavat |
śrāvaṇātpaṭhanāccāpi bhuktimuktiphalapradam || 103 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne prabhoḥ pañcamā'bdike mahotsave vividhagandharvāṇāṃ gāyanāni dālbhyabakādisahasrarṣīṇāṃ siṃhavyāghrādicarmabhyaḥ siṃhādīnāṃ sajīvīkaraṇaṃ aṃguṣṭhāttattaccarmāvirbhāvaścetyādinirūpaṇanāmā catustriṃśo'dhyāyaḥ || 34 ||
[Analyze grammar]