Chapter 502

śrīnārāyaṇa uvāca |
śṛṇu lakṣmi purā cāsīd hārītanāmako muniḥ |
vānaprasthāśramī tasya bhāryā pūrṇakalābhidhā || 1 ||
[Analyze grammar]

sādhvī pativratā rūpaudāryayauvanaśobhitā |
lakṣmīsamāṃ tāṃ dṛṣṭvā vai kāmadevo mumoha ca || 2 ||
[Analyze grammar]

snāntīṃ vivastrāṃ saṃpaśyan tyaktvā prītiṃ ratiṃ striyau |
vijanaṃ tatsthalaṃ matvā prasuptaḥ sa taṭe kṣaṇam || 3 ||
[Analyze grammar]

kautukaṃ pracakārā'sau niḥśvāsān niḥśvasan muhuḥ |
tiṣṭhan sandarśane tasyā rugṇo dīno yathā janaḥ || 4 ||
[Analyze grammar]

sāpi tathāvidhaṃ kaṃcidanāthaṃ bhikṣukaṃ śubham |
matvā pārśvaṃ yayau kiṃcid phalaṃ dātuṃ prabhojanam || 5 ||
[Analyze grammar]

tāvat kāmo yauvanastho vahnivacca prabhāsuraḥ |
kāmaprabhṛtanayanaḥ sarvāṃgasundaro dṛḍhaḥ || 6 ||
[Analyze grammar]

abhavat kṣaṇamātreṇa sānurāgaśca bhāvukaḥ |
pūrṇakalā tu taṃ dṛṣṭvā sānurāgaṃ tu nirjane || 7 ||
[Analyze grammar]

jambhābhagakṛtāyāsavepamānaśarīrakam |
drutaṃ tadbāṇanirbhinnā sābhilāṣā babhūva ha || 8 ||
[Analyze grammar]

pārśve sā niṣasādā'sya spṛṣṭvā vihasya vai muhuḥ |
hanyamānā viśeṣeṇa kāmabāṇaiḥ pativratā || 9 ||
[Analyze grammar]

bhūmiṃ lilekha cāṃgulyā paśyantī tanmukhāmbujam |
sāyaṃ samayaḥ sañjāto hārītastāmanāgatām || 10 ||
[Analyze grammar]

jñātvā'nveṣṭuṃ ciraṃ tatrā''yayau yatra tu sā satī |
tiṣṭhatyeva na saṃbhogaṃ labdhavatī ca tāvatā || 11 ||
[Analyze grammar]

hārītastāṃ satīṃ pativratāṃ dṛṣṭvā tu mohitām |
tāṃ vimohāṃ kārayantaṃ jalpantaṃ ca rajomayam || 12 ||
[Analyze grammar]

kāmasya hṛdgataṃ bhāvaṃ jñātvā kopāt samabravīt |
yasmāt pāpa tvayā patnī mamaivaṃ śarapīḍitā || 13 ||
[Analyze grammar]

anabhijñā tathā sādhvī svāmidharmaparāyaṇā |
pratāryate surūpaḥ san bhoktumicchati me priyām || 14 ||
[Analyze grammar]

kuṣṭhavyādhisamāyuktastasmād vipriyadarśanaḥ |
svakairdāraistathā mukto bhaviṣyasi na saṃśayaḥ || 15 ||
[Analyze grammar]

ityuktaḥ saḥ praṇipatyovāca hārītamuttaram |
mayā bhāryā tava dṛṣṭā mohamātreṇa vai mune || 16 ||
[Analyze grammar]

na ca bhuktā tathā naiva kuceṣṭāpi kṛtā'dhunā |
tasmānnāhaṃ śāpapātraṃ kṣamāṃ kuru kṛpānidhe || 17 ||
[Analyze grammar]

pāpaṃ tredhā mānasaṃ vācikaṃ karmajamityapi |
manastāpād vrajetpāpaṃ mānasaṃ tadgataṃ mama || 18 ||
[Analyze grammar]

vācikaṃ tu japenaiva yadvā stavanamātrataḥ |
tasya prasādanenaiva naśyati yatra tatkṛtam || 19 ||
[Analyze grammar]

prāyaścittairyathoktaiśca karmajaṃ pātakaṃ vrajet |
karmajaṃ na kṛtaṃ kṛtaṃ mānasaṃ vācikaṃ ca yat || 20 ||
[Analyze grammar]

bhavatprasādato naśyet prasanno bhava sarvathā |
hārītaḥ prāha taṃ kāmaṃ dehaprābalyayogataḥ || 21 ||
[Analyze grammar]

prathamaṃ manasā sarvaṃ cintyate tadanantaram |
tataḥ prajalpate vācā kriyate karmaṇā punaḥ || 22 ||
[Analyze grammar]

prathamaṃ hi manastasmāt sarvakṛtyeṣu doṣavat |
tasmātte nigrahaścātra mānaso'pi kṛto mayā || 23 ||
[Analyze grammar]

raverārādhanenaiva kuṣṭhaste vigamiṣyati |
iyaṃ bhāryā mama patnī bhūtvā khaṇḍaśilā kṣaṇam || 24 ||
[Analyze grammar]

sūryārādhanapuṇyena satī patnī bhaviṣyati |
ityuktvā ca yayau svasyā''śramaṃ hārītako muniḥ || 25 ||
[Analyze grammar]

pūrṇakalā śilā jātā kāmaḥ kuṣṭhī tato'bhavat |
nāganadyāstaṭe sūryaṃ dhyātvā''rādhanamācarat || 26 ||
[Analyze grammar]

māsānte ravirāgatya kāmakuṣṭhaṃ hyanāśayat |
śilāṃ spṛṣṭvā satīṃ patnīṃ kṛtvā pūrvaṃ yathāsthitām || 27 ||
[Analyze grammar]

dadau nārāyaṇamantraṃ yayau sūryo divaṃ prati |
kāmaḥ kāmasya bhavanaṃ satī hārītakagṛham || 28 ||
[Analyze grammar]

yayau patiṃ namaskṛtya vastutaḥ pāvanī tadā |
siṣeve bhāvataḥ sādhvī bheje nārāyaṇaṃ harim || 29 ||
[Analyze grammar]

oṃ namaḥ śrīkṛṣṇanārāyaṇāya pataye namaḥ |
jajāpa nityadā mantraṃ babhūva divyavaiṣṇavī || 30 ||
[Analyze grammar]

atha tasyāḥ sannidhau vai dīrghikānāmakanyakā |
samāgacchati nityaṃ vai sevanārthaṃ gṛhāntarāt || 31 ||
[Analyze grammar]

parṇaśālā ca sānnidhye vartate itibhāvataḥ |
nityaṃ pūrṇakalāpārśve tiṣṭhati catvare drume || 32 ||
[Analyze grammar]

vedikāyāṃ ca śālāyāṃ japati śrīharermanum |
oṃ namaḥ śrīkṛṣṇanārāyaṇāya pataye namaḥ || 33 ||
[Analyze grammar]

evaṃ jāpaprabhāveṇa divyadehā hi kanyakā |
vabhūva vyomacārā ca nirāvaraṇasiddhikā || 34 ||
[Analyze grammar]

vīraśāntasya ca ṛṣeḥ putrī sā dīrghikā hyabhūt |
atidīrghā pramāṇena janahāsyavivardhinī || 35 ||
[Analyze grammar]

na kaścid varayāmāsa dṛṣṭvā'tidīrghikāṃ tu tām |
atisaṃkṣiptakeśīṃ ca hyatidīrghāṃ ca vāmanām || 36 ||
[Analyze grammar]

udvāhayati yaḥ saḥ ṣaṇmāsāntare mṛtiṃ vrajet |
itikāraṇamālambya na gṛhṇāti janaśca tām || 37 ||
[Analyze grammar]

tato vairāgyamāpannā tapastepe sudāruṇam |
cāndrāyaṇāni kṛcchrāṇi tathā cīrṇānyanekaśaḥ || 38 ||
[Analyze grammar]

pārākāṇi yathoktāni tathā sāntapanāni ca |
evaṃ tasyā vratasthāyāstejo vṛddhiṃ gataṃ bahu || 39 ||
[Analyze grammar]

ākāśagāminī śaktirudbhūtā tapaso balāt |
tato mahendrasadasi yāti samutsavādiṣu || 40 ||
[Analyze grammar]

yadā devasabhātaḥ sā prayāti svagṛhaṃ tadā |
tadāsanā'bhyukṣaṇaṃ ca kurvantīndrasya kiṃkarāḥ || 41 ||
[Analyze grammar]

tathā dṛṣṭvā'bhyukṣaṇaṃ ca papraccha sā purandaram |
kaṃ doṣa vīkṣya me śakra prokṣyate tvāsanaṃ mama || 42 ||
[Analyze grammar]

indraḥ prāha sute te'sti śārīro doṣa eva ha |
tvaṃ kumāryapi saṃprāptā ṛtukālaṃ vigarhitam || 43 ||
[Analyze grammar]

avivāhaśca te'dyāpi tvaśuddhiṃ sā tvayi sthitā |
ṛtukāle patiyogaḥ śuddhikaro hi yoṣitām || 44 ||
[Analyze grammar]

tat tvaṃ varaya bhartāraṃ yena yāsyasi medhyatām |
tacchrutvā pṛthivīṃ gatvā catvareṣu trikeṣu ca || 45 ||
[Analyze grammar]

uddhṛtya dakṣiṇaṃ pāṇiṃ vakti varārthameva yat |
yadi kaścid dvijo jātyaḥ pāṇigrahaṃ karotu me || 46 ||
[Analyze grammar]

mama tapasaścārdhaṃ tu tasmai dadāmi sāmpratam |
jalpantī tāṃ janā hāsyaṃ cakrurnarma parasparam || 47 ||
[Analyze grammar]

ekaḥ kaścit kuṣṭharogī brāhmaṇaḥ prāha dīrghikām |
ahaṃ tvāmudvahiṣyāmi kṛtvā pāṇigrahaṃ tava || 48 ||
[Analyze grammar]

tatastasyāḥ kumāryāḥ sa pāṇiṃ jagrāha sā'pyatha |
patiṃ prāha vada me kāṃ sevāṃ karomi te pate || 49 ||
[Analyze grammar]

patiḥ prāhā'ṣṭaṣaṣṭitīrtheṣu gantuṃ mayeṣyate |
sahāyena tvadīyena yadi śaknoṣi tatkuru || 50 ||
[Analyze grammar]

aho bhāgyamiti matvā tatastūrṇaṃ pativratā |
kārayāmāsa sulabhaṃ vaṃśakuṭīrakaṃ śubham || 51 ||
[Analyze grammar]

mṛdutūlāsanayuktaṃ tataḥ prāha nijaṃ patim |
mama devā''roha maṃjuṣāsaneṃ'sagamūrdhani || 52 ||
[Analyze grammar]

nayāmi sarvatīrtheṣu kṣetreṣu ca śubheṣu ca |
tataḥ kuṣṭhī prahṛṣṭaśca niṣasāda kuṭīrake || 53 ||
[Analyze grammar]

sā tat svamastake kṛtvā sarvatīrthe yathāsukham |
sarvakṣetreṣu babhrāma snāpayantī nijaṃ patim || 54 ||
[Analyze grammar]

tīrthe snānāt satīyogāt patyuḥ kuṣṭho nivartate |
nityaṃ kuṣṭhasya saṃhrāso dṛśyate tejasā'dhikaḥ || 55 ||
[Analyze grammar]

evaṃ sā hāṭakeśasya kṣetraṃ prāptā niśāmukhe |
nāgavatyāstaṭe vṛkṣacchāyāmāśritya peṭikām || 56 ||
[Analyze grammar]

sthāpayitvā viśaśrāma patistasyā nadītaṭam |
prātarutthāya ca śanaiḥ snātuṃ māṇḍukyasaṃjñakaḥ || 57 ||
[Analyze grammar]

yaṣṭyā yāti sṛtau patrasamudāyaṃ vilaṃghya ca |
tāvat patreṣu ṛṣirāṭ māṇḍavyo nidrito'bhavat || 58 ||
[Analyze grammar]

māṇḍukyena padā yaṣṭyā spṛṣṭaḥ patrāntarasthitaḥ |
ajānatā gatermārge māṇḍavyo jāgṛto'bhavat || 59 ||
[Analyze grammar]

prāha ko'yaṃ mahāmūḍhaḥ padā yaṣṭyā ca māmiha |
tāḍayati mama nidrābhaṃgaṃ karoti pāpavān || 60 ||
[Analyze grammar]

sūryodayāt prāgeva te mṛtirbhavatu vai dhruvā |
māṇḍukyastaṃ tathā śrutvā nanāma vai muhurmuhuḥ || 61 ||
[Analyze grammar]

tathāpi toṣamevā'yaṃ nāpanno māṇḍavīsutaḥ |
māṇḍukyastvaritaḥ snātvā cāgatya vṛkṣasannidhau || 62 ||
[Analyze grammar]

patnīṃ prāha yathāvṛttaṃ kuru sevāṃ tathāntimām |
māṇḍavyaśāpataścāhaṃ mariṣye prāk raverdṛśeḥ || 63 ||
[Analyze grammar]

dīrghikā ca tadā prāha pātivratyaṃ tu me yadi |
tīrthayātrā ca vidhinā patisevā ca bhāvataḥ || 64 ||
[Analyze grammar]

sarvaṃ satyavrataṃ cenme sūryodayo'tra mā bhavet |
ityukto bhāskarā'śvānāṃ staṃbhanaṃ vyomamaṇḍale || 65 ||
[Analyze grammar]

babhūva sahasā tena nābhyudeti prabhākaraḥ |
rātrikālo mahāñjātaḥ sarve sūryodayaṃ vinā || 66 ||
[Analyze grammar]

babhūvuścātiduḥkhasthā ruddhā yajñādikāḥ kriyāḥ |
śrāddhā'dhyayanadānāni dharmakṛtyāni yāni ca || 67 ||
[Analyze grammar]

sūryādhārāṇi sarvāṇi ruddhāni ca viśeṣataḥ |
devāḥ svargaparāḥ sarve yajñabhāgavivarjitāḥ || 68 ||
[Analyze grammar]

jātāśca duḥkhitāḥ sarve yayuryatra divākaraḥ |
prāhurdeva kathaṃ naiva karoṣyudayanaṃ prabho || 69 ||
[Analyze grammar]

etat tvayā vinā sarvaṃ jagad vyākulatāṃ gatam |
sūryaḥ prāha bhayāt pativratāyā nodayo mama || 70 ||
[Analyze grammar]

tasmād gatvā surāḥ sarve tāṃ vadantu kṛte mama |
yena tadvākyamāsādya gamiṣyāmyudayaṃ sukham || 71 ||
[Analyze grammar]

anyathā māṃ śapet kruddhā nūnaṃ sā hi pativratā |
pātivratyena tapasā vartate sā sureśvarī || 72 ||
[Analyze grammar]

kastasyā vacanaṃ śaktaḥ kartuṃ caivamato'nyathā |
etasmātkāraṇād bhīto nodgacchāmi kathaṃcana || 73 ||
[Analyze grammar]

pativratātvamāpannā nārī vidanti tatphalam |
aśvamedhasahasreṇa yatphalaṃ jāyate hi tat || 74 ||
[Analyze grammar]

ityuttamatapoyogādbibhemi satyayoṣitaḥ |
tato devā drutaṃ yāntu yatrā'sti sā pativratā || 75 ||
[Analyze grammar]

atha devāḥ samāyātā dīrghikāṃ jagaduśca te |
tvayā pativrate sūryo yanniṣiddho divākaraḥ || 76 ||
[Analyze grammar]

śubhaṃ tanna kṛtaṃ bhadre kriyā naṣṭā raviśritāḥ |
tasmādudgacchatu prājñe tava vākyād divākaraḥ || 77 ||
[Analyze grammar]

yajñakriyā japo homaḥ pravartante yataḥ śubhe |
dīrghikā ca tadā prāha māṇḍavyena ca roṣataḥ || 78 ||
[Analyze grammar]

me patiḥ śapta evā'sti ravyudaye mṛto bhavet |
tato mayā niruddho'sti sūryo hyudayanaṃ prati || 79 ||
[Analyze grammar]

vinā kāntaṃ na me sūryodayenā'sti prayojanam |
śrāddhadānādikaiḥ kṛtyairanyairvā na prayojanam || 80 ||
[Analyze grammar]

atha te vibudhāḥ prāhurvicārya vinayānvitāḥ |
udgacchatu ravirbhadre tavā'yaṃ dayitaḥ patiḥ || 81 ||
[Analyze grammar]

kāyākalpaṃ samāsādya punarjīvatu tatkṣaṇam |
pañcaviṃśativarṣīyaṃ kāmadevamivā'param || 82 ||
[Analyze grammar]

tvaṃ ca drakṣyasi saṃbhūtvā kanyā pañcadaśābdikī |
evaṃ śreṣṭhaṃ sukhaṃ loke svecchayā sādhayiṣyasi || 83 ||
[Analyze grammar]

sūryodaye tava patyuḥ śarīraṃ nidhanaṃ gatam |
punaḥ sañjīvayiṣyāmo dehi sūryodayaṃ hi naḥ || 84 ||
[Analyze grammar]

ityuktā bāḍhamityaṃgīkṛtyovāca satī punaḥ |
yathā devāḥ pravadanti dampatyorvai navaṃ vayaḥ || 85 ||
[Analyze grammar]

kariṣyantyāvayostena satyenodaya bhāskara |
ityuktamātre prāk kāṣṭhā prabhātā cābhavad drutam || 86 ||
[Analyze grammar]

aruṇasya praveśaścā'dṛśyatā'ruṇaparvate |
tāvat sūryodayo jātaḥ saṃmṛto dīrghikāpatiḥ || 87 ||
[Analyze grammar]

vibudhānāṃ karaiḥ spṛṣṭaḥ punareva samutthitaḥ |
pañcaviṃśativarṣīyaḥ kāmarūpo'tisundaraḥ || 88 ||
[Analyze grammar]

dīrghikā'pyabhavatpañcadaśavarṣā'tisundarī |
divyā devīsamā devasparśena kamalāsamā || 89 ||
[Analyze grammar]

devāstāṃ sādaraṃ procuḥ sakāntāṃ vai pativratām |
varaṃ vṛṇu sati sādhvi nā'deyaṃ vidyate tava || 90 ||
[Analyze grammar]

sā covāca nadītīrthaṃ dīrghiketi jagattraye |
adyaprabhṛti loke vai khyātaṃ me nāmato bhavet || 91 ||
[Analyze grammar]

ante dhāma harermokṣasthala labheyamācyutam |
saha bhartreti tāṃ prāhustathā'stviti surā yayuḥ || 52 ||
[Analyze grammar]

tataḥ sā bahukālaṃ vai sukhaṃ prāpya pativratā |
uttare vayasi prāpte kāntaṃ vīkṣya mṛtaṃ satī || 93 ||
[Analyze grammar]

saha tena jagāmeyaṃ brahmalokaṃ pativratā |
evaṃ te lakṣmi cākhyātaṃ dīrghikāvratamuttamam || 94 ||
[Analyze grammar]

paṭhanācchravaṇāttathāvartanāt sevanādapi |
bhuktiṃ muktiṃ labhennārī naro'pi nātra saṃśayaḥ || 95 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne hārītapatnyāṃ pūrṇakalāyāṃ mohitakāmadevasya kuṣṭhitvaṃ pūrṇakalāyāḥ śilātvaṃ punaruddhāraḥ dīrghikāyāḥ patisevāpuṇyena sūryastambhanaṃ patisahitāyāstasyā navayauvanaṃ mokṣaścetyādinirūpaṇanāmā dvyadhikapañcaśatatamo'dhyāyaḥ || 502 ||
[Analyze grammar]