Chapter 542

śrīnārāyaṇa uvāca |
śṛṇu lakṣmi mahāpuṇyaṃ vṛttāntaṃ prāgbhavaṃ śubham |
śravaṇātpāpahaṃ yacca dhāraṇānmokṣadaṃ param || 1 ||
[Analyze grammar]

ahaṃ tuṣyāmi bhāvena śraddhayā sevayā tathā |
dāsyena premavṛttyā ca bhakteṣṭakṛd bhavāmi hi || 2 ||
[Analyze grammar]

bhāvasādhyo'smyahaṃ devi na vittairna japairaham |
bhaktānāṃ tu madarthaṃ vai kāyakleśo bhavet kvacita || 3 ||
[Analyze grammar]

karmaṇā manasā vācā maccitto yo jano bhavet |
ahiṃsāṃ satyamasteyaṃ brahmacaryaṃ samācaret || 4 ||
[Analyze grammar]

ekabhaktaṃ tathā naktamupavāsādika caret |
mama saṃkīrtanaṃ sādhusmaraṇaṃ cā'pyanindanam || 5 ||
[Analyze grammar]

bhajanaṃ ca prakuryādvai mama pratuṣṭaye rame |
purā''sīd brahmaṇaḥ putra āruṇirnāma nāmataḥ || 6 ||
[Analyze grammar]

so'raṇyamagamat kiñcittapo'rthaṃ dvijasattamaḥ |
tapastepe dāruṇaṃ cāpyupavāsaparāyaṇaḥ || 7 ||
[Analyze grammar]

nāganadyāstaṭe ramye tvāvasathaṃ cakāra saḥ |
snānārthamekadā nadyāṃ yayau snātvā taṭe sthitaḥ || 8 ||
[Analyze grammar]

dadarśa tatra cāyāntaṃ vyādhaṃ dhanuśśarānvitam |
taṃ dvijaṃ hantumāyāt sa vyādho valkalakāṃkṣayā || 9 ||
[Analyze grammar]

ṛṣistu jñātavān divyacakṣuṣā vyādhamānasam |
śuśoca sa hṛdi yadvai vyādho'yaṃ bahupāpakṛt || 10 ||
[Analyze grammar]

mama hatyākṛtaṃ pāpamaho tasyā'dhikaṃ bhavet |
evaṃ vai pāpakartuśca kadoddhāro bhaviṣyati || 11 ||
[Analyze grammar]

tasmād vinā dvijahatyāṃ gṛhṇātu valkalāni saḥ |
iti kṛtvā'rpitānyeva yāvanti valkalāni hi || 12 ||
[Analyze grammar]

dhyāyannārāyaṇaṃ devaṃ tasthau maunaṃ tu bhūsuraḥ |
taṃ dṛṣṭvā suvrataṃ vipraṃ cāntargataharimṛṣim || 13 ||
[Analyze grammar]

dayāluṃ śāntahṛdayaṃ parapāpanivārakam |
vyādhasya mānasaṃ tatra krūratāṃ tu vihāya vai || 14 ||
[Analyze grammar]

sāttvikaṃ dharmayuktaṃ ca vyāvartata kṣaṇāntare |
vyādho vihāya cāpaṃ ca śarāṃśca vākyamabravīt || 15 ||
[Analyze grammar]

hantumicchannahaṃ vipra bhavantamiha cāgataḥ |
idānīṃ darśanātte'tra hiṃsābuddhirgatā mama || 16 ||
[Analyze grammar]

brāhmaṇā bahavo nāryo mayā hatā hi pāpinā |
kāṃ gatiṃ pratipatsyāmi brahmaghno'haṃ dvijottama || 17 ||
[Analyze grammar]

idānīṃ taptumicchāmi tapo'haṃ tvatsamīpataḥ |
upadeśādidānena prasādaṃ kartumarhasi || 18 ||
[Analyze grammar]

evamukto'pyasau vipro nottaraṃ pratyapadyata |
pāpinā tu sahā''lāpe pāpaṃ saṃkramate yataḥ || 19 ||
[Analyze grammar]

anukto'pi sa dharmecchrurvyādhastatraiva tasthivān |
yathā viprastathā vyādhastapastepe taroradhaḥ || 20 ||
[Analyze grammar]

athaikadā nadītīre siṃhaḥ kaścit samāgataḥ |
bubhukṣitaśca taṃ vipraṃ dṛṣṭvā khāditumīśvaram || 21 ||
[Analyze grammar]

vipraṃ yāvat taṭe siṃho jighṛkṣati ca tāvatā |
vyādhena śaraghātaiśca śīghraṃ siṃho vināśitaḥ || 22 ||
[Analyze grammar]

ṛṣiḥ oṃ śrīkṛṣṇanārāyaṇāya svāmine namaḥ |
ityuktvā jalamagno'bhūjjalādho niṣasāda ca || 23 ||
[Analyze grammar]

kṛṣṇanārāyaṇaṃ nāma śrutvā siṃho mamāra ca |
bhūtvā niṣpāpakastasmād divyapumān samutthitaḥ || 24 ||
[Analyze grammar]

śrutamātre jahau prāṇān divyadeho'bhavattataḥ |
uvāca yāmi taddeśaṃ yatra kṛṣṇanarāyaṇaḥ || 25 ||
[Analyze grammar]

tvatprasādād dvijaśreṣṭha vipāpmā mokṣabhāgaham |
śrutvedaṃ ca jalā'ntaḥstho brāhmaṇo bahirāyayau || 26 ||
[Analyze grammar]

papraccha taṃ tadā siṃhapuruṣaṃ ko'si vai vada |
siṃhapumān dvijaṃ prāha prāgāsaṃ vaidiko'pyaham || 27 ||
[Analyze grammar]

dīrghabāhuritikhyāto kriyākāṇḍaparāyaṇaḥ |
sarvaṃ vedmi kratukāryaṃ nānyā'pekṣā ca me tataḥ || 28 ||
[Analyze grammar]

ahaṃ jānāmi vedāṃśca vedmyahaṃ ca śubhāśubham |
brāhmaṇairnaiva me kāryaṃ kiṃ vastu brāhmaṇā iti || 29 ||
[Analyze grammar]

mamaivaṃvādino viprāḥ sarve krodhasamanvitāḥ |
ūcuḥ śāpaṃ durādharṣaṃ krūraḥ siṃho bhaviṣyasi || 30 ||
[Analyze grammar]

jñānaṃ te ca vinaṣṭaṃ syānmātyarthaṃ smaraṇaṃ tava |
mṛtyukāle kṛṣṇanārāyaṇaṃ nāma hi śroṣyasi || 31 ||
[Analyze grammar]

tadā muktirbhavitā te hyāruṇeḥ sannidhau paśo |
tvayā yadṛcchayā bhakṣyaṃ ṣaṣṭhakāle samāgatam || 32 ||
[Analyze grammar]

paśunṛpakṣijātīyaṃ yatte sthāsyati sannidhau |
yadeṣughātaṃ labdhvā tu prāṇaiḥ kaṇṭhagatairbhavān || 33 ||
[Analyze grammar]

śroṣyati śrīkṛṣṇanārāyaṇaṃ brāhmaṇavaktrataḥ |
tadā mokṣagatiste vai bhavitā nātra saṃśayaḥ || 34 ||
[Analyze grammar]

paravaktragataṃ cāpi viṣṇornāma śrutaṃ mayā |
kṛtadoṣo'pi vipro me mokṣadātā babhūva ha || 35 ||
[Analyze grammar]

yasya darśanamātreṇa pratyakṣo'bhavadacyutaḥ |
yaḥ punaḥ svamukhenaiva gṛhṇāti śrīnarāyaṇam || 36 ||
[Analyze grammar]

prāṇaprayāṇasamaye mukto bhavati vai dhruvam |
satyaṃ satyaṃ punaḥ satyamutkṣipya bhujamucyate || 37 ||
[Analyze grammar]

jaṃgamā brāhmaṇā devāstatrasthaḥ puruṣottamaḥ |
brāhmaṇasyā''ruṇeryogād gacchāmi śāśvataṃ padam || 38 ||
[Analyze grammar]

ityuktvā''ruṇimāpūjya yayau brahmākṣaraṃ padam |
āruṇiśca tato vyādhaṃ samuvāca prasannahṛt || 39 ||
[Analyze grammar]

jighṛkṣormṛgarājasya yat tvayā rakṣito'smyaham |
tat putra tuṣṭaste dadmi varaṃ varaya suvrata || 40 ||
[Analyze grammar]

vyādhaḥ prāha varaścāyaṃ yastvaṃ māṃ bhāṣase sa hi |
putratā tava santoṣaḥ kimasmādaparo varaḥ || 41 ||
[Analyze grammar]

ataḥ paraṃ vareṇā'haṃ kiṃ karomi praśādhi mām |
ṛṣiḥ prāha tvayā vyādha prārthito'haṃ tapo'rthinā || 42 ||
[Analyze grammar]

mayā kiñcittadā noktaṃ yataścāsīdaghī bhavān |
idānīṃ tava pāpāni tapasā mama rakṣayā || 43 ||
[Analyze grammar]

tathā me darśanenāpi kṛṣṇanāmaśrutena ca |
naṣṭāni śuddhadeho'si sāmprataṃ nātra saṃśayaḥ || 44 ||
[Analyze grammar]

tapaḥ kuruṣva sādho tvaṃ mokṣamevamavāpsyasi |
vyādhaḥ prāha bhavatoktaḥ kṛṣṇanārāyaṇaḥ prabhuḥ || 45 ||
[Analyze grammar]

sa kathaṃ prāpyate pāparatervai mādṛśairguro |
ṛṣiḥ prāha tamuddiśya sarvaṃ kuryāt samarpaṇam || 46 ||
[Analyze grammar]

saḥ paraṃ tamavāpnoti bhaktyā vratena karmaṇā |
evaṃ jñātvā ca tadbhaktyā sarvaṃ vrataṃ samācara || 47 ||
[Analyze grammar]

na bhakṣayedanaivedyaṃ na vadedanṛtaṃ kvacit |
japaṃ kuryāt sadā tasya dhyānaṃ kuryāddharestathā || 48 ||
[Analyze grammar]

etatte vratamādiṣṭaṃ mayā vyādha tathā kuru |
atraiva tapasā yuktastiṣṭha tvaṃ yāvadicchasi || 49 ||
[Analyze grammar]

evamuktvā muniḥ punaḥ salilā'ntarviveśa ha |
vyādho guruṃ smaraṃstepe tapastvāhāravarjitaḥ || 50 ||
[Analyze grammar]

kṣudhākāle śīrṇaparṇānyabhakṣayat kvacit kvacit |
śanaiḥ śanaistyaktavāṃśca parṇānāṃ bhakṣaṇaṃ tadā || 51 ||
[Analyze grammar]

nirāhārastapastepe smaran gurumatandritaḥ |
evaṃ tapasyatastasya durvāsā abhyagānmuniḥ || 52 ||
[Analyze grammar]

dadarśa śuṣkadehaṃ ca saprāṇaṃ vyādhameva saḥ |
tapastejo'nvitaṃ kṛṣṇanārāyaṇe sthitaṃ hṛdā || 53 ||
[Analyze grammar]

jñātvā ṛṣiṃ sa ca vyādho natvā ca śirasā munim |
uvāca taṃ kṛtārtho'smi bhagavan darśanāt tava || 54 ||
[Analyze grammar]

idānīṃ tvamatithirme prāpto'si daivataṃ mama |
śīrṇaparṇādibhiḥ kṛtvā prīṇayāmi dvijottamam || 55 ||
[Analyze grammar]

durvāsā api taṃ śuddhabhāvapūtaṃ jitendriyam |
jijñāsustattapaḥśraiṣṭhyamidamuccairuvāca ha || 56 ||
[Analyze grammar]

yavagodhūmaśālīnāmannaṃ miṣṭaṃ susaṃskṛtam |
dīyatāṃ me kṣudhārtāya tvāmuddiśyā''gatāya me || 57 ||
[Analyze grammar]

bhaktavyādho'yamityuktaścintāṃ paramikāṃ gataḥ |
kasmādāneyametādṛk kathaṃ tat saṃbhaven mama || 58 ||
[Analyze grammar]

evaṃ cintayatastasya smarataśca narāyaṇam |
gurośca kṛpayā vyomnaḥ pātraṃ saṃpatitaṃ śubham || 59 ||
[Analyze grammar]

sauvarṇaṃ siddhisaṃyuktaṃ tajjagrāha kareṇa saḥ |
tad gṛhītvā muniṃ prāha pratīkṣasva kṣaṇam ṛṣe || 60 ||
[Analyze grammar]

atraiva sthīyatāṃ yāvadbhikṣāṭanaṃ karomi ca |
tāvanmayi prasādaṃ tvaṃ guro vidhātumarhasi || 61 ||
[Analyze grammar]

evamuktvā sapātraḥ sa bhikṣāṃ yācitumeva ca |
nātidūreṇa nagaraṃ vṛkṣavallyādiśobhitam || 62 ||
[Analyze grammar]

lakṣyīkṛtya prayāti sma mārgavṛkṣādivallayaḥ |
tasya tatra prayātasya cāgrataḥ sarvaśobhanāḥ || 63 ||
[Analyze grammar]

vṛkṣebhyo niryayuḥ kanyā hemapātrāgrapāṇayaḥ |
vanadevyaśca sundaryaḥ pakvānnāni śubhāni ca || 64 ||
[Analyze grammar]

vyañjanāni ca peyāni coṣyāṇi bhojyakāni ca |
bhakṣyāṇi śubhalehyāni madhūni surasāṇi ca || 65 ||
[Analyze grammar]

dugdhāni ghṛtamiśrāṇi śarkarāpāyasāni ca |
vyañjanāni vividhāni tiktamiṣṭāmblakāni ca || 66 ||
[Analyze grammar]

ṣaṭpañcāśadvidhānyeva dadustā vanadevatāḥ |
sa ca kṛtārthamātmānaṃ matvā punarathāśramam || 67 ||
[Analyze grammar]

ājagāma ṛṣiṃ prāha bhikṣā prāptā yathepsitā |
brahman kṣālaya pādau tvamupaviśyā''sane śubhe || 68 ||
[Analyze grammar]

imāṃ gṛhāṇa bhikṣāṃ ca kuru māṃ puṇyabhājanam |
evamuktaḥ sa jijñāsustapo balaṃ punarmuniḥ || 69 ||
[Analyze grammar]

prāha bhaktaṃ ca taṃ vyādhaṃ nāsti pātraṃ jalasya me |
nadīṃ gantuṃ na śaknomi pātraṃ te'pi na vidyate || 70 ||
[Analyze grammar]

kathaṃ prakṣālanaṃ vyādha pādayorme bhavediti |
ityukto vyādhabhaktaḥ saḥ punaścintāparo'bhavat || 71 ||
[Analyze grammar]

anādiśrīkṛṣṇanārāyaṇaṃ smṛtvā guruṃ tathā |
smṛtvā jagāma śaraṇaṃ tāṃ tu nāganadīṃ tadā || 72 ||
[Analyze grammar]

uvāca praṇato bhūtvā sarit tvaṃ śaraṇaṃ mama |
vyādho'smi pāpakarmā'smi brahmahā'smi saridvare || 73 ||
[Analyze grammar]

tathāpi māṃ bhaktamatra pāhi te śaraṇāgatam |
devatāṃ naiva jānāmi na mantraṃ na tathā'rcanam || 74 ||
[Analyze grammar]

āruṇerme guroḥ pādau dhyātvā paśyāmi vai śubham |
evaṃ bhaktasya me devi kṛpāṃ kuru saridvare || 75 ||
[Analyze grammar]

ṛṣerāsannatāṃ yāhi pādaśaucārthamāpage |
evamuktvā nāganadī jalapravāharūpataḥ || 76 ||
[Analyze grammar]

ājagāma yatastasthau durvāsā vṛkṣamāśritaḥ |
tad dṛṣṭvā mahadāścaryaṃ durvāsā vismayaṃ yayau || 77 ||
[Analyze grammar]

prakṣālya hastapādau ca bhikṣānnaṃ śraddhayā ṛṣiḥ |
vubhuje paramaprītastathā''camya hasanmuhuḥ || 78 ||
[Analyze grammar]

taṃ vyādhaṃ śuṣkadehaṃ ca kṣudhā durbalatāṃ gatam |
varaṃ dadau te vedā vai sāṃgā sārthapadakramāḥ || 79 ||
[Analyze grammar]

brahmavidyāstathā sarvāḥ pratyakṣā vai bhavantu hi |
tvaṃ ca nāmnā satyatapā ṛṣiragryo bhaviṣyasi || 80 ||
[Analyze grammar]

vyādhaḥ prāha kathaṃ śūdro vedādhyayanavānaham |
ṛṣiḥ prāha śarīraṃ te gataṃ pāpamayaṃ dhruvam || 81 ||
[Analyze grammar]

tapomayaṃ śarīraṃ te dvitīyaṃ vartate'dhunā |
prāgajñānaṃ gataṃ nāśamidānīṃ jñānamāgatam || 82 ||
[Analyze grammar]

evaṃ tvaṃ śuddhakāyo'si satyametad bravīmi te |
dīkṣayā tapasā bhaktyā deho vai parivartate || 83 ||
[Analyze grammar]

tena vedādhyayanādi pratibhāsyati te'dhunā |
prāgavasthamadharmākhyaṃ parijñānavivarjitam || 84 ||
[Analyze grammar]

gataṃ te vyādhaśarīraṃ paraṃ dharmavratādimat |
idānīṃ vai samāpannaṃ bhaktipūtaṃ dvitīyakam || 85 ||
[Analyze grammar]

yastu bhāvaḥ purā hyāsīt prāṇino nighnatastava |
tatpāpākhyaṃ śarīraṃ te pāpasaṃjñaṃ gataṃ khalu || 86 ||
[Analyze grammar]

idānīṃ śubhasadvṛtti tapaārjavabhaktimat |
dvitīyāṃ dharmarūpaṃ tu śarīraṃ te vyavasthitam || 87 ||
[Analyze grammar]

vyādhaḥ prāha ṛṣiṃ nārāyaṇo vai sādhanaṃ vinā |
kathamārādhanīyaścā'parigraheṇa yoginā || 88 ||
[Analyze grammar]

durvāsāḥ prāha manasā pūjanaṃ sarvathā''caret |
na dhanaṃ vā kulaṃ tatra sampadvā samapekṣyate || 89 ||
[Analyze grammar]

bhāvena bhagavān nityaṃ tuṣyatyeva janārdanaḥ |
snātvā dhyātvā hariṃ nityaṃ mānasairupacārakaiḥ || 90 ||
[Analyze grammar]

pūjayed bhāvayennīrājayet kṣamāpayettathā |
puṣpāṃjaliṃ jalamarghaṃ dadyād dadyācca mānasam || 91 ||
[Analyze grammar]

ātmārpaṇaṃ prakuryācca tena tuṣyejjanārdanaḥ |
sadhanainirdhanaiścāpi prāpyate parameśvaraḥ || 92 ||
[Analyze grammar]

api koṭiśreṣṭhadānairbhaktihīnairna tuṣyati |
sabhaktestu patramātradānenā'pi pratuṣyati || 93 ||
[Analyze grammar]

jalena candanenāpi puṣpamātreṇa tuṣyati |
tritasya khalu bhāvena kardamenāpi cārcitāḥ || 94 ||
[Analyze grammar]

jalena vai surāḥ sarve santuṣṭā hi nidarśanam |
prahlādasya japenaiva tuṣṭaḥ śrībhagavān hariḥ || 95 ||
[Analyze grammar]

gopīnāṃ śrīkṛṣṇanārāyaṇastuṣṭo hṛdarpaṇāt |
lakṣmyā dāsyena santuṣṭaḥ kṛṣṇanārāyaṇaḥ prabhuḥ || 96 ||
[Analyze grammar]

pārvatyāśca tvaparṇāyāḥ santuṣṭaḥ śaṃkaraḥ svayam |
ambarīṣasya bhagavāṃstuṣṭo bhāvena pūjayā || 97 ||
[Analyze grammar]

evaṃ śrīmatkṛṣṇanārāyaṇo'kṣarādhipaḥ prabhuḥ |
bhāvabhaktyā prasannaḥ syānna vinā bhāvamacyutaḥ || 98 ||
[Analyze grammar]

devatā guravaḥ santaḥ pitaro dharma īśvaraḥ |
mokṣaḥ phalaṃ sadityetacchraddhāgamyaṃ hi bhāvitam || 99 ||
[Analyze grammar]

bhaktiḥ sevā vyavahāraścopārjanaṃ ca melanam |
arthaḥ siddhiḥ sukhaṃ caitat kriyāsādhyaṃ tadaṣṭakam || 100 ||
[Analyze grammar]

mantro vidyā ca kalaho gāyanaṃ japa āhvanam |
upadeśo'rthavādaśca vāṇīsādhyaṃ tadaṣṭakam || 101 ||
[Analyze grammar]

gṛhāṇi ca striyo ramyāḥ putrāścājñākarāḥ kṣitiḥ |
yaśo mānaṃ patiḥ pārśvāḥ puṇyasādhyaṃ tadaṣṭakam || 102 ||
[Analyze grammar]

śāntistṛptirvirāgaśca śreyaḥ puṇyaṃ ca mokṣaṇam |
nivṛttiścopakāraśca jñānasādhyaṃ tadaṣṭakam || 103 ||
[Analyze grammar]

pṛthvī prāha purā devo vārāho jalamagnikān |
jalaplutāṃ mahīṃ dadyānnārāyaṇāya bhāvataḥ || 104 ||
[Analyze grammar]

tathāpyahaṃ prasannaḥ syāṃ pṛthvyāṃ raso'smi vai yataḥ |
tvayā devi smṛtaścāhaṃ jalena pūjitastathā || 105 ||
[Analyze grammar]

tvadrakṣārthaṃ samāyāto vārāhaṃ rūpamāsthitaḥ |
evaṃ me bhāvayuktena manasā śaraṇaṃ vrajet || 106 ||
[Analyze grammar]

tasyā'haṃ sarvathā tuṣṭo mokṣaṃ dadāmi tadvaśaḥ |
dvādaśyāṃ ca prage pūjāṃ yaḥ karoti tu bhāvataḥ || 107 ||
[Analyze grammar]

tasyā'haṃ brahmalokaṃ ca dadāmi śāśvataṃ kṣite |
ityuktvā pṛthivīṃ kroḍa uddadhāra jalopari || 108 ||
[Analyze grammar]

ityevaṃ pārvatīṃ lakṣmi śaṃbhuḥ prāha prabhāsake |
paṭhanācchravaṇāccāsya brahmalokaphalaṃ bhavet || 109 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne āruṇeḥ sannidhau siṃhasya muktiḥ vyādhakṛtā viprarakṣā tapaścaryā ca vaidikasya dīrghabāhorviprāṇāmavamānāt siṃho bhaveti śāpaḥ tapasyato vyādhasya prārthanayā''ruṇeḥ pādaprakṣālitavatī nāgamatī nadī vyādhasya pāvitryaṃ |
satyatapānāmaṛṣitvaṃ durvāsasā kṛtajñānopadeśaścetyādinirūpaṇanāmā dvācatvāriṃśadadhikapañcaśatatamo'dhyāyaḥ || 542 ||
[Analyze grammar]