Chapter 504

śrīnārāyaṇa uvāca |
ādityā vasavo rudrā aśvinau devateśvarāḥ |
pūjanīyāḥ sadā lakṣmi yogakṣemakarā hi te || 1 ||
[Analyze grammar]

varuṇaśca tathā sūryo bhānuḥ pūṣā ca tāpanaḥ |
indraścaivā'ryamā caiva dhātā caiva bhagastathā || 2 ||
[Analyze grammar]

gabhastirdharmarājaśca ta ādityā daśa dvayam |
dharo dhruvaśca somaśca makhaścāpyanilo nalaḥ || 3 ||
[Analyze grammar]

pratyūṣaśca prabhāsaśca vasavo'ṣṭau hi nāmataḥ |
mṛgavyādhaśca śarvaśca mṛgīvyādhastṛtīyakaḥ || 4 ||
[Analyze grammar]

ajaikapādahirbudhnyaḥ pinākī ṣaṣṭha ityapi |
dahanaśca kapālī ca raivato navamastathā || 5 ||
[Analyze grammar]

vṛṣākapistryambakaśca rudrā ekādaśaiva te |
nāsatyaścāpi dasraśca dvāvetāvaśvinīsutau || 6 ||
[Analyze grammar]

trayastriṃśatsamākhyātā ete tu suranāyakāḥ |
dānavānāṃ ca devānāṃ mānavānāṃ ca dehinām || 7 ||
[Analyze grammar]

pūjanīyāḥ sadā tena nāpamṛtyuḥ prajāyate |
aṣṭamyāṃ ca caturdaśyāṃ rudrāḥ pūjyāḥ sadā priye || 8 ||
[Analyze grammar]

daśamyāṃ vasavaḥ pūjyāstatra śukle viśeṣataḥ |
saptamyāmatha ṣaṣṭyāṃ ca ādityānpūjayet tathā || 9 ||
[Analyze grammar]

aśviputrau tathā pūjyau dvādaśyāṃ ṣoḍaśādibhiḥ |
rudrāstuṣṭā rakṣaṇaṃ ca dadatyapi paraṃ padam || 10 ||
[Analyze grammar]

vilāsādīn dadatyeva svargaṃ tu vasavo'rcitāḥ |
ādityāḥ pūjitāstuṣṭā aiśvaryaṃ tvarpayanti vai || 11 ||
[Analyze grammar]

devavaidyau pūjitāvaśvinau nāśayato rujaḥ |
sarveṣāṃ ca surādīnāṃ guṇagānādilekhakaḥ || 12 ||
[Analyze grammar]

vyāsastu sarvadā pūjyo jñānamokṣaprado guruḥ |
yatputraḥ śukanāmā'pi śukyāṃ brahma babhūva ha || 13 ||
[Analyze grammar]

vedavyāsasya vai cāsīt kalatrārthaṃ matiḥ kvacit |
tato vicitravīryasya kṣetre putrān dhurandharān || 14 ||
[Analyze grammar]

satyavatyāḥ samādeśājjanayāmāsa sa prabhuḥ |
pāṇḍuṃ ca dhṛtarāṣṭraṃ ca viduraṃ ceti kauravān || 15 ||
[Analyze grammar]

vānaprasthe'pi santiṣṭhan cakāra vaṃśavistaram |
tataḥ sa cintayāmāsa bhāryāmadya karomyaham || 16 ||
[Analyze grammar]

tataḥ sa prārthayāmāsa jābāliṃ munipuṃgavam |
tasya kanyāṃ dvitīyāṃ tu ceṭikākhyāṃ śukīṃ śubhām || 17 ||
[Analyze grammar]

jābālistu dadau tasmai ceṭikāṃ svasutāṃ śubhām |
sāpi garbhavatī jātā garbho yāti bahirnahi || 18 ||
[Analyze grammar]

dvādaśābdā atikrāntā na niryāti bahiḥ khalu |
yatkiṃcicchṛṇute sarvaṃ garbhe garbhagataḥ sutaḥ || 19 ||
[Analyze grammar]

śukī sā garbhatejobhiḥ śuśubhe vedasūriva |
garbho'pi hṛdaye sarvaṃ dadhāra jñānacintanam || 20 ||
[Analyze grammar]

vedāḥ sāṃgāḥ śrutāstena garbhe'dhitā yathāśrutāḥ |
smṛtayaḥ saṃhitā mokṣaśāstrāṇi nītayastathā || 21 ||
[Analyze grammar]

brahmā'dhyayanamevā'pi tyākhyānānyātmavanti ca |
sarvaṃ garbhe śrutaṃ yadyadadhītaṃ yāvadeva tat || 22 ||
[Analyze grammar]

yathā yathā suto vṛddhiṃ yāti jaṭharamāśritaḥ |
mātā tathā tathā gurvī pīḍāṃ yāti tataḥ pitā || 23 ||
[Analyze grammar]

vyāsaḥ papraccha kastvaṃ vai praviṣṭo garbharūpadhṛk |
kathaṃ bahirna cā''yāsi vada sarvaṃ yathātatham || 24 ||
[Analyze grammar]

garbhaḥ prāha piśāco'haṃ rākṣaso'haṃ ca mānuṣaḥ |
suro'haṃ turagaścāhaṃ gajo'haṃ kukkuṭo'smi ca || 25 ||
[Analyze grammar]

chāgo'haṃ ca kumāro'haṃ vṛkṣo'haṃ bālako'smyaham |
caturaśītilakṣāsuyoniṣu vai bhraman muhuḥ || 26 ||
[Analyze grammar]

āgato'smi kathaṃ vedmi ko'haṃ te vacmi kaṃ ca mām |
mānuṣe jaṭhare cātra praviṣṭo'smi nirañjanaḥ || 27 ||
[Analyze grammar]

atra yogaṃ sādhayāmi prāpya jñānaṃ tu vedajam |
nirviṇṇo'smi mokṣamārgaṃ pratīkṣāmi ca śāśvatam || 28 ||
[Analyze grammar]

na vai ghore'tra saṃsāre bhramaṇaṃ me prarocate |
na yāsyāmi bahirgarbhādatraiva brahmacintanam || 29 ||
[Analyze grammar]

kariṣye'tha gamiṣyāmi mokṣaṃ tava kṛpāvaśāt |
vyāsaḥ prāha śṛṇu cātman nirañjanasya te suta || 30 ||
[Analyze grammar]

yonikuṇḍe'tidurgandhe vastuṃ prītiḥ kathaṃ vada |
niṣkrāmasva tato vidvan garhitāt mūtrakuṇḍakāt || 31 ||
[Analyze grammar]

bahirāgatya yogaṃ vā jñānaṃ cārjaya śobhanam |
garbhaḥ prāha navaṃ jñānaṃ navo yogaśca neṣyate || 32 ||
[Analyze grammar]

tāvajjñānaṃ ca vairāgyaṃ pūrvajātismṛtistathā |
yāvadgarbhasthitirme'sti mokṣecchā tāvadeva ha || 33 ||
[Analyze grammar]

jantuśced garbhaniṣkrāntaḥ spṛśyate bāhyavāyunā |
sarvaṃ garbhagataṃ jñānaṃ yogo bhānaṃ vinaśyati || 34 ||
[Analyze grammar]

tasmānnāhaṃ kṛtahānerniṣkramiṣye kathañcana |
garbhādeva prayāsyāmi mokṣamityasti niścayaḥ || 35 ||
[Analyze grammar]

vyāsaḥ prāha na te cātman vāyupāśo bhaviṣyati |
jñānaṃ yogaśca te sarvaṃ yathārthaṃ sthāsyati dhruvam || 36 ||
[Analyze grammar]

māyā te bādhate naiva garbhe vā bahireva vā |
tasmād darśaya me vaktraṃ cānṛṇyaṃ saṃvṛjāmyaham || 37 ||
[Analyze grammar]

pitaraśca sutṛptāḥ syustava janmaśravād drutam |
garbhaḥ prāha yadi tvaṃ me viṣṇuṃ sākṣiṇaṃ rakṣaya || 38 ||
[Analyze grammar]

tadā bahirniḥsarāmi tatra yogyaṃ kuru drutam |
vyāsaḥ sasmara tacchrutvā kṛṣṇanārāyaṇaṃ prabhum || 39 ||
[Analyze grammar]

kṛṣṇanārāyaṇo devastatra kṣipraṃ samāyayau |
sākṣī tatrā'bhavat prāha śṛṇu garbha hitāvaham || 40 ||
[Analyze grammar]

pratibhūste bhavāmyadya sarvaṃ jñānādikaṃ tava |
sthāsyatyeva bahiryāhi gaccha yogārthameva ca || 41 ||
[Analyze grammar]

māyā me vāyusaṃsparśakṛtā vyāptā na te bhavet |
atha garbho viniṣkrāntaḥ kṛṣṇanārāyaṇecchayā || 42 ||
[Analyze grammar]

dvādaśābdapramāṇastu yauvanasya samīpagaḥ |
jātamātro jātismaro yogirāḍiva cetanaḥ || 43 ||
[Analyze grammar]

kṛṣṇaṃ jananīṃ janakaṃ praṇamyaiva ca tatkṣaṇāt |
vanaṃ sa prasthito bālo vyāsastiṣṭhetyuvāca tam || 44 ||
[Analyze grammar]

saṃskārān jātakarmādīn te karomi sthiro bhava |
ceṭikāyāḥ sutaḥ prāha saṃskārāḥ pratijanmani || 45 ||
[Analyze grammar]

sahasraśaḥ koṭiśaśca jātā me bhavasāgare |
yairahaṃ bandhanarūpaiḥ parikṣipto'smi yoniṣu || 46 ||
[Analyze grammar]

atha vyāsaḥ śukaṃ nāma dadhāra bhagavān svayam |
śuko gantuṃ padanyāsāṃścakre vyāsa uvāca tam || 47 ||
[Analyze grammar]

pitaraṃ taṃ parityajya yogārthaṃ yo vanaṃ vrajet |
sa yāti narakaṃ putra mā vraja tvaṃ gṛhe vasa || 48 ||
[Analyze grammar]

śukaḥ prāha yathā'haṃ te sutastathā gate bhave |
tvaṃ cāsīrme sutaścāhaṃ pitā te tatra śāsanam || 49 ||
[Analyze grammar]

tvayā pālyaṃ mama vyāsa yadyeṣā dharmasaṃsthitiḥ |
nāhaṃ niṣedhanīyastu vrajamānastapovanam || 50 ||
[Analyze grammar]

vyāsaḥ prāha janiṃ labdhvā puṇyaprāpyāṃ dvijagṛhe |
saṃskārān yaśca gṛhṇāti vedoktān sa viśiṣyate || 51 ||
[Analyze grammar]

śukaḥ prāha ca saṃskārādātmamukti्rna niścitā |
saṃskārāccedbhavenmuktistādṛgdhūrtasya sā bhavet || 52 ||
[Analyze grammar]

vyāsaḥ prāha bhavetpūrvaṃ brahmacārī tato gṛhī |
atha tyāgaṃ puraskṛtya tato muktirbhavet suta || 53 ||
[Analyze grammar]

śukaḥ prāha brahmacaryānmokṣaścet ṣaṇḍha āpnuyāt |
gārhasthyena ca mokṣaścejjagatsarvaṃ tamāpnuyāt || 54 ||
[Analyze grammar]

vane vāsād yadi mokṣo mṛgādīnāṃ sa vai bhavet |
tyāgāccenmuktirutkṛṣṭā daridrāṇāṃ ca sā bhavet || 55 ||
[Analyze grammar]

vyāsaḥ prāha gṛhasthādikrameṇa satpathāśrayaḥ |
ihā'mutrānandadātā tena mokṣaḥ phalātmakaḥ || 56 ||
[Analyze grammar]

śukaḥ prāha gṛhaiḥ sakto moharāgavaśaṃgataḥ |
vāsanābandhabaddhaśca yamamārgaṃ phalaṃ labhet || 57 ||
[Analyze grammar]

vyāsaḥ prāha vinā rāgaṃ paitryaṃ daivaṃ prasādhayet |
śukaḥ prāha vinā bhaktiṃ paitryaṃ daivaṃ pratārayet || 58 ||
[Analyze grammar]

vyāsaḥ prāha gṛhe bhaktiṃ paitryaṃ daivaṃ sadā kuru |
śukaḥ prāha nijātmā me gṛhaṃ tatra karomyaham || 19 ||
[Analyze grammar]

vyāsaḥ prāha vinā putraṃ puṃnāmanarako dhruvaḥ |
putreṇa tasya taraṇaṃ tasmātputraḥ praśasyate || 60 ||
[Analyze grammar]

śukaḥ prāha tathaiva cet kharavānarasūkarāḥ |
putravantastariṣyanti ko viśeṣo'tra mānuṣe || 61 ||
[Analyze grammar]

vyāsaḥ prāha yadi jñānaṃ teṣāmapi ca mokṣaṇam |
śukaḥ prāha pitastadvai garbhādevā'rjitaṃ mayā || 62 ||
[Analyze grammar]

gamiṣyāmi samāyātaṃ mokṣaṃ bhaktyā ca keśavam |
prāptaṃ cintāmaṇiṃ tyaktvā kaṃkaraṃ kathamāvahet || 63 ||
[Analyze grammar]

prāggrāse'mṛtamutsṛjya makṣikāṃ vai kathaṃ graset |
prāpte svarṇarase cāgre kardamaṃ mardayet katham || 64 ||
[Analyze grammar]

sūryasya darśanaṃ tyaktvā rāhuṃ kathaṃ vilokayet |
divyadīpaṃ parityajya dhūmrolkāṃ kathamarjayet || 65 ||
[Analyze grammar]

ekakārāgāramuktau dvitīye vai kathaṃ patet |
brahmamārge cāvagate kṣudrasṛtyā kathaṃ saret || 66 ||
[Analyze grammar]

śreṣṭhaṃ copasthitaṃ tyaktvā kaniṣṭhaṃ nāvalambayet |
satyaṃ prāptaṃ parityajya kṛtrimaṃ cāśliṣet katham || 67 ||
[Analyze grammar]

akke cenmadhuvindeta kimarthaṃ parvataṃ vrajet |
iṣṭasyā'rthasya saṃsiddhau ko vidvān yatnamācaret || 68 ||
[Analyze grammar]

ityuktvā pitaraṃ kṛṣṇadvaipāyanaṃ hṛdi sthitam |
mātaraṃ ceṭikāṃ kṛṣṇaśaktiṃ praṇamya sādaram || 69 ||
[Analyze grammar]

yayau vanaṃ sadā'vanaṃ yatrātmanā bhavatyapi |
vyāsaḥ śokaṃ ceṭikā ca duḥkhaṃ jagāma vai kṣaṇam || 70 ||
[Analyze grammar]

śukī vyāsaṃ tataḥ prāha cariṣyāmi tapaḥ punaḥ |
putrārthaṃ yena vaṃśasya vardhako me bhavet sutaḥ || 71 ||
[Analyze grammar]

vyāsājñāṃ sā samāsādya tapastepe pativratā |
oṃ namaḥ śrīkṛṣṇanārāyaṇāya pataye namaḥ || 72 ||
[Analyze grammar]

iti mantraṃ dadau vyāso jajāpa sā divāniśam |
kṛṣṇanārāyaṇastatra tvāyayau hṛṣṭamānasaḥ || 73 ||
[Analyze grammar]

varado'smīti tāṃ prāha varaṃ varaya suvrate |
śukī prāha sutaṃ dehi mama vaṃśavivardhanam || 74 ||
[Analyze grammar]

tathā'stviti hariḥ prāha yayāvadarśanaṃ tataḥ |
ceṭikā susutaṃ lebhe kapiñjalamiti śrutam || 75 ||
[Analyze grammar]

kapiñjalo mahāyogī pitroścaiva samājñayā |
gārhasthyaṃ svīcakārā'sau bharadvājīṃ sukanyakām || 76 ||
[Analyze grammar]

pariṇeme tato bhāradvājaḥ putro babhūva ha |
bharadvājasya taittiraḥ kāmarūpadharaḥ sutaḥ || 77 ||
[Analyze grammar]

saca prāgjyotiṣadeśe yayau parvatabhūstare |
tataḥ punaḥ samāgatya navalakṣābhidhe'cale || 78 ||
[Analyze grammar]

nivāsaṃ svīcakārā'sau kāmākṣīṃ cā'bhajat satīm |
kāmarūpo mahāyogī parvatīyo maheśvaraḥ || 79 ||
[Analyze grammar]

parvatīyaprajānāṃ vai guruḥ rājā tapobalāt |
abhavat tena girayaḥ kāmarūpābhidhāstataḥ || 80 ||
[Analyze grammar]

abhavaṃśca narāḥ svalpā nāryo bahvyaḥ satīcchayā |
bhajanti smaikapuruṣaṃ śataṃ śataṃ hi yoṣitām || 81 ||
[Analyze grammar]

atha bālavayogīndro brahmaputrātaṭe vasan |
tapaścacāra kaṭhinaṃ bālavanmohavarjitaḥ || 82 ||
[Analyze grammar]

te tāḥ samprārthayāmāsurnarāṇāṃ vṛddhaye tataḥ |
sarvāḥ putraprasavābhimukhyo bhavantu madvarāt || 83 ||
[Analyze grammar]

yādṛksaṃkhyāḥ kanyakānāṃ narāṇāṃ santu tāḥ samāḥ |
sāmyottaraṃ sāmyabhāve kanyākumāramātaraḥ || 84 ||
[Analyze grammar]

bhaviṣyatha yathāyogyā iti tāśca tathā'bhavan |
evaṃ te kathitaṃ lakṣmi purāvṛttaṃ yuge yuge || 85 ||
[Analyze grammar]

navaṃ navaṃ punaḥ sañjāyate nirmāṇavad bhave |
kāmarūpaṃ tathā tīrthaṃ bālavākuṇḍakaṃ tathā || 86 ||
[Analyze grammar]

bhuktimuktipradaṃ śreṣṭhaṃ paṭhanācchravaṇādapi |
yatheṣṭadāyakaṃ mantrasiddhipradaṃ hi vidyate || 87 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne |
kṛṣṇadvaipāyanavyāsasya śukyāṃ śukakapiñjalau sutau kapiñjalasya bharadvājastasya taittiraḥ sutaḥ bālavayogivaradānāt kāmarūpadeśe narāṇāṃ nārīsamasaṃkhyākotpattirityādinirūpaṇanāmā caturadhikapañcaśatatamo'dhyāyaḥ || 504 ||
[Analyze grammar]