Chapter 503

śrīnārāyaṇa uvāca |
śṛṇu lakṣmi kathāṃ munerjābālermokṣakāriṇīm |
jabālāyāḥ ṛṣidāsyāḥ putro jābālisaṃjñakaḥ || 1 ||
[Analyze grammar]

brāhmaṇasya tu bījena samutpanno babhūva ha |
kaumārabrahmacaryeṇa yena cīrṇaṃ tapaḥ sadā || 2 ||
[Analyze grammar]

kṛcchracāndrāyaṇādīni pārākāṇi śanaiḥ śanaiḥ |
kurvatā'nena vai devā saṃnītā bhayagocaram || 3 ||
[Analyze grammar]

tato devā hi militāścakrurvighnasya mantraṇām |
raṃbhāṃ sapreṣayāmāsurbrahmacaryavighātinīm || 4 ||
[Analyze grammar]

brahmacaryaṃ tapomūlaṃ siddhisampādakaṃ mahat |
ābālād brahmacārī ca jābālistejasā mahān || 5 ||
[Analyze grammar]

kāmadharmaṃ na jānāti nārīsaṃgamavarjitaḥ |
tasya kṣobhāya ca devaṃ vasanta sāyudhaṃ tathā || 6 ||
[Analyze grammar]

kāmaṃ ratiṃ tathā prītiṃ preṣayāmāsurīśvarāḥ |
indrājñayā gatāḥ sarve hāṭakeśvarabhūtalam || 7 ||
[Analyze grammar]

jābāleḥ parṇaśālāyāḥ sannidhau kusumākaraḥ |
cakre'kasmādaśokasya suśobhāṃ puṣpasañcayaiḥ || 8 ||
[Analyze grammar]

tilakānāṃ ca cūtānāṃ śobhāṃ mañjarikādibhiḥ |
sarojāni samantācca vikāsaṃ prāpuruttamam || 9 ||
[Analyze grammar]

vavau ca surabhirvāyurdākṣiṇātyaḥ smarapradaḥ |
tatrāntare tasya muneḥ raṃbhā sāmīpyamāgatā || 10 ||
[Analyze grammar]

muniḥ paśyati yāvat tāṃ sā'pi vastraṃ vihāya ca |
samīpavartisalile saṃsnātuṃ praviveśa ha || 11 ||
[Analyze grammar]

vivastrāṃ tāṃ samālokya kāmasya vaśago'bhavat |
pulakāṃcitasarvāṃgaḥ kṣubhitaścā'bhavat tataḥ || 12 ||
[Analyze grammar]

rambhā jalād vinirgatya vastramāvṛtya cārdhakam |
ārdrarūpā muneḥ pārśve gatā nanāma sasmitā || 13 ||
[Analyze grammar]

provāca madhuraṃ brahmannāśrame kuśalaṃ kimu |
muniḥ prāha sadā me'sti kuśalaṃ ca tavāgamāt || 14 ||
[Analyze grammar]

kā tvaṃ devī mānuṣī vā mama manmathavardhinī |
rambhā prāha kathaṃ gātre svedaste vikṛtistathā || 15 ||
[Analyze grammar]

muniḥ prāha tavā''lokāt svedo me manmathodbhavaḥ |
brahmacaryaparasyāpi mahāvrate'pi vartinaḥ || 16 ||
[Analyze grammar]

rambhā prāha ca yadyeva māṃ bhajasva yathāsukham |
nātra kaścid bhaved doṣo bhajamānā'smi yat svayam || 17 ||
[Analyze grammar]

apsaro'haṃ svargapatnī tava bhaktāṃ bhajasva mām |
yo nārīṃ kāmasantaptāṃ svayaṃ prāptāṃ parityajet || 18 ||
[Analyze grammar]

nārīniḥśvāsadagdhaḥ sa sarvathā hīyate janaḥ |
evamuktvā tayā so'pi pariṣvakto mahāmuniḥ || 19 ||
[Analyze grammar]

evaṃ tayā samaṃ reme sthito yāvaddinakṣayam |
tato niṣkāmatāṃ prāpto visasarja ca tāṃ tataḥ || 20 ||
[Analyze grammar]

sā ca gatvā surānprāha kṣobhito vai mahāmuniḥ |
tapastasya hataṃ sarvamindra tvaṃ sukhabhāg bhava || 21 ||
[Analyze grammar]

atha dadhre munergarbhaṃ suṣuve sā ca bālikām |
muniryatra punaścakre tapastatra yayau ca sā || 22 ||
[Analyze grammar]

nītvā sarojapatrākṣīṃ kanyāṃ candraśubhānanām |
gatvā''śrame ṛṣeragre mumocedaṃ ca sā'bravīt || 23 ||
[Analyze grammar]

tava vīryasamutpannāṃ mama garbhe praropitām |
kanyakāṃ te sutāṃ divyāṃ paripālaya te namaḥ || 24 ||
[Analyze grammar]

na svarge vidyate vāso mānuṣāṇāṃ kathaṃcana |
etasmāt kāraṇāt tubhyaṃ datvā yāmi divaṃ punaḥ || 25 ||
[Analyze grammar]

evamuktvā yayau raṃbhā jābāliḥ snehapūritaḥ |
kanyāṃ tāṃ pālayāmāsa rasairmiṣṭaphalodbhavaiḥ || 26 ||
[Analyze grammar]

vardhate sma mṛgaiḥ sārdhaṃ krīḍati sma ca pakṣibhiḥ |
tasyarṣeḥ sarvakāryeṣu sāhāyyaṃ sma karoti ca || 27 ||
[Analyze grammar]

samitkuśādi ca vanādānayāmāsa nityadā |
ekadā svāśramād dūraṃ phalārthaṃ sā jagāma ca || 28 ||
[Analyze grammar]

tadā vyomnā vimānasthaścitrāṃgadābhidho divaḥ |
gāndharvo niryayau dṛṣṭvā'vatīrya tāṃ jagāda ca || 29 ||
[Analyze grammar]

kā tvaṃ caikākinī bāle vane bhramasi kanyake |
kanyā prāha ca jābāle kanyā phalavatī hyaham || 30 ||
[Analyze grammar]

phalapuṣpārthamāyātā samīpe me pitā'sti ca |
citrāṃgadastadovāca pitā te bhāryayā vinā || 31 ||
[Analyze grammar]

kumārabrahmacārī tvāṃ janayāmāsa vai katham |
kanyovāca mama mātā rambhānāmnyapsarovarā || 32 ||
[Analyze grammar]

muniṃ saṃsevya taddvārā putrīṃ prāpa tataḥ pitā |
jābālirme janako'sti poṣitā tena sadrasaiḥ || 33 ||
[Analyze grammar]

citrāṃgadastataḥ prāha varārohe bhajasva mām |
ahaṃ citrāṃgado nāma gandharvastridivaukasām || 34 ||
[Analyze grammar]

kanyā prāha kumāryasmi tathā ca vaśagā pituḥ |
tasmātprārthaya me tātaṃ sa māṃ tubhyaṃ pradāsyati || 35 ||
[Analyze grammar]

mamāpi rocate citte bhavān yuvā surūpavān |
citrāṃgadaḥ prāha śaknomyarthayituṃ na vai tathā || 36 ||
[Analyze grammar]

ko jānāti hi taccittaṃ kīdṛgrūpaṃ bhaviṣyati |
kanyā prāha ca yadyevaṃ vinā''jñā kiṃ karomyaham || 37 ||
[Analyze grammar]

jānīyāccet pitā me tvāṃ māṃ cāpi sampradhakṣyati |
iti pravadamānāṃ tāmadhīraścitrakāṃgadaḥ || 38 ||
[Analyze grammar]

jagrāha cāṃke prabalo reme tayā vanadrume |
sāpi kāmena saṃvyāptā ramayāmāsa taṃ muhuḥ || 39 ||
[Analyze grammar]

divyabhāvaṃ parityajya kāmabhāvamupāśritā |
divaso nirgataḥ sāyaṃ gataṃ tad bubudhe na sā || 40 ||
[Analyze grammar]

jābāliratha taccintāmagno duḥkhasamanvitaḥ |
anāyātāṃ sutāṃ vipadgatāṃ jñātvā niśāmukhe || 41 ||
[Analyze grammar]

paribabhrāma sarvatrā'nveṣayituṃ vane vane |
aho vyāghrairbhakṣitā kiṃ vṛkṣāt sampatitā kimu || 42 ||
[Analyze grammar]

agādhajalamagnā vā nītā vā'nyena vai balāt |
ityevaṃ ca parivadan babhrāma śokakarṣitaḥ || 43 ||
[Analyze grammar]

kaṃcicchabdaṃ samākarṇya matvā bālāṃ prayāti tam |
atha vṛkṣatale śabdaṃ śuśrāva kanyakākṛtam || 44 ||
[Analyze grammar]

śīghraṃ tatra samāyāto dadarśa sanarāṃ sutām |
krodhāviṣṭo gṛhītvā ca kāṣṭhaṃ dudrāva taṃ naram || 45 ||
[Analyze grammar]

dhikdhik pāpa vane putryāḥ kaumāryaṃ dūṣitaṃ tvayā |
tvayā putri lāñcchanaṃ ca dattaṃ loke mamopari || 46 ||
[Analyze grammar]

tasmādenaṃ tathā tvāṃ ca nāśayāmīti saṃvadan |
prahāraṃ yāvat kṣipati tāvat citrāṃgado'mbare || 47 ||
[Analyze grammar]

adṛśyo'bhūcca sā kanyā vivastrā śaktivarjitā |
piturbhayācca tatraiva niṣasāda prakampitā || 48 ||
[Analyze grammar]

muniḥ kāṣṭhaprahāreṇa santāḍya patitāṃ kṣitau |
mṛtāṃ matvā ca visṛjya yāvat paśyati cāmbare || 49 ||
[Analyze grammar]

tāvaccitrāṃgado dṛṣṭo vimānena divaṃ vrajan |
śapto muninā drāk saḥ kuṣṭhī bhava patātra ca || 50 ||
[Analyze grammar]

gāndharvastu papātorvyāṃ kuṣṭhī jātaḥ kṣaṇāttadā |
prāha kuru kṣamāṃ mahyaṃ putryai dayāyuto bhava || 51 ||
[Analyze grammar]

bhūtaṃ tad bhūtamevā'tra svalpaḥ kopo hi sādhuṣu |
jābālistaṃ tadā prāha daṇḍapātraṃ vicārya vai || 52 ||
[Analyze grammar]

yathā putrī tathā tvaṃ ca vastrahīnaḥ sadā bhava |
ubhau tvatra sadā nagnau tiṣṭhata vai vanadrume || 53 ||
[Analyze grammar]

yadyanyatrā'gamiṣyataṃ śiraḥsphoṭo hi vāṃ bhavet |
evaṃ śāpaṃ tu tau prāptau kṣetre śrīhāṭakeśvare || 54 ||
[Analyze grammar]

tatraiva tau tathā ruddhvā munirnijāśramaṃ yayau |
caitramāse śuklapakṣe niśārdhe bhagavān haraḥ || 55 ||
[Analyze grammar]

yoginībhistatra rantuṃ daivāt samāyayau vane |
tatra tadā hyubhābhyāṃ ca nagnābhyāṃ gāyanaṃ tathā || 56 ||
[Analyze grammar]

nartanaṃ ca kṛtaṃ śaṃbhoḥ prasādārthaṃ muhurmudā |
śaṃbhustuṣṭaścakārainaṃ gandharvaṃ nirujaṃ tadā || 57 ||
[Analyze grammar]

vyomagāmitvasāmarthyaṃ gaṇatvaṃ ca dadau haraḥ |
kanyāṃ tāṃ yoginītvaṃ ca vyomagāmitvamādadau || 58 ||
[Analyze grammar]

oṃ namaḥ śrīkṛṣṇanārāyaṇāya pataye namaḥ |
iti mantraṃ dadau tābhyāṃ dadau tulasīmālikām || 59 ||
[Analyze grammar]

bhaktau tau vaiṣṇavau jātau hāṭakeśvaratīrthake |
citrāṃgadena saṃśapto jābāliśca nirambaraḥ || 60 ||
[Analyze grammar]

janahāsyāspado nityaṃ yathā'haṃ tvaṃ tathā bhava |
itiśāpena saṃdagdho garhayāmāsa yoṣitam || 61 ||
[Analyze grammar]

aho pāpātmanāṃ puṃsāṃ yoṣitsaṃgo hi jāyate |
sakṛd yoṣitprasaṃgena mama duḥkhaṃ hi kīdṛśam || 62 ||
[Analyze grammar]

ājanmamaraṇaṃ yāvatpāpaṃ prāptaṃ vivastrakam |
tarhi strīṣu prasaktānāṃ kā gatirityacintayat || 63 ||
[Analyze grammar]

evaṃ tasya bruvāṇasya putrī prāha ca yoginī |
etaccarācaraṃ viśvaṃ strībhiḥ sandhāryate śubham || 64 ||
[Analyze grammar]

kathaṃ tāṃ nindasi pitarnindako duḥkhamavāpnuyāt |
pitā prāha striyaḥ śaśvat sarvāvasthāsu duḥkhadāḥ || 65 ||
[Analyze grammar]

iha loke paratrāpi tābhyaḥ saukhyaṃ na labhyate |
putrī prāha pitaste vai buddhirnāsti damo na ca || 66 ||
[Analyze grammar]

kimantyajo'pi tatkarma kurute yat tvayā kṛtam |
ahaṃ kāṣṭhaprahāreṇa tvayā prahāritā muhuḥ || 67 ||
[Analyze grammar]

strīhatyodbhavapāpasya cintā nā'bhūcca te hṛdi |
viśeṣeṇa sutāyāśca kā te gatirbhaviṣyati || 68 ||
[Analyze grammar]

śapkā'haṃ sarvadā nagnabhāve tvatpātakaṃ ca te |
nityaṃ navanavotthaṃ manniśvāsajaṃ mahattaram || 69 ||
[Analyze grammar]

kalpānte'pi ca te tasya naivā'ntaḥ saṃbhaviṣyati |
tasmād bhuṃkṣva tathaiva tvaṃ gandharvaśāpataḥ pitaḥ || 70 ||
[Analyze grammar]

na bhūyo nindasi prāyo na ca saṃtāḍayiṣyasi |
anindyā yoṣitaḥ sarvā naitā dūḥṣyanti karhicit || 71 ||
[Analyze grammar]

māsi māsi rajo hyāsāṃ duṣkṛtaṃ parikarṣati |
pitā prāha striyaḥ pāpā naitāḥ śuddhyanti karhicit || 72 ||
[Analyze grammar]

sutā prāha na caivaṃ vai vedoktaṃ śṛṇu śāsanam |
brāhmaṇāḥ pādato medhyā gāvo medhyāstu pucchataḥ || 73 ||
[Analyze grammar]

ajāśca mukhato medhyāḥ striyo medhyāśca sarvataḥ |
pitā prāha tadā śāstraṃ parityajya ca kalpitam || 74 ||
[Analyze grammar]

brāhmaṇāḥ sarvato medhyā gāvo medhyāśca sarvataḥ |
ājāścāpi kvacinmedhyā na medhyāśca striyaḥ kvacit || 75 ||
[Analyze grammar]

putryuvāca gṛhe cintāmaṇiḥ kalpadrumo gṛhe |
kuberaḥ kiṃkarastasya yasyā'sti kāminīgṛhe || 76 ||
[Analyze grammar]

pitovācā''padastasya duḥkhaṃ tasyā'khilaṃ gṛhe |
narako'styatra vai tasya yasyāsti kāminī gṛhe || 77 ||
[Analyze grammar]

putryuvācātra saukhyāni bhogasthānāni yāni ca |
dharmārthakāmajātāni tāni strībhyo bhavanti hi || 78 ||
[Analyze grammar]

pitovācā'tra duḥkhāni yāni pāpāni dehinām |
yāna kaṣṭāni gaṇyante strībhyastāni bhavanti hi || 79 ||
[Analyze grammar]

putryuvāca vivāhena dharmārthakāmamokṣakān |
vahnipradakṣiṇābhiśca nārī jñāpayati dhruvān || 80 ||
[Analyze grammar]

pitovāca vivāhena janmajanmāntarāṇi ca |
saṃsārabhramaṇānyeva nārī jñāpayati bhramaiḥ || 81 ||
[Analyze grammar]

putryuvāca satīṃ patnīṃ prāpya sarvārthasādhikām |
ke nāma naiva rajyante dehino jñānino'pi ca || 82 ||
[Analyze grammar]

pitovāca na rajyante virāgāścātmani sthitāḥ |
mūḍhāstāsu nipatanti jvālāyāṃ śalabhā iva || 83 ||
[Analyze grammar]

putryuvāca stanau śroṇyau jaghanaṃ mukhamaṇḍalam |
sevyante puṇyavadbhiśca tadanye bhāgyavañcitāḥ || 84 ||
[Analyze grammar]

pitovāca vināśasyonmukhā lekhā lalāṭajā |
yasyāsti tena sevyante tānyanye puṇyaśālinaḥ || 85 ||
[Analyze grammar]

putryuvāca striyāḥ sparśo darśanaṃ racanādayaḥ |
pariṣvaṃgaśca sukhadāḥ sarvathā śramanāśakāḥ || 86 ||
[Analyze grammar]

pitovāca striyāḥ sparśādayo miṣṭaviṣātmakāḥ |
saṃgādyā duḥkhadāḥ sṛṣṭau sādhvāśramavināśakāḥ || 87 ||
[Analyze grammar]

putryuvāca striyā duṣṭaḥ sukhī sukṛtī ko na vai |
spṛhaṇīyatamaḥ ko na strījano yasya vallabhaḥ || 88 ||
[Analyze grammar]

pitovāca striyā dṛṣṭo duḥkhabhāk pāpavānna kaḥ |
tiraskāryo bhavetko na strījano yasya vallabhaḥ || 89 ||
[Analyze grammar]

putryuvācāpi kīṭasya rocate strīsamāgamaḥ |
manuṣyasya ca devādeḥ kiṃ punarjñānino'pi ca || 90 ||
[Analyze grammar]

pitovācātipāpasyā'medhyasya rocate kṛmeḥ |
amedhyaṃ strīśarīraṃ kāmino nānyasya vai sataḥ || 91 ||
[Analyze grammar]

putryuvāca svayaṃ brahmā pāśaṃ nārīsvarūpakam |
kathaṃ vai janayāmāsa brahmā bhunakti yaṃ svayam || 92 ||
[Analyze grammar]

tvayā raṃbhā kathaṃ bhuktā pālitā'haṃ sutā katham |
anyalagnā kathaṃ śaptā yadi mūlyaṃ na gaṇyate || 93 ||
[Analyze grammar]

tvaṃ ca mātrā kathaṃ labdho jabālayā hi sevayā |
ṛṣīṇāmāśrameṣveva paśya mūlyaṃ striyāstadā || 94 ||
[Analyze grammar]

kasya putro'si pṛṣṭastvaṃ yājñavalkyena pāṭhane |
mātaraṃ pṛṣṭhavān tvaṃ ca tadā mūlyaṃ striyāstava || 95 ||
[Analyze grammar]

idānīṃ kva gataṃ tadvai jñānaṃ nārīpradarśitam |
mātṛputro'si samyak tat pitṛputro na vai hyasi || 96 ||
[Analyze grammar]

ajñātapitṛkā nārīṃ nindanti tvādṛśāḥ pitaḥ |
te sadā kālasūtre vai pacyante nindakāḥ striyāḥ || 97 ||
[Analyze grammar]

pitarau sarvadā pūjyāviti matvā mayā pitaḥ |
tvaṃ na śaptastathā'pyatra gāndharveṇa praśāpitaḥ || 98 ||
[Analyze grammar]

svakṛtyasya phalaṃ labdhaṃ tvayā cāpi mayāpi ca |
kanyā deyā yogyakāle yasmai kasmaicideva ha || 99 ||
[Analyze grammar]

daivayogādahaṃ prāptā gāndharvāya kṣatistu kā |
apsaraḥkanyakā cāhaṃ gāndharvaṃ samupāśritā || 100 ||
[Analyze grammar]

kā hāniste'tra sambandhe śāpe vā lābha eva kaḥ |
vinā vicāraṃ kṛtavān kruddhaśca jñānadurbalaḥ || 101 ||
[Analyze grammar]

kṣamasvā'dhikavāco me hyanuneyā'smi vai yataḥ |
ityuktvā sāśrunetreyaṃ praṇanāma ca pādayoḥ || 102 ||
[Analyze grammar]

pitā tu lajjito jātaḥ putryā jñānaṃ vilokya ca |
prāha dhanyataraṃ manye tvahamātmānamadya vai || 103 ||
[Analyze grammar]

yasya me tvaṃ sutā jātā īdṛkśāstravicakṣaṇā |
tasmānme kopa evādya śāntaḥ putri sukhā bhava || 104 ||
[Analyze grammar]

ityuktvā prayayau vipraḥ parṇaśālāṃ prati drutam |
putrī cakre tapastatra yoginīmadhyavartinī || 105 ||
[Analyze grammar]

atha kālāntare tuṣṭo nārāyaṇaḥ samāyayau |
divyarūpāṃ vidhāyaiva tāṃ nināya pramokṣaṇam || 106 ||
[Analyze grammar]

caturbhujā'bhavatsādhvī nārāyaṇapativratā |
citrāṃgado yayau svasya gāndharvalokagāśramam || 107 ||
[Analyze grammar]

jābālistapasā kṛṣṇanārāyaṇaṃ bhajaṃstataḥ |
śāpamukto'bhavat kṛṣṇanārāyaṇapratāpataḥ || 108 ||
[Analyze grammar]

yayau golokamutkṛṣṭaṃ dhāma kṛṣṇakṛpāvaśāt |
ātmaniveditā kiṃ kiṃ na karoti sudurlabham || 109 ||
[Analyze grammar]

akāṭyaṃ cāvināśyaṃ cā'pradhṛṣyaṃ śāśvataṃ ca yat |
parāvṛtya navaṃ kṛtvā samarpayati padgatam || 110 ||
[Analyze grammar]

api vajrasamaṃ bhāgyaṃ śaithilyaṃ nayati dhruvam |
kṛṣṇanārāyaṇabhaktirnavaṃ bhāgyaṃ karoti ca || 111 ||
[Analyze grammar]

etatte sarvamākhyātaṃ lakṣmi vāñcchāprapūrakam |
paṭhatāṃ śṛṇvatāṃ caiva tviha loke paratra ca || 112 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne jābālinā rambhādvārotpāditaputryāḥ phalavatyāścitrāṃgadagandharvakṛtabhoge pitṛśāpena nagnayoginītvaṃ piturapi samīpasthāyitvaṃ tatastapasāmuktiḥ saṃvādaśca padmaśilāyāṃ dvayorvāsaścetyādinirūpaṇanāmā tryadhikapañcaśatatamo'dhyāyaḥ || 503 ||
[Analyze grammar]