Chapter 541

śrīnārāyaṇa uvāca |
śṛṇu lakṣmi nandatīrthaṃ śaṃkareṇa yathoditam |
pārvatyai te kathayāmi nando bhāgavato hyabhūt || 1 ||
[Analyze grammar]

oṃ namaḥ śrīkṛṣṇanārāyaṇāya svāmine namaḥ |
itimantro vaśiṣṭhādvai gṛhītastena bhūbhujā || 2 ||
[Analyze grammar]

mahābhāgavato hyāsīnnārāyaṇaparāyaṇaḥ |
na durbhikṣaṃ na cā vyādhirnā'kāle maraṇaṃ nṛṇām || 3 ||
[Analyze grammar]

na caurā na ca kāpaṭyaṃ na cā'vṛṣṭyādikaṃ bhayam |
tasmin śāsati rājendre prajāścāsan sukhāḥ sadā || 4 ||
[Analyze grammar]

vimānaṃ tasya tuṣṭena dattaṃ vai viṣṇunā svayam |
vyacaran sarvalokān sa vimānavaramāsthitaḥ || 5 ||
[Analyze grammar]

ekadā vyacaran bhūmau mānasaṃ tu saro yayau |
devādisevitaṃ padmasugandhaparivāsitam || 6 ||
[Analyze grammar]

divyavārisamāyuktaṃ śītatṛptipradaṃ śubham |
tatrā'paśyacchubhaṃ padmaṃ vikasitaṃ ca pāṇḍuram || 7 ||
[Analyze grammar]

tatrā'pyaṃguṣṭhamātraṃ ca sthitaṃ puruṣasattamam |
apaśyaccā'kathayat svasārathiṃ gaccha vai jalam || 8 ||
[Analyze grammar]

yadidaṃ dṛśyate padmaṃ puruṣeṇa virājitam |
ratnahārāliśobhena pītavastrādidhāriṇā || 9 ||
[Analyze grammar]

dvibhujena sudivyena madhyabhāge hyadhiṣṭhitam |
tadidaṃ kamalaṃ śīghraṃ samānaya mamāntikam || 10 ||
[Analyze grammar]

dhārayiṣyāmi śirasi bhaviṣyāmi kṛtārthakaḥ |
evamuktaḥ sārathistu vimānādavaruhya ca || 11 ||
[Analyze grammar]

vyomnā vāyusamādhāraścāvātatāra padminīm |
adhomastakasthityaiva hastaṃ prasārya yāvatā || 12 ||
[Analyze grammar]

vyomnaiva gṛhītuṃ yāti tatpadmaṃ nālasaṃsthitam |
yāvatā spṛśati tāvad dhūmrastasmādajāyata || 13 ||
[Analyze grammar]

andhakāramaye tatra vyomni mamāra sārathiḥ |
nando vimānamadhye ca kṛṣṇavarṇo babhūva ha || 14 ||
[Analyze grammar]

balavīryavihīnaśca medhāśaktivivarjitaḥ |
unmatta iva sañjāto mlānaśuṣkānanastathā || 15 ||
[Analyze grammar]

kajjalapiṇḍavaddehaṃ dṛṣṭvā śuśoca bhūpatiḥ |
kimidaṃ me tu sañjātaṃ mṛtaśca sārathirmama || 16 ||
[Analyze grammar]

kopo'yaṃ kasyacijjāto vasiṣṭho māṃ prarakṣatu |
ityuktamātrastu gururvasiṣṭhastatra cāyayau || 17 ||
[Analyze grammar]

yogabalena ca yāne samāgatyā''ha bhūpatim |
mā bhayaṃ yāhi rājendra kuśalaṃ śaṃ tavā'stu vai || 18 ||
[Analyze grammar]

rājā vasiṣṭhaṃ dṛṣṭvā ca viśokaḥ samapadyata |
namaskāraṃ vidhāyaiva dīnavannijagāda tam || 19 ||
[Analyze grammar]

eṣa me bhagavan jātaḥ kṛṣṇo dehaviparyayaḥ |
sārathirmama naṣṭaśca kamalasya prabhāvataḥ || 20 ||
[Analyze grammar]

kimidaṃ vada me brahman nistāraṃ kārayā'sya vai |
vasiṣṭhaḥ prāha rājendra mānase'tra sarovare || 21 ||
[Analyze grammar]

etad brahmodbhavaṃ nāma kamalaṃ padmajātikam |
nārāyaṇasya nābhervai yadā brahmā vyajāyata || 22 ||
[Analyze grammar]

sanālakamale tadvai padmametannigadyate |
tajjātīyaṃ tu kamalaṃ mānase'tra sarovare || 23 ||
[Analyze grammar]

vaṃśarūpeṇa bhagavān rakṣatyeva paramparām |
etadīyasusantāne kamale sarvadā hyajaḥ || 24 ||
[Analyze grammar]

aṃguṣṭhamātrapratimo brahmā tatra virājate |
yāvanti kamalānyatra tasya santānajāni hi || 25 ||
[Analyze grammar]

tāvanti brahmaṇā cādhivāsitāni bhavanti vai |
nānye paśyanti caitāni puṇyahīnā hi dehinaḥ || 26 ||
[Analyze grammar]

supuṇyā mokṣagantāraḥ paśyantyetattu padmakam |
dṛṣṭamātreṇa cānena dṛṣṭāḥ syuḥ sarvadevatāḥ || 27 ||
[Analyze grammar]

etadvai dṛśyate dhanyairbrahmabhāgavatairjanaiḥ |
mahābhāgavatairlokairyat tvayā dṛṣṭameva hi || 28 ||
[Analyze grammar]

etasmin dṛṣṭamātre tu jalasparśe ca vai kṛte |
sarvaśokavinirmuktaḥ padaṃ nirvāṇamāpnuyāt || 29 ||
[Analyze grammar]

sārathistava rājendra dadarśa kamalaṃ tathā |
pasparśa ca jalaṃ nālaṃ muktiṃ jagāma tāvatā || 30 ||
[Analyze grammar]

ahaṃ nityaṃ darśanārthaṃ tvāyāmi vyomamārgataḥ |
na spṛśāmi jalaṃ kintu natvā taṃ pitaraṃ hyajam || 31 ||
[Analyze grammar]

punargacchāmi me sthānaṃ puṣkaraṃ cārbudācalam |
tvaṃ tu mahāvaiṣṇavo'si dṛṣṭavānasi tena vai || 32 ||
[Analyze grammar]

savedhasaṃ ca kamalaṃ tava puṇyaṃ hi śāśvatam |
jalaṃ na spṛṣṭvāṃstena rājan jīvasi vardhase || 33 ||
[Analyze grammar]

kintu padmaṃ ca hartuṃ te vāñcchā jātā nṛpeśvara |
tena kārṣṇyaṃ tava jātaṃ doṣeṇa nīlavarṇatā || 34 ||
[Analyze grammar]

vāñchanti devatā nityaṃ munayaḥ ṛṣayastathā |
mānase brahmapadmaṃ tu drakṣyāmastat kadā vayam || 35 ||
[Analyze grammar]

prāpsyāmaśca paraṃ brahma yadgatvā na nivartanam |
evaṃ tejoviśiṣṭaṃ tat hartuṃ kāmena paṃkajam || 36 ||
[Analyze grammar]

apahārapradoṣaśca tvayā labdho hyajānatā |
tato rājan padmasaṃsthaṃ bedhoyuktaṃ narāyaṇam || 37 ||
[Analyze grammar]

kṛṣṇanārāyaṇakṣetre gatvā''rādhaya somake |
prabhāse śrīkṛṣṇanārāyaṇaṃ ca vedhasā yutam || 38 ||
[Analyze grammar]

svarṇapadme kārayitvā samārādhaya tāpasaḥ |
tatastvaṃ nīlatādoṣānmokṣyase nātra saṃśayaḥ || 39 ||
[Analyze grammar]

vaśiṣṭhasya vacaḥ śrutvā nandabhūpo jagāma ha |
kuṃkumavāpikākṣetramaśvapaṭṭasarovaram || 40 ||
[Analyze grammar]

tatra snātvā kṛṣṇanārāyaṇaṃ natvā ca lomaśam |
raivatādrau vāmanaṃ ca yayau natvāprabhāsakam || 41 ||
[Analyze grammar]

tatra vai kānakīṃ mūrtiṃ padmasthāṃ brahmaṇāyutām |
anādiśrīkṛṣṇanārāyaṇarūpāṃ nidhāya ca || 42 ||
[Analyze grammar]

pūjayāmāsa vividhairupacārairdivāniśam |
tapaścakāra bhagavatsamārādhanapūrvakam || 43 ||
[Analyze grammar]

viṣṇuṃ śivaṃ gaṇapatiṃ pārvatīṃ ca divākaram |
pūjayāmāsa vidhinā śrīhariṃ pañcadevatāḥ || 44 ||
[Analyze grammar]

māheśvaryāstaṭe ramye tapaḥsthānaṃ cakāra saḥ |
tasya tapastathā bhaktiṃ vilokya devatāstathā || 45 ||
[Analyze grammar]

brahmā kṛṣṇastathā lakṣmīrdarśanaṃ pradadustadā |
prasannāḥ sma iti prāhurvaraṃ vṛṇu yathepsitam || 46 ||
[Analyze grammar]

rājā prāha harerbhakto naiva vāñchati caihikam |
mokṣaṃ dehi satāṃ saṃgaṃ pradehi śāśvataṃ padam || 47 ||
[Analyze grammar]

anādiśrīkṛṣṇanārāyaṇaḥ prāha hasaṃstadā |
rājan tattu tvadarthaṃ vai mayā prāgeva niścitam || 48 ||
[Analyze grammar]

na me bhaktasya vai bhuktau muktau vā rodhanaṃ bhavet |
prasanno'smi ca rājaṃste kṛṣṇatā padmadoṣajā || 49 ||
[Analyze grammar]

yā jātā'si layaṃ yātu bhava campakavarṇakaḥ |
divyadehastathā bhūtvā bhaja māṃ puruṣottamam || 50 ||
[Analyze grammar]

atrā''gatya jano yo māṃ kṛṣṇanārāyaṇaṃ prabhum |
vedhasaṃ pañcadevāṃśca sūryādīn pūjayiṣyati || 51 ||
[Analyze grammar]

sa ca loke nirogī syād yāsyatyante parāṃ gatim |
evaṃ harirvaraṃ datvā kṛtvā suvarṇavarṇakam || 52 ||
[Analyze grammar]

tatra tīrthaṃ paraṃ kṛtvā tataścāntaradhīyata |
nandīghaṭṭe naraḥ snātvā bhuktiṃ muktimavāpnuyāt || 53 ||
[Analyze grammar]

nandatīrthaṃ tathā kṛtvā na punarmartyatāṃ vrajet |
nandatīrthasya pārśve ca tritakūpākhyamuttamam || 54 ||
[Analyze grammar]

pāvanaṃ vartate tīrthaṃ kartavyaṃ puṇyalabdhaye |
purā saurāṣṭraviṣaye vipra ātreyasaṃjñakaḥ || 55 ||
[Analyze grammar]

babhūva tasya putrāścaikato dvitastritastrayaḥ |
tritaḥ sarvaguṇopeto mūrkhau jyeṣṭhau babhūvatuḥ || 56 ||
[Analyze grammar]

gate svarge tu pitari dhuraṃ jagrāha vai tritaḥ |
tasya buddhiḥ samutpannā kathaṃ yajñaṃ karomyaham || 87 ||
[Analyze grammar]

sa nimantrya dvijaśreṣṭhān yajñakarmaṇyadhiṣṭhitān |
yajñārthaṃ dravyalābhāya pravāsaṃ prajagāma ha || 58 ||
[Analyze grammar]

gṛhītvā bhrātarau jyeṣṭhau gavārthaṃ prasthitastritaḥ |
yasya yasya gṛhe yāti grāmeṣu bhrātṛsaṃyutaḥ || 59 ||
[Analyze grammar]

tatra tatra parāṃ pūjāṃ lebhe gāśca supuṣkalāḥ |
evaṃ dravyaṃ puṣkalaṃ ca godhanaṃ vipulaṃ tathā || 60 ||
[Analyze grammar]

gṛhītvā gṛhamāyāti bhrātṛbhyāṃ sahitaḥ sa ca |
trito gavāṃ puro yāti pṛṣṭhato bhrātarau ca tau || 61 ||
[Analyze grammar]

atha taṃ godhanaṃ dṛṣṭvā bhūridānārthamāhṛtam |
jyeṣṭhayostu matirjātā pāpaprāyā'tilobhataḥ || 62 ||
[Analyze grammar]

parasparamūcatustau bhrātarau pāpacetasau |
trito yajñeṣu kuśalo vedeṣu kuśalastathā || 63 ||
[Analyze grammar]

mānyaḥ pūjyaśca sarveṣāmāvāṃ mūrkhau nirarthakau |
etacca godhanaṃ sarvaṃ trito dāsyati dānake || 64 ||
[Analyze grammar]

asmākaṃ na bhavet kiñcit pratyuta yatpiturdhanam |
tasmādapi pradātavyaṃ bhaviṣyati kratau tadā || 65 ||
[Analyze grammar]

yajñe lokāśca dāsyanti dhanāni ca bahūnyapi |
tritasya tāni sarvāṇi nāvayorvai kapardikā || 66 ||
[Analyze grammar]

tasmādāvāṃ dhanahīnau trito dhanāḍhya eva ca |
bhaviṣyati tato hetorvadhastritasya yujyate || 67 ||
[Analyze grammar]

evaṃ vicārya tau jyeṣṭhau yāntaṃ tritaṃ puraḥ puraḥ |
āhvayāmāsatuḥ kūpaṃ dṛṣṭvā jalārthinau yathā || 68 ||
[Analyze grammar]

jalapānaṃ kariṣyāmaḥ samāgacchā'tra bho trita |
tritaḥ śrutvā samāyāto dvābhyāṃ kṣipto hi kūpake || 69 ||
[Analyze grammar]

tatastau godhanaṃ nītvā dravyaṃ nītvā ca puṣkalam |
prasthitau svagṛhaṃ hṛṣṭamānasau lobhakāriṇau || 70 ||
[Analyze grammar]

kūpe ca patito vipraścintayāmāsa mānase |
viprā yajñārthamāhūtāḥ kraturmayā kṛto nahi || 71 ||
[Analyze grammar]

tasmāt yadbhāvi tajjātaṃ kūpe'tra mānasaṃ kratum |
karomi yāvajjīvāmi jalena manasā tathā || 72 ||
[Analyze grammar]

iti vicintya sūktāni proktvā proktvā jalena vai |
añjalinā ca havanaṃ cakāra kardamena saḥ || 73 ||
[Analyze grammar]

śraddhayā tasya dadato bhūyastṛptāstu devatāḥ |
āgatya brāhmaṇaṃ procurvipra santarpitā vayam || 74 ||
[Analyze grammar]

tuṣṭāḥ sma mānasairbhāvairvada dāsyāma īpsitam |
tritaḥ prāha mayā yajño bhāvayajño'tra vai kṛtaḥ || 75 ||
[Analyze grammar]

dravyayajñaṃ gṛhe gatvā karomi tattathā mama |
svāsthyaṃ kuruta deveśā kūpānniḥsaraṇaṃ mama || 76 ||
[Analyze grammar]

ityuktāśca surā vipraṃ nītavanto jalādbahiḥ |
gṛhe gatvā kratuṃ kṛtvā bhrātṛbhyāṃ pūjitaśca saḥ || 77 ||
[Analyze grammar]

dakṣiṇā vividhā datvā punaḥ kūpaṃ yayau tritaḥ |
tapaścacāra vipulaṃ kṛṣṇanārāyaṇaṃ smaran || 78 ||
[Analyze grammar]

jagāma śrīharerdhāma divyayānena śāśvatam |
sa kūpastritakūpo'sti devatīrthaṃ tu pāvanam || 79 ||
[Analyze grammar]

jalapānād bhavenmuktistritasya smaraṇādapi |
śravaṇātpaṭhanāccāsya vaikuṇṭhaṃ labhate janaḥ || 80 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne |
nandarājñaḥ sāratheḥ mānasasarasi brahmakamaladarśane grahaṇārthaṃ |
gatasya muktiḥ nandasya manasā grahaṇapāpasya phalaṃ kṛṣṇavarṇatā nandītīrthasnānācchubhravarṇatā tritaviprasya bhrātṛdvayakṛtakūpanikṣepastatra jalayajñe devatābhiḥ kṛtoddhārastapaścaryā muktiśceti tritatīrtham ityādi nirūpaṇanāmaikacatvāriṃśadadhikapañcaśatatamo'dhyāyaḥ || 541 ||
[Analyze grammar]