Chapter 31

śrīkṛṣṇa uvāca |
śrūyatāṃ rādhike devī śāvadīnā tu kālikā |
aśvapaṭṭasarastīre divyovāsa vaṭāśritā || 1 ||
[Analyze grammar]

kṣetrarakṣāṃ karotyeva cāṣṭādaśabhujā priyā |
siṃhavāhanayuktā ca kṛṣṇanārāyaṇāṃganā || 2 ||
[Analyze grammar]

kanyakānāṃ sadā rakṣāṃ karoti divyavigrahā |
pratyakṣā dṛśyate lokaiḥ kṛṣṇanārāyaṇecchayā || 3 ||
[Analyze grammar]

tattīrthaṃ kālikātīrthaṃ vartate'śvasarovare |
paścime tatra setau vai kṛtaprāsādasannidhau || 4 ||
[Analyze grammar]

māghasnānasamāptau ca kṛṣṇanārāyaṇaṃ prabhum |
pūjayāmāsuratyarthaṃ prajā viprāśca kanyakāḥ || 5 ||
[Analyze grammar]

mahotsavo mahān jāto divyo mokṣaprado hi saḥ |
atha sarvatra vārtā sā prāsarad vāyuvegataḥ || 6 ||
[Analyze grammar]

jalamānavavīkṣārthaṃ janāstvāyānti dūrataḥ |
dṛṣṭvā dṛṣṭvā mahāścaryaṃ manyante śrīharerbalam || 7 ||
[Analyze grammar]

hariṇā sa vārinaro vāriṇā prokṣitastadā |
divyarūpo hastapādāvayavaḥ samapadyata || 8 ||
[Analyze grammar]

tuṣṭāva śrīhariṃ sevāmārthayatpādayoḥ sadā |
śrīharistaṃ sarasyeva kṣetrapālaṃ vyadhātsadā || 9 ||
[Analyze grammar]

tava vaṃśo mānasaśca sarvatra prasariṣyati |
jalamānuṣasṛṣṭiḥ sā bhaviṣyatīti cāha tam || 10 ||
[Analyze grammar]

jaḍadehaṃ tadā tasya jalamadhye vyasarjayat |
tato divyā jalanarā jalanāryo'bhavan śatam || 11 ||
[Analyze grammar]

atha lokā mahākālīṃ paśyantyatha vrajanti ca |
kathayanti pratāpaṃ śrīkṛṣṇanārāyaṇasya te || 12 ||
[Analyze grammar]

bhajante śrīkṛṣṇanārāyaṇaṃ śrīparameśvaram |
muktiṃ yānti bahavaśca śrīśasvāmipratāpataḥ || 13 ||
[Analyze grammar]

payovrataṃ tāḥ kanyāśca cakrustatrāśrame yataḥ |
hariḥ kāntaḥ prabhuḥ prāptastadarthaṃ mānitaṃ tu prāk || 14 ||
[Analyze grammar]

rādhike vratapuṣṭyarthaṃ gāvaḥ kāmadughāstadā |
payo dadati nityaṃ vai vrataṃ kurvanti kanyakāḥ || 15 ||
[Analyze grammar]

śrīhariṃ nirmaladugdhaiḥ snapayanti prage ca tāḥ |
paścādvārbhiḥ snāpayitvā vastrabhūṣādibhiḥ prabhum || 16 ||
[Analyze grammar]

śṛṃgārayanti bhāvena sugandhayanti saddravaiḥ |
mardayanti prabhordehaṃ rañjayanti sugītikaiḥ || 17 ||
[Analyze grammar]

hāsayanti sumādhuryaistoṣayanti sunartanaiḥ |
ānandayanti susparśaistarpayanti subhojanaiḥ || 18 ||
[Analyze grammar]

stuvanti vardhayantyeva nīrājanakṣamāpanaiḥ |
evaṃ kṛṣṇavratakartryaḥ pibanti dugdhameva tāḥ || 19 ||
[Analyze grammar]

māsapūrṇaṃ vrataṃ kṛtvā cakruḥ kṛṣṇārpaṇaṃ ca tat |
dānahomotsavamudyāpanaṃ kṛtvā ca pūrṇatām || 20 ||
[Analyze grammar]

tasthustatraiva saṃbhejuḥ śrīkṛṣṇaṃ puruṣottamam |
anādiśrīkṛṣṇanārāyaṇaṃ prāṇapatiṃ prabhum || 21 ||
[Analyze grammar]

śrīrādhikovāca |
kathaṃ kṛṣṇaḥ parabrahma mleccharākṣasakanyakāḥ |
jātinikṛṣṭabhāvotthā jagrāha pāvanaḥ prabhuḥ || 22 ||
[Analyze grammar]

śrīkṛṣṇa uvāca |
śṛṇu rādhe kathayāmi mama divyāṃ kathāṃ tava |
pareṇa brahmaṇā cāhaṃ purā svāṃśaḥ prakāśitaḥ || 23 ||
[Analyze grammar]

mayā rādhā tadaṃśā ca patnīrūpā kṛtā tadā |
sāhaudaryaṃ rodhate na tejasvināṃ tadatra vai || 24 ||
[Analyze grammar]

pareṇa brahmaṇā nārāyaṇaścaturbhujaḥ kṛtaḥ |
parabrahmasamutthā ca lakṣmīstena priyā kṛtā || 25 ||
[Analyze grammar]

sāhaudaryaṃ bādhate na nārāyaṇāvatārake |
brahmaṇā svasya vaṃśīyā sāvitrī saṃvivāhitā || 26 ||
[Analyze grammar]

gāyatrī vaṃśajā putrī brahmaṇā svapriyā kṛtā |
sarasvatī tathā putrī patnītvena sumānitā || 27 ||
[Analyze grammar]

brahmapautrasya putryaśca dakṣajāḥ kulajāśca tāḥ |
brahmaputraiḥ praputraiśca sarvā eva vivāhitā || 28 ||
[Analyze grammar]

kaśyapena purā tiryagjātīyāḥ svapriyāḥ kṛtāḥ |
danuśca ditireveme rākṣasyau kaśyapastriyau || 29 ||
[Analyze grammar]

arundhatī śvapacī ca vasiṣṭhena vivāhitā |
kālī ca bhairavī durgā tāmasyaḥ śaṃkarapriyāḥ || 30 ||
[Analyze grammar]

vṛndā tulasī daityasya patnyau viṣṇuvivāhite |
mlecchā goromato jātā gavāṃ vaṃśāstu te smṛtāḥ || 31 ||
[Analyze grammar]

samartho bhagavān sarvān pavitrayati tatkṣaṇāt |
na tasyāgre jātibhāvo noccatā nīcatā na ca || 32 ||
[Analyze grammar]

bhāvagamyo hi bhagavān bhāvito bhāvayatyapi |
sarvaṃ tasya saḥ sarvasmin tadātmakaḥ sa eva ha || 33 ||
[Analyze grammar]

sarvabhoktā sarvakartā sarvapatiḥ patīśvaraḥ |
tasyā''jñayā purā brahmā yugalāni samasṛjat || 34 ||
[Analyze grammar]

tadyugalaṃ bhrātṛsvasṛrūpaṃ sahasramāsa ha |
tataḥ sṛṣṭiḥ kṛtayuge bhavatyeva na dūṣaṇam || 35 ||
[Analyze grammar]

tadā kanyāḥ parasmai vai dātuṃ prathā na cā'bhavat |
atha kanyāvihīnānāṃ vaṃśasantānasiddhaye || 36 ||
[Analyze grammar]

kanyādānaṃ pradātavyamanyasmai niyamo'bhavat |
paragotre pradātavyā kanyeti niyamastvanu || 37 ||
[Analyze grammar]

asapiṇḍe pradātavyā sājātye niyamo'bhavat |
evaṃ sarvairlabhyate vai kanyā vaṃśapradā tataḥ || 38 ||
[Analyze grammar]

anye dharmāḥ purā sṛṣṭau sṛṣṭyāraṃbhe'pi cāparāḥ |
anye dharmāḥ kṛte tvādye tretādāvapare vṛṣāḥ || 35 ||
[Analyze grammar]

kalau dharmā adharmāste tadānīmabhavan priye |
kṛtadharmāḥ kalau sarve na tu dharmatayā matāḥ || 40 ||
[Analyze grammar]

tejobhedād bhinnadharmāḥ pravartante yuge yuge |
tasmāt kṛṣṇasya doṣo na tatkriyā dharma eva saḥ || 41 ||
[Analyze grammar]

tatkṛtaḥ saḥ parāmnāyaḥ śāsti sarvaṃ jagat sadā |
sa cāmnāyo naiva kṛṣṇaṃ śāsituṃ kṣamate kvacit || 42 ||
[Analyze grammar]

āmnāyasya mahāmātā kriyā kṛṣṇasya vartate |
tasmāt kṛṣṇakriyāḥ sarvā ātmāmnāyasvarūpiṇī || 43 ||
[Analyze grammar]

na saḥ kāmo na saḥ krodho na vyavāyo na hiṃsanam |
na taccauryaṃ na sāṃkaryaṃ kṛṣṇakṛtaṃ tu yadbhavet || 44 ||
[Analyze grammar]

kāmo divyastathā krodho vyavāyo divya eva saḥ |
hiṃsā cauryaṃ ca sāṃkaryaṃ divyaṃ kṛṣṇakṛtaṃ sadā || 45 ||
[Analyze grammar]

rādhā divyā ratirdivyā divyā vaibhavabhogyatā |
sarvaṃ divyaṃ parabrahmamayaṃ tatra na dūṣaṇam || 46 ||
[Analyze grammar]

yatrā'sti tejasāṃ rāśistamastatra na vidyate |
tamastu dūṣaṇaṃ proktaṃ tejasviṣu na saṃbhavet || 47 ||
[Analyze grammar]

alpadṛṣṭyā vilokyante dūṣaṇāni tamo'dhikaiḥ |
brahmadṛṣṭyā tu tānyeva bhūṣaṇāni bhavanti hi || 48 ||
[Analyze grammar]

yādṛk snehaḥ striyāṃ putre sutāyāṃ janakādiṣu |
sa eva sādhuṣu kṛto mokṣaṃ dadāti nirguṇaḥ || 49 ||
[Analyze grammar]

satsu sādhvīṣu ca doṣā bhasmatāṃ yānti yogataḥ |
hareryogād divyabhāvāḥ santaḥ sādhvyo bhavanti hi || 50 ||
[Analyze grammar]

yathā rādhe tava putrāḥ kṣārodā api sarvathā |
pāvanāstīrtharūpāste divyarūpā bhavanti hi || 51 ||
[Analyze grammar]

yathā liṃgaṃ kāmamūlaṃ doṣātmakaṃ jagatsu vai |
śaṃkarasya tu yogena brahmavatpūjyate hi tat || 52 ||
[Analyze grammar]

pāṣāṇādyā brahmayogāt pūjyante pratimātmakāḥ |
tyā sarvaṃ tvayā rādhe pūjanīyaṃ madanvayāt || 53 ||
[Analyze grammar]

mlecchatā kṛṣṇayogena vrajatyevā'cchatāṃ priye |
bhagaṃ vai brahmayogena yajñakuṇḍe pradṛśyate || 54 ||
[Analyze grammar]

patnīhaste tvaśvaliṃgaṃ tvaśvamedhe pradīyate |
sarvatra brahmayogena pāvitryaṃ kalpate priye || 55 ||
[Analyze grammar]

tasmācchaṃkā na kartavyā mlecchakanyāḥ kathaṃ priyāḥ |
yatpriyaṃ śrīharestattu śuddhameva na saṃśayaḥ || 56 ||
[Analyze grammar]

atha tvidaṃ pravakṣyāmi dharmatattvaṃ nibodha me |
prāgbhavam ṛṣibhirdṛṣṭaṃ dharmavidbhirmahātmabhiḥ || 57 ||
[Analyze grammar]

anāvṛtāḥ purā kila striyastvāsan varānane |
kāmacāravihāriṇyaḥ svatantrāścāruhāsinī || 58 ||
[Analyze grammar]

tāsāṃ vyuccaramāṇānāṃ kaumārāt subhage patīn |
nā'dharmo'bhūd varārohe sa hi dharmaḥ purā'bhavat || 59 ||
[Analyze grammar]

taṃ caiva prācīnadharmaṃ tiryagyonigatāḥ prajāḥ |
sarvadā'nuvidhīyante ṛtudharmamanusṛtāḥ || 60 ||
[Analyze grammar]

pramāṇadṛṣṭo dharmo'yaṃ pūjyate ca maharṣibhiḥ |
uttareṣu ca deśeṣu kuruṣvapi pravartate || 61 ||
[Analyze grammar]

parvatīyaprajāsveṣaḥ dharmo bahupatitvakaḥ |
devīṣvapi ca svargādau vartate dharma eva saḥ || 62 ||
[Analyze grammar]

dāsīṣvapi ca sarvatra vartate dharma eva saḥ |
strīṇāmanugrahaprāptaḥ sa vai dharmaḥ sanātana || 63 ||
[Analyze grammar]

athoddālakaputreṇa kadācit śvetaketunā |
maryādā sthāpitā tena kopāttāmapi saṃśṛṇu || 64 ||
[Analyze grammar]

śvetaketoḥ kila purā samakṣaṃ mātaraṃ pituḥ |
jagrāha brāhmaṇaḥ pāṇau gacchāva iti cābravīt || 65 ||
[Analyze grammar]

ṛṣiputrastadā kopaṃ cakārā'marṣanoditaḥ |
mātaraṃ tāṃ nīyamānāṃ balād dṛṣṭvā pituḥ puraḥ || 66 ||
[Analyze grammar]

kruddhaṃ putraṃ pitā dṛṣṭvā śvetaketumuvāca ha |
mā putra kopaṃ kārṣīstvameṣa dharmaḥ sanātanaḥ || 67 ||
[Analyze grammar]

anāvṛtā hi sarveṣāṃ varṇānāmaṃganā bhuvi |
yathā gāvaḥ sthitāḥ sve sve bhoktari pramadāstathā || 68 ||
[Analyze grammar]

śvetaketustu taṃ dharmaṃ sarvathā vai na cakṣame |
cakāra caiva maryādāmimāṃ strīpuṃsayorbhuvi || 69 ||
[Analyze grammar]

mānuṣeṣveva nānyeṣu śṛṇu tāṃ rādhike priye |
vyuccarantyāḥ patiṃ nāryā adyaprabhṛti pātakam || 70 ||
[Analyze grammar]

bhrūṇahatyāsamaṃ ghoraṃ bhaviṣyatyasukhāvaham |
bhāryāṃ tathā vyuccarataḥ kaumārabrahmacāriṇīm || 71 ||
[Analyze grammar]

pativratāmetadeva bhavitā pātakaṃ bhuvi |
patyā niyuktā yā caiva patnī putrārthameva vā || 72 ||
[Analyze grammar]

na kariṣyati tasyāśca bhaviṣyati tadeva hi |
uddālakasya putreṇa dharmyā vai śvetaketunā || 73 ||
[Analyze grammar]

maryādā sthāpitā tasmāt sa vai dharmo vyavasthitaḥ |
ṛtau ṛtau striyā bhartā nātivartavya eva ca || 74 ||
[Analyze grammar]

śeṣeṣvanyeṣu kāleṣu svātantryaṃ strī kilā'rhati |
saudāsena nijapatnī niyuktā putrajanmani || 75 ||
[Analyze grammar]

madayantī jagāmarṣiṃ vasiṣṭhaṃ gurumeva tu |
tasmāllebhe ca sā putramaśmakaṃ nāma viśrutam || 76 ||
[Analyze grammar]

athotathya iti khyāta āsīddhīmān ṛṣiḥ purā |
mamatā nāma bhāryā''sīttasya paramasaṃmatā || 77 ||
[Analyze grammar]

utathyasya yavīyāṃstu purodhāstridivaukasām |
bṛhaspatirmahātejā mamatāmanvapadyata || 78 ||
[Analyze grammar]

uvāca mamatā taṃ tu devaraṃ vadatāṃvaram |
antarvatnī tvahaṃ bhrātrā tava tasmāttu devara || 79 ||
[Analyze grammar]

amogharetāstvaṃ cāpi dvayorgarbhe na saṃbhavaḥ |
evamukto'pi sa kāmaṃ niyantuṃ na śaśāka ha || 80 ||
[Analyze grammar]

reme sārdhaṃ tayā cāthotsṛjantaṃ reta eva tam |
abhyabhāṣata garbhastha autathyo'tra na saṃbhavaḥ || 81 ||
[Analyze grammar]

dvayoḥ kṛte nāvakāśo na pīḍāṃ kartumarhasi |
aśrutvaiva tu tadvākyaṃ garbhasthasya bṛhaspatiḥ || 82 ||
[Analyze grammar]

śukrotsargaṃ cakāraiva tacchukraṃ garbhaśabālakaḥ |
padbhyāṃ hataṃ papātorvyāṃ tataḥ kruddho bṛhaspatiḥ || 83 ||
[Analyze grammar]

śaśāpa garbhaṃ mūrkha tvaṃ tamo dīrghaṃ pravekṣyasi |
sa vai dīrghatamā ṛṣirjātyandhaḥ samajāyata || 84 ||
[Analyze grammar]

kintu vidvānataḥ patnīṃ pradveṣīṃ nāma labdhavān |
sa putrān janayāmāsa gautamādīn tapasvinaḥ || 85 ||
[Analyze grammar]

dīrghatamā vṛṣavacca prakāśe maithunakriyām |
janānāṃ sannidhau cakre maryādānāśakṛd yathā || 86 ||
[Analyze grammar]

ṛṣayastaṃ tiraścakrurbhinnamaryādameva ca |
pradveṣī taṃ sevate na tatastāmabravīnmuniḥ || 87 ||
[Analyze grammar]

bhārye tvaṃ māṃ kathaṃ naiva sevase vada kāraṇam |
pradveṣī tu patiṃ prāha bhartā tu bharaṇānmataḥ || 88 ||
[Analyze grammar]

patiśca pālanāccāpi tvayi dvayaṃ na vidyate |
pratyutā'haṃ bharaṇe te sasutā kleśabhāginī || 89 ||
[Analyze grammar]

bhavāmyaśaktā ca tato bhartrantaraṃ karomi ca |
yatheṣṭaṃ kuru viprendra gacchāmyahaṃ janāntaram || 90 ||
[Analyze grammar]

dīrghatamā uvāca |
adyaprabhṛti maryādā mayā loke vitanyate |
eka eva patirnāryā yāvajjīvaṃ parāyaṇam || 91 ||
[Analyze grammar]

mṛte jīvati vā patyau nā'paraṃ prāpnuyānnaram |
pare prāpte patitā sā bhavediti niyamyate || 92 ||
[Analyze grammar]

śrutvā kopayutā putrānuvāca pitaraṃ prati |
badhvoḍupe kṣipantvenaṃ cāndhaṃ vipriyavādinam || 93 ||
[Analyze grammar]

putrā badhvā pitaraṃ taṃ coḍupe samavāsṛjan |
gaṃgāyāṃ sa cānusrotaḥ plavamānaḥ pravāhake || 94 ||
[Analyze grammar]

naukā pravāhapatitā dūradeśaṃ gatā yadā |
naukāsthamekalamandhaṃ śrīśanāmajapānvitam || 95 ||
[Analyze grammar]

apaśyadvai baliḥ rājā jagrāhainaṃ nināya ca |
gṛhaṃ jñātvā ṛṣiṃ patnyāṃ niyuyoja sutārthakaḥ || 96 ||
[Analyze grammar]

sudeṣṇā rājapatnī sā na svīcakāra taṃ munim |
svāṃ tu dhātreyikāṃ tasmai vṛddhāya prāhiṇottadā || 97 ||
[Analyze grammar]

tasyāṃ kākṣīvadādīṃścaikādaśa putrakān muniḥ |
janayāmāsa ca tataḥ sudeṣṇā taṃ hyarocayat || 98 ||
[Analyze grammar]

tato jātāḥ sudeṣṇāyāṃ kumārāḥ pañca tatsutāḥ |
aṃgo vaṃgaḥ kaliṃgaśca puṇḍraḥ suhmaśca te balāḥ || 99 ||
[Analyze grammar]

teṣāṃ deśā bhaviṣyanti tattannāmabhireva te |
evaṃ baleḥ purā vaṃśaḥ prakhyāto vai maharṣiṇā || 100 ||
[Analyze grammar]

parāśaro mapsyagandhāṃ dhīvarīṃ samapadyata |
evaṃ pūrvataro dharmo nārāyaṇasya kā kathā || 101 ||
[Analyze grammar]

sarvaṃ nārāyaṇabhogyaṃ nārāyaṇasya varṣma ca |
sarvaṃ nārāyaṇapatnīrūpaṃ patirnarāyaṇaḥ || 102 ||
[Analyze grammar]

mā śaṃkāṃ tvaṃ kuru rādhe kṛṣṇanārāyaṇaṃ prati |
māyāyāṃ garbhado yaḥ sa māyikyāmapi garbhadaḥ || 103 ||
[Analyze grammar]

sraṣṭā pātā ca saṃhartā sa eva parameśvaraḥ |
sarvakanyāśca gṛhṇīyād yogyaṃ tasya sadā hi tat || 104 ||
[Analyze grammar]

paṭhanācchravaṇāccāsya dharmatattvaṃ purābhavam |
jñāyeta ca vilīyeta saṃśayaḥ puṇyabhāg bhavet || 105 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne kanyakānāṃ payovrataṃ purādharmatattve śvetaketukṛtamaryādā saudāsapatnyāṃ vasiṣṭhaputre'śmakaḥ utathyabhāryā bṛhaspatispṛṣṭā dīrghatamā balerdāsyāṃ rājñyāṃ ca putrānutpādayāmāsa tato maryādākaraṇaṃ cetyādinirūpaṇanāmā ekatriṃśo'dhyāyaḥ || 31 ||
[Analyze grammar]